قمع المشاعر

البارت 4 من الجزء الثاني

قمع المشاعر.... الرابع من الجزء الثاني...
للكاتبة زهراء ( روزايه)...

العشك يعني التفاني...التضحيات
ما يدوم الا بوفه ونكران ذات
واحنه ما قدسنه حته الذكريات
وطبعا تسيء الامور
احنه مالينه الغرور
وكلمه ما نتحمل اثنيناتنه
وبعد شيرجعه؟ انتهى البيناتنه
.....

قبس.. جاوبتهه اي اني قبس وين تعرفيني؟؟
.. هاا لا مااعرفج بس من خلال سامر من يحجي ويه بشار ..

قبس.. اهلا وسهلا حبيبتي
... وبيج اكثر ودنكت راسهه خجلانه سالتهه فاديه؟؟

فاديه.. شكد سولفنه وماعرفنه اسمج؟
.. اسمي اسراء
فاديه.. هله بيج وان شاء الله ترتاحين يمنه..

ام بشار.. يمه اسراء البنات مثل اخواتج اي شي تحتاجي تستحين مني اطلبي من عدهن والبيت بيتج ..
اسراء.. شكرا خاله ماتقصرين بس سامر كال بين ماادور بيت لان عمامي يوميه يجون يتعاركون ويااا

ام بشار.. ماكو فرق سامر وليدي كومي فاديه اخذي البنيه للغرفه تبدل وترتاح ..
فاديه.. تعالي ويايه واخذتهه للغرفه انطيتهه جربايه قبس وكنتورهه خلت ملابسهه وبدلت وطلعت ويايه رجعنه بالمطبخ..

شجن.. جنت نايمه ع رجل قبس وهي تاخذ خصل من شعري وتبرمهن لو تسويهن شوارب لو تحركهن ع عيني!!

صابرين ماتحجي ابد كاعده بس تستمع ولاتدخل صارلهه
درس..

واسراء الضيفه الجديده كاعده خجلانه وحته ماشاركت بس ماما جبرتهه تكعد يمنه مدام ماكو احد

حجت بيبي اكول قبس ماكو حمل انريد انشوف جهال يملون البيت !!
قبس.. ماادري بيبي هستوني صارلي شهر من تزوجت

ام بشار.. ياعمه انطيهم مجال يتهنون لاحكين ع هوستهم وهو ابني سوده عليه اشاف اسمع يطب بمشكله يطلع باكبر منهه..

الحجيه.. الله كريم .. فاديه ماخابرتي عمتج بشرى شدكول ع بسمه محد يسمع اخبارهه..
فاديه.. دكول تزهو بالنصر هي والعصابه مالتهه بس دكول امجد متعارك ويه امه بس ع شنو ماتعرف عمه ماحجتلهه...

الحجيه... ضيعت روحهه بسمه وماعرفت تربيهن هسه لوتجي قسمتهن ويروحن عاد ترتاح منهن وتزوج امجد..

شجن.. اخذتنه السوالف لحدما اجه عمو عادل
اسراء ركضت للغرفه وماطلعت بعد وصارت تاكل هي وشجن وبشار كالعاده نادرا مايجي ع الغده هو وعمر..

تغديت وصعدت لغرفتي دكيت على بشار حجيت ويا شويه كال اليوم اجي ع العشا شغلنه خفيف ماعدنه شي..

قبس.. حبيبي اريد اروح للمختبر احلل
بشار.. اليوم؟؟
قبس.. بكيفك
بشار.. ب٥ ادزلج السايق يجيبج للشركه ومناك اخذج لان اني ب٥ اطلع وخاف اتاخر بين مااجيج ونرجع ..

