| هفوات الحياة | ' باللهجة العراقية '

البارت السادس

#هفوات الحياة
#بقلم : الراوية
#البارت السادس

بسم الله الرحمن الرحيم ❤

صلوا على النبي ❤

.

زينب..

گعدت قريب المغرب.. گمت و باوعت ل مراد الي نايم بمكانه
طلعت برا للممر غسلت وجهي و بقيت واگفه بالممر
بس صوت عمتي و عمي جاي من الصالة
گلت ما عليه و لا اروح اشوفها ل عمتي

فتت للمطبخ و لگيت شهاب واگف عند الطباخ

- شدتسوي!

التفتت عليه و گال بابتسامه

- داسوي چاي..

- چان گعدتني اسويلك

- ما صار شي كملت

حچاها و صب اله بالگلاص
سند ظهره على الكاونتر و گال ورا لحظات

- صارت عركه مو؟

جريت حسرة و گلت

- لا

- بلي اكو.. لأن انتي بس من تتعاركين لو تضوجين اطولين بالنومه

ابتسمت و هزيت راسي ب اي..
هو گبل گال

- زينب اذا چانت امي او جمانه هنّ الي مزاعلاتچ اگول لأبويه و هو يعرف يتصرف

- لا شهاب على بختك.. سد الموضوع لأن ما يسوه

زفر و التفتت للباب و گال

- والله ضجت من زعلتها كل يوم و الثاني وي زوجها

- انتوا اهلها.. وين تروح

سكت لحظات و تنهد.. و اجا يطلع من المطبخ و عند الباب التفتت و گال

- لعد انتي هماتين مو عندچ اهل؟ شو ما تسوين نفسها

و طلع و تركني.. بقيت واگفه و اني اباوع للباب
و افكر بكلامه ل شهاب.. اني صدگ عندي اهل
و اذا حچيت راح يگلبون الدنيا على رأس عمتي.. ليش باقيه ساكته ل هاي اللحظه؟

تنهدت و استغفرت ربي.. گلت اصبري زينب ربچ من عالي سماه يحلها ل معضلتچ

شويت العشا و عمتي و جمانه ما ساعدني.. من اجيت اصب الامل سمعت عمي صاح بيهن
ف اجت جمانه تساعدني بس من ورا خشمها.. و هي كل شويه تخزر بيه عبالك اني گلتلها تعالي..

خليت العشا و التمينا كلنا.. شهاب چان يريد يطلعنا من الجو المتكهرب
ف گعد يشاقي و يضحك.. و صدگ گدر يغير الجو
بس بقت عمتي الي تخزر بي و مطنگره.. بس لو اعرف اني شنو مسويه الها چان ارتاحيت

فوگاها جدو ما يحاچيها.. يعني انو هو الچبير و روح تعال.. بس الحمدلله عمي چان واگف وياي بكل لحظه..

كملوا عشا و شلت الصينيه.. و ما ادري شعجب
جمانه گامت سوت الچاي بدون محد يگوللها او يطلب منها..

فتت للغرفة و شوية دخل مراد. بصراحه تجاهلته
لأن بعدني ضايجه من ردة فعله البارده ناحية جمانه
گعد بصفي و باوعلي ثواني.. قبل لا يلزم ايدي و يگول بنبرة خافته

- زنوبة عموي

تنهدت و گلت

- ها

- باعي.. تعرفيني اني ما احب مشاكل النسوان
و ما احب ادخل بيهن.. بس مو معناتها اني ما احچي و ما اعرف شنو المشكله

كلامه كلش استفزني.. التفتت عليه و گلت

- مراد.. اني عمري محد مد ايده عليه
تجي جمانه و تسحبني من شعري

عگد حاجبه و گال

- ضربتچ !!

