ونسيت اني امرأة

الجزء الاول (محدش بيشوف نفسه غلط)

ممكن اكون مظلومه وممكن اكون ظالمه
بس الاكيد محدش بيشوف نفسه غلط
كلنا فينا التكبر وكلنا عايشين دور المظلومين
بس انا هعترف واقول انا ظلمة نفسي

ماما:  يا مرفت يابنتي انتي نقصك ايه عشان تتجوزي الجوازه دي
مرفت:  ومدحت نقصه ايه عشان ارفضه ياماما بس
ماما:  يابنتي دا معاه اربع بنات اكبر وحده طولي
مرفت:  عشان انتي اللي قصيره ياقمر هههههه
ماما:  عمامك وخيلانك كلموني ومفكرين ان مدحت معاه فلوس عشان نوافق عليه
مرفت:  مدحت معاه اللي اهم من الفلوس
ماما:  معاه ايه ان شاءالله
مرفت:  معاه قلبي
ماما:  خايفه تندمي
مرفت:  عمري مندم طول ما مدحت معايا
ماما: لو ابوكي كان عايش كان رفض المهزله دي
مرفت: لو بابا كان عايش كان وافق علي مدحت عشان اتا بحبه

وقفت قدام الكل واتجوزنا وطبعا عمامي وخيلاني مش حضرو الجوازه عشان رافضين وانا مش فارق معايا غير اني هتجوز مدحت جاري اللي لما بشوفو واقف في الشباك بحس بكهربا
محدش عايز يعرف ان الحب السلطان ومدحت سلطان قلبي

شهر العسل تم اختصاره في يومين عشان مش يقدر يغيب عن البنات اكتر من كدا
واتجمعنا كلنا في شقه واحده انا وجوزي وبناته

البنات بتكبر وبيتحكمو فينا اكتر كانو دايما بيعرفو يلو ايد مدحت بالعياط والعصايه السحريه
اه كان معاهم عصاية سحريه بيتحكمو بيها في مدحت
وهي جملة ( الله يرحمك ياماما لو كنتي عايشه مكنش حصل معانا كدا )  وبكدا تتحزم المعركه لصالح البنات

نسيت نفسي ونسيت سني وكنت بحاول طول عمري ارضيهم حتي بعد ربنا كرمني بي محمد واحمد عيالي التوام
بس بعد الخلفه المصاريف الصبيان والبنات بقت كتيره علي مدحت
بقيت انزل شغل بياعه في مول كبير في وسط البلد مهو مش عيب ولا حرام لما اقف جنب جوزي ابو عيالي
وكانت الكارثه اكتشفت اني ست
اه اصلي كنت نسيت حاجه زي كدا

صاحب المحل:  البضاعه الجديده يامرفت قبل رصها تتسجل
مرفت:  تم يامستر ماجد
ماجد:  برافو عليكي...  ايه دا...  مش ممكن
مرفت:  ايه في ايه؟؟
ماجد:  الطقم دا تحفه عليكي
مرفت:   ههههههه الله يسمحك هههههههههه قلبي وقع
ماجد:  بعد الشر علي قلبك
مرفت:  احمممم انا هروح اشوف باقي البضاعه

كنت في الاول محبش اسلوب مستر ماجد
هو اصلا لو شاف اي انثي قدامه لازمه يشكر في جمال لبسها بياع هدوم وبياع كلام

بس بعد كدا بقو في زبائن عندي بيجو مخصوص عشان عرفين زوقي كويس في اختيار الهدايه
والغريبه انهم بردو كانو يمدحو في شكلي ولبسي
انا متجوزه من عشر سنين ونسيت اني امرأة
تصدقو اسم حلو للقصه

