عزيزي القارئ فضلاً وَ ليس َ أمراً أضغط تصويت لنشر المزيد من احداث الروايــة
فستان أحمر
تحسين لقمان
أسـمع صوت ياسمين من ورايه باوعتلهه صحت عليهه:لحكي ولج حنظل راح يرتكب جريمة بالولد
اباوعلها تركض وَ تلهث وتصيح:حنظل حنظل ابو الغيره
ضياء:اذا انت أبـن ابوك اضرب وشوف شلون ينكسر ضهرك عار
اباوع لحنظل واني حاطه ايدي على صدري يصعد وينزل من الخوف طلع صوت بحلكه كأنما واحد
يريد يذب شي من حلكه وتفل بوجه ضياء و انطاه كله بكصته،ضياء رجع ليوره بسرعه عثر
ووكع ركضت عليه ياسمين:يا حنظل حنظل تخبلت لج مياده لحكـي على ابوج
ضليت واكفه بمكاني الخوف كاتلني كتل فعلا من يكون الخوف داخل جسمج يوقفج عن كلشي
ويخليج متاخذين أي شي هزيت راسي باوعـت لحنظل دفع ياسمين وركض على ضياء جره من ياخته
وصاح:باوع لك وَ أسمعني زين إن شفتك تحوم داير مداير البيت أو مجرد ملمح كلمه لمياده
اكتلك بساعته وقد أعذر من أنـذر •
اجه رجال جبير يركض من بعيد ويصيح گول يالله
أجـة تقرب علينه وجر حنظل من ايده:
ها ها حنظل وخر وخر عاد
ويجر بحنظل من ايده وَ ياسميـن من خوفها أجتـي بصفي تركض وَ ثريه اجتي من ورانه
تصيح بالي مو يمها خايفه من كلشي كدامي صاح ضياء:لك تنام عليه وتهددني اله أنعلك بالساعه الي اجيت بيهه
وهد عليه حنظل بالصياح والعياط رجعت ليوره وحطيت ايدي على وجهي لأن حرفياً تعبانه من
كلشي وهذا الرجال بنصهم يفاكك بيهم ماحس اله ضياء يضرب بحنظل بوكسيات بطنه ،
ياسمين تصيح: يا أهل الغيره يا أهل الرحم وين التفزعلنه ياناس ياعالم
وخرت ايدي ورحت للحديقه ادور على اي شي حنظل راح يموت بيد ضياء ، امشي وادردم بعلو
صوتي اسمع من جوه صياح ابويه بس مو بيدي ماكدر اروحلة، اجتي عيني على برج مال طيور نصه مهدم جريتلي خشبه كلهه
مسامير لزمتهه من الطارف وطلعت لگيت ولد المنطقه مجموعه ماخذه حنظل بجهه ومجموعه
ماخذه ضياء بجهه وواحد يوعد بالثاني ويشمر كلمات بوجه الثاني
الرجال يگله: انت أسمع زين تهج من ديرتنا ومالك محطه هنا حنظل ابنه ومنه وبينه منهو
انت يابَ تمسي وتصبح بوجهنه •
حنظل:عوفوني والنبي ازوعه حليب امه هلنكس صاير زلمه براسي
ضياء:رايح رايح اني وَ ألـي جيه هنا وكعده هنا
نفض ايده من بين الشباب وراح ركض على الشارع العام ، لزمت ايدي ياسمين ذبت العوده
مني وسحلتني بأتجاه البيت وهي تهمس:ادخلي ادخلي يمعوده هسه يگب علينه حنظل
شصخمتي وهيج الولد يثور •
وگفنه بنص الحديقه واني خايفه لازمة ايدين ياسمين وحاطة أذاني يمهم اسمع الاصوات بره
يم الباب بدت تخف معناهه راحوا اجاني صوت رجال جبير بالعمر يهدي بحنظل ويعاتبه بس مو كلش أسمع
گمت أفتر بالحديقه وصوت ابويه يعلى استغربت شبي هيج باوعت على ياسمين ولوني مخطوف
رحت ركض ليجوه وكلبي يدگ بكل قوه من الخوف والقلق والتوتر بس اريد اوصل للغرفه
