#جوليت وأسرها....

البارت السابع

البارت السابع
رواية...جولييت وأسرها...غياهب الإنتقام
بقلمي ..نور سمو العراق

💔💔💔💔💔💔💔💔💔💔💔

سجاني ها انا مقيدةٍ بالأصفاد ..
لا الذنب ذنبي .. بت اسيرةٍ الالم...
سهماً أستقر بأضلعي.. مزق نياط قلبي ..
يا مجرم انتهك حرمة قلبي..ياثورة الأفكار ..
يا عازف بالألم لحنٍ .. ياراحتي التي تتعبني ..
صفعتني فشعرت بك خيالاً كاذباً..
رغم مذلتي وزماني .. سأجعلك تغرق بقلبي..
بقلم سمسمة..smsma89

...............................

ركضت برعب واحس المسافع بيني وبينه قليله والارض احسها تهتز من قوووته وضربه للارض بحوافرة الحاااااده...

المنطقه جانت زراعية والاشجار بيها كثيفه والمزارع زاااهيه وأكثرها ناس فلح ومزارعييين

ضليت اصررخ بصوووت عالي واني استنجد بالعالم والخووف سيطر علئ كل جسمي ...

طلعو الفلاحين من مزارعهم وضلو يركضون وراها واني التفت عليهم وارجع اركض واصرخ...

وصبرية تركض وره الثور وتصييح...الزموو الزموو هاج علينه الزموو...

جان كاطع الحبل وضال مربوط برگبته حاولو يلزمو بس ما كدرو...

وكل شخص كدامه يصير يرفسه ويرجع يركض العالم انرعبت منه...

نزلت اركض بنص البستان وهو يركض ويدوس علئ العشب الكثيف ويدمره بحوافر رجلية...

ما اعرف شنو الصار بالضبط يمكن لان ركضت هو هجم عليه وصار يرفس شكو واحد كداامه

من عبرت للبستان عثرت بس لزمت بالغصن مالت شجرة الرمان وحاولت اتماسك واني اصرخ وابجي

تقرب مني اكثر وهو يضرب الارض برجله وصبرية لازمته من الحبل الي مشنوق برگبته  وتجر بيه

عاطت بيه بغضب...كوووومي ولج لا يموتج

دا اكوووم وهو فلت من صبريه وهجم عليه

حطيت ايدي علئ راسي واني اتشاهد ...ياااربي ارحمني ياااربي فدووة ما اريد اموت غريبه وما مصفية حسابي

لميت روحي واستسلمت للموت او اي ضربه منه واكيد تهشم عظامي

محد كدر يتقرب منه لان هاايج ومتخبل

غمضت عيوووني وما حسسيت غير بصوت طلق ناري وبضررربه قوويه علئ الارض

صرخت واني اغمض عيوووني بصدمه ما حسيت بشئ بس هدووء ولحظات صمت

فتحت عيوني ببطئ شديد شفت الثور واكع علئ الارض وينازع باخر انفاسه والدم مثل خزان مثقووب يتطافر من بطنه ...

ثوبي تبلل من دمه ..

لمعت عيوني بدموع هسيتريه باوعت شفت واحد واكف لابس بنطرون اسوود وقميص جوزي ولازم مسدس بيده جان موجهه علئ الثور

ركضت صبريه وهي تحضن الثور وتلطم علئ،صدرها...يمممه ثوووري يمممه الثور مااات ليش كتلته ليش...

جان ينازع بروحه تقرب منه الشاب ورجع وجهه مسدسه عليه واطلق رصاصه جانت بمثابة رصاصة رحمة حتئ تخلصه من نزاع الموت والعذاب الي صار وياه

فزيت من صوت الرصاصه ..

استقرت الرصاصه بين عيووونة وانتهت مرحلة الألم لهذا الثور المتهور...

