عزيـزي القارئ فضلاً وَ ليسَ أمراً أضغط تصويت لنــشر المزيـــد من احداث الروايـــة
فستان أحمر
تحسين لقمــان
البنية الثانية صاحت : هيَ هيَ الكتلتها
اني اني شفتهه
بنات وينجن لحكن بيداء ماتت
هاي البنيه كتلتهه
وخرت عن البنيه الي بالگاع وصحت بعلو صوتي: اني شعلية خافي ربج اني معلية والله
صَاحت الشرطية:ايدج ايدج ليفوك أياج وَ بالج تسوين أي حركة .
دموعي نزلن بسرعة وَ الخوف أكلني أكل رَفعت ادية ليفوك واني شبه ميتة أباوع للشرطية
اخذت هذا الجهاز وَ صَاحت بي : قطاع سبعة حول حول الصحيات وقوع جريمة
حول دعم اريد •
نزلت أدية حطيتهن على وجهي ، صدري يصعَد وَ ينزل من الخوف رأساً صاحت بيه: گلت ايدج ايدج ليفوك كاعده احجي وياج
صاحت البنية من يمهه : بنية يمج قرباج تكتليها ولج ما كفيتي بالجرائم المسويته بالخارج
الله يلعنكم •
بين الدموع وَ الخوف صحت بيهه: الله يلعنج الج يـاكلبه اني شعليه فهميني انتي جنتي قبلي بالحمام
واكيد أنتــي •
اجني البنات يركضن من خارج الحمام وَحدة تشهك وَحدة تحير شتصفط من كلمات بحقي ،
الـى أن أجتي مجموعة من الشرطة أتوقع اربع ْ بنات مو كلش حسبهتم رأساً وحدة صاحت:
كف ايدج اليمنى أشبگي بكف ايدج اليسرى
رفعي أيديج اثنيـنهن على راسج
لفي وجهج علينه ومتحركي لا يمين ولايسار
بلعت ريـگي وَ سويت الگالتلي عليه
أباوعله أجتي تقربت بأتجاهــي والسلاح موجهته عليه , واني اكول بكلبي : من ساعه السودة
الدخلت بيهه ربي ربي يامنجي
ويامسهل الامور
ساعدني ماعندي غيرك •
وَصلت يمي بسرعة جرت أيدي وَ لوتها على ضهري وقبضت عليهه بيدهه توزعن البنات البقيه على
البنية الواگعة بالگاع وَ هاي أخذتني لخارج الحمام وَ وياهه أثنين هم من الشرطه
واني أحجي وياهه : مروتج والله والله مو أني بيمن احلفلج
صاحت الثانيه : والله عيوني زين تعرفين الله دسكتي ماما سكتي
صحت بيهه : كاعدة أگلج مو أني مجرد دخلت للحمام وَ صارت كدامي والله والله معلية
صاحت الي لازمتني : لج ياقطاع انتي منو مسؤولتج
اتذكرت كلام ام ياسين من جرت الملف كتلهه: قطاع ستة اي قطاع ستة اعتقد ام يايسن
الثالثه صاحت : تهي بهي ام ياسين نايمه ورجليهه بالشمس سجيناته يتنقلن وَ يقتلن وَ هيَ ماكو دمشي يمه أمشي
صحت بيهه : وين ماخذتني معلية
مو اني الكتلتها ليش ماتصدكون •
وحدة منهن ضربتني على جتفي وَ گالت : هذا الحجي بعد ما يوكل خبز
أحجي للمحقق او للقاضي , كدامي يلا •
رجعت وحدة ثانية ضربتني على راسي معناهه دنگي ليجوه دنگــت راسي ومشيت وَياهن
خبصت السجن بصياحي بس فعلاً من يطيح الفاس بالراس خلاص ينحكم عليج بالموت
أمشي وَ افكر شلون اخلص روحي من هاي الورطة لو شلون اخلص روحي من سالفة التزوير
