_ بتحبيه
_ اكدب لو قولت بحبه واكدب لو قولت ميهمنيش
_ ايه جو اخاصمك اه اسيبك لا دا
_ ضحكت وردت عليا
عارفه لما تحسي نفسك بتبسمي ابتسامه هبله مش عارفه تدريها كل ما تشوفيه او تسمعيه اوقلبك يتخض لما تسمعي كلمه حلو عارفه احساس انك متلغبطه ومش فاهمه حاجه مش عارفه يا حسناء بس هو احساس حلو وجديد اول مره احسه
_ اممم وايه كمان يا ست امال كل دا ومش عارفه بتحبيه او لا دانتي ناقص تاخديه بالحضن
_ اصلك مسمعتيهوش وهو بيقولي امال بصوته كدا عميق وتقيل بيقول الكلمه بتخلي قلبي يقع من مكانه
_ بت انتي اتلمي لاعدلك بصي قومي روحي انا مش طايقاكي اصلا
_ الاخ حسونه بيغير عليا
_ قومي يا امال امشي بدل ما ارميكي في البحر ولا تلحقي تتخطبي ولا تتجوزي
_ طب مش جايه
_ شوييه وهاجي وراكي
_ طيب اروح اكلم زوجي المستقبلي بقا علي ما تيجي
_ زقتها غوري يا به
_ امال مشيت وفضلت مكاني افكر في حاجات كتير
انا في اكتر فتره في حياتي متلخبطه مش فاهمه نفسي ولا اللي حوليا احداث كتيره بتحصل مش لاحقه اجاريها خلصت كليتي في القاهره وسبت ماما وبابا وجيت اعد عند خالتو في اسكندريه بحجه الشغل
امال هتتخطب بس مش من اللي حبته
امال كانت بتحب حد تاني فضلت تحبه سنتين ودلوقتي بتتخطب لواحد تاني منكرش ان ابراهيم خطيبها احسن كتير من اللي كانت بتحبه كان بيقسي عليها ويبسبها ايام زعلانه عمري ما حبيت ادخل بعلاقتها بيه بس كنت بسال نفسي ازاي كانت بتهون عليه عارف انها زعلانه وسايبها بحجه انه بيربيها مثلا علشان مدلعتش زياده وكانت كل مره حتي لو مش غلطانه بتروح تكلمه وتصالحه كل دا كان بيحصل قدامي
الحب بيضعف وبيخلينا نتساهل في حاجات كتير انا عارفه دا كويس
بس امال طيبه لدرجه السذاجه هو كان عارف كدا وبيستغل انه حافظها كويس فبيقسي عليها
الغريبه انها كانت مع كل دا شايفاها بتحبه غريبه اوي العلاقات في الحب مفيش حكايه شبه التانيه مع ان اللي رابطهم حاجه واحده
لما ابراهيم اتقدملها عملنا انا وهيا حفلة عياط بس لما فكرت شويه قررت تقارن بينهم بس علشان تقارن بعدل كان لازم تدي فرصه لابراهيم هو كمان تتعرف عليه والحقيقه ان طلع الطف مما تصورنا متفهم شخصيتها بيحتويها بحنيه وبيحاول يقوي شخصيتها ومش بيستغل طيبتها باين عليه جدا انه بيحبها
بيحاول يعمل كل حاجه تسعدها هي الست ممكن تحتاج ايه غير كدا فرحانه علشانها كدا بس مضايقه جدا جدا جدا بدا يخدها مني بيكلمها كتير فمباتش تعد ترغي معايا زي الاول انا معنديش صحاب غيرها امال مش بس بنت خالتي وصاحبتي كمان
الظاهر اني لازم اتعود الفتره اللي جايه اني ارجع لوحدي
اتنهدت تنهيده طويله وبصيت للبحر
_ ايه التنهيده الطويله دي
_ زين انت جيت امته
_ من زمان بس الظاهر انك سرحانه اعده لوحدك ليه فين امال
_ ضحكت بسخريه وبصتله الله يهني سعيد بسعيده ياعم عروسه بقا وهتتخطب مش هنبقا قاطعين ارزاق
_ سكت وانا كمان سكت
وبعدين اتكلم من غير ما يبصلي
_ خايفه
_ بصلته بسرعه هخاف من ايه
_ بص في عيني وبعدين بص قدامه تاني واتكلم المقال الاخير بتاعتك بتقول كدا
_ ايه رايك فيه
_(تعوّد أن تخيط جروحك من الداخل .. بنفسك .. لا أحد يعرف حقيقة وجعك .. وشدّته .. كما تعرفها أنت .. أي يدٍ أُخرى تلمس جروحك .. ستوجعها )
اممم اعتقد ان كلامك مش صح مينفعش تحكمي من غير تجربه انتي بتخافي من العلاقات علشان خايفه من البعد
بتخافي من العربيات علشان خايفه تموتي في حادثه عربيه
بتحبي البحر وخايفه تنزليه لتغرقي
انتي عايشه ليه يابنتي متقرفيناش
_ ضحكت
زين ابن خالتي اخو امال مديري في الشغل كمان او هو اصلا اللي عرض اشتغل معاه بيقول انه بيحب طريقتي في الكتابه فطلب مني يبقا ليا عمود اسبوعي في المجله بتاعته اكتب فيه
ممكن منكونش انا وهو صحاب بس خلينا اقول ان بحب اخد رايه في كل حاجه ومعرفش ليه
_ هو لازم كل اللي بكتبه يبقا بيعبر عني
_ رد عليا ببروده المعتاد
لا يصرخ القلم الا اذا فقد صاحبه القدره علي التحدث
_ اتنهد تاني وسالته
_ هي الحياه ممله وكئيبه ولا انا بس الا شايفاها كدا يازين
_ انتي مش شايفه الحياه اصلا يا حسناء انتي واقفه بعيد تتفرجي علي كل اللي حواليكي
تقدري تقوليلي انتي بتعملي ايه غير شغلك وانك تعدي هنا قدام البحر اللي اصلا عمرك ما فكرتي تنزليه
_ كان بيتكلم وهو بيبص في عنيا غصب عني سرحت في عنيه مش عارفه اوصفها بس كل اللي اقدر اقوله اني عندي استعداد افضل سنين معملش حاجه غير اني ابص في عنيه فيها راحه اكتر من راحتي في اعدتي علي البحر
_ يابنتي بكلمك ردي عليا
_ ها ...ااه جيت علشان بحب اسكندريه
_ بصلي بغيظ طب قومي ياله نروح الوقت اتاخر