قبس.. ماشي بس ماراح اكول لخاله علمود التحليل خاف يطلع ماكو الا نتاكد!!
بشار.. ماشي ب٥ اني اخابرج

قبس.. صدك بشار اجه سامر جاب اخته؟؟
بشار.. خابرني الصبح كتله امي بلبيت وديهه وهو راح لديالى
قبس.. يله حبيبي مااعطلك عن شغلك راح انام شويه
بشار.. نوم الهنا حبيبتي

قبس.. سديته من عنده ومددت بفراشي وغطيت بالنوم ماشلت راسي لحد ٣ ونص باوعت لساعه مابيه اكوم بس ماكو وقت كمت غسلت وبدلت ونزلت

لكيت عمه بشرى موجوده بس شافتني
كالت هلا بعروستنه هذا كله نوم لازم ابن اخوي مسهرج؟؟

قبس.. دنكت بوستهه وكتلهه انتي شدكولين ؟؟
بشرى.. ادري بي محروم وصايم سنين واجته هيج وجبه
دسمه يسهر عليهه للصبح يفلس..

قبس.. ههههه لايسمعونه البنات جانت بس هي والحجيه بالهول وخاله ام بشار بالحمام والبنات بالغرفه

بشرى.. هاي اخت سامر شكد تبقى هنا؟؟
قبس.. مااعرف سولفتلج خاله؟
بشرى.. اي سولفتلي خطيه اتذكرهه من هي بروضه جابهه سامر يمنه وبس تبجي بليل الا تنام بحضنه

قبس.. هو بشار كال حيل متعلق بيهه وكل هذا
اليسوي علمودهه مايريدهه تتعذب مثل امه..

بشرى.. لاشكو بيهه اتكاطعت الناس حالهه من حال البنات والله اني كتله عمه سامر جيبهه يمي محد عندي سامر ربه يمنه ينحلف باخلاقه..

اكلج شو مبدله انتي وين تريدين ؟؟
قبس.. بشار كال ادزلج السايق ب٥ بعد نص ساعه نريد نطلع
بشرى.. لعد مدامكم طالعين كليله عمتك دكول اريد علاجي هو يعرفه اني اظل يمكم لليل..

قبس.. كاعده اسولف ويه عمه وطلعن البنات من الغرفه واسراء وياهن ماادري ليش كلما ارفع عيني عليهه الكاهه تباوعلي وصافنه عليه وبس تشوفني انتبهت تنزل عينهه!!

بعدني كاعده انتظر اندك الباب عبالي السايق سلمت عليهن وطلعت شفت من جوه الباب عبايه مال مره وادك بالباب حيل !!

فتحت الباب بسرعه دفعته وفاتت وحده لابسه
خمار وعبايه مال راس وتاخذ النفس كوه ..

قبس.. تفضلي منو انتي؟؟ رفعت الخمار وانصدمت ساره مرت وائل وهي تلهث عبالك جانت تركض حجيت بتعجب ساره!!!

ساره.. اي عيني ساره ولج قبس خليني افوت بعدين
انسولف لاتجي وراي الحيه!!

قبس.. فوتي فوتي اعذريني تفاجأت من شكلج وبوستهه وباركتلي..

طبيت وياهه صحت يابنات اجت ساره مرت وائل حته ينتبهن كلهن كامن عليهه يحبنهه بنت خالتهن وهي فقيره ..

مالحكت اكعد وافتهم شبيهه لان انخبصن
وطلعت خاله من الحمام حضنتهه وبجت
واني السايق اجاني سلمت وطلعت وبالي يمهن شصاير؟؟

صعدت ويا ابو حسين سلمت علي وهو يتباركلي
ماشايفته من يوم سالفه ساجده
ولا شايفه شارع الشركه من ذاك اليوم

وكف السياره بعيد عن باب الشركه واني اباوع وينه بشار
لحدماكالي انزلي عمي اجه الاستاذ طلع جاي من ورانه ماانتبهت..

نزلت وصعدت يمه كالي هاياحلو خوماتاخرت عليج؟؟
قبس.. لا ماصار هوايه من واكفين!!
بشار.. هسه انروح للمختبر هم تحتاجين طبيبه ؟؟
قبس.. لا مااحتاج مابيه شي بس نحلل لان صارلهه عشر ايام ماكو ..

