ابي والغزلان

البارت الاخير

ابي والغزلان الجزء الثاني
للكاتبة Reem
البارت الاخير القسم الاول
(بسبب طول البارت صار قسمين القسم الثاني بعد ربع ساعه يتم نشره )

اضحك بالوجوه بغير راحة بال
واصبر لو ليالي العسر ضكني
واكابر على الشدايد حد مصب العين
واسكت لو دثو من الناس لاسني

ريم : كاام من مكانه وكال صدك لو تتشاقين ويايه
ريم : ليش اشاقه حااسه حامل
حسين : وشنو هذا البرود
ريم : شسوي يعني اركص
حسين : هسه نروح نحلل
ريم : بعد وكت معزلين دنيا ظهر
حسين : امشي يمعوده ابتسمت وهو يروح ويجي منا ميعرف شيسوي على كيفك
حسين : تكلي على كيفك امشي بدلي ولتضلين واكفه
تالي بدلت وطلعنا ولكينا مختبر مفتح وحللنا وطلعت حاامل فرحت حسين مو طبيعيه احسه يريد يبجي من الفرح لازم ايدي ويسووق
ريم : لهاي الدرجه فرحان

حسين : شلون ماافرح وراح يصير عندي طفل منج ولك تيم راح يجيك اخ
تيم : يلعب ويايه
حسين : اي يلعب وياك واني العب ويه امك
ريم : ضحكت على سوالفه كتله مشتهيه موطا من الفقمه فدوة
حسين : جنج على موطا اخذنا لزيونه وكف السياره على الشاره ونزل
راح اشتره كل واحد وحده اني اخذت مشكل بلقوقعه وكاعد اكل وهو ضحك
شبيك
حسين : تتذكرين من بكتي شحاطة بيبي الجديده وانطيتيها لابو الموطا
ريم : هههه اي اتذكر بس انت خبيث اله اخذت وحده
حسين : اخذت الحمره يمكن
ريم : اي واني الصفره ولزمتنا سليل وانت بسرعه جر بوشك ردت تحجي

حسين : جان سليل تجر من الاذن لو من الشعر وتشيغ روحي واني هم مااعرف اكذب
ريم : جنا صغار بس هسه ماكو واحد ميعرف يكذب
حسين : اني مااكذب
ريم : لا بالله ياعيني راح ابجي من الصدق
حسين : اليوم مااجاوب مدلله
ريم : اني دومي مدلله
حسين : بهاي غلبتيني
ريم : دووم اغلبك مو جديده
حسين : غير انتي ريم هو منو اليكدر على لسانج
ريم : يمه فديت لساني خمسه بعيون الحساد
حسين :ههههه اكلي وخلي نرجع للبيت

رجعنا فرحانين اتصلت بخواتي فرحن حيل جنت متردده اكول لغزوله بس بعدين كلت خاف مااكول وتفهمني غلط اتصلت بيها وحسيت بفرحتها رغم أذيتها لان ماعدها طفل تمنيت الله يرزقها حتى اقلها ترتاح من مراجعه الاطباء وهاي المنشطات الي تضربهن حيل نخاف عليها لان كلهن بيهن اثار جانبيه وهي مستمره شهر وره شهر مبطلت مراجعات

جان وحامي قوي ومزعج وحسين متحملني وشايل مسؤوليه تيم زينه اخت سامر من عرفت زعلت وكطعت علاقتها بيه ومن تتصل بتيم تسلم وتروح مو مثل قبل تسولف ويايه عذرتها مهما كان كنت زوجة اخوها وتزوجت

رشا : شعلان من يوم الاتصال مااعرف شئ عنه ولا يهمني التهي ويه فروحه حتى على بته مسأل عفته وركزت بعالمي الي صنعته اليه افصل بيه من كلشي بلساعات اكعد اگلب بلقصص واقرا واندمج واعيش وياهم نزلت برنامج الواتباد ومن قصه لقصه مرات ابجي ومرات اضحك ومرات اسكت واكعد افكر شراح يصير باجر لحد مصرت مدمنه قصص واكثر الكاتبات قاريه الهم وبيوم كاعده اقرا تعليقات ومخبوصه الدنيا عن قصه اسمها سجينه الروح باديه من زمان گلت خلي اكعد اقراها وبديت اقرا اقرا فقدت وفصلت عن كلشي مره اصير يمامه بطله القصه ومره الحجيه جميله وصل بيه الحال اصير حاامد حيل حبيتها للقصه واندمجت بيها واصفن على حب حامد معقوله اكو هيج حب لو هذا تسفيط بلقصص شو اني مشفت هيج حب وارجع اكول لا شفت حسين وريم وسجاد وسليل اكثر ناس تأذو من الحب والحمدلله الله جمعهم

خابرت ريم لكيتها تعيط
رشا : شبيج بس تعيطين
ريم : يمعوده بس يوصخون
رشا : منو
ريم : تيم وحسين
رشا : حسين شجاه
ريم : وربج يوصخ اكثر من تيم اني عندي اثنين جهال مو واحد والثالث بلطريق
رشا : والله فقير حسوني وشايلج بلصلوات هو تنظيف اني اجي انطفلج ولدردمين
ريم : شكوو ماكو
رشا : اكلج ريمو
ريم : ياستار
رشا : هااي شبيج بس اسمعي
ريم : يمعوده فضيني عندي كومه شغل
رشا : شنو رأيج نكتب قصتنا
ريم : شلون نكتبها
رشا : نطيها لكاتبه وتنزلها النا
ريم : اروح اكمل شغلي مبين انتي شاربه شى واني مالي خلكج
رشا : اسمعيني ولج اوو روحي الجمعه مو تجين نسولف
ريم : نصيحه روحي سبحي حتى تصحين لو تمسحين هذا البرنامج المصخم الي خبلج كاعده كل الوكت عيونج راحن لو ماخذه الماجستير والدكتوراه هواي احسلج
رشا : خليتهن الج ولي روحي