رجعنا البيت كانت امال بتكلم ابراهيم بصينا لبعض انا وهو وضحكنا زين كان عارف انها كانت بتحب حد قبل كدا شخصية زين غريبه اوي معرفش مين ممكن يبقا عارف ان اخته بتحب حد تاني ويبقا بالهدوء دا والاغرب ان لما ابراهيم اتقدملها اخدت رايها برضو كتير ببقا عايزه اتكلم معاه في الموضوع دا ومجتليش فرصه او كنت بخاف ومعرفش من ايه
_ انا داخل انام ابراهيم صاحبي وانا عارف انه مش هيخلص النهارده تصبحي علي خير
_ وانت من اهله
_ دخل اوضته وسابني امل فضلت تررغي بعدها يجي نص ساعه وبعدين قفلت
_ بتجيبي الكلام منين للوقت دا كله
_ ضحكت وردت علي هو والله اللي بيفتح مواضيع مش انا
_ فاكره لما كنا صغيرين لما كنتي بتقولي عايزاه اسمه ابراهيم علشان كل شويه تقوليله عايزه ورد يابراهيم
_ ضحكت وكملت وانتي كنت عايزاه اسمه ادهم علشان تقوليله عند امه يا ادهم
فضلنا نرغي شويه ونعمل ماسكات وبقينا كيكه علشان نبقا منورين في الخطوبه علي راي امال
نمنا وصحينا تاني يوم الضهر صلينا
احنا نازلين يا خالتو
_ زين كان جاي من البلكونه رايحين فين داحنا لسه الضهر
_ ضحكت وغمزتله علي امال
_ صح صح يدوب يلحقو يشطبوكي يا امال
_ فضلو يجرو ورا بعض ويضحكو وانا ببص عليهم من بعيد شكلهم حلو علاقتهم ببعض بتخليني كل ما ابص عليهم ابتسم زين بروده وشخصيته حاجه وعلاقته بامه واخته حاجه تانيه راجل بكل ما تحمله الكلمه من معني
_ نزلنا وهو نزل معانا علشان رايح هو وابراهيم يجيبو البدل او حاجات كدا مركزتش فيها
فضلنا كتير في البيوتي سنتر شعر وبشره ومناكير ودلع الحقيقه كنت مبسوطه وانا شايفه امال بتبسم بسرحان كنت عارفه انها سرحانه فيه او في كلمه قالهلها هي تستاهل كل الخير والحب اللي في الدنيا
امال لبست فستان نبتي وانا لبست فستان اوڤ وايت وحقيقي كنا قمرات اوي يعني
_ صدقي يابت يا امال انتي خسراه فيه
_ ضحكت احنا خسراه في اي حد اصلا يا اوختشي ما تيجي نهررب
_ مخلصتش الكلمه ولقينا ابراهيم داخل
_ت ايه يا اختي
_ انتي عارفه انا استنيت اليوم دا اد ايه
_ امال حبت تتوه فين الورد يابراهيم
_ طلع بوكيه ورد من وراه ضهره باس ايديها ودهولها طلعت وسبتهم انا كنت بشوف في الفديوهات علي النت انهم بيقولولهم كلمتين كدا بتخلي خدودهم تحمر فخرجت علشان يعرف يتكلم
_ قولت اطلع استناهم عند العربيه ويارتني ما طلعت
_ زين
كان واقف ساند علي العربيه لابس بدله زرقه وقميص ابيض زي لون قلبه اول مره في حياتي اددق في ملامحه كراجل او مره اصلا ابص في ملامح راجل اصلا بس هو زين احلي من اي راجل ممكن اشوفه في حياتي كنت واقفه قدامه فضل بيبصلي وساكت وبعدين مد ايده اول مره زين يسلم عليا بس غصب عني حاجه كمان شدني امد ايدي ليه
_ ست الحسن
_ ابتسمت حسناء اسم مش صفه فيا يازين
_ مش بيقولو لكل من اسمه نصيب وانتي واخده تفاصيل اسمك بالملي
ابتسمت وبصيت في الارض خدت بالي اني ايدي لسه حاضنه ايده ساعتها بس سالت نفسي ازاي ممكن نص امان العالم في ايده
امال وابراهيم جم فرجعت خطوه لورا
وهو راح لامال كانت زي القمر ملاك جاي من روايه باس ايديها ودماغها فهي دمعت وحضتنته
ساعات كتيره اوي بغير من امال علشان هي عندها زين وانا لا
اخ واب وصاحب شال مسؤليه امه واخته في سن صغير قادر يحتويهم ساعات كتير ببقا نفسي اساله هو شال الحمل دا كله لوحده ازاي وقادر يكمل هو اخ يفتخر بيه حقيقي كنت اتمني لو كان عندي راجل في حياته يشبهله
ركبنا وروحنا القاعه كل حاجه كانت حلوه بابا وماما جم علشان يحضرو الخطوبه امال فرحانه وابراهيم بيعمل كل حاجه يفرحها بيها كانو بيرقصو سلو وامل خدودها كل شويه تحمر وتبتسم
انا كالعاده بقف في ركن بعيد اتفرج علي كل حاجه حوليا افتكرت كلمة زين مره قالهالي"" كل الكتاب مرضي تفاصيل وانتي يا حسناء اكتر واحده بتثبت دا بتغرقي وتوهي وانتي بتتفرجي علي تفاصيل حيات الناس حواليكي وناسيه نفسك""
معرفش ليه كنت بدور بعيني علي زين بس ملقتوش
وبعدين بابا شاورلي خدني وطلعنا بره القاعه قالي اني بعد الخطوبه هروح معاهم علشان مينفعش اعد معاهم علطول وفي وجود زين في البيت قالي قراره ومشي وسابني وانا دموعي نزلت انا مش عايزه ارجع القاهره انا هربانه من كل حاجه هناك مشاكل بابا وماما اللي مبتخلصش والبني ادم الوحيد اللي حبيته ويوم ما كنت راحه اعترفله بمشاعري لقيته خلاص كان بيحب واحده تانيه انا مش عايزه ارجع انا كنت بدات انسا انا بحب اسكندريه بحب خالتو وعايزه افضل مع امال وزين
_ زين انا لازم ادور علي زين رنيت عليه وطلبت منه يجيلي بره القاعه كنت بعيط لحد ما قربت اتخنق من كتر العياط
_ اتخض من شكلي فكان بيتكلم بقلق
_ ايه مالك يا حسناء مين زعلك ايه اللي حصل
مكنتش قادره اتكلم من العياط كنت شايفاه قدامي محتار ومش عارف يعمل ايه
مسك ايدي
_ اهدي بس علشان خاطري وقوليلي ايه اللي زعلك كدا
_ كنت بتكلم وصوتي بيقطع بابا..عايزني ..اروح معاه ..بعد الخطوبه ..
