تائهه باروقه ليست اروقتي.
ولا لحال دنيا تربيت عليه.
الايارب. حصنني بدعاء امي وصلاه ابي. فقد ولدت من تلاوه كلمات القران الكريم
حسيت بهوسه بالشارع وجوه هم اكو هواي. حجي. وصوت رجال فزيت وختلت وره الباب المشكله الزقاطه خربانه مال باب بقيت صامه حلكي وخانسه. وصوت الرجال يحجي طريقه كلامهم مختلفه يخلون وره كل كلمه بيها هاء الف
جان ديكول
توا. رجع. يكول المنذر ما يرد بعد يضل ورا جم شهر عود يجي خالتي جاوبته
ها. وبعد ماكال شي هو وينه خلني احاجي
لا تطلعين هسا. ديشتغلون. بس طرش الغدا. اكلج حضريلي هدومي اريد اتسبح
اي بعيني.
انا رايح وارد شوي النوب
خوش
بقيت. خانسه. وره شوي رجع. وويا صوت لخ. من يحجي يخوف. عبالك. غاره من تدك
ها عمه الله يساعدج. هاذ مصرف الج.
يمه. شنو مايجي لعد شوكت. يبين. مو رايدته بشغله
شغلتيش كليلي
ها لا مو وكته. عاشت اديك
لتطلعين عمه. جاي يزفتون.
لا وين اروحن
مليكه- صارت صنطه وريحه الاكل تسطر شوي وصار صوت مكينه مال زيان. وخالتي تسولف
ادري شوكت رديتم
حجيه. انه رديت من الصويره وابو قبضه توا راد التكينا بالمنطقه شجاج تحقيق خما تخقيق
اول نوبه المنذر هلكثر يبطى شعجب
ماعرف تدرين بي اخوي بس ايدا اليمنا ابو قبضه يالا. فيماللا
الله وياك
مديت راسي وطلعت هالتي من المطبخ همست.
مليكه
ها خاله
يله تعالي اكلي
وتتلفت كالت
لو اكلج. اخذي من الدرج الاكل. لون ماللله يفرجها خضج عدل المنذر ماجاه واكدر اضحك على اخو بجم جلمه اكلي يمه اكلي بالعافيه
مديت ايدي اخذت الصينيه. من اباوعلها اشكال مشويات. والنص الثاني بيد خاله. كللت
يكفيج
ضحكت
خاله. يكفيني سبوع.
اصعدي اكلي بحده تسلوس خلصي شبعي. زين. خلي يكوه عودج. باع وجههج اليوم شون مورد
صعدت وتربعت بغرفتي. ماعرف بيش ابدي.
لو اكل خالي هم اشبع بس خاف مااكدر انزل بعد لان خاله كالتلي لتنزلين بعد بليل ابد ولتشغلين كلوب الاصفر مال غرفتي ولا تطكطكين ابد
هدات. وبلشت اكل واباوع عالشباك الشارع يروش زلم. وطفل كاعد عالدرج مصلخ. لابس بس تيشرت. يطلع عمره سنتين. صافن عليهم من ياكلون وبيده. لفه شكبرهه وتيشرته من بعيد مبين وصخ. جانو يشوون عالفتحه مال برميل. بس شاكي بالعرض. مو على طوله ويشوون وواحد يشيش وواحد يخلي بالخبز وينطي. التزفيت خلص لنهايه الفرع داشوفه. لمحت جلب اسود عالي. يخوف. يروح ويجي وكلسا شامريله لحمه.
جانت مغربيه وتوها خالتي كاعده. من النوم وحتى الطفل اللي عالدرج عينه منفخه.
ساعه اكثر وكملو كل الفرع والجينكو خلو فوك الفرع على شكل كوخ حتى اذا مطرت الفرع ميتبلل ينزل المي بالحدايق. على جانبي الفرع
جانت نافذه الغرفه الساكنه بيها من كد ما الصبغ. ميعبر شمس ابد مااعرف ليل لو نهار وبصف غرفتي. درج ثاني. ليفوك. للسطح. بس مبي سياج. هم ويخوف ممكمل بناء والباب مسدوده مال سطح
جان الضلام بليل يخوف بس الشارع يضوي ببلاجكترات بحيث يطب شعاع منها من شخط السويته بالماشه واضل اباوع عليه حدما اغفى
ايام مرت واني كل ونستي صلاتي الماعرف قبلتها. وقراني اللي راجعت منه وتذكرته. والشارع اللي ليل نهار اراقب
الغريب بالموضوع وكتهم عكس وكتي
يكعدون ب٦ المغرب وينامون ب٧ الصبح.
