عزيزي القارئ فضلاً وَ ليس أمراً أضغط تصويت لنشر المزيد من احداث الروايه •
ملاحظه: الرجاء من كل القراء قراءة الكلام المكتوب في نهاية البارت
فستان أحمر
تحسين لقمان
أجه حجي مطلك رفع سلاحه عليهم
ماشوف اله حنظل يجي من وره الشرطه
ويصيح : حجي مطلك نزل سلاحك
أجه اليوم الكتلك عليه •
شرطي من الشرطه صاح بعلو صوته : نزل نزل سلاحك ,
اخوان بسرعه بسرعه توزعوا على البيت
حجي مطلك : سلاحي مانزله انتو من كل عقلكم واكفين كدام وجهي هاي اله اذا جنتوا تردون
تنهون حياتكم وتخلصون من دنياكم الگشره •
صاح واحد من الشرطه مبين واحد جبير بالشرطه : لك باوعلي زين الكدامك ضابط
استخبارات الزمك احركك واحرك روحك فاهم لو لا نزل سلاحك
بعده مامكمل كلامه الضابط والبنات نزلن من فوك ياسمين وثريه كلهن يصيحين بعلو صوتهن
ياسمين : يمه يمه لحگيني وخر وخر ايدك عني وخر وخر
وتدفع بأيد الشرطي بكل قوته كل صياحهن بجف واختفاء مهره هنا بنص هاي الهوسه بجف
اجتي وكفت بصفي هي وثريه اباوع لوجه ثريه ستوني شفتهه كله مدمه وكله مورم ماعرف شنو
شبيه ولا هسه الوكت المناسب مال اكعد واسئلهه شبي وجهج حنظل واكف يم الدرج لگيت حجي
ناصح بصفه والشرطه تفتر بالبيت كله .
والصياح مال الشرطه عباره عن رعب خلاني ميته من الخوف خايفه اتقدم وخايفه ارجع ليوره
البنات البقيه وين وهيماء اختي وين والاهم مهره مهره ستوهه جانت هنا وين راحت .
ردت احجي ردت اكول بس بقيت ساكته لان ميته خوف وميته وجع من اعتداء الحجي عليه
حياتي احسهه خلصت مابيهه لا طعم ولالون وحتى ريحه ما بيهه كل الاريده اموت واخلص
من كلشي حجي مطلك يصيح ويترادد ويه الشرطه والشرطه نفس الحاله ثريه وياسمين
واكفات شويه عني ميتات من البجي مابيدهن غير بس هذا الشي
نزلو شرطه اثنين من الدرج واحد منهم أسمراني ومعضل صاح : سيدي سيدي صناديك مال كريستال
هواي أكو وابطالة ويسكي درزن كامل متوفر ومن غير وجود الرمانات اليدويه
ومن غير المعدات الثانيه الاسلحه •
ضربت وجهي حيل وكلت بكلبي عزه عزه بعينج مياده وين جنتي عايشه يحضي يمصخمه
شيطلعج من هاي الهوسه هسه عزه فدوه ربي الحلكلي اباوع للبنات خايفات كلش وهذا مطلك
بس يكمز وذوله لازمين عليه السلاح صاح ضابط الاستخبارات : عوفوهن بمكانهن محد يلزمهن
تجي القوات المختصه هسه ينادون عليهم علمود هم يسجلوهن وياخذون فحص كامل
تقرب بأتجاهي وكال : شسمج بنتي
من كثر رجوليته وصياحه وصوته الخشن ماكدرت ارفع عيني بعينه واكله شسمي رئسا دنكت راسي
وكتله : ميا مياده سي سيدي
صاح : اها انتي اضاهر مياده كليلي بويه بعد جم وحده من البنات هنا حسب المعلومات
الي عدنه هواي وينهن .
بلعت ريكي وكلت بكلبي شجاوبك ماتكلي هو اني لو ادري بيهن جان كلت رئسا
كتله : سيدي مادري مادري
صاح الثاني : ساقطات أحجن وين جماعتكم لا احرك البيت على روسكم وروس الخلفكم
حنظل صاح : ذني ساقطات بس مياده لا تشملهه طبق القانون الصح من دون غلط وسب ولعنه
صاح الشرطي الي هو نفسه صاح قبل شويه : امي امي امي ياناس خسرتهه بسبب ذوله رادت
تلبسني بدلة الشرطه بيدهه وتهلهل يم راسي وتسويلي حنه بالبيت ونلتم احنه وكرايبنه
شسويتوا انتو ها شسويتوا
فجرتونه ولعبتوا بينه لعب من ضيمي ضيمي من قهري من قهري اصيح واحجي واغلط واسب
واكسر ليش لان امي امي انتو محد رايحله ام منكم محد ضايك طعم من واحد يخابرك يكلك
تعال امك ماتت •
ماسامعين هاي الكلمه ماشايفين جسمكم شلون يصير بذاك الوكت ماشايفين روحكم شلون
راح تجمدون بمكانكم تخافون تتقدمون وتخافون ترجعون ليوره خلوني خلوني احجي
اغلط احرك اسب لحد يدخل
رئسا صاح بي هذا الي يمي ضابط الاستخبارات : محمد محمد حقك وثار امك مايروح هدر والناس
الي ماتت اني اخذ بثارهم معليك معليك محمد يمي بعد .
اباوع لعدد الشرطه هواي وهذا الجهاز مالتهم جنه راديوا بس يحجي ابد ماسكت ماعرف شيحجون
وهذا حجي مطلك لازم سلاحه وخايف كمية الكره الي مزروعه بداخلي بأتجاهه جبيره جبيره
دمرني ودمر حياتي ودمر هواي بنات مثلي
تقرب ضابط الاستخبارات على حجي مطلك رئسا
تلاوه هو ويا علمود ياخذ من عنده السلاح انوبه حجي مطلك شسمنه وكرشه طالع ليكدام اجوي
جم واحد من الشرطه الي واكفين طاحوا ضرب عليه اسمع ونينه وصياحه ماعرف ابجي على
حضي لو اوكف اتشمت بصياحه وونينيه بس حرفيا يستحق كل الضرب خلي يون خلي يحس
بونين ذني المكرودات الي خطيه يوميه يونن ويبجن اي يادنيا فريتينه فر
شسويتي بيه .
وهم يكتلون بي رحت تمشيت بأتجاه ياسمين و الشرطه الي واكفين يم حنظل ماخذين كل نظرات
الخوف والقلق من عندي حقهم اذا هم عبالهم اني الفجرت واني التاجرت واني الكتلت واني الي
هجمت بيوت شيعتبروني حقهم حقهم . وصلت لياسمين لزمته من ايدهه رئسا جرتني من اللحاف
الي لافه بي روحي وحضنتني بكل قوه وثريه ادك على ضهره خطيه وجهه مورم تورم .