بسبب كلام مستر ماجد وكلام الناس معايا
بقيت اهتم بنفسي واشوف قد ايه اني كنت استاهل اعيش عيشه تانيه
اعيش ملكه في بيتي مش شوية بنات بيتحكمو فيا
ورغم تعبي معاهم ومع ابوهم مفيش تقدير
ايه؟؟  انا قولت ابوهم!!! 
اه ابوهم
الاول كنت بقول مدحت بكل حب
عشان كان شاغل قلبي وعقلي
لكن دلوقتي حتي الكلمه الحلو بيخاف من بناتو يسمعو
ولو فكرت اهزر واضحك معاه البنات تبص علينا وهو يقلبها نكد ولما ازعل وادخل الاوضه

مدحت:  انتي زعلتي؟؟
مرفت:  لا عادي بقي
مدحت:  حبيبتي المشكله انهم بنات ومش ينفع نهزر مع بعض قدامهم
مرفت:  ماشي مفيش مشكله
مدحت:  وكمان احنا كيبرنا علي كدا
مرفت:  مين دول اللي كبرو؟؟؟  انا لسه صغيره وفي عز شبابي
مدحت:  انا ياستي اللي كبير وعجوز كمان
مرفت:  هقوم احضر العشا
مدحت:  خليكي معايا هنا شويه البنات بتتفرج علي المسلسل الهندي
مرفت:  تعبانه وعايزه اكل عشان انام عندي شغل بكرا
مدحت:  لا وبكرا اهم يوم في الشغل
مرفت:  اشمعنا؟؟
مدحت:  بكرا القبض
مرفت:  ااااه فعلا

مكنتش بفتكر ميعاد القبض زي ما مدحت مركز كدا

ومفيش اسرع من الأيام والسنين وتتجوز اول وحده من البنات وطبعا كنت في الفرح زي ام العروسه واختها في نفس الوقت ونزلت صور الفرح فيس و واتس
وكنت بفرح بكل تعليق

واخد الهدوم القديمه بتاعت بنت مدحت
لابس محزق و ملزق

مدحت:  ايه اللي انتي لابسه دا
مرفت:  انت عارف معنديش هدوم كتير اخد الهدوم بتاعت العروسه الهدوم القديمه مش جايه علي البنات اصلهم اطخن من اختهم وانا مقاسي زي مقاسها تقريبا
مدحت:  بس اللبس مش بتاع سنك
مرفت:  سنك سنك سنك انت ليه مصمم تحسسني انا كبيره
مدحت:  مالك بس ياقمر متعصبه ليه... طيب يالا عشان مش تتاخري علي شغلك ياصغنن
مرفت:  ومالك خايف اتاخر كدا ليه
مدحت:  انهارده ميعاد القبض
مرفت:  اااااه القبض طيب سلام

مدحت بقي مهتم بالمرتب اكتر من اهتمامه بيا
نسيت عيالي ونسيت نفسي وبقت كل حياتي شغل وبس واهتمامي بالشغل مش حب فيه لا
اهتمامي كان عشان الكلام اللي بسمعه من الزبائن
وفي يوم كنت عندي صداع جامد

ماجد:  مالك يامرفت
مرفت:  عندي صداع جامد اوى
ماجد:  من السهر انتي طول الليل سهرانه من الفيس للواتس لتويتر  ارحمي نفسك
مرفت:  اهو بسلي وقت عشان مش افوق
ماجد:  اتكلم معاكي بصراحه ومش تزعلي مني
مرفت: اتفضل
ماجد: انا لما حضرت الفرح بتاع بنت جوزك وشوفتو وشوفت بناته.... عرفت انك ظلمتي نفسك... انتي لسه صغيره
مرفت: انا صغيره؟
ماجد: انتي في عز شبابك
مرفت: نصيبي بقي
ماجد: ممكن تغيري النصيب دا... ممكن ربنا يكرمك باللي يقدرك ويقدر انك نعمه
مرفت: هههههه فات المعاد
ماجد: لا لسه مش فات

