#بارت٢٥
من
#المنطقه١٣
مريم السعدي
احمد- عمي يحجي ويتمشى اجه ابو المولد نطاه فلوس الخط وراح وبقينا نمشي ونسولف
على شغله وعلى ام اسينات واهلها وعلى مشاكل ام قاسم وانفتح موضوع البيت كال
عمي بس طيني مجال اني داريد ابني بيت بالديوانيه عدي مرتي كاعها هناك ورثها من ابوها ونبيع البيت
صفنت عليه
وتاخذ حصه ابوك
عمي وام قاسم
ام قاسم رضت تجي هله بيها مارضت لاني اول ولااخر واحد يتزوج
وعمي محمد
هذا طايش شيباته ترست شعره وطايش اني اريد اهج من سوالفه
براحتك عمي كايل للولد
اي كتلهم وكالو سري اليريحك همه يردون يبقون هنا يم خوالهم اني ماجابر احد بس حمزه كال اني اجي بالعطله يمك هذا روحه باسونه
ورده اسينات
والتفت عمي عليه يبتسم
شتكول حمودي حصتي على حصتك واخذك يمي وازوجك وافرح بيكم
صفنت عليه ابتسمت ونصيت عمي اني شايفها اختي الله يشهد واني باقي هنا عسى ولعل يجي يوم تجي بي مليكه اكون انتضرها
صفن عليه وهز راسه نصه مقهور
لزمت ايده عمي طيني مهله افكر اني انت فافاجاتني
لاعمي هه اني مجان قصدي على اسونه اسونه وجر حسره شكبرها اسونه متفيدك
بلعت ريك
عمي يشهد الله البنيه ذهب بس حرام عليه اضلمها ويايه بس هذا هو التريده يصير
وليدي داكولك اسونه متفيدك اني ماريد اضلمك
بلعت ريكي ليش هيج تكول عمي شبيها اسينات جنها ورده
اي بس للاسف مغمضه
شون يعني وضح مو وكفت كلبي
عمي اسينات شايله تك مبيض والثاني خمول
فزيت فكيت كل عيني وراسن غرغرت
عمي شدتحجي بعدها طفله
ها امر الله متشوف حمزه متعلق بيها الوحيد اليعرف حمزه وامها واني وهسه انت ولوماعرفك سراني فلا احجي
بلعت ريك عمي شون صار بيها هيج همس وباوع للشارع همس
تمرضت وتنهد
تمرضت والتهابات وعلاجات تالي صار مثل الكتله بي من الالتهابات كالو لازم نشيله والثاني اثر عليه الالتهاب خمول صار عدها
يحجي وصوته رجف
بقه ساكت ويباوعلي هاي روحي من الدنيا اطيب كلب بجهالي هي وحمزه هسج الدنيا لعبت بيها من صغرها
عمي اني اتزوجها واخليها بعيني
لايابه لا اني مااقبلها عليك حرام عليه احرمك من الذريه ليش
سكتت حاير احس داااذي اختنكت حيل همست
محد بينا مرتاح
كال
ابد كمل مشيته كال
اني قصدي وحده من بنات اخو ام اسينات واكعدك يمي
سكتت افكر باوعتله
خليني افكر عمي
والله يابه احسلك تضل هنا بيد محمد يطيح حضك هذا
لا عمي اللي تكوله صح
واني هم موباجر لو عكبه فد سنه خلي يكملون قسام شرعي مال بيت مرتي والله يسهل
خوش عمي
شفت فكرته انسب فكره وتمخمخت ببالي ايام وليالي اروح لجماعتي مناك وارجع وياهم اشتغل ساعه اكول اشتغل بالفلح ساعه اكول ارجع لدراستي لحد ما خليتها على الله
بس من اتذكر اسينات اتفركس يكلبي ورده مفتحه شطفاج
