هشاشة قلب

البارت ١

هشاشة قلب
الـبــارت_1_
للكاتبه_العباديه
                    

كُـن كيف شئت تجد محبـك مثلـما
تهـوى عـلى الـحالـيـن غيـر مغـايـر

~~~~~~~~🍁~~~~~~~~

كالعاده نايمه على سريري الحديدي والسيمات حاشكات بين ظهري وسُمك الفراش منخفص .. احس ضلوعي تكسرت.. وصوت الآذن الخفيف يرج بمسامعي ويبعث راحه لقلبي. صوت المؤذن بعيد بس گعدنّي من عز نومتي آه.

فتحت عيوني واشوف الدنيا ظلمه والشبابيك مايعبرلهن ولا فتحة ضوه !

فكرت ببالي بيش الساعه هسه يمكن الفجر لو نص الليل. لا لا مو نص الليل لان ديأذن إحتمال الفجر..

زين آني منو؟؟ ووين نايمه؟؟ أهلي وين؟؟

بلشت استعيد ذاكرتي شويه شويه وتذكرت اني ثريا وباجر عندي دوام كليه اول يوم.

كعدت على حيلي صخام بوجهي بس لا راح عليه الدوام.

ركضت بفزع شغلت الاضويه وباوعت بالساعه من شفتها بالـ6 وفوگ..
تذكرت الدنيا العصر وآني رجعت من اخوالي.. نمت مباشرةً غميت كصتي بضجر..
وهاي دائماً تصير بيه الحاله..
اگعد من النوم فاقده الذاكره ههههه ولااتوب والله.

تمطيت بكسل ورفعت شعري المنكوش عبالك ساحره وطالعه من ملحمه تاريخيه.

شلت ملابسي خليتهن مقابيلي ع السرير اتأملهن باجر اول يوم إلي بالكليه وفرحانه أريد أطير أخيراً گدرت اقنع إخواني ادوام كليه خليني اعيش حياتي بلكي اوصل لنتيجه احصل وظيفه فد شي.

لبست جاكيته خفيفه لان بداية شهر التاسع يبلش الجو بارد ومنعش. وكام كلما تتقدم سنه كلما يزيد الحر مثلاً العام شهر التاسع ابرد من هيج وانعش بينما السنه شويه دافي.

حطيت إيديه بجيوب الجاكيته وطلعت لگيت أمي بالصاله فارشه مصلايتهه وتصلي دائماً قبل لايبلش آذان تظل تقضي مامضى من عمرها.

كملت طريقي للمغسله ولگيتهم متجمعين كلهه تتوضى.

كلت بتذمر وملامحي مزعوجه.

- يهووو هاي شوكت تخلصون؟؟

جاوبتني إختي الكبيره تقوى.

- روحي حبيبتي إرجعي نامي هسه حسن راح يتوضى ووراهه اني ووراهه إسماعيل

- شلقضيه شحة مغاسل.

- اي عيوني ع السره تريدين الزمي سره

- ياا... اوف منكم رايحه اغسل بالصوندا امري لله

سحبت الصوندا لباب الطارمه وغسلت وجهي وتوضيت حتى المي يعبر من جوه الباب وميتلف الطارمه..
دخلت للصاله شغلت التلفزيون وخليته على قناة العقيله وشغلت دعاء بصوت أباذر الحلواجي احب صوته هادئ وحنين.. وهم أحب أجواء المغرب ببيتنا وصوت الادعيه اليِشرح النفس..

صليت وكمنا نحضر عشا. سويت بيذنجان قلي وطماطه وبتيته وسويت وياهه زلاطه وخبز حار امي خبزت قبل شويه وتعشينا الحمد لله.

إسماعيل كال

- يوم باجر اطلع ادورلي شغل شَفت ثاني ادعيلي

- الله يوفقك يمه

- ان شاء الله

إسماعيل اخويه الكبير من الولد.

