عزيزي القارئ فضلاً وَ ليس أمراً أضغط تصويت لنشر المزيـد من احداث الروايــة
فستان أحمر
تحسين لقمان
گـلبي يدك حيل
كلبتهه طلعلي وجهه
دم
شخطات
خشم يخر دم
الجلد محروك
العيون مطفيه
الساني انبلع
دموعي تنزل اريد احجي ماكدر ماكد ثريـة
شهكت وصاحت : هيماء
وهيَ غمضت العيون والنفس راح وروحها راحت
اختـي هاي اختـي شبيهه منو سوه بيهه هيج اريد احجي اريد اصيح اريد اريد,
بنص دمهه وشخطاتهه ضميتهه بصدري ، ثريه ادك على راسهه يمي وَ ياسمين أجتـي تـصيح شكو
شجاوبهه شحجي شگـول ياناس ياعالم اختي راحت راحت من ايدي راحت ولكم بس هـاي وحك الخــالـق بس هاي عندي
ياسمين تجرني من يمهه واني ارفض أهـز براسي مثل المخبله وَ أصيـح بعلو صوتـي ليش هيج
اني البذات مكتـوبلي التعاسة وَ القهر ياناس أخيـتي هاي أخـيتي راحت من ايدي
ياسمين : كـومي كـومي ويايه ذكري
الله مايصير هيــج
مياده : وين وين اروح خلوني اكعد وياهه خلوني احجي خلوني اشم عطرهه ولكم ياناس هي
وعايشه ماشبعت منهه خلوني هي وميته خليني فدوه وخري وخري عنـي
اباوع لياسمين رجعت ليوره وكعدت بالگـاع حطت أيـدهه على وجهه وبجت بكل حرگـه رجـعت
عيوني على هيماء أهـز براسهه وأحـاجيهه: هيماء هيماء انتي تسمعيني مو
بس انتي البقيتي تاليها ترحيـن كعدي اني اختج مياده كومي شوفي ابويه منتظرج
هيماء هيماء كعدي لعد ابويه المن ياخذ دواه المن عايش لحد الان غير علمودنه اني وياج كومي
كومي ندخل اني ويـاج نسلم عليه كومي ماميته انتي كعدي كومي
اباوع جهال المنطقه ملتمين علينه داير مدايرنه اباوع بوجوهم وعيوني تنزف بالدموع
شكلهم شحجيلهم على الدنيا الغبره من افترت بيه فره لو هذا القهر الكدامي
وكف تكسي يمنه نزل منه حنظل تقرب مني رأساً صحت : حنظل اختي اختي راحت
نزل للكاع جر راسي لجتفه •
وَ أجتـافي وصدري ينهزن من كثر الانهيار والبجي
همس يم اذني : امر الله امر الله
لا أعتراض على حكمته كومي گـومي
وخرت روحي من عندة وصحـت : وين وين اروح هيماء راحت تعرف شنو راحت يحنظل
لزمني من ايديه وصـاح : مو زين كومي كومي ويايه الله يرحمه برحمته الواسعـة
ثريه : عوفهه عوفهه خطيه شافت الويـل
مياده : ششوف بعد ششوف ولـكم أفتـح الباب تطلعلي أخيتي مدمايه وواكعه بطولهه
ولكم شسويت شسويت حاجوني •
ميلت راسي لليمنى ولليسرى وَ أني أون على أختـي: لاتصدكون اليروح يرد علينه
فراكهم والله فراكهم يكسر كلب والله وعمينه
يثريه يياسمين يحنظل شاب راسي من الحزن
والله شاب وَ الليل يمة والله اخلصه بس اون ونين شثگله والله فراكهم يكسر كلب والله وعمينه
كامت ياسمين من الكاع والتراب كام وياهه وَوگـع تقربت مني بدموع وخرت هيماء من حضني
واني شبه ميته عيوني راحن وَ جلدي يرجف من الانهيـار كمت على رجليه وبلايه حيل
وكعت هيماء وموته كدامي سجينة سجينة ودخلت ضهري
ثريه وحنظل شالو هيماء من الگـاع دخلوهه ليجوه , واني وراهم اون ونين موتــة
رفيــق تلگــانه باب الهول دموعه تنزل على وجناته وحاط ايده على اذانه ويفتر داير مدايره
ويسوي : بحر بحر دم دم الكل مات اي اي الكل مات بحر دم دم
عبرته ودخلت وراهم للهول حطوهه بطولهه بالكاع واكفه عليها أتـامل الدم الي يسيـل منهه
ووجهه المحروك وَمعانيها المخيفة تقربت منهه وكعدت يمهه حطيت راسي على رگبتـها
وبجيت بكـل حرگـه ياسمين وَ ثريـه يجرن بيه وَ أبويـه أسمعه بالغرفة يصيـح شكو شصاير
شجاوبك يابويه شگـلك أگـلك بتك من لحمك ودمك ماتت شلون شلون اكولهه الك ,
لج هيماء كعدي تسمعين ابويه يصيح بأسمج ليـش ماتكوميـن أليـة
رفعت راسي لگـيت حنظل واكف بعيد بالهـول وحاط ايده على وجهه وَ يبجـي
اباوعلهم كلهم يواسوني بالدموع •
باوعتلها وَ كمت توجهت لغرفة ابويه اسمع ثريه تكول لياسمين : جيبيلي وصله خلي نستر المرحومه
