هشاشة قلب

تكمله ٣٧

هشاشة قلب
تكملة _بــارت 37_
للكاتبه عبرات{العباديه}
                  alabadyia_09

" يـومٍ بعد يـومٍ أتحمـل الأشيـاء حـولـي بـصـعـوبــة."♡

~~~~~~~~~~~~~~~~~~~~

ثُرىٰ

تقربت مني وعيونهه تجدح وملامح خبيثه مرسومه على وجهه

ام ماهر.. لج شمسويه لإبني مديححججي ويااااي

- شمسويتله اني شعليه غير انتم ماتتحاجون على سالفة موج

ام ماهر.. لجج لااا متغير جذررياً گولي شمسويتله امهات السحورة

- يااا امهات السحوره شنو النوب

ام ماهر.. لج والله لو أعرف لهالسوالف واندل واحد الإ اطلعج منا بالليلة ظلمة بس ااخخخ شعرفني بهالسوالف اصلاً اخاف منهه واتقزز بس حرامات خليتهن الج

- عمة شنو هالحچي اني شعرفني بهالسوالف ووين شايفتهن

ام ماهر.. لعد شبيه ماهر هيج يباع بحلكج

- جاي اتعب عليه ابو بيتي شعندي غيره رغم حملي مااشتكي من شي واقوم بواجباته كلهه وأحبه وصايرتله كلهن بوقت واحد

ام ماهر.. مداصدك هيج يحبج لان تهتمين بيه

- عمة اذا صدكتي او لا مايهمني المهم اني اعرف بنفسي شجاي اسوي ف خليج بعيدة واني اريد احافظ على عائلتي لاتسويلي مشاكل رجااءً

ام ماهر.. مستتحيل وربي ماافك منچ ياخه اذا متطلعين مطلگه واجيب جنونه

- يعني تشتتين عائلتي علمود جنونه؟ مو آني حامل بحفيدج

ام ماهر.. اي ناخذه حفيدي منج شعبالج لعد اخليه الج

- استغفر الله ربي واتوب إليه عمة فكري براحة ابنج لتفكرين براحتج انتِ خوش اني مااحجي شي من تسوين هيج لان مااريد مشاكل علمود ماهر اكول خطيه اجي اشكيله ويگول نكديه بس انتِ ماتفكين مني

اجت عليه دفعتني ومشت .. اني طحت بالگاع وصرخت لاارادي .. تأذيت فوك حچيهه ظليت ابچي احس روحي تعبت كلمة وحده وانفجر ملييت .. من شافتني ابجي رجعت عليه خايفه وايدهه رجفت

ام ماهر.. شبيججج

- بطني أذتني

ام ماهر.. اسفه والله آسفه هاج هاج اشربي مي

شربت ماي وعيوني تجري جاي اتعب يوم بعد يوم .. ماحبيت ضعفي مقابيلهه خليت وگمت مااتحمل حچيهه كله سم سسممم .. هالمرة مستعدة كلشي تسوي في سبيل تطلعني من البيت .. شأسوي هسه اني يربي. ماتعوفني بحالي .

•••••

{تسريع الأحداث}

اليوم رجعت من الدكتورة بعدمـا گتلهه تحددلي وقت للعمليه حتى أجيب لان مااگدر اجيب طبيعي كالت ترجعين باجر اشوف وضعج واحددلج يوم لان لكيتهه ازدحام .. كالعاده تلگتني ام ماهر تريدني اجيب طبيعي واني روحي طافره

ام ماهر.. عيني لتتعايرين جيبي طبيعي احسنللج

- اني اعرف شنو الأحسن إليه

ام ماهر.. مامو عملية تجيبين طبيعي

خليتهه ومشيت تعبانة وجسمي نحلان كوه امشي وبطني واصلة لخشمي اريد انفجر فوك ثگل الحمل فوك حجيهه المسمم .. كل حچاية والثانيه تسم بدني بكلمات تخليني اتحرگن .