ترتيبهم يبلش من إسماعيل و_ حسن _موسى _حمزه

اما البنات ف كبيرتنا... تقوى و_ نهى _ثرى والي هيَ آني _ والصغيره مروه بس هيَ شاذه بيناتنا حتى إسمها مو على الوزن خربت الاوزان مالاتنا كلهه بسببهه.

دائماً مدلله ودلوعة البيت ومرات تتذمر بسبب حالتنه.. عكسنا دائماً نحمد الله ونشكره غيرنا ماعدهم لگمه ياكلون.

ابويه متوفي أثر حادث سير راح بيهه بس أمي ماعافتنا عند اعمامي رغم شكد حاولو ياخذونه منهه بس تمسكت بينا لااخر شي.

امي الله يستر عليهه تحب الجهال ف خلفت هواي تكول اخلفهم بساع بساع مادام بعدني شباب حتى من اكبر مااتعب ف سطرتنا ثمانيه..

إسماعيل رغم عمره بالتلاثين بس ممزوج لان حالتنه ماتسمح ف مأجليهه وهوَ هم ديشتغل ويجمع.

اما موسى وحسن وحمزه ف يدرسون والبنات كذٰلك كلنا ندرس بس آني رادو يبطلوني بسبب فهاوتي يكولون عني فاهيه وبسرعه اتقشمر وانجرف بالكليه بس اني مداشوف هيج اصلاً بالعكس اني اشوف نفسي واعيه وشخصيتي قويه إحم.

نجحت من السادس بمعدل 83 أهلني دخول جامعة ذي قار كلية العلوم الفيزيائيه.

ولأن معدلي عالي ماردت اخسر وماادخل جامعه لحيت هواي يلا خلوني.

نهى.. ثريا عندي ملابس إلج الا بشده البسيهن باجر بالكليه

- عندي ملابس مال العام راح البسهن

- شكد عوبه إنتِ لج باجر تشوفين اللبس مال البنات تغوصين بملابسج من الخجل والفخامه لهاالسبب خل انطيج ذني العندي وجربيهن واذا ماطلعتي فد كشاخه عاتبيني

- امم بله خل اشوف

راحت ركض لكنتورها وسحلتني وياهه طلعتلي ستره كابوي وبدي أبيض بيه لمع قليل بس منظره حلو وتنوره سوده بيهه دگم على طولهه.

نسقتلي شال زيتوني وحذاء زيتوني من عدها ووياهن جنطه لون كريمي تصير صفح وسيرها طويل لبسه فد شي.

باوعتلهه بشك وسألتهه

- ولج منيلج ذني؟؟

تلبكت وظلت تمتمت

- آآءء.. شسمه اشتريتهن من مصروفي !

باوعتلهه بتفحص ونظرات الشك بعيوني

- مصروفج ميكفي تجيبين هيج ملابس راقيه

- خب شبيج غير سوگ هرج مليان بالات واخذتهن منه قطع جديده ونظيفه ليش افوتهن وكله بالعلامه بيوم الجمعه ينزلوهن جديدات علمود المحافظات يجون يتسوكون

- بس اذا ينزلون الجمعه يرفعون الاسعار هاي فرصتهم

- لا سوالي خصم اخذت قطعتين بخمستالاف رغم القطعه على تلاثه

- اهاا.. اكلج بس خاف مو هذا الزي

- لا حبيبتي اول يوم عادي كلشي مسموح

- هاا خوش

سكتت رغم شاكه بالموضوع وممرتاحه لهالشي مال اشترتهن !.

اخذتهن حطيتهم مقابيلي على كنتوري الخشبي القديم صبغه مزلغ وصاير خريطه من اللزگات لامخليه نور صبري مالازگته لا حسام الرسام كلهه ملزگتهه بالكنتور من وره ومن گدام.

تمعنت بملابسي واني اتخيل باجر شلون راح يكون اول يوم إلي بالكليه الله اخيراً خل اشوف عالم ثاني.

