| يا تعبي العشگته | ' باللهجة العراقية '

| البارت الاول |

#يا تعبي العشگته
#بقلم الراوية
#البارت الاول

بسم الله الرحمن الرحيم

| صلوا على النبي ⁦♥️⁩ |

.

لين..⁦

سنة2017

طلعت من بيتنا و اني اسمع صوت خالي الي يصيح عبالك عندو مسابقة أعلى صوت..

مشيت ناحية بيت روان..و اني ادعي و اگول يا رب
يفتحلي الباب سلطان ابو السلاطين
احنا اثنينه بنفس الفرع و بيناتنا بيت

دحگت لـ ام عامر و بداخلي اگول اويلي يابه راح تتلگاني بالاسئلة و اني شلون مزاجي اليوم ما اتحمل كلمة

من فتت من يم بابها هي چانت تشطف الگدامو
سلمت عليها سلام سريع و كملت طريقي بس وگفتني من گالت

- اولي لين شبي خالچ

انداريت عليها و گلت و اني اتخصر

- ليش خالة ؟

- مو صوتو واصل لـ سابع جار..

ابتسمت و بسخرية گلت

- كالعادة متكاون..تحبين احچيلچ المشكله لو ما حاجه ؟

لوت بوزها و گالت بعدم رضا من كلامي

- لا خية روحي لمدرستچ

ابتسمت بمجاملة و كملت طريقي..
دحگت هيچ و هيچ ماكو احد بالشارع رغم الساعة بالسبعة اغلب الموضفين طلعوا..

رفعت نفسي على اطراف اصابعي و دحگت من فوگ الباب و ضحكت من شفت سيارة سلطان طابگه بالحوش..

دگيت الباب و محد فتح.. ظليت ادگ و ماكو احد يفتح
أكيد روان لحد هسا نايمه من نامت عليها طابوگه.

استغفرت ربي و رجعت ادگ بالباب دحگت عالگاع و شفت حجرة اخذتها و گمت ادگ بيها الباب

سمعت صوت باب المطبخ الخارجي ينفتح رجعت رفعت نفسي على اطراف اصابعي و شفت سلطان طلع

گلبي گام يدگ مية دگه بالثانيه
گبل عدلت وگفتي و هو طلع و اني اسمع صوتو يحچي و يدردم

من فتح الباب ابتسمت ابتسامة واسعة و گلت

- صباح الخير

- يا صباح الخير الي يجي من وجهچ

- ليش يابة شبي وجهي

مادري بنفسي من على صوتي.. بلعت ريگي من خزرني
و دحگت لـ ام عامر الي اندارت و گعدت ادحگ علينا

رجعت التفتت لـ سلطان و گلت

- صيح لـ روان ما ظل وكت

تخصر و گال

- مو اشتغل عند الخلفوچ
الساعة بالسبعة و نص روحي لمدرستچ

- و روان ؟

- ما اداوم الوكت تأخر

هزيت ايدي و گلت بسخرية

- و انت ليش تقرر عنها

رفع تك حاجب و گال

- لين روحي من هين ترا طابگات عندي
روان لحد هسا مطموره روحي انتي و گولي للمديره مريضه

- اييي و ليش تفاول عليها ؟ اگوللها مخموده و تأخر الوقت و ما لحگت

حچيتها و مشيت و أني بداخلي اگول من اشتعلوا اهلك على هاي النفسيه الشايلها

رحت للمدرسة و اني ادردم  و كل ما أتذكر كلام سلطان مدي هيچ اهجم عليه اشبعه بوس
لا اقصد بوكسيات

وصلت للمدرسة و دخلت للصف و چان وقتها درس رياضيات تجينا ست خولة بيه
ما صدگ على الله يخلص الدرس تا اطلع عوذه شگد نفسيه و حقنه چنها النسخة الانثوية مال سلطان..