مكاعده اكدر احس الدرب صار طويل كلش عليه، فتحت الباب بسرعه لگيت ابويه بموقف مستحيل
انساه عمت عيني اي والله واگع من الجربايه وحاط ايده على خاصرته يون من الوجع رحتله
ركض ورايه دخلت ثريه،
مياده:اسم الله الرحمن بويه غير تنتبه
بالكوه طلع الكلمات من حلگه:هو بويه بگـى انتباه بهذا عمرنة
أسمـع ونينة ودموعي تنـزل علية باوعت لطارف حلكه يذب دم رجعت عيوني لثريه كتلهه: وراج الكلنيس
انطتنياه بسرعة اخذت مجموعه وبديت امسح بـالدم وكلما امسح يطلع بعد دم فتحت حلكة
علكيفي لكيت سن من سنانه يذب دم
صحت بصوت عالي علمـود يسمعنـي:بويه بويه هاي الكلنيسه حاطتهه بحلكك بين ما يگطع الدم وخرهه
اباوعله هزلي راسه وياخذ الـنفس بالكوه
مياده:ثريه تكدرين ويايه تشيلي انتي من الرجلين واني منا مقابيلج
اجتي عليه ركض شالت رجليه وهي ساكته بس دموعه تنزل، حسبت للثلاثه ورفعنا رأساً على الجربايه
گال:حبة حبة
عقجت حواجبي مستغربه كلمته دنگـت عليه وكتله:علكيفك بويه علمود افتهمك يمك اني شو يلا اكطع هذا النفس أستقر اهدأ
نفسه مامنتظم يصعد وينزل ثريه كعدت على الكرسي تباوعلنه واني كاعده يم راسه امسدله
شعره شفته بلع ريگه رفع ايده وگال:حبة الضغط ضغطي بويه انطيني
گمت على حيلي رحت على المكان الي مأشر عليه جريت الشريط مال الحبوب وايدي ترجف ماعرف
اخدتلي حبايه ورحت يمه كعدته شويه حطيتله المخده وراه علمود متوكف الحبايه بلعومه بلعهه
وشربته مي ماحس اله صوت حنظل بالحديقه يصيح
اني أسمعة وَ ألم لوية ببطني فضيـع وَ كصتي عركـت من الخوف شطلعنـي ماعرف
ثريه:أطلعي شوفي واني أبقه يم عمي
مياده:ها لا اني ابقه وانتي روحي
تقربتلي لزمتني من ايدي وكالت:شبيج مياده رايحه للمشنقه تره حنظل هذا
مياده:لا مو اشوف زحمه اني اروحله يعني روحيله انتي وَ أجـرج عند الله
كاعده تحجي ثريه جان يصيح من الهول بأسمي الوجع زاد بطني اكثر ثريه تحركلي بحاجبه بمعنى
روحي روحي، اخذت نفس على السريع ثبتت روحي زين وطلعت من الغرفه لكيته يمشي بالهول
ويصفك بيده يحجي كلمات مو كلش مفهومه
صار بوجهي اول ماشافني صاح
حنظل:زحمه اصلا زحمه عليج توكفين واطلعين راسج بعد طلعي ليكدام واوكفي واحجي
واتمضحكي ويا •
بلعت ريگـي اباوعله لابس فانيله والعرك يصب من راسه، ودم يوكع من خشمه
رطبت شفايفي وكتله:بس اني ماسويت شي
بعدني مامكمله كلامي رأساً صاح: شتسوين بعد لخاطر الحمزه فوك المسويتة
ماكو زلم بالبيت واطلعين راسج ها ماكو تبخروا خلصو
رطبت شفايفي وكتله: الباب اندكت بسرعه انتظرتك تنزل مانزلت كلت جوز نام ورحت فتحته
اباوعله راح بأتجاه باب الهول ركعه برجله رأساً انطبكت زاد الخوف عندي لأن فعلا حنظل كدامي
شخصيه ثانيه عن ما جان قبل صاح:أسمعـي كلامي وانتبهي اله زين كاعده تكولين جوز يعني جائز ان اكون نايم ،
اجتي ياسمين من الدرج بيدهه علبه مال ادويه كالت:حنظل اهده مو زين عليك عندك ضغط