اربع ايام وخاله ام اسينات واسينات عد اهلها
نايم بيوم الخامس الفجريه سمعت صوت الوذان توني اكوم اتوضى واسمع نزله درج سريعه وترديد يارب سترك سترك يارب سترك
صوت عمي هذا فتحت الباب ركض صار بوجهي ديمشي سريع وجهه اصففرر وشفافه ترجف
خيرك عمي شبيك شكو
مادري والله يابه مادري
حمزه طلع وابراهيم
شبيك يابه شكو
والله بابا مادري خخابروا جوارين بيت جد اسينات ووكال دكوهم وولا واحد صاحي لك يابه عينوني
اني كال هيج رجلي تخيطت
حمزه ضرب على راسه صاح
البنيه حجي البنيه وين
والله يابه مادري مادري
يقهر يرجف ووجهه اصفر حيل ويصيح مادري ويباوعلنا يريد نطمنا
وركض حمزه جر قميصه وتلفونه يلبس ويحجي
نسيم عدك شي كاعد لو نايم. زين زين اذا شفت خالي كوله ماراح اجي الباجر طالع للديوانيه فيناللا
امشي يابه عل، كيفك ماكو شي
ابراهيم- انتضروني بس ابدل
احمد- بدلت ركض وهمه يحجون شلت الجزدان عمي محمد شال راسه كال شنو هالهوسه محد جاوبه
وطلعنا نركض اني وابراهيم وعمي وحمزه
تكسي من الكراج كبلنا للديوانيه جان عمي بكل خطوه يردد
دخيلك ربي مااكدر بلاهم
متت قهر متت حمزه كاعد ويفرك بوجهه ويعض شفته
عمي كلسا يخابر ويمولوله مندري محد طلع كلها تخاف بس الشرطه تارسه المنطقه
علما وصلنا للديوانيه عمي تخربط كوه مشينا ويدلي بينا
لكينا سيارات بباب البيت بيكمات عاليه ووشباب محزمه مسلحه
والوجوه تنفض غضب عمي صاح وبجه
لك حمادي وين عمتك. لك جاوببني
حمادي نصه راسه واجاه عمي يهز بي وذاك منصي وساكت واحد منهم جاوب
اذكر الله عمي الولد البي كافي كل اهله راحو
بس كلولييي وينهم وين الكاهم اهل البيت النسوان ويين
ماضل ولا واحد عدل كلها راحت كالها ووجهه غاضب
عمي وكع من طوله وحمزه راح ركض على الولد ضل يحجي وياه ويتوسل اخر شي صاح
لككككك احجيييي اختي وييبن
الولد جاوبه
مو وي الجثث والله ماعرف بيها وين
وطلع واحد عجوز يركض
عمي. عدنا عدنا جانت عدنا بالحوش وصارت الدكه
وركض حمزه عمي تعرفها. اختي بت بنتهم
اي جا شون ماعرفها بت حجي راجح
اي فدوه لملبك نصه على ايده يبوس بيها فدوه لكلبك اخذني الها
واندار علينا اخذو ابويه للمستشفى اشوف اختي واجي
رحنا وي عمي وحمزه راح
الخبر جان موكد ام اسينات وي المقتولين كانو يحضرون الاكل بالطرمه لزفه الولد بالشارع وطبولهم دكوهم
بس ابن اخوهم عدل جان بالمزين الكع مليانه دم. شي مرعب والفرع مليان مسلحين وكلها تصيح
وعمي راح
يون بالمستشفى ويردد
شتريتها بعمري وردت روحي بيها يربي دخيل اسمك ردها
بجانا. هلكد يحبها يون يون ويرد يكوم بلكن بعدها عدله جوز ممتاكدين هي هادئه من تتالم متحجي خاف عبالهم ميته
حدما ابراهيم صيح
ياببببه ماااات شفتها شفتها بعيني مااتت وكع عمي.