بقت تاكل الفكره بالي ذني شلون اقنعهن
اول شى سويته خليتهن يحملن واتباد ويقرن القصه ويتعلقن بيها وسويت كروب على الواتساب نتناقش بيه بعد القصه لحد ماتعلقو بلقصص اله ريم يوم تقرا ويوم لا

كاعدات يوم جمعه هستونا كملنا الغدا وحطينا الجاي على الصوبه جان شهر الثاني عطلة نص السنه والتمينا
سليل :عيني شفتي حميد يماااي يلعب بلگلب من يتغزل بطيرته
ريم : خلي يسمعج عمو سجاد اله يهلس ريشج ياام الطيور ويعلكج بلسطح مثل الفختيه
سليل : الله اكبر حسره احجي حرام وسجاد ماكو احجي براحتي
غزل : اني يعجبني مازن بس لو تقبل ودق بيه والله يحبها
ريم : هااا يمه انتي هم انعديتي ذني ملكوفات انتي شبيج
غزل : ريمو والله القصه كلها حب بس لو تقريها
ريم : رجلي وموجود احب بيه ولو هليام من وره الوحام شالعه گلبه بس المسكين راضي وساكت

نهر : خير شبيجن
ريم : تعالي على بناتج عقل ماضل بيهن الله وكيلج حايرات بلقصص والابطال وعايفات بيوتهن
رشا : عمه بشرفج شلونه حميد
نهر : حميد اوف منه جعلته اخويه غير يخبل من يشاقي يمامه ويتغزل بيه هيج يلعب بلگلب ومنو يكول الها احبنج وحك علي اني من يمي سنوني تطلع
جان تغم ريم كصتها ولكم انتم مرض معدي حتى عمه فسدتوها
نهر : ليش شمسويه وكت فراغي اقرا واغير جو وين نولي الجو بارد ويه القصص يطلع يخبل

ريم : لا مو صاحين انتم عمه اذكري الله ذني تمشين وراهن ترجعين تراهقين
نهر : هسه هو حميد قابل حبيته جعلته اخويه
ريم : ولجن ياظالمات النفس حتى الحجيه ماخلصت من سوالفجن
رشا : ماطول مجتمعين شنو رإيكم اندز للكاتبه حتى تكتب قصتنا
نهر : لا بنتي لهنا وتوكفين ياقصه تكتبها
ريم : الْحٍمَدٍ للـّہ عمه بعدها منعدت حيل
سليل : والله قصتنا تخبل واشكال بلاوي بيها وراح يحبوها الجمهور

ريم : قصدج راح يخلصوها بواجي ونوح ولجن الي مثل قصتنا تفيد لواحد يريد ينتحر ومتردد يقراها وبنفس اللحظه يشمر روحه تفيد لواحد نص ونص مخبل بس مو حيل يقراها ويتخبل رسمي هاي القصه تفيد للي يريد ينهي حياته وماكو طريق يدلي يقراها ويسلمها على الترابي

غزل : ليش والله حلوة ومشوقه والحمدلله هاي السنه وضعنا شويه تحسن
ريم : هااا عمه صفنتي
نهر : لا يمه هيج
ريم : وانتي ام سجاد مو اذا سمع مو يذبحج لا يعلكج من اصبعج الصغير مال رجلج ويشويج مثل الدجاجه
سليل : والله ياريمو فكرة حلووه عجبتني ونتفق ويه الكاتبه متذكر اسمائنا الحقيقيه اني سمعت بث الها تغير اسماء ومواقع وتخفي شغلات واني شفت سجينه الروح شلون مبدعة بيها
ريم : لا انتم شخطتو رسمي بابا من كل عقلجن هذا اسمه انتحار لو يعرف واحد من الولد شيسوي بينا

رشا : ومنين يعرفون شو رجولتج لا يقرون قصص ولا يمهم واكثر وكتهم ببجي لو كوفي لو يوتيوب وحتى الفيسات مالتهم عادي للاصدقاء لمواقع السيارات يعني لا كروبات نسائيه ولا واتباد
غزل : واذا عرل احد من كرايبنا
رشا : ننكر اكو شغلات هوايه صارت بينا كرايبنا ميدرون بيها وحتى اذا شكوو خلي يجيبون دليل هاي قصتها ولجن والله انطك للستار
ريم : انتي دكج ومدكوكج حتى المتابعات يسبن مشعول
رشا : اااخ الله كون ينبشنه نبش كون الادعيه ترخ هيج ترخ عليه بحيث راسه من رجله ميندلها

غزل : واذا عرفت جنات
رشا : طز متهمني وقابل بس جنات سوت هاي السوايه تره اكو نذلات مثلها هوايه
نهر : يمه اكعدن واسكتن لتسون مشاكل لو متعرفن تعيشن بله مشاكل
ريم : اي الف رحمه على ابوج جلدهن يحكهن يموتن على المشاكل
رشا : راح اراسل الكاتبه وانطيها قصتي والي متريد بكيفها
سليل : اني وياج
ريم : هاي عود الجبانه يابه طلاكج من وره هاي القصه
سليل : ميعرف والله شبيج حتى القصه مااقراها كدامه وكلها كم شهر وتنزل قصه جديده وتنسي قصتنا وتروح منو يقرا منو يكتب مو نقرا شكد قصص نحبها ونبجي ونلطم وتنزل غيرها ننسى الي قبلها وهكذا
غزل : اني وياكم بلكت يدعنلي بلطفل واحبل

ريم : اني لا اعرفكم ولا اعرف هاي العائله المخرفه حشى ابويه وانتي عمه
نهر : لا يمه مراضيه بس هنه بكيفهن بعد
ريم : حجايتج رچيچه حجيه
رشا : هههه هاي الحجايه من القصه موو
ريم : يابه دطيرن وطلعني من السالفه كلها
رشا :اي منريدج جبانه
ريم : تعرفين بيه مو جبانه بس هم حقي اخاف ليعرف واحد وتصير كارثه
رشا : ميعرفون بس صيري سباعيه
ريم : مالكم دخل بيه وحيرن بنفسجن
ولك تيم لتكمز لتوكع اشتعلت نوريه
سليل : ليسمع رجلج
ريم : كل ماهو ماكو اسب امه واخته وابوه ياهو اليجي بلساني بس من هو موجود وداعتج انعم من ريش النعام