استغربت بنفس الوقت ياسمين شمعرفهه بحنظل، رجعت كالت: تره مياده ماكتلت سيد علمود هذا الصياح
صاح بيهه:لو كاتله سيد ولا مسويه هاي السوايه لو الظاهر متعوده على شغل مهره
هو وگال هلكلمه نغزت گلبـي بسرعة صحت بي: لهنا وبس عاد شنو منو انت وتتحكم بيه
ها منو انت لتشوفني انطيتك مجال قبل احترم نفسك وبس عاد اطلع واحجي واضحك ويه
اليعجبني وعندي أب يحاسبني مو تجي انت وغيرك يحاسبني كافي الضيم والقهر المر عليه هناك
كملت كلامي واني بالگوة واكفـة ايدي ترجف ووجناتي يرجفن دموعي تنزل اباوعله بسرعه راح لياسمين شال علبة الادويه وركعه بالگاع وصاح: مياده أقسم برب العالمين
كطع كلامه وتقرب ووگف بنص الهول ورجع
صاح:أقسم برب العالمين وبعد تعرفين شنو رب العالمين يعني خالك هذا الكون واقسم بالنجوم
الي تلالي تالي الليل واقسم بشگة الكمر
أن لگفتج بره يمياده أگصن رجلياتج كص •
صحت بي بسرعه:مو من حقك افتهمت لو لا
صفگ بأيده وصاح:لك يالاسلام لا تراددين لا
تراددين من اكول شي تم وانلصمي، طلعه
للحديقه ماكو البيت بيتي وخلي الكل يسمع شكو واحد عايش جوه هذا السكف يمشي بكلامي وبس
بلعت ريگـي وتقربت منه صحت بعلو صوتي: اذا البيت بيتك مو تذلنه بي ذل الجلاب،
وآني ماخذه ابويه والبنات وطالعين من بيتك وتهنى بي براحتك
اباوعلة باوع صفح أجتي عيني على شريان ركبته شلون بارزه اكثر رجعت ليوره لان عصبي كلش
باوعلي تقرب علية و جرني من زندي وصاح: طلعه منا ماكو طلعه منا ماكو وبعد اكولهه باعلى صوتي طلعه منا ماكو
ثريه:سمو بالله يمعودين
مياده: تعاي شوفي حجيه يريد يحبسنه شنو احنه وين كاعدين.
بعدني ما مكمله كلامي شال رجله ودگهه بالگاع صاح:مياده مياده سكتي لج سكتي بويه و حگ الخگلج انطيج لطمه على حلگج
دار وجهه على ياسمين وصاح:سكتوهه
سكتوهه لا أبـتلي بيهه
مسحت دموعي وكتله:فوك ضيم الدنيا ضيمك منو انت وتتحكم بينه، ارحمونه عاد
حنظل:اني اني حنظل الي ركض وره فلان وعلان في سبيل يطلعج من السجن وميخليج بذاك
المستنقع اني حنظل الي ليل ونهار جان يسمع ونين ابوج وهو يرادد بأسمج واسمعيني زين
مادام انتي عايشه ويايه هاهيَ تتحملين كلشي وانتي ساكته
اختج ماهي مختفيه لحد ألان رجليه انفتحن ميه وثمانين من وره الركض و ذوله يراقبون بيوتنه
عبالج طلعتي من السجن انتهى كلشي وبعد ماكو مطلك كلش متوهمه
اكعدي واسكتي انتي والبنات واذا على الرحمه فأرحمينا انتي
دار وجهه وراح كعد على التخم، راحتله ياسمين بسرعه ثريه جرتني من ايدي تريد ادخلني للغرفه
من گال كلماته مادري ليش حسيت ان اني غلطت بس وكت العصبية وهو كلامة أكيـد أتصرف هيج شكد شايل بكلبه من وجع من كثر
ماراكض بقضيتي وبقضية اختي وبأبويه
هلمسكين، كاعدات ندخل الغرفه جان يجي رفيق
يصيح: مي مي مي رش رش مي مي
باوعتله لكيته لازم مسدس مال مي ثريه كلتله: شسمه هو هذا الولد حتى اسمه راح مني