رجعت للبيت و من فتت استقبلني صوت خالي الي يصيح..تنهدت و گلت

- جينا على مشعول الاهالي الي ما يسكت

طبيت للبيت من باب الصالة لگيت خالي گاعد ويمه امي الي تحاول تهدا بيه
دحگت عليه شلون عاگد حواجبو و معصب فول

ما حچيت كلمة و لا گلت شكو..لأن متعوده على هالشي
خالي عندو محل مال ملابس معروف بالسوگ بس ما شاء الله يوميه متعارك وي واحد

فتت لغرفتي و لگيت طيبة گاعد تدرس
طيبة اختي و هي هسا مرحلة ثانية كلية اقتصاد

ذبيت الجطنه بالگاع و مددت على چربايتي و گلت

- شبي عُميد

رفعت راسها و دحگتلي من ورا نظراتها الطبية المستحله معظم ملامح وجهها

- كالعادة متكاون وي واحد بالسوگ

ضحكت باستهزاء و گلت

- يعني ما كافي المعارك الي بيني و بينو

- تؤ ما تكفي ما تشبعو

حچتها طيبة بضحكه
و اني رجعت گمت و گلت

- شو ما مداومه

- ماخذه اجازة

تأففت و غيرت ملابسي و رجعت طلعت برا الغرفة
صبت امي الغدا و گعدنا نتغدا
دحگت لـ خالي عماد شوية هسا هدا..والله ما ادري شلون لحد هاي الحظه متحملين وجودو بينا
بس شنسوي ما عدنا غيرو من بعد رب العالمين

هسا اجا الوقت حتى اعرفكم بي على نفسي
اسمي لين عمري 19 سنة ادرس سادس ادبي
ضاعت عليه سنتين بسبب احداث داعش
بوقتها طلعنا من منطقتنا و رحنا لـ كركوك من بدت العالم ترجع رجعنا اول الناس تقريباً

من صلاح الدين و عندي اخت وحده اسمها طيبة..اكبر مني بـ 3 سنين.. ساكنه اني و امي و اختي و خالي عماد
ابوية ميت من جيت على الدنيا..و عمامي بغير منطقة ساكنين عندي عمام اثنين و اصلاً علاقتنا مو حيل قوية من عهد ابوية دايماً معارك طاحنة بينهم
صح كل فترة يجون يسألون علينا و يشوفون شنو محتاجين..و دائما عمي جابر الچبير يجي و يسأل اكثر من عمي الصغير

امي ما عدها بس اخ واحد و الي هو عماد..عمرو 28 سنة.. جدي توفى  من زمان و جدتي قبل سنتين توفت باحداث داعش..و اصلاً احنا گاعدين بيت جدي ابو امي
لأن ابوية الله يرحمو ما مخلي النا ورث
يعني لا ورثنا من عندو لا جمال و لا حظ و لا فلوس بس صورة معلگه بالحايط..و الي مرات امي تطبگ عدها الحالة و تنزلها

كملت غدا و فتت للغرفة لفيت راسي و نمت
و ما حسيت الا على صوت طرگعه يم راسي و حچي
فتحت تك عين و شفت روان گاعده يم طيبة على التخت

من شفتها گعدت و گلت

- شعندچ جاية بعز الظهر ما تگولين ناس مخموده

ضحكت و گالت

- يا ظهر يولي.. الساعة بالـ5 الا ربع

فركت عيوني و دحگت للساعة و صحيح نفس ما گالت
طيبة طلعت لأن امي صاحتلها لميت شعري و رجعت اگول

- اليوم ليش ما داومتي ؟

- اخذتني النومه و ما حسيت الا الساعة بالثمانيه

- من ان شاء الله تاخذچ النومه الكبرى

حچيتها و طلعت غسلت وجهي على المغسلة بالممر و رجعت

مسحت وجهي و دحگت لـ كتبها و گلت بسخط

- من هسا رجاءاً روان لا تگعدين تگولين شنو هذا و هذا ما فهمتو
ترا طافرة روحي

- والله حقچ تطفر روحچ إذا مگابلة واحد مثل خالچ..لو تصير بيج حالة نفسيه محد يلومچ

دحگتلها بطرف عيني و گلت

- نفس النسخة الي عندچ

- سلطان ؟

- ايي شلعان الگلب

ضحكت و هي تسحب جنطتي و گامت اطلع بالواجبات..
ظليت بمكاني گاعده و صافنة الصفنة الي تجي ورا النوم و ما تروح الا ورا ساعة