فتحت الباب ووكفت كدام ابويه اباوع لوجهه شعره مشيب وجناته مجرورات من التعب
وَ النفخات هواي جوة العين من العلاج والقهر والضيم
رجعت عيوني لهيماء لكيتهن يحطن الوصله على وجهه ,
كريم كاسيته : شكو بويه شصاير احجيلي شنو هذا البجي
مياده : بويه الفاتحة أقـراهه •
عدل روحهه وجناتـة رجفن گـال :ليـش اقراهه
مياده : الفاتحه تنقري على الموتـى اقراهه
شال ايده وضرب صدره وصاح : هيماء هيماء مو بويه هيماء لا لا تعوفيني بويه
تعبت عليج بويه بنيتي وينهه وينهه گولـي وينهه هيماء
دخل حنظل للغرفة وَ راح عليه لزم ايديه وحضنه رأساً وخره من عنده
وشال ايديه ضرب وجهه وصاح : ضناي مات وراح عني بويه بويه هيماء بويه بويه
وكعت بالكاع وحطيت ايديه على وجهي ورجعت انهاريت
اسمع رفيق يمي كاعد يكلي : شب شبي شبيج اي اي شبيج مياده لي ليش ليش تبج تبجين
رفعت راسي والدموع تنزل على وجهي والشعر مرفوع كتله : رفيق الكلب مجروح
ياعمري يايابَ الگضيتك بالبجي والنوح
رفيق : ما ماتت ماتت
لطمت عـلى وجهي وصحت بعلو صوتي : اي اي ماتت وموتونـي وياهه
ياريتني ميته قبلها
اجتي ثريه شبگـتني وخرتهه مني وصحت : ياگـاع انشگـي انشگـي وبلعينـي
الدنيا افترت عليه فره جبيره شيصير بيه بعد ياناس
كريم كاسيته : كـوموني كـوموني ودوني وين ماهـي َ ودوني
حنظل: بويه مريض أنت اكعـد أرتـاح
گمـت على حيلي وَ اخذته من ايده على العربانه ومشيت بي على جثة هيماء وصلنه الهه بالهـول
وهي متمدده بدمهه أبـاوع لأبوية بعيون متروسة غواش
لف اللفاف عليه وصاح بعلو صوته : ربي يارب العالمين فدوه اروح لأسمك هاي بنيتي
حاطهه امانه بيدك بنتي مسكينه بنتي ماتحجي منغوليه گـضت عمرهه هيج أجونه اهل الحرام
اجونه الميخافوك كتلوهه ضربوهه اغتصبوهه ربي تعرف شنو أب يگـول
أغتصبو بنتي عذبوهه حرگوا وجهه تعرف لو لا إلهي حاطهه يمك ديربالك عليهه وَ أنتَ رؤف ورحيم وغفور بعبادك
إلهـي بكل صرخه صرختهه هلمكروده بكل دمعه نزلت على وجهه تجمع الدنيا والوكف وياهه ضدهه
وتنتقم منهم انتقام يزيد وقومة محلفك بمنزلة الفجر وكيفك يارب الكـون
نزل راسه على هيماء وضرب وجهه وصاح :
يابوية يابنيتي ضهري انكسـر
كلنا دموعنه تنزل على هيماء راحت وَ ماشافت شي من حياتها ودنياتها
أبـاوع لأبوية كام يگـح بسرعه رحتله مسحت حلگـة بالجفيه مالته طلع دم من حلكه
بلعت ريكي وكتله بشهكه وبجيه : بس عاد بويه صحتك ذابت وراحت
كريم كاسيته : ياصحه ياصحه بقت من بعدهم تمرمرنه بويه
اباوع لحنظل خابر على حجي ناصح وطلع بره بالحديقه يكمل مكالمته والغصه بحلكه مبينه
اخذت ابويه لغرفته واني احاول اصبر بي بس شصبر اب وفقد بنته وين يعرف الصبر
نومته على الجربايه بتعب والدموع بعيونه متجمعه ماعرف شكد مر عليه من وكت بس جان
طويل گضيتة اهدأ بـي وأمسـد بشعرة بس هذا بقة اليـة بعد
كمت من يمه على صوت الزلم وصوت بنية غريبه بالبيت بلعت ريگي وفتحت الباب
لكيت ثريه وياسيمين يشيلن بهيماء يحطنهه على وصله ثانيه
وَ واكف يمهن حنظل وحجي ناصح ومادري بعد مو ذاك تركيزي رحت عليهن
وين وين شتسون
جاوبنـي حجي ناصح : شلونج بويه مياده شصاير بحالج
ميادده : تسألني شلوني هو شلوني يحجي ناصح من بعد الاحباب يالون يبقى من بعدهم ماتگـلي
حنظل : مياده وخري عن البنات يشيلوهه
تقربت مني بنية مبوشه اخذتني بحضنهه وهمست: اللة يرحمة برحمتة الواسعة ادعيلها
وخرته مني وكتله :منو
گالت: عبير اذا تذكريني
نزلت دمعتي ورجعت حضنتهه عبير انسانه طيبه وعلى نياتهه ونفسي الوكت أغبر صار وياهه
مسحت دموعي ورجعت اباوع لياسمين وثريه شلون غطن هيمياء بالوصلة واني دموعي تنزل بكل حركة
بس شيفيد شيفيد البجي راحت هيماء وراحت طيبتهه،كل حيلي حرفياً انهد بعد مابيه اي شي