وكفت صبرية بقهر وهي تضرب بالشاب...ولك داوود ولك كووا...شلون تموت الثور

رد عليها بخبث ممزوج بغرور...احسن ما يكتل الوادم نخسر ثور ولا نخسر بني ادم

رجعت ضربته علئ صدره ...انت شعليك ثور ابن الثور والله تطلع ثوري من عيونك منو طلب منك تكتله اليوم اني اگاومك وخلي ابووك يجي يفصل

ضحك وهو يحط مسدسه باحزام بنطرونه ...شسالفه عمه تحجين صدك يعني عندج الثور احسن من البنيه

صرخت بوجهه...اي احسن والله لا انت ابن اخووي ولا اعرفك اذا ما تخسر فلوس الثور

رجع باوعلي وابتسم ببتسامه مثل ابتسامة شبح كال...اي هاي منو الحلوه اول مره اشوفها ههه شنو ضامتها علينه عمتي هاي عود انتي عمتي ليش ضامتها مني ليش

لزمته من قميصه ودفعتها وبغضب...انجب زمال مالك شغل بيها ولا تضل تفيك لا وروح امي اطلع قهر الثور بيك

وكفت واني احس بنهر من دم اسفل رجليه من دم الثور

والرجفه بعدها باديه وكل جسمي يرجف احس الخوف يتراقص بشراييني ...ويقصف بروحي

مسحت دموعي باسئ واني لازمه بطني والعالم اجتمعت كلها

وهذا داوود يباوعلي بنظرات حاااده وقذرة

وبعدها صارت عركه بينه وبين صبريه وضلت تتهدد عليه وصيح وهي تطلب الثور منه

وهو ابد ما اهتم الها ويضحك عليها

باوعتلهم بقهر كالت...ما يصير ابيعه لحم

جاوبها واحد من الفلاحيين...لا ميصير حرام لان ميت ومقتول والشرع حرم اكله اذا تبيعينه تتحملين حرام

لازم ناخذه وندفنه وان شاء الله الله يعوضج

هي مددت رجليها وضلت تصرخ...انهبتي يصبريه وين انطي وجهي ثووري مااات راح حلالي راح تعب السنين والله شتريته بماي عيوني

اشو هايه شويه وهجمت عليه ...كله من وراج ليش ركضتي كدامه انتي خبلتي

رجعت بخطوات خايفه تجدد عندي الالم والرهبه همست من بين دموعي.  والله خاله من شفته خفت هو اصلا من البدايه جان يركض وعيونه حمر

صرخت بوجهي...لا تجذبيين وين اكو ثور عيوونه حمر

كعدت كعده وحضنته وهي تبجي وهو فاتح عيونه ومسلم الروووح

حطت شيلتها علئ حلكها وهي تنعي...يا من تعب يامن شگه يا من علئ الحاظر لگه...

رااح الزين ضلت بس الغمان ...اتعب واسهر واعلف وتاليها تموت من  وره جكليت و داوود والله اليوم العب لعب...

انقهرت عليها لان خطيه تبجي حييل وتدعي علئ ابو اللول ودكول...شماتي مو شمات شماتي شمات بالكبر ويكولون حي عدل ما مات.  خلي يفرح ابو اللول هو وحسنه

كعدت حطيت ايدي علئ جتفها اواسها هي دفعت ايدي بغضب...وخررري مني الططوه الچاسووحه كله من وراج مات الثور انتي السبب،

والله اليوم اخابر جابر اخلي يجي ياخذج ويخلصني،منج انوب اكثر وشرب واشتري ملابس واجيب وفوكاها دكول الثور عيونه حمر موتته

هذا الحلو ابو عيون كحيلة شلون دكولين عيونه حمر وتذبين تهمه عليه ...

امشي ولي من وجهي ولي لا وروح امي اذبحج وراها خليني بضيمي

باوعت للناس بفشله وتركتها ورحت والالم يعصر بطني وقلبي

مشيت خطوات راجعه للبيت حسيت بحركه ورأيه درت وجهي شفته نفسه الي كتل الثور بدم بارد

مشيت بخطوات اسرع واني هاربه من نظراته

لكن استوقفني صوته بعد ما اطلق كلمة اتعدت الحدود الحمرة

فتحت عيوني مرعوبه ومصدومه من كلمته اني جاسر زوجي وابد ما ينطق هيج كلام وياي حتئ اثناء العلاقه الزوجيه

سكوتي عن السفية جواب تركته ومشيت رجع كال...شدعوة هلكد حلوووه بس مبينه من مشيتج حااامل اووويلي هنياله ال... 

وين زوجج عنج شكد حيوان اني منه اخليج بجام واضل صافن عليج لا والله احطج بحضني واقفله عليج...

ارتعاب خووف الم ذل احساس بالظلم كلها تجمعت مثل لدغة الافعئ انتشر سمه بكل جسمي

واحد تافهه تعده حدوده ويه رب العالمين...قبل لا يتعداهن ويايه

وصلت للبيت ارجف وابجي طلعت الموبايل اتصلت بجابر كلبي ابد ما متطمن...