_ بصلي بصدمه ليه طيب ماهو عارف ان شغلك هنا اهدي يا حسناء بالله عليكي وفهميني علشان اقدر اساعدك
_ مسحت دموعي بيقولي مينفعش افضل اعده معاكم وامل كام شهر وهتتجوز
_ ابتسم وبعدين ضحك
_ حسيت بحد ضربني علي قلبي هو بيضحك علشان همشي هو كان مدايق من وجودي معقول اكون تقلت عليهم وانا مش واخده بالي عنده حق هو هيشيل مسؤليه ايه ولا ايه مشيت من قدامه بسرعه نده عليا مره واحده ومردتش دخلت القاعه وانا مقرره انه خلاص همشي معاهم بعد الخطوبه ما تخلص فقررت استغل الوقت واقضي اطول فتره مع امال
روحت وقفت جمبها وفضلنا نضحك ونتصور وزميلنا في الشغل جم للحظه دورت بعنيا علي زين بس ملقتوش فمهتمتش وانا مالي انا
بصيت علي بابا علشان اقوله هجيب حاجات من شقه خالتو قبل ما نمشي وبرضو ملقتوش
فجأه لقيت الانوار اطفت
_ امال
_ هو فيه ايه يا ابراهيم
_ حسناء ابراهيم راح فين وزين
_ معرفش استني هنزل اشوفهم
كنت لسه نازله ولقيت الانوار اتفتحت تاني وفي ترابيزه اتحطت في نص القاعه وبابا اعد وزين وابراهيم و.....مأذون!!!!!!!
_ رجعت تاني اعدت جمب امال بزهول
_ هو فيه ياامال
_ مش عارفه
_ كل حاجه خلصت قبل مانا حتي الحق استوعب
اتكتب كتاب امال وابراهيم
وانا ..وزين!!!!!
وبابا جه باس دماغي ونزل وبعدين زين جه جمبي لبسني دبله باس ايدي وفضل ماسكها الناس جايه تباركلي وانا كل ده مش مستوعبه حاجه
_ امال قرصتني
_ فشهقت وعنيا دمعت امال اللي حصل دا مش حقيقي صح
لقيتها بتبسم
_ انتي مبسوطه
_ انا اكتشفت اني بحب ابراهيم وكدا احسن علشان ميبقاش في ضوابط خطوبه ولا قوانين بقا جوزي
_ عنيا دمعت طب وانا
انا اه مش عايزه اسيب هنا بس كمان مش عايزه ارتبط ...ارتبط ايه انا اتجوزت من غير حتي ما اقول راي
فضلت باقي الحفله ساكته متكلمتش وزين كمان كان واقف مع صحابه الحفله خلصت اول ما دخلنا البيت قفلت باب اوضتي وترميت علي السرير اعيط
متاكده ان شخص زي زين مش هيلاقيني بطلب منه مساعده وميعملش كل اللي يقدر عليه علشان ينفذها بس ..بس
دا عمل كدا علي حساب نفسه هو ذنبه ايه يتجوز بنت خالته اللي مبيحبهاش
وانا انا مش عايزه اتجوز اصلا ولا حتي ارتبط انا اخري ابص علي الناس من بعيد وابتسم معرفش فضلت اعيط اد ايه وبعدين نمت مكاني من العياط
صحيت تاني يوم الصبح بدري لميت هدومي علشان امشي اللي حصل دا غلط مش هظلمه معايا لمجرد اني عايزه افضل هنا وخايفه من شبح الحب اللي بيطاردني في القاهره كنت خارجه من الااوضه كان زين اعد في الصاله بيقرا في ورق المجله قدامه وبيشرب قهوته بتاعت كل يوم الصبح
_ انتي رايحه فين
_ همشي
_ رفعلي حاجبه تمشي ...تمشي تروحي فين
_ هرجع القاهره
_ ليه انتي مش كنت بتعيطي امبارح علشان مترجعيش وانا مخلتكيش ترجعي ايه اللي اتغير
_ رميت الشنطه من ايدي وقربت منه زقيته بايدي
_انت هتفضل لحد امته تيجي علي نفسك علشان اللي حواليك يوم ما تخف مسؤليتك بجواز امال تشيل نفسك مسؤليه اكبر كل دا علشان ايه مش عايزه ارجع ياخي كنت رجعت ولا انك تعمل كدا في نفسك علشاني ذنبك ايه انت ترتبط بواحده مبتحبهاش ولا بتحبك علشان بس تساعدها لمجرد انها بنت خالتك وانت عارف ومتاكد ان العلاقه دي يوم ما تقرر تنهيها هيبقا فيها مشاكل بين امي وامك مانت اكيد فهمت بابا اننا عايزين نرتبط بجد
قعد علي الكرسي من كتير العياط والتعب وصوتي راح
عملت في نفسك كدا ليه
هتشيلني ذنبك ليه يازين حرام عليك
_ قعد علي الارض قدامي ومسك ايدي ممكن تهدي علشان نعرف نتكلم واشرحلك
_ مسحت دموعي تشرحلي ايه ازاي شيلت نفسك هم واحده مبتحبهاش ربط نفسك بيها بعدين حسيت بمرار في قلبي لما فكرت في ...طب ولما تحب وتيجي تتجوز هتعمل ايه معاها ومعايا انا كمان شهقت بدموع وحطيت ادماغي بين ايديا
لقيته مشي من قدامي حاولت اهدي رفعت راسي لقيته بيمدلي اشربي مايه واهدي علشان خاطري لو زين ليه خاطر عندك
اخدتها منه استناني لما هديت
_ حسناء
رفعت عيني وبصتله
_ انتي بتثقي فيا ولا لا
_ يازين انت عارف انك حاجه كبيره عندي وبحترمك اد ايه وبثق فيك بس انت ملكش ذنب
_ انا عارف انتي مش عايزه ترجعي ليه
_ بصتله بصدمه
_ ومن اول يوم جيتي كمان من وقت ما حكيتي لامال كان صوتك عالي وسمعتك