رحت لاامي كتلهه توقت الموبايل مال إسماعيل رغم موبايله صرصور بس فايدنه نكعد عليه للدوامات وهم اسمه موبايل ويخابر.

...

كعدتني امي الصبح وكنت كلي نشاط وحماس اريد بس اوصل للكليه .

كمت صبحت على امي ومشيت للمطبخ بالعاده نتريگ بيه. صبحت على اهلي ورحت غسلت ورجعت لمكاني صبتلي امي چااي وانطتني بماعون على جهه بيض ويمه طماطه أكلت ع السريع وظلوا يقلدون عليه

تقوى.. ولج راح تغصين لاحگه ع الكليه

كالت امي بصوت ممزوج بضحكتهه المستبشره

- ولكم خلوا البنيه فرحانه شتردون منهه

- شفتي ماما مايريدوني اكمل فرحتي

إسماعيل.. كملي فرحتج بس مو تغصين علينه ههههه

كملت ريوگ تحمدت وركضت متحمسه بدلت وتشيكت...خوش لبسه هاي تجنن . طلعت شكل ثاني ولا عبالك آني..

اخذني إسماعيل بالفورتات ووصلني للجامعه وراح لشغله خطيه.

وكفت مقابيل الكليه واني اقره الاسم
"جامعة ذي قار "
الله شگد حلو الاحساس من واحد يحس هنا راح يقطف ثمرة أتعابه.

دخلت بالممر وافر بإذاني كلشي مااندل.. ظليت امشي واني ماادري وين رايحه اصلاً !

شفت الطلاب كل مجموعه سويه وكل واحد بيهم أنيق ولبق بالكلام والطالبات كذٰلك بس لبسهن سويه اوڤر ومثقلات بالمكياج عبالك حاضرات حفلة زواج مو جايات للجامعه !

لكيت مجموعة بنات تقربت منهن سألتهن بعد السلام

- بنات وين قسم العلوم الفيزيائيه مرحله أولى؟

وحده بيهن حاطه دبل مكياج على وجهه وخاطه الايلاينر موصلته لأإذانهه ورموشها تتلازگ من المسكارا وخو لون الحمره اوڤر كلش بحيث طالعه عبالك طلي ماكل رمان.

باوعتلي بنظرات إشمئزاز وعبالك شايفه مقابيلهه شخص بيه جرب لو جدري !

تمعنت بوجهي وفحصت ملابسي بنظرات عيونها المتجوله بكل تفصيل بيه.

كالت

- إحنه هماتين مرحله إولى

..وشأسويلج بتل بتل

بداخلي گلتهه لان يمكن لو أگلهه هيج تسمطني بچلاق ترجعني يم جبار ابو الطرشي.

- اي عيني هسه وين الگاهه القاعه مال طلاب المرحله الاولى

صاحت بدلع متصنع وتعوج بحلگهه

- نرجسس عيني نرجوس

التفتتلهه وحده چانت يم المجموعه الثانيه لابسه حجاب أميره وماحاطه مكياج وملابسهه مرتبات ومستوره. وجهه مدور وبشرتها بيضه وعيونها شهل. خشمهه مُدبب وشفتهه صغيره بس مليانه.

باوعت عليه وسلمت بإبتسامه بريئه مرسومه على شفافهه. بسرعه دخلت قلبي وحبيتها. ملامحهه بريئه ومو يم بقية الشله ابدد تختلف عنهن إختلاف جذري.

نرجس.. هلاو عيني نورتينا

كالتلهه الساحره المتبطره شرشبيله

- روحي دليهه على القاعه مالتنا

سحبتني من إيدي ببراءه وحسيت على بشرة إيدها ناعمه حيل وترفه ودفو إيدهه انمزج ويه برودة إيدي المثلجه..
دخلنا للقاعه واسعه حيل وبيههه مجموعة ستيجات لجميع الطلاب وبالمقدمه ميز وعليه كتب أعتقد لدكتور الماده..والسبوره چبيره حيل اجه اببالي اقيسهه بس منا نرجس فشله...