دزلي رساله كتب...لا تخابرين اني عند بيت عمي

داهمني الخووف والخجل كتبت....يمك هوو

جاوبني بسرعه...اي كاعد بصفه

قفلت الموبايل وحطيت اديه علئ وجهي وبجيت بعنف ...ياربي هاي هم تعتبر خيانه معقوله اكون خاينه تالي،عمري زوجي كاعد واني اراسل بابن عمه لا ياربي ليش اني بالذات وصلت لها مرحلة فدوة ربي ارحمني احساس بالذل معبني وضميري موتني...

يارب مو تعرفني اني ما متعلمه علئ الطلعه ولا متخرجه وما اعرف بالعالم لو ترجعني الامي لو ترجعني اله بس كون مياذيني ولا يياذي طفلي...

هو يحب بنته حييل مستحيل يتقبلني واخويه قتل اهله وبنته مستحيل ...

اتذكرت مره جعفر خلاها تروح للسوبر ماركت كلها جيبلي جكاير افير

راحت واجت جايبه بيض كلها...جعفر كتلج جكاير افير جايبتلي بيض شنو

ردت بطفوله ...ما ادري انت كتلي فير واني طلبت من ابو السوبر ماركت وانطاني

ضحك ..ياربي جايبتلي بيض روحي رجعي كليله جكاير افير

ابتسمت وردت مرح...ايي هسه اروح

دخل جاسر كال وهو عاقد حواجبه...وين تريد توديها

هو جعفر يخاف من اخوانه وابو بس مو بيده جكاير وحبوب وخمر عشقه هل شغلات ...

اخذ البيض من ايدها بتوتر ...هاااا اي مشتهي بيض وراحت غزوله جابتلي

شال غزل بغضب وعيون حاده باوع لجعفر بتهجم...هااي اخر مره تدز غزوله تشتريلك شئ شنو ما عندك رجلين تودي غزل تشتريلك

وبعدين انت شنو توديها لو ضاربتها سياره واحد يخطفها عبالك اخليك عايش لا بالقران ادفنك وراها

ضحك جعفر...عمي كفينه شرك انت وبنتك واني اروح اكلي البيض احسلي

هي باسته بخده بمرح...لا بابا لا تحجي علئ،عمو جعفر احببه هو حباب

همس...اني هم احبه بس احبج اكثر

جنت دائما اباوع عليهم مبتسمه واحبها من دكووله بابا اتذكر ابويه حبيبي الغالي

جنت حيل احب خوفه علئ بنته واهتمامه بيها و بدراستها ناطي البنته شخصية كووولش،حلوة

بحيث الطفله احسها ثاقه من نفسها وحتئ متكلمه بس للاسف جان يكول عندي هدف لغزل وان شاء الله احققه للاسف ما كدر يسوي شئ لان اخذها الاقوئ منه ومني ...

هو جان اخوانه ما يرحمهم اذا طلبو منها شغلها او ضوجوها وهمه اخوانه من نفس دمه ومن نفس الرحم

شلون يرحم اخووويه ويرحمني اكيد العقاب فضيع ومفجع اكيد يعيشنه بعاصفه هوجاء تخترق كل ايامنه الزاهية...

رحت للحمام سبحت وبدلت وغسلت ملابسي ما اعرف شنو الغايه من الطفل الي نايم بارتباك بين احشائي معقووله دوه لجروحنا وجبر لخواطرنه المكسورة

لو هو رحلة عذاب يقودها الكاسر ضدي

لمست بطني بانين مكسور.. مستحيل اتنازل عن ابني مستحييل هذا رحمه من ربي وقطعه منه مستحيل ياخذه مني ويبتزني بي...

شوويه واجت صبريه تلطم وتصيح وتغلط وبكل سالفه حطت ابو اللول وحسنه وسبتهم

بعدها كالت...ربي اني دعيت علئ حسنه وابو اللول تموت الثور مالتي ليييش،فوگ حگه دگه ليش ربي ليش

مجاوبتها ولا نطقت بأي كلمه والثور مالتها اخذو بالشفل ودفنو لان اكو ناس دنيئة نفس ياخذو يبيعون لحمه وهو حرام اكل لحم الحيوان الميت

بدليل من نص قراني...{حُرِّمَتْ عَلَيْكُمُ الْمَيْتَةُ وَالْدَّمُ وَلَحْمُ الخنزير.