هذا اصعب شي يمر علـى الانسان يشهد على موت أنسان من لحمه ودمه
وهو مكاعد ويا غير مجرد ايام وساعات محسوبه على الاصابـع
، لفوهه وتگابلو عليهه الزلم عبير لازمه ايدي تفرك بيهه جوز تكدر تاخد جزء من همي وضيمي
، وثريه المسكينه حاطه راسهه على جتفي وتبجي بكل هدوء
مياده:وين ماخذيهه
حجي ناصح:بويه ربج يگول الميت اكراماً الـه لازم يندفن واخيتج راحت لربهه لازم تطهر وتندفن
نروح للمستشفى وللمغيسل وللمگبره لليل نطلع بيها
تقربت منهه واني كل حيل مابيه، راسهه صاير بجهة حنظل نزلت راسي وبست گصته وگعت
دمعتي على وجناته وگتله بصوت مهزوز:
امنيتي جانت اجتمع وياج وَ ألـمج لحضني وَ أوكلج بيدي ونسولف ونضحك اني وياج
مثل اي اخت ويه اختهه بس ماصار ماصار مامكتوبلي وياج اي شي وياج مامكتوب
وكعت دمعتي مره ثانيه، شهگت بكـل حرگـة عندي
حنظل صاح:أسم الله يابَ
ياسمين خيتي اخذيهه ديربالج عليهه امانه يمج
باوعتله بعيون تبجي
كتله:اخذني وياك عفيه
عظ شفايفه بقهر وگـال بصوت خشن: وين اخذج ويايه يابعد عيوني كافي بجي باعي حالج
صحت: اختي اختي هاي والله بس هاي عندي بعد ماعندي، انت ضگت الاصعب منه خسرت امك
وابوك اني خيتي راحت
دار وجهه طگ رگبته وگال:اخذيهه من هلشارب الكدامج والله بس نروح للمگبره اخذج ويـاي
اجتي ياسمين جرتني منهم غطوا وجهه وراحو بأتجاه الباب حسيت بأحد يدفعني يگلي روحي
روحي كعدي بيهه صيحي بيهه، اريد اروح اريد اصيح بس الصوت ميطلع والله ميطلع
طلعوا بيهه من باب الهول وراحو بعيد بعيد، درت وجهي حضنتني ياسمين بصدرهه تواسي بيه
ذبيت كل البجي يمهه واني اشهك بصوتي
استغرب شلون حجي مطلك ومهره يكدرون
يكتلون ويعذبون بهاي الناس هاي هيماء مجرد ضليت وياهه ايام قليله ومن راحت احس گلبي
تكطع على فراكهه اما ذوله شنو احاسيسهم شنـو مشاعرهم تكون بذاك الوكت من يكتل ويذبح
كعدني على التخف واني تعبانه بس دموعي تنزل من اذكرهه تكتبلي بالورقه
" عذبوني وحرگـو وجهي لأن ماطاوعت زبون "
جريت حسره وصحت بعلو صوتي
" يهيماء شصار بيج واني بالسجن
لج شلون متي شسوولج شسوولج
شلت اديه وضربت راسي ضربات متكرره اريد اوكف كلشي بيه ماريد اعيش بعد بهـاي الدنيا الغبرة
ياسمين تهدء بيه واني اكلهه:ياسمين ياهدوء ياهدوء تدرين انتي حارگين وجهه لأن ماطاوعت
زبون ولج ياسمين هاي بشر بشر يالاسلام بشر الله يعلم شسوت بيهه مهره الكلبة
مو كلتيلي ماتسويلهه شي مو كلتي لو لا، مو گلتي هي بحاجتهه
خلي تبقيهه والله مادور عليهه ابد ابد بس كون عايشه بس كون تتنفس
عبير تقربت مني جرت وجهي اباوع لايدهه صبت مي بيهه من الكلاص وغسلتلي وجهي
وهي تقره آيات قرآنيه عليه،
كتله: شيفيدن بعد شيفيدن راحت راحت
عبير: اي راحت لراس الركن ياعيني غير لربهه كلنه على هـذا الـدرب ذكري الله ترحميلهه
ثريه راحـت جابت كلينس قربته من خشمي، اخذته منهه بسرعه مسحت رشح خشمي
وَبللت شفايفي رجعت خصلات شعري ليوره باوعت لملابسي بيهه دم هيماء
اسمع ابويه من الغرفه يجود قرآن، باوعت لليمنى لگيت رفيق حاط دب وكاعد يم باب المطبخ
رحت يمه علكيفي وكعدت ويا كتله:رفيق ماتت هيماء
يفرك بالدب يحاول يحرك عيونه، اباوعله مي حلكه يوكع على ملابسه يسحب رشح خشمه
اخذت كلينسة ونظفته بسرعه گال بصوت مقهور: ط طع طعم طعم اي طعم الموت
الموت بحر ص ص عب صعب اي اي صعب
دمعتي وكعت مسحتهه بسرعة وكتله: صح صعب
سحب رشح خشمه وگال: مو مو مث مثل ط طعم اي طعم مو موت الام الام اي اي امي بحر بحر
ذب الدب وَ صفك أيده وهز راسه ويصيح:بحر دم دم دم دم
لزمته من ايده وكتله:اهدأ اهدأ اني يمك اني موجوده
باوعلي ورجع لزم الدب وفك حلكه اكثر وبده يضرب بي: اك اكع اكعد بس لا لا لا اي لا مت متت متت مثلهم اي مثلهم