وخرت ياسمين عني وجريت ثريه عليه حضنتهه بكل قوتي كالت بهمس صوت ناصي : تهون تهون اهم شي شردتج ووصلتج لابوج
وخرتهه عني وابتسمت بوجهه رغم الالم والوجع الي نحس بي بداخلنه بس شنو نسوي
صياح حجي مطلك ابد ماوكف ولا دقيقه واكفه بصف البنات واشوفه شلون يصيح ويعيط ويرد
ليوره اذكرت كلام ماما منى من جانت تجتمع بينه بصف الميتم نكعد كلنه على لمه حلو وبنصنه
العصير والكيك وهي يم الصينيه تحجيلنه وعينهه على الصينيه او على الكلاصات خاف
وحده من عدنه توكع عصيرهه او تسوي خباثه . جانت تكللنه من تشوفن واحد بس يصيح ويغلط
ويسب ويتلاوه ويرادد ويه غيره معناهه هذا الشخص ضعيف كلش ومايملك غير بس صوته
كمت اني وكتلهه : معقوله هسه كل العالم الي عصبيه وتصيح وتغلط هم ناس ضعفاء
كالتلي : اي ضعفاء ماماتي يحاولون ان يعبرون عن قوتهم بطريقة الصياح والغلط بس اذا ترجعين للاصل هم ناس كلش ضعفاء .
اباوع لحجي مطلك اكول معقوله هو هيج فعلا . فزيت على صوت سيارة شرطه ثانيه رئسا دخلو
البيت زلم كومه ماعرف شنو كاعد يصير ابدا , ضابط الاستخبارات مادري شنو حجه وياهم
درت وجهي بأتجاه الدرج لكيت حنظل تعبان وعيونه بيهن سوالف هواي كلهن وجع وضيم
كون هسه اروحله واحط ايدي على ضهره واكعد اسحب همه لهمي .
خرعني صوت ضابط الاستخبارات وهو يكول لشرطي : اخذ البنات بالسياره السادسه كبل على التوقيف وهذا الزباله تاخذلياه لمركز مكافحة
الجرائم راح انادي هسه عليه وهم مناك يستقبلوكم
حطيت ايدي على صدري كلش خايفه ياتوقيف يامركز مكافحه شجابني لهذا الدرب دخيلك ربي
ساعدني محتاجتك كلش هواي .
صاح حنظل : بس انت تعرف هاي السالفه ان مياده وثريه معليهن بالقضيه
مفروض يرجعن ويايه
صاح واحد من ذوله الي اجوي قبل شويه : احنه بغض النظر عن حالته وقضيته لكن ابني وجوده
هنا هو جريمه يعاقب عليها القانون فناخذ وياها كافة الاجراءات القانونيه
باوع على الثاني وصاح : شوف شغلك بسرعه .
اجه علينه الشرطي يريد ياخذنه وحنظل من مكانه يصيح وحجي ناصح يهدء بي ويسكت بي
وحجي مطلك كاعد على التخم والدم يسيل من حلكه من كثر الضرب الي اكله .
ياسمين صاحت من يمه : سيدي سيدي والله والله مجبورات قابل بيدنه
جاوبه الضابط بصياح : وهذا شنو الي يجبرج تشتغلين بيت دعاره ماستحيتي على نفسج
اخ يلساني المصيبه انتي بكد بتي وعراقيه ماكدر اهينج
صاحت بي : اشتغل بيت دعاره لان مالكيتك ولا لكيت الي يحضني ويلمني امي باعتني لهذا
الحجي واني صرت الضحيه مال رغبة امي علمود الفلوس ولو لاكيتك بذاك الوكت ولو لاكيه القانون
الحقيقي هم بذاك الوكت جان ماوصلت لهاي المواصيل معليه اني
جاوبهه ذاك الثاني : احنه لو ندري بقضيتكم ومنو الي يسندكم جان مالكيتي روحج هنا
وبهيج مكان مامليق بيج •
ياسمين : يوم العلم بخدمة الشعب وينكم لعد بخدمة الشعب لو خدمتكم مطبقيهه صح جان
ماوصلت لا اني ولا ثريه ولاغيرهه •
جاوبهه ذاك : خيتي رحمه لربج منو كلج اني اخطبوط عندي ثمن رجلين
شصيرلج متكليلي انتو هو واحد اثنين •
رادت تحجي ياسمين رئسا صحت اني : سيدي اني ماتحرك اي اي ماتحرك منا اذا مو اختي وين
تقرب الضابط وصاح : اي مو كاعد احجي واصيح وين البقيه انتي تفرين براسج
احجي الوكت ينفذ من عدنه بنتي .
مياده : مادري مادري كل الي اعرفه هي بغرفته والبقيه هم بغرفتهن
رجع راسه ليوره عدل البيريه مالته وصاح بالشرطه : فتشتوا البيت عدل لو لا
كلهم جابو بمعنى اي سيدي فتشنا ومالكينه اي شخص غير بس المتواجدين
لطمت على وجهي وصحت بعلو صوتي : صخام صخام الصخمج مياده اختي اختي وين اختي
وين ولكم مهره اها اها من اجيتوا صاحت كبسه وصعدت
رحت لايد الضابط جريته رئسا وصحت بأعلى صوتي : فدوه فدوه سيدي اختي اختي منغوليه
وكلشي ماكو مروتك مروتك سيدي والله منغوليه اريد اختي فدوه هاي مهره ما راح تتركهه وحيدهه
صاح بيه : وخري وخري بنتي
حجي ناصح : مياده ماعاش الي يمس شعره من اخيتج لاتنسين عمج موجود وارد اشوف
ياهو الي يدنه •
صحت بي من ضيمي وقهري : مو وكت عضلات ولا وكت صياح ولا وكت عرض جتاف
صاح حنظل بيه : هيي مياده طلعتيه من ماعونه احترمي نفسج عاد
صحت بي : هذا الواقع حاليا مطلوب فعل جاد مو بس كلمات نطلعهن من حلكنه ونشمرهن بالهوى
هم نفس الكلمات سمعتهن قبل شهر نجيج وناخذج ونطلعلج وهسه اجيتوا بعد مادمرت
حياتي بالكامل شرفي راح تعرفون شنو شرفي راح
اني وكلت هيج ماحس اله حنظل يكمز كمزه قويه من الدرج ركض بأتجاه حجي مطلك
لزمه من ياخته دك بوكسيات والشرطه عليهم يفاككون بيهم وثريه تصيح : يمه يمه لحگي
حجي ناصح يحاول يلزم حنظل ويجره عليه : حنظل حنظل بس عاد شو تعال
حاطه ايدي على حلكي من الخوف اباوع لحنظل فاقد على حجي مطلك بالضرب الشرطه يجرون
بي وماكو ماحس اله ضابط الاستخبارات اجه بكل قوته ضربه برجله .