ابتسمت بسخرية و گلت

- يعني اذا ضربتني راح ادافع عني؟

- اكيد غير انتي مرتي.. بس گوليلي ضربتچ

- لا ما ضربتني.. بس حچت عليه و سحبتني من شعري

ضرب على افخاذه.. و گام على حيله و طلع
ما گلتله تعال لو ماكو داعي ارجع.. بقيت ساكته
حتى أشوف راح يكمب دفاعه عني
يرجعلي حقي و كرامتي

فد عشر دقايق و فات هو و مبينه العصبيه على ملامحه.. رجع ل مكانه و گال

- سبحان الله شگد عينها صلافه و وقحه

ما جاوبته.. لان هالشي مو جديد عليه
تنهد و رجع گال

- حچيت وياها.. ف الموضوع انسد

- ان شاء الله

حچيت كلمتي..و هو باوعلي باستغراب و گال

- زينب ليش أحسچ مو مقتنعه بكلامي

- لا استغفر الله.. ليش هيچ تحس

ختمت كلمتي..و گمت للكنتور ارتب بالملابس
الي اصلاً هنّ مترتبات.. بس ردت اي شي يلهيني و نا احچي وي مراد لأن هسا ضايجه و واصله مرحله يمكن انفجر بيها
ورا وين اندگ الباب
گال مراد اتفضل.. و فات شهاب و هو شايل علاگة حلويات
هو چان برا طلع ورا العشا گبل

تحمحم و گال

- جبت حلويات..خلي نتعلل بيها

ابتسمت و گلت

- بوكتهن والله
اروح اجيت مواعين و اجي

فات هو و اني طلعت.. جبت صحون و گلاصات لأن شفت جايب عصير
لمحت جدو نايم
و عمتي و عمي بغرفتهم.. و بس جمانه هي و أولادها بالصالة

رجعت لغرفتي.. و گعدنا احنا و شهاب
ما بينت گدامه انو اني ضايجه من مراد.. بالعكس گعدت بصفه و احچي وياه و حتى هو استغرب

شهاب چان يعرف بيه شي بس ما حسباله وي مراد.. ف اجا و گام يضحك بيه و يشاقيني..

گعدنا ناكل الحلويات.. و بال12 تقريباً تمدد شهاب على الچربايه و هو يسوي نفسه نايم

گمت اضحك و اني اخلي ايدي على شفتي من مراد يطرد شهاب و الثاني ما يرد يسوي نفسه نايم بسابع نومه
اخر شي صاح بي مراد و ما حسينا الا شهاب طاير من مكانه.. و دعم الگلاصات و الحمدلله الله ستر و ما تكسرن و اني خربانه من الضحك عليه
سد مراد الباب و اني محيت ضحكتي بس كل ما ارجع اتذكر شكل شهاب ارجع ابتسم

گعد بصفي مراد و اني التفتت اله من گال

- ما طول هلگد شهاب يضحك راح اخليه يشتغل قرقوز عندچ

- شهاب روحه حلوه.. بس مو معناتها انو مهرج

ابتسم و هو يگول

- ما ترضين احد يحچي عليه ؟

تنهدت و گلت

- اخوية.. و ماكو اخت ترضى احد يحچي على اخوها

بقى مراد يباوعلي و ابتسامه ناعمه على ملامحه.. اخر مسح على خدي بايده بلطف و ورا لحظات وخر و گال

- كلش نعست.. راح انام

هزيت راسي ب اي.. و گمت شلت المواعين للمطبخ و اكياس الحلويات
غسلت الصحون و رجعت للغرفة..بدلت ملابسي ل دشداشة نوم و مراد فتح الغطا و صاحلي حتى انام بحظنه.. بالأول ترددت بس بعدين استسلمت

و اني اطفي الضوء و مددت بحظنه.. و هو حظني من خصري و مسح على بطني بكف ايده و هو يگول

- شوكت يجي اليوم الي يجي بي ابنا ؟

- ما بقى شي بس أربعة أشهر

- والله مدة طويله

- غمض عين و فتح عين راح تلگه ابنا بحظنك

باسني من شعري و هو يگول بنبرة خافته

- ان شاء الله عمري ان شاء الله

الصبح گعدت و سويت الريوگ.. گعدوا العائلة
و مراد تريگ و سلم و راح للدوام.. و وراه شهاب

عمي من طلع من المطبخ گال و هو يأشر على عمتي..