نهر : لتشيلين ذنبهم
ريم : لاذنب على فاسق عمه وذوله همه اصلاً الي اخترعو الفسوق وحطوه الاساس مالته اشتغلو ويه ابو لهب وفرعون
غزل :اهم شى ابتعدي عنهم مالج دخل بيهم
ريم : وداعتج من يوم زواجنا ذاك يوم وهذا يوم ولا ادري اي شى عنهم الله يجفيني شرهم تصوري حتى من يطب حسين ولا اسأله شلونهم اهلك شصاير مصاير وهو هم ميحجي مطنشه ومشتريه راحة بالي
نهر : الله يكملج بعقلج يمه ويبعد عنج سمهن
ريم : امين صبن جاي تره صار تيزاب يفور ويرجع ليوره وانتي الصافنه تخططين شلون تهجمين بيوتنا شيلي الفكرة من بالج ليشيلها بابا بلقوه
رشا : اله اراسلها
سليل : متجاوب
رشا : عادي يجي يوم وتجاوب

ريم : كومني مابيه رجلي نملت
رشا : وين رايحه
ريم : اريد اكفشج حتى تبطلين هاي السوالف
رشا : دطيري شكد جبانه
ريم : عمه عقلي بت اخوج تره مناقصنا مصايب
غزل : والله تصير قصه بشده
ريم : واحنا هم نتعلك بنفس الشده من الله يشيل القصص منين طلعت النا وخلتجن بليه عقل لا جبيره ولا الصغيره حكمتك ربي

سليل : لو تعرفن بمنو حلمت
ريم : بيه اكيد
سليل : بإمجن وحسام
رشا : ستوب اضربي بربك اني ماعندي ام ولا اخ
ريم : اجت من زرف الحايط
سليل : بله شقه والله حلمت بيهن
غزل : راح اكول شى بس مو تعيطن عليه
ريم : شمسويه مكسوره
غزل : ممسويه والله بس بابا كل كم شهر يخليني اخابر نوران واجمع اخبار عن حسام وعن جهاله ومره دزت صورته هو وجهاله بلسوبر ماركت
نهر : اي شفتها
رشا : خوش والله واحنا مندري رجلنا بلشمس
نهر : اعذرن ابوجن تعرفن بيه گلبه طيب وحنين ويبقى ابنه
ريم : حسام جاحد وحقير ومتإكده الله بيوم يعيشه نفس شعور بابا وسبحان الله رب العالمين رزقه اثنين ولد حتى يشوفه شكد راح يتعب وتالي يديرون وجهم ويرحون عنه
الدنيا دواره وخاصه عقوق الوالدين تندار على الواحد لو شميسوي

شبيجن صفنتن
رشا : صفكولها
ريم : ياربي القصص خبلت اختي
رشا : مداعرفج شنو هذا الهدوء والكلام الرزن
ريم : شعبالج اعجبج من اتفستق
وسليل من تنامين بعد اتغطي زين مكشفه وحلمتي بيهم
نهر : يعين گلبك ياخويه متعرف شى عن ابنك الوحيد وادز الغرب يسألوله
سليل : مو بيده گلبه طيب
رشا : زين همه شلونهم فضول تره
غزل : حسب كلام نوران وضعهم زين وحسام يشتغل شغلتين وسياره وشقه عنده وجهاله بلمدارس بس ام حسام انتقلت على غير ولايه وسيارتها جواها وحالها زين يعني عايشة وناسيتنا خصم الحجي
سليل : صايره تسميها ام حسام
غزل : شسوي متطلع من لساني ماما استحيف اكولها بس الج ولماما نهر

ريم : سلول
سليل : هااا
ريم : اذا نشرتي قصتج تذكرين سالفه سلام
سليل : ياسالفه
ريم : القديمه
سليل : كمت ابلعم وارتبكت
غزل : ياسالفه اريد اعرف
سليل : بدت ريم تحجي بس مقتطفات ورجع شريط ذكرياتي واني طفله واتختل من عمي واتذكر شلون يلمسني بقذاره ومن كتله بابا متحملت وركضت للحمام تقيأت
رشا : كاافي ولج شذكرتيها
غزل : كل هذا صاير بماما بقيت صافنه عليها ونزلت دمعتي شلون تحملت كل هذا
وعمو يدري
ريم : اي يدري

نهر : كاافي يمعودات وكتها هسه تعالي وينج هستوها اكلت سوده عليه
سليل : دخلت ماما عليه وتفرك بظهري
نهر : على كيفج يوم
سليل : مجرد مايجي طاريه وينذكر معدتي تگلب
نهر : كله من وره هاي الملكوفه ريم يوميه طالعتنا بسالفه شكل غسلي وجهج وتعالي اسويلج نومي بصره يلزم معدتج
رجعت كعدت وراسي يريد يطك
ريم : والله مو قصدي بس سألت لعد شلون اذا انشرت وقريتي
رشا : ضلي نگي لحد ما ريام ترفض كتابة القصه
ريم : يوم عيد وترفضها ولتخافين مترفض ماطول قصه كلها لطم تاخذها من يوميه مخابرتني وتبجين وخشمج يخر من وره قصتها وهذا مات وذاك انفقد هاي قصه تازه مشكل يالوز بيها اغتصاب وقتل وسجن وحرك وموت وطلاك وخيانه كرزات مو مثلها

رشا : اطلعي منها وهي تصير
ريم : اكيد اطلع ماادخل لو تموتون
سليل : اباوع على حياتنا المشت وشلون كاعدات كلنا تزوجنا عدا رشا بس عدها فرح ماليه حياتها لمتنا كل فتره بيت اهلي مابطلناها واذا نتأخر ماما تخابرنا
ريم : تدرون مال شنو هسه
رشا : راشي ودبس وخبز على الصوبه