رئسا وكع بالكاع اباوع لحجي مطلك خشمه وجلده وحلكه يخرن دم رجعت ليوره يم ياسمين
حضنتني من الخوف خطيه لا بيدي اكعد اهدئهه ولا بيدي اكعد اهدء حنظل
البيت صار عباره عن جهنم حقيقيه دم وصياح وبجي وخوف وقلق وارتجال محد يعرف شنو
صاير اجانه شرطي من الشرطه دفعنه مدافع كتله اوكف خلي البس اي شي شلون اطلع هيج
رئسا دخلت للغرفه فتحت الكنتور لكيت دشداشه كدامي لبستهه بالكوه واني أصبر روحي على الوجع
طلعنه لبره البستان و ياسمين تبجي وتصيح : مو اني معليه معليه اني عوفوني
وثريه تبجي المره مابيدهه اي شي شنو تحجي شنو تسوي ماتعرف المكروده
واني دموعي تنزل واصيح بعلو صوتي :هيماء هيماء وينج ولكم اختي اختي فدوه اريد اختي
واحد من الشرطه : الله والقانون موجودين اختج بيدي ارجعهه الج سالمه ومن عيوني
صحت بي : الله موجود اما انتو وين وين وين ها وين اختي ياناس ياعالم ماهي وين ولكم منغوليه
منغوليه تعرفون شنو يعني منغوليه مروتك سيدي احسبهه اختك خالتك صديقتك زوجتك مروتك
رجعهه اليه منغوليه مريضه
صاح بيه ذاك الثاني صوت خلاني انخلس بمكاني : احنه مافارغيلج كلجن نفس الطينه اذا هي مريضه انتي
امرض منهه صعدي صعدي يلا بت الكلب
فتح الباب ودفع ياسمين من ايدهه كبل دخلت ليجوه بسرعه وثريه تبجي رئسا صعدت خطيه
شنو تحجي وشنو تكول ماعرف واني اتماطل ويا اصيح واجر بي
مياده : اريد اختي اختي اختي هاي اختي يامسلمين ياعالم ياناس اختي هاي شنو محد
يحس بالوجع محد يحس بالفراك مو خالتي هاي اختي خويه مروتك مروتك خليني يمكم اختي
واالله مريضه ماتكدر •
رئسا اجه واحد واكف من بعيد جرني من شعري وكبل دفعني على ايدي جوه بالسياره وكعت
بحضن ثريه من كثر ما الدفعه قويه وتوجع ,
طبك الباب بكل قوته رفعت راسي وصحت بعلو
صوتي : كسر كسر بيدك ان شاء لله ولكم هاي اختي اختي
ثريه حطت ايدهه على جتفي تحاول تهديني او تواسيني رئسا صحت بيهه : ثريه ثريه تعرفين
شنو منغوليه وتعرفين مهره شلون وحده ساقطه وذرة اخلاق ماعدهه
اباوع لعيونهه تنزل منهه الدموع وويه كل دمعه سالفه بيهه هم وضيم بس ياريت اكدر امد ايدي
وامسحهن واكعد اواسيهه بس ماكدر رئسا جاوبتني : حبيبتي بهيج وكت نحتاج الدعاء
ادعيلهه واني متاكده مهره ماتكدر تأذيهه
كمزت
كمزت ياسمين من يمهه وكالت : اي صح ماتكدر تأذيهه لان رزقهم اكثر شي عليهه
كافي ترعشين اهدي واستهدي بالرحمن .
جاوبتهه : يارحمن يارحمن استهدي بي ولكم اختي هاي لا اني الي لحكت عليهه من اني
وصغيره ولعبت الختيلان وياهه ولا من اني وجبيره كعدت وياهه وسولفت سوالف حلوه
وياهه شلون شلون ويه حضي
أنفتحت باب الصدر رئسا صعد بيهه واحد من الشرطه ووجهه مورم تورم ويتنفس
بعصبيه بنفس الوكت انفتحت الباب مال السايق وصعد بيهه شرطي يسب ويلعن بينه كأنما احنه
المجرمات واحنه الي كتلنه ونهبنه خيرات الوطن
صاح: ساقطات اهلكم يخلفون ويذبون بالشوارع
امي امي تلومني تكلي ليش ما تزوج شزوج وانتن وحدتجن ساقطه شغلهه شغل الليل
صاحت بي ياسمين بكل عرامه :
تعلمنه من امك عيناي •
الله يلعنك ويلعن السانك والفاظك
اباوعله ضرب الاستيرن بسرعه وصاح : بت الكلب هاي الفاظج اله اطلعه من عيونج , امي اشرف
منج ومن الجابتج ياكلب بت سطعش كلب
صحت بي : مو كلهه تشتغل شغل الليل لتحكم على البنيه من المظهر والمكان الي لكيتهه بي
لان اكو ضروف اكو ناس اكو اكو اكو شغلات جبرتهه تكون بهذا المكان الي
حظرتك وحضرت امثالك ماعاجبهم العجب ’
صاح الي بصفه : تنجبن وتاكلن تبن خلصن روحجن من القضيه القانونيه وخاف عبالجن
يطلعلجن راس من ذولي الروس القديمه الي اطلعكم لا يابه لا خططنه تخطيط الكم من هذا التوب
صاحت بي ثريه: والبريئ شنو شنو ذنبه ينحبس وينسجن ويكضي طول حياته بالسجن
كال : خيتي البريئ والمظلوم اكيد الله يبينه ويكشف امره ويفرجهه عليه بس ليش تكولين
مظلومه وانتي ملزومه ببيت مشبوه وتجارة مخدرات وشرب ومن غير المرقص الي مسوي ,
مياده : بس خويه ليش ماتصدكون احنه مظلومات ومجبورات
باوع على الجامه نزلهه علكيفه تفل بره واخذ حسره ذبهه بالجو وكال : خيتي منو كلج مامصدكج ومجذبج بس القانون ما يعرف شي
اسمه مظلوم ومجبور انلزمتي بمكان تواجدج بي خطأ
هاهي لعد تتحملين كافة الاجراءات القانونيه هذا الي عدنه احنه ما نشاقه وياج ولا نلعب وياج
ردت احجي بس اجه صوت بالسماعه مالته بالكوه فهمت منه ان حرك السياره بسرعه
شال السماعه وكال بصوت عالي علمود ذاك الثاني يسمعه : استعمت سيدي لبيت لبيت حول
ذب السماعه ووجه كلامه للي بصفه حرك
السياره بسرعه
وفعلا بسرعة البرق تحركت السياره
ثريه وياسمين يبجن بهدوء واني حايره وصافنه بزماني باوعت للجامه مال السياره لكيت الشرطه
الي بلبستان يجرون بحجي مطلك وحنظل يكمز ويتعارك وياهم