وتلاحكوله اربع ايام. وكفه بالمستشفى حدما اخذناهم وردينا
اسينات-
صعبه حيل الدنيا ضلمه صارت بعيني جنت عد جوارينهم اجيب وي صاحبتي المواعين لان مواعين بيت الخال متكفي واني دزتني وصار الصار طلعت اركض والرجال قفل البوب علينا ويصيح طبو طبو
واني اصيح اهلي
ويكولي ماتطلعين هسه
ربع ساعه اقل رمي. واني افرفح بجي حدما هدات اول مره احس السكوت يصرخ. الرجال ابوهم بيت جوارين خالي باوع من شباك الغرفه الفوك بخوف عال طرمه وهمس
لاحول ولاقوه الا بالله. لاحول ولاقوه الا بالله
واتقرب بسرعه اشوف اهلي كلها ممدده امي هاي دشداشتها هاي هي واكعه وادك والطم واصيح هاي امي اريد اروح عليها مخلوني ردت نحت حدما ملخت روحي مارضو
جتفوني واخذوهم
جانت الدنيا ليل وخربت لثاني يوم الفجر اكوم وارد اكعد احس روحي بحلم حدما فكيت عيني واشوف حمزه كدامي عيونه مجمره
همس اسونه حبيبي
صفنت وجمدت جروحي هاي امي يمكن ماتت حمزه
نصه راسه وهو الماسواها بيوم
والطم كباله لك امي ماتتتت كللللي
وحضنني
وجن كللي موتيها لنفسج
فرفحت روحي ترفض واقعي واصيح ماماتت.
ويشدد حضنه ويبوس براسي
اروحلج فدوه حتموتين نفسج
عساها لروحي عساهااا
اسونه حبيبتي. لتوجعين كلب اخوج. يابه هاي هاي امر الله
لالااا هذا حكم اللبشر اني امي انقتتتلت. انقتلت شفت بعيني مطربسه بدمها
لزم وجهي ويبجي ويايه. ويردد كون اشيل وجع كلبج. ولا شي ياذيج اسونه كون احطج بكلبي ولا يتوجع كلبج
روحي ساحت اربع ايام وردينا بغداد
لاضلولي اهل بالديوانيه ولااني الضللها غير ابن اخوها العريس
انتهت عائله بكاملها افراحها واحزانها وذكرياتها وسوالفها وديناتها وتعلومها. اربع اجيال انتهت بيها
جده
خالي وامي
ولد خوالي وبناته
واحفاد خالي بنات بنات خالي
الهدوء يقتل السياره تدك بينه والهدوء يكتل ابويه ليكدام وابراهيم من صفحه وحمزه لافني بيده وكلسا بايسني من راسي ىيهمس
عيوني انتي صبري روحج. امج تتاذه
بعد ماكول ماما حمزه
ميخالف حبيبتي شتردين اني موجود
حمزه مافد يوم رديتني.