يعني يتريكون ب٦ العصر عادي كلش ويتغدون ب١٢. بليل. تمن ومرك. كانما الضهر
بس لل٧ الشارع يخنس ولاشاب. بي يطبون بالبيوت
عمري مشفت مره بالشارع.
خالتي ابدا متصيحني ازيد من قبل الصينيه تخليها عالدرج. احس ب٨ الصبح اصعدها اتريك تمن ومرك لو لحم عالتمن لو دجاج مشوي عالتمن. ومخليه نوبات وياها اجبان. وخبز بالجيس. ونوبات كيمر ودبس وويه الغده طبعا خالتي جانت مثلهم تكعد المغرب. اني بوكت اللي اصلي بي صلاه المغرب. احس بيها تفتح باب الحمام البيها صوت بفتحتها وسدتها
كمت اعين وكت الصلاه عالشمس التجي من حديقه البيت اباوع من الشباك واصلي
عليك يا الله
اغلب الوكت اصلي واقره قران واراقب كمت اعرف. كم اسم بيهم
ابو خبزه اللي يطبخ الهم بالبيت البصف بيت ابو البرده الحمره
ابو كزله واحد اعرج. يكزل ويوزع الصواني اكل ويصب وياه
ابو النار اللي يخبز بتنور طين بحديقه ببيت من البيوت الكدامي هم
عكروط هذا يمكن اخو المنذر يطلع من بيت العايشه بي اني. ويطب بي وكت الينامون من كل عقلهم يكولون
ياله فايت نايم اني طلعت الشمس
ويبقه واحد بس
عالكرويته الكبال شباكي يتمدد هسه عرفت ليش بيها تك يده لان متكفي طوله. نوبات ينام ببيت من البيوت نوبات عالكرويت والجلب وياه. بالكع
مرت كم اسبوع وفد يوم الضهريه كمت من سجادتي. على صوت هوسه باوعت شفت لوري. جبير مليان اسلحه. وينزلون بيها على مشمع بالكع ثخين فارشي وسلاح سلاح ينضفو ويخلو بعلب خشب بيها نشاره. مال خشب ويخلون كل اربع اسلحه منضفه وممسوحه سوه يصفطوها ويسدون العلبه ويسلفنوها بلاصق نفس ذيج المره من شفت بس هالمره الكميه كلش هواي وكلها متربعه وكاعده بالخمسين رجال يكملون تغليف ويخلون باللوري الفارغ. علب علب مستطيله. بس الرجال الاكرع. يفتر عليهم نوبات يجون يسالو على شغله بالسلاح وياخذه منهم يسويها ويرجعها. بقيت اراقب بلا ملل
كملت تقريب الاربع ساعات وتحملت باللوري وغطوها بنفس المشمع واللوري طب ببيت من البيوت وسدو الباب مال بيت من اباوع اللوري مشه بالطرمه مال هذا البيت الفات بي لوري جبيره وين ديفوت بنص البيت.