وحديث للرسول...النبي صلى الله عليه وسلم قال: ما أنهر الدم وذكر اسم الله عليه فكل ـ وقال: إذا أرسلت كلبك وذكرت اسم الله عليه فكل ـ لكن إن كانت حية حياةً مستقرة تزيد على حركة المذبوح وجب عليك أن تذبحها وتسمي الله عند ذبحها، فإن لم تفعل وماتت صارت حراماً عليك. انتهى.

الغلط صار من داوود ما خلاهم ذبحوها قبل الموت وذكروا اسم الله عليها والتذكيه للاسف

بالعكس من شافه ينازع رجع ضربه مره ثانيه طلقه ...لذلك تحرم اكله وما استفادو من لحمه..

طلعت وهي لسه تغلط وتسب واني احس نار اشتعلت بصدري ...

مشطت شعري وضفرته ونمت علئ فراشي حضنت نفسي بتعب مشتاقه الاهلي مشتاقه الحياتي القديمه احس روحي تنازع وتريد تتحرر من بين ضلوعي ياريت امووت واخلص...

وارجع استغفر ربي واذكر نفسي الجزع حرااام

جاسر اذا لكاني شيسوي بيه ؟

............................

جابر...

الكل جان كاعد بالديوان وشيوخ عشيرة اهل جولييت موجودين

والكل يطلب عطوه ويحجي بامور العشاير

جنت كاعد بصف جاسر الي الكل احتار وياه وهو يراوغهم بالكلام ويطالب فقط بالقصاص...

طلبو منه ان ما يتعرض الباقي افراد العشيره ولا افراد عمومة عاصم...

المطلوب عاصم واهله خلي ياخذ ثاره منهم بس لا يظلم باقي افراد العشيره بسبب فرد واحد منها...

التخلي عن عاصم هو جان سيد الموقف لان هو ما قبل بفصل ولا قبل ينطي عطوه

الشئ الوحيد الي راده هو تسليم عاصم بكل هدوء وبدون اي مناقشات ...

واحد من شيوخ عشيرة اهل جولييت دك صدره بعزم...احنه لو نعرف عاصم ويين نسلمه الك بكل دم بارد او نسلمه للمركز لان هذا مجرم بس احنه ما نعرف وينهم واحنه طلبنه بس تاخذ قصاصك من القاتل الاصلي

وما نريد نرجع الايام الجاهلية من يقتلون شخص ياخذون الاحسن منه بذنب غيرة

وان شاء الله انت رجال ونعم منك تعرف الله وتعرف احكامه واصوله اذا تريد تقتص اقتص من القاتل الحقيقي...

وعمي اذا عفيت عن الجاني اجرك عند ربك عظيم...

رد بخبث وثقة...ما ادور اجر اني الجاني لازم يتعاقب واني وراه لو يضل يوم بعمري ولحد يدافع اله رجاءا

بسببكم وبسبب وكفتكم دوم ويه الباطل صار القتل بفلس صار منو يجي ولزم سلاح وشد ظهره بعشيرته وشيوخه

كونوا علئ حق لمره وحده بحياتكم وانصفوني ...

قتل مع سبق الاصرار والترصد ...اذا فلاح اله ذنب بلي صار يمكن اكدر اعفي عن عاصم في سبيل اكو سبب

بس بنتي طفله شنو ذنبها تتعاقب .تروح هدر بسبب تهور عاصم الكلب

ابويه شنو ذنبه لحد الان اذكر كلمته وهو يكوله يااابه السلاح خطر لا تكتلنه خلينه نتفاهم

مغرور وطايش وهاد بسلاحه كتل تلاثه بدم بااارد

الكل يرجع البيته ويمارس حياته طبيعيه اذا انتم او بيت عمهم بس عاصم وعائلته اني كتالهم وحقي اخذه من بين عيونهم

واحد من الشيخ رد عليه...براحتك بويه وكفو منك ما خلطت الزين بالشين بس النه حرمه عندك وهي اخت عاصم

زفر بفحيح غاضب...حرمتي هي حرمتي انتم شكوو

رد واحد من الشيوخ وهو يسبح بسبحته. يكولون بنيتنا مهزومه خايفه منك ومحد يعرف بأي ارض هي

اطلق بنظره نظرات مثل سيف مسموم بثاره فتح عيونه مصدوم وكف بكل قوووه ...انت شدكوووول شنوو حرمتي انهزمت

جانت كلمة شيخ عشيرتها مثل سهم غدار استقر بقلب جاسر من كال...حرمتك هي حرمتك ومن انهزمت خايفه منك وتحمي روحها منك وهي عرضك صارت بصمة عار عليك مو علينه

اشتعل دهليز الكره عنده دك علئ صدره بغضب...حرمتي ما خلت وصمة عار عليه حرمتي بالحفظ والصوون والوصل الكم جذاب ومنافق

النهاية للكل والبداية للزلمه...انتم هاي نهايتكم وتدكدرون تتفضلون

واني ان شاء الله من اليوم بدايتي بدت...