- لين

- ها روان

دحگتلها و هي رجعت تحچي

- تدرين خالچ فتحلي الباب..شو هذا خنزر بوجهي و گال خيرر

- عادي ما تعرفين خالي و خبالاتو

گامت من الگاع و گعدت بصفي و گالت بجدية

- لين اني متعوده عليه بس ترا والله عيب.. يعني كل ما اجي يگول خير شتريدين
لو ما تجي امچ يمكن يطردني

- لا ما يسويها..خوما هو اخوج

گلبت عيونها و گالت

- ترا چان بوقتها متعصب من خالچ لإن متكاونين و طردچ

تربعت و گلت

- عود بس لو اعرف شنو بينهم چان ارتاحيت
واحد ما يريد يشوف وجهه الاخر تحسينهم اعداء مو ولد خالات

رفعت روان اكتافها بعدم معرفة و گالت

- الله أعلم..سلطان ما يقبل يگول و لا خالچ
و ظال سر بينهم محد يعرفو

حچتها و رجعت للكتب

و اني مددت و ظليت صافنة بالسگف
سلطان و روان يصيرون ولد خالة امي عدهم بنية بعد اسمها رانية متزوجه و عايشه خارج العراق
..علاقتنا قوية وياهم و ناس تجي على ناس بس الي خلانا نقلل زيارات لبعض هي العداوه الي بين خالي عماد و سلطان..و تقريباً بدت من أيام دراستهم بالكلية
من هذاك الوكت صاروا ناس ما اطيق وجه ناس

راحت روان و اني طلعت وراها..لگيت خالي گاعد يدخن نارگيلة بالحوش
دحگلنا بطرف عيونو ما درت بال الو..ودعت روان
و جيت اطب جوه بس هو صاحلي

- لين

انداريت عليه و گلت

- نعم

حچيتها و هو سحب نفس نرگيلة و رجع گال

- خوما گاعد تروحين عليهم

سويت نفسي غبيه و اني اگول

- منو ؟

ضحك باستهزاء و گال

- لا تسوين نفسچ ما تعرفين..بيت سلطان

ختم كلامو و اني رحت باتجاهو
و گلت بابتسامة واسعه

- الصبح چنت يمهم..و باچر روان عمري عازمتني على العشا عدهم

رفع تك حاجب و گال

- حيل صدگت اخت النفسيه تعزم احد على وجبه

ابتسمت و گلت و اني اضيق عيوني

- تعرف عماد انت كلش مستفز

- عماد بعينچ..بطولچ و تگولين عماد حافي

حچاها بعصبية و هو يذب القمچي مال النرگيلة
و بسخرية دحگت لرجلية و گلت

- لا عماد مو حافي.. هيانو لابس نعال

و قبل لا استوعب شي ما حسيت الا بالنعالات تجيني من كل حدب و صوب
ركضت للبيت و اني اسمعو يسب و يفشر..لأن ما شاء الله خالي بلبل بالمسبات

و گبل لا افوت من باب المطبخ انرگعت بالباب
بصراحة تألمت و جيت ابچي و الي غثني اكثر صوت عماد الي وصلني

- اووف حل و ابو زايد

انداريت عليه و اني امسح على گصتي و اگول بعصبية

- من اشتعلوا اهلك خالي

- بنت الـ......

حچاها و گام على حيلو و اني طگطگت نعالاتي و ركض لغرفتي
فتت و أني اسحب نفس قوي دحگت لـ طيبة الي گالت

- شبيچ ؟

- چلب چان يركض وراية

حچيتها و أني اگعد على الچرباية
رجعت دحگت لـ طيبة من گالت و هي تتعدل بگعدتها

- لين شهل السان ؟ ترا اعرفچ على خالو تحچين
على الأقل احترميه ترا اذا امي سمعتچ والله تعصب عليچ