شي ولكفته. هاي منا طبينا ومنا نطلع. باب حوش تنفتح من داخل بيت. ب داخل الفرع يعني ومناك هم. باب حوش تنفتح يعني بيت وره بيت مفتوح بس للطبه والطلعه حتى متلزمهم الشرطه. لان شغلهم حراميه. او يبيعون اسلحه وهاي ينسجنون اذا لزموهم الشرطه
اتخيل شكل البيت بس بيبان. باب حوش تنفتح من وره وتطب السباره وتضل تمشي بطرمه موصوله. بين بيتين واحد وره اللخ حدما يوصل لباب الحوش اللخ اللي بنص فرعنا ويفتحوها ويطب المنطقه
شي مرتب ومحد يلكفه
هذا يمكن رئيس العصابه. ابو قبضه ويمكن هذا عكروط هم رئيس لان اخو. المنذر
صافنه على شغلهم وابو قبضه عاط بواحد
هيييي انتا. صببببحووو
ابو قبضه ماتشوفا شون يداهر
دبسكم عاد كملو شغل فضوها
ابو قبضه انه وياه لا تتدخل
ولكفه ابو قبضه من زيكه من وره وهو ديريد يضرب اللخ اللي ديداهر شاله من زيكه وركعه بالكع. ذاك غلط حجي مسامعته. بس اعرف بي فشار لان بي مصطلحات. موجوده بجسمي. وابو قبظه يصيح
بسسس حسك لايطلع. باااس
وسكتو ورجع ذب حجابه. صبحو واليتداهر يضحك ورجع لكفه ابو قبضه موته كتل والولد التمو
كافي ابو قبضه كافي عوفه يولي مايسوا
لا خلني اعلما لا خلي يفهم مايكسر كلما
عوفا خلا يولي ابو قبضه صيح. عكروط ياشجاك ابو قبضه
صيح هذا الولد بعلو صوته
يويييل مااايفففههههم. حسبه زغيرون. دوخني سطرني. من ——— فشر لعبت نفسي كام الولد اللي ضربه ولازم بطنه صيح
الا يحي المنذر واكلا عليش مشيخك علينا علميش فهميش انت باوعتله وجهه مدمه خطوتين تقدم ابو قبضه ضربه كله وكع بالكع وشالو مبتعدبن صبح بعلو صوته
هذا انااا اللي يريد يعاكسني بجلمه. سلاحي ردادا وانتو بكيفكم بعد وصبحو يطلع من العمليا كلها
تقدم ابو كزله يحجي
الو قبضه علكيفك مو هيج
لا اهييييج تسكت لو تطلع انت هممممات
سكت وتفرهدو من يمه واخذو صبحو ببيت اليطبخون بي —-
بقيت اباوع. الضاهر هذا جبيرهم بس مو كلش جبير اصلا عكروط اكبر منه نزع. يشماغه وكعد عالكرويته شعره خفيف مزينه خله راحه ايده. على كوكه راسه هو ومنصي وحركها يمنه ويسره. بحركه. مساج لراسه بعدين نفضه لراسه ولزمه ويباوع يمنه ويسره عالفرع كلها طبت بالبيوت تمدد ودار المبرده برجله اول مره اشوف هيج مبرده نايلون وبيها جروخ وجهه عليه وطبك كفوف ايده وخلاها بين افخاذه ونام مكنفدالجلب بصف الكرويت بالكع نام اباوع يهز كف رجله من ينام شوي وطفو البلاجكترات. رغم مانهار بس الجينكو يعزل ضوه الشمس نوعا ما طفوها وعبالك دنيا ليل. كلها خنست بس اني كاعده
واباوع جعت وكمت نزلت بايتين من الدرج جريت الصينيه. بهدوء وترقب. خالتي محذره غير هالوكت ماانزل ابد مر شهرين على هالرنه توني اسحبها والمح احد طلع من الحمام. اللي صاير كبال الدرج جمدت وتقدم بهدوء مد راسه مستغرب واني جامده عكد حاجبه وفك حلكه كان اربعيني لابس فانيله رصاصيه وسروال اسود باوع باستغراب وخوف واني. متت بدمي. رجليه ترتعش من الخوف
همس
منو انتي منين جيتي وطلعتي
دااصعد فوك انهزم وتوكع الصينيه من ايدي خالتي فزت. وجتي باوعت لعكروط والي كالت
صعدي بمه لتخافين
منوووو هااي صاح ومنين طبت شون طببتيها. وضحى
وخاله راسن صمت حلكه
نترت حسسك ماسمعه هاي بنت المنذر
رجع باوعلي وباوع لوضحى
شوكت طببتيها للقطاع
اااقبل يومين
وضحىىىى منو هاي
بنت المنذر من صفا شبيك صفا ماتتت متدري
اي ادري بس المنذر مكلي عدي بنيه منها
لا يدزي بس عايفها. ع ببيتها والبيبي ماتت ودزو عليه اخذيها
فك عينه وباوعلي ورجع باوع لهالتي كال
ابو قبضه لازم يعرف
لا. ميحتاج
ابو قبببضه لازم يعرف تدرين. اذا عزف شيسوي بينه يحركنه. حرك القطاع محد يفوته وضحىىى حجاها من بين سنونه وخالتي ارتبكت تريد تلم السالفه ديطلع بره صاحت
عكروط لعد كوله بدربك جهاد ياهو الذبه بالمنهوله وكتله
وكف الرجال وضهره علينه
تحجي—- احجي. ومالي دخل خلي يسوي بيك اليريده وعدي اليثبت منو كتل جهاد
صفن عليها بغضب يريد ياكلها نتر انتي اول وحده تعرفين انه بله قصد يحجي بالغاز ويباوعلي خايف
جاوبت خالتي بدم بااارد
شعليه خلي حتى لو بس يشك بيك ميبقيك بعد هنا واذا طلعت تنكتل معروفه هاي
رجع فرك وجهه يروح ويجياشرتلي خالتي اخذي الصينيه وصعدي
شلت الصينيه هي مكلوبه بس عدلتها لان مغلقه بحيس هي يدزوها مجيسه صعدت واسمعه. يحجي تصنتت
هسه شون فهميني
هو ميطب هنا ومحد يفوت والبنيه. بس فوك متنزل. وبت اخوك عمروط
بت اخويه. نصرف عليها بره المنطقه مو هناااااا حياتها تدمرت بس طبت هنا وضحىىى
ميخالف. ياعيني محد قبل تبقى يمه وهي حديثه. هسه. محد يدري. بيها. بس اني وياك صار شهرين. هي هنا تدري بيها. تطب تنام وتطلع حسيت بيها
ابد
خلص. لتضل توهوس
واذا عرف
منا لذاك الوكت الف عمامه تنكلب. واحتمال اطلعها. مابقيها بالمنطقه.