ثاني يوم رجعت للدكتورة وحددتلي موعد العملية الخوف متغلب عليه وافكر خاف يصير بيه شي وكل الاوهام تخطر على بالي واطردها

••

اليوم ودلاتي .. نايمة ع السدية واحس اطرافي ثلجت من الخوف .. بطني خبطت ومتوترة .. ماهر يمي لازم إيدي ويهدأ بيه .. اهلي جايين وفرحانه بيهم صار هواي ماشايفتهم عيوني عليهم ودخلت السديه لغرفة العمليات وانسد الباب .. خدروني بالبنج وبعد ماحسيت بشي .

••

كعدت بعد مدة ماادري شكد كلهم يمي تحمدولي ع السلامه.. مرت فترة يله جابولي ابني رضعته ملامحه نسخه من ابوه بس عيونه بيهه شبه إليه.

ماتحملت ابقه بالمستشفى 3 أيام وطلعت وام ماهر لازگه اله يخلوني اسبوعين ادري شعندي اريد ارمم المستشفى .

رحت لبيت أهلي أمي تعتني بيه واني وماهر متفقين ابقه شهرين .. خلصتههه كله سهر وتعب وماهر وياي ماعافني يوميه يجي يشوفنه اني وزيودي .. سميناه زياد

إمتحانات أخير السنه اجلتهن ع الدور الثاني مااگدر أمتحن .

خابرني ماهر أتصال فيديو رديت عليه وبحضني زيودي

- الووو

تنهد

- الووو مالكم نية ترجعون

- هههه لا مانرجع

- مو مليت لوحدي البيت وحشه يخنگ

- اي غير انتَ سويت علينه حصار من بداية حمله لهسه ماجاية لااهلي اتحمل بعد مشكلتك

- خرب يومج تحسبين حساب عرب

- اي جا شعبالك

- باجر اجيكم ميكفي صار 40 يوم

- اتفقنه شهرين

- ثُرىٰ والله مشتاقلكم بعد مااتحمل

- يلا خوش راح نلم غراضنه وتعال باچر

لميت الغراض مالتنه وثاني يوم إجانه ..  سلم على أهلي وگعد شويه وطلعنه للبيت .. الطريق كله لازم إيدي ويباوعلي بلهفه .

وصلنه للبيت تلگتنه ام ماهر بالهلاهل وتطش چكليت علينه فرحانه .. ركضت لزيودي اخذته من إيدي وتبوس بيه

ام ماهر.. يمه فداوي نسخه من إبوه الحمد لله مطلع عليكم

إبتسمت مجاملة وكعدنه ع القنفات ماهر همس بإذني

- يلا نصعد

- شلقصه هسه گعدنه خل نبقه شويه يم عمتي

- مشتاقلكم

- امممم صارت جمع

- هههههه اي جمع زدنه نفر

- وان شاء الله نزيد نفرات

- لا بعد بس بنيه ونصير احلى عائله

- رزق من رب العالمين

- اي ادري رزق إذا اجه هلا بيه واذا مااجه نبقه على البنيه والولد تشكيله حلوة

ام ماهر كالت خلوه اليوم يمي وانتو اصعدو ارتاحو !
صعدنه لفوگ لگيت الملابس ع الچرباية مسفطه البنطرون واحد فوگ واحد والقمصان هم والتشيرتات نفس الحاله بس بترتيب

من دخلت باوعلي ماهر بخبث

- هاي كلهه منتظرتج

- شبيهن؟

- غسل وكوي هههههه عقاب

- ييييحح هووواي

- هههههه لعد وين اروح استنكف اطلب من موج لو امي جنت ادزهن للمحلات بس شفت غسلج ارقى

- يبووو لازم اكعد اليوم بالحمام

- ههههه حتى بعد متعوفيني وتروحين .. الحياطين أكلتني يوميه منتظرج اكول هسه تگلي تعال اخذني بس ماكو ولا تشتاقيلي واني يوم وظليت ألوب

- خل اغسل هاي الكوامات وارجع

رحت عليهن اريد آخذهن للحمام وهوَ رأساً سحبني من إيدي

- لججج تعاليي وييين

- الملابس

- دعوفي الملابس

تقرب عليه طبع بوسه خفيفه على خدي ......