ريم : ولج لا مال حمص بطحينه وبنصها زيتونه وهاي الزيتونه الي الي تمد ايدها اكسرها وتبوله حامضه
نهر : وحامج بهذا الجاهل مو مثل تيم
ريم : اي والله عمه اجه تيم يركض ماما خابري بابا اريد جبس ليز اكلت الجبس مالتي فرح
ريم : اكتلها يمه لتخليها تاكل
رشا : ليش ولج نمونه
ريم : اسمعي وغمزت الها
تيم : لا ماما خطيه تحبه
رشا : يمه اروح فدوة لطوله للحنين
ريم : هذا هو ثبت عيد بتج لابني روح ماما العب هسه اخابرلك
رشا : غير اكبر منه
ريم : واذا اكبر ناخذها فصليه مثل القصص مالتج
رشا : هههه يمه وليش بله فصليه كاتله امج ابوج
ريم : ماخذه القمصله الجوزيه مالتي وهاي اطير بيها رگاب

سليل : وشعلان يكعد بلفصل
رشا : شذكرج بيه
سليل : على اساس انتي ناسيه
رشا : مو ناسية بس مدايره بال
نهر : ماخابر موو
رشا : ولا سأل حتى على بته
ريم : يطبه طوب رايدته بشى
رشا : ولا اريده بس فرح تسأل عنه
ريم : كليلها مسافر قشمريها
رشا : هذا الجيل ميتقشمر شايفته شكد ذكي
سليل : اي والله ذاك اليوم انمسح برنامج عندي وهذا زين فعله ونزله وهو طوله شبر مو جهال كارثه

رشا : فرح هم هيج وحتى تيم شفتي لساناته شطولها والموبايل يفلسوه تفلس
نهر : امهات تالي وكت حاطات الموبايلات بيد الجهال وعيونهم
رشا : يمعوده نخلص من الدوخه شايفه اذا ميلزموه شويه الخباثه والعركات تشتغل
ريم : اخابر على حسين يجيبلي مقبلات وليز تردن شى
غزل : يعينه الله عليج
ريم : شمسويتله ولج بس من اضوج اعضه لو اختل واخلي يدور عليه وافززه
سليل : هههه فديوم فزه ويشكل السكر يرعنه اكبري شويه
ريم : ضايجين وين نروح ومرات العب دومنه واسحله ومن يخسر اخسره اكل من بره مااطبخ
نهر : يمه ياحسوني يامظلوم
ريم : والله محد راح يخبله عليه غيرج عمه
نهر : غير ابني واخاف عليه
ريم : مابيه شى يخبل ابنج فدوة لجلاويه

سليل : بقينا لليل عشا وسوالف وضحك ويلعبون دومنه بابا وسجاد ضد عمار وحسين وكل وحده بينا تشجع رجلها ورشا تشجع بابا وكل شويه كابه العيطه ونضحك تالي بابا وسجاد فازو والعشا وكع براس حسين وعمار مقبلت ماما دومها مدبره بين مجنا نلعب لكيناها مكمله العشا باقي بس الصمون دومها معدله ومرتبه وتحسب حساب لكلشي
خلصت سهرتنا وكل وحده راحت لبيتها

بدا الشتا يروح ويجي مكانه الحر هل علينا الشهر الرابع واشيل بلملابس الشتائيه مال الجهال وملابس سجاد والزوالي مگلوب البيت واصعد وانزل بلبيتونه وعندي جنطه ام السحاب قماش جبيره شكوو ملابس قديمه احطها بيها جان اصلاً بيها ملابس سجاد مره شمرهن كلت اكمل الملابس الباقيه وانطيهم لناس محتاجه واني اگلب بيهن واحط فوكاهن لمحت خاولي شايفته جريته بين الملابس اكلب بيه هذا الخاولي مالتي اي والله مالتي اخذته ونزلت ليجوه لكيت سجاد يصلي كمل صلاه وباوع عليه شبيج صافنه عليه
سليل : رفعت حاجبي وكتله هذا شجان يسوي عندك
سجاد : شنو هذا
سليل : لتسوي نفسك متعرفه هذا الخاولي مالتي
سجاد : حييل وين لكيتي
سليل : شجان يسوي يمك من الاساس
سجاد : جنت احب وحده ودكت الناقصه بيه واني گلبي رهيف اخذته اشم ريحتها بيه
كاام وشال السجاده والتربه وحطهم على صفحه وسحبني من ايدي وكعدني بحضنه
ليش تتحارشين

سليل : والله ممتحارشه بس لكيته استغربت حتى صاير اسود
سجاد : من كثر مجنت اشمه تالي ريحتج اختفت منه ضميته
سليل : لهاي الدرجه جنت تحبني
سجاد : ياظالمه النفس جنت احبج وهسه شنو مااحبج
سليل : يعني مو مثل قبل
جان يكرصني حيل من زندي اااخ أذيتني
سجاد : لو مو مثل قبل مجان لهسه ماابات بره بدونج ولا اكل بلياج وحتى من اروح محافظات علمود الشغل اضل الليل اسولف وياج واله اشوفج يله انام انتي متعرفين قيمتج عندي سليل انتي معجنونه بيه عجن تمشين بدمي ويه كل نفس يصعد وينزل ويايه
سليل : ليش لعد متكول هذا الحجي الحلوو اليه
سجاد : المفروض تعرفي كل شويه لازم اكوله
سليل : اي كل شويه وكل ساعه
سجاد : راح تملين والحجي ماكو اسهل منه بس الفعل هو الصعب وكدامج اركض على العيشه يعني هم على كيفج ويايه مقصر بشى وياج