لو شلون ألگة أختي المنغولية الي أختفت ومابقه منهه أي شي أعتب على الوكت
لو اعتب على لازماتني •
أخذني مسافة بعيدة وَ رجعني لنفس السجن وَ لنفس الغرفة الي جنت بيهه وحدي شمرني وراحن
باوعت على الغرفه واني الطم على وجهي
رفعت راسي للسماء وگلت بصوت مسموع ربي خلصني من هاي الــمشكله وينك فدوة وتخلي
البنيه تطلع عايشة •
من ساعة السودة يميادة من رحتي للحمامات شورطج ماتكليلي شورطج •
أي يدنيا اي شترويني بعد مو لعبتي بيه لعب . اباوع للغرفة ماعرف وين انطي وجهي اكعد ادعي
اكعد اعزي روحي بالطامه الي جايتني
زين هذا المحامي شنو صار بي
مشيت بأتجاه الجربايه وكعدت عليهه واني اتخيل هيماء دتعذب وشايفه الويل بدنياهه اي يخيتي
محد حاس بيج غير بس اني ومحد يخلصنه من مصايبنه غير الله كون يوصلج دعائي
رجعت تمددت على الجربايه لأن أي حيل مابية بعد كبرت سنين وَأني بعمر الورد
درت وجهي على الحايط وغمضت
عيني وگعت دمعتي
حسيت اكو ايد من وره تمرغلي ضهري كل التعب أنزاح شلت ايدي اليمنى وحطيتهه على الحايط
. كلما اصفن اگول المرت بي ياسمين وغيرهن من البنات مقارنتاً بية هنه جوز اني اهون لعد الله
يساعد تمارة شنو حالهه من ابوهه لزَمه الشارع وخلاهه تجدي , جوز اني ماكدر احس بشعورهه
شلون جان لأن صحيت لا أب ولا أم •
اما هي قضت أيام وسنين ويا ومن الصغر ويا صعبة صعبة ياناس أبويه يفتح الباب بوجهي
ويلزمني الشارع شنو جان هي شعورهه ماعرف ماعرف بس على يقين تام جانت محطمة فعلياً
ومتأكدة الكون بعينهه رماد, غمضت عيوني ورحت لعالم بعيد عن كل المستنقع الداير مدايري
واگفه يم بسطية صغيرة ماَل خضروات وداير مدايري بسيطات بيها شغلات ناعمة وحلوة
ليكدام اكو بسطيات عليها ناس تصيح ثياب بناتية وناس تصيح ملابس ولادية رأساً دخلن دراجات
وعليهه شباب ملثمة اسحلتهم على جتوفهم ماعرف ليش هم هيج دخلو بنص السوك
ويصيحون على الجبير والصغير
صارت هوسة وما أشوف الة شاب منهم سحب اقسام بسلاحة والسوك ترسو ترس طلق وكلهه على الناس
اباوع الدم فاض فاض بالگاع الكل واكعه طفل رضيع جسمه ماع بالگاع وبسرعة اختفــة
امهات زلم كومه كلهه نجطلت بالگاع وتختفي اجسامهم يبقى بس الــــدم
اباوع للگاع الدم يجي بأتجاهي بكل سرعة صعد جسمي وبده يتشبع بية الى ان وصل لركبتي
خلاص راح اغرگ بالدم , فتحت ايديه وضليت احرك بجسمي راح اغرك راح اغرك
صعد الدم لحلگي گلبي كام يدك بسرعـــة عيوني أنگلبن ليفوك ,
بسرعة فزيت : بسم الله بسم الله الرحمن الرحيم
كمت على حيلي من الجربايه حطيت ايديه على راسي واني اباوع على الغرفه وعلى الحيطان شنو
صارلي ياربي منو ذولة الناس ومنو ذوله الشباب وليش هيج اجسامهم تختفي رحمتك ربي .
