قمع المشاعر

البارت 5

قمع المشاعر.... الخامس من الجزء الثاني...
للكاتبة زهراء ( روزايه)...

(بارت مفاجئ شكرا لتفاعلكم💓)

قبس.. رجعت قريت الرساله مره ثانيه وثالثه ماكو رسائل قديمه وهاي اول رساله من هذا الرقم!!

هذا ولد لو بنيه اشو تحجي بصيغه امر !!
ظل عقلي مفتر مااعرف شسوي
وكل هذا وماشكيت بي ابد كلت يطلع واساله
بس ماانكر دب الخوف بداخلي..

سمعت باب الحمام انفتح سديت التليفون وعفته ع الميز واخذت ملابسي ورحت للحمام ..

اكو مرايه برا الحمام مخليهه بالصاله
جان واكف ويعدل بشعره كتله نعيما
وفتت للحمام ...

طول مااني جوه المي اسبح بس احس عقلي
يفكر باشياء سلبيه..
هديت نفسي وصرت احجي ويه روحي

كون اتماسك اعصابي واساله بهدوء
لاتنفعلين ياقبس!!
لاتعصبين صيري هادئه
بشار يحبج الج هذا رقم غريب احتمال صديقه..

كملت سبح واني راسي مفتر بدلت وطلعت
لافه شعري بالخاولي لكيتهه مدد ومرتجي ع الجربايه

الموبايل بعده بمكانه ع الميز والظاهر
حته مافاتحه لان ع حطة ايدي
كاعده كدام المرايه امشط بشعري ورفعته
واخذت تليفونه خليته بصفه ع علمود المنبه..

وافتريت من الجهه الثانيه فتحلي ايده والغطا
ونمت ع صدره ..

جنت مثل الداخله بتمثيليه احاول
اهدي اعصابي ولا انفجرت بسرعه
قدر الامكان ضبطت نفسي..

ايده تمسد ع راسي بعدنه ماغافين
حته الضوه مفتوح ماطفيته
حجيت بهدوء حبيبي!!!
بشار.. هايروحه لحبيبج!

قبس.. من انت بالحمام دك تليفونك رساله وفتحتهه!!
بشار.. منين الرساله؟؟

قبس.. مااعرف رقم غريب !!
بس مكتوب مر عليه عندي امتحان..

بشار.. اني امر؟؟
قبس.. اااي غير تعرفه اقره الرساله..
سحب التليفون واني بعدني ع صدره
فتح الرساله كدامي قراهه وسد التليفون

جان يكول مااعرف الرقم احتمال متوهم!!
قبس.. شلون متوهم وحته مكتوب مومثل البارحه تذكر منو العنده امتحان..

بشار.. ماادري!! وبعدين اني سايق حته اوصل ياهو الجان!!
نامي حبيبي هذا غلطان بالرقم..

قبس.. كمت على حيلي وربعت كدامه وحجيت
بشاااار منو هذا الرقم؟؟ وفوكاهه يحجي بصيغه امر
اني مااحجي بيهه..

بشار.. شبيج قبس؟؟ كتلج مااعرفه ولامواعد احد اخذه
ولا اعرف واحد عنده امتحان

قبس.. دك علي هسه شوفه منو احتمال صديقك
بشار.. هسه ادك الساعه ب١٢ دنامي وراي دوام وبطلي سوالف تعبانه

قبس.. هاي موتعبانه لازم اعرف منو هذا ؟؟
وليش جاي تتهرب ماتتصل بي لو تعرفه؟؟

بشار.. شو سدي حلكج هاج راح اتصل كدامج
وسحب التليفون طلع الرقم اتصل بسرعه
طلعله الجهاز مغلق!!

سده ورجعه لمكانه هاا ارتاحيتي مغلق باجر الصبج
اتصل علي واشوف منو ؟؟

قبس.. كعدني الصبح لاتروح وتعوفني نايمه
بشار.. بيهه رقم تكعدين يوميه اسحلج سحل تصيحين عوفني نعسانه

قبس.. اي قابل اجذب عليك اني مره والغيره من سماتنه
واني هسه مامرتاحه للرقم ورفعت اصبعه بتهديد

بشار ديربالك عينك تروح منا منا ترى تشوف قبس
ثانيه !!