ضل ابوي يحجي وياهم وصارت مشادات بالكلام وهو احس ثواني وينفجر بيهم...

اتصل موبايلي شفتها جولييت غلقته ورسلت رساله الها وحذفت الرساله وحظرتها خايف يصير شئ الها خايف عليها اكثر ما خايف علئ نفسي...

الديوان شبه فااارغ ...

باوعلي بعيون من نااااار كال...اوووف جولييت فتحتي عليج ابواب جهنم من كل جانب كله بسببي اني السبب بلي صار اني الي رخيت الها الحبل اني الغبي الي ما قفلت عليها وحبستها عبالي فقيرة طلعت ادبسز ويين تروح وييين

ااااخ لو الزمها اله احرگها بدييه اله اكطعها وصل واشمرها للضباع ..

عض اصبعه بجزع...اني هل عار تكون بصمة عار علئ جبيني والله اذا ما كصبتها للكلاب الكلبه بنت الكلب

صوجي اني والله كله من ايدي بس هييين اذا ما خليتج مداس للكل ما اطلع جاسر...

اردف بقهر...اوووف شام مقهور عليج اكثر من نفسي لو جنتي موجوده كل هذا ما صار ولا عرفت هاي الحيوانه الكلبه...

حاولت اهدئ او احجي وياه بس هو جان متعصب...

خفت من كلامه حييل جنت رايد احجي لابوي عنها بس تراجعت لان اعرف ابوي يرجعها اله وتبدي وياه رحلة اليمة من العذاب...

محتار ...الله لا يحير عبده بس حيرتي حيره

وساعي بكل جهدي اشوف اهلها ويين لازم اسلمها لاهلها حتئ اطلع من خطيتها وارتاح لان تورطت ورطه بس الله يعرف بيها....

يااارب انت اعلم بحالها ساعدها...وكون بعونها

......................

ريهام ...

ضلت وقار عدنه كم يوم خطيه منحرجه هووايه ...

واحنه ممقصرين الله شاهد كوولشي دنسوي الها وبابا متخبل عليها كل شويه واجه وكلها هاا عمي وقورة شمحتاجه اني بخدمتج

هي طبعا تستحي تطلب...

شفت اهتمام خالتي قليل بيها بس رضيه واخوانها يخابرون عليها ويسألون بس امها لا

يمكن خطيه المره تعبانه وما الها واهس ...اللهم لا تجعلها غيبه....

نضفت البيت دا اسووي عشا اني ووقار ...

اندك الباب شفت امي وبابا ديصلون يمكن جابر هذا

خليت ورحت كلت منوو مجاوب

اتقربت اكثر همست بخفوت...منوو

جاوبني بنفس الخفووت...انيي

انصدمت...هذا شبي يقلدني

همست..هسه اصيح الك بابا

كال...اني صلاح شبيج

حسيت بانتعاش بروحي لثواني وبعدها تداركت نفسي واني استغفر ...واستعيذ بالله من الشيطان الرجيم...

فتحت الباب ببتسامه خجوله بس ما باوعتله ..هلا بيك تفضل

دخل رفعت عيوني لكن سرعان ما نزلتهن ..بس شفت نظرته بيها لهفه ...

كال ببتسامه...هلا بيج شلونج

مشيت بخطوات اسرع وخايفه. الحمد لله زينه تفضل تفضل بابا يصلي جوه

جر نفس طووويل وتنهد اني من تنهيدتة المجروحه درت وجهي عليه همست بخوف...شبيك

باوعلي ورجع زفر بقهر ...ليش من تشوفيني تنهزمين انتي تكرهيني ليش اشوفج تضوجين مني

هزيت راسي بنفي...لا اني ما اكرهك اني احب الكل مستحيل اكره شخص بس اني هاي شخصيتي ما احب اوكع بالحرام

صدمني بكلمته من كال.  ادري وشنو قابل متقرب منج اني لوو...