اولا انا مظلمتش نفسي ولا حاجه انتي مش عايزه ترجعي وانا يستحيل اخليكي ترجعي مكان هتبقي تعبانه فيه
ياستي اذا كنت انتي معقده من العلاقات فانا كمان مش مستعد ارتبط لا بعد سنه ولا اتنين ولا عشره
فخلاص محلوله منها هخلص من زن خالتك وانتي هتفضلي هنا من غير ما حد يقولك حاجه وانا وانتي زي ما احنا
_ بصتله بامل يعني ينفع كدا عادي
_ ابتسم وبعدين ضحك بشقاوه وغمزلي عدي بس الجمايل دي
_ ضحكت ومسكت ايده شكرا بجد يا زين ربنا يخليك ليا مش عارفه من غيرك كنت هعمل ايه انت اعظم راجل شوفته في حياتي
بعدين اخدت بالي من اللي قولته وبصيت في الارض لقتني برضو ماسكه ايدي فشلتها
_ ضحك
وغمزلي لو خالتك شافتنا هتقول بتغرغر بيكي
قومي يا ياله يا شيخه دخلي الشنطه دي جوه وتعالي خلينا نشوف ورق المجله دا
ماهو مش معني اني بقيت جوزك انك تدلعي انسي الشغل شغل ياماما انا زين اه بس راجل اوي
_ ضحكت كتير علي طريقته وبصتله بشكر
انا مش عارفه اقولك ايه بجد ربنا يحميك يا زين ويحفظك من كل شر انا بجد متكشره جدا
_ ايه يا حسونه جو التسول دا لو فاكره ان الكلمتين دول هيخلوني ادلعك في الشغل او مخلكيش تعمليلي قهوه بدل اللي مشربتهاش دي انسي يا ماما مش انا
_ خمس دقايق واعملك قهوه واجي اشوف معاك الورق
_ هدخل البلكونه علي ما تخلصي
دخلت الشنطه غسلت وشي وعملتلنا قهوه ودخلتله كان واقف بيبص للبحر بسرحان
القهوه يا عم اي خدمه
فضلنا نشتغل علي ورق المجله كتير
_ اتنهدت اخيرا
_ علشان تعرفي بس بتعب اد ايه
_ لو كنت طلبت مني من زمان كنت ساعدتك
_ محبتش اتعبك
_ ولا تعب ولا حاجه يا سيدي تعبك راحه
بعدين افتكرت حاجه _ زين
_ امم
_ انت ليه كتبت كتاب امال انت كنت قايل خطوبه بس خصوصا يعني انك ..
_ كنت عارف انها بتحب حد تاني
_ مش عايزه اضايقك بس مش قادره مسالش
_ علشان كنت عارف ووافقت علي ابراهيم وكمان وافقت كتب كتاب في الخطوبه
_ انت غريب اوي يا زين اخ مين يستحمل المسؤليه اللي انت شلتها من صغرك وقادر يكمل ولسه واقف علي رجليه قادر تحتوي عيلتك الصغيره بكل الحب ورضا
كمان كنت عارف انك اختك علي علاقه بواحد تاني ومدخلتش بالعكس سبتها تختار طريقها بنفسك
_ امال مبتحبوش يا حسناء
_ سنتين ومحبتوش يا زين
_ صدقيني محبتوش هي بس شدها انه تقيل عليها وغامض حبت تستكشف الشخصيه دي فوقعت في فخه الكلام العابر بقو صحاب بعدين كلمه حلوه اتحولت لحب وفضل مغرقها كلام حلو اللي هي مفتقداه وانا بغبائي منعته عنها
لو كان في سبب واحد للي حصل فهو انا لو كنت قدرت احتويها واسمعها كل الكلام الحلو اللي هي متحتجاه في سنها ده مكنتش مشيت ورا اول واحد خبط علي بابها بكلمتين حلوين
ابراهيم صاحبي وانا عارفه انه بيحبها من زمان لما اتقدملها انا حكتله وهو اللي وافق يكمل رغم انه عارف ان مشاعرها مش ثابته لما وافقت يكتب كتبها كان علشانها وانا عارفه هيحاول بكل الطرق يكسب قلبها فحبيت الموضوع يبقا حلال علشان ربنا يباركلهم
_ كان بيتكلم بيبص للبحر قدامه
بس انا مقدرتش مبصلوش سرحت فيه الامان اللي بحسه في وجوده مبحسوش حتي وانا في حضن بابا
_ بتبصيلي كدا ليه
_ معجبه
_ ايه
_ هااا ايه ايه
_ حسناء عايز منك طلب
_ مش محتاج تطلب يا زين
_ مش عايز ماما تحس بحاجه يعني احنا قدمها بنحب بعض فعلا واتكتب كتابنا
_ حاضر
_ ضحك انا همشي بقا علشان اودي الورق المطبعه سلام
_ سلام
بصيت قدامي للبحر قدامي خطرت علي بالي كلمه قالتها غاده السمان
""عذراء كل إمراة لم تعرفك ، عزباء من لن تعقد قرانك عليها ، عاقر كل أم لم تنجبك ، يتيمة من لن تكون أباها""
الجمله دي متلقش بحد غير زين انا فخوره بيه اوي علي اد ما هو جبل مبيتهزش
ساعات بحس انه محتاج حد يطبطب عليه ويقوله ارمي وجعك عليا هشيله معاك
ايه الهبل اللي بفكر فيه دا
قومت صحيت امال اللي هتفضل نايمه طول اليوم دي
فضلنا نرغي سوا كتير
زين رجع كانت خالتو حضرت الاكل وكانت عازمه ابراهيم كمان
اكلنا والغدا مخلاش من ضحك وهزار ابراهيم مع زين
اكلنا وامال وابراهيم دخلو البلكونه وزين دخل اوضته
كنت بساعد خالتو في المطبخ
_ بتعملي ايه بس يا حسناء خدي الشاي وديه لزين والحبوب دي علشان هو مصدع وقالي هينام
_ ادخله اوضته!!!!!