باوعت بتعجب واتمعن بكل تفصيل بالقاعه حلوه حيل مو مثل صفي ذاك القديم والرطوبه واصله للسگف والحيطان تصل علينه برد بالشتا ومراوح ماكو بالصيف لان المروحه اصلاً تريد توگع فوگ روسنا.. اضافه للسبوره الصغيره ومن نكتب عليهه بعد ماينمسح القلم او الطباشير لان يوميه يگلبوهه على جهه وماصايره..

نرجس.. وهاي قاعتنا شنو رأيج؟؟

- كلش حلوه عجبتني

- شنو إسمج؟؟

- ثريا

- حلو اسمج واني نرجس

- عرفته من صاحتلج شرشبيله

- مني هاي شرشبيله؟؟

- صديقتج

طگتهه ضحكهه رجت بمسامعي.

- خرب يومج قصدج ساره والله لو تسمعج تسويج وصلتين وحده بالشمال ووحده بالجنوب ههههههاي

- خفت منهه بالله

- هيَ حلوه بس بدون مكياج لان ماتعرف تحط المكياج وتطلع صدگ شرشبيله هههههه والله لقب

ظلينا نسولف وتعارفنا عرفت عائلتهه واهلهه ووين بيتهم طلع بيتهم ع الشط قريب على جسر الحضارات.

شويه وتجمعت الطلاب بالقاعه وصار هدوء وكل واحد طلع دفاتر واقلام وگعدوا متحضرين .. دخل العميد سلم علينه وألقى محاضره طويله عريضه عن الزي والالتزام واي شي داخل الجامعه ماكو ووو هواي قوانين ولازم نلتزم بيهه وإلإ يصدرون بينه طلب ولي امر ولازم ناخذ تعُهد لو فصل اذا تجاوز طالب على احد الدكاتره ..

شويه وبلشوا الدكاتره يجون يتعرفون علينه ويحفظون اسماءنه دخل علينا دكتور إسمه أحمد شكله جذاب .وجهه ضعيف وشعره عالي ولبس واناقه فول ساعته مزينه إيده المُشعرّه ونظارته الشمسيه حاطهه بجيب قميصه مال القاط الرسمي.

البنات كتلن رواحهن عليه بس آني عادي عندي ماركزت وياه زين بس سأل عن إسمي وجاوبته وبقية الطلبه كـذٰلك.

حسيت نظراته مني طول المحاضره بحيث تضايقت حيل وردت بس تخلص المحاضره وأطلع.

اول ماسمح إلنه نطلع ركضت بره اريد بس اشتم هوى حسيته خنگني شنو هاي حتى ماعنده لحيه يووو چنه قرد ملّحس..

طلعت بره ونرجس بقت جوه تسولف وي البنات.

كعدت ع المصطبات وظليت اتأمل بجمال الجامعه وجمال الحديقه الله كلش حلوه عالم آخرر.

اني واعده نفسي محاضره ماافوت لان ماجايه اتملعب جايه ادرس واحافظ على سمعتي واريد اكون ملتزمه .

تقربت يم قاعتنا اشو هدوء !

قبل شويه جان الاصوات صاخبه وماليه المكان هسه ماكو صنطه !

عزا بس لا دخللنا دكتور واني اريد ادخل.

يبووووي.

الباب مال القاعه مسدود مبينه دخللنا دكتور !

گلبي كام يخفق لان سولفتلي نرجس ع الطلاب اليتأخرون ميدخلوهم.

تقربن يم الباب ودگيته على كيف.

إجاني صوت خشن ورجولي

- تفضل

فتحت الباب بهدوء ومديت راسي لگيت الصدمه دكتور بملامح رجوليه صارخه !!. عزا شنو هذا من جمال منين اجانه هذا ؟؟

هل هو قمرٌ أم أنا أُم عباس السحارهٌ..