وماردج لو اعرف. اشتغل ليل نهار لخاطرج اسونه
اريد امي
كلتها وبجيت برطم ىحضنني قوي
حتموتيني اسونه دتحسسيني بضعف وعجز
مرت ابويه شحتسوي بيه هي ومروه
همست وابراهيم اندار رافع تك حاجب ورجع باوع للشباك
حمزه باوعله وشاورني
تبقين فوك وابويه هم فوك واني اصعد يمج لتخافين ادرسج واونسج واساعدج حتى بالشغل
تروح لخوالك وتعوفني بحيدي
لا حبيبه والله حتى لبيت خالي مابات بعد اضل وياج. حتى متستوحشين
ضميت راسي بصدره. صبرني حيل وعصر راسي بحضنه وهمس
كل مر راح يمر خالي يكول هيج وفعلا يمر وتجي الحلاه شحم الرمان شكد مر كشر البرتقال شكد مر ويجي وراه حلاه تحلى طعم حلكج
هي هاي حياتنا مره وراها حلاه حتى نحس بطعمها
كمت اغفي وهو يمسد على خدي بهدوء غفيت
حسيت من وصلنا ونزلنا للبيت ابويه محودب ومنصي ابرهيم فك الباب صار بوجهه قاسم
صاح
ها يابه وحضن ابويه وابويه بجه وقاسم هم بجه من باوعلي نصيت راسي خليل اخذ ابويه وحضنه واني حضنني قاسم
قوي روحج اسينات احنا كلنا وياج
هزيت راسي وجاوب حمزه
سباعيه اختي لحد يحاجيها
خليل تقرب مني ونصه حسيته متحمل تعابير وجهي خليل رغم بعد المسافه بيننا بس مافد يوم طلبني ورديته كان دوم عدي صفحه بيضه وي اخوتي يحبوني ماعدهم شي ويايه الا حمزه يتنفسني
ماعافني رغم من طبينا واله من عزتني مرت ابويه ومروه احس بيها شماته. صعدت فوك حمزه شوي وصعدلي هو وسله هدومه
طبلي للهول
يابه تقبلون لجوء انساني حيواني
ابويه ابتسم ونصه كام نام بالغرفه واسمع الشهكه تحرك بروحي كل ركن بالبيت بي نفسها المبه اللي قبل لنروح للديوانيه لافه ٣٠٠ قطعه والكباب التكلاه والكبه مال شوربه. ممخليه ممخليه شي عبالك كلبها يعلم
حمزه ضل يمي يشاقيني ومن ابجي يمسد على راسي نمنا عالقنفات وهو بالكع يمسد على راسي
مردته يبتعد لحضه واحسه بفراغ امي ابد مردته يروح وهذا الصار
امه كلسا تصيحه تدزه وهو يروح يجيب التريده ويرد يصعد كام يشتغل ويايه حتى مواعين يغسل تكلاه يكلي والصبحيه يروح للشغل واني اتاني ساعه ساعه يرد وي ابويه ونتغده سوه
امه مارضت وتعيط وتصيح علي وهو يسكت ويصعد حد ما ملت
احمد- البيت صار اضلم حمزه كام يصيحلي نتعشى فوك من اجي ينتضروني عالعشا ونصعد نشاقي عمي راجح واسينات ويحركني كلبي من اتذكر هاي مراح تصير ام
كم مره ومره نمت فوك بالهول وي حمزه وهي بالغرفه وعمي يوعينا على صلاه الصبح
وحمزه نومه طينه
معود كوم صلي يصيح عمي راجح وهو يجاوب
يابه عدي عذري ويشتغل الضحك
حمزه حيل خفيف الضل ومريح من تكعد ويته ماعده مكرهانيه
وبده دوام جامعته
تدريبهم صعب يجي. مكسر تكسر كليه عسكريه بعد تدريب ودراسه. وقاسم وخليل وابراهيم يضحكون عليه مستجد ومستحد يعني اول سنه كليه عسكريه
وهي خطيه تكوي البدله مالته وتداري وتريكه. صار كل اهتمامها حمزه وصارتله دوم الام اله ولعمي راجح ونوبات حتى الي فتره مرت قاسم تعارك وي خواله وكام يبقى بالبيت من يسمعنا كعدنا كلنا نتريك يصيح من كوه الدرج اكو ريوك لو اطفر بالشغل اتريك عمي يصيح اصعد يابه اصعد
ويصعد تصير لمه حلوه واسينات تروح منا وتجي منا طايره بيهم تسوي ريوك لهذا ولهذا