گلبت عيوني و گلت بعدم اهتمام

- دطيري انتي وياه

هزت راسها بعدم رضا و اني ضحكت و كملت كلامي

- والله عمري اني الي يحترمني على عيني و راسي و الي لا..تعرفين وين مكانتو

هزت ايدها و گالت باستهزاء

- و الحمدلله ما شفت احد يحترمچ انتي و هذا السانچ الي ينگط عسل

خليت رجل على رجل و اني اگول بعنجهيه

- هاي اني و هاي شخصيتي مو المفروض اعجب الكل و احترم الكل
لأن صدگ اكو ناس ما تستاهل ذرة احترام

دحگتلي بعدم رضا و هزت راسها و اني مددت بمكاني
اني و خالي واحد حاد اسنونو على الاخر..هو زين بس مرات او اغلب الاحيان طابگات عندو الحار و البارد
علاقتو بطيبة علاقة خال بنت اختو و اقوى بعد عبالك اخوان واحد يحب الاخر..و مرات تصير بينهم اسرار عكسي اني وياه بس واحد يشوف الاخر تبدي المسبات و الحچي و التكفخ

الي يشوف علاقتنا وي خالي يگول هذا اخوهن
و حتى بالمدرسه من مرات تحدر عليه الحنيه و يوصلني البنوات من يشوفنو يگولون عندچ هيچ اخ و ما تحچين..

بالليل على العشا چنا نتعشى ادحگ ل عماد الي عاگد حواجبو..و ساكت ما ادري شعحب
تحمحمت و گلت و اني ادحگلو بطرف عيني

- يمة تا اكمل عشا و اروح ل روان

- شسوين ؟

حچاها عماد و جاوبتو

- نريد ندرس سوية

- ما تنچبين و تدرسين وحدچ لو الا يم الفاهيه اخت النفسية

- استغفر الله العظيم

دحگنا اثنينه لأمي..
رجعت تحچي بشبه عصبيه

- عماد خليها تولي و تفكني من عولتها..لأن اذا ما راحت راح تگرع راسي بالگركره

و بحركة مستفزه دزيت بوسه لأمي بالهوا و گلت

- من اروح فدوه لنبع الحنان

امي ما ردت عليه بس الي صار خالي دحگلي بطرف عينو و هز راسو بتوعد

على السريع كملت عشايه و غسلت المواعين
اخذت كتبي و استأذنت من امي..اني ما رايحه علمود القراية..لأن اتي بالحالتين كسلانه كسلانه
على گولت عماد.. بقرة تائهه في بحر العلم

أمي وگفتلي بالباب علما وصلت لبيت اهل سلطان
دگيت الباب و سمعت صوتو الي يلعلع يمكن شوية بالغت بالدگ على الباب
اول ما فتح الباب و شافني اني و كتبي زفر و وخر عن الطريق
فتت و لگيتهم بالحديقة گاعد يتعللون
سلمت عليهم و اني ادحگ لـ سلطان الي گعد و كمل نرگيلتو

- نروح لغرفتي ؟

حچتها روان..و اني گبل خزرتها انو تسكت
اني ما صدگت على الله انو الگاه سلطان و اگابلو تا تجي هاي تخلي الفرصة اطير من ايدي

- لا هين احسن..جوه خنگه

حچيتها و اني اگعد على البساط يم ام سلطان الي گعدت تسألني على امي

گعدنا اني و روان نقرا و الحمدلله كلشي ما فهمنا
لأن اثنينه كسلانات..بس اني شوية اهون و احسن منها..اذا هي تعرف صفحة اني اعرف صفحتين بس
شنسوي رب العالمين ذاب علينا الغباء

چنت كل شوية ارفع عيني و ادحگ لـ سلطان الي ملتهي بالنرگيلة و الموبايل مرة يبتسم و ادحگ لعيونو تلمع..

سلطان بالنسبة ليه حلم صعب الحصول
فرق عمر..فرق التفكير
اضافة لـ عداوته وي خالي..ما يستلطفني
و احسو مرات يكرهني
دايما يگول انتي نفس خالچ.. بالطبع و بالسان و بالملامح

حيل اضوج.. رغم انو كلامو صحيح
الكل يشبهني على خالي عماد..يگولون انتي طالعه عليه خلقاً و اخلاقاً..