- ام مراد اليوم مشتهي غدا من جوه ايدچ

شو بس گال هيچ عمتي طنگرت..اني بالأول ما افتهمت شنو يقصد.. حسبالي صدگ يريد ياكل شي من طبخها

بس من گمت اغسل بالمواعين و انظف بالمطبخ
اباوعلها شلون بدت ادردم و هي مرة تباوع عليه و تهز براسها

كملت عمتي الغدا.. بوكتها سوت مرگة تبسي
باوعت ما مسويه تمن.. ف گمت سويت اني..
عمي راد غدا ف صبيت الهم غدا.. و جمانة متربعه و گاعده ما ساعدتني الا صاح بيها عمي يلا گامت

امشي و هي تمشي ورايه و اسمعها تحچي عليه
و تگول طفله و مشت ابويه على مزاجها

ما حچيت و غلست.. و تحسبت

تغدينا و كملنا.. و رجع شهاب العصر.. گلتله تريد غدا گال لا مو جوعان

ورا العشا اندگ الباب.. چان زوج جمانة و حماتها و عمها

فاتوا للصالة.. و هي ما قبلت تدخل تسلم عليهم.. ف اجا عليه شهاب گال سوي ضيافة
على السريع سويت و انطيته اله
و هو أخذه و فات الهم..

اني رحت گعدت بغرفتي.. و لحظات و صار صوتهم عالي.. گلت ما اطلع خليني بغرفتي گاعده احسن

ورا ربع ساعة او يمكن اكثر.. فات مراد و هو يستغفر ربه و يهز راسه بقلة حيله

- مراد شبيك

سالته و هو التفت عليه و گال بتنهيده

- شبيه ؟ يعني ما سمعتي صوت جمانة العالي
الحمدلله رجبها أخذها و خلصنا من صياحها

كمل و هو يگعد بصفي على التخت

- والله لو غير رجال على صياحها و صلافتها فلا يرجعها.. بس شيسوي ما يريد يفرط باطفاله

بقيت ساكته لحظات قبل لا اتقرب اله و اگول بهدوء

- مراد

- ها عمري

حچاها و التفت الي و اني احچي بتردد

- يعني اذا اجا يوم و صار صوتي عالي عليك
هماتين تزعل مني و تطردين لأهلي؟

حاوط وجهي بيديه اثنينهن و گال

- لا يعمري ماكو اب يزعل من بنته.. و بعدين اني اعرف انتي شنو ف ما راح يجي هاليوم

ابتسمت و نسيت كل زعلتي من عنده و اني تقرب اله و احظنه.. و هو بالأول تفاجئ بس بعدين طوق خصري بيديه و هو يگول بنبرة خافته

- الله يقدرني و أسعدچ و ما اخليچ محتاجه شي ما طول خشمي يشم الهوا

حظنته اكثر.. و اني بداخلي اگول
اعرف عمرك ما راح تتركني لو تترك ايدي.. لأن انت سندي بهالدنيا

ما چنت اعرف انو يجي هاليوم الي راح يتخلى عني بسهوله..

مرت ايام و راحت ايام.. و دخلت بالشهر السابع
چنت يوم عن يوم يزيد تعبي اكثر
اضعف اكثر.. و حملي يتعبني اكثر..

عمتي گلت بلكتن من تشوف حالتي تحن عليه.. بس لا والله بالعكس زادت تصرفاتها.. و زاد كرهها الي الغير مبرر.. و كالعاده مراد چان يسكت و ما يحچي شي

لدرجه بديت اضوج منه.. و انقهر بالزايد
اسمع النساوين شلون تگول رجلي يدافع عني.. محد يگدر يقلل من قيمتي بوجوده.. و انهضم و انقهر
و اگول مراد ليش مو مثلهم ؟ مراد ليش ما يوگف والدته عند حدها.. اني زوجته و ام ابنه

چنت اسكت و ما اگوللها ليش يا عمه هيچ تسوين بيه.. و اني انتظر مراد يتحرك و يبدي ردة فعل
صح مرات احس نفسي مظلومه بهالبيت.. و خصوصاً من قبل عمتي.. و برود مراد ناحية الاهانات الي اتلقاها.. بس عمي و شهاب اكدوا انو اني مو وحدي.. انو اي صدگ عندي سند و الي هما..