اتقرب من عدنه ويسوي حركة سحب الاقسام ويوجه السلاح علينه:طا طا رش رش،مي
مياده:رفيق منين جبت هاي السوالف ذبه واكعد عاقل
رفيق:طا طا موتوا موتوا اي اي موتوا بالكاع
ف فله اي اي ف فله ماتت ماتت بهذا طا طا
يشيل رجله اليمنى واليسرى يدبج بالگاع ويصيح:جك جك جك جك خطار خطار الفرح
ابتسمتله رأساً رغم الوجع الي بداخلي ثريه كلتله وهي تبتسم:خطار عدنه الفرح
وشنسوي بعد رفيق
رفيق: صص صوان صواني اي اي صواني شم شمعه اي اي شمعه
بوسط العصبية ضحكنه وكملتله ثريه:ونعلك صواني شموع
ماحس اله رفيق نام بالكاع ووجه عليه المسدس يرش عليه مي وحنظل بس ينفخ ويتأفف شلون
عصبي ماتوقعته يكون فعلا ً بهذا الشكل، جرتني ثريه ليجوه للغرفه باوعت للغرفه كلش بسيطه
ومابيهه اثاث هواي زين هو جان يم حجي مطلك بكل ذيج الفتره شلون طلعله هيج بيت بي أثاث وهو أيجـار
كعدتني ثرية على الكرسي وجرت كرسي ثاني وكعدت كدامي كالت: تره كل الحجاه حنظل صحيح
يامياده لازم ننتبه اكثر على روحنا لأن مايصير ننسى انُ احنه ألمن أنسجنة
وويامن جنه نشتغل •
مياده:خايف علينه على عيني وراسي يجي يطلب بأحترام مو يشمر بالحجي وبعدين ششافني كدامه
لهل درجه اني رخيصه ياثريه أسلم روحي لضياء
صاحت بيه بهدوء:فتحي فتحي لمخج شويه
اضاهر يامياده نسيتي ويامن جنتي تشتغلين خلي اذكرج شويه ويه مهره و وام مازن و حجي
مطلك وفروعهم ضيگه وطويله و مطشره
وجربتيهم قبل ويمج الحساب ونتوقع منهم وجود ضياء حاليا وتقربه منج هو غايه منهم
علمود يوصلولج لازم تعرفين مياده أنُ انتي او احنه كلنه ماكاعدين نتعامل ويه بشر لا ويه اشباح
ناس مسيطره على الوضع ونفوذهم بحر وانتي جنتي يمهم وتحت سگف واحد وشفتي بعينج
شصار ماصار
مياده:ونضل طول عمرنه هيج لاطلعه ولاطبه ولله شنو مهره وجماعته بعد اثير كالت اساعدجن اذا
اجيتن اليه ليش منروحله •
لمت جفوف ايديهه وغمتني گالت:ماما حجي السياره هيج كلاوات الله يخليج ياعيوني انتي هي متدري ماكو قانون
حطيت ايدي على حنجي وكتلهه:شو هو انتي طلعتي بوكتهه ايدج والقانون شنو غيرج هسه
ثريه:اذا اتجه للقانون حاليا راح تكون خسائر بالنسبه اليه لان ما أمنه لا أمي ولا ملاك لازم اساير الوضع
مياده:وشلون تسايري
ثريه:بركصه وبهزه وطكة علج بالحلك
مياده:افتهم من كلامج راح ترجعين لنفس الدرب
ثريه:اذا طلبت السالفه اكيد ارجع علمود اخيتي جا اني هنا مرتاحه وأختي هناك محصوره
مياده:زين احنه ليش ما نلعبهه صح
دخلت ياسمين علينه وكالت:شلون نلعبهه
ثريه:عزه بعينج ماتفوتين شي جنتي تتسنطين مو
ياسمين: سويت خشم حنظل ووكلت هلولد
المخبل رفيق واجيت بالدرب منا وسمعتجن
مياده:اكعدي وافتهمي شلون
اجت كعدت كدامنه وكملت كلامي:ثريه انتي قبل شويه كلتي جوز ضياء يطلع منهم وبيهم جوز هذا الجائز فعلا يطلع صح واكيد
ليش مانوصل لمهره من خلاله لأن اكيد مهره هي ميسرته