رجعت كعدت على الجربايه وصدري يصعد وينزل من الخوف اذكرت كلام رفيق من يگول
بحر بحر مال دم حطيت ايدي على وجهي مسحت عرك كصتي واني
استغفر ربي بصوت مسموع علكيفي •
شوية وانفتحت الباب علية دخلت بنيه لابسه بدلة الشرطة گالت : بلا زحمه مياده ثائر مو
عقجت حواجبي : اي اني تفضلي
باوعتلي من فوك ليجوه ماعرف شنو أفسر نظرتهه گالت : المحامي ضياء منتظرج
بالقاعه تفضلي وياية
بلعت ريگي وگتلهه : والبنيه شنو ماتت لو شنو ترة مو اني
معلية لاتبلوني بيهه •
ضحكت وكالت : منو ذبها عليج
تقربت منهه وكتلهه : مو هاي البنيه طلعت وكالت عليه اني الكاتلته وداعت كل عزيز عندج اي شي
مامسويه مجرد دخلت ولكيتهه كدامي •
كالت : أمشي عيوني امشي المحامي منتظرج
باوعتلهه كأنما هي اصلا مامهتمة للسالفه او كلبهه بارد عكس ذنيج طلعت من السجن وطلعت وراهه
مشيت بالممرات الى ان وصلت الغرفه قبل لا ادخل نفس الطريقه ابصم واوقع ماعرف شنو
معناهن بس ذني شروط اساسيه لازم أسويـهن
دخلت للغرفه رحتله بسرعة : فدوه فدوه ساعدني
ماعندي غيرك هاي ماتت مادري شصار بيهه
طلعت بنيه وكالت اني الكاتلتها
وداعت ابويه معليه •
جاوبني ضياء وهو يأشر بأيدة : أهدي أهدي اواش اواش تعاي تعاي كعدي وكلشي ماكو
أنتهت السالفه
عقجت حواجبي ورحت كعدت على الكرسي والخوف واضح عليه : فدوه شصار وشلون انتهت
ابتسم بوجهي وقدملي بطل مي كدامه فتحة وگال : شربيلج كمع اخذيلج نفس
يابَ لونج مخطوف •
استغربت من تصرفه شبي هذا هم دمه بارد سحبت البطل مسحت الحلك مالته بيدي
وشربت لحد ما كال الله بس , نزلته وسديته باوعتله كتله : ليش مامهتم للسالفـــة
حط ايده بنص ايده الثانيه ورجع ارتجة على الكرسي گال: لأن الجانت بالكاع كعدت
واعترفت كالت جنت دايخة ووكعت •
ضحكت وكتله : لعد والدم شنو
ضياء : تگول افترت بية الدنيا والطخ راسي بالمغاسل ووكعت
عقجت حواجبي كتله : الله يخليك لا تخبلني يامغاسل وهو عباره عن سنك بي حنفيات
كال : احنه هسه مايهمنه كلامهه صح او جذب عساهه بطركاعة سودة الي يهمني قضيتج وبس
حطيت ايدية على الميز سويتهن نفس حركة ايديه وكتله : انت شمدريك بهاي التفاصيل اني مارجعتلك وبلغتك
انُ صار وياية هذا الحادث •
ضحك ومد أيده بجيب السترة طَلع شلون الكارت حطة على الميز وقدمة بأتجاهي : الكدامج محامي مو شله وَ أعبر فاهمه لو لا
هذا شغلي تعاي كعدي بمكاني
ومارسي شغلي بأسمج
ابتسمت بوجهه واني اوزع نظراتي على معانيه من يحجي وينفعل ، تبين تقاسيم وجهه اكثر
عباره عن شرايين متداخله ويه بعضها
باوع بوجهي عدلْ ياخة قميصه وگال : كلما نركز بسالفتج اكثر كلما نتقدم بيها اكثر فاهمة لو اعيد
كتله : انت شبيك هيج أنفعلت ترة اني ماگلت شي وهاي بطاقتك اخذها من كدامي •
جرهه مني وگال : هو صوجج لو صوج الافندي الكدامج على العموم عندج شي تحبين تضيفي
على هاي الطامه الجديدة •
عدلت كعدتي وگتلة : اني ماعرف لا ثائر ولا غيره اني جنت بالميتم طلعتني منه الموظفه مالتة
لبيت صديقتهه علساس اشتغل بي خدامة بمرور الايام عرفت واقعهم وعرفتهم هم شنو والله عاد
يومين مدري تلاثه ماذكر بالضبط عرفت المسؤوله بي تصير امي
ماعرف شنو اكلك من مشاعر كره مو طبيعيه اجتي بگلبي تجاهه بس اكدر اوصفلك مشاعري
من وكفت بوجهي وگالت انتي بت حرام وابوج الي بالجنسيه مو ابوج