الولد عطفو عليها وحبوها لاسينات ازيد من قبل لكن عركات خاله مروه موكفت وتصبح حوبتي بينت دعيت عليها بوكت مغربيه
وهي تسكت جان حمزه يحجيلي ويفرفح يكولي شكد اكولها يتيمه حرام تكولي حيه هاي مثل امها
اسمع واقارن لعد اختي ششافت مننج اذا هاي اخوتها وابوها ذيح وحدها يعلم الله ششافت منج
مروه انزوت مالها حس لحد ما مره نايم بالصاله واسمع تمطك وتبسبس بالطرمه بالليل فزيت باوعت من الشباك. وره الباب مال بيت ولد. وهي واكفه. وديحضن ويشبك تخبلت الولد ثلاثتهم مو بالبيت وحمزه فوك وامها نايمه
دفعت الولد وسدت الباب تتلفت طلعت من الغرفه لازم تخاف مني مو مالي علاقه بيها واصيح شعليه عمي والولد يتاذون بت عمي
طلعت من الصاله صارت بوجهي
يممه جفلتني شبييك
نترت همس مروه بالقران اكول لاخوتج يربوج من جديد
رفعت تك حاجب
كدي انت بابا احنا اختك شردناها دير بالك على روحك حباب
نار وشبت بيها
لاعبالج اسكتلج لااخليهم يربوج بسيطه توني اطب للغرفه وجلبت بيه وشكت ثوبها درت وجهي راسن
تغيرت ملامحها كلت راح تخاف راح تتوسل وشمرت روحها بحضني تصيح بعلو صوتها
يممما الحكيليييي ياببببه.
اريد ادفعها ماكو ضربتها ووكعت بالكع وطلعت امها حمزه من فوك كمز شكو هاي
وهي ممدده بالكه نص صدرها طالع وتبجي وتصيح ضربني يريد يعتدي عليه
فكيت عيني وانهد باوعت لحمزه ونترت
اختك هاي اختك عااار دير بالكم منها
وامها تصيح امشي اليوم اذا متطلع بره لااجيل اخوتي يخلوك تنام جوه
حمزه فاك حلكه صافن عمي راجح نزل لزم راسه وهاي تصيح طبلي للغرفه ويجرني يريد يجيبني للصاله وشك هدومي عليه
مكدرت اسمع بعد لعبت روحي
حمزه نزل بهدوء منصدك بيها همست
اني راج اطلع
خاله مروه تصيح اطلع اطلع ولي يللله اطلع بسيطه اذا مفضحتك بسيطه الا اخليك تتوسل الموت وتخابر على اخوتها
واني بالطكاك. لزمت حمزه اسمع لكك
شفتتها بالباب مماصص لبو موزه. صاير. للاسف الالفاظ تعلمتها لمن اشتغلت بالورشه من الولد
حمزه باوعلها وباوعلي همس
احند روح خوالي ياذوك
باوعت لعمي
عمي امانه عدك وبس هالمره حافض عليه اسينات هاليتيمه دير بالك عليها اني طالع حمزه ماوصيك باختك
لميت هدومي اكتفيت وطلعت عمي اذاني من مناقش مبي حيل وحمزه بين الشاك وبين المصدك واخته بالكع بباب الصاله ووجهه مصبوغ. اني غلطت اكبر غلط بحياتي لمن واجهتهها اني شعليهويطبها طوب
توتي اطلع وجنتي بيدي طبكت سياره خوالها ونزلو كلت انسحلت لا و الله طلعو اوادم
وصار الحجي واني ساكت هي تالف وتصيح وتبجيييي تبجي
قاسم طب موجر من الشغل جاي مخابرته امه معثولتها اجه عليه راسن شالني من ياختي نترت ايده صيحت
وخررررر ايدكك باوعت لعمي عمي البيت ينباع. واريد حصتتتي
كلهم صفنو عليه ام قاسم صيحت
شوف العار فوك ممتهجم على بتنا
وصيحت ممتحمل
خاله والقرررران والنزله عساج بالمرت بي اختي والاذيتيها بيها تضوكيها وحده وحده بالقران والنزله انتي المهججتها ابراهيم نتر
احمد لتخربط شي بشي
لالا اخربط. مدام الخوال كاعدين فهموني اختي شون طلعت هسه انت. كلكم الكاعدين تدرون بمروه كذابه. ماريد اكول اني شسفت من شوفه بالباب وهي خايفه لا احجي وسوت السوته.