صحت بوجهه..اششش استغفر الله ياربي حرام عليك ادخل جوه ادخل وروح استغفر لذنبك

ضحك كال...ليش شمسوي

تنهدت بضيق..اني انييي ادخل عفيه صلاح اني ما احب احجي ويه الولد

ضحك ...ريي يوفقج ويحفظج شكد احب طهارتج

عفته ودخلت جوه واني ارجف من كلامه غسلت وجهي اكثر من مره يالله ميصير هيج احس دا ابالغ بس مو بيدي مو بيدي تعمقت حييل بالديين ومجاي اعرف اتصرف ...

دا احس اي كلمة احجيها حرام وما اعرف امشي امور حياتي

شلون باجر اتزوج واعيش بقرب زوجي شلون اتقبل قربه

لا انوب جعفر مستحيل ما اريده ...

اني من خوفي من ربي مدا اكدر اعترف النفسي ودا احارب الشيطان واحارب نفسي وما متقبله وناكره للمشاعر الي صارت عندي تجاه صلاح...

وقار من سمعت اجه اخوها راحت اله وهو حضنها وباسها بخدها وبعدها باسها براسها ...

ضل كاعد وهو حاضنها ويحجي وياها جان حنين عليها مثل حنيتة جابر

جنت اباوع الهم من الشباك ابتسمت ربي يسعدهم ان شاء الله...

وطردت فكرة صلاح ما اريد مشاعر وياه حرام اصلا كوولش،حرام هو ابن عمي ويمكن ابويه يزوجني الجعفر بعد ما اعرف شنو ظام اليه الزمن...

..........................

جولييت ...

بعد مرور ايام...

روحي بجحيم نارك مثل الحمامة كسرت جناحاتها واجبرتها تدفن نفسها بنفسها..

طعنتك  وطعنتني جرحتك وجرحتني...ما اريد توجني ملكة علئ عرش قلبك يا شيطان

هذا هو خلص اعتقني أتركني رجعووني الامي والله احن الحضنها مثل طفل يتيم وامه تركته باليلة ضلمه

كرهت روحي،بوجودكم ما اريد شئ بس اريد انام مرتاحه انام واني ما عندي قلق من باجر

ليش عيوني تترقبكم بخووف ودوم غايره بالدمووع

أتألم وما اكدر انطق الصمت قناع اتخذته حتئ اجاري حياتي

الم الكتمان عذبني احس نفسي مشلوله وعاجزه عن فعل اي شئ متغربه وحيده مرميه بدهاليز مظلمه

حامل ومجروحه ومكسوره واهلي مو وياي ومطلوبه الهم كلها اجتمعت عليه

راااح انفجر والله.  ويينج يمممه ويينج متتت گلبي ينزف والله ينزف...

وهذا جابر خلاني يم هاي صبريه الخبله وراح من مات الثور مالتها لحد الان وهي محاربتني

عبالك اني كتلته بس تحجي عليه وتغلط تعبت منها واني منا نفسيتي زفت علئ،ساعه اتعارك وياها

عود هي مثل امي...لا مستحييل امي مثل اية ان مع العسر يسرا...

من اشوفها تتيسر اموري كلها....

اذكرتها قبل لا اتزوج ورجعت بذاكرتي الايامي الحلوة وياها...

رجعت بذاكرتي قبل لا اتزوج وجنت تحت حمايتها امي..

جنت دا انضف بالبيت رغم محفر وتعبان بس مرتبينه والحمد لله

رفعت البجامه سويتها برموده جانت بيضه وبيها نقط وردي وتشيرت لنص الفخذ وردي وشعري ضافرته واني امسح بالماسحه واغني ...طب وليه يعني ايه  دموعي حبيبي تهون عليك ..لو كان كلام ياويلي منو لو كان دعشق بتوب عنو لو نصيب اعيش فكراح اعيش فكراح. 

دخلت امي وهي تمشي بهمه ومبتسمه باوعتلها ابتسمت وهي،ضحكت بفرح بوجهي ونزعت عباتها خلتها علئ المحجر

كعدت علئ الدرج كالت ...جولييت تعاي،يمه انزعي جوريبي ضهري موتني احس شايلة كونية تمن فوك ضهري

كعدت قريب من رجليها ونزعت جواريبها ورحت غسلتهن وشريتهن

فتحت علاكتها وطلعت منها باكيت صاحت بضحكه..جولي يممه تعاي يمي شوويه

اجت كعدت بصفها واني اباوع للعلاكه مستغربه

فتحت الباكيت وطلعت منه موبايل والفرحه مستبشرة علئ ملامحها التعبانه

طلعت موبايل منه نوعية گلگسي توو

حطت ايدها علئ،خدي بدفئ غامر ومتناغم ويه احساسها الحلو باوعتلي بفرح ممزوج بحزن..يمه جوولي جبتلج هديه مو طلعتي ناجحه هذا موبايل جبته من رسول ابن ام قاسم بالقسط شوفي حلو ؟