كالعاده ورا ما خلصت تنظيف البيت و هوسة الريوگ.. عمي طلع للسوگ

و من رجع چان جايب علاگة بيها سمچ و طلعت وحده خربانه گال هاي للبزونه مالتنا

بوقتها چانت عدنا بزونه بعدها مو كلش چبيره.. توگف عند باب المطبخ و اخلي گدامها عظام الدجاج و هي ما تفوت للبيت لأن هيچ متعوده

عمي خلا السمچ بالمطبخ و دخل غير ملابسه..گال اليوم معزوم عند صاحبي.. و راح گعد بالصالة لأن بعد وكت

التفتت ل عمتي الي گالت بنبرة أمر

- باعي.. گصي راس الخربانه من تنضيفنه حتى اعرفها

هزيت راسي ب اي و ما حچيت.. هي سوت الغدا و كملته
مراد چان بالدوام..و شهاب دوامه صباحي
اجا و غير ملابسه و گال ترا جوعان

صبيت الغدا.. و من حتى نگعد نتغدا عمتي خلت گدامي صجنغ.. باوعت چان بيها سمچه
گبا نزلت دموعي و اني اباوع للسمچه الخربانه.. شهاب ما انتبه خطيه گعد يتغدا
باوعتله بعتب.. و هي التفتت عني و كملت غداها
جدو ملتيه ياكل..

عمي چان گاعد يم جدو.. لأن ما راح
من اجا يروح شغل السيارة و گال تخربط.. اخاف تروح توگف بالطريق

اني چنت مدنگه و محد منتبه الي.. و ما خليت لگنة بحلگي بس القهر اكلني اكل..
رفعت راسي فجاة من عمي گال

- خليتن السمچه الخربانه للبزونه

گلت هسا تگول اي خليناها..بس هي ما نكرت
و بعين صلفة گالت و هي تلتفت عليه

- لا هيانها گدام زينب

حچت هيچ.. و ما حسينا على عمي صار بركان ثائر
گام يحچي عليها و هو يوگف على طوله

- شهل الظلم يا مرة.. ربچ باي نار راح يذبچ
ماكله من خيرچ هااا احچي ليش سكتي

عمتي ما نطقت اي حرف.. و هي تكتف ايديها گدام صدرها ما عبالك عمي شطوله يرزل بيها گدامنا

- بس اريد اعرف من فلوسچ !! شو اني و رجلها نجيب هالمسواگ و نصرف على البيت..بس ما اگول غير حسبي الله ونعم الوكيل بيچ

حچها و دنگ اخذ صحنها و طلع
اني بقيت بمكاني گاعده و دموعي توگع
رجع ذب الصحن گدامها و گال

- خليته للحيوانه لأن بيها اجر اكثر منچ

و سحبني من ايدي على الخفيف و اخذني للغرفة مالتي.. خلاني اگعد على الچربايه و گال

- ابقي هنا.. هسا اجي

هزيت راسي ب اي و ما حچيت حرف.. بقيت گاعده و اني اشهگ و ابچي
ما توقعت راح تتصرف هيچ وياي.. اريد احاول اعرف بشنو اذيتها چان ارتاحيت
لا خليت عمي و لا مراد ينقلبون عليها.. عمي من زمان هاي تصرفاته وياها لأن تمشي اعوج
اما مراد ف ما تغير شو تهيني و تسمعني حچي و هو ما يحچي حچايه وحده

اندگ الباب و دخل شهاب.. و هو يبتسم عگدت حاجبي من گال

- باعي هي صدگ امي بس والله ابويه ما ينلام بيها

گعد على المندر بالگاع و گال من شافني ساكته

- وين ابويه !

- ما ادري

حچيتها بخنگه و هو سكت لحظات قبل لا يگول

- زينب...لا تبقين ساكته
احچي ل مراد كلشي

باوعتله و گلت

- يعني هو على اساس ما يشوف امك شنو تسوي بيه !