_ ياحبيبتي انتي بقيتي مراته دلوقت ياله روحي متتكسفيش
_ اخدت منها الصنيه وانا مش عارفه اعمل ايه بس لما شفت الحبوب صعب عليا هو نام متاخر وصاحي بدري ونزل الشغل كمان
خبط محد مردش
_ اترددت اني افتح بس قولت يمكن نام
_ كان نايم وشكله عرقان ووشه احمر
_ زين ..يازين
مردش حطيت الصنيه حطيت ايدي علي وشه كان سخن جدا ينهار اسود طب اعمل ايه
_ طلعت ادور علي خالتو لقتها اعده معاهم في البلكونه محبتش اقلقهم
_ جبت مايه وتلج ودخلت اوضته
فضلت اعمله كمادات كتير لحد ما الحراره نزلت
_ فتح عيونه براحه
_ زين سامعني حاسس بايه
_ كويس عايز اشرب
_ ثانيه واحده
_ خدت اشرب وخد الدوا علشان الحراره تنزل
اخده ونام تاني
_ غطيته وجيت علشان اخرج
_ حسناء
_لفيت ليه نعم
كان شكله بيتكلم وهو نايم فقوبت منه
_ متسبنيش لوحدي انا تعبان من غيرك
_ قلبي وجعني عليه حسيت انه ابني مسحت علي شعره
مش همشي انا جمبك فضلت اقراله قران لحد ما راح في النوم وبعدين خرجت كان ابراهيم مشي وخالتو دخلت اوضتها وامال كمان
_ دخلت اوضتي كنت سرحانه فيه انا قلبي وجعني عليه قوي وخايفه عليه كدا ليه يارب دلني انا تعبت غمضت عيني ونمت
_ صحيت تاني يوم علي صوت امال قومي يا زفته انتي ورنا حاجات كتير
_ ايه بس ياامال
_ صبرني يارب يابنتي مفيش غير شهر علي الفرح وورنا خاجات كتير قومي بقا
صحيت
_ هو زين فين
_ غمزتلي الا صحيح يا حُس انتي كنت فين امبارح انتي وزين
_ ضربتها بالمخده اطلعي بره يا هبابه انتي بدل ما اولع فيكي
_ اهدي بس ورسيني علي الحوار دانا اموله
_ اتنهدت مش عارفه انا متلغبطه
_ ابشر يا تيمور مدت ايديها وسلمت عليا
_ انت في بدايه الطريق الف مبروك يا مرات اخويا
_ ضربتها تاني بس يا به
بس هو زين فين بجد
_ نزل شغله من بدري
_ نزل ازاي دا تعبان
_ تعبان ماله
_ كان سخن امبارح وشكله تعبان
انا هرن عليه
_فضحكت
_ والله شكالك واقعه
تطلعي بره ياما وحياة امك ماهاجي معاكي في حته
_ هلبس واستناكي بره
_ مسكت التليفون اتصل بيه بس متصلتش معرفش ليه ومعرفش ايه الاحساس اللي انا حساه دا انا في شعور جويا جديد تجاه زين ومش فاهماه
لبست وخرجت ونزلت مع امل فضلنا نلف علي المحلات ونشتري لبس وحاجات كتير روحنا البيت كنا بعد العشا
خالتو فتحت لينا كنا ميتين من التعب دخلنا ننام علطول غيرت هدومي وجيت انام بس معرفتش انا طول اليوم بحاول اشغل نفسي مفكرش فيه طب هو عامل ايه ومش عارفه اتنهدت وخرجت من الاوضه فضلت متردده كتير بس روحت خبطت علي اوضته
_ ادخل
_ زين
_ حسناء تعالي ادخلي
_ جيتو امته
_ من شويه عامل ايه النهارده وازاي اصلا تنزل الشغل وانت تعبان انت بتسهبل يا زين
_ رفعلي حاجه وبعدين ضحك وغمز ايه الاهتمام دا بس يا حسونتي
_ صدق انا غلطانه اني بطمن عليك انا ماشيه
_ مسك ايدي استني بس
لفيت وبصتله وعنيا دمعت غصب عني انا بجد كنت خايفه عليه وشعوري دا مضايقني
_ انا اسف انا بس بهزر معاكي
_ ابتسمت انت كويس دلوقت
_ بقيت احسن كتير وشكرا لانك مقلقتيش ماما
_ تصبح علي خير
_ دخلت اوضتي وفضلت افكر فيه انه بقيت افكر في زين كتير غير العادي بقيت اتلغبط وانا قريبه منه وقلبي كمان بيتلغبط حطيت ايدي علي قلبي وانا مش فاهمه ايه اللي بيحصلي
عدا شهر بين تجهيزات لفرحنا انا وامال وضحكنا ان فرحنا هيبقا سوا كنت شايفه فرحتها بابراهيم ساعات بحس بالزعل علي نفسي انا اه بخاف من العلاقات بس كنت اتمني احس اني فرحانه زي اي عروسه
الكارثه اني فعلا فرحانه اني هبقا مع زين بس كل حاجه جويا متلغبطه ومش فاهماه زين كان بينزل معانا كتير واشرتينا حاجات لينا سوا زين ليه شقه في الدور اللي فوق شقة خالتو بس بعد ما امال تمشي محبتش اسبها لوحدها او....يمكن خفت ابقا مع زين لوحدي