السياره رئسا حركت ليكدام ماشفتهم عدل ضل بالي يلعب ليش هيج صار وشبي حنظل شبي هيج
يكمز ويتعارك وياهم , طلعت السياره على الشارع العام ومشت بكل سرعه عدهه , البنات يبجن واني
اباوع على الجامه وعلى الشوارع وشلون صايره صفنه بوكت الليل ,
سمعت ياسمين ادندن بصوت ناصي مامفهوم باوعتلهه لكيتهه تبجي وتكول : هذوله العذبوني وهذوله المروموني
وثريه تجاوبهه وهي دموعه تنزل : اه وعلى جسر المسيب سيبوني
حطت ايدهه على وجهه وبجت بكل حركه وقوه , رجعت باوعت على الجامه وكلت بكلبي اليوم
لازم يعرف الانسان ان احلى شي يمر بي او يصير ويا ان يحس بندمه ويحس بخطائه معقوله
ياسمين وثريه تندمن اليوم على كل شي صار وياهن , اذا ترجع السالفه اليه فاني
متندمه انُ نخلقت وعشت ببيئه حيوانيه تفكر بجمالية الشرب والكبسله والقتل والخراب والدمار
وماتفكر ابد بجمالية الخالق بالمحيط مالتنه ,
ضلت السياره تمشي بينه طريق طويل ومتعب سئلت نفسي على صوت شهكات ياسمين وثريه
معقوله حياتي بالمستقبل راح تكون اطول واتعب من هذا الطريق لو راح تنفتح كل البوب بوجهي
واكون انسانه الي كياني الخاص واتخلص من كل هذا الاستغلال الي يصير بيه وبغيري ,
وكفت السياره بينه كدام بنايه جبيره باوعتله زين لكيته مركز الشرطه نزل الشرطي من السياره
وفتح الباب الي يمي رئسا مد ايده وجرني جر , نزلت بسرعه وورايه ثريه وياسمين كطعن البجي
وتقبلن الواقع مالتهن ,
اباوع للشرطي رفع الجهاز مالته وراح شويه من عدنه ماعرف شنو نادى بالسماعه واجه يمنه
سمعت صوت من وره درت وجهي لكيت زلم كومه من الشرطه طلعوا من وره الباب
تقرب علينه واحد مبين رتبه جبيره اول ماوصل كال : صدك جذب تالي الليل تجن على المراكز
من صخونه مال حصونه ماتستحن على نفسجن
رادت تحجي ياسمين رئسا صاح بيهه : شش لج بت الكلب
الكدامج ضابط استخبارات كلمه وحده ماسمع اذا هناك على الفراش يهزوج هز اني
هنا انتفج تنتف بت المنتف •
باوع على الشرطي الي بصفنه وصاح : من ياقطاع تحولو
جاوبه الي بصفنه : سيدي قطاع سته لوحدة الاستخبارات وقوات الامن الوطني
باوعله صفح وكاله : شنو بس نسوان ماكو مخانثيث منا منا
ضحك الي بصفنه وكله : لا سيدي شلون ماكو اكو وخطيه اكتشفه سيدي الضابط
جوعان وراح يعشوا عشه مرتب ويجيبو هنا •
اباوعله راح اتمشى على الشرطي حط ايده على جتفه وطبطب عليه علكيفه : عفيه عفيه بالابطال
بالزلم الحوك اريدكم هيج يابه
جاوبه ذاك : أبطال بوجودك سيدي
رجع باوعلنه وكال : شباب اخذو اخواتكم
للتوقيف وزيد زيد وينك ياولد
جاوبه هذا الي اسمه زيد : وياك وياك سيدي كول
كله : بويه لانروح ننساهم سجلهم على الوحده السادسه
صاح : حاضر حاضر سيدي
اجوي اربع ولد بيهم السمين والضعيف مشوربين كلهم وماعرف ليش نصهم صلعان ماعدهم شعر
وخزراتهم تخليني ابلع بريكي وارد ليوره شكلهم كلش يخوف مشينه لداخل المركز واحنه نتلفت
منا ومنا واني ساكته لان خايفه •
اجه هذا الولد زيد صاح الولد : يوسف يوسف دخلهم لغرفة المدير بس نسجلهن
جاوبه يوسف : صار صار
اخذنه يوسف للغرفه واحنه ميتات من الخوف اباوع لياسمين تبجي كلت بكلبي والله ياياسمين
مادري شكول الج ولا اعرف شنو اوصفج
دخلنه ليجوه صاح يوسف : وحده وره الثانيه توكف وبدون نفس واحد
بلعت ريكي ووكفت اول وحده وورايه
ياسمي و ثريه كلبي يدك من كمية الخوف والتوتر الي بيه
دخل رجال جبير مبين رتبه قويه كعد على الميز وصاح بصوته الخشن : اي بويه بناتي شنو
صايرات حنينات علينه ومسويات البيت دعاره وشرب وكبسله
ياسمين : احنه وجودنه هناك جان جبر علينه منو الي تقبل تكون بهيج مكان يهين الهه
صاح بعلو صوته : بنتي الملفات الي وصلت وراكم الي هي بأسمكم تحتوي على ادلة الجنايات
المختصه وتحقيق الكادر الامني تبين الملفات وجود مخدرات وبطالة عرك ومن غير المواد
المسلحه الله يخليج يامجبورات بابا هذا الحجي نكعي بطاسة مي وشربي مجبورات تهي بهي
باوعلي وكال انتي هيو اسمج يول فضيني
ردت اجاوبه بس ما اعرف ليش حسيت ان الغرفه تفتر وميز هذا الرجال يفتر فر كامل ووجع قوي
فضيع بمنطقة الرحم رئسا وكعت بالكاع اشوف بعيون مغوشه ياسمين فوك راسي تضرب بوجهي
وتصيح بأسمي مياده مياده . غمضت عيوني ورحت لعالم بعيد
مابي اي وجود من البشريه , صحيت على نفسي لكيت مره جبيره بالعمر تمسح بوجهي وملابسي
شبه نازعتهن وكطن وريحة ديتول ومنطقة الرحم احس بيهه وجع فضيع
رفعت راسي كتله واني خايفه : شنو اني اني وين خاله فدوه شنو وين ياسمين ثريه
جاوبتني وهي تحط ايدهه على وجهي تريد ترجعني على الجربايه انام كالت : اهدي اهدي
استهدي بالرحمان وكولي يالله انتي حاليا
بالمستشفى واني ام مراجعه هنا وياج بالغرفه شفتج تتحركين خطيه كلت اكيد تحلم