ملامح رجوليه طاغيه حواجب كثيفه ملتصقه ومعگوده رموش سوداء كثيفه ، عينان غائرتان تعلوان أنفاً رومانياً دقيقاً يطل على شفتين مرتويتين مشدوده. شوارب خفيفه شبيهه بمحيط كوز الذّرة الطازج.. وجه ضاوي بذقن مُدبب وشعر فاحم مصفوط ومرتب بأغراء عجيب .

نزلت عيوني عن عيونه المخنزرات صارت عيني على إيده ... بيضه قطنيه يزينهه المحبس الرجالي معدني الصدأ ، نازك وشذرته ماروني وبإيده شعر خفيف بارز بعض من شرايينه الرجوليه .. المحبس ضايف جماليه لاإيده وعاكس بياضهه.

الصراحه إرتبكت مااعرف من نظراته الغاضبه مااعرف من جماله.

كال
- إنتِ طالبه هنا؟؟؟

جاوبت بتلعثم وإرتباك

- نعم إستاذ !

- اولاً إسمي دكتور مو إستاذ وثانياً بعد تأخير ماكو هاي گدام الطلاب كلهه أي طالب يجي متأخر ولو ثانيه وحده يُعتبر مطرود من محاضرتي لان مااحب التأخير ابد واقدس الوقت وحتى الثانيه اقدسها فهمتوا؟؟؟؟

جاوبوه واني معلگه يم الباب وهوَ ينطي محاضره ب اليريده وبقوانينه.

كتفت إيديه ببعض ومدنگه وأحس النار تطلع من خدودي لان بإعتبار ديسويني فرجه وعبره لبقية الطلاب.

سألته بخوف وهمس

- آآآءءء.. إستاذ أدخل؟؟؟؟

إلتفت عليه خازرني وعيونه غاضبه .. خب شبيك تخوزر بيه والله خفت هسه شمسويه آني

كال بصيغة أمر

- إسمي دكتور

- متعوده اكول إستاذ فدوه خليني براحتي

صفن ورفع حاجبه كال

- يلا تفضلي هاي اخر مره مُسامحه لان اول يوم وبعد دخول للقاعه ماكو بعد دخولي

جاوبت ببلاهه

- اي توبه والله

إبتسم بس عض شفته يخفي إبتسامته ولِكوني مايُخفى عليه خافيه لگفته.

رحت گعدت بمكاني ومركزه نظراتي عليه شگد أنيق ورزن لخاطر الله..

إنطانه شروطه وشيحب بالمحاضره ويريدنا ننتبه ونركز وياه ومايريد صفنات ولاتأخير لان يقدس الوقت على گولته.

بلش يفتر علينه ويسجل اسمائنه بورقه.

إفتر ع الطلاب ووصل إلي الدور هوَ من ياخذ الاسم ينزل على قاعدة ستيج الشخص ويسجل اسمه ف من وصللي دنگ ع الستيج وسئلني عن إسمي اني تلبكت وتوترت عمري ماكان شخص قريب مني لهالدرجه.

بلعت ريگ بصعوبه وكتله إسمي لبگ

- ثريا عبد الحسين شامخ

رفع راسه ويباوعلي عينه مخصومه ومنزل حاجبه بإستغراب كال

- ثُرىٰ عبد الحسين شنووو؟؟

- شامخ

- شامخ !!!! أسم غريب

إبتسمت مجامله وسكتت منحرجه وإنتبهت لاإسمي شلون لفظه بلسانه " ثُرىٰ "

الله شگد حلو ضم الثاء..

صحيح بالجنسيه هيج مكتوب بس اهلي يصيحولي ثريا عود أخف ..

من شاف إرتباكي انطه الدفتر لنرجس وكالهه

.. كومي إفتري ع البنات خاف ينحرجون من ادنگ ع الاستول لان لازم إستقواه ع الورقه قابل اكتب ع الحايط.