من رفعت اصبعي بوجهه وحجيت جان يجر
اصبعي ولوا حيل صحت بصوت عالي ااااااااخ

بشار.. ولج زعطوط كدامج وترفعين اصبعج وتهددين
ع شي فارغ ..

رقم داك عليه شمدريني منو وكاعده
تسوين قصص تافهه براسج وتهددين!!

قبس.. عوف اصبعي وجريته حيل
لاتمد ايدك عليه موتايهه الك
ادري بيك انت استاذ بشار بس مومعناتهه
احط بلاستر ع حلكي واشوف واسكت ..

بشار.. نصي صوتج وكعد على حيله تخبلتي انتي
موهاي دكيت علي كدامج مغلق شمعرفني منو؟؟

قبس.. اي احجي بهدوء مو معاجبك الحجي من
كتلك عينك منا ومنا
تكدر دكول لا اني شعندي غيرج

بشار.. اللهم صبرج ياروح شوتعالي نامي الظاهر
هرمونات الحمل مخبلتج وانتي منا تك وتك

قبس.. سحبني علي دفعته حيل وصحت لاتلزمني
نام انت وراك امتحان وانداريت اريد انزل من الجربايه
احس الحراره صعدت لراسي..

بس بعدني منزله رجليه اريد اكوم سحبني
من ايدي حيل وكعت بحضنه ادفع بي وهو
لازمني وصوتي بده يعله واني اصيح
. وووخر عوفني ماانام يمك..

منيمني بين اديه عبالك انجعصت بقوطيه
رجليه فوك رجليه وايد جوه راسي
والايد الثانيه حاضنتني ووجهي بصدره

احرك نفسي مااكدر اكوم وكلما يرتفع صوتي
كال اششش ..

ظليت اتلاوه ويا محتاجه اطلع برا
تالي صاح بيه بصوت كااااافي
راح اكوم ابتلي بيج اذا مانمتي..

ظليت خالسه بحضنه ماتحركت
من صوته وخفت اظل اتلاوه ويا وتكبر السالفه
فكره تاخذني وفكره تردني لحدماغفيت..

فزيت ع صوت المنبه حركت نفسي
على نومتي ولا تحركت وهو نفس
النومه محاوطني ونايمين ع جهه وحده للصبح..

سحبت نفسي من عنده فز صاح وووين؟؟

قبس.. دك المنبه كوم وراك دوام!! فتح عينه وباوعلي
كال صباح الخير!! رديت علي صباح النور يله كوم ماتلحك خاف!!

بشار.. شعندج كاعده ارجعي نامي امي تسويلي ريوك!!
قبس.. شبعت نوم اريد اكعد وكمت قبله للحمام غسلت ورجعت رتبت الغرفه...

بس دخل للحمام اني ركضت ع تليفونه
ع السريع فتحته واخذت الرقم سجلته بتليفوني
وكلبي يدك سريع احس نفسي ضاق..

سديته ونزلت جوه لكيت خاله مسويه ريوك
بس صبيتله هو نزل كعدنه تريكنه بوسط هدوء تام
من كام يريد يطلع كمت ورا باسني وكال رجعي نامي..

بعده يريد يصعد بالسياره صحته بشاار
التفت عليه رحت وكفت يمه كتله اتصل ع الرقم
والله كلبي يوجعني!!

اخذ نفس وكال وتاليتهه يابه اكو شي براسج؟؟
هاج هذا الرقم وطلعه اتصل وفتح مايك دك

ويه كل دكه كلبي يخفق سريع ولحدما خلصت
الدكه ومحد جاوب فصلع ورجع دك مره ثانيه طلع
الجهاز مغلق

كال ها ارتاحيتي ؟؟ هسه يبين منو وبطل هالشكوك
البراسج لان اتعبين واتعبيني ...