ظلينه نسولف لحدماوصلنه للمختبر
اخذوا دم من عندي وهو يعرف
ابو المختبر كاله اني اتصل بيك لاترجع ع النتيجه...

بشار..هسه وين انروح؟؟
قبس.. بكيفك
بشار.. خلي نتعشه برا ونفتر شويه ونرجع لان مواعد جماعته بليل يجون

قبس.. افترينه شويه وتعشينه بالمطعم وطلعنه للسياره هستوه صعد دك تليفونه ابو المختبر عيني علي وكلبي كام يدك سريع !!

بس كاله الله يبارك بيك لزمت ايده حيل
وهو يباوعلي مبتسم ويحاجي بالولد ...

سده من عنده والتفت عليه كالي مبروك حبيبتي
ورفع ايدي وباسهه ..

احس نفسي طايره من الفرح مثل الفراشه وفتحولهه حقل ازهار وكامت تتنقل من زهره لزهره اجمل..

بهذا اليوم اثنينه فرحانين بشار من كدما فرحان
حته مايعرف يعبر بالكلام كلساع ورفع ايدي باسهه

لحدمارجعنه بليل بس نزلت تلكتني عمه بشرى انطيتهه العلاج جانت بالمطبخ وشاورتهه عمه اني حامل..

بعدهه الكلمه مانطقتهه كامل وكامت تهلهل
كلهه اجت ع صوتهه ومااعرف البوسات منين تجيني
حته عمو عادل باسني من راسي وحضني

حسيت اني موبس زوجه ابن بهذا البيت
لاااا .. حسيت هذوله اهلي عمو هو بابا
وخاله المايوم سمعتني كلمه موحلو
والبنات اخواتي واكثر...

صعدت لغرفتي سبحت وبدلت وبشار بس نزلني وراح ينتظرو جماعته اجتني صابرين باركتلي وراحت
تمنيت بهاي اللحظه عندي ام او اخت اخابرهه وتفرح وياي

تمنيت عندي صديقه وحده احجيلهه يومياتي
وتفرح لفرحي وتحزن لحزني!!

صح سناء وعاليه صديقاتي بس مااتواصل هواي
وياهن ولحد الان مااجني ع زواجي

لذلك بشار صار عندي كلشي صديقي
وحبيبي ...وزوجي.. بيوم الي اريده صديق
واشكيله الكا بجانبي

حته من اضوج من عنده واتعارك احتاج شخص احجيله
كام يفوت يلكاني ابجي
يكلي اشكي الي وصدك مرات انفعل وانسه هو زوجي
اكوم احجيله كلشي ويناقشني ويتحمل كصديق حته اذا الشي ضده ...

نزلت جوه واجه بالي مرت وائل اريد اشوف
شكو وشعدهه جايه وهم ميخلوهه تطلع
فتحت الباب مال الغرفه لكيت شجن مدده وتقره بكتاب...

واسراء كاعده ع جربايتي تقره وفاديه تصفح بتليفونهه
اريد احجي بس اسراء كاعده اشرت لشجن براسي حته تكوم..

رحت كعدت بالهول واجتي وراي كعدت بصفي
كتلهه تعالي شجن طلعت وماعرفت ساره شعدهه؟؟

شجن.. كايله لام وائل اروح اضرب ابره عند جيرانه
وجايتنه تركض!!
بس سالتهه ماما شلونج كامت تبجي وتشكي!!

ساره.. خاله ارحموني تعبت اني من وائل شبابي
راح واني اخدم بي وبامه ومامحصله بس الكتل منهم

ابني بطولي ويكومني بغلط ويكعدني بفشار
ومعتبرني عنده خدامه لامه وبس للنومه وبعدهه
يكلي كومي طلعي من الغرفه واروح انام يم بناتي

خاله ابوس ايدكم دبرولي حل تعبت والله انتن خالاتي قنعتني وزوجتني وائل وضحكتوا عليه كلتوا يخليج تكملين دراستج
وكتلولي يحبج وسويتولي الدنيا جنه..