بقى ساكت و اني بقهر گلت

- مراد لو يريد يدافع عني چان من اول اهانه وجهتها الي عمتي وگفها عند حدها

- ما يهون عليه زعلها

- لعد اني مو مرته ! و ام ابنه ليش ما يهون عليه زعلي و قهري

سكت شهاب و ما عرف شنو يگول..
دقايق و فات عمي و هو شايل علاگة
خلاها بالگاع و فتح الكيس.. چان جايب سمچه مشويه

- هلا والله شهل الدلال.. هذا اكيد الي

حچاها شهاب و هو باوعلي و گال

- هاي ل زنوبه.. يلا بنتي تعالي اكلي و اذا ما اكلتي والله ازعل منچ

ابتسمت و نزلت من الچربايه.. نفسي انسدت من بعد كلام عمتي بس عناد بيها گلت الا اكل

التيمنا اني و عمي و شهاب.. گعدوا يسولفون و ما تطرقوا ابداً ل موضوع عمتي
لأن عرفوا انو راح انغث و اضوج..

ما خلينا بيها شي بس السنون. و كل ما اريد اگوم عمي يگول اگعدي.. اخذت الصحن حتى اذبه بسلة الزبل و دخلت للمطبخ

باوعت المواعين عمتي ذابتهن على السنگ.. رفعت أكمام دشداشتي و گمت اغسل بالصحون
سويت چاي و انطيت ل جدي و عمو و شهاب
و هي چانت نايمه بغرفتها

العصر رجع مراد من الشغل.. ما فتحت الموضوع گدامه گلت اذا حچيت او لا نفس الشي ما راح يسوي اي شي.. ف سكتت و گلت عمي اخذلي حقي..

سويت العشا و خطية شهاب من شافني واگفه وحدي اجا و گام يساعد بيه.. صح مو كلشي يعرف بس على گد المساعده..
چنت اغسل بالطماطه و الخيار حتى اسوي زلاطه.. اجا مراد و وگف بصفي و گال بصوت ناصي

- زينب.. ترا ابويه حچه ل مراد على سالفة امي

تنهدت و گلت بعدم اهتمام

- حتلو ما راح يحچي وياها

ابتسم و گال

- اني و ابويه اندافع عنچ هذا كافي مو ؟

التفتت اله و گلت بابتسامه صادقه

- ربي ما يحرمني منكم..

ابتسم و رجع يخلي الاكل بالصحون..
كملنا عشا و ما ردت اگعد يمهم و اشوف عمتي
ف فتت لغرفتي.. اخذت ملابسي و فتت للحمام
سبحت و طلعت گعدت گدام المراية و اني امشط شعري
انفتح الباب و دخل مراد.. باوعتله و رجعت اباوع للمراية و اني امشط بي
هو وگف ورايه و سحب المشط من ايدي و گعد يمشط الي و اني ساكته.. لأن هو متعود على هالشي

كمل و خلاني التفت اله و گال بنبرة خافته

- زينب انتي ما ظامه عليه شي مو؟

عرفته يقصد على سالفة عمتي.. و ما انطيته الجواب الي يريده و گلت

- لا مراد.. كلشي ما ظامه

- متأكده؟

هزيت راسي ب اي.. و رحت للفراش و هو طفى الضوء و غير ملابسه و اجا نام بصفي
و سحبني ل حظنه چان ظهري على صدره سمعته يتنهد و اني صافنه بالحايط

دقايق مرت و گلت يمكن نام بيها.. بس تفاجأت من گال

- ابويه حچالي شنو سوت امي الظهر

- عادي تعودت

حچيتها ببرود.. و باوعتله من رفع نفسه شويه و گال

- شنو زينب؟

- ماكو شي حبيبي.. نعسانه اريد انام

رجعت مددت و هو بقى ثواني يباوعلي و ساكت
قبل لا يرجع يخلي راسه على المخده و هو يتنهد.. شكله ضاج من حچايتي
دست على نفسي و ما التفتت و بررت اله كلامي.. ف كل الي سويته غمضت عيوني و نمت