باوعت للموبايل مصدومه وفرحانه ممصدكه صار عندي موبايل

باوعتلي،بخوف..هااا يومه جوجو ما عجبج اغيره

حضنتها بفرح...لا يجنننن يجننن اليوم اخبر كل صديقاتي صار عندي موبايل وهماتين اخابر هاله اكيد تفرح

ضحكت فرحانه ...خووش يمه بس بعد امج ما اريد مشاكل ما اريد تتقشمرين وهااا لا تطلعين اغاني وتسمعين

عقدت حواجبي بضيق...عاد بس كم اغنية شريفه اسمعهن بس من انضف حتئ يصير عندي حماس

جرت نفس...جوولي ليش تخليني اتندم...يمه اني احبج والله من اسمع يكولون بنت القزمه تجنن وحلوة شكد افرح رغم يعايروني بشكلي وبحدبتي بس افرح لان بنيتي حبابه وحليوة ولكل يشهد الها...

حضنتها واني اضحك...اي صدك هاله دكول خالتي حيل تحبج بحيث من تصير مناسبه وتركصين تضل بس صافنه وتباوعلج فرحانه بيج وتضحك

حزنت من كلامها جريت نفس...يرحون فدوه الطولج يمممه غير اشوفج احلئ وحده بالكووون

اردفت بانذباح...يمه جولي من اول يوم انولدت بي لحد ما صرت طفله واني البنات يضحكن عليه ويقلدن ويتنمرن عليه جانن حتئ ما يلعبني وياهن يكولن انتي مو حلوه

جنت اضوج واحزن بداخلي وانذبح بسيوف كلامهن بس اصبر بنفسي

ومن كبرت وصرت شابه اخواتي تزوجن وصديقاتي واني ضليت محد دك بابي جانت امي ماكله همي ودكول اخاف اموت وبهية تضل وحدها ومحد الها وماكو الي يرحمها

جنت اتمنئ،اتزوج يصير عندي طفل اعيش مثل الناس ابني للمستقبل لحد ما اجه ابوج وخطبني صدك هو هم معوق بس حبيته وما قصر وياي

وجبتج انتي واخوانج...

وصدك اني مو حلوه بس والله يا يمه اشوف روحي،بيج واتباهه بيج واشوف روحي حلوه بجمالج وعيونج الملونة..

حسيت كلامها سجاجين تضربني لعد امي،شكد مظلومه من طفولتها لحد الان

بست ايدها بحب...فديتج يمممه انت غير جنه اصلا انتي حووريه هنيالي لو كل الناس مثلج

اكو امهات صاحيات وهنه مقصرات ويه الكل ويه عوائلهن وازواجهن وانت دومج تعبانه بس حتئ ترضينه

ضحك وباستني...يالله يمه جولي اخذيلي صور اني وياج سفي مو شيسمونه يالله يالله

ضحكت وفتحت الكاميرا اخذنه كم صوره وهي حيل فرحانه و دكول.... خوش والله طالعات حلوات

رجعت الواقعي واني مرتجيه علئ الشجره لزمت بطني،بووجع...اوووف يمه وينج والله كل يوم قبل لا انام اعاتبج شلون نامت عينج وخليتي الوحدي اصارع ويه الوحوش...

صرت راعية بقر وازرع واحصد وصبرية كل شويه وعاركتني واني مدا اتحمل ابببببد متت منها متتت.

اجت صبريه تهف رابطه عبايتها علئ خصرها ولابسه نعالها ابو الصبغ وثوبها ازرك مشجر باخضر..

كالت...كووومي جكليت كوومي احلبي البقر باجر اروح من غبشه ابيع الحليب والروبه...

عضيت شفايفي بقهر والم....فدوة خاله مو دا اكولج اخاف من الحيوانات اني بحياتي مشايفه بقره مو انوب اجي احلبها اخاف ترفسني وتموتني اني وطفلي وبعدين اني،من ركض وراي الثور ومات واني صارت عندي خوفه كوولشي يتخيل اليه...