خفت من اني ...مش عارفه بس كنت خايفه
_ حسناء حسناء حسو حس يا زفتاااااااه
_ فتحت عيني بغيظ
انتي اتربيتي
هل انتي شفتي يوم تربيه
_ ضحكت
وللاسف انا كمان ضحكت
_ فضلنا نضحك كتير سوا
_ انتي مصدقه ان النهارده فرحنا يا حسناء
_ كنا احنا الاتنين نايمين علي السرير وباصين للسقق
_ السقف هنا حلو اوي صدقي اول مره اخد بالي منه
_ بصينا لبعض واعدنا نضحك تاني خالتو وماما دخلو علي ضحكنا فضلو يعيطو كعاده الامهات
فطرنا ونزلنا البيوتي سنتر بس فضلت ادور بعيني علي زين قبل ما انزل وملقتوش معرفش اضايقت ليه بس انا ليا اسبوع مش عارفه اشوفه هو مش وحشني لا بس مفتقداه
كنا لابسين فساتين زي بعض مع اختلاف الميكب بصينا في المرايه
_ صدقي احنا خساره فيهم
_ ضحكنا وبعدين البنت اللي في الصالون قالت انهم جم
اتوزعنا امل كانت بره وانا فضلت في الاوضه جوا كنت مستنياه
انا فاكره ان من زمان كان نفسي اعرف هما بيحسو ايه في الوقت دا انا دلوقت عرفت انا حاسه ان قلبي هيقف
دخل زين كنت شامه ريحته اللي بحبها واللي عمري ما قولتله اني بطمن لمجرد اني اشم طيف ريحته حوليا
_ فضل باصصلي كتير وانا غصب عني مقدرتش ابعد عيني عن عنيه يخربيت حلاوتك يا اخي
_ باس ايدي ودماغي انا قولتلك مره انك واخده تفاصيل اسمك بس شكلي كنت غلطان انتي احلا حاجه شفتها في حياتي والله
_ ابتسمت بخجل وبصيت للارض ايدي برضو لسه في ايديه فضحكت
بس مسبهاش فضل ماسك ايدي
_ عملك فرح بقا انما ايه عجب
_ فضحكت انت كنت مخبي خفت الدم دي فين وراسم وش البارد
_ غمزلي دانتي متابعه
مردتش وخرجنا
_ فين امال وابراهيم
رافعلي حاجبه وانتي مالك انتي معايا دلوقت انسي اي حد
_ زين غمزلي عيونه
_ يازين بطل بقا انا متوتره خلقه والله
_ يا شيخه توتر ايه بس بالفستان دا دانتي هتاخدي عين تخسف بيكي الارض اسمعي مني
_ ضحكنا خدني مكان حلو علشان سيشن فضلنا نضحك كتير واحنا بنتصور
خلصنا وروحنا القاعه الفرح كان حلو كل حاجه فيه مبهره
كانت اخر رقصه لينا سلو
قربه مني للدرجه دي كان مخليني مش قادره اتنفس ومش قادره ابعد عيني عن عنيه هو كان ساكت بس سكوته كان حلو
افتكرت جمله كتبتها في النوت بتاعتي من زمان بس اول مره احسها بجد
""""كانت مذاق قربه لطيفة للحد الذي جعلها تتنهد بارتياح ، كانت تمرر اناملها فوق قلبه لتأخذ فِتاته المبعثر عندما تغادر ضلوعه اردت ان تظفر بعبير قربه فاحتضنته بذراعيها كأنها تقايض رئتيه برائحتها فكان فعلها صفقة ناجحه استطاعت بها ان لا ترك قلبه خاوياً من رائحتها .."""
يشوفوك يازين ويتعلمو منك معني كلمه راجل وسند واب واخ.... وزوج
الفرح خلص بس مروحناش
_ احنا هنروح فين يازين
_ غمزلي هخطفك
_ ابتسمت
_ ايه مش خايفه
_ اقولك سر
_ قوليلي سر
_ انت اكتر حد بحس بالامان في وجوده
_ ابتسم طب بمناسبه القمر دي بقا هفسحك فسحه قمر زيك كدا
"" سرحت في ابتسامته ياريتك تضحك علطول يازين بشوفه طفل مشاغب وهو بيضحك وهو بيغمزلي بعنيه بحس اني قلبي للحظه بطل يدق انا مش فاهمه ايه احساس بس اللي اعرفه اني مبسوطه ومطمنه
بعد فتره
وصلنا ياستي انزلي
_ احنا فين
_ مطروح
_ بجد انا من زمان ونفسي اجي هنا
_ اي خدمه ياعم عد الجمايل بس
ربنا يخليك يازين
_ انا حجزت شقه مرضتش ننزل في اوتيل علشان تعرفي تبقي علي راحتك
_ بصتله بامتنان
وسكت
وصلنا
_ دخلنا البيت وانا مش عارفه اعمل ايه والمفروض اقول ايه بس هو مفيش حد هنا فمش مضطرين نمثل
_ هدخل اغير هدومي غيري هدومك وتعالي علشان نصلي
_ نصلي!!!
_ ايه يا تريزه مالك
_ ضحكت مش قاصدي يا غلس بس ..