الصبح گعدت و سويت ريوگ شلون ما كان..من شبع مراد و اجا يروح للدوام گلت

- مراد.. تگدر تاخذني لأهلي؟

حچيتها و هو باوعلي و حسيته استغرب

-ليشش عيني ؟ مو هذاك الاسبوع چنتي عدهم

وصلني صوت عمتي.. باوعت ل مراد الي گال

- خوما صاير شي

- لا ما صاير.. بس اشتاقيت الهم

عمتي من شافت عمي مو موجود.. و هي تعرف انو مراد ما راح يبدي موقف ف گالت بشبه عصبيه

- والله كل كم يوم اشتاقيت الهم و جاره ابني و رايحه لأهلچ و تعالي يا سميه ابتلي بالبيت و شغله
ف ماكو روحه عود الاسبوع الجاي روحي و ان شاء الله ما ترجعين

عضيت شفتي و اني اكتم دمعتي
و عمتي طلعت و هي ادردم و مراد صنم و واگف حتى ما كلف نفسه يحچي و يگول كلمه

جريت حسرة و التفت للسنگ و اني اكمل الصحون غسل..
مراد تقدم و اجا وگف بصفي و گال

- زينب لا تزعلين العصر اخذچ وداعتچ

- مراد روح لشغلك هسا تتأخر

حچيتها و هو زفر و طلع.. قبل لا يسلم على السريع

تركت الگلاص من ايدي.. اني اگرمز و أسند ظهري على الكاونتر.. استغفرت ربي و اني امد ايدي و امسح خدي

حسيت نفسي شوية ارتاحيت.. و گمت كملت شغلي
بس بطني گامت توجعني و ظهري هماتين
بي دست على نفسي و تحملت.. ما بيه حيل رزايل عمتي و حچيها الي راح يغثني

بقيت للظهر اني بالمطبخ و عمتي ما شفتها.. اجا شهاب من الدوام
و فات من باب المطبخ.. ابتسمت من لمحت علاگة الحلويات الي شايلهن بيده
سلم عليه و انطانياهن و گال

- الله يساعدچ زنوبة

- و يساعدك شهاب.. ترا كلفت نفسك

- لا كلفت نفسي و لا هم يحزنون.. اني جايب الحلويات الچ و لأبن اخويه

- ما تقصر ربي يحفظك

- تسلمين خيتي انتي

حچاها و التفتت للجداري و گعد يشوف شنو طابخه
بوكتها سويت مركة و تمن على شعيره
خطية هو جوعان
ف بس كمل الغدا صبيت و التمينا كلنا

- اگول شهاب.. شنو هاي العلاگة الي شايلها من فتت

تسألت عمتي و شهاب بهدوء جاوبها

- حلويات ل زنوبة و ابنها

- يعني ابوك ينطيك فلوس لمصروفك و انت تبذره على الخانم

- عادي تتدلل.. كم زنوبة عدنا

تركت الخاشوگه من ايدي و نفسي انسدت من كلام عمتي.. بس شهاب ما انطاها مجال گبل رد عليها ب كلام خلاني احس صدگ هو أخوية و سندي بهاي الدنيا

التفتت اله و هو چان گاعد بصفي و گال..

- اكلي زنوبة.. غذي نفسچ و الطفل

حچاها و هو ياخذ لحمة الصدر و يخليها گدامي
و عمتي تباوع بطرف عينها..

العصر اجا مراد.. و من سلم و فات للغرفة گال و اني گاعده على الچربايه

- تروحين لأهلچ..حتى اوصلچ

- لا ما اروح.. شوية تعبانه
و انت توي جاي من الشغل

اجا گعد بصفي و لزم ايدي و گال

- ضجتي من كلام امي ؟

- لا..

جاوبته باختصار و هو تنهد.. حاوط اكتافي و باسني من راسي و گال

-زينب.. اصبري و تحملي ل خاطري
والله ما بيدي شي اسويه.. هاي امي و هذا طبعها

- هو اني متحمله لخاطرك و خاطر ابني..

من حچيت هيچ وخرني شويه عنه و حظن وجهي بيديه اثنينهن و گال

- ربي يحفظچ الي.. بس رب العالمين بعرف غلاتچ عندي..