ههه انتي عبالج. سهله. خاف قبل ليجي ابو قبضه هسا. كاعدلج بباب القطاع. انسي. وهووشون عضا جلب هالفترا كلش مجلوب
اي لاتضل تهوبز بس سد حلكك هي ماطالعه ابدد ولانازله حتى سد حلكك وكلشي مابصير
سكت ونصه وطلع.
بقيت متبسمره بمكاتي صاحت خالتي تبتسم
مليكه
نعم خاله جاوبت واصبعي بحلكي همست تبتسم بنصر
زقفلت الباب والمنذر بيانه عده مصيبه وماخاي بكدر يوصل المنطقه. فانتي هالفتره بامان وبعد مندري ربج شكاتبلنا
يعني شنو خاله شسوي
يعني نزلي وياي نلملم نرتب ومن يجي عكروط صعدي كبتج
اوك
نزلت واعدل بحجابي هالفتره. احس روحي قويت ثلث شهور مرت وزني زاد خدودي تفحت وشعري وقف تساقط تصالحت وي روحي وذبيت ذنبي وذنب اللكمه الاكلها بركبه. مروه. مرت عمي مكدرت بله اكل والاكل اليسووُمغري حيل بحياتي مماكله هيج اكل
بشرتي فتحت رغم الحبوب الطلعت ببوجهيوملامح. جسمي بده يكبر واشتغل يوميه من يطلع المغرب وره الريوك مالتهم اللي هو ساعه ٧ العصر. وخاله تقفل الباب واني انزل انضف والمع البيت وعي ويايه البيت كام يبرج حتى الصفحه الممكمله بناء طابوكها جان رصخ جلفته صار اصفر يلمع. خالتي. كضتها ابوه وخيط تصغر الهدوم عليه. المتحتاجها وانتبهت عليه بيوم امسح زيك دشداشتهازعريض عليه
وجسمي مله طلع همست
كبرانه يمه جسمج مبين لازم امر للسوك اشتريلج داخليات مال عمرج
بقيت صافنه وباوعت لزيك دشداشتي وكملت شغل صعدت توني ارتاح ضهري انكسر لان البيت صب بس صبه ناعمه من ينغسل يصير يخبل تمددت عالمندر مالتي واحس بحراره بين رجلي عبالي تدررت على روخي فزيت واباوع المندر كله دم تخبلت وابجي طبيت الحمام اغسل ويرد يطلع. اغسل ويرد يطلع شكيت الدشداشه اللابستها عليه. صارت كصيره لفيتها وكل ضني جرح او مرض
واردد وي روحي
هاي لكمه الحرام هيج تسوي
هاي اني تمرضت
خاف اموت خاف اكوت والله مراضي عليه لان مامله حرام واعرف بي حرام. خنيك بخنيك ابجي. طابه طالعه من الحمام . حسيت خالتي تصعد الدرج بالكوه هي سمينه كوه تتحرك تتعب بسع وتنهد
صاحت
مليكه شبيج كلسا فايته للخلاء شو وينج طلعي
اي خاله احجي واملخ بخدودي خايفه شكولها ميته خجل
فتحت الباب باوعتلي
شبيج يمه وجعانه
بقيت اباوعلها واحس عيوني كامت تغوش والم ببطني ذبحني همست فكت عيونها
عليج العاده يمه
بقيت صافنه
شنو
دتذبين دم
برطمت. نصيت. اي خاله هواي
ضحكت تبتسم كالت
ييمه صرتي جبيره. هاي اول نوبه. مو