شفتو ابتسم و اني حسيت بدگات گلبي اسرعت
من وعيت على هاي الدنيا و هو گبالي..يوم عن يوم اتعلق بيه و هو ما يلتفت عليه اصلاً
شگد انطردت من هذا البيت و چان هو الي يطردني
بس على گولتهم اني بلا كرامة
ارجع و لا كانو صاير شي..يمكن لهذا السبب هو ما يحبني و لا يحب شوفتي هين..

صفنت بوجهو و ابتسامتو الناعمه
عيونو عسليات فاتحات مثل عيون روان..شعرو اسود حالك و دائماً يخليه خفيف ما يثخنو و لحيتو و شواربو ما يخليهن عاليات بحكم شغلو بالجامعة..هو معيد بالجامعة و هو بگد خالي عماد

حسيت بضربة على زندي و دحگت لـ روان الي رفعت حواجبها اثنينهن يعني كافي ادحگين

رجعت اقرأ و شوية و گام سلطان و فات جوه..
انداريت على روان و گلت بصوت ناصي تا ما تسمعنا عمتي

- روان..تعرفين شبي سلطان !
شو بس يتمضحك

ابتسمت و گالت باستهزاء

- أكيد گاعد يحچي وي لماروو

من حچت هيچ تهدلت اكتافي و صديت لباب الكيلديور الي فات منو گبل شوية
و رجعت دحگت لـ روان و گلت بقهر و تساؤل

- هما مو تعاوفوا ؟
انتي هيچ گلتي ذاك اليوم

- مادري..بس سمعتو يحچي وياها و يعتذر منها
لين.. سلطان ما يگدر ينساها يحبها

دمعت عيوني و ما اعرف شلون كتمت غصتي
اعرفو يحب وحده..متعرف عليها گبل سنتين
هي من منطقتنا ورانا بفرعين

رجعت دحگت لـ شباك الصالة المطل على الثيلة
گمت و دحگت عليه روان و گالت

- وين ؟

- اريد افوت للحمام

حچيتها و فتت جوه و هي لحگتني و تحچي بصوت ناصي ارجعي يولي..

الحمدلله ام سلطان ما انتبهت لأن ملتهيه كامشه قطعة قماش و اطرز عليها

فتحت باب الصالة و هو گبل رفع راسو و دحگ عليه
چان يحچي وياها صوت و صورة..ابتسمت و گلت و اني ارفع صوتي

- سلطان تگدر توصلني للبيت هسا أمي تقلق عليه

حچيت هيچ و هو عيونو صارت حمر دم..روان كمشتني من ايدي تريد اطلعني
بس أني صنمت بمكاني و اسمعها السعلوة مالتو تصيح سلطان منو هاي.. أكيد مو اختك

هز راسو بوعيد و أني ضحكت و گلت
و عيني بعينو

- يلا سلطان تأخرت

نزل راسو على الموبايل و گال

- يلا لمار بعدين نتخابر

ما خلاها تكمل حچيها و سد الخط.. انداريت على روان الي گالت بتمتمه

- شسويتو يولي

جا وگف گبالي..و هو يدحگ و رافع تك حاجب
بلعت ريگي من گال برود

- حركات الزعاطيط شوكت تعوفينها ؟

بصراحة حسيت شگد اني غبيه لدرجة..
يعني اعرف نفسي ما اگدر اواجهو..ليش احچي كلمة اني مو گدها
بس ما تحملت..الغيرة حرگت گلبي حرگ
رمشت و اني ارجع خطوة ليورا من گال بصوت حاد

- تريدين اوصل هذا حچيچ لأمچ ؟
لو نگول لخالچ الافندي ؟ الي ما عندو  بس يلگح حچي على فلان و علان
بس ليش الومچ و انتي تربية عماد

من حچه هيچ.. ما عرفت شنو صار بيه و أني اسمع كلامو و هو يهين بيه و يطعن
رفعت رأسي و دحگتلو و أني اگول باستهزاء

- و شبيها تربية عماد ؟
على الأقل ما يوم شفتو يحچي وي بنات الناس صوت و صوره..و هو عندو خوات

حسيتو شوية و يضربني و هو يضغط على قبضة ايدو بقوة..
رجعت خطوتين ليورا و اني ادحگ و اركز بنظرات عيونو و اگول

- ظل اركض وراها للمار
صدگني الا اطيح حظك و تخليك تمشي و ما تندل دربك..