دفعت فلوس كومه في سبيل تطلعلج جنسيه •
يعني شنو معنى كلامي معناه اني لا أعرف ثائر ولا بطيخ كل مافي الامر حسب اقوال امي هو ابوية
بالجنسيه وبس وهو مستلم فلوس كومة من امي في سبيل اسجل بأسمة
ضياء : منو يكول مامزوج امج
ضحكت وكتله : هي الصراحه ماگالت ازوجته بس اكيد مزوجين لعد شلون أسجلت بأسمة
عدل ياخة قميصة وگال : وانتي شنو لگيتي ابوج علساس اسمة كريم وطلع حجي امج صح لو شنو
مياده : اي اي قابلته وحجيهه صح من ناحية الجنسية بس كلامهه على ابويه جذب
من گالت اغتصبني •
حط ايده جوه حنجه وگال : سؤال
صدك طلعتي بت حرام لو لا •
وخرت اديه و كتله : ماعرف ماعرف
ابويه گال امج من تزوجتهه العفو يعني
هز راسه وَ گال : هاهيَ مفهوم كلشي بس ميادة اني ماخايف من قضيتج هاي
عقجت حواجبي وكتله : لعد منين
ضياء : خاف ابوج يطلع فعلاً ثائر مو بعيد ان يكون هو من متقرب لأمج و أستغفر لله ربي هاي
اعراض عالم بس مادري بحكم شغلي
مارة علية هواي سوالف
كمت على حيلي وكتله : ما أضن ابوية ثائر وحتى لو يطلع ابوية مايشرفني ابد يكون هذا الحثالة
ابوية فاهم لو لا مستعدة اكضي سنين حياتي
هنا بالسجن ولا أگول لهذا النموذج كلمة بويــة •
ماحس اله وضياء وكف على حيلة ضرب الميز
وصاح : اخر مره اكلج احترمي الكدامج وهاي الصلافه والرعونه كلهن مطكطكهن وعاجنهن بدية
صحت بي : ومن تحجي ويه موكلتك مو بطريقة أستهزاء
اذا ماعندك شي اكدر اولي لغرفتي •
رجعت ليورة شويــة اباوعلــة گام يمشي بالغرفه وهو يسحب نفس شهيق ويذبه كل حرگه ويضرب
ايد بأيد گلت بكلبي يلوك ابو شلوك والله يالله •
مابقالي غير بس انت يالاصلع يالمنتف
يلخالي من كل شعراية •
عدل سترته وگال: قضية البنية مال الحمام سديتها من يمي وهي البنية الي اعترفت گالت ماكو احد اني من يمي بقت قضية ثائر
تردين اكلج شي مهم وضروري
مياده : اكيد كول
ضياء : ماعتقد ثائر راح يبقى ليالي هواي
مياده : شلون يعني
ضياء: وجود ثائر بقبضة القانون يهدد وجود امج ووجود المشكرجي مداح
عقجت حواجبي مستغربة منو هذا : بس منو المشكرجي مداح
گال : الافندي ثائر يشتغل ويه واحد مداح من الكويت وصايرة قضية تجارة بيناتهم من ناحية
الحبوب ومداح رجال اقوى مني ومنج ومن مطلك بين قوسين عنده نفوذ هواي
يعني من المحتمل ثائر تطلع جنازته منا من السجن قبل محاكمته لان گتلج وجودة
خطر على الاثنين امج والمشكرجي مداح •
مياده : امي ليش خطر عليهه
ضحك وگال : امج الله يسلمها شتعرفين عنهه ماتكليلي بس يلزمها القانون أصلا القاضي
اعتقد يحير على شنو يحكم
على هاي على ذيج •
تقربت من عنده وكتله : معقولة وجود حجي مطلك بالسجن ميهدد المشكرجي مداح
ضحك وگال : ميكدر حجي مطلك يسوي شي لمداح لأن ابنه ومرته يموتون بنفس اللحظة ألي
يحاول بيهه ينطق بالحرف الواحد ضد مداح •
مياده : معقوله هيج نفوذهم واسعه ماكاعده اصدك شكاعد يصير زين شلون يراقبة
وهو بالسجن راح اتخبل •
ضياء : انتي فقيره وفطيره وماتدرين بالدنيا عاشت لو ماتت ذوله عدهم ناس من الشرطة
متعاون هو وياهم يعني ردت اوصلهه الج
هسه احنه مانريد نحجي كلشي •
استغربت من خوفه كتله : اكدر افتهم من كلامك وجودي هم خطر عليهم
باوعلي بثبات وگال : على حجي مطلك اي ليش لا
حطيت ايدي على صدري