صعد بالسياره ودك هورن اطب جوه...
اجذب عليك اذا ماكمت اشك ساعه اضحك ع نفسي
وساعه اكول اي احتمال عنده شي..
مارجعت نمت رتبت الغرفه وفتحت تليفونه اتصفح بي
فارغ من الصبح كلشي ماكو..

صارت ب٩ كلت خلي انزل جوه بعدني بالممر
واسمع صابرين تصيح قبس قبس!!
رحت لغرفتهه دكيت الباب ودخلت

خطيه جانت رجلهه الصاحيه مشكله وماتكدر تكوم
كومتهه وظليت افرك بيهه حته تصير زينه
بعدين انتبهت ع الغرفه الظاهر اثار معركه الليل مهوسه الغرفه..

شويه صارت احسن كالت اني اعزلهه وتشكرت مني ونزلت
احجي ويه نفسي لعد احنه شكد حبابين ومرتبين..

نزلت يم البنات لكيت جدو كاعد يشرب جاي
كل يوم يروح للمحلات اليوم ماطالع
سمعت طرف السالفه يحجون بوائل
كمت للغرفه سالت فاديه شكووو؟؟

فاديه.. ماادري بس شيخنه مخابر جدو
ويكول وائل مكلفه يريد يجي يعتذر من عدنه
ويسامحوا الولد وهو غلطان وبهالحجي

قبس..شوكت هالحجي؟
فاديه.. هسه الصبح وبابا ميقبل وبشار وعمر كذلك
وبعد مادري تبدو انها مليوصه!!

قبس.. شعنده راجع
فاديه.. لان انطرد حس بغلطه وخسر
كلشي وهسه يريد يعتذر..
قبس.. ظليت اسولف ويه فاديه صارت ب١١ تقريبا اجتي شجن كالت صديقاتج اجن عليج...

عرفتهن الثنائي المرح شكد فرحت بجيتهن ساعه واحنه انسولف ونضحك وجايباتلي ملابس نوم هدايا
وسناء دكلي كلما تلبسيهن ادعيلي بالرجل الصالح...

تونست هواي وياهن حته نسيت سالفه الرقم !!
ب١٢ اجه السايق عليهن وراحن واني التهيت بالغده..

شجن.. بليل كلنه كاعدين ع العشا حته اخوتي موجودين
وظلوا يحجون بسالفه وائل ورفضوا يجيب ناس ويجي..

اثناء الكلام بابا عله صوته وكال يابه اليوم بسمه
خابرتني !! ودنك راسه وحجه بأسى

غيث خاطب فاطمه بتهه وهي موافقه
وسالتني خاف عدنه اعتراض !!

من حجه بابا هالكلام كل العيون توجهت الي
اول مااجت عيني بعين قبس !!
حته بابا ظل يباوعلي والكل يعرف بالسالفه..

ابلع بريگي الناشف دكات كلبي والالم
الي اجاني مفاجئ احس نفسي راح اخرب
واني لازمه الخاشوكه واكلب بالمعكرونه
واسوي نفسي اكل

اسمعهم يحجون بس مااميز كلامهم
صار صوتهم مثل الصدى لا اكدر اكوم
ولا اكدر اظل كاعده لحدمانقذتني
صابرين!!

صابرين.. شجن مااكدر اكوم علوش بغرفتج خاف يبجي
لان كملتي انتي!!

شجن.. بسرعه كمت حته بدون عكازات
استند ع الحايط وامشي وعبالك انطوني افراج
اسمع صوت ماما تصيح اسم الله لاتوكعين!!

بس سديت الباب كعدت بالكاع الدموع شلال
الم كلبي يعادل كسره مية عظمه بجسمي..

اختنكت واني اشهك اريد الهوه
اهفي بايدي ع وجهي اريد اتنفس ماكو
كلشي شح عليه!!

ادري بي يتزوج وادري اني مومن نصيبه
بس من صارت صدك انهاريت والمن؟؟
لفاطمه ؟؟ ماكو غيرهه ياغيث

طعنتني وكسرتني باختي
ورجعت كملت طعنتك هالمره باكثر وحده
عيرتني اني فاشله وماانفع لشي!!