- روان اخذيها من چدامي

حچاها ببرود و أني هزيت رأسي بـ أي و گلت

- هو راح اطلع..بس ظل متذكر كلامي
لمار ما تفيدك..

حچيت حچايتي و طلعت برا و أني اسمع روان تحچي وياي بس ما درت الها بال..اخذت كتبي و خالة گالت ليش تروحين توي جيتي
تعذرت منها و گلتلها امي گالت لا تتأخرين
طلعت و رجعت لبيتنا..
فتحت الباب و فتت..لگيتهم يتعللون بالحوش
فتت جوه بدون ما انطق كلمة و أني اسمع عماد يگول شبيچ مطنگره

فتت للغرفة و ذبيت الكتب و گعدت على الچرباية و أني انصي راسي و افرك وجهي و اگول ميخالف لين ميخالف..

غمضت عيوني من حسيت دموعي تچويهن و اني كاتمتهن
أعرف نفسي لزگه و اعرف نفسي وحده بلا كرامة لأن تحب هيچ شخص
يكرهها على كره خالها..
بس مو بيدي..مو بيدي اشوفو يضيع عمرو وي هيچ وحده..الكل يحچي بسيرتها بالمنطقة

هو الي ما يرضى على أي أحد..و دائماً ينتقد هذا و هذاك ليش ما يشوف تصرفاتها
صارلهم سنتين متعارفين و حتى اهلها يعرفون بسالفتهم..بس عادي الوضع عدهم
خالتي شگد حچت وياه بس ما يفيد قافل عليها

ظليت گاعده شوية و حسيت نفسي شوية تحسنت
فتحت شعري و رجعت لميتو و طلعت برا و أني ابتسم

كلهم استغربوا التغيير..ضحكت و گلت لـ طيبة

- صبيلي چاي

صبتلي و هي تگول بحذر

- شبيچ توي من جيتي ضايجه

-ما بيه بس تلاطشت وي روان..شلعت گلبي
ما تفتهم و بس ضيعت من وقتي من رحتلهم

حچيتها و أني اشرب الچاي و نظرات عماد عليه
عرفت شنو سر نظراتو..انو ما صدگني
ما درتلو بال .. بس نظراتو ظلت عليه

اخر شي زفرت و گلت

- اگوللكم شو شفت باچر مطر زخ
يمكن ما ادوام

- ادوامين و كافي حجج..كل ما زخت شويه
ما ادوام اخذتي اجايز اكثر مما داومتي

حچتها امي الي مضيقه عيونها و ادحگ للموبايل
رفعت رأسها و كملت كلامها

- دهاچ شوفي شبيه الفيس بوك شو يطلع من حالو

ضحكت طيبة و هي دگول بصوت ناصي

- والله امي شلعتي گلبي بهالفيس

اخذت التلفون من عدها و أني اشوف شبي
بس ما حسيت الا انسحب من ايدي..دحگت لـ عماد الي گال

- شو جيبي تريد تسوي نفسها فهيمه

- ترا اعرف والله.. بعدين شنو جاهل جواك هيچ تسحب الموبايل

- اي

جاوبني باختصار و أني گمت انافخ و ادحگ لـ عماد و ارجع ادحگ لأمي الي ادحگ للموبايل و هي تريد تعرف شنو الموضوع
امي مو چبيره بالعمر..يعني يطلع عمرها بالـ44 سنة

بسبب عصبيتها المفرطه و قهر السنين..صار بيها سكر و ضغط و هي دايما تعبانه

ظلينا گاعدين بالحديقة..هيچ يوميا نگضيها
مناوشات بينا و بين عماد
و محد بينا ينطي مكاسر كل واحد يگول اني عيني اگوه