مسحت دمعتي وكتله:شيفرق طعم الموت عن الام والاخت ثنينهم اكيد اعزاز وَ أقراب على الواحد
هز راسه يمنى ويسرى وگال: لا لا لا اي لا ام امي امي امي اقرب اقرب اي اقرب وحده اليه اليه
عرس عرس عرس رفيق هيل وطش
طش بالولايه
دم دم بحر بحر
مياده: واختي هم اقرب اليه
باوعلي وگال:شك شكد ما ماتكون القرابه القرابه اي القرابه بينكم تكون الام الام اقرب اي اقرب
جنت جنت اي جنت صغيرون عنوني عنوني بعدني طفل طفل اي طفل قبل قبل لا لا انام اي
انام اغمض عين عي عين وحده واتخيل واتخيل موقف موقف امي من تموت تموت تغيب تغيب
اي اي تتركني وحدي دموعي دموعي وحيدهن وحيدهن ينزلن بسرعه بسرعه اي اي بسرعه
وهو مجرد مجرد خيال تخيلته بس بس
ياجان واقع واقع يصير موت
طع طعم طعم موت احبا احبابج شي بسيط بسيط اني اني اني مشيت بين النار النار
صوته جان جان جان مثل الام الام الي الي تسكت بأبنهه اش اش اش ام القواطي القواطي اجت
اجتي هيج جان صوتهه صوتهه
مش مشيت بين بين الموتى اصيح اصيح
يمه يمه
ياسمين شهكة من البجي وصاحت: انكطع گلبي دخيلك كافي شلون شلون اني عايشه وانتو هيج
عفت كلامها وكتلة: رفيق المن عايش؟
رفيق: و ال المن اي المن ميت ميت هنا هنا عندي اصدقاء اصدقاء مهدي مهدي مهدي
ثريه: وين اكو مهدي
رفيق: هذا اجه شوفوا شوفوا هذا صاحبي مهدي بيوم عرسي اي بيوم عرسي حلق حلق شعره وياي اي وياي
اشرتلهن يسكتن هذا مسكين رفيق شباقي بي غير ضيمه وقهره، ومن فرات الدنيا ويا گـام يتخيل
وجوه خير من الله يشوفهه كدامه، ويحجي وياهم يغني وياهم شنو يسوي غير هذا
عبير وثريه يمسحن بالكاع بدم هيماء واني بصف رفيق اسمع ابويه يقرة قرآن واني ابجي بهدوء
من اتذكر ملامحهه شلون بريئه رغم حرگهه شلون مسكينه فقيره تشتكيلي تكتبلي كلمة كلمة من
عذابهه الضـاگـته ويجون فلان وعلان يزودو عليهه
مر عليه الوكت بـكل شكـل من أشـكال الحزن
واني اتمشى بالهول يارايحه ياجايه، دموعي احاول احبسهن بداخل عيوني وَ أضل ساكتة
وَ أقاوم اكثر واكثر بس الانسان دائما تكون عواطفه اكبر من عنده، وتتغلب عليه بكل المواقف
مهما حاول أن يسيطر، اباوع لعبير فارشه مصلايه وتقره قرآن وكأنما الميت الـه، ردت الزم القرآن
واكعد اقره واطلب من ربي يغفرله بس مينطيني گلبي ينهار اكثر اختي هاي صعبه صعبه كلش
مددت على التخم حطيت عگس ايدي على عيوني رخيت ظهري وذبيت كل ثگلي ورحت
لعالم بعيد نقي لاخوف ولا قلق ولا موت كعدت على صوت عبير
تگلي:كومي غده اكليلج لگمه مو زين عليج نمتي هواي، وهذا ابيج خطيه نظفي
فركت عيوني وخرت الدمع الصاير بحفرة العين، وگمت على حيلي فتحت حلگي حسيت بحرگه
قويه بي: بيش الساعه، وشبي ابويه؟
عبير:مو مايكدر على ما اعتقد حنظل ملبـسة حفاظات وهو بفراشـة
حطيت ايدي على حلگي شلون صايره هاي السالفه، ياسمين صاحت من يمهه: ساعه ثلاثه
اكلي لگمه ياعيوني وروحي لأبـوج
رجعت شعري ليوره وكتله:اكلوا انتو ماشتهي رايحه لابويه
عفتهن يحجن ورحت لغرفة ابوية فتحت الباب لگيت ريحه ابد مو طيبة أستغربت كلش
تقربت منه گال بصوت مهزوز:روحي بويه ماتكدريلي يجي حنظل وهو يتوكل بأمري
كمل كلامه ومسح دمعته كسر خاطري شنو ذنبه يكون بهاي الوضعيه الضعيفه معقوله يجيني يوم
واكون بهيج حاله. بلعت ريگي وتقربت منه بست راسه واخذت ايده كتله: يابَ اسمعني زين، صح
مو قريبه عليك مثل ماقريبه هيماء بس الـي أكـدر عليه اسوي وانت ابويه حزام ظهري
ودعوتك اليه كلش كافي، كلنا باجر او عگبه نمر مثلك او اكثر واكرر اني بنيتك من لحمك ودمك
ماريدك تستحي مني، واذا ماخدمك
الـمـن اخدم يابويه •
وخر ايده من ايدي ومسح دموعه، جبت كلنيسه من الميـز مسحت وجه