مستر ماجد رمي كلامه ومشي ونسيت الصداع وبقيت افكر في كلامه
وبقيت في البيت من اقل كلمه اتعصب واطلب الطلاق
مره خناقه ومره عتاب ومره زعيق
لحد ما في يوم

مدحت:  يووووه انا كل متكلم معاكي مفيش علي لسانك غير الطلاق الطلاق مش مطلق يامرفت
مرفت:  خليك راجل وطلقني انا مش عايزه اعيش معاك
مدحت:  وانا راجل يامرفت اتنزلي وانا اطلق
مرفت: موفقه
مدحت:  ايه!!!  للدرجادي مش طايقه العيشه معايا
مرفت:  وهدفع كمان فلوس المأذون...  انا عارفه كل المهم عندك الفلوس
مدحت:  تمام جهزي فلوس المأذون ونطلع من المحامي علي المأذون
مرفت:  بكره الفلوس تبقي جاهزه
مدحت:  وفلوس المحامي كمان
مرفت:  ياااااه

ادخل الاوضه وانا بفتكر كلام ماما الله يرحمها وهي رفضه الجوازه دي

وفي الصاله مدحت وعياله

مدحت:  شغلي المسلسل الهندي يا سلمي
سلمي:  بابا انت بجد هتطلق مرفت انت بتحبها
مدحت:  متخافيش انا مصمم انها تدفع عشان اعجزها ومن هنا لي بكرا تكون هدية شويه
سلمي: ياسوسه انت... طيب ما تدخل ترضيها بدل مهي مولعه كدا
مدحت: سبيها تتربه شويه... بسبب كلمها الزفت دا

وتاني يوم اروح الشغل واطلب من مستر ماجد اقبض

ماجد:  بس دا لسه بدري
مرفت:  محتاجه الفلوس ضروري
ماجد:  اوك بكره ان شاءالله
مرفت:  لا انهارده
ماجد:  هو في ايه؟؟

احكي اللي حصل لي مستر ماجد

ماجد:  للدرجادي جوزك معفن حتي فلوس المأذون والمحامي وكمان هتتنزلي عن حقوقك
مرفت:  في داهيه كل حاجه المهم حريتي
ماجد:  بلاش تتصرعي فكري الاول هتعملي ايه هتروحي فين والعيال
مرفت:  العيال هيفضلو معاه شويه لحد مظبط حالي وهرجع شقة ماما الله يرحمها هي اصلا مكتوبه بي اسمي بس مدحت مش يعرف
ماجد:  ليه مش عارف
مرفت:  خوفت اقولو يخليني ابيعها
ماجد:  يبقي ادي الفلوس ياستي....  وهستنا منك تليفون عشان اقولك مبروك

ارجع البيت وقبل ميعاد خروجي من الشغل عشان نلحق نروح للمحامي والماذون
سلمي:  ابله مرفت؟؟  رجعه بدري يعني
مرفت:  ابوكي فين؟؟
سلمي:  رجع من الشغل تعبان دخل ينام
مرفت:  انا هدخل اصحيه

وادخل عشان اصحيه

مرفت:  مدحت...  مدحت
مدحت:  انا صاحي
مرفت:  قوم عشان نكسب وقت

مدحت يقوم ويقعد علي السرير

مدحت: وقت لي ايه؟؟
مرفت: نروح للمحامي وبعد كدا المأذون
مدحت: اممممم انتي مصممه بقا
مرفت: اه
مدحت: والعيال؟
مرفت: لو عايز العيال خدهم انا واثقه فيك
مدحت: ههههههههه حتي العيال؟؟؟ هقوم اللبس.... اتفضلي بره عقبال ما اللبس

واخرج من الاوضه علي الصاله وافضل قعده متوتره

سلمي: ابله مرفت... اقولك سر
مرفت: لا... انا مش امك ولا من اهلك عشان تقول ليا اسرارك
سلمي: انتي زي اختنا الكبيره ياابله سلمي
مرفت:  ههههههههه  اختكم....  الله يرحم.... ولا اختكم كمان
سلمي: بس احنا بنحبك