سليل : الشهاده لله لا الي يضوجني نادراً متكول كلام حلوو
سجاد : بس احبج وكلشي بيج اعشقه وحتى واذا محجيت لازم تعرفين هذا الشى لهفتي وحضني الج يدل شكد متعلق بيج
وغيرتي وعصبيتي اني اذا طلعت وياج ابقى متوتر اخاف اخد يباوعلج بنظره مااحبها واتعارك وياه
سليل : غير هاي سوالفك قابل متزوج انجلينا جولي لو حلووه حيل شسوي
سجاد : انتي عندي احلى النسوان كلها كلمن وذوقه ليش هسه اني مو احلى رجال عندج
سليل : اي والله اموت عليك واغار عليك من الهوا
سجاد : مو اكلج الشاذي بعين امه غزال
سليل : هسه منو الشاذي طلع
سجاد : انتي
سليل : دفعته وردت اكوم كاام يضحك بصوت عالي وجرني بحضنه ونومني على الجربايه وصار فوكي شكد احب اضوجج اكزكز عليج سمنانه صايره بطه تخبلين
سليل : مو شاذي
سجاد : اشاقه وياج بسرعه تزعل ام دميعه

سليل : هذا هو خلصها تقلد وام دميعه
سجاد : بمناسبه الخاولي ليش مدشني
سليل : شون يعني
سجاد : تعالي اعلمج
سليل : رغم كل السنين الفاتت بعدني من اكون بحضنه انسى نفسي سجاد حب العمر الي فتحت عيني واني احبه مرات يكون هادئ بارد بس اي حركة مني ينگلب شعلت نار عنده تصرفات مزعجه حاله حال اي رجال بس طيبته وحبه اليه دوم تخليني اتغاضه عن الشغلات الي تضوجني
كل الفات والصار بيه علمني مااتنازل عن ملكي وسجاد ملكي تعلمت اصبر لو شكد ما اتأذه بعدني ابجي من اقل تصرف منه من اغار من يعيط بيه ولهذا اليوم من يشوف دمعتي يضوج ويسكت حتى لو نتعارك
جهالي قطعه من روحي اي قطعه لان سجاد هو الروح ولهذا اليوم اغار حيل عليه صرت احاسب وانتبهه على حركة منه رغم اعرف ماعنده شى بس شسوي غيرتي قويه عليه يمكن انعديت منه

رشا : راسلت الكاتبه وقنعتها بقصتنا وحبتها حيل بس بقت قصه ريم وحيل جذبتها وطلبت تحجي ويه عمتي ولان عمه تحبها وافقت ومدري شلون قنعت عمه تنطيها قصة بابا وقصتها توقعت بس قصتي تنزل تالي اخذت العائله مقاوله
مرات اتردد واخاف واكول شسويتي بروحج يرشا ومرات اكول شكوو بيها خلي الناس تشوف الظلم الي وكع علينا

ريم : حسوني
حسين : هااا حبيبي بيج شى
ريم : فدوة وديني لاهلي
حسين : مو قبل كم يوم يمهم
ريم : ما اتأخر والله لان غزل هناك على الواهس
حسين : بالاول اريد بوسه
ريم : تقربت وبسته
حسين : كم مره كتلج اني مو تيم وتبوسيني هيج
ريم : لعد شلون ابوسك
حسين : هيج
وسحب راسي وباسني بهدووء ويتفنن بشفايفي لحد مذبت بيده وكتله ااخ بطني
حسين : هاي كلاواتج بطليها اعرف لان عندج طلعه متخليني اتقرب منج
بسته بقوه من خده وكتله يله حباب حتى لنتأخر ومن نرجع اعوضك للصبح
حسين : ميحتاج تعوضيني اني اخذ حقي كامل منج
ريم : گلي الك بس يله
مااشي بدلي وامشي نروح
ريم : يمه فديته للحنين بسته من شفايفه قووي وهو يضحك ويهز بيده بدلت وبدلت لتيم وطلعنا بلطريق جان يدك الموبايل جاوب عرفت نوريه

حسين : وهسه شلونه مااشي جاي بلطريق
ريم : خير
حسين : ابويه متخربط ميعرفون شبيه.
ريم : توصلني لبيت اهلي لو ترجعني
حسين : حبيبي بس خلي افهم شبيه ابويه ماطول قريب على بيتهم شيرجعني للبيت سيطره وفره دقايق ابقي بلسياره بس اشوف شبي واجي
ريم :لتتأخر

وكف السياره باب بيتهم اباوع البيت شكد كأيب صاير ركزت عيوني على المشتمل الي بصفه جان مشتمل جديد حلوو رجعت ذاكرتي لنفس المكان جان بيه بيتنا الي انولدنا بيه صفنت عليه الهيكل حلوو وراقي وحديث بس الكاع هاي شافت اشكال من الضيم والقهر نفس الكاع جان على ظهرها بيت هيكله شايل نفسه بيه بنيه شابه تزوجت ابن عمها وكل ذنبها حبته من كل گلبها تالي ظلمها وموتها بحسرتها واخذ ابنها الي ورث قله الحظ منها وكبر الولد وكعد بنفس البيت وتزوج بيه واستقر هو وزوجته واربع بنات ولد عشنا الجوع والالم والمشاكل متنغصين حتى على لكمتنا اذا يوم راحه عشر ايام مشاكل وطلايب نفس البيت انتهت قصته يوم محترك وترك اثر بكل وحده بينه لنهايه عمرنا مننسى حالنا واحنا محصورات بلسطح ونخاف النار تاكلنا
البيت احترك وصار كوم فحم وانكرب وانبنا بمكانه بيت بس تبقى هاي الكاع شالت البيت القديم ولو عدها لسان كان نطقت وكالت شكد شفتو ظلم انتم وابوكم وبيبيتكم رازقيه
فزيت من صفنتي على صوت حسين
هاا حبيبي