رجعت رفعت راسي كتلهه : خاله فدوه شسوي بالمستشفى اخ خاله خاله وجع وجع وجع
خاله اخ فدوه فدوه خاله وجع •
رئسا كامت مني وطلعت من الغرفه صاحت دكتوره دكتوره لحگي هاي البنيه مادري شبيهه
اباوع اكو شرطه واكفين بالباب بلعت ريكي يربي شنو اني وين شنو هذا الالم
اجتي الدكتوره ركض كالت : اهدي اهدي
هذا وجع الخياط •
صحت بيهه : دكتوره ياخياط يمعوده اني بالسجن وهذا الوجع شنو شنو ياسمين ثريه
وين •
كالت : ماما اهدي انتي اجيتينه من مركز الشرطه والشرطه هنا يمج بالباب واكفين انتي شنو
سالفتج ماتكليلي منو مغتصبج هيج ياحيوان
رجعت راسي ليوره وانهاريت بالبجي اجتي حضنتني وكالت : شش علكيفج علكيفج حبيبتي
يمج اني والقانون وياج علكيفج اهدي
جاوبته واني اشهك : ماعرف ماعرف عليمن ابجي على حضي لو على الدنيا الغبره الي دارت بيه
لو على الضيم الي شفته لو على
انتهاك شرفي ماعرف ماعرف •
المره الي جانت تمسح بوجهي كالت : خطيه يالله البنيه اضاهر شابعه ضيم وقهر اهدي يوم وداعتج
ربج مايعوف عبده بيج وماصحتي بأسمه لا تنسي ابد
الدكتوره باوعتله وكالت : عزيزتي ميصير توصلين لهذا السرير هذا مخصص لهاي السجينه رجاءا
رجعي لمكانج لا ابلغ عليج الشرطه الي بره تفضلي رجعي لمكانج
رئسا لزمت عبايتهه وراحت لباقي الغرفه وخرت اديه من وجهي فركت خشمي على السريع احس
بي حراراه قويه كتلهه : دكتوره فدوه اني كلشي مامفتهمه شلون اجيت هنا وشنو صارلي ومن
شوكت هنا اني وشلون اني جنت بالمركز مال الشرطه
كالت : ماما انتي اجيتي ويه الضابط يوسف واذكر اربعه من الشرطه
مغمي عليج ومنطقة الرحم عندج فايضه بالدم تكفلناج بعد ما عرفنه ان ُ انتي سجينه تابعه لمركز
الشرطه كشفت عليج دكتوره رباب وجزاهه الله الف الجزاء شافتج مغتصبه وصايره عندج
فتوحات اطلب الامر من عدنه الخياط بأسرع مايمكن والحمدلله امي احمدي ربج وشكري
انتي هسه مثل الورده
اجيتينه شبه ميته •
فركت خشمي وكتلهه : دكتوره فدوه شكد اني صارلي هنا وشنو وين راح اروح
كالت : ماما انتي سجلتي اسمج يمنه من ساعه عشره ونص وهسه ساعه ثنتين ونص
وشنو وين راح ترحين هسه بس تجيكج دكتوره رباب ترجعين للمركز
بس يا أمي ليش هيج انتي بعمر الورد معرضه نفسج للاغتصاب شلون سمحتيله يمد ايده عليج
معقوله ضحك عليج مثل ما اسمع من ذني البنات الي يجن للدكتوره
نزلن دموعي شجاوبهه شكلهه شسولفله كتلهه : الي مايعرف شي خلي يسكت دكتوره
بس فدوه وجع فضيع ماكاعده اكدر احرك رجلي براحتي
كالت : اي شي طبيعي هسه كايمه اصيح دكتوره رباب تشوف وضعج
بعدني اريد اعرف اي شي عن ياسمين وثريه وشنو صار بس ماكو مانطتني اي مجال رئسا
كامت مني وراحت طلعت , باوعت على الكطن كله دم لعنت روحي ولعنت روح حجي مطلك الف
لعنه ليش هيج اني ادمرت حياتي وخسرت كلشي بسبب منو ماعرف ماعرف
ضليت اصبر بروحي على الوجع مال الخياط كلش يوجع احس روحي هيج تنوكل اكل , انفتحت
الباب باوعت لكيت بنيه شويه سمينه اجتي عليه وكالت : وياج دكتوره رباب الحمدلله على سلامتج
همزين اليوم اني خفر جان رحتي بالرجلين
مياده : فدوه الج دكتوره بس الوجع وجع فضيع ماكاعده اتحمل
كالت : قابل بيدي ياعيوني شسويلج المثل شيكول
باوعتلهه واني اعقج حواجبي من الوجع :
شيكول
رباب : الي يسوك المطي يتحمل صخامه حسب الي سمعته من الشرطه انتي
سجلج كله خطوط حمر اتحملي الي جنيتي بأيديج
مياده : اني كاعده اكلج وجع عندي من واجبج كدكتوره تخلصيني من هذا البوجع مو تكعدين
تحاسبيني وتعاتبيني بت خال بت عم
كالت : ومنو كلج اني شريان علمود اهدء الوجع الي بيج سويتلج خياط عشرة ايام تجين وتفكي
راح اكتبلج كلشي بورقه خاصه وها رغم الي مسويته راح ازود ملفج الصحي بكافة الفحوصات
والاشعه مالتج •
هاي مساعده مني الج نظرا لحالتج ,
ابتسمت وكتلهه : دكتوره والله لا تحكمين عليه هيج بنظره وداعتج اني هم اتمنى اكبر وادرس
واصير دكتوره واعالج الناس مثلج بس يدكتوره غير الدنيا غبره ماترحم لا فقير ولاغني
شسوي قابل بيدي
كالت: على العموم الحمدلله على سلامتج اريدج ترجعين راسج على المخده وترخين كل جسمج
علكيفج وشويه فتحي رجليج بس شويه اذا تحسين بألم رجعي طبكيهن بسرعه
اباوعلهه حطت نظارات ولبست جفوف رئسا رجعت راسي على المخده ورخيت جسمي
وسويت الي كلتلي عليه
فتحت شويه من رجلي , اباوعلهه رفعت الجرجف شويه وزعت نظراتهه على الاماكن الي كلش
توجعني جابت عصارة دهن
ودهنت المنطقه كله سدت العصاره ورجعت الجرجف كالت : لتسدين رجلج خليهه بهذا
المستوى بين ما الجلد يمتص المرهم
شويه راح تمر عليج ايام صعبه حاليا من ناحية الوجع حاولي تتحملين لان شي طبيعي انتي
متعرضه لأغتصاب بطريقه اكثر من بشعه مال واحد ماشايف كدامه مره بحياته كلهه .