ضحكت ثريه وگالت:انتي شماصار وياج منهم ماراح تفهمين انُ ذوله التعاميلهم أكبر
منج ومني افتهمي عاد •
ياسمين: لنفرض تواصلنه ويه ضياء ما أعتقد نكدر ننجح وفعلا كلام ثريه اني صارلي سنين
و أعرف الحيل مالتـهم مانكدر نأمن بضياء •
مياده: ماعرف والله ماعرف گـايمه اشوف ابويه
ولا تضلن تفترن تره عيب من حنظل
ياسمين: هو الولد كال ناخذ هاي الغرفة اني وثريه وَ أنتي ويه أبـوج ورفيق بغرفة ويه حنظل
مياده:عسى مانام بالممر أهـم شي نايمه جوه سگف
درت وجهي ردت اطلع رجعت على ياسمين :فدوه حنظل وين راح اريد اطلع
ياسمين:الخوف شحلاته، أستجني من البدايه ماده بوزج من الباب
مادري وين راح يمكن للمطبخ مادري ليفوك لغرفته
مياده:خطية راد يبـدل ويروح للشغل
ياسمين:هو خطية أي فعلاً خطية أسـويله خشمة ويگـلي هاي جزاتي أتعـب وَ أركـض هيج تجازيني
مياده:اكلج فدوه لطولج هسه هو لا أعرفة ولا يعرفني كلش زين
عشتو على شنو يضوج •
باوعتلي صفح وكالت:اتركي هاي الـهوسه وگـولي شنو نسوي غدة
عقجت حواجبي وكتلهه: نفس مايوميه حنظل يسوي
كالت: حنظل وابوج وهذا الـولد صارلهم يومين من أجوي هنـا
حطيت ايدي على صدري وكلتله:وين جانو
وانتي شمدريج
كالت:هو گـلي جانو بشقة ويومين من أجوي
مياده:ماعرف شگـلج بس شو هواي اكو سوالف مامفهومه لحد ألان
ثريه:روحي لأبـوج خطية وحده وعوفينه أحنـة
هزيت راسي بمعنى أي وطلعت من الغرفه بسرعة
لكيت الهول مابي أحـد رحت بأتجاه غرفة ابويه بس ترددت باوعت للمطبخ گلت خلي اشوفه وين
مديت راسي صارت عيني بعينة اجاني صوته:شبيج هيج تمشين
باوعتلة مبدل ملابسة ولازك لزگة على خشمة بلعـت ريكي وكتله:ماكو شي سمعت طكطگـه بالمطبخ
واجيت اشوف منو وهسه رايحه اني •
حنظل: أي تعاي أدخلي وياية ساعديني
مياده:بشنو
حنظل: بأي شي خلي اسوي ريوك لان طگنـي الجوع
مياده:أنتَ تسوي ريـوك
فتح الثلاجة وَ كال: وليش مستغربه منو يسوي يوميه بس منا ورايح
تقرب عليه وكال: فتحي ايدج
فتحته وحط البيض بيدي وگال:منا ورايح عليج الطبخ كل وحده تلزم شي وتشتغل
أبـاوعله عافني وراح جر كرسي من الميز وكعد عليه
مياده:زين الطاوة المواعين وين
دلاني بيهن كل واحد بركن بالكاونتر رحت عليهن وطلعتلي طاوه وبديت أحـظر بالريوك الى أن
كملته فتحت الثلاجه وطلعت أجـبان وزيتون
وديته على الميز وكعدت كبـاله گتله:مبينه طيبه
من الريحه
حنظل: مو مهم الريحه المهم الطعم مو صح
سكتت وبديت آكل رفعت عيني لكيته يباوعلي
رأساً نزل راسه على الماعون وگال: شلونج
وگفت اللكمه بحلكي كتله:شلوني بعد هاي الـمسرحيـه الصارت
جاوبـني بنتر: وليش تعتبريها مسرحيه وتالي وياج
رجعتلياه بسرعه:من تحجي تحجي بهداوه مو صياح وعياط مو بس أنت بشر الى وَياك هم بشر
حنظل:واذا المقابيلي مايفتهم شلون أتعـامل ويا
مياده:أكل حنظل
ضرب الميز وصاح:من احجي مو تسكتيني انتي واكفه ويا بالباب وتحجين وترديني أضـل ساكت