بالـ11 كل واحد راح على غرفتو..مددت بفراشي و أني ادحگ لـ طيبة الي كامشه تلفونها
تنهدت و اني اريد انام و ما اگدر..ماكو شي التهي بي
تلفزيون و اكو بالغرفة بس أني ما احب اتفرج عليه
و تلفون امي ما تقبل اشيل الا اصير بالكلية..و عماد يگول يجوز حتى ما اخلي بيدچ

طيبة صارت اول كلية يلا شالت تلفون..
امي حيل حريصة مرات احسها شكاكه بكلشي..من نسألها دگول أني اعرفچن شنو بس ما اعرف هالزمن شنو من شي
حيل تخاف و توهس بشكل..حتى على خالي إذا تأخر بالمحل تگعد توهس و دگول شو ما جا اكيد بي شي..

- طيبة

- همم

- شگاعد تسوين

سألتها و هي زفرت و گالت

- رفيچتي گاعد ادزلي المحاضرات

- زين اريد اتفرج عليه ورا ما تكملين..

اندارت عليه و گالت

- على شنو ادحگين..

- اطلع صفحة سلطان

حچيتها و هي گمزت من مكانها و گالت
بعصبية

- لين چم مرة گتلچ عوفي هالشغلة ؟
راح تخليني احلف ما تگضبين تلفوني

خزرتها و أني اجاوبها

- يعني الي يسمعچ مصادقه بيه
هو بس ادحگ على صورو..لا تحسسيني گاعد اسوي شي غلط

- هو انتي كل تصرفاتچ غلط ظلت على هاي الشغلة

من حچت هيچ..رجعت ادحگ لـ تلفونها
و أني ادحگلها بدون ما انطق كلمة..عادي تعودت على هاي حچايتها
ما اعرف ليش دائماً يشوفوني البنت الي ما عدها اي احترام للمقابل او الها
يحچون و يعصبون بوجهي و عبالهم عادي الوضع ما اهتم..فـ يتمادون

ما نطقت كلمة و گمت اخذت لحافي و مخدتي
هي ادحگلي بدون ما تحچي
بس عرفتني زعلت و شلت على خاطري..

طلعت للصالة و سمعتها تگول

- لين يمعوده ليش زعلتي تعاي والله مو قصدي

رجعت وگفت باب الغرفة و گلت

- ما زعلت..تدرين بيه ما ازعل
بس اريد اروح اتفرج على التلفزيون

- تفرجي هين

- اروح على البلازما بالصالة

حچيتها و ما سمعت ردها..مديت فراشي بالصالة عند القنفة و عيني دمعت..بس بسرعة فركت عيوني
حتى اضيع دمعتي..

مددت على صفحتي و أني احط ايدي جوه خدي
صارت عيني على صورة والدي..رفعت تك حاجب و گلت

- صارلك 19 سنة ادحگ علينا و تبتسم
حتلو شفتنا نبچي تظل ضحكتك على وجهك..بنتك ضايجه على الأقل تعاللها بحلم و واسيها

رجعت مددت على ظهري و اني اركز بالثرية
حطيت أيديه جو رأسي و أني اگعد احسب بالطليان
تعلمت من صغري اذا صعب عليه النوم اگعد احسب
يمكن تعلمتها من أفلام الكارتون
بس أني اغير بيها..اگعد اغير اسماء الخرفان و اسميها بأسماء اشخاص اعرفهم
و اول واحد..عماد..وراها طيبة..وراها روان
و وراها لمار..و هيچ ابقى احسب نص اسماء اقاربي
الاثنين الي ما اسميهم بأسماء الخرفان هما
سلطان و أمي..

مادري شوكت غفيت
و أني اوصل لرقم 22..وصلت حد ضرغام ابن عمي

حسيت على حركة يم رأسي..ما تحركت و أني احس بشفايف على گصتي
و ايد تمسح على شعري..عرفتو هذا خالي عماد..