(ها ها وين تفضلو يابة )

••

مرت سنتين خاليه من أي شي مهم غير كملت دراستي وانتقلنا لبغداد .. ام ماهر مافكت مني كل يوم لازم مشكله واني ساكته عنهه معتبرتهه أمي الثانيه ومثل ما امي من ترزلني اسكت هم اسكت واگول مااريد انكد عيشتنه ..

موج تزوجت شخص تقدملهه صديق إمهه من طبقتهم على گولتهه راقي وكشخه هم يفخفخ ومغرور .

ااني ابني تارس حياتي بسوالفه مدبدب وحچيه قليل مكسر ماهر يتخبل على سوالفه ومونسنه .. ام ماهر تسوي روحهه ماتحبه لان مني ومن يجي يمهه تتخبل على سوالفه .

اليوم سويناله عيد ميلاده وعزمنه اقاربنه وزينّه الاستقبال كل صديقات ام ماهر إجن واني مخبوصه باللبس والترتيب لان هيَ خبلتني بصديقاتهه يقلدن ع النمله شلون تمشي.

بلشت الحفله واحتفلنه بعيد ميلاده هوَ مكيف بس يضحك ويصفگ .

ماهر جابله سيارة صغيره يسوق بيهه واني هم اشتريتله آيباد انطيهياه بأوقات محدده

اجه يم أبوه يكمز يأشرله بإيديه رافعهن يريده يشيله .. شاله وباسه بخده .. ظل يأشر ع النوز ويصيح

- ببا موجّه

التفتلي عكد حواجبه يضحك

- شنو شيريد

- هههه موزه

- لك اصيرلك موزة .. ثُرىٰ إحنه حنصعد فوگ ألعب زيودي شويه واصعدي

- اي بس اكمل العشه واجي

كملت العشه مال عمتي وموج وصعدت صبيت وماهر تذمر

- ثُرىٰ تدرين بيه مااحبه حار ليش مصبيتي من وكت

زيودي صاح من يمه :-

- نعمط الله

- ههههه وهاي زيودي يگلك اكل كلهه نعمة الله .. مايفرق شي

- لك تعال هنا بحضني تعال

رفعه بحضنه وظل يبوس بيه ويوكله علما يبرد أكله .. إلتفت عليه ولزم خدوده يگرصهن ويضحكه بصوت طفولي :- وليك وليك وليك. (ولك)

ضحك من اعماقه وشاله للغرفه عافو العشه وظل يلعّب بيه .. اضحك على ضحكهم ومرتاحه .

ثاني يوم الصبح ماهر طلع واني نزلت لجوه وزيودي نايم فوگ . نظفت البيت وركبت غده كلساع اصعد اشوف زيودي خاف يكعد ويبجي تطمنت نايم رحت لبره غسلت الطارمه هيَ بعيده عن المطبخ .. غسلت وصلت للنص وسمعت صياح ام ماهر بعلو صوتهه

ام ماهر.. متصعديين للولللددد تخبل من البچي شبيج فاهية شبيججج

- ياا صخام زيودي فوگ

ام ماهر.. لا والله بعد وكتتت لج انتِ أُم من صدگ مهمله

ذبيت الصونده وركضتله لكيته ع الدرج مفرفح من البچي .. شلته ابوس بيه

- سوده عليه ماما ماكو شي اشش بعد روحي

مسحت دموعه ونزلته اريد اغسلله وهيَ تلكتني بالرزايل

ام ماهر.. جيبيه يامهمله الا اخذه منج واحرمج من شوفته اخليج تتمنين تلمحين خياله

- شنو غير ابني وبعدين اني وين اسمع صوته عفته نايم توني شفته كلت بس اكمل الطارمه واصعدله

ام ماهر.. جيبيه انتِ وين تعرفين للاطفال

- عمة شويه عن الطريق اريد اغسلله وابدلله هم يله اريگه واطبخ غدانه

ام ماهر.. اني اعلمج اليوم الا اخلي ماهر يطلعلج گلب ثاني

عفتهه ومشيت غسلتله وريگته وحطيت يمه الالعاب خليته يلتهي وكملت شغلي .. خابرني ماهر سلم عليه وكال :-

- ثُرىٰ آني اليوم معزوم يم صديقي لتنتظروني على الغده واتأخر للمغرب

- بالعافيه

صليت وتغدينه آني وزيودي .. نمنه وللعصر نزلت لجوه اسويلهم كليجه لان خلصن المسويتهن .. كملت العجين وظليت أفلس بالتمر .