بقيت صافنه عليها
اي معلرمه ماعدي. اي شي تجاه هالمواضيع اني بجهل عنه
كعدتني حجتلي كلشي واني منصيه. كمت كالت وين
خاله تاخرت صلاتي
وين اكو صلاه وكت العاده هههه
بقيت اباوعلها اشك بيها تعرف. بهالسوالفيعني حتى ماما الله يرحمها جانت تصير عدها هالسوالف
اي طبعا. اكولج كلنا
بس اني ولايوم شفت ماما تركت صلاتها
يجوز علمودكم تصلي يجوز متعرف
واتذكرت جانت تجي ايام ماما بس تلبس الجادر وتكعد وره بابا واحنا كلنا نصلي وهي بس تسبح اني واحمد نسالها. يمه ليش متصلين تكول صليت اني وكاعده رجلي توجعني
الحنين لذيج الايام اخذني نزلت خالتي وبقيت بفراشي متغطايه رجفه. لزمتني ودموعي تجري تفصيل تفصيل كعدت اجبر عقلي اتذكره خاف انسى شي تمنيت احمد يمي ويكمللي الذكرى يمكن احمد مات هسه يمكن. راح. يمهم او يمكن بعده بالسجن
غفيت. وحسيت ب١١ الصبح الفرررع صننطه. كمت باوعت من الشباك. واعدل بهدومي والاحتياطات المستغربه منها شي جديد عليه
بقيت اباوع من الشباك فتحه. كد العين او شوي اكبر تسربلي شعاع شمسي ضيق لداخل الغرفه. اباوع منها عالشارع شفت الفرع فارررغ شوي من الصفنه نزلت جبت الصينيه عالدرج. وصعدت بقيت اباوع البيت الكبالنا. الهوا يلهب بالبرده الحمره المشرشبه.
بس هاي الحركه بالشارع هناك والمح. الجبير مالتهم لابس فانيلا طلع من البيوت اللي بصف البيت ابو البرده الحمره وتمدد عالكرويته والجلب وياه دك تلفونه ماسمعه. جاوب
ووكف توجه للبيت اللي يطل عالفرعين اللي يطبون من عده للفرع. ويطلعون فتح الباب كلهاي. اني اراقب بقه ينتضر شوي وتلفت عالشارع ورجع باوع وطبو الولد كومه ب١٥ واحد صفنت وين جانو ذوله الله اعلم
طبو خلصو اخر واحد عكروط وبيده لازم ثنين شادين ايديهم وعيونهم اشرلهم ابد محجو الحجي بينهم اشارات. اشرلهم يطببوهم ببيت بصف بيتنا باربع بيوت اخر بيت بالفرع لان ماكو بيوت هواي بي طببوهم وطلعو وكعد يمه عكروط عالكرويت والولد كلمن طب لبيت.
ضلو يحجون جنت اخاف عكروط يحجي لان خالتي حيل جانت خايفه من ابو قبضه وحسب وصف عكروط اله مينجرع. وميقبل ابقى واذا عرف احتمال ياذي خاله
طب عكروط للبيت وذاك رجع نام
للمغرب رجعو كعدو اني داصلي المغرب والفرع صارت هوسه عرفت كعدو ركضت لل عين السحريه مالتي. هاي الجنت اسميها. جان عدنا زرف. بفتحه بابنا القديمه ببيت اهلي احمد جان يكولي لتفتحين الباب لاحد اله تباوعين من هالزرف العين السحريه.