نزلت دمعتي
رئسا مدت ايدهه ومسحت الدمعه بطارف اصبعهه وكالت : اريدج قويه عيوني وراج محكمه وراج سوالف ولا تنسين ربج اذكري هواي ,
اباوعلهه بنظرات متروسه ضيم وقهر شنو اكول ماعرف , نزعت النظارات وكالت : تصبحين على خير نامي وارتاحي والي يصير
الصبح حياه الله
كتلهه : شكرا دكتوره
ابتسمت بوجهي دارت وجهه وراحت , اما اني حسيت نفسي لازم استسلم لان طفح الكيل بيه
عيوني خلاص ادمرن صارت ساعة الصفر لازم انام لان كل طاقتي خلصت
غمضت عيني رغم الوجع الي كاعد يصير بيه , ورحت بنومه عميقه كعدت على صوت بنيه
تصيح صياح وادغني بعوده من ايدي فتحت عيوني فركتهن حيل
لكيت بنيه لابسه ملابس مثل الشرطي الي شفتهم البارحه وحاطه البيريه عدل كالت : كومي كومي عاد كافي عرامة نسوان
دخلت دكتوره رباب وكالت : عيني حضرتج لو سمحتي
المريضه بعدهه بحاله حرجه والملفات كملن عند الضابط يوسف
كالت : تعاي اوكفي بمكاني ومارسي مهنة الامن بدالي وشعليه اني ,
باوعتلي وكالت : شوفي ماماتي ذني السوالف ودموع التماسيح مشيهن على مامي وبابي
اني مره لاليلي ليل ولا نهاري نهار اركض بمهنتي جني وحده ارمله كومي فضيني وراج مركز
تحقيق انتي والحبشكلات الي وياج •
مياده : بس وجع وجع اتوجع ولله شلون امشي
دكتوره رباب : هذا الي كاعده اوصله الهه وتره احنه شغلنه كله عذاب وضيم وقهر
جاوبتهه : شو انتي تراددين ماما الي كدامج برتبة ضابط من توكفين كدامي توكفين وعينج بالكاع
باوعتلي وكالت : تكومين لو استخدم وياج كافة القوى الامنيه
كمت على حيلي كعدت على الجربايه كتلهه : والله ماكدر امشي وجع قوي
باوعت لدكتوره رباب وكالت : جيبيلي عربانه بسرعه واي ملابس دبريلهه
صاحت دكتوره رباب : تره انتي بمستشفى مو باله وتردين ملابس حتى وان جنتي بمهنة الامن
احترمي الفئه الي دتحجين وياهه
كالت : مهنتج على عيني وعلى راسي بس انتي حاليا لازم تسايرين الامور علمود نمشي الوضع
لان الي كدامج على الجربايه من الممكن يأذوج ويأذون باقي المرضى طبقي كلامي بسرعه رجاءا
راحت دكتوره رباب بسرعه طلعت اباوعلهه جرت كرسي من الغرفه وكعدت كدامي كالت : جنت
بعمرج احلم واكول هم يجي يوم والبس هاي البدله واكون احد ضباط الدوله وادافع عن بلدي
بكل ما أملك من قوه ليش هيج عدمتي حياتج ويه مجرمين وقتله وويه مجموعات مسلحه
جاوبتهه : اني قصتي اذا اسولفهه تبجين وتبجي الحايط وياج
كالت:معقوله ماما الي صار وياج وصلج تشتركين بعملية التجاره بالمخدرات
كتلهه : اني عمري وحياتي مامديت ايدي على الحرام لو مالدنيا مشت بالمعكوس ويايه
كامت على حلهه وكالت : الله يساعدج ويطلعج من كل شر اذا جنتي حسب كلامج
مضلومه ومالج اي علاقه
ضلت تمشي بالغرفه تروح وتجي الى ان دخلن اربع ممرضات ودكتوره رباب تدفع بالكرسي
اجتي دكتوره رباب لبستني دشداشه كلهه ريحه ماعرف شنو اكول عليهه
جابت الكرسي و صعدني علكيفهن عليه واني اون بعلو صوتي من كمية الوجع الجبيره
طلعنه من الغرفه بسرعه وهاي الي جنهه رجال تمشي بصفي تدفع بالعربانه لكينه كومه شرطه بالباب
كلهم يمشون ويانه ويتلفتون منزله راسي واحاول اغطي بديه لأن بيا وجه اقابل
الي يمشون كدامي بيا وجه •
ومشت بيه الاجراءات القانونيه بأسرع مايمكن من رحنه للمحكمه علمود غرض التحقيق تكفل بيه
محامي وبعدين عرفت ان هو من طرف حنظل وحجي ناصح وهو راح يدافع عن قضيتي
اما ياسمين وثريه متكفل بيهن حجي ناصح وموكللهن محامي رجال جبير من دخلت للغرفه
على العربانه بده المحامي يسئل بيه عدة اسئله عن حياتي وعن ايامي ومنو اني وشلون
وصلت لهنا
كتله : تريد وجع راس لو لا
كال : اكيد اريد
بديت احجيله على كل دقيقه مرت عليه بالبجي والفرح ولو هو يافرح مر عليه ,
و بعد ماكملن كافة ملفاتي ومرفقاتي ويه ياسمين و ثريه بقه يوم واحد عن محكمتي بعد ماضلينه اسبوع كامل احنه بالتوقيف ,
مشى هذا اليوم حاله حال الباقي واجاني الصبح واحنه التلاثه كل وحده تفكر بهمهه وضيمه
وقهرهه اليوم هو يوم المحكمه شنو راح يكون مصيرهه وعقابهه بعد مامشت بكل مجابر الحياة
تحولنه على محكمة بغداد حسب اوامر المحكمه الي بالبصره ماعرف ليش اتخذو هيج اجراءات
تحفظا على العمليه الامنيه ماعرف اي شي
وكالعاده الطريق من البصره لبغداد طويل ومتعب واحنه بعد تعبنه كلش والوجع الي بيه بده يخف
شويه شويه ومنتظره عشرة ايام تمر عليه علمود ابلغ المحامي مالتي على قضيتي الصحيه
وصلنه بغداد بعد عناء طويل كلش وسيطرات وغيرهه وجانن هواي سجينات ويانه بالسياره
بس تمنيت تكون عندي طاقه واكعد اسمع وحده وحده واتعرف عليهن بس حرفيا تعبت كلش
مابيه صبر بعد
