#سليل للشيخ
#البارت الثاني عشر
للكاتبة #زينب البديري 💡
____________________
بالمرة الثالثة حسيت دوخة كلش قوية ونعاس
نمت بالكاع وضليت اباوع للدم الي ان مادري شلون غمضت عيني وشفت سيف لازم يدي ويجر بية مادري وين يريد ياخذني
بس اجة بالحلم نفس الرجال الي دائما اشوفة
بس شكلة كلش زعلان وعاكد حواجبة
اجة كمش يدي بكل هدوء ومشينة
اباوعلة شكلة كلش عصبي
ماكملت الحلم كعدت لكيت نفسي بالمستشفى بغرفة وحدي اباوع ليدية ملفوفة بس كلش توجعني
جانو مشكليلي بطل دم
يدي تموتني من الوجع
وجفن عيني كلش يوجعني
وراسي يفتر
ضليت ساكتة وصافنة ومحد يمي شوية وطبت الممرضة اجت يمي
-شلون صرتي
سليل.. رأسي يوجعني
-أي طبيعي لان نزفتي هواي
ضليت ساكتة ماحجيت اي شي
اجت قاستلي الضغط وراحت
شوية وطب رجال جبير للغرفة
اني حاولت أكوم من مكاني
أبو صالح.. ضلي كاعدة اريد احجي وياج
سليل.. منو
أبو صالح.. اعتبريني ابوج وجاي ادليج لطريق الصح
ضليت اباوعلة بستغراب
أبو صالح.. بوية الي سويتي أكبر غلط
دائما خلي هااي الآية بالج
اللة يمهل ولا يهمل
لو شايلة هموم الدنيا فوك راسج لاتفكرين بالانتحار
لأن هم راح تموتين وهم راح تروحين لنار جهنم
وما راح تحصلين شي
بوية هااي الروح مو ملكج هااي ملك رب العالمين هوة يطيهة وهوة ياخذهة .....
من يحجي حسيت بتأنيب الضمير واتندمت على السويتة
ضل يحجي وبعدين كال
أبو صالح.. بوية انتي ليش هيج سويتي ضوجوج بشغلة كولي اني بضرهج يبوية
من كالي هيج كلت بلكي أخلص من سعدية ومن أولاد عمي و من هذا الي يردون يزوجزنياه كلت خلي احجيلة كلشي بلكي اللة يسعادني
سليل.. عمو اني من يوم الماتوا أهلي ما شفت الراحة من يوم الكعدت يمهم و همة يعاملوني مو زين بس اتحملت و كتمت بكلبي
و ادري اكو رب العالمين الي يأخذ حقي منهم بس اليوم وصلت حدها و بعد ما أتحمل
و قررت الحك أهلي واخلص من عمي واولادة يريدون يزوجوني غصب و عمتي انطتني تلفون وطلبت مني اضمة
لأن مرت عمي سعدية ما راح تخلي عندي و اليوم شافت عندي التليفون و اتهمتني بأخلاقي
وابن عمي يكللها هوة بس هل الاسبوع و نزوجها يعني عمو شنو تريدني تسوي عمو ترة حكم القوي على الضعيف واني تعبت ومليت
شفتة انصدم وضل ساكت دقايق يلة حجة
أبو صالح.. بوية لا تخافين اني من اجيت و كتلج اني بضهرج يعني اني بضهرج لا تشيلين هم راح اخلصج منهم
■■■■■■■■■■■■■■■■■■■
صالح.. خير بوية شكو
أبو صالح.. بوية بت أخو أبو حسين بالمستشفى وحالتهة خطيرة ويردولهة دم
صالح.. اي
أبو صالح.. زمرة دمهة O ومالكولهة متبرع
صالح.. بوية اني O
أبو صالح.. اي يبوي كتلة راح نجيك وصالح يتبرعلهة
صالح.. انشاللة بوية ، شوكت نروحلهم
أبو صالح.. هسة بس خلي نكمل اكل
صالح.. اللة كريم بوية
كملت اكل وصعدت لغرفتي غيرت ملابسي ونزلت ورحنة لبغداد
وصلنة للمستشفى وخابرنة أبو حسين طلع النة
وصلنة للغرفة لكينة اكو شرطة يم باب الغرفة
أبو صالح.. خير أبو حسين ليش اكو شرطة
أبو حسين.. واللة يابو صالح سليل حاولت انتحرت ويريدون يحققون وياهة
أبو صالح.. شنو ياللة بدخلك ليش تنتحر
أبو حسين.. البت تسودنت وحيدهة تسولف وتضحك واكيد شافتهة حرمتك شسوت من اجت الأربعين
ومتخبلة علينة وهااه شوف جنت يمكم وخابروني كلولي محاولة متنحر
وهااي الشرطة يريدون يحققون وياهة لأن هااي قضية انتحار
أبو صالح دخيلك خلصنة منهم راح ننفضح
أبو صالح.. ولا يهمك
راح ابوي حجة وي الشرطة وراحو
شوية واجت ممرضة اخذتني للغرفة سحبولي الدم
ومن خلصو جابتلي عصير لان ضغطي نزل
طلعت من الغرفة ودكت علية نجلاء
نجلاء.. ياللة شوكت تجون
صالح.. مانجي لليل
نجلاء.. وليش
صالح.. ترة بت أخو أبو حسين بالمستشفى وحالتهة خطيرة شلون نعوفة وحيدة
نجلاء.. اي انتة شعليك ترة ابوك الشيح مو انتة
صالح.. اي حتى لو غير اني ابنة الجبير
نجلاء.. صالح كتلك تعال
صالح.. لا تلحين نجلاء
نجلاء.. صالح اني حامل
صالح.. شنوووو
من سمعت هذا الخبر صدك فرحت من كل كلبي وأخيرا راح اصير آب صارلي خمس سنين منتضر هااي اللحظة
نجلاء.. اي حامل وهسة ياللة ضل يم ابوك بعد سلامة
صالح.. اللة وياج
سديت التليفون منها ورحت لابوي
صالح.. بوية باركلي
أبو صالح.. مبروك بوية بس على شنو
صالح.. راح تصير جد
بينت الفرحة على وجه ابوي
كبل شبكني
أبو صالح.. الف مبروك بوية يتربة بعزك
صالح.. رحم اللة والديك يالغالي .