قاسم - احمد عيييب احنا نسمع منكم مو تخربط بالحجي عمي وخوالي كاعدين
اسكت عيوني انت كلش عادي من تمولك ساقط وامك واكفه اختك مو مضلومه حبيبي عوف هالموضوع مدام خوالك اجوي واني عدي حجايه وياهم
خاله كال
ابني غير نفهم المشكله انت كاعد ببيت محترم وعمك مخليك بعيونه وبت عمك هاي
عمي اني مغلطان وياها بشعرره بتكم تتبله عليه زين اني مباقي هنا. طالع وروح ابويه بس اني ردت منكم جيه لو اجيكم انتو اصحاب نخوه واجيتكن نخيتكم
بقوه صافنين عليه خليل نتر
كومي لج كومي يله. وعدي حساب وياج
وذيج تصيح
الله ينتقم منه متصدكوني واصدكو شوفي يوم مكيفه عدي اخوه راحو لذيج مكيفه لجبروحج ربيتي
وامها نترت
جبي لج خوالج كاعدين هو ميبقى بعد اذا بقى اني ماابقى بعد مابقي واحد ناقص غيره ببيتي
واني ساكت اباوع لاخوها خزرها خنست ودتطب صحت
خاله ضلي الحجي وياج
شرايد منيي من الفجر ليهسه موتتنا ياختي يااختي شخبصتنا
لا خاله العفو اني ردتها من الله ومروه فكتلي باب بس ردت نارعمي راجح تبرد وافتح الموضوع
الخال كال
كول عمي تفضل ابو قاسم من رخصتك
وحجيت
عمي اختي مبقيها بيت جدها امانه عد عمي تمام
كال تمام عمي كمل
ارجع من السجن ماالكاها يملولي شردت شنو شردت صغيرونه عمي عمرها١٤ سنه
والخال يهز راسه ورفعه باوعلي وباوع لقاسم وحمزه
عمي انت اهل ديوان ومجالس واحد صايم مصلي ابويه جان يحلف براسك واختك ترجع ومتلكها طفله شيشردها غير من الضيم
ونترت خاله مروه
لاعيتي لا هي كل مجتي جالتك جلبت بيها خاله اخذيني وياج تتلوك
خاله اختي متعرف خالتي لان ابويه المرحوم مجان خليها تخطي العتبه خاله. مووتمام عمي راجح
عمي هز راسه
انت بمكانس شتسوي فهمني باوعت للخال جر نفس كال
والله ابني اني من اجاني قاسم وكال اريدها كتله ماكو مشكله بت عمك ويتيمه
وكفت بلعت ريك
اواشك عمي اواشك
منوكال اريدها رفعت زوج حواحبي شايط قاسم كان يتبلعم وخاله مروه تسكت لاااموهيج. انتهم متعرف هو مكال اريدها واني صيحت
خاااالله اسكتي اريد افتهم ولزمت قاسم وكفته
انت ردتها. ليش شمد جان عمرها وردتهااا كلها ارباطعش قاااسم وانت١٨. احجييي
صيحت وغمض عينه نصه. همس
اي ردتها كلت لامي ووامي مقبلت
اني هنا شطط ت
اختي شااافت شي اللي انهزمت وي مره متعررررفها. اختي ماذيهااا بشي عمي راجح اذكر الله بروح ام اسينات احجييي احلفك بروح ابويه. اختي ششافت هنا وهجت
كلهم صفنو على خاله مروه نترت
هي مكعددت تتختل وي هذا ووي ذاك وره البيت اختك موعاقله انت متدري ةبرت وانت بالسجن متختخ وكامت تسري مشتكل بين الاخوه
هنا مكدرت بعد والزم قاسم خنكته وكلهن التمو عليه الصيبه قاسم مديقاوم مرجوتني اريد يقاوم شي يثبت انه مصاير البالي شي
قاسسسم اختي غلطت احجي منصي عينه هو وبدلته وسلاحه وهيبته وشاربه واني خانكه وجهه صار احمر وخاله مروه تصيح يمه ابني حيقاله
قاسسم اختتي غلللطت
نتر
لاا. ودفعني لا مغلطت
امك دتكول غللطت صيحت بعلو صوتي امك دتكول اختك تتختل قاسم
همس حشاها وباوعلي كال
وحق الله ردتها الي وامي رفضت وجبت خالي هذا كدامك اساله.