رحت جبت العربانه ووخرت الغطه وحضنته علكيفي كعدته على العربانه صح الريحه جانت
قويه بس رجال جبير شنو بيده وشنو يكدر يسوي هم مثلي الوكت افتر بي ووصله لهاي
المرحله القذره الي مايتحمله أي بشر، اخذته للحمام وهو يبجي ماسكته ولا كتله لاتبجي
لأن حقه يبجي منو يتمنى لروحه أو يرضى لروحه توصل بي هاي المواصيل
دخلت الحمام لگيت كرسي بس يصير ابيض گال بوسط دموعه: حنظل يكعدني على الكرسي الكدامج يشطفني وينظفني وينقلي لهنا
مياده: ارتاح لتشيل هم اني هسه اخذك وارتبك حبيبي بابا
دنكت على وجناته وطبعت بوسه علـى دموعه . قربت الكرسي الابيض من عدنا وحضنته نقلته نقله سريعه عليه
وخرت الكرسي القديم علمود ميتلوخ بأي شي گتله:لازم انزعك الحفاظه اريدك تترجى عليه
بچه وبجيت ويا فعلاً شي صعب على الواحـد بسرعة جريت نفس وَ مسحت دموعي وهمسة
بأذنه: اريدك تتذكر دائما اني بنيتك مياده لتتوقع تلعب نفسي منك، غمض عينك وانسى وجودي
هزلي راسه بمعنى اي وگـومته علكيفي خليته يلزمني من ركبتي ونزعته بسرعه ورجعت كعدته
گال: فتحيلي الصونده واطلعي اكمل واصيحج بويــة
باوعت للصونده شكلتها بالحنفيه وفتحت اللوله وانطيته الــة وَ طلعت بره غسلت ايدي بالمغسلة
ولفيت الحفاظه بعلاكه وتخلصت منها بسرعه، رحت للغرفه فتحت الباب فتحت الشبابيج لملمت
الافراش الى ان سمعته يصيح بأسمي رحت ركض فتحت الحمام نشفتلة واخذت حفاظه جديده
بدلتله وطلعته، نيمته بفراشه وضليت افتر ويه ذاكرتي اتذكر مواقفي البسيطه الي انحفرت بعقلي
اني وهيماء، راحت وراح الحلو وياهه، بغض النظر عنهه أنُ هي اختي بس فعلاً انسانه طيبه
جنت اشوف بعيونها تحب تعيش تحب الحياة تريد تعيش يومهه حالهه حال باقي البنيات
بس للأسف الميخاف الله شنو احجي
ويا ويفتهم هذا الحجي!
ساعه وره ساعه والوكت يمشي بمجرى سريع واني على بطن وحده من الريوك منتظره حنظل
معقوله دفنوهه وبدون ماياخذونـي لا بس هو انطاني كلمه اكيد يووفي بيها.
صار الليل وحنظل ماله أي جيه واني دمعتي ماوكفت وصوت عبير بالقرايه يجي على الجرح
أندكت الباب الخارجيه بسرعه رحت فتحتها لگيت حنظل وراه سيارات كومه گال:عباتج على راسج، عينج بالكاع گبل بالسياره
رحت بسرعه بدون ماجاوبه جريت العبايه
ياسمين: الله وياج ربي يرحمها ويغفرله
ثريه لبست عبايه مادري منين وگالت: وياج يلا
طلعنا اني وثريه باوعت لوحده من السياره
لگيت التابوت محطوط على السياره دموعي نزلن مجرد ماشافنهه هيج، صعبه صعبه صعبه!
حنظل نتر: سياره يلكائنات بلسياره يلكائنات
جرتني ثريه ودخلنه السياره وكعدنه ليوره وحنظل بالصدر وولد معضل يسوق لابس شفقه ونظارات
مانتبهت اله بس ماعتقد غريب عليه، ثريه قدمتلي كلينس مسحت دموعي بيهن
وحركت السيارات وحده تمشي وره الثانيه
الولد گال : الفاتحه مسبوقه بالصلوات
صلينه وفتحت اديه اقره الفاتحة ترستهن دموع ، كملت قرايتها فركت ايديه ومسحت وجهي، اجتي عيني بعين حنظل من خلال المرايا عيونه صافية
ممزوجه بطعم غيرة بتعب بقهر صعب تفسيرهن بهاي اللحظات، درت وجهي للجامة الي بصفي
وبديت اباوع على العالم شلون تمشي وشلون تضحك وعايشه يومها حلو، وهذا الي يشوف
السياره الي عليها جنازه يتأثر ويانة ويرفع ايده يسلم على الجنازه، نوعاً ما شويه مستغربه
من تصرفات الناس بهذا الشكل، طريق مقبرة النجف طويل وعباره عن ازدحامات
ماعرف شكد مر علينه من وكت الى أن وصلنه السيطره مال النجف حنظل گح
وگال:روسجن يابَ
اني وثريه وحده باوعت على الثانيه، مافتهمنه شي اشرتلي ثريه بمعنى خلى ندنك روسنه
الى ان عبرناهه رجعنه رفعناهن باوعتله من المرايا حط اصبعه بحلكه وعظه
ماعرف تصرفه هو تهديد بمعنى بسيطه او شنو! وصلنه للمقبره وَ بالگوه دخلنه
بالليل وَ أزدحام لعد شكـد اكـو موتى !