وكتله : يعني توصل مرحلة الموت وياية
اباوعله عافني بمكاني و راح بأتجاه الميز شال الجنطه مالته وگال : كل الاكدر اكوله الج انُ
ديربالج من اقرب وحدة الج بالسجن لأن السجن ميادة غابة واني حذرتج والباقي يمج
اترخص اني •
ميادة: اني حطوني بغرفه وحدي لأن صيحت
عاد فدوه سويلي حل أريد يم ياسمين
باوعلي وگال : راح اسوي كم شغلة من خلال علاقاتي بس منو الي ودتج اكيد اوامر
ضابط بس شسمها •
باوعتله وكتله : ام ياسين اعتقد
ضحك وگال : بشرفج اذا اريد اروح اتوسط يم ضابط من يگلي شسم الضابط اگله ام ياسين
كال هذا الكلام وطلع وَ عافني بحيرة اتذكرت كلامة ان لازم ماثق فعلا الصار وياية بالحمام
اليوم ماينسكت عنه ومستحيل انساة يعني لو مرتكبه عليه البنيه جان رحت بالرجلين
بس معقوله كلامهه صح •
انُ هي داخت و ألطخ راسها
بس شفت هواي دم وزين هاي البنيه شتسوي بالحمام مادري مادري احس كلشي كاعد يلتم عليه
دخلت عليه الشرطيه وگالت : شنو عيني ناويه
تباتين هنا جاي كهوه كدامي ماماتي يلا •
مياده : اي اي جايه بس فدوه شوكت ترجعوني لغرفة السجينات الباقية
طلعتني وقفلت الباب گالت : من الذكر ينكلب نثية
عقجت حواجبي وصحت : شنو مافتهمت
صاحت بجهازه : شرطي انعام حول مركز سبعة
ماجاوبتني ولا حجت اباوعلهه ملتهية بالسجلات تكتب وترد ليورة صدك شغلهه صعب وهي بنية
شنو جابهه لهذا الدرب ماعرف لهناك مر شويه من الوكت واجتي انعام سلمت عليها واخذتني
رجعتني للغرفة الي عبارة عن هموم ومصايب احس روح هاي البنية بيها •
رحت كعدت على الجربايه اباوع منا ومنا ماكو اي شي اسوي باوعت على الميز فتحت الجرار
وطلعت الدفتر گلبت الاوراق الي قريتهن الى ان وصلت اخر شي وين ماجنت واصله من احداث وياهه
نوارس : روح روح شايله قنبلة
اني وگلت قنبلة حسيت الكل سمعني الرجال رجع ليورة بسرعة والناس كلهه بدت تشرد والصياح
ترس الجامع واني على نفس وگفتي ماتحركت ولا سويت أي شي اباوع لهذا الرجال خطية واكف
كدامي نفس وكفته ويتشاهد يصيح :
الله الله اكبر اشهد اشهد
كلماته احسهن تروح وترجع لأن سمعي ثگل و عيوني ثگلن وكمت ماشوف حسيت بدوخة كلش
سريعة الى ان وكعت على الكاع وبعد ماعرف شنو صارلي كل العرفته من صحيت على نفسي
اني بنص هوسة الشرطة وبنص هيبة القانون والمحاكم والقضاه تروح وتجي عليه
قدمت كل الاعرفة عن المدرسة وعن كل سامي قشطة و أبونة زامل وَ بمرور الايام
شفت الشرطي الزين و الشين جنت اسمع انواع الكلمات واني ساكتة لان شنو مايحجون حقهم
وقليل بحقي مهما گالو وَ مشت بيه الاجراءات القانونيه على حسب الاصول وصولاً لهذا اليوم
الكاعده بي بالغرفة اكتب بهذا الدفتر البسيط اخر اشياء صارت وياية بالحياة , لان بعد ساعات
رايحة لمحكمة الاعدام ويختفي وجودي من الحياة ماريد ادافع عن نفسي ولا اريد اسوي اي
شي لأن اصلاً احس هذا الاعدام لصالحي حرفياً تعبت من وجودي بهاي الدنيا القذرة
بس كل الأكتبه هو مستحيل أسامح امي وابويه الي خلاص تيهوني بمسار الحياة وماسامح
وما أغفر لأي واحد راد يدمر ويكتل هاي الناس الفقره
اني مظلومه •
المتوفية من هذا الوقت •
نوارس •
غمضت عيني اليسرى ونزلت دمعتي على اسمهه جريت حسره وبسرعة طبگت الدفتر . شنو ذنبهه
بنيه بعمر الورد أنضحك عليهه ووصلت هاي المواصيل مفروض القانون يكون عادل