اخلي الفصم ع الچيس والتمر اسويه دعابل صغيره احشيهه بفستق .

اجه زيودي يمي ردت اطلعه ظل يتململ ويريد يبچي .. گعدتّه يمي وحطيتله عجينه صغيرونه يلتهي بيهه علما اكمل.

گصيت العجينه والتفتت ع الطباخ ادخل الصينيه توني دخلتهه وسمعت صوت زيودي عاط بعلو صوته

- ممممااا

دخلت الصينيه ركض وطفرت عليه

- شبيك ماما

فرفح بچي ويأشرلي على خشمه ونفسه مگطوع من البواچي تخبلت

- شبيك حبيبي

اجت ام ماهر على صوت البچي شافته وظلت تدك وتلطم خلت الولد يتخبل واني هم تخبلت

ام ماهر.. صخام بوجهي راح الوللددد رااح

تمرغل بين إيديه ويرفس بچي

- مامااا شبيكككك شو خل اشوف ايدك بله شووويه

ام ماهر.. عززززااااا تعال يماهررر شووف ابنك ممااات الوللددد مااات

- عمةةةة خبلتييي الووولللددد شوويه خل افهم منه

- ماما حبيبي باوعلي شسويت

أشر ع الفصم وأشر على خشمه عرفت مدخل الفصمه بخشمه .. ظليت أسويله حركات اگله قلدني بس مايكدر طفل مايفتهم شي

ام ماهر.. خل اركض اخابر ماهرر

- عمةةة تعاايي

ركضت اخذت موبايلهه وضميته لان ماهر يتخبل كلشي ولا زيودي .. النوب يجي يسوق سريع ويصير بيه شي .

ام ماهر.. لجج انطيني الموبايل خليه يشوف عمايلج

- عمةة هسه تطلع لاتكبريهه

ام ماهر.. لج متطلع الا مستشفى يسحبوهه

- لا تطلع

ظليت ارجف محتارة شأسوي ياربي .. ادعي وماكو ان شاء الله تطلع من خشمة قبل لايجي المغرب .

- ماما لاتبجي ماكو شي حبيبي ماكو شي

هدأته شويه گعد بحضني وصوت الشهگة مال البجي مسموعه .. يأشرلي على خشمه عود يأذيه وعيونه وخشمه حمر .

- هسه تطلع حبيبي لاتخاف 

شديت شالي للسيدة شريفه (ع) كون العصر تطيح الفصمه .. خابرت إمي تشدلي الرايه جايبتهه من المرقد .

- ماما فدوه اروحلج شديلي اريدهه العصر تطيح اذا يجي المغرب ماهر يتخبل

- هسه اشدلج الرايه ثقي بالله العصر ترديهه تطيح يعني تطيح وشوفي

- ان شاء الله

ظليت ابجي بصمت وادعي مااريد ابين خوفي لان عمتي قلقانه وابني گوه سكتته يجي يشوفني ابچي شيصير بيه.

الظهر كله لازم خشمه ومخبوص والنوب الطفل كلش نحس بس يصير بيه شي ينخبص .. هوَ من ينشخط يخبصنه مو الا فصمه مستقره بخشمه .

مايقبل يتغده گوه وكلته اسويله اجت الطياره يله ياكل

- يله يله اجه القطار ووووعم .. كام يضحك لان دوم اسويله هيج وياكل بشهيه .