مياده:رجعنه للصياح وللعياط كايمه آني
دفعت الكرسي مال الميز علمود أگـوم لأن اذا ابقه راح تگب العيطه
اول ماكمت شال الخاشوكه وضربهه بالكاونتر وصاح:كعدي
صحت بي:شتريد شتريد بس تصيح وتعيط
حنظل:من احجي وياج احجي عدل
مياده:وشكاعده احجي اني بس انت الظاهر متعرف تناقش
شال ايده نفضهه من الخبز وفرك وجهه حيل وگال
بهدوء:مياده كعدي
مياده:اذا تكعد تصيح وترزل اخلي وأكوم
جر نفس وگال: كعدي هاهيَ
كعدت علكيفي باوعتله وكلت: شصار بهاي الفتره
باوع بوجهي ضل مركز كلش استحيت نزلت راسي ليجوه گال:تدرين بعيونج حلوه
ضليت ساكتة گال:تعرفين شنو
مياده:شنو
حنظل: جان ابوج يوصفلي جمالج وحسنج وخاصةً عيونج بس ماتوقعت بهذا الشكل
حطيت ايدي جو حنجي وكتله: بس عاد لتجذب هو ابويه وين شايفني
ضحك وصفك أيده غمازته برزت أنطـت جمالية اكثر لسمارة رجع گال:هو انتي شتعرفين يابَ
بعدج كلشي ماكو •
هزيت راسي وكتله:ماتوصلت لهيماء
عدل كعدته وگـال: أكـو ضابط يصير صاحبي راح يوصلهه ونشوف شنو يكول
مياده:زين هذا منين الضابط وشلون كدر يوصل
ضحك وگـال: لؤي ضابط استخبارات صاحب قضايا هوايه وما ياخذ قضايا فارغه ومادري شنو
مياده: هاي الـي مادري شنو شلون صايره هو رجال يشتغل ويطلع گبل
حنظل: اقصد ياخذ القضايا الصعبه والمعقده والحمدلله بوسطات حصلته واخذ قضية اختـج
مياده: شلون قضيت سبع أشهر ويه أبويه ورفيق
غمض عينه وطبگ حاجبه
گال: ضايگه طعم المُر
هزيت راسي بمعنى أي رجع كمل: عشناهه بمروره مو طبيعيه بالگوه تنجرع كعدنه يم حجي ناصح
وطلعنه منه أجرنــة شقة و أجرت هذا البيت
مياده: ليش طلعتوا منه
حنظل: شفتهه زحمه سويت روحي يمه ضليت أشتغل بالگاع ارعاهه من الصبح للعصر وبليل
اركض وره هذا وذاك واسطات علمود اوصل لأختج
مياده:بس ماعرفت ليش طلعتوا
حنظل:بنات يوميه يجن كل وحده شكل وشفته عيب زحمه نبقه احنه اني وابوج ورفيق ماترهم
وهو الحجي الصراحه ماقبل نطلع بس أني ماقبلت
مياده:ملاك اخت ثريه شنو صفه بيهه الدهر
حنظل: لا تجيبين سيرتهه على السانج
ودار وجه على الباب أستغربت من تصرفه رجعت
كتله: ليش وينهه البنية
حط اصابعه بحلكه عضهن وگال بصوت خشن:يابَ وحگ الخلگني لو ما الله بعيني اله اكتلهه خلاص
وَ أشرب من دمهه •
مياده:انت شبيك هيج شراني بس تريد تتعارك
اضاهر انعديت منهم
بعدني ماكملت كلامي كال بنتر:مياده
مياده: غير افتهم شسوت البنيه
گـال:السانج ضبي زين مرات يكتلج
مافتهمت شنو قصده رجعت وكتله: شنو سوت ملاك
حنظل: مو من طبعي احجي بشرف بنيه
مياده: كـاعد تحجيلي اليه مدتحجي لأحد خارج البيت
حنظل: شگلج أگـلج البنية عرضت روحهه عليه وشردت بليله سوده لسعد حباية ورجعناهه بالگوة
لو احجيلج من باگت البنيه عبير علمود تطلع تشتري هلسم الهاري
حطيت ايدي على حلكي وكتله: معقوله ملاك تسوي هيج
حنظل: شو سكتي سكتي يمعوده