نزلنه من السياره وجانوا هواي شرطه كدامنه متحضرين النه توزعنه على عدة فرق امنيه
وكل الي افتهمته من الهوسه الي صارت ان محكمتنه احنه ساعه عشره
دخلنه المحكمه وكعدنه على المصطبات وويه وجود الشرطه والضابط يوسف
شويه ودخل المحامي مالتي ومال ياسمين وثريه ووراهم حنظل وحجي ناصح
ردت اكوم اروحلهم رئسا صاح واحد من الشرطه : بمكانج بمكانج اي حركه ماكو
راد يجينه حنظل بس الشرطه ماقبلوا سمحوا بس للمحامي فقط يحجي ويانه
اجه المحامي مالتي وكال : كل الاريده منج تكونين هادئه وشنو يجي من قرار الحكم حمدي
ربج وشكري لان المكان الي انلزمتي بي مو شويه
كاعد يكمل كلامه رئسا انفتحت الباب مال
المحكمه وصاح واحد من الشرطه : المتهمه مياده ثائر كاظم , ياسمين علاء خلف , ثريه عباس عبد
المحامي رئسا كال : يلا يلا كومي وتوكلي على الله وياج اني
كمت على حيلي وكلبي يدك حيل من وره الخوف والقلق والتوتر شنو راح يصير ماعرف اي شي
اباوع على ياسمين وثريه خايفات اكثر مني بس شنسوي بعد طاح الفاس بالراس
دخلنه للقاعه ووجهنه الشرطي على المصطبات الي مخصصه النه
باوعت للقاعه فارغه وبيهه صدى قوي باوعت للباب شفت المحاميين يردون يدخلون
بس الشرطه متقبل يكلولهم بعد مو هسه ادخلون
ضلينه كاعدات وحيدنه واحنه خايفات ياسمين
كالت : يمه كون تجين وتشوفين حال بتج شنو صار بيهه وشلون ادمرت
كاعده اجاوبهه جان يصيح الشرطي بأسماء المحامين ان يدخلون وبعدهه سمحوا بالدخول للمرافقين النه
دخل حنظل وحجي ناصح كعدوا ورانه التفتت الهم كال واحد من الموجودين عدم الالتفات
وعدم الكلام داخل القاعه الرجاء
ان الحفاظ على الهدوء •
نزلت راسي بالكاع واني افرك بأيديه لحظات قويه وصادمه تخلي الواحد لاراديا يشعر بالخوف
والقلق والتوتر
صار هدوء كلش رئسا هذا الي يم الباب صاح :
المتهم مطلك حسون ميثم
لاأراديا كلبي راد يطلع من مكانه حجي مطلك هنا وشيسوي ومو علساس بس احنه
اني والبنات وحده تباوع على الثانيه رئسا دخل من الباب نباوعله وجه متروم تورم من وره الكتل
ولحيته وشعره مزيني صفر اكرع كلش
كعد على المصطبه وواكف يم شرطي •
رئسا الي على الباب صاح : سيادة القاضي المحترم واعضاء الهيئه القضائيه
الشرطي الي يمنه كال اوكفوا القاضي اجه
كلنا الي بالقاعه وكفنه على حيلنه
دخل القاضي وويا اثنين يمشون بكل فخر وهم رافعين راسهم ليفوك وصل للكرسي مالته
وكال : تفضلو
رجعنه كعدنه
كمية الوجع والخوف ماعتقد اي واحد يكدر يحس بيهه
احس اكو لويه بطني وضهري احسه صار كله مي من وره العرك ومن وره الخوف الي لازمني لزوم
اباوعله شال جاكوج من خشب جان يمه ضرب بي الميز وصاح : بدأت الجلسه
المتهمه مياده ثائر كاظم وينج بابا
اشرلي الشرطي اوكف على حيلي
وكفت على حيلي وكتله : نعم اني
باوعلي ورجع باوع على الاوراق الي كدامه باوع عليهن وضل يكلب بيهن كال : يامواليد بابا
مياده : 1998
القاضي : ومكيفه ها بهيج عمر ومتواجده بأماكن مشبوهه ومنافيه للاخلاق العامه
بابا أنتي الي بكدج طالبات علم ومعرفه وثقافه وانتي اليوم متواجده هنا
نزلت دمعتي بسرعه لأن ماعرف شنو أكول وشيحجي حقه
كام المحامي وكال : سيدي ارجوا الاطلاع على كافة الملفات وكل المذكور والمرفقات تثبت ان هي
مجبوره واضافه الى ذلك الادله الطيبه تثبت وجود جريمة اغتصاب من قبل المتهم مطلك حسون
صاح بي القاضي : وانت منو شو كلبتنه حاصل فاصل
ضحك وجاوبه : سيدي المحامي زكي عطيه محامي آلانسه مياده ثائر كاظم
صاح بعلو صوته : مو تدلل يابه
نباوعله جر ورقه وكال : محامي زكي منفي من حضور الجلسه القضائيه وذلك لعدم احترام
ضوابط قاعة المحكمه
انطه الورقه للي بصفه واشرله بأيده معناهه طلعو بره ,
رئسا كام يصيح المحامي بالكوه طلعوا من القاعه النوبه القاضي صار عصبي واني الخوف صعد عندي
رجع باوعلي وكال : عندج شي تضيفي فوك كل المرفقات الي عدنه
مياده : لا سيدي بس شي قليل اني مضلومه واتمنى من القضاء العراقي ان يحكمني ويعاقبني
بكل عداله وبكل انصاف واريدك من تحكمني تعتبرني بنتك وصار وياهه المكتوب يمك بالاوراق
واختي منغوليه سيدي محلفتك بالله تلكاهه اليه
كال : من هذا الشارب ايام قليله و الامن يقضبون القاء القبض على الباقي
سكتت وكعدت رئسا رجع صاح
القاضي : المتهمه ثريه عباس عبد
كامت ثريه على حيلهه ونفس ماسويت اني لان حرفيا جان الخوف مركز علينه
اما من صاح ياسمين كامت وهزت القاعه هز وماهتمت للي راح يصيرلهه الي عدهه الاهم ان ادافع عن حقهه ووحقنه
ومن كثر صياحه العالي الي صار بالقاعه ضرب الميز بالجاكوج وكال : رفعت الجلسه
لعشرة دقائق ثم ننطق قرار الحكم