تالي مرحله اولى كليه وبطلني ومن هذاك اليوم لسه
واني عايشه باكل بطني لاعندي كيان ولايقدر تعبي
وبس اخلف واربي ..

واجي اشكيلكم دكلولي وين تروحين
اروح لابوي يكلي اذا طلكتي مااستقبل جهالج
زين بناتي صغار حته يكرهن ابوهن من يشوفنه يكتل بيه...

ام بشار.. شبيدنه ياساره اطلكتي وانتي حاطه ٥ بركبتج وكبار وابوج مابي خير وين تروحين ..
ساره.. من الاساس كتله مانخلف هواي لان من عرسي لسه واني ع هالحال..

تالي كل حمل يصير غصبا عليه لايخليني اخذ حبوب
ولا اروح لطبيبه بمزاجه شوكت مايعجبي يقرر يخلف لازم اكله سمعا وطاعه وهاي كسر ظهري بالجهال..

وغير كل هذا بالجديد حماتج بسمه كرهتني بعيشتي
هي وبناتهه خاف عوزني قهر يوميه يمنه وتشحن بخالتي
ساره وسخه!! ساره تحجي علينه!! ساره هيج ساره هيج..

ماتخاف الله انتي الحجيه امهه ماتحجين وياهه
ارحموني والله يوميه ادعي عليهه واتحسب شنو
ذنبي!! يجي وائل تتلگا امه تشحن بي من ورا كلام بسمه

موعدهه بنات ماتخاف الله يسوي بيهن مثل ماتسوي
بغيرهه لو ماتعرف الحرام شنو؟؟
انتم ادخلون بخطيتي اذا سويت شي بروحي..

بشرى.. ع كيفج ساره واحجيلنه بسمه شنو غايتهه؟؟
ساره.. غايتهه تزوج فاطمه لغيث ليل نهار ادك ناعم براس خاله حته يتزوجهه

وخاله لازمه التليفون لغيث وتقنع بي وكلنه نعرف غيث عاف البيت وبالصدفه يمر وعلاقته موقويه ويانه..

والبارحه اجتنه العصر هي وفاطمه واني بالمطبخ والله اشكال
اسمع حجي وما انقله لان مرجعهه عليه اني الي اتحاسب..

سمعتهن يحجن واتفقن يروحن لوحده تسوي محبه لغيث وعگده لسان حته يوافق يتزوج بحكم ع اساس غيث مسويله عمل...

وهاي السالفه بسمه خلتهه براس خالتي سمعتهن واني اشتغل ولا حجيت ولاكعدت يمهن ليش مااجت فاطمه تريد مي انصدمت من شافتني بالمطبخ..

وراحت مدري شكالتلهن لان اني طلعت اخبز ومن اجه وائل بليل خاله دكله مرتك تصنت علينه وفشلتني كدام الناس
وع اساس اني كايله لفاطمه انتن ماتستحن وبعد لاتجنه

واني وروح امي اذا الحايط حجه اني حجيت وخلت وائل يدور حجه عليه ضربني واوجعني الليل كله اون من جسمي

شنو ذنبي ابجي وبناتي يبجن وياي احجولي
اني بيش ماذيه بسمه اعرفهه تعرفني حته انكتل بسببهه..

قبس.. عزااا بعينهن ياربي شنو من مله تعبانه وين
تريد توصل بسمه تخبلت محد يوكفهه عد حدهه..

شجن.. تعالي اسمعي لعد من طلعت حجت وياي
كالت غيث محاجي بشار وعمر عليه وكايلهم شتردون حاضر
غلطت اني بس اريد شجن

واخوتي رافضين كايليله خلي العلاقه طيبه بيناتنه
ماعدنه اخت للزواج وغيث ساكت..