ابتسمت و هزيت راسي ب اي.. و مثل كل مرة انسى كلشي بلمسه و كلمه منه و هو يطمني انو المستقبل احلى..

المستقبل الي وعدني بي.. چنت اخطط اله
گلت يمكن فترة و يقتنع و نطلع بيت وحدنا.. اثثه شلون ما أحلم
غرفة النا..و بيها بالزاوية سرير صغير لطفلنا.. حتلو بيت صغير بس راح يكون مليان حب و حنيه.. اريد اربي أطفالي مثل ما ربوني اهلي
اريده يطلع يشبه مراد.. و بنفس حنيته عليه.. و اريده يكون صبور مثلي.. عمتي تحن عليه و تصير زينه وياي.. نگعد اني وياها مثل البنت و امها
تلزم اولادي و اولاد مراد و تلاعب بيهم و تغرگهم بالحنيه

چنت احلم و أحلامي يوم ورا يوم يموت حلم منهم..
و ما عزلنا وحدنا.. و لا حن گلب عمتي عليه
يوم ورا يون ادعي و ابچي على سجادتي انو الحال ينصلح و يتعدل...

چنت اتحمل و اگول تهون.. الشغل كله عليه تنظيف البيت
من غير الطبخ و الخبز.. و عمتي صارت عبالك كنه جديده.. مثل العروس گلاص مي ما تجيبه ل نفسها..
بس تغسل ملابسها و ملابس شهاب و عمي

كله براسي.. حتى گمت انظف غرفة جدي و اغسل ملابسه..

لميت شعري الي طول و بدا يضوجني.. و اريد اگصه
بي وين مراد ما يخليني.. بيوم چانت عدنا حماتي الوسطانيه اسمها ريتاج
بنيه حبابه و مو مثل امها و اختها الچبيره جمانه..
چانت تحس بيه و تعرف شلون ظيم اسود شايفه عند عمتي.. بس ما بيدها شي هي متزوجه
و تزوجت تقريباً بعمر ال14 سنة.. بس حتى تخلص من قهر امها..

چنت اني وياها واگفات بالمطبخ.. خطيه توگف تساعدني
عكس اختها و امها.. اني صح اطبخ بس مرات اخرب
لأن طول عمري بيت اهلي ما چنت اطبخ شي كله على امي.. و فجاة من تزوجت كلشي صار على راسي..بس بعد عيني عمي يگعد يمدح بيه
و اني اخجل لأن مرات حتلو الاكله مو طيبه يمدحها و يسويها تجنن.. عكس عمتي الي تگعد ترزل بيه

التفتت ل ريتاج الي گالت

- زينب ما تگصين شعرچ.. اشوفه يضوجچ

تنهدت و گلت

- ما يقبل مراد.. رغم يشوفني مضوجني.. و اني راسي يبقى يوجعني و حتى شعري گمت ما اتحمله

- الله يعينيچ.. مجربه هالشعور ابني الچبير هماتين من الحمل راسي احسه راح ينفجر
بس گصي من عنده حتلو شبر

- ريتاج داگلچ ما يقبل.. يگول تگصين راسي و لا تگصين شعرچ.. و والله شنو من انام اتلفلف بيه

هي ضحكت و گالت

- لعد ما طول يحبه مراد لا تگصينه

- بس والله يضوج.. باعي شوية و نروح نگعد يمه
و اني احچي و اگله اگصه.. و انتي صيري واسطه

- خوش عيوني.. مع اني متأكده ما راح يقبل

- لا عفيه.. بلكتن يقتنع

ختمت كلامي.. و صاحت عمتي

- يلا وين عشاچن

ضحكت ريتاج و گالت

- هسا تجينا امي.. يلا خلي نخف ايدينا

ابتسمتلها و على السريع كملنا صبينا العشا.. و كالعاده المل يضحك و يبتسم الا عمتي
مطنگره و ضايجه

ورا ما كملنا عشا ناديت ريتاج لغرفتي.. چان مراد هنا
گعدنا و نسولف بعدين سكتت لحظات و گلت

- مراد

- همم