هذا الي نسمعه من ماما منى •
بس ياعدالة تكون من ينفذ حكم بحق مظلوم بس نفس حالي وجودهه ولزمتهه بالجرم المشهود هذا
شي كلش كافي يخلي القانون يمشي وياهه
بهذا المجرى
, جريت حسره ورجعت الدفتر بمكاني وگمت على حيلي گلت : اي الله يرحمج يانوارس
ان جنتي فعلا مظلومة
ضليت امشي بالغرفة واني افكر شنو راح يصيرلي بعد وشنو راح يصير بقضيتي معقولة توصل
المواصيل بيه ان ينحكم عليه مثل
ماأنــحكم على نوارس •
لا اكيد اني قضيتي تختلف , ضحكة بصوت مسموع وگلت : اصلا هاي اذا بقيت عايشة مو غريبه على حجي مطلك ان يكتلني
واني بالسجن عاد كلشي اتوقع
ضليت اروح وارجع بالغرفة واني افكر ماعندي شي اسوي ولا اعرف شي اسوي
انفتح القفل مال الباب بلعت ريگي ووگفت بمكاني اريد اشوف منو راح يدخل وشراح يصير بعد دخلت انعام
وگالت : والله عيوني الواسطات ترگع
منا ومنا امشي
عقجت حواجبي لأن كلشي مافتهمت من كلامهه واسلوبهه ابد مو مال تعامل كتلهه : وين امشي ويا واسطه
هزت ايدهه وگالت : ماتدرين شكو سودة علية
عيوني يمة العرامة امشي يحضي انشكت الورقة الي انكتب عليهه عقابج هنا لأسبوع كامل
ابتسمت واذكرت ضياء معقولة هو هيج شاطر وحلهه بسرعه والله عاد سبع كون يحل قضيتي
واطلع منا ومن هاي النمـــاذج
مياده : اي خلي تنشك بس لا تگولين واسطة
وانما كولي الفرج عن المظلوم •
هزت ايدهه وكالت: والله اني المظلومة مو انتي
امشي عيوني
طلعت كدامهه وهي وراية قفلت الباب ومشيت كدامهه وهي وراية تمشي
سجلت خروج من كل الابواب الي مرينه بيهه الاجراءات غريبه وجديدة عليه نوعا ما بديت
اتعلم على كل شي يمر عليه الى ان وصلنه القطاع ستة طلبت مني الي على الباب ابصم
واوقع وسويت نفس مارادت فتحتلي الباب رأساً دخلت لگيت كدامي ياسمين
كاعده على الجربايه كامت على حيلهه
وتقربت مني
ياسمين : مياده اشتاقيتلج كومه
ام فاروق : صلوات ماخيبت ضني مشكور ربي
ثريه : هلا بيج هلا وهلا بيج هلا
ضحكت وياهم وسلمت عليهن وحده وحده ,
مرات الغريب يكون احن عليك من القريب
مصارلي هواي يمهن بس صارن جزء جبير من حياتي
ام حمزه دخلت بالنص وين ماجنة واكفات ومتجمعات
ام حمزه : هش هش يلا يلا كلماً لجربايته بدون هوسة
ام فاروق : ام حمزه تخبلتي خلي الحبايب ملتمات عليهه
ام حمزه : ام فاروق انتي مرة جبيرة اها اها شوية اها گرصي نفسج واستچني بجربايتج
يلا هش هش •
من بين الضحك والحجي جرتني ثريه من ايادي ياسمين وراحت بيه لجربايته والبنات البقيه كلهن
توزعن . اباوع منا ومنا احس اكو عيون تراقبني من البنات واسمع اسمي ينحجي بي
بيناتهن بس بهمسات •
كعدت على جرباية ثريه وكالت : كليلي شصارلج سوولج شي
نزلت دمعتي وحضنتهه ثرية انسانه ماتتعوض ابد ابد رغم تعرفت عليهه بمستنقع بيئي بس
احسن من امي الي جابتني للدنيا ماتعرف بالحلال لو بالحرام . وخرت عن حضنهه وكتلهه
: اني بخير بخير رغم الوجع الشفته
اباوعله كامت تحط ايدهه على جسمي وتمشيهه
كالت : كليلي كليلي وين الوجع اذوج مو سوده عليه اي والله
وخرت ايدهه ولزمت وجهه كتلهه : لا لا لتخافين ماسولي شي بس يثريه الوجع الي بجسمي عاد
اذب عليه ديتول وينتهي كلشي بس الوجع بكلبي اي بكلبي يثريه شلون بي •
ماعرف خبر لا عن اختي ولا عن ابويه ولا كلشي وهسه اجتني طامه جديده جنسيتي مزورة