خاله كال صح. يابه واني حاحيت اختي ورجع كمل قاسم
بس هي انهزمت ثاني يوم وي خالتها من جتي
كعدت بالكع ولزمت راسي ارتعش خاله لزم ايدي نترتها مكدرت ابقى بعد كمت واباوعلهم احسهم وحوش وبقت يمهم اختي
اختي هجت من وراك خافت منك من صغرها تخاف منك وانت طفله تخلي عينك عليها روح الله يستر على اختك
عمي عالاتفاق البيت ينباع وكلمن ياخذ حصته اني مواضل طول عمري ادفع بدين اخوك فيماللا
وطلعت من البيت كل مكان احس بي لوعه من لوعات اختي هاي التخجل من الهوا تكولي تتختل وره البييت بيومها مكدرت احجي كلمه ولااكل لكمه من الصبح لليل اشتغل وطلبت من الاسطه ابات بالورشه منا وهيج وقبل
سنين سوده مدري عليمن عايش واخاف ادعي ترجعلي اختي وترجع مو نفس طهرها اليوم صار عمرها١٧ سنه صارت مره اكيد بين جسمها ومفاتنها وحسنها
اكيد نسخه من امي
عمي راجح اربع مرات احالي للشغل واني مااقبل ارجع وعرض البيت قسام شرعي وخاله مروه رادت طلاك والولد مقبلو هالفتره جنت على طول اخابر حمزه مردت اقطع علاقتي بي وبالي يم اسينات
كال رقيه انخطبت لنسيم ابن خالهم اخو سلام
عرفت ستروا عليها لان الولد بالباب مونسيم
وانعرض البيت قسام شرعي وننتضر عالبيعه مالته ومال ورثه طولت بيعته سنين وعمي محمد مختفي خلانا كلنا نتعطل عالبيعه
بقيت اربع شهور روحي طلعت ابات ليل نهار بين الجريديه والدهن كشن مال سياره قديمه انام عليها بس مرتاح من هوسه البيت
بس الصدفه والقدر يلعب دور يخبل
كالعاده من يحي شغل خارج الورشه الاسطه يدزني الي
ورحت لمنطقه من مناطق بغداد الراقيه نوعا ما
الرحال يدليني واني. امشي على اشاراته حدما وصلت بيته ونزلت كال
عمي تفضل هاي السياره
طبيت للطرمه ببدله عمل وبلشت فتحت البنيد اشتغل وهوويمي خطيه جاي وفاكهه عصير وساعه تجر ساعه لل٨ بليل
مااسمع الا دممم
الفرع كله صاح ياستار
واني بالطرمه واباوع المحوله مال فرع مجمره ودتطشر شرار
اباوع نهايه الفرع بيت بي نخله والمحوله فوكاها عدل وتطشر شرار من اشوف اخذ السعف يابس وشوي شوي ديوج
واخذتني الحميه صحت
الحك عمي هذا البيت حيكب
---
يتبع
مريم السعدي
عذروني ممدققه
وهالمدرت اكتبه ٣٠٠٠ كلمه خل نعوف اليوم ملوكه وابو قبضه ونشوف حميدان واسونه
بدت القصه تتشعب وبدت لب الحبكه خليكم ويايه
شكرا جزيلا
تره مليان اغلاط لان عيوني راحت منايمه
اعذروني