كتلهه لعد ليش غيث هيج سوه ؟؟ هو التخله عني وصدك رجلج واني بريئه..
ساره.. غير كومه ادله يجيبله يوم صوره انتي ولد كاعدين يوم رقم يوم رساله من جهازج والله حته اني صدكت

بس غلطة غيث هو خطوبته من فاديه هي هاي
دمرت علاقتكم..

قبس.. وشلون رجعت علاقته ويه اخوتج ماسالتيهه؟؟
شجن.. اي سالتهه كالت غيث مسولفلهه هو رايح شكم مره يعتذر من اخوتي ومتراضين..

بس تدرين قبس عرفت شغله وتاكدت منهه غيث مايعرف اي شي عن سوايه اخوووو
يعني غيث يعرف بس وائل تهمني برسائل وعلاقه ويه ولد وياي وع هذا الاساس غيث مايحاجي وائل محمله المسوؤليه

بس سالفه الاعتداء والطلقه هاي كلهه مايعرفهه اخوتي ماحاجيله يعني غيث بعده مخدوع من اخوووو...

قبس.. والله مااعرف شگلج ياشجن ؟! بس احسنلج تنسي
ادري هو يحبج وانتي تحبي بس جمعتكم مستحيله
لان اخوتج ماراح يوافقون ابد..

ختمتهه ويه شجن وصعدت لغرفتي
كالعاده كل ليله نعيش شوك ولهفه جديده
واخر جولتنه تنتهي انام حضن بحضن
واني احمد واشكر ربي ع هاي النعمه الي اني بيهه...

مرت ٣ ايام وسمعت عمه بشرى رايحه لبسمه
ومتعاركه وياهه وصاير بيناتهم غلط واجت حجت لجدو وهو راح لبسمه مرزلهه بس مايفيد عمه تعلمت المكر من بناتهه
ابدال ماتعلمهن ع الادب...

اني حملي نوعا ما سهل مرات اتقيء بس صايره انام
هوايه بحيث كلما ارفع راسي احس نفسي صار شكد مانايمه وارجع انام...

بشار مشغول بسالفه سامر وابد ماالتقه باسراء
وهي ماتطلع من الغرفه بس تقره حبابه وهادئه وتستحي...

اليوم عرس حوراء بنت عمه بشرى ورحنه للعرس
وسامر اجه اخذ اخته كال اني عندي اجازه يومين اظل يمهه مااطلع وتشكر من عدنه وراح...

شجن ... رجعنه من العرس تعبانين بس جانو جماعه عمر بلاستقبال وصابرين كاعده بالهول ماراحت ويانه

بدلت وكعدت يم علوش ابوس بي طب عمر كال راح نطلع ربع ساعه ونرجع بس وحده تروح تعدل الاستقبال ..

رادت تكوم صابرين ماخليتهه كمت اني رتبته وفتحت الشبابيك
ريحه الجكاير تسطر والسماعات مشمره بالكاع شلتهن ..

ردت افتح بعد ضوه شفت تليفون ع الشحن عبالي تليفون عمر
ضغطت ع مفتاح القفل بسرعه فزيت هذا تليفون غيث...

عرفته من الصوره المخليهه نفسهه صوره الغلاف
مال الفيس مالته من جنه ع علاقه اتذكر رمزه
مره اتشاقينه وكالي بي..

ماادري شلون وخرته من الشحن وكعدت فتحته
واني عيني ع الطرمه خاف يجون بس دكيت
الرمز انفتح

صارت دكات كلبي سريعه هم خوف وهم ارتباك
وقلق خاف واحد يجي بسرعه دخلت ع الفايبر
لان اكثر استخدامه فايبر ..

اجه اول اسم كدامه فاطمه....
بده الهوه يشح عليه واني افتح المحادثه
وايدي ترجف وادعي كون جذب هاي موفاطمه

شفت رسائل هواي بحيث كلما اسحب الشاشه
تتحدث بس كل عشر رسائل تقريبا
هو راد بوحده كلام عادي لو اي لو ان شاء الله

بس كلامهه فضيع وجرأتهه بالحجي وهي
دكله اني احبك يوميه الا اشوف صورتك
يله انام ..