تعكرت ملامحها واحتدت كالت....كله من وراج مات الثور والله كلبي،ينزف علي دم لو ميت ابو اللول ولا ثوري علئ الاقل هذا بي فايده بي جم مليون اله ذاك السگط شبي

واردفت بغضب...انتي ليش من شفتي. ركضتي انتي من ركضتي خبلتي الثور عباله راح تكتلينه وبعدين ليش تجذبين ودكولين عيونه حمر وين اكو ثور عيونه حمر چلب هو چلب

احس شئ بداخلي يصرخ ما متحملتها صبرت روحي كلتلها. والله من الخوف هو شفته احمر مو بس عيونه

فتحت عبايتها وشمرتها وطلعت جكايرها تشرب بحرگة.. خطية الثور بركبتج من شافج ما شاف خير صار شكد عايش ويانه بس اجيتي مات

جاوبتها بضعف وصعوبه...ان شاء الله خاله بس هل شهر واروح منج وهاي اني هيج حظي مدري شبي منو التجئ اله يتاذه بسببي...

عافتني وراحت كعدت علئ البلوكه وهي تحلب بالبقره وتخلي بالسطل كالت بقهر...نصيبنه لازم گواني ملاح ويجر بالعواني انطه الكحا...وما انطاني

اردفت بحزن..اي والله انطه للكح.  واني نساني امده حضي انوب وين العووبه تلفي عليه الثور،مات ومن القهر حتئ حلكي طكطك

ترست السطل حليب ودا تشيله والبقره ما اعرف شنو الي استفزها رفست السطل بحافرها من وره وتبده الحليب علئ العشب

من شافت الحليب تبده جن جنونها لطمت علئ خدها.  صخام الصخمني الحليبات راحت

ضربت البقره بجف ايدها الخشن والبقره عاطت بصوت عالي ضلت تغلط وتصيح

حظي مصخم امده حظي الله ما راضي عليه لان ملفية العوجه والعووبه وين الفكر تلفي عليه

كلتلها بحزن..خاله تقصديني  ؟

تخصرت بقهر..همزين تعرفين نفسج الثور مات من وراج وهسه تبده الحليب يعني فكرررر

جريت نفس بقهر....والله تستاهلين يتزوج عليج ابو اللول

اني ما كلت الها هييج تخبلت صارت مثل الثور المرحوم ضلت تنطح وتزاكط

وتغلط وتسب وصيح عليه وبعدها لزمتني من جتفي كالت...هو اني اريدها من الله اريد اطردج يالفكر يالله امشي ولي ما اريد اشووف وجهج يالله خلي جويبر منين ما جابج ياخذج...

لزمتها بتوسل..فدوه خاله العفو مو قصدي انتي صار شكد تغلطين عليه محجيت والله ما كتلج شئ

صرخت بوجهي...لج حيوانه دكليلي حل وياج تزوج عليج ابو اللول والله ما اخليج عندي لو الثور يرجع من الموت

دفعتني بغضب...امشي ولي

راحت تركض البيتا شويه واجت تركض واني ابجي جايبه علاكه بيها ملابسي شمرتها عليه

كالت...يالله ولي ما اريدج انتي ما عندج كرامه ولييي
الثور مات من وراج كتله داوود من وراج

اخذت الملابس بكم هائل من الدموع ودرت وجهي واني ابجي والدموع تتطاير من جفوني اريد اصررخ اريد الطم تعبت حييل انذليت

صرخت بصوت مسموع وهمست من بين اسناني.. ياكلب يا حيوان جاسر الله لا يوفقك شسويت بيه ضلمتني يا ظالم يا شيطان والله ارجع واخش بعيونك

واريدك تحجي ...ياااربي هو ثور مات صبرية شوفتني نجوم اليل بعز الضهر مو جاسر ماتو اهله من وره اخووويه ..

كعدت علئ الطريق والدموع شلال مالح ينزل من عيوني ...جابر ويينك بس انت تساعدني مالي غيرك بعد ربي ...

طلعت الموبايل واني ابجي اتصل اكثر من مره مجاوب

رجعت اتصل فتح خط كال بجبروت وقساوه.  الووو

فتحت عيوني مصدومه...مستحييل هذا صوته

نهاية البارت ...يتبع

كونوا انتم كونوا بخير...احبكم 💔

نور سمو العراق 😘

اعذروني اذا اتاخر بس عندي تقارير ومدا الحك 😥

والفائزة هي صاحبة التعليق هذا وطبعا البارت هديه الها 👇👇👇👇

لا تنسو التصويت والمشاركة 🌹