للعصر واني مكابلته وكاعده اخاف اجيس خشمه النوب تدخل بالمجاري التنفسيه .. ظليت بس اباوعله .. ظل يحك بخشمه متذمر ويلمس بالمكان الدخلت بيه

- مماااا

- ها حبيبي هياتني يمك

لزم إيديه وعطس .. طفرت الفصمه واني بچيت .. الحمد لله ربي.

ركضت صليت ركعتين للسيدة شريفه (ع) ماقصرت .. ظليت حاضنته وابجي هوَ يوخر بإيديه يريد يگوم يلعب خلص اليوم كله كاعد مامگمز .

عمتي هم ظلت تبوس بيه وتتحمد لسلامته

ام ماهر.. ديري بالج المرة الجايه

- عمه هوَ طفل شلون ألزمه واني مامتيهته بس التفتت

ام ماهر.. بسيطه

المغرب إجه ماهر دخل للمطبخ صاح لزيودي ركض عليه شاله يبوس بيه وهيَ ركضتله

ام ماهر.. ابنك اليوم وصل الموووت من وره مرتك المهمله

ماهر.. شنو شبيه؟؟

ام ماهر.. الفصمه دخلت بخشمه

ماهر.. فصمة إيش؟؟

ام ماهر.. دتسوي كليجه وحاطه فصم التمر ورايحه تسخت لما الطفل شالهه خلاهه بخشمه شعرفه بيهه شنو

باوعله كالله

ماهر.. شبيك بابا

زيودي أشرله على خشمه وهز راسه .. التفت عليه

- ثُرىٰ وين انتِ عنه؟؟ وهسه شنو الفصمه بعدهه بخشمه

- لا لا طلعت بس اني خليت الصينيه بالفرن ثواني والله لكيته مدخلهه

هزز راسه عاكد الحواجب وكال :-

- يله مصار شي

اكيد وراي حساب بس ماحب يفشلني گدام امه ..

هوَ بقه بالمطبخ واني رحت للصاله شغلت التلفزيون اريد اطلع دعاء شي .. هيَ اجت وراي

ام ماهر.. لج طفل متكدرين تلزميه عمت عينج ياغبية

- عمةةة رحمه لله كافي تره مليت والله ملييتتت غير طلعت الفصمه وراحت السالفه انتهت 

ام ماهر.. لا ماانتهت انتِ اغبى منج ماكو هذا دماغج فااارغ

اجت عليه ضربتني بكل قوتهه على راسي اني هنا تخبلت لأول مره تضربني .. ترزل اي تحچي اي بس تضربني شنو اني بنيتهه الصغيرة؟؟

وخرت راسي ورفعت صوتي

- كاافيييي شنو اني صغيروونه تسوين وياااي هييججج

ام ماهر.. اي طبعاً صغيرونه وغبيه حتى زوجج ممهتمه بيه

- اني مامهتمه بزوجي؟؟ خليت الاهتمام الج ع الأقل محافظه على رجلي وبيتي مااسوي مشاكل

ام ماهر.. وينه رجلج ووينه بيتج كله مفكك چنه اني وابو ماهر مثل البلابل هسه انتو مخلصيهه بس عرك

- شووكت متعاركين؟؟ اشو حتى عركاتنه هادئه وماكو صياح حتى تدرين بينه تعاركنه او اصلاً مانتعارك

ام ماهر.. على الاقل اني مراسلت على ابو ماهر وخنته

- اي ماراسلتي ومدللته وحاطته على راسج اشوفه راح تزوج اثنين عليج وانتِ هنااا تحمدين بيه خلينه ساكتين تره اني بعد مااسسسكت مللييييتتت انتِ النبي المُنزّل واني اليهودي !

ام ماهر.. شنوووووو تزووججج؟؟؟؟

صفنت اراجع ببالي اني شكلت؟ !

عصرت عيوني حيل متداركه المصيبه السويتهه .. التفتت لكيته ماهر واكف بباب المطبخ وشايل زيودي وملامحه كااارثة

يتبع..

            للكاتبه عـبـرات الـعـبـادي🌻🌼
alabadyia_09