انفتح الباب مااكدر ارفع راسي منو بس شفتهن
كعدن كدامي البنات كل وحده تحجي وتهدي
اني مااسمع غير دكات كلبي السريعه..

صابرين.. شجن وجهج اصفر مايستاهلج اصلا
فاطمه من نفس الطينه مالتهم الله يحبج وخلصج

شجن.. مااكدر اجاوب مرجعه راسي ع الحايط وابجي
وايدي ضاغطه ع كلبي تشنج واحس النفس انكطع

مغمضه عيوني واسمع صوتهن وحجيهن وكلمه مايستاهلج
كلساع تنعاد بس ماجاي اكدر استوعب الصار ولا اذاني تصدك السمعته!!

حسيت ايد خشنه تخلت ع راسي والثانيه سحبتني
لحضن دافي!!

جنت بين الذايبه روحي وبين الصاحيه
بين الوعي وبين اللاوعي !!

فتحت عيني واني ارمش شفته عمر!!
وهو يكل للبنات اطلعوا عوفوهه يمي..

فاديه.. مااطلع وهي تبجي شوف حالهه الله
لايوفقه ولايهني مالكه غير فاطمه الحقيره
وين يريد يوصل بنذالته عود هذا الزين
بس ماكو واحد خير بيهم كلهم النذاله تمشي بدمهم

عمر.. كافي اطلعوا !! وانتي فاديه كافي لاتحجين
اي شي كلشي ماضي وانتهى..

شجن.. طلعوا البنات وعمر كومني من الكاع وهو ساندني
كعدني ع جربايتي وكعد بالكاع كدامي ولزم اديه

عمر.. اتسمعيني موو؟؟ ادري بيج تحبي
وادري الحب موبيدج واختاريتي الانسان الغلط
وهسه انتي ادفعين الثمن وحدج

بس ياشجن عمر الينكسر مايتصلح
وحته اذا تصلح راح يبقى اثاره
واقل زله تنجرحين وتنزفين من جديد..

غيث حبج وحبه شريف وطاهر ورادج اله
بس مدام سمع كلام اخو وشك بيج بيوم
وماانطاج الثقه الكامله هذا مايستاهلج..

يكدر يعاقبج ويعلمج درس !!
ويكدر يزعل عليج مره اثنين لحدما تتغيرين
ويكدر يحتويج ويمتص خوفج
مااحمله المسوؤليه كامله لان النصيب الاكبر الج

بس ثقي مايستاهلج هاي مرتين
اذاج وجرحج باختج وبعدوتج هالمره
غيث صديقي واني اخوج مو اقنع بيج بس
الله يحبج وبعده عن طريقج

امه منو؟؟ واخو منو؟؟
حته احنه مانأمن عليج نخليج بنص هيج عائله
فكري بعقلج شجن وعوفي عاطفتج وكلبج...

شجن.. جنت منصيه راسيه ودموعي تجري
واني اسمع كلام عمر اخر شي ختم كلامه
الخير فيما اختاره الله ...

ايام صعبه ومريره مرت عليه اكو شي يكول
غيث من البدايه موالج
واكو شي ثاني يخليني اتخايله بحضن فاطمه
وراح يكلهه حبيبتي
وراح يتغزل بيهه
وراح وراح...

لحدما اتعب وماتغمض عيني
ارفع راسي لسما بس هو اليسمعني
اكعد اشكي ساعات ابجي وادعي
الله يخلصني من الضيق الي اني بي..

من عمري ١٧ لسه اني عايشه بالخوف
جبتهه من وائل لاعتداءه عليه لاعاقتي لمرضي
وصحتي التدمرت لغيث وفراكه
جرحه الي وهو يخطب اختي
وهسه كملهه يخطب فاطمه!!!

سمعت تمت الخطبه ومسوين حفله
احنه مانحاجي بسمه محد راح
بس بيومهه صوت الهلاهل الطلعت من بيت خالي وصلتنه..
وعبالك متعمدين يطلعون برا ويهلهلن
جانت روحي تتكطع واني اسمعهم

مثل الديج اليذبحوا جوا رجل العروس
هو يصارع بروحه وبالالم والناس تهلهل لان انذبج...