غصب عني بقيت بتكلم وفي عيني دموع

مرفت: حب متاخر.... كنت بعمل كل حاجه عشان ارضيكم حد فيكم اهتم بيا... حد فيكم فكر فيا... اول مره اسمع من حد فيكم كلمه حلوه وانا خلاص قرارت امشي واسيبها
مدحت: ومش هترجعي فيها... انا جاهز يالا بينا
سلمي: علي فين؟؟
مدحت: هنروح مشوار ورجعين
سلمي: اوعي يكووووون
مدحت: هفضل واقف كتير.... يالا

سلمي تمسك ايد مرفت

اوعي تنزلي معاه دا مش راح الشغل انهارده عشان يعملك اكل ويصلحك و راح اشتري ليكي شيكولاته

ابص لي مدحت وفي عيني دموع

مدحت: لو مش هتنزلي هنزل لوحدي
سلمي: من فضلك يابابا بلاش
مرفت: متحوليش ياسلمي فات المعاد

وانزل انا ومدحت علي المحامي وكتبت ورق بالتنازل وبعد كدا علي الماذون
ويتم الطلاق وننزل من عند الماذون

مدحت: هتروحي البيت معايا انا كدا كدا مسافر اسبوع
مرفت: انا هطلع علي شقة ماما الله يرحمها والعيال هتفضل معاك لحد ما اظبط اموري
مدحت  : خدي وقتي... عايزه مني حاجه
مرفت:  خلاص انا متنازله عن كل حاجه
مدحت: في بينا معروف وعيال.... سلام
مرفت:  سلاااااا.......

ويمش مدحت من طريق وانا من طريق وقلبي بيبكي ومش مصدقه نفسي
لا اكيد انا بحلم انا واثقه ان دي مش حقيقه
انا مقدرش اعيش منغير مدحت
ومدحت ميقدرش يعيش منغيري
ههههههههه اهو حلم شويه واصحي منه
واروح شقة امي اوضبها وانا شايفه امي في كل ركن في الشقه
واسمعها بتتكلم وقفه قدامي وبتتكلم معايا قبل جوازي

ماما: انتي نقصك ايه عشان تتجوزي الجوازه دي

وتختفي والف علي طفها الشقه لحد ماشوفها نايمه علي السرير وبتعيد نفس الكلام بتاعها قبل متموت

ماما: مدحت عيوبه كتير..... بس ظروفو اللي حكماه... جوزك يوم ماربنا يكرمه هيبقي واحد تاني هيعيشك ويعوضك.... مدحت رغم عيوبه عنده قلب طيب وبيحبك ودا لوحده كفايا كنز حافظي عليه يابنتي

وتختفي امي تاني.... وانا ببكي وبصرخ

مرفت: كنزي راح ياامي.... كنزي رااااح يا ااااامي ياااااماااااااه ياااااامااااااااااه

وافضل علي سرير امي ببكي لحد ما اروح في النوم واصحي علي صوت التليفون اجري عليه اكيد مدحت بيطمن عليا 
يطلع اللي متصل ماجد

مرفت: الو
ماجد: اقول مبروك ولا قلبك حن
مرفت: لا قلبي مش حن انا اطلقت
ماجد: يبقي لازم نحتفل تحبي تتعشي ايه
مرفت: هي الساعه كام
ماجد: لسه 11
مرفت: الوقت متاخر
ماجد: صوتك متغير مينفعش اسيبك كدا لازم اكون جنبك

ويفضل يزن عليا لحد ما اوفق
وبعد مقفل معاه

مرفت: يمكن تكون انت عوض ليا ياماجد

وماجد بعد مقفل بيكلم نفسه

ماجد:  لازم اضرب علي الحديد وهو سخن وتبقي ليله

نهاية الجزء الاول