وهاي الناس تكتل وتكره وتحقد وتزعل مو على ساعه يمررونا بهـذا الطريـق مايتعضون •
دخلنه بالافرع بين الگبور مر كدامي الالف گبر نصهن عليهن صور الموتى والنص الثاني لا
دموعي ينزلن ويترحمن على هذا الشايب والشاب والطفل والمره، كُلها مجتمعه هنا
الى أن وگفت السياره كدام قطعه بيها گبر واحد
نزل حنظل واني نزلت وثريه ورايه رأساً لزمتني
وجرتني على صفحه، اباوع للزلم ينزلون بالتابوت علكيفهم ودموعي بكل حرگه تنزل معقوله هيماء
راح اشهد على دفنهه معقوله!
حطو التابوت بالگـاع وطلعوهه منه أجه شيخ رجال جبير
گال: الفاتحه على روح المرحومه هيماء معطر افواهكم بالصلوات المحمديه
صلينه كلنه وقرينه الفاتحه بوسط الدموع وشهكاتي الجانت تهمس بالوادي
رجع گال:هيماء هيماء هيماء
كوني بخير عند رحمة رب العالمين، وتذكري دائما
قطع كلامه وگال: نزلوه بالكبر نقله وحده
وهو گال هاي الكلمات وَ گلبي انزرف والله انزرف شهكت بسرعة ورحت ركض عليهه يم راسهه
وصحت بعلو صوتي: ولج هيماء وين عايفتني ولج اني اخيتج كومي
احلفج بداعة ابويه كومي كومي
محتاجتج والله
اجتي ثريه سحلتني منهه كعدتني على التراب، اخذوهه كدامي تعاونوا عليهه ونزلوهه للدفان
نقله وحده مثل ميكول الشيخ، رجع گال: تذكري أن ربك الله وَ نبيك محمد وَ أمامك علي أميـر المؤمنين
اكرر ربك الله ونبيك محمد وَ أمـامك علي أميـر المؤمنين، كوني ضيفة اليوم لليلة الاولى
عند امير المؤمنين •
فتح كتاب صغير وبده يقره أدعيــة ويعيد بيها الى ان گال : ذبـو التراب
اباوع للتراب كدامي عليه نقاط دمعي، گمت اصيح بعلو صوتي: منو الي من بعدج منو الي يهيماء
گمت اشيل بالتراب واذب على راسي من حرگتي وَ ضيمي
اسمع الشيخ يقره سورة يس، وذوله يدفنون بيها
كملوا دفن وبقه بس القريب من عدنة
رحت للگبر على رجليـة وكعدت يمها شلت حفنة تراب ولطمت بي وجهي وصحت: شلون بيج هيماء شلون
دنكـت راسي على الگبر وبديت أحجي وياهه
النـار بگلبـي جبيرة منو يطفيها ليش ليش عفتيني
مثل حنيتج حبيبة گلبـي لليوم ابد ماشافت عيوني
اجتني ثريه كومتني علكيفها وَ اخدتني للسياره صعدتني بيها اباوع لحنظل علك شموع وبخور
ورش مي واجه صعد وكلنا رجعنا واني ألـوم بگلبـي شلون عفتهه هنا
حطيت راسي على الجامه طول الطريق ودموعي توكع على وجناتي تسولف ويايه ثريه
واني مو يمهه. وصلنا البيت بعد ماجان الطريق طويل محمل بالحزن والبجي والضيم والقهر
فتحت غرفة ابويه اول مادخلت مسح دموعه وگال: دفنتوهه
نزلت دموعي وكتله: نام بويه نام
طلعت بسرعه من الغرفه ماريد اجاوبه ولاريد احجي تعبانه تعبانه من كل شي
لگيت ثريه دخلت الغرفة مالتهن تنام ورفيق نايم يم باب المطبخ
ماعرف اكعده اعوفه، عفته ومشيت طلعت بالحديقه اريد اكعد وابجي براحتي
باوعت ماكو احد طلعت علكيفي مرتجيه على الحايط وامشي بالگـوه شفت بلوك مفلش كدامي
اخذت بلوكتين وحده فوك الثانيه حطيتهن وكعدت، رفعت راسي ليفوك اباوع للنجوم شلون
حلوات وحده بصف الثانيه الله هسه هيماء اكيد وياهن، قطع تفكيري صوت من ورايه: أكلتي شي يابَ
باوعتلة بعيون مغوركه بالدموع تقرب عليه راح جاب بلوك حطهن بصفي وكعد يمي گال: اسف
مسحت دموعي وكتله:على شنو
حنظل: ماكدرت اجيبها الج وتشبعين منها
نزلت دمعتي ومسحتهه: سويت التكدر عليه
حنظل:بس مطلوب من عندي جان لازم اسوي الاكثر
مياده: لتنسى انت مو شخص مسؤول بالدولة وعندك كُتل قويه تحصل التريده برمشة عين
حنظل
حنظل: عيناي كدامج يابَ