حسين : انزلي
ريم : نزلت الجامه خير ليش انزل
حسين : حبيبي بس اودي ابويه حاله حيل تعبان ومتخربط انزلي ١٠ دقايق ويجي ياخذج سجاد هسه اخابره
ريم : منو هنا بلبيت
حسين : ماكو احد امي وابويه راح اخذهم ويايه وتبقى بس بيبيتي انعام
ريم : تعوفوها وحدها
حسين : شنسوي لعد منتأخر بس اشوف وضعه ساعه وراجعين
ريم : عوفني يمها
حسين : لا
ريم : لتخاف مااكلها ترجع تلكه اعضائها كامله
حسين : بدون مشاكل حبيبي هسه يجي سجاد ياخذج لبيت اهلج ومن اكمل اجيج
ريم : والله مااسويلها شى وانتظرك هنا مو تكول متتأخر
حسين : واذا صار شى
ريم : كتلك وعيونك مااسوي شى الها شايفني قاتله مجرمه تره والله حجيك ماصخ
حسين : يله انزلي وما نتأخر ديري بالج على نفسج وتلفونج بيدج لتذبي
ريم : اوك ونزلت وبيدي تيم صرت وجهه بوجهه ويه نوريه وعلي وجان علي تعبان وكوه يمشي كلت السلام عليكم مجاوبوني اثنينهم ابتسمت بوجهه حسين وكلت حبيبي دير بالك على نفسك وانتظرك ودخلت وسديت الباب اعرف راح تتخبل نوريه لان دخلت للبيت وعافتني وحدي بيه

باوعت على تيم تروح تلعب بلحديقه اكو طوبه متروح منا ومنا اطيح حظك
اي ماما
راح يلعب واني دخلت اباوع البيت هادئ بقيت افتر بيه تالي فتحت بابها لكيتها تباوع وساكته
تقربت منها وكعدت يم راسها كبرانه حييل ومنتهيه صفنت عليها وعلى وضعها ساعات اكول ليش لهسه عايشة وساعات اكول يجوز عذاب من الله لان حالتها كلش صعبه الحاجتين جواها وبيها زهايمر ومريضة كل وكت جريت نفس بهدوء وباوعت بوجهه تدرين جانت اقصى امنياتي واني صغيره اشتري سياره وادعمج بيها الجهال كلها معروفه يكرهون من يأذيهم بس اني مجنت اكرهج كلمة الكرهه قليله عليج جنت اريد اشرب من دمج الكاج محروكه مكطعه مذبوحه معلكه بلشجره تصوري طفله وتفكر بيج بهاي الطريقه لعد شكد تكرهج

بس سؤال نعوم تعرفيني بقت صافنه بوجهي ومبين معرفتني
الظاهر القرص مالتج مفرمت وناسيه كلشي سؤالين ياكلن ويشربن ويايه ومالكيت اجابه الهن لهذا اليوم اول سؤال انتي الحركتينا عيونها تباوع يمنه ويسره وعليه

حتى لو انتي هم اكيد متتذكرين اذا كم مره اسألج ومتجاوبين مو عاد هسه زين السؤال الثاني اني صرت هسه ام واعرف بالامومه عوفج من ابني لان طالع من روحي اكيد غير شى مثلاً بت رشا او جهال سليل اذا واحد وكع منهم اتخبل اذا انجرحو گلبي يأذيني انتي شلون من گلب عندج تاخذين طفل عمره ساعه وتربي وتهتمين بيه وتغسلين اله وتبدلين حفاظته لا تذكرت قبل ماكو حفاظات وصل وتغسليهم وتسهرين وتسبحين وتوكلين وتكبرين وتالي تكرهي ومطيقين شگله شلون تكدرين القابليه الشايلتها مشايلها بشر عادي ولا يوم حبيتي ولا عطفتي عليه رغم هو يحبج خلص عمره يتمنى يحس بأمومتج طه جان يعتبرج امه

جان تنطق بصوت ناصي وكلام مكسر طه الگلب
ريم : يعني نسيتي گلشي ومانسيتي ابويه والله يابابا حظك برتقالي ويه نعوم نست الكل ومنستك خلي اذكرج اني ريم بت طه حبيبج الي جنتي تمشين وتعيري بينا بنات طه أذيتيهن ومتأكده انتي الحركتيهن وخليتي حياتهن جحيم ومكفاج كسرتي فرحتي الاولى بحسين وحرتي شسويتي بعد هذا الوكت كله والسنين الراحت بنات طه اخذن منج اكثر ناس تحبيهم

سليل اخذت ابن اخوج جنتي روحج بيه وتزوجته وهسه الْحٍمَدٍ للـّہ بيت وحدها وجهالها اثنين ويموت عليها سجاد وراها تعلقتي بحسين وصار اعز حتى من ولدج وشكد حاربتي حتى مياخذني حتى انجلطتي وتاليها هسه اني مرته وهذا الي بطني بحركه خفيفه مشيت ايدي على بطني ابنه واني هسه چنت هذا البيت شفتي بنات طه شلونهن ذني العيرتي بينا وبت ابنج الي ربيتيها وجنتي تضربيني اذا تقربت منها اخذت انكس رجال فضاله رشا هم بت طه اذا ناسيتها

يعني بعد التعب والمشاكل والخطط والحرك وكطع الارزاق والسحوره صفت النه كلشي تحبي وانتي باقيه بهاي الغرفه وحدج محد بحالج لا ابن يسأل عليج ولا حفيد او حفيده لو جنتي زينه وحقانيه وطيبه ويه بابا جان هسه لكيتي كاعد يم رجلج يداريج انتي الخسرتي ابن جان صار عكازتج بهيج اوقات صعبه والي زرعتي كعد تحصدي هسه وبهذا وضعج الكسيف ربج عادل عظيم ومايقبل بلظلم وانتي ظلمتينا من اول يوم انولد بابا وسجلتي بأسمج