_ مفيش بس وانجزي علشان انا جعان وعايزه انام فننجز بقا وبلاش مرقعه
_ غيرت الفستان واتوضيت لبست الاسدال وطلعت كان مستنين بره
صليت وراه وانا جويا احساس اتمني يفضل عمري كله كدا دا اكتر وقت في حياتي ابقا حاسه اني طايره من الفرحه هو صوته قمار كدا في الصلاه ازاي انا اول مره اعرف الموضوع دا صوته كان بيطبطب علي قلبي بيقولي انا هنا لو كل العالم سابك انا موجود ...صحيح مفكرتش عمري في الجواز ولا اني في يوم هصلي ورا جوزي ومش اي راجل دا زين هو فعلا زين الرجال
خلصنا صلاه بصلي وابتسم وشاور بايده بحركه كوميدي كدا
_ خدي امال اقولك
_ روحتله
_ فحط ايده علي دماغي
_ ايه ياعم هتسخطني ولا ايه
_ مدرش وفضل يقول حاجات بصوت واطي وانا فضلت بصاله بهدوء
_ خلص وشال ايده
_ انا مش مرتحالك علي فكره انت قولت تعوذيه ولا ايه
_ بس يا تريزه اسكتي انتي
قومي ياله انا عايزه اكل علشان هموت وانام اكلنا وسط تريقة زين علي مواقف اللي حصلت في الفرح
_ دانت طلعت مش سهل
_ عدل اللياقه بتاعته انتي بس اللي مش مقدره
_ ماشي ياسيدي حقك علينا ياله تصبح علي خير ودخلت اوضتي ونمت علطول من التعب نمت وانا مرتاحه نفسيا وقلبي فرحان
_ صحيت تاني يوم العصر غسلت وصليت ولبست الاسدال وطلعت دورت عليه في الشقه ملقتوش
فسمعت صوته في البلكونه كان بيتكلم في التليفون
_ ياعمي متقلقش والله حسناء في قلبي
_ ابتسمت
"" لا اكيد يعني مش هقولها انا اللي اتفقت مع ابوكي اتجوزك من غير ما ناخد رايك ولا قولتلها انك طلبت منها ترجع معاك علشان اتجوزها مش هروح اقولها انا ضحكت عليكي ومثلت دور الضحيه علشان...
_ الدموع نزلت من عينا من غير حتي ما احس بيها ومشيت من غير ما اسمع باقي كلامه وجويا سؤال واحد طب ليه مشيت بسرعه ودخلت اوضتي يعني ايه كانت لعبه من الاول كنت لعبه ايده وانا اللي فضلت حاسه بالذنب انه لبس فيا وهيشيل مسؤليتي وبابا بابا ليه يعمل فيا كدا كان قلبي جواه دوشه كتير ومش قادره افكر فضلت اعيط مكاني لحد ما نمت تاني لما صحيت كنا بعد العشا كنت متلغبطه ومش عارفه اعمل ايه حاسه جسمي كله واجعني وهموت من الصداع فعيط تاني من كتر الصداع مكنتش عارفه افتح عيني
الباب خبط ففتحت
_ حسناء...!!! مالك بتعيطي وانتي نايمه من امبارح قلقت عليكي
كنت ساكته وبعيط من الصداع اللي في دماغي وقلبي كمان
_ عندي صداع دماغي هتنفجر يازين مش قادره استحمله
_ هنزل اجبلك مسكن قوي وهرجع بسرعه
نزل جابلي الدوا وجه بسرعه فعلا
_ خدي حبايه من ده وهتبقي كويسه
_ اخدتها وغمضت عيني وسندت دماغي علي السرير وغالبا نمت تاني من غير ما احس اخر حاجه فاكراها انه كان حاطط ايده علي دماغي وبيقراي قران
صحيت تاني يوم الصبح بدري وانا حاسه بحاجه تقيله علي قلبي
_ صباح الخير
_ عامله ايه دلوقت
_ كويسه
_ تعالي افطري انا مستنيكي من زمان وجعت
_ اعدت اكل او امثل اني باكل
_ مالك يا حسناء
_ هو احنا ينفع نرجع
_ ليه انتي مضايقه من حاجه انا زعلتك في حاجه
_ تعبانه يا زين ومش مرتاحه هنا عايزه ارجع البيت
_ حاضر يا حسناء اللي تحبيه بكرا الصبح هنسافر
هزيت دماغي
خلصنا اكل ودخلت اوضتي تاني ومخرجتش منها حتي علي الغدا مخرجتش غير تاني يوم الصبح
ركبت العربيه وعملت نفسي نايمه طول الطريق وانا بفكرا هو ليه يعمل فيا كدا دا كنت بتعذب كل يوم وانا شيفاه مغصوب عليا
_ حسناء
_ امم
_ وصلنا ياله
_ طلعنا الشقه وخالتو استغربت اننا مكملناش حاجه ورجعنا فزين قالها انه جاله شغل ضروري وانه هيعوضهالي
قدام خالتو مضطرين نكمل تمثيل فدخلنا اوضته كنت حاسه اني مخنوقه وحاجه مساكه قلبي بتعصره هو ليه عمل كدا انا للدرجه دي مش مهمه ميهتمش براي ولا انا عايزه ايه
_ فوقت علي صوته اعد قدامي وبيبصلي
_ فيكي ايه بس ريحيني
_ بصيت في عنيه وعيطت فضلت دموعي تنزل وانا ببصله قلبي مش هاين عليه يظلمه
_ انت ليه عملت كدا
_ عملت ايه
_ انا سمعتك وانت بتتكلم في التليفون
صوتي بدا يعلا انا للدرجه دي رخصيه عندك علشان تعمل كدا حتي ابويا سلمني ليك من غير اعتبار لراي وانا انا كنت حاسه بالذنب انك اتغصبت عليا وانت ملكش ذنب شايفني ببكي علشان صعبان عليا وانت مكمل ومبسوط ليه عملت كل دا ليه دانا كنت شايفه العالم حاجه وشايفاك انت حاجه تانيه صوتي علا اكتر ليه يازين رد عليا ليه المسلسل دا كله ليه
_ علشان بحبك ....
علشان عارف انك عندك فويبا من العلاقات كان لازم مدكيش فرصه تفكري علشان عارف هترفضي بقالي سنين بحبك وانت متعرفيش مصدقتش نفسك لما عرفت انك عايزه تعدي في اسكندريه وبعدين جتلي الضربه اللي شرخت قلبي نصين انك راجعه علشان هربانه من حب حد تاني
شايفك قدامي ليل نهار ساكته بتتفرجي علي اللي حواليكي من بعيد كنتي داخله في حالة توحد هتوصلك في النهايه انك هتخسري حياتك عارفه قررت اعمل كدا امته
سكت شويه كمل يوم ما سالتيني عن الحياه كئيبه خفت تضيعي مني قررت اعمل كدا علشان اخليكي جمبي الحقك وارجعك للدنيا اللي انتي مش عايشاها اصلا كان عندي امل تحبيني لو كنت كملتي للاخر كنتي سمعتيني بقول الابوكي اني عملت كدا علشان بحبك علشان الاقي فرصه اكسب قلبك انا اسف لو جرحتك وفرضت نفسي عليكي انا بجد اسف علي كل حاجه
_ خرج وسابني وقعت علي الارض غرقانه في دموعي هو وجع القلب مش وراه غيري هو كل ما اقول الدنيا بتتلون قدامي ترجع كئيبه من تاني ليه حتي هو الوحيد اللي قرر يساعدني ظلمته وجرحته وحسسته اني رفضاه مع اني بدات اشوفه اقرب حد ليا
فضلت مستنيياه كتير يرجع علشان اعتذرله لحد ما نمت مكاني
صحيت تاني يوم الضهر قومت من السرير بفزع بدور عليه
_ زين
_ خرجت من الاوضه بلهفه ادور عليه اكيد بيشرب قهوته بتاعت الصبح بيبص في اوراق النشر بتاعت المجله
_ زين
_ صحي النوم يا حسونه
_ خالتو هو زين فين
_ سافر
_ سافر...!!!!!