مياده:لتلوم نفسك
حنظل: اكلتي؟
مياده: شلون اكل واختي راحت راحت مني
حنظل; تردين تموتين وراهه
باوعتله وكتله: ياريت
حنظل:ليش تردين تموتين وراهه واحنه منو النه
مياده:هيماء قطعه من روحي ماكدر بلياها
حنظل: تدرين شي؟
مياده:شنو
حنظل:اني خسرت امي وابويه تعرفين شنو
خسرت الاثنين ام واب تعرفين لو لا
تمنيت اموت وراهم،
بس مامتت وبيومهه عرفت
مياده:شنو عرفت
حنظل:محد مات وره المات، محد مات وره احبابه
نزلت دمعتي ومسحته
كتله:بس اني اريد اموت
حنظل:واني منو اليه
باوعتله بحواجب مطبوكه ووجنات منكعه بدموع: وانت شنو بيك
گح وگال:اتركيني، هيج بسهوله
مياده: شفتهم من كلامك
حنظل:انسي، انتظري هسه اجي
كام من مكانه ودخل جوه رجعت اباوع للنجوم عليكفي واتأمل بجمالهن، شويه واجه كعد
مد ايده بيهه جيس كيكه وعصير
حنظل: أكلي مايصير تره ترحين من ايديه يابَ
مياده:ماشتهي ماريد لتجبرني
حنظل:مياده
مياده:حنظل
حنظل:باوعي بوجهي
باوعت بوجهه واني كاتلني القهر وبنفس الوقت مستحيه
ابتسم بوجهي عيونه لمعن وغمازته برزت ، شواربه شعرهن حلو گال:يابَ انتي عود ليش هيج حلوه
نزلت راسي وكتله: حنظل ماريد ماشتهي
حنظل:تاكلين يعني تاكلين
فتح الجيس وقدم الكيكه اليه، نترت بي: ماريد لتلح تره اكوم والله
حنظل: تگومين واتركيني اني حنظل عضلة
باوعتله بطرف عين وكتله: عظله ايباه دسكت اسكت
ضحك وگال: يابَ النظرات الصفح منج شحلاتهن
يلا عاد شو طياره طياره اكلي
وخرت حلكي ليوره وكتله: يلا راح اكل امري لله
حنظل: ام دميعه
باوعتله وبديت اكل بالكيكه مستحيه ومرتبكه ومتوتره بالكوه كملتهه،
فتحلي العصير وگال: اشربي شويه
مياده: لا ماريد وخر ،عطشانه مي
حنظل: تره الـي بصفج حنظل عضله، يروي العطاشه بعيونه تردين أرويــج
كمل كلامه وغمزلي، ابتمست وكتله: حنظل
حنظل: ضحكته
مياده: لا عيونه
وضحكنه سويـة
مياده: افكر ان ُ نطلع نشتغل لازم هنا كل وحده بينا ادبر فلوسهه وتكون يومهه
طگ رگبته وطبگ حواجبه گال: وعضله شنو جرجوب مال باب
ابتسمت وكتله: ميصير كلنه عليك لازم نتقاسم كلشي مادام عايشين ببيت واحد
گال: مياده
مياده: ادري ترفض كلامي بس لازم نسوي هيج
حنظل:مياده
باوعتله وكتله: ها!
حنظل: مادام حنظل يتنفس الهوى، وتضوه عيونه بياض وجناتج ماريدج تفكرين
بهاي الزاعبيل شغل وماغيرة
مياده:و شتلحك تصيرلنه حنظل وبعدين شنو تشتغل
حنظل:نامي مرتاحه وماتعتازين شي بوجودي اعيد كلامي
مياده: حنظل
حنظل:يابَ هيج اسمي حلو، ماحسيت بحلاته اله من تگولينه
ابتسمت وضربته بيده بخفه وكتله: حنظل بس عاد فهمني
حنظل:مياده منا ورايح لازم تتعودين من احجي حجايه لتجادليني بيها
مياده:جوز غلط حجايتك وتهدد حياة غيرك
حنظل:اهدد حياة العالم كله، واله حياتج خط احمر
عقجت حواجبي وكتله:عبير البنيه لازم ترجع
خطيه هنا باقيه وشجابها مناك لهنا
حنظل:ترد باجر ويه حجي ناصح
مياده: وحجي ناصح وينه،
حنظل:بجيبي، بات يم صديقه
مياده: خطيه ليش ماجبته وياك
حنظل: مياده يابَ اسئلتج كثرانه شو
مياده: كايمه اجيب بكل مي
حنظل: بكل منو؟
ضحكنه سويه وكتله:حنظل شنو تضحك عليه
حنظل:تدرين ضحكتج حلوه
مياده:اي ادري كلولي
اباوعله عقج حواجبه بلل شفايفه وگال بصوت خشن:منهو الكالج
ضحكت وكتله:منهو منهو مادري
ابتسم وگال:اها تضحكين عليه مو
مياده: لا بس منهو حلوه من تكوله، بس هو منهو مادري
ضحك وبرزت غمازتة،شكلة رجولي حلو
گال:سنانج ماتطلع كدام غيري
مياده:حنظل
حنظل:ها!