يجوز بعد مااشوفج ولا تصيرلي هيج فرصه احجي بيها وياج بس اكول مامبريه الذمه على كلشي سويتي وان شاء الله نتلاكه يوم القيامه وناخذ حقنا من عيونج
حسبي الله ونعم الوكيل كمت من يمها ورحت للمطبخ اشرب مي ودك تلفوني
رشا : وينج يمعوده تأخرتي
ريم : يم نعوم
رشا : يانعوم
ريم : كم نعوم عدنا بيبي نعال نسيتيها
رشا : شوداج يمصخمه
ريم : تعبان ابو حسين وداه للمستشفى شويه ويجي
رشا : ادزلج احد ياخذج
ريم : لت منتظره حسين
رشا : ديري بالج على نفسج
ريم :اختج بطله ضوجوني احرك البيت واطلع
رشا : ههههه كدها اعرفج
بقيت كاعده اتصفح بلفيس وصحت تيم كعدته يمي اخاف يلعب بشى ويتأذه وره ساعه سمعت صوت هورن وطبو كمت على حيلي طب علي لازمه حسين ودخله لغرفته جان تتقرب مني نوريه

نوريه : لا عبالج حبلتي راح تاخذي مني الصار لويت ايد اليه وغصب عني قبلت مااخليج تتهنين بيه يوم من عمري وازوجه تاج راسج وحده من مستواه مو مبكعه وارمله اخذله بنيه واكسر خشمج
ريم : ابتسمت بهدوء وتقربت منه وكتله شسوين سوي ايدج الج وذاك حسوني اذا كدرتي تزوجي زوجي براحتج
نوريه : هسه يمل منج هذا حب مراهقه قديم شى محصله وكتل نفسه وماطول حصلج راح يشمرج شمره الزبل

ريم : شبيج عمه متعصبه انتي مره مريضة ليصير بيج شى واذا على حسين يبقى ابنج ويروح ويجي عليج بس تالي الليل بحضني اني يكدر يعوفج بالايام والاسابيع ميجيج يكتفي بأتصال ويسده بس اني الليله الي ابات بعيد عنه يتصركع يجيني من الصبح ياخذني اني ريمته الي كسر كلامج وكلام ابوه وعائلته كلها واخذني لتعبين نفسج عمتي ابنج بإمانتي والبيه زود ياخذ حسين مني

جان يطلع حسين من غرفة ابوه ابتسمت بوجهه وكتله يله حبيبي تأخرنا
حسين : عينج عليه يوم واذا صار شى اتصلي
نوريه : ابقى بات هنا ابوك تعبان
حسين : تباتين حبيبي بيت اهلج
ريم :لا اصلاً رجعني للبيت تعبت وبطني توجعني حييل وسويت نفسي عندي الالام
حسين : يوم اوديها لريم للبيت واذا صار شى اتصلي دقايق اني يمج
ريم : طلعت وسحبت تيم ويايه واباوع نوريه شبت نار ابتسمت وطلعت ورجعت للبيت ودزيت خبر للبنات مااكدر اجي
وبيومها خليت حسين بحضني عبالك مثل الوحده تخاف ياخذوه منها وهو مكيف لان نايم بحضني ويشوفني يكوم ويكعد احضن وابوس بيه

تحسن علي هو نوبات سكر تجي ياكل حلويات ولا يهتم وحسين يروح ساعه ويرجع كل كم يوم
كاعده بلمطبخ اثرم زلاطه واباوع على بطني كبرت وصعد الطفل لگلبي سالفه البنات يكتبن القصه قالقتني وحجيت ويه الكاتبه ورفضت اكثر من شهر ونص يحاولون البنات يقنعوني واني قافله بس استفزتني وكالت مو مهم قصتج عاديه واني متحملت كتلها اكتبيها عادي وانطيت الموافقه لحد معرفت من رشا تقصدت تسوي هيج حتى اوافق

اهفي من الحر شهر السابع ٢٠١٩ والدنيا موت حر صار كم يوم وضع حسين معاجبني ذاك اليوم طلع بليل ورجع وجهه الصبح كال ابويه تخربط هواي صاير يروح لاهله والبارحه راح كال طالع لسجاد وخابرت سليل كالت سجاد نايم شصاير ومااعرف الفار گام يلعب بعبي واني اثرم كصيت اصبعي شاغت روحي كمت اغسلها جوه المي ودخل حسين وشافني هيج اجي يركض
حسين : شبيج حبيبي
ريم : وين جنت
حسين : اكلها شبيج وشنو هذا الجرح تكول وين جنت
ريم : وين جنت حسين وضعك هاي الفتره كلها معاجبتني تروح وتكول للمكان الفلاني وانت مرايح اله وتبقى من الصبح لليل بيت اهلك تره حيل اختنكت من هذا الوضع ومن اسألك تتهزم من الجواب
حسين : طريقة كلامج محابها

ريم : طلعت من المطبخ وكعدت بلهول وبطني توجعني ومختنكه خفت لا نوريه قنعته يخطب يتزوج دمعت عيني من مجرد فكرت بلموضوع
حسين : غير افهم شنو هاي الاعصاب والتوتر
ريم : عندك شى خطبتلك امك موو
حسين : ههههه وبقى يضحك ويضحك واني اشيط بلزايد
حسين :دومج ذكيه بس عندج هفوات مال وحده غبيه فول
ريم : تحجيلي لو اعيط اااخ بطني
حسيت بتقلصات خلتني اختنك واصفريت وهو حس عليه
حسين : يمعوده لتجيبين اسبيعي مثل اختج هسه احجيلج بالاول تحلفين متكولين لاحد وخصوصاً رشا

ريم : مااكول بس احجي
حسين : شعلان تزوج
ريم : لا بربك طفرت من مكاني
حسين : يمعوده بطنج
ريم : جرني وكعدني عوف بطني مابيها شى شمدريك انتي احجيلي كعدت بصفه لزك
حسين : اتزوج قبل شهرين وجابها ويه جنات بنفس البيت وعلكت عركات ومشاكل لدرجه جنات كاتله مرته الجديده وصايره من الروس بلشارع ولازمها شعلان مزوعها العافيه واجت من الكوت لبغداد هاجه بليله ظلمه وهو تخبل وحلف عليها يمين هي ترجع واله يطلكها
ريم : كللللللوووووووش
حسين : خبال شجاج
ريم : كمل الله عليك
حسين : حقي مااكول بس اعرف ماطول عقلج شطح بغير مكان راح تسوين مشاكل
ريم : مااسوي فدوة لوجهك الحلوو وسحبت وجهه وبسته كمل فدووة اروح لطولك الحلوو
حسين : باع اللواكه من عندج سالفه يمي
ريم : حبيبي اني ريمتك لا اتلوك ولا شى بس كمل مو راح اجيب والله من وراك