ضلينة بالمستشفى للعصر واجت الممرضة وكالت صحت البنية
أبو صالح.. أبو حسين من رخصتك اريد اطب لغرفة لبنية واحجي وياهة شوية
بين على وجة أبو حسين الخوف والتوتر حسيت اكو شي ،ضل ساكت فترة و بعدين كال
أبو حسين.. أبو صالح خاف مايقبلون
أبو صالح.. احجي وياهم بلكي يقبلون
أبو حسين.. براحتك خوية شتريد تسوي سوي
راح ابوي وحجة وي الدكتور وقبلو يطببو
من وافقو أبو حسين زاد توترة
راح ابوي شوية وطلع وشكلة مايتوصف
مبين مقهور اني اعرف ابوي من ينقهر
راح كبل وحجة وي أبو حسين
ضلو يتناقشون شوية وبعدين اجة يمي
اني مارحت يمهم جنت دايخ لأن سحبو مني هواي دم
صالح.. خير بوية شكو
أبو صالح.. بوية البت منتحرة لأن يريدون يزوجوهة
صالح.. يعني يريدون يزوجوهة تنتحر خو تكول الهم ما تريد تزوج
أبو صالح.. بوية جابريهة هية مااريدة الرجال والرجال عمرة فوك ال أربعين سنة
صالح.. وهسة شنو تاليتها
أبو صالح.. بوية راح نأخذها يمنة كم يوم ومن تنحل السالفة انردهة لان اخاف يسولها شي وبنية يتيمة وبركبتنة
صالح.. اللة كريم بوية روح جيبها وإني راح اتانيكم بالسيارة
راح ابوي طب لغرفة البنية وانة طلعت للسيارة تأخرو ياللة اجو .....
■■■■■■■■■■■
طلع عمو من الغرفة وشوية واجة
سحب الكرسي وكعد مقابيلي
أبو صالح.. بوية حجيت وي عمج وطلع الولد عمرة فوك ال 40 سنة
من كلي عمرة فوك الاربعين سنة جانت صدمة حياتي
أبو صالح.. ومزوج ورادج الرجال الزوجة الثانية
سليل.. لا عمو دخيلك ما أريدة حباب
أبو صالح.. بوية اني أريد اخذج يمي لبيتنة لحد ما تنحل السالفة وارجعج انتي موافقة
فكرت بسرعة وجاوبتة
سليل.. اي شي موافقة علية بس المهم أخلص
أبو صالح.. راح اكول لعمج لأن اني ماكتلة حتى أخذ رايج واشوفج موافقة
سليل.. أي عمو موافقة بس خلصني اللة يخليك
أبو صالح.. ياللة بوية رايح اكول لعمج واخذج
طلع من الغرفة وإني احس الحياة رجعتلي يعني ما راح ازوج الحمد للة شوية واجة نفس الرجال ويا ممرضة
أبو صالح.. ياللة بوية طلعي جبتلج هااي الممرضة تساعدج وتنبهج على كم شغلة
اجت الممرضة يمي
- حبيبتي جرحج سبوع وتفتحين الخياطات واكو مراهم بهاي الوصفة كتبهة الج الدكتور
ديري بالج يلتهب الجرح
المي مايوصلة و........
ضلت تنطيني كم نصيحة وبعدين وخرت بطل الدم لأن خلص ضليت شوية نايمة بعدين كومتني انطتني عصير شربتة وطلعنة وهية وياي
من طلعنة لكيت عمي واكف ومعصب
من شافني خنزر علية ردت اطلع سمعت صوت
فارس.. أبو صالح اني ما موافق تأخذ بتنة وياك
أبو صالح.. يابو حسين اذا ماتريدني اخذهة تمنع الزواج حرام عليك بنية يتيمة مايصير تسوي هيج
فارس.. يابو صالح اني مطي للرجال حجاية والسبت الجاي العرس مايصير هيج
أبو صالح.. اني سألت البنية وموافقة تروح
ضل يباوعلي ومخنزر كأنو يكلي رفضي
استجمعت كل قوتي وكلت
سليل.. اني أريد اروح ويا
استندت على الممرضة ومشينة سمعت صوتة ورانة
فارس.. سليل اذا رحتي اني متبري منج إلى يوم الدين ........
●●●●●●●●●●●●●●●●●●●●●●●●●●●●●
ولهنا ويخلص البارت 😏
اشوفكم بالبارت الجاي 💃
احبكم يا أحلى ناس 😃❤❤
اختكم#زينب البديري 💡
بااااااي🙋😘