وهاي هم صار عدي هنا عين سحريه
داباوعلهم هم التمو. عالصينيه مال اكل وابو قبضه همه وياكلون يوجه ويعلم. بيهم بصوت عالي باوامر
شباببب هنا. عاينوني
معوووودين. اششششش صاح عكروط
وسكتو
وحجه ابو قبضه
خلي يكون بعلمكم اي. خطا بتنفيذ المهام. عقابه بره المنطقه. والقطاع كله
اي غلط اي تصرف من كيف الواحد دون رجوع للعكروط لو الي خلي يعتبر روحه بررره
خلوها على بالكم. التركيز بالعمل والانتباه. لان اذا انلزمتو منعرفكم. واذا جبتو الشرطه ليجاي. بعد متلزمون وتبلغون. معناها. انت الخسران. لان انتو اول العارفين الحكومه بجيوبنا الصغيره
مامعناه اللي يلزم. معناها. انلزم وحده
واني ورقتي بيضه. بره تعرفون بيه فانتبهو الانتباه الانتباه
هودج وجماعته. مممنوع. تطلعون بره البستان. تكول اختنكت تكول داموت هاي مشكله امك حبيبي. انت مطلوب اربعه ارهاب
صبحو. عليك. نقطتين الثالثه. تطلع ميحتاج اذكرك
اني الجمعا الجايا مسافر السوريا. وراجع بعد سبوع. عدي مهمه لازم تكمل. وفاتح يجي وياي لان ماعده سوابق بالحكومه شغله مرتب
هودج. تعذرني مااكدر اسويلك شي حاولت كل الاصابع عليك وانت ممقصر كاتل سبعه امريكان شتريد يسوولك بعد بيتي.
يحجي ويهز براسه هودج جان ضخم حيل وشكله عصبي كلش جماعته بصفه ١٣ واحد حسبتهم حساب. ضلو يحجون صوت ناصي وياه مداسمع وابو قبضه يهز راسه بالرفض ونتر. بعد مالحو
داكوووولك لااااا طلعه منا ممنوع اهلك نوصللهم بيد سميره. راتبب لتلح. داكولك مخطططر اي غلطه تجر وياك الولد اني شكو عليه بس اذا لكفوكم بابوغريب يذبوكم ويطلعون حليب امك من خشمك هالفتره انسالي اهلك
سكت ونصه راسه
خله ابو قبضه ايده على كتفه ويهمس بمواساه وهودج منصي راسه ويهز راسه موافق بس يقهر رغم هو مجرم
صبحو كال بعد مكمل ابو قبضه كلام
زين وانت شنو ناخذ اوامر منك
ابتسم ابو قبضه تك خد ولوه ركبته يطكها وتقدم لزمه من ساعده عكروط يهدي. اشرله وهز راسه بالقبول
لالا عوفني
وتقرب يم صبحو
شون حبيبي
وصبحي تقرب خطوه وصل يم ابو قبضه رفع راسه بصلافه.
كال بصوت مسموع وياشر وعيونه بعين ابو قبضه اللي كاتف ايده ويباوعله رافع تك حاجب
اني ويياك ووالولد غير جماعه هودج. الجوي بالجديد احنا ربينا بفد بيت وحمانه فد سككف وفد لكمه جننا ناكل وفد شغله اشتغلنا وفد سجن انسجننا. وفد مكان. تدربنا. على يااا اساسسس انت تشيخ علينا
حرك ابو قبضه فكه الاسفل يمنه ويسره والتفت عالولد كال
شباببببب
اني من اليوم طالع من المنطقا وكلمن ياخذ راحتاااا. بعد يريد يبقه يريد يروح
والتمو الولد
لالا الو قبضه شدتسوي لا يمعرد كلنا بشاربك
واللي جر صبحو يسكته وهو عت ايده قوي منهم وابو قبضه يباوعله رافع راسه كال
هاا صبحو شتكول
انت عليك قضيه بكد راسك بس تطلع باب القطاع تلفون واحد يذبوك جوه الكع. ولك انت بهذا الاصبع اشيلك وشال اصبعه الصغير ورد عادها
بهذا الاصبع لتضل تهوبز لا تطك
سكت صبحو مخنزر عينه نتر ابو قبضه
تخزززرني ولللك نززل عينك لا فكسسهننن
منزلها نزل راسه اللي بصفه وصيح
نزلهن ابو قبضه نزلهن مال بارحه ماثر بي
اي ليثكل لللعد زززين لان اذا ثكككل ياثر عالولد كلهممممم.
وطببو لصبحو بواحد من البيوت وفرغ الفرع كعد ابو قبضه متنرفز وعكروط بصفه. يهدي بي وكلسا ينتر
هذا من ورا انتم. كلكم ينداسون اني شوراي
معود عوفه بس بوخه
حجيهم نصه فشار شي مااكدر اكتبه بقصه فشار وكفر واني اكضي الوكت العن باللي
كفر سبع مرات حتى يروح من ذنب كفرهم
جسمي كله يقشعر
بقيت اراقب ايام وليالي والتغيير الصار عدي طولت حيل عن طولي القديم الجانت محنيه من الضعف --- صارت مره ملامحي بينت شعري صار كلش حلو يوميه امشطه كدام مرايتي المكسوره.