وانفتحت ملفات ثانيه ماتكليلي وين انطي وجهي شيصير بيه بعد ماعرف
ثريه : زين انتي شمدريج انفتحت الملفات
باوعتلهه وكتلهه : صافنه بالغرفه واخذت خيره وطلعتلي السالفه
ثريه هسه هذا سؤال ياعيوني غير اجاني محامي جديد اسمه ضياء الولد ماقصر لو ماهو جان
ماطلعت مناك من ذاك َ السجن
خلوني وحدي عيوني بين اربع حيطان والله شنو لان سويتي فوضى ,
اجتي ام فاروق صاحت من يمه : ثريه يلا للمطبخ ساعدي البنات يلا اني كاعده يم ميادة
ابتسمت الهه بسرعه ثريه هزت راسهه ليجوه بمعنى حاضر وكامت بسرعه تقربت مني ام فاروق
وكعدت بصفي : اعتبريني امج ولا تحرگين بنفسج ياسمين حجتلي جزء عنج الله يعينج يمة
بس شتسوين هاي سنة الحياة يوم عليج ويوم الج
حطت ايدهه على جتفي ورجعت كالت : انتي عاد وعيتي على الدنيا لا اب ولا ام بس اني ييمه
ربيت وتعبت على ضناي واحد منهم راح واخذ ويا الحيل كله والثاني اها هاي هنا كدامج ذبني بالسجن
حطيت اديه على حلگي متفاجئه كتلهه : خاله ام فاروق على الي عرفته من البنات هناك خارج
السجن كلهم عدهم احباب وكلهم اندفنوا جوه التراب الله يرحمه لأبنج وينطيج الصبر والسلوان
بس ابنج الثاني ليش ذبج هنا بالسجن
هزت راسهه ورفعت ايدهه اليمنى مسحت دمعتهه أجانة صوت مال قبق كدر وگع من ايد البنات
باوعت عليهن حاطات بالزاويه طباخ صغير وبصفه ميز وثلاجه
ام حمزه صاحت : وعمه حتى عمه قبق مادبرتي جا اها بليلة عرسج شلون •
بنات وكت فلك طرجن اي والله •
ضحكت ودرت وجهي على ام فاروق ابتسمت بوجهي وكالت : ام حمزه مره ماتعرف شنو تكول
وشنو تحجي اليصير على لسانهه تحجي
اخذت وضع الجديه ورجعت كتلهه : ماكتيلي خالة على سؤالي
ام فاروق : ابني مطي لو مامطي ماسواها
وشمرني هنا •
اتبع كلام مريته ومشه بكلامهه لهاي الحيه وهسه هي بيت اهله الاعرفه مطلكها
عقجت حواجبي وكتلهه : بس خاله شلون يعني اتبع كلام مريته على گولتج
ام فاروق : جان يحط فليساته بغرفته يجمع بيهن ويرد ليوره في سبيل يفتح مشروع صغير يساعده
بشغله مال المحاماة , مريته حيه تلعب على الحبلين بيومها اجه كلعاده مستلم راتبه وزع حصة
المي وحصة الكهرباء وحصة البيت وحصة مريته والزاد ينظم بغرفته لهذا المشروع يفتحه ويعينه
للمستقبل وخله و طلع من البيت لجماعته وعود يعود بتالي العصريه للبيت
مريته بس يطلع هي أطب وتطلع من البيت ماخذه راحتهه واني يخاله مياده مره فقيره على كبري
اروح واجي بصف الحايط لا فهم ولا علم •
وان حجيت تبدي العياره بيه ان هي مكعدتني بيتها جنت عايشه جوه رحمة الله واتجنب
المشاكل وياهه ليش ما يجي الولد من بره ويدخل يريد ياخذ فليساته مايلكاهن يسئلهه:
يگلهه وين الفلوس يامرة •
تكله : اني جنت طالعه اتسوك للبيت ومن رجعت لگيت رجال بالباب بسيارة بيضة اول ماشافني
طبك الباب مال البيت وصعد سيارته وراح سألت عمتي امك كتلهه منو هذا كالت
ان حجيتي حرف واحد السانج ينكص •
امك امك هي ماخذتهن
مياده يمه لحظات صعبه متروسه وجع وقهر تشوفين الي ربيتي وتعبتي عليه الي جنتي
كل الليل تلويله بمهده تلكي اليوم يلتف عليج ويخنكج خنك ووين اليوجعج
هاي تشوفين كدامج لارجليه الي يعنني ولا اديه الي يعنني وهو محامي و زوجته حشة راسه حش
التفت عليه الدنيا لفات الحياية
رهمها مادري شلون بعد هو محامي ضياء ويمج
الحساب وها هاي كدامج ييمه •
بس كل هذا والله والله
نزلت راسهه وحطت ايدهه على وجهه وبجت بكل حرگه گالت : والله والله مسامحته بس اريده
يصدكني ان اني عمري وحياتي مافكرتله بالضرر كل الي ردته اله الخير والبركه
اني اني يمياده جنت البس الجادر مال الصلاة وادعيله بالرزق تاليهه من يجي ابوگه شلون
شلون فهميني
سحبت راسها بحضني وبوسة راسها شنو ذنبها ماعرف
كلماتي خلصن بعد ماعندي اي شي اواسي بي
احد الى ان هدأت ووخرته عني
كتلهه : شنو اسمه لابنج كلتي
مسحت دموعهه وكالت : ضياء يمه ضياء محامي
بالدوله وشلون ضياء ذاك الحسن والاخلاق
بس مرته مرته ييمه هي الخربت والدمرت
قاطعتهه رأساً كتلهه : محامي بالدوله تكدرين توصفيلي شكله
عدلت كعدتهه وباوعتلي بشك كالت : اها يصير اگرع وحيلو و شوية متروس
حطيت ايدي على حلكي ووكمت على حيلي : هو هو اي اي
كامت ويايه كالت : شكو يمه وكعتي كلبي
كتلهه واني ابلع بريگي : ابنج المحامي
مالتي هم ضياء وهم اكرع وهم نفس
المواصفات هو هو متاكده هو
ضحكت وحضنتني تشم بيه وتكول : بيج ريحة الغالي يمه وليدي فدوه فدوه اروحلج يمه
شوكت شوكت بعد عندج شوكت يجيج
هدأته علكيف وكعدتهه على الجربايه العيون
مال النسوان تباوعلنه وكلهن يتهامسن بيناتهن
كتلهه : اهدي اهدي لتخافين من يجي وعد
مني اخذج ويايه وعد
ماجنت متوقعه ان ضياء المحامي مالتي امة بالسجن لا والمصيبه الاكبر هو من يطلب الرحمه
من القانون للمتهم , يكوم يسجن امه صدك الناس متلونه بعدة الوان وبعدة اوجه .
بهاي الساعات مشه بيه الوكت بين الغده ورنة الاستكاين الي تكول اجه الجاي اجه الجاي ,
نشرب ونسولف ونضحك محاوله كل وحده من عدنه تشرد من عالم بعيد كل البعد
عن واقعنه القديم والمر
الى ان صار الليل وكل وحده من عدنه دخلت لجرباياته الي تنام والي تكتب بدفتر والي تضل
تغني بصوت دافي علمود تنام والي يسمعهه ينام كمت على حيلي مالكيت ياسمين موجوده
استغربت منهه وين هاي , سألت بنية گالت: راحت للحمام
گمت على حيلي و رحت بأتجاه باب السجن
دكيت الباب شويه وانفتح الباب طلعتلي الشرطي كتلهه : للحمام اريد
كالت : تفضلي ويايه منو البنات بعد اريد انام لا كلساع حمام وحمام
ابتسمت على حجيهه ومشيت وياهه للحمام وكفت بالباب واني دخلت ليجوه باوعت منا ومنا
مالگيت احد كملت كل احتياجاتي وطلعت للمغسلة الي هو نفسه عن سنك وبي حنفيات
وفوكاه مراية معلگة
رحت فتحت الحنفية وبديت اغسل اديه ووجهي وصفنه أي صوت ماكو , وياسمين ماكو
جفلت بسرعة لان اكو
ايد أدغ بيه من الظهر فتحت عيني صارت بالمرايا لكيتهه بنيه سمينه حطت تلفون
بأذني واشرتلي بحركه اسمعي
اجاني صوت بنيه تصيح بكلمات بس مامفهومه كمت اتنفس سريع صدري ينزل ويصعد من وره
الخوف اجاني صوت بنية من السماعة: كولي لضياء ليلعب ويانه تره اختج تخسريها يحلوة
رأساً لكفتهه كتلهه : مهره انتي مهره مهره اختي اختي فدوه
دموعي وكعن اسمع صوت اختي تصيح بس كلشي مافتهم انگطع الخط والبنيه سحبت التلفون
حطته بجيبهه ضربتني بيدهه على جتفي
اشرت بحاجبهه ليوره
درت وجهي لگيت ياسمين كدامي
تتقرب عليه وبيدهه سجينه
صحت واني خايفه : ياسمين !
يتبع ...
لا تنسوا التصويت والتعليق •
نلتقي في بارت جديد
للمتابعة في الانستكرام: tahsin_luqman
دمتــــم سالمـــين
تحسيــن لقمـان