وكفنه على حيلنه الى ان طلع من القاعه هو والي ويا
رجعنه كعدنه واحنه بالكوه نتنفس صاحت ياسمين على حجي مطلك
الله يكرفك ويخلصنه من جحيمك ياكلب ابن كلب يا ابن الزنه دمرتونه وخربتونه
ماركزت بكلام ياسمين اجاني صوت من ورايه صاح : مياده مياده اني وياج
باوعت ليوره لكيت حنظل يبتسم ويسويلي علامة الانتصار
ابتسمت بوجهه لاراديا رغم الضيم والقهر •
مرت علينه عشر دقائق بلمح البصر ودخل القاضي رجعنه وكفنه الى ان كعد كعدنه ضرب الميز
بالجاكوج وكال : بدأت الجلسه
نظراً لكل الملفات المرفقه لدينا لكل من المتهمات الحاضرات مياده ثائر كاظم, وياسمين علاء خلف , وثريه عباس عبد
ونظراً لكل الادله القليله المتواجده لدينا التي تثبت ان مشاركة المتهمات بالجرائم التي فعلها المتهم مطلك حسون لم يشاركن بها ,
ونظراً للسلطه التي منحتها لنا السلطات العليا وبموجب القانون المعنون لدينا قررت المحكمه لكل من المتهمات مايلي
نستمع لقرار المحكمه وقوفاً
كلنه وكفنه على حيلنه واحنه خايفات حيل واني العرك يمشي بجسمي مشي
كال : قررت المحكمه لكل من المتهمات ياسمين علاء خلف , ثريه عباس عبد , مياده ثائر كاظم
بالحكم لمدة سبعة شهور •
و قررت المحكمه بشأن المتهم مطلك حسون بأقرار نطق الحكم بحقه في
الاسبوع القادم بتاريخ 21/7/2016
ضرب الميز بالجاكوج وكال : انتهت الجلسه •
خله وطلع ياسمين صاحت : مضلومات مضلومات ياناس معلينه ارحمونه
ثريه : مضلومات سيدي والله معلينه مجبورات
حطيت ايدي على وجهي وانهاريت بالبجي معقوله وصل بيه الحال للحبس بمدة سبعة أشهر
شلون شلون اني مياده ام الضحكه الحلوه واللعبه الحلوه هيج توصل بيه الدنيا
وخرت ايدي وشفت حجي مطلك يردون يطلعو رئسا صحت
الله لايوفقك الله يراويك جهنم وانت عايش حسبي الله حسبي الله ونعم الوكيل عليك
ياكلب يانكس الله يشوه حياتك نفس ماسويت بينه ياكلب
حنظل يصيح ويعيط بكل قوته وحجي ناصح يهدء بي تقربوا الشرطه من عدنه كلبجو ايدينه
واخذونه من القاعه مشينه بممرات المحكمه واحنه شبه ميتات
طلعنه من المحكمه وكبل بالسياره الي خلاص راح تودينه لسجن متكون من حيطان مليانه قصص
وكل قصه بيهه هم جبير بس معقوله اكو هم اكبر من قصتي مادري مادري
صعدنه بالسياره واحنه مابينه اي نفس بس الدموع تنزل على وجناتنه ونباوع للسمه
بلكت تنزل رحمة الله علينه ,
حركت السياره ومشت بينه للمهجوم •
ماعرف شكد مشينه من وكت بس جانت ساعات طويله وجان الطريق صحراوي اكثر شي
وكفت السياره اول مانزلنه منهه باوعت ليوره لكيت هواي سيارات ويانه مال شرطه
مشينه وره الضابط يوسف واني متفاجأه بالسالفه هذا ليش بكل مكان ووين ما اروح الكاه
كدامي الله يستر منه ,
اباوع للسجن كلش جبير وبي هواي مساحه فارغه
دخلنه وره الضابط ودخلنه گرفان التفتيش
وبعدهه دخلنه ليجوه تكفلتنه مفتشه سجلت
اسامينه واخذت كافة الاوراق الرسميه من ضابط يوسف واخذت توقيعنه ومشت بينه لغرفة السجن
ماجانت عباره عن حديد لا هاي المره غرفه جبيره وبيهه باب
فتحت الباب ودخلنه وحده وره الثانيه اباوع لعدد السجينات يعبرن العشره
كل وحده تصيح شكل : بالفرج انشالله
والثانيه : هلا والله حلت لمتنه
والثالثه : هلا عيوني هلا
ومشت ايامي هنا بين السجينات استلمت وجبة الريوك من منظمة السجن ام فاروق
وابد ماحسيت بنقص
حياة كلش حلوه بس ها مو كلشي نريده نحصله
مشه بيه الوكت اسبوع كامل اني بين السجينات
الى ان اجه هذا اليوم •
دخلت المفتشه وكالت : مياده ثائر وينج ماماتي
اجيتهه كالت : الج زياره ويه حنظل تردين لو لا
عقجت حواجبي وكلت بكلبي : حنظل شعده
كتلهه : اي اي اجي
كبل رحت لجربايتي اخذت شال من صديقتي ام أنس ورحت وره المفتشه سدت الباب ومشيت
وراهه طلعنه من قاعة السجينات وصلنه لغرفه كالت ادخلي خمس دقايق وبس
دخلت بسرعه لكيت حنظل كاعد ومتوتر عيونه بيهن سوالف
كام على حيله وكال : مياده شلونج كولي محتاجه شي
استغربت شفت حنظل مو طبيعي ابد
كتله :حنظل شنو صاير شو مو طبيعي شبيك
حنظل : مياده انتي تؤمنين بحكمة ربج مو
عقجت حواجبي وكتله : اكيد حنظل شنو هذا السؤال شصاير
كعد على الميز رحت وراه و كعدت كدامه بسرعه حط ايده على راسه وكال : مياده اختج للأسف
ضربت وجهي وكتله : شنو شنو
شبيهه أختي
يتبع .....
لاتنسوا التصويت والتعليق •
نلتقي بعد رمضان •
الحقيقه لم أستطيع نهاية الروايه وذلك لاحداثها الطويله المملوئه بالمغامرات والتشويق
لذلك نلتقي بعد شهر رمضان المبارك في احداث جديده ومشوقه
رمضان كريم للجميع وعساكم من عواده •
للمتابعه في الانستكرام: tahsin_luqman
خالص مودتي لكم
تحسين لقمان