مياده: شنو سبب هذا الاهتمام؟
حنظل:مياده
مياده:لتعوف سؤالي جاوب
حنظل: گومي نامي تأخر الوكت أم بكل •
باوعتله صفح، رئساً همس:عيونج
رجعت خصلت شعري ليوره وكمت على حيلي باوعتله ورحت مشيت ليجوه دخلت يم ابويه،
نمت يمه نومه عميقه ناسيه كلشي يمي، الى ان كعدت على صوت
ثريه: مياده كومي سلمي على عبير
راح تروح البنيه
گمت على حيلي باوعت للساعه سبعة الصبح گلت بگلبي: اكو احد يطلع بهيج وكت
طلعت من الغرفه واني النعاس كاتلني كتل ثريه انطتني شال
كالت: حجي ناصح موجود لبسي شال
لبسته بسرعه وطلعت صارت بوجهي حضنتني وبجت
گالت:مصابج مصابي تمنيت ابقه اكثر واخذ من مصابج شويه بس تعرفين مرتبطة ببستان الحجي
طبطبت على ضهره وكتله: ماقصرتي حبيبه، مودعه بالله
حجي ناصح اخذ من خاطري وراحو ، استغربت حنظل ماهو سئلت ثريه
كتله: وين حنظل لعد
ثريه: راح للسوك يجيب مسواك ويجي
رحت للحمام كملت تغسيل ورحت لرفيق النايم بباب المطبخ
كعدته: رفيق رفيق گوم اسبح المي حلو
ويلا صحصح
رفيق:خلص البحر البحر البحر مو مو مو
هزيت راسي والدموع متجمعه بعيوني: اي اي خلص
عفته وبديت بتنظيف وترتيب البيت التهيت بي وماحسيت على الوكت اله وصاير ساعه ثمانيه
ونص، اندكت الباب بللت شفايفي منو يجي هسه
باوعت ليوره ثريه
كالت: لبسي شالج وشوفي منو من وره الباب
بدون ماجاوبه حطيت الشال على راسي
وطلعت كلت:منو على الباب عيني
اجاني صوت رجال خشن: كهرباء كهرباء، طريق خلي اقره الميزانيه
بلعت ريكي شسوي هسه ياميزانيه هاي يقراهه
فتحت الباب وكتله: خويه وين هي الميزانيه ماندله
گال: سويلي طريق عمو، اكيد حاطيها بره
فتحتله الباب ودخل واني خايفه منه، والف فكره گـشره على بالي اجتي
گال: ذيج وينهه وره النبگه •
راحله حط بلوك وصعد قره شكد، نزل جر الورقه
مالته كتب بيهه مادري شنو وگال: خمسة وتلاثين
بلعت ريكي ردت أجاوبة رأساً اجاني صوت حنظل: اي تعال اخذهه مني
باوعتله عيونه مخوزرات عليه، نتل محفظته وانطاه المبلغ وراح
راح وراه رگع الباب بكل قوة
اجاني بقمة العصبيه والنار مبينه على وجهه
رأساً رعد بوجهي
: وجهج لليسرى گبل ليجوه •
بللت شفايفي وكتله: ابو الكهرباء تره
صاح: والكدامج عجل مايدري ابو الكهرباء ها مايدري دخلي ليجوه
رحت بسرعه دخلت، دخل ورايه ذب العلاليك وصاح: اوگفي وتعاي كدامي اوكفي
وكفت بمكاني وثريه اجتي: شبيك حنظل غير ابو الكهرباء
صاح: رجال غريب يدخل بيتي والافنديه وَاگـفه كدامه بدشداشه نص ردان والكذله طالعة
مياده: تره ابو الكهرباء واجيت انت وشفت
صفك ايديه وصاح: يلكائنات يالاسلام وملابسج وملابسج
حط اصبعه وبحلگه
وگال:اخ يمحمد مياده ارحمي روحج احسلج لا تتحديني لا تتحديني
دار وجهه بأتجاه باب الهـول ضربها وَ صاح:
ذاك اليوم شگلت شگلت
افرك بيدية ماعرف شجاوبة : ما ما مادري
صفك بيده وصاح: اي ماتدرين ماتدرين
هين يمياده لا ابشرج منا
وَ فـكــي أذنــج زين ويايه
وثريه خليج شاهده
أحنــة لازم نتــزوج •
گلبي أدهورت نبضاتة
وَ بطني عرگـت
رأساً صحت: شنو
يتبع ...
لاتنسوا التصويت والتعليق •
نلتقي في بارت جديـد
للمتابعة في الانستكرام: tahsin_luqman
محبتـي للجميـع
تحسين لقمان