مد ايده بجيبه وطلع باكيت جكاير لونه ابيض سحب وحده وورثهه كتله:حنظل
حنظل: عيونه يابَ
مياده: تقربت عليهه لو لا
صفك ايده وگال بنتر: لا ياالله يالاسلام سودتني انتي وتكليلي هيج
مياده: مو قصدي بس مجرد سؤال
حنظل:يابَ البنيه بماي عيني شنو أتقربلهه أحرك روحي بساعته
مياده:وهسه هي وين
حنظل:يم حجي ناصح اذا ما شردت منه
مياده:ليش ماجبتهه وياك؟
حنظل:شجيبهه وياي اذا هي هناك بوسط البنات وكشفت نفسهه اليـة
النوبـة أجيبها ويايه وَ أحنه تلث زلم •
هزيت راسي أستحيت من الحجي كمت من يمه رحت بأتجاه السنك باوعتله وكتله بصوت مهزوز :حنظل اختي اريدهه
رفعت أيدي اليـمنى ومسحت دمعتي الي نزلت
كام على حيله وگال بصوت خشن: مسحي دموعج ماريد تبجين بعد من اني موجود
مياده: خايفه انت هم لا تروح
حنظل:يابَ باوعي الكاتبه الله يصير مهما يكون
وعساه مافد يوم اجيج بتابوت اريدج تكملين وين ما أعوفج
مسحت دموعي وكتله بعيون أدمـع من جديد:ليش تحجي هيج عمرك طويل
حنظل:طَالع اني اكمل شغلي
مياده: اختي ماوصيك بغير شي ومارايده منك شي
حنظل: كاعده تشوفين شاربي الماخذ حيز بوجهي
هزيت راسي بمعنى اي
گال: أختج تجيج من هذا الشارب، وازينه كدامج أن ماجتج
بس دموعج مسحيهه وهاهيَ
دار وجه راد يطلع أجة بالي كلام ثريه أنُ جوز ضياء من طرفهم رجعت
كتله:حنظل خلي نتواصل ويه ضياء
جوز وداعتك يَطلع من دربهم
حنظل: لحيتي هواي على ضياء
والي يلح هواي
يجكجكني هواي •
مياده: مافتهمت
ضرب الباب وصاح: أبـن الزنى تنسي وَ أختج تجيج تجيج ماسمع شي بعد
دار وجهه وطَلع، جريت نفس وذبيته لأن حرفياً زهگـت من كلشي، لملمت المطبخ بسرعة وطلعت
للهول رحت لغرفة ابويه دكيته ماطلع صوت فتحته علكيفي ودخلت
مياده:بويه كاعد لو لا
شويه واجاني جواب منه گال: كاعد كاعد ادخلي بويه تعاي يمي على الجربايه اشوفج تشوفيني
هلدنيا الگشره ماخلتلي شي غيرج وبس •
رحت يمه واني احس كلبي يريده جريت الغطه ردت انام فتحلي ايده وگـال: نامي على ايدي يابوبه
باوعت بعيونه عباره عن ضياع وألـم وصراع وصراخ ووجع.
رجعت شعري ليوره وحطيت راسي على ايده وتغطينه گال: بويه حافظي على نفسج بيج وماكدرتي
مياده: شنو افتهم من كلامك يابَ شصاير وياك
كريم كاسيته: الدنيا مو امان يابنتي واني مادايملج طيلة الدنيا
اعتمدي على نفسج وبس •
مياده:شنو صار بيك من دخلت السجن
كريم كاسيته: تسأليني على الصار بيه
هو أني گضيت عمري
غريب
وحيد
عادي يابَ فراگج
مياده:ألادري بي فراك الأحباب يجوي الگلب
كريم كاسيته:للعنده گلب
مياده:وانت ماعندك گلب ياب َ
كريم كاسيته: بويه گلبي أنشال
من أنشالت الانسانيه عند العالم
مياده: زيـن بويه تتوقع اختي تجي
ضحك وبجه، شي كلش صعب أنُ تبجي وتضحك بنفس الوكت معناهه أنهال عليك كلشي
جر نفس وگال:ترد اخيتج بس خوفي تكون بلياه نفس، •
مياده:لا يابَ لا تكول هيج
كريم كاسيته: نامي بويه نامي.