هو مش انتو قولتو انكم رجعتو علشان شغل هو نزل الصبح بدري وقالي مرضاش يصحيكي وسافرعلشان يخلص الشغل اللي نزلتو علشانه
_اه انا بس لسه صاحيه من النوم فمش مركزه
_ صحيح امال كلمتني وسالتني عليكي بتقولك افتحي تليفونك تكلمك علشان وحشتيها
_ حاضر
_ دخلت االاوضه وعنيا مليانه دموع حقك علي قلبي يا زين انا اسفه بس ارجعلي متمشيش وتسبني انا عارفه اني مستاهلش كل دا بس انت طول عمرك قلبك كبير كنت واقفه ببص لصورته وابتسامته خايفه اكون ضيعتك يا زين لا مش خايفه انا مرعوبه انت اخر حاجه عايزها تبعد عني
قعدت علي السرير بتعب شنطة هدومي لقيتها لسه من امبارح مكانها لكن شنطته مش موجوده مسحت دموعي وقومت احط الهدوم في الدولاب غصب عني فتحت ضلفته ريحته لسه موجوده في هدومه ابتسمت لما شوفت التيشرت الاصفر بتاعه من زمان واانا عايزه اقوله انه بيقا قمر اوي فيه جيت احركه من مكانه فلقيت حاجه بتقع كان نوت بس شكلها غريب اول مره اشوف زيها كنت بتفرج عليها من بره غصب عني فضولي قاتلني افتحها
""لا القلب ينسا حبيبا كان يعشقه ولا النجوم عن الافلاك تنفصل""
""إن ساعة كتابتي إليك هي ساعة من الحياة معك وإن كنا على بعد.""
"""
أَمِيلُ بِقلبِي عنك ثُمّ أرُدّهُ
وأعذُرَ نفسي فِيكَ ثُم ألومُها""
كنت بقلب في الصفح ودموعي بتنزل وكلمة بحبك اللي رماها علي قلبي بتتردد جويا مش بتروح
التليفون بيرن
_ الو
_ حسناء مال صوتك
_ عيط زياده سابني يا امال سبني قبل ما الحق اقوله اني حبيته خسرته خلاص ياامال انا مستاهلوش انا عارفه بس قلبي بيوجعني هو فضل طول عمره شايل مسؤليتكم ومخبي مشاعره لحد ما يعمل واجبه ويوم ما يبدا يتنفس ويمشي ورا قلبه جرحته ووجعته يامال
_ اهدي يا حسناء اهدي
_ انا حبيته مشي قبل ما اقوله اني انا كمان بحبه انا مش بطمن غير معاه سابني ومشي معرفش راح فين ولا هيجي امته
_ هو كلمني يا حسناء وقالي اطمن عليكي وقفل من قبل ما الحق اساله احكيلي بس ايه اللي حصل
_ حكتلها وفضلت تهديني وتقولي انه اكيد هيرجع
_ معلش يا امال دوشتك حقك عليا المهم عامله ايه
_ مبسوطه يا حسناء حبيته كنت هندم عمري كله لو مدتش لنفسي فرصه
_ ابتسمت من قلبي علشانها ربنا يسعدك ياامال ويدوم عليكي ساعدتك
ياله هقفل بقا وروحي شوفي جوزك وانا هقوم اساعد ماما ...
عدا 3 اسابيع وهو لسه مجاش كنت قاعده علي البحر
_ إسكندرية حلوة آه.. لكن بدونك زيها ..زي المداين كلها الحزن كان طبع الشوارع والبيوت الأمكنة والناس هناك وأنا مش هنا انا عقلي وقلبي معاك ارجعلي بقا يازين كفايا كنت اعده سرحانه فيه في تفاصيله ضحكته وطريقه كلامه عنيه وحشتني نبرة صوته وحشني احساس الامان في وجوده وحشني كل تفاصيله اتنهدت بتعب
_ ايه التنهيده الطويله دي
_ زييييين
_ غمزلي ياقلبه
_ فتحت في العياط من تاني
_ طب بتعيطي ليه دلوقت امشي يعني
_ مسكت ايده بسرعه
مشيت وسبتني لوحدي انا كنت خايفه من غيرك كنت خايفه مترجعليش تسبني وتمشي
_ اتنهد امشي واروح فين بس انا عايش بيكي
_ حقك علي قلبي يا زين والله ما اقصد اجرحك انا كنت متلغبطه وظلمتك سامحني
_ انا مزعلتش منك علشان اسامحك
انا بعدت علشان متغضطش عليكي ومكنتش ....
_ بحبك
_ فتح عنيه جامد وبصلي قام وقف وعلي صوته قولتلتي ايه
_يابني احنا في الشارع
_ قوليها تاني علشان خاطري
_ بحبك يا زين والله
_ شدني لحضنه واتكلم اسف لو ضلوعك هتتكسر بس انا نفسي اعمل كدا من زمان
_زين
_ زين بيتنهدك يا ست والله
_ غمضت وابتسمت وحضتنه انا كمان
؛؛؛
واخَتارنِي قَلبكِ الأَرقّ مِن اليَاسَمين ذَات يَوم ..يَكفيني أننَا يَومًا تَلاقينَا ..!
...
#hasnaa