گامت نرجس اخذت الورقه منه وبسرعه شرشبيله ساره سحبتهه وكالتله اني اسجل هوَ خزرهه بس هيَ ولاكأنما .. فشلهه گال

- اولاً انتِ طالبة كليه وبحرم جامعي تصرفات الاعدادي والمدارس بطلوهه واكو شي إسمه إستئذان.. من تگومين إطلبي مني هالشي ومن اسمحلج تصرفي

هيَ تفشلت بس مابين بخدودهه مثلي لان حاطه عليهه كيلو طماطه أأ أقصد مورد خدود

گعدت متفشله وأغلب الطلبه يضحكون عليهه عاط بيهم بصوت خرسّهم.

كملت نرجس الاسماء وسلمته الورقه وكال لازم من اول يوم يشرح !!

يبوو هـٰذا شكد نفسيه هسه خلينه مستراحين اله تورطنا ابنل ابنل.

ظل يشرح وكلهه مركزه وياه بس آني بالي بحركات إيديه وشلون يشرح ورزانته وهدوءه بويااي..

إنتبه عليه صافنه صاح بسرعه..

- ثُرى... وياي

سمعت صوت من وره صاح

- نعم دكتور

التفتت لوره لگيتهه بنيه واگفه استغربت هوَ گالهه

- مو إنتِ ثُرىٰ.. قصدي ثُرىٰ عبد الحسين
(وأشر عليه)

يبوو غصت بملابسي من الفشله وافشلتاه..

دنگت وهالمره صدگ ركزت وياه شني هالظيم يريدله حجه عليه عابت .يلا يمكن عجبه إسمي كلساع يگوله ههههه ادري اسمي يعجب.

كلساع يخزرني يشوفني منتبهه لو لا ويجاوب إسئلة الطلاب وعينه عليه لما اخر شي كملوا اسئلتهم الطلاب واحنه ماسئلنه تقرب يم الستيجات مالاتنه وكال

- وإنتو بنات ماعدكم أسئله

جاوبته نرجس

- لا دكتور ماعدنه اسئله

باوع لجهتي كال

- وإنتِ ثُرىٰ؟؟؟

تلبكت ومااعرف ليش كلامه هيج يسوي بيه

- آآء.. لا إستاذ ماعندي اسئله

- اها..حلو

التفتت ع المكتب أخذ كتبه وكال

- فرصه سعيده طلابي نلتقي وياكم باجر بمحاضره جديده.

ماادري ليش حصرتني الضحكه على كلماته حسسني كاعدين بفلم أجنبي..

هوَ طلع وكلهه ضحكت خو البنات كتلن رواحهن عليه وبس يوصفن بيه اني لساتني بحالة صدمه واتذكر بس ملامحه ويلاااه..

اجتي نرجس ضربتني بخفه على إيدي

- ها ولج شو صافنه بس لا وقعتي ويه الاوستاذ ماهر هههههههاي

- ماهر !! الله شكد حلو إسمه

- اي والله وطلع ماهر خلاچ دايخه بمهارته مهرج تمهر مُمهمراً

- ههههه لج هذا كُنافه بالقشطه

- ديلا مافي خبصتينا عبالك مشايفه

- اي والله منين شايفه يحسرتي

- ههههه گومي لج گومي خل نطلع بره نشم هوى

- ويني وين الهوى إسماعيل كال بـ12 ضبط اجي عليج ومابقه بس ربع ساعه

- لا بشرفج اكلي وياي والله مااعرف وحدي

- لا حبيبتي بالعافيه

راحت تركض واجت بإيدها لفه

نرجس.. إخذيهه وياج تغدي بيهه

- مااريد شبيج ليش كلفتي نفسج

- احنه اخوات ماكو رسميات فهمتي

ضحكت وبوستني..

همزين لگيت هيج صديقه اجتي فيت وياي على مقاسي صدگ لو كالو

" علَىٰ نيِاتكم تُرزقون "
صدق الله العظيم

يتبع..

       للكاتبه عـبـرات الـعـبـادي🌻🌼