حسيت كلماتة الاخيرة هيَ راحة للجايني بعد جريت نفس من ريحته وغمضت عيوني ورخيت
جسمي وغطيت بنومة عميقه لأول مره اكون مرتاحه بهذا الشكل لاحلم ولا كابوس ولا نماذج
وصخه مرت عليه بهاي النومه •
فزيت على صوت طكطكه بالبيت رفعت راسي لكيت أبـويه نايم گمت على حيلي مشيت على
طارف أصابعي علمود مايطلع صوت، فتحت الباب وطلعت بالهول باوعت منا ومنا ماكو أحد
رحت اتبعت الصوت لگيت رفيق كاعد على الميز بالمطبخ وثريه تطبخ وتسولف ويا
شافني كام على حيله وگال:ميا مياده اي اي مياده هل هلو
باوعتلي ثريه بسرعه وكالت: هلا كعدي كعدي كاعده احظر بالغده
رحت لرفيق جريته من أيدة وكعدته على الكرسي كعدت بصفه رأساً دخلت ياسمين شاده وصله على
راسهه بدون اي صوت جرت كرسي وكعدت
رفيق:جك جك جك جك قطار قطار روح روح اي اي روح
ياسمين:راسي يوجعني فدوه أسكت
مياده: ثريه ترديني أسـاعدج
رفيق: جك جك جك جك روح روح
ياسمين: رفيق شنو يعني جك جك
ومنو هو الي يروح
مياده:ياسمين الولد خطية
ياسمين: عرفت مريض بس قصته شنو
رفيق: ابو ابو ابويه أي أي ابويه ابويه شم شمر شمرني اي اي شمرني
هز راسه حيل وَ صفك أيدة بكـل قوة
اجتي ثريه كعدت كدامه
مياده:وين شمرك؟
رفيق: قطا قطار قطار سريع جك جك جك بليل بليله بليله اي اي بليله ض ضل ضل
ثرية :ضلمة مو
صفك ايده وًگـال وهو يهز:اي اي اي ضل ضل ضلمه اج اجه السريع السريع
يطب يطب يطبطب اي اي يطبطب على ظهري
اي اي ظهري ويكل ويكلي اي ويكلي
قطار قطا قطار سريع يسو يسو يسوي اي اي يسوي جك جك جك
صعد صعدني بي وهو يدف يدفع اي يدفع بيه ميريدني ميريدني ميريدني
جك جك جك جك مخبل مخبل مخبل
ابويه ابويه اي اي ابويه بنا بنات اي اي ابويه شمرني يسوي يسويلي جك جك
دنه الكرسي وگام على حيله يكمز داير مداير ياسمين ويسوي يم اذانه: جك جك جك جك جك
قطا قطا قطار قطار. •
وياسمين المسكينة حاطه ايدهه على وجهه وتبجي بحرگـة
وَ ثريه الفقيره تمسح بدمعاته اللة يعين عقلنة أي واللة على كلشي صار كدامنة
سمعنة الباب اندكت جريت حسره وگمت على حيلي
كامت ثريه، كتله: اني طالعه للباب تعالي وراية
رحت بسرعه جريت الشال من على التخم،لبسته بسرعه وطلعت ببداية باب الهول كلت:منو على الباب
محد جاوبني، الدك عليهه مستمر ودگه وره دگه مستمره، رطبت شفايفي لبست نعالي وتمشيت
بأتجاه الباب أول ماوصلت گلت;عيني منو على الباب
سمعت صوت ونين بنيه تون من الوجع حطيت ايدي على صدري، هزيت راسي وفتحت الباب
اجتي عيني على ولد ركب السيارة وراح گبل
نزلت راسي ليجوه عيني أجتـي مباشرةً على البنيه
باوعت ليوره لكيت ثريه كاعده تجي
هاي البنيه منو مرميه على وجهه أسمع وناته
دنكت عليهه بسرعه
سميت بالله بگلبي
وَ أيدي ترجف
كلبي يدك حيل
گلبتهه طلعلي وجهه
دم
شخطات
خشم يخر دم
الجلد محروك
العيون مطفيه
الساني انبلع
دموعي نزلـت بسرعـة اريد احجي ماكدر ماكدر
ثريه شهگت وصاحت: هيماء
يتبــع
لاتنسوا التصويت وَ التعليق •
نلتقي في بارت جديد
للمتابعة في الانستكرام:tahsin_luqman
سلامي ومحبتي للجميـع
تحسين لقمان