عكروط اكثر من مره اتصادف وياه وانهزم فوك راسن يبقى يباوعلي بغضب
خالتي مكطوعه لغه الحوار بيننا انضف واصعد كل يومين اربع ايام وانزل عالدرج اخذ اكلي واصعد جنت اتمنى عدي قصص الانبياء اقره بيهن بس كلشي ماعدي حتى قران ماكو هنا بس اصلي واسبح بكف ايدي هواي اكثر من مره حاجيت خالتي عالصلاه
خاله ليش متصلين
وتضحك تكولي وين اني وين مصلايتي هاي سوالفكم
واسكت ماعرف شون اعلمها مره من المرات بعد ماصارلي خمس شهور هنا احس طولي زعد شبر من فريت ووزني زاد بالعشر كيلوات اذا مواكثر
مره من المرات داانزل الدرج والمح مره بليل تقريب العشره تتغده وي خاله والضحك مالتهن صوت عالي خاله تعمدت تحجي صوت عالي يعني لتنزلين لان لمحتني من عالدرج اخذت الصينيه وصعدت مرت اللخ كعدت عالدرج اسمعهم
اول مره يجينا احد
اول مره اعرف اكو مره غير خاله هنا
تحجي بتموع ونص حجيها فشار.
ضحاوي المنذر وين صار متكليلي مو صار عدي جفاف وتضحك صوت كلش عالي
والله سموره مدري شكولج شكله هج من عدنا وخالتي هم تضحك.
وبقو يحجون على مواضيع مختلفه. ووصتها على ملابس نوم توصفلها وخاله تكولها شسوالف عليج واوب حتى من يجي يلكاني متحضره
خالتي سكتت وراحت المره نزلت همست
خاله
فجقفلت الباب خالتي واشرت تعاي
طبيت كعدت اكل بالكع جان دجاج مشوي وتمن احمر يخبل. دااكل وسالتها
خاله من هاي
هاي بنيه هنا
يا يعني اكو غيرج نسوان
هزت راسها وجرت نفس هو بس راسها وراسي وهسه جيتي انتي حضري نفسج. الجمعه طالعين منا لان ابو قبضه يطلع لسوريا
وكفت اللكمه وين نروح
دبرتلج مكان حتى تكملين مدرسه هم لتخافين
خاله وين عفيه خاف مثل بيتجنه
لالا هاي بيت معلمه وماعدها اطفال وهسه كبرت كتلها عليج كالت جيبيها عدي شفتها ذيج النوبه
وين بيتهم
وره المنطقه بكم قطاع شلج دخل انتي عليج الصافي بقيتج هنا اذا عرفو بيها الولد يعني تموتين هنا وتضيعين
صفنت عليها بلعت ريك هزيت راسي وتوكلت على الله بعدني صغيره وكلشي مابيدي بس انتضر قدري
خاله هاي مرت المنذز
همست خالتي
ولج وين مرته هو هذا هم يتزوج هاي وحده مستكعدها
صفنت يعني شنو
يعني تشتغل شغل موزين وجابها هنا اله
يعني انتي مومرته
صفنت عليه همست
كملي اكلج يمه كملي وكومي صعدي هسه يطب الجحش
كملت اكلي وكمت الملم فتحت الثلاجه فارغه كل يوم نوبات بيها خياره طماطيه اخذها ويايه فوك وي الملح هالمره فارغه
كالت
الباجر يجي المسواك
صفنت ولامره مفكره منو يتسوك لو منو يجيبه اشكال فاكهه ومخضر بالثلاجه دوم موجود بس ماعرف منو يحيبه صار عدي فضول وصعدت فوك
بقيت اباوع من الشباك منمت اليوم شفت الولد الصغير هم مصلخ الدنيا بارده وهو بطرك البلوز وملابس لا بنطرون ولاداخليات وحافي
كاعدين الولد بالفرع بس ابو قبضه ماكو
ديلعبون ورق واللي دومنه واللي يسولف واني صافنه عليها تجمعات تجمعات ماشوف الا الباب انفتحت وصوت ابو قبضه صاح
يله يولدد وياي----