گام و فتحت تك عين و گلت بصوت ناصي

- ليش ما نايم

جر حسرة و گال

- مو نعسان.. ليش زعلانه و نايمه هين

- ما بيه شي..بس حبيت انام هين

رجع دحگ عليه و گال

- الصالة بارده..شغلت الصوبة

هزيت رأسي بـ اي و هو طلع
و أني رجعت ادحگ للسگف..شگد حنين و يتخبل لو يصير بينا شي
بس ما يبين هالشي..شگد يحچي علينا و يعصب و اربعة و عشرين ساعة يتعارك ويانا
بس بحنيتو و حبو النا ما شفت

الصبح گعدت و تحظرت تا اروح للمدرسة..
ما تريگت و طلعت و أني اسمع عماد يحچي بالتلفون بالطرمة

طلعت و من وصلت لبيت اهل سلطان دگيت الباب و فتحتلي ام سلطان
ابتسملتها و گلت

- خاله روان وين

- فوتي فوتي گاعد تتريگ

بداخلي گلت سم يسمها..شگد فاهيه
يوميه لازم تاخرنا

فتت و ظليت واگفة بالحوش..ما نسيت طردة البارحه ف ما فتت
طلعتلي روان و هي شايلة گلاص الچاي و بيدها لفة و تگول

- بس اخلص هالگلاص و اجي

- استغفر الله.. يعني شلون وياچ
يلاا كملي راح نتأخر

هزت راسها بـ اي و فاتت و أني ظليت بمكاني
دحگت لأم سلطان و هي تشر بالهدوم على الحبل
ما ادري شوكت تگعد حتى بهالسرعة مكملة الهدوم و نص البيت راح تخلص شغلو..

انداريت للباب المطبخ من طلع سلطان و هو يگول يمه تحتاجين شي
دحگت عليه لابس بنطرون و قميص اسود و جاكيت
و شايل بيدو سويج السيارة و ملازم بيدو الثانيه..هو معيد بالجامعة
و يا نيال الطالبات عليه

ظليت ادحگلو و هو انتبهلي بس ما دار بال
توي تا يصعد بسيارتو و هو يصيح لـ روان تا تفتح الباب

صارت عيطه برا..
وگع گلبي من عرفت هذا صوت عماد

بدون ما افكر مرتين ذبيت الجنطه الشايلتها بيدي على الگاع و فتحت الباب و أني اسمع ام سلطان تگول يا ساتر شكوو
و سلطان يگول ارجعي

فتحت الباب و طلعت و لگيت خالي بنص الشارع و فوگاه يمكن اربع زلم..عبالك ثيران من كبرهم و نازلين بخالي دگ و كتل..

الناس تريد تفاكك بس هذوله ما ينطون مجال و يدفعون بالي يحاول يدخل..اني ما تحملت

دحگت هيچ و هيچ و لکيت حجارة
شلتها و ركضت تا اضرب واحد بيهم..و گبل لا اضرب واحد حسيت بيد واحد تكمشني و تذب الحجره من عندي.

خزرت سلطان الي سحب الحجر من ايدي و هو يحچي و يصيح فوتي جوه
ما درتلو بال و أني ادفعو
و اهجم على الزلمه الي صاير ظهرو عليه و أصيح

- من اشتعلوا اهلك وخرر

مع ما ضربتو على چتفو اندار عليه
بلعت ريگي من شفتو يخزر بيه .. حاجبو مطبور و يم شفتو جرح مخيط

رجعت خطوة ليورا و طخيت بسلطان
الي كمش ايدي و هو يگول بصوت ناصي و معصب

- لين فوتي جوه

.

السلام عليكم 🌚

شلونـكم عيوني 🙃⁦❤️⁩

أن شاء الله الكل بخير 💚

طبعاً شفت تفاعلكم و تشوقكم للقصة 🌚
فـ قررت انشر هالبرتوت 🌚😂

فـ شنو رايكم و توقعاتكم ؟
و شنو نظرتكم عن شخصيات القصة 🙄

من هسا النشر راح يكون بين يوم و يوم ⁦❤️⁩
و ان شاء الله ما أطول 🌚

و ها لا تقصرون بالتصويت ترا والله ما ينتل 😂💔
يعني اذا عجبتكم 🌚

و بس والله ⁦❤️⁩😂

نلتقي على خير احبتي 🧡
و لهذاك الوقت استودعكم الله الذي لا تضيع وداعه ⁦♥️⁩🥺