اكو رساله جانت تحجي عليه وهو رادهه
وكايلهه اذا ذكرتي شجن ماتلومين غير نفسج..

اكلب بالرسائل ودموعي تنزل بحراره
لحدماشفت صورتهه دازتهه اله بعرس بشار هذا بيتنه
وهو شايفهه وماراد عليهه...

صح اني ويا منتهين بس موبيدي
اغار ولابيدي اجذب واكول نسيته
اول حب هو غيث واول جرح هو ..

سديت تليفونه ماكدرت اشوف بعد لان اختنكت
وطلعت من الاستقبال اجر بذيال الخيبه والندم

كل اليصير بسببي اني ضيعت كلشي بسكوتي
واني علقت نفسي بشخص اخو مخليني اباله وهددني اكثر من مره ماتصيرين اله بس اني تعلقت بوهم...

طبيت ع السريع لفراشي وغطيت راسي وابجي
اني شلون اعيش شلون اكمل حياتي بهيج حب من اساسه غلط..

كلبي بهذيج الليله اذاني حيل كلساع اكعد ع حيلي
اخذ نفس عالي اريده يملي صدري بس ينكطع

شكد استغفرت وشكد دعيت الله يبرد كلبي
بس كلما اتذكر بيوم اسمع زواجه اختنك...

قبس... سولفت لبشار ع عمه بسمه وشمسويه بساره
بشار.. هاي مو اكو نقمه بسمه نقمه هي وبناتهه
قبس.. خطيه ساره ليش هيج يكتلهه هي مرته ام جهالهه ماينكسر كلبه عليهه..

بشار.. وائل حيوان هو الخله عينه ع شجن وهي طفله شتترجين منه وهسه بعد اكثر واكثر راح يكعد بلبيت ويظل يتحجج عليهه..

قبس.. ليش طلع تقاعد
بشار.. لا بعده بس انطرد من رتبته وهم طلعت علي سوالف فساد ياخذ راتب الجنود ويسجلهم موجودين ويتفق وياهم مايداومون ..

قبس.. يعني ع الشكوه مالتك انطرد
بشار.. هي من زمان سالفه شجن وظلت ورا سامر وبعدهه التهينه بسالفه ساجده وطلعت علي قضايا ثانيه والبارحه سامر كالي انرفعت اوراقه وانفصل بس محد يدري خاف نشمت بي..

قبس.. مممم كلت راح اخلي ينفصل وصدك يعني ماترجع بكلامك ..
بشار.. اني ماارجع بكلامي !! بس وياج كلبي مايكدرلج

قبس.. بشار شكد تحبني؟؟
بشار.. هم رجعنه ع هالسؤال ذبحتيني بي باليوم شكم مره تساليني ؟؟

قبس.. احب اسمعهه منك يله كلي شكد؟؟
بشار.. ماادري شكد لان ماينوصف بالكلام بس اني اكدر اوصفه بالحركات تعالي اكلج شكد...

وغمر راسه بركبتي واختلطت انفاسنه
وتعانقت ارواحنه...
لحدما ضميت راسي بحضنه واني ابوس بي..

جنت مدده ع صدره رفعني وكام كال اروح اسبح حته نجي انام وراي دوام..

كام واني كمت بدلت ورجعت كعدت انتظره
وعدلت الفرشه ..

سمعت صوت رساله اجته تليفونه ع الميز كمت اريد اشوف منو وهاي اول مره اتطفل ع تليفونه ..
فتحت الرمز اعرفه لان مرات ينطينيا وهو ينام اظل اشوف فلم بي..

جانت رساله من رقم مامكتوب علي اسم
ومحتوى الرساله جان...

لاتنسه باجر مر عليه من وقت علمود الامتحان
البارحه مالحكت ع امتحاني....

.
.
يتببببببع... متابعه شيقه..