حسين : بس اثبتي والله مينلام سجاد يسميج زيبك
ريم : راح اشك هدومي من حرگان الاعصاب احجي دخيلك
حسين : ابنه تخربط ونقلناه للمستشفى ومن عرف اجه مثل المخبل وراد ياخذه وهي منطته ولمت المنطقه عليه بلعياط تالي كعدنا ويااه وفهمناه ميصير اثنينهن بنفس البيت كال لخاطر ابني راح افصل البيت كلمن الها نص بلبدايه مقبلت وكالت لو يطلكها لو يطلكني وجيب ودي صار شهرين تالي وافقت الخاتون من لحت عليها امي وابويه هم مقبل الها تطلك كال الها ما الفيج اذا اطلكتي اضطرت تقبل والبارحه اجه اخذها هي وجهالها صار شهر امي ادز عليه على شغلات تخصها لو ابنها تمرض لو كعده ويه شعلان علمود موضوعها واني مردت اكول الج اعرفج راح اطشيها

ريم : زين معرفت منين هاي الي اخذها
حسين : شمعرفني بس تكول جابها واجه وكال هاي مرتي وحالها من حالج وعلكت

ريم : طفرت ركض سحبت تلفوني ودك على رشا جان يجر التلفون مني
حسين : احنا شگلنا
ريم : بداعتي خلي ابلغها الله عليك
حسين : گلتي مااكول مااريد هوسه ريم صار شهرين ضام عليج من وره هاي السالفه وتالي هسه ركضتي على رشا
ريم : يله مااكول انطيني التلفون سحبته من ايده وركض واني وبطني ياساعه ادعبل وطبيت للحمام وقفلت الباب عليه
حسين : ريم افتحي الباب
ريم : ماااا
حسين : اذا اتزحلكتي وكعتي فوك وكعتج اضربج
ريم : لتخاف ماعليه شى
حسين : صوجي كتلج والله
ريم : اي عفيه جوصك
حسين : جوصك بعينج ولج افتحي الباب
ريم : احبك حسين هاي احلى بشرى انطيتها اليه
حسين : صوجي ااااخ شحجاني

اتصلت مره ثانيه جان تجاوب
ريم : زغرطي يانشراح الگاي احلى من الراح كلللوش
رشا : الحباله مبينه حيل مأثره سالمين شصار
ريم : شعلان تزوج
رشا :ناسيته ومااذكره عشت حياتي بدونه حسيت اخذت حقي منه راح ومكام يسأل حتى على بنته بس من كالت ريم هيج نغزني گلبي مو نغزت حب بس نغزت مفاجأه احتقار كراهيه اليوم تأكدت وبلدليل القاطع اني اختاريت انسان فاشل وعوينجي وابو نسوان واني مجرد مهره على كولته صعب ترويضها وروضها ومل منها وراح لغيرها سكتت التقط انفاسي الي تناثرت بلغرفه احاول اجمع كلمات تناسب الصدمه السمعتها

ريم : الوو وينج گلت راح تهوسين وتگلبين البيت بلعياط والهلاهل اني فلتت من حسين بلكوه حتى ابشرج وانتي تسكتين
رشا : بعدين نتخابر سديته حتى اجمع شتات نفسي ردت افهم وين عقلي جان من جنت مأمنه بيه واحبه ليش مكتشفت معدنه من وكت ليش صدكته حتى من رجع يتوسل
ونادم صدكته بس مقبلت ارجع اله تمددت على ظهري وجهي للسكف شهيق زفير وغمضت اريد اهدأ واجمع افكاري الغلط مني من الاول اني الي أمنت ومسألت ولا استفسرت يوم معرفت بيه مطلك تغاضيت عن هواي امور وعماني الحب وهاي نتيجتها
نبضات گلبي ادك بصدري وتتناغم ساعه تصعد وتعلن ثورانها وساعه تهدأ تعلن استسلامها گلبي مثل المحيط ثائر هادئ بنفس الوقت

جمعت نفسي ورجعت اتصلت بريم
ريم : مديت راسي بهدوء اباوع حسين ماكو طلعت جان يلزمني
حسين : هااا فختي اله كتيلها
ريم : اايييي مي بارد نزل على گلبي
حسين : وشستفاديتي هسه
ريم : ارتاحيت مو شرط استفاده
حسين : بعد ولا احجيلج شى
ريم : متكدر تضم بطرقي الخاصة اخذ الي اريده منك
حسين : وبعد لتكولين زوجتك مخبل اتزوج عليج غير تذبحيني واني نايم
ريم : زين تدري وتعال گلي يعني خوف مني متتزوج مو حب
حسين : من اكلج عندج هفوات مال اغبياء متصدكين اني حسين جدي احترك وانشوى وانحمس يله اخذتج شلون اتزوج عليج انت هنا واشرت على عقله وهنا واشر على گلبه وهنااا على صدره انتي بيه
ريم : اموت على رومانسيتك بس جعت تره
حسين : خربتي ام الرومانسيه ياجوعيه
ريم : هههههه تعال نتغدا

رجعت اتصلت رشا وفهمتها الي سمعته جان تكول
رشا : اريد رقم جنات
ريم :منين اجيبه
رشا : من تلفون رجلج
ريم : هاي سهله شعجب سهير مبلغتج
رشا : البنيه تزوجت والتهت ومن اخابرها ابد ماافتح هذا الموضوع
ريم : اجت ملبلبه لحد يمج
رشا : رقم جنات مو تنسي
ريم : خلي ينام ساعه والرقم يمج
رشا : اختنكت بدلت وطلعت لسليل
يتبع ...