بيومهه ماما حضنتني وتواسيني بالقسمه والنصيب
هولاقسمتي ولانصيبي بالعافيه عليهه فاطمه
لاتعبت ولاسهرت ولابجت اجت اخذته ع الحاضر..

قبس.. الجو مشحون بس شويه بده الوضع يستقر
بعدما شجن اقتنعت بنصيبهه بس ظلت عازله نفسهه
بس لاتبجي ولاتحجي الا قليل..

علاقتي ببشار طبيعيه سالفه الرقم مانسيتهه
بس ماعرفته منو حته هو كل مره وكال ماعرفته..
مااكدر اشك بي لان تليفونه مامنعني منه
وشوكت مااريد افتحه واعرف الرمز بس يبقه شك
بداخلي اتجاه الرقم...

بيوم منهن صدفه داتحجي فاديه بخصوص
الارقام وكالت عندي برنامج اسمه تروكلر
يكشف الارقام..

ركضت للغرفه بسرعه جبت تليفوني وكتلهه
شوفيلي هذا الرقم لان رمش عليه!!

رديته الهه ودخلته بتليفونهه واني كاعده بصفهه
اباوع بس داست ع الاتصال
جان يطلع اسراء

عكدت حواجبي وكتلهه منو اسراء؟؟
ضحكت ياااا ولج هذا الرقم مال اخت سامر
من اجتنه انطتني رقمهه وخزنته بتليفوني
وهاج شوفي حته البارحه خابرتني ..

احس الدنيا افترت بيه منا حمل وحاره
نفسي لعبت بسرعه ركضت للحمام
اتقيء امعائي تكطعت..

اخذت نفس وغسلت وطلعت سويت نفسي
طبيعيه!! بس اجذب ع روحي
براكين وتغلي بداخلي

صعدت لغرفتي وكلساع اريد اخابره
واكله وارجع اتعوذ من الشيطان
كمت اجيب افكار بكيفي

كلت احتمال لان صديق اخوهه وموصي عليهه
وتذكرت الرساله بصيغه امر !!
وعبالك عدهه ميانه ويااا

لابشار مايسويهه وهو من النوع الصريح
ومايجذب اذا هاي جان كالي

لا احتمال هي مخليه عينهه علي
لاااا مااشيل ذنبهه البنيه حبابه
وماشفت شي عليهه واصلا ماطلعت ابد

احس راسي يريد ينفجر من التفكير
بس جنت ضابطه اعصابي واتصرف بهدوء
وحته اذا اجه بشار ماحجي الا يرتاح وياخذني
بحضنه

مر اليوم يخنك مع العلم خابرني وسالني
شلونج محتاجه شي؟؟ وكتله لا بس مشتاقتلك
وظل ربع ساعه هو يتغزل بيه
لحدما اندك باب المكتب وراح

ليل اجه وبيومهه ماطلع وكعد ويه جدو وعمو يسولفون
لحد الساعه ب١٠ بليل صعد لكاني مدده بفراشي

مثل كل مره غزل وحب
بس جان مالي خلك ونفسي تلعب بشكل
اخذني بحضنه وهو يسولفلي ع الشغل..

اخر شي سالته بشار عرفت الرقم منو؟؟
رد عليه بهدوء منووو؟؟

دكيت ببرنامج عند فاديه طلع رقم
اسراء اخت سامر!!

من كلت هيج فززز كال شنووو؟؟
ااي والله هي منطيه رقمهه لفاديه.

هدوء تام وهو ساكت لا كالي اي
ولا كال لااا ولابرر ولا حجه شي بس ساكت وصافن بالفراغ..

حجيت بهدوء واني اخلي راسي بركبته
هاا بشار شو سكتت اكو شي مااعرفه اني..

كام عدل كعدته ورفعني من صدره
وهو يباوعلي واني صافنه بعيونه
انتظره يحجي وهو ع هدوءه

مد ايده لتليفونه اخذه وكال تعالي يمي!!!

.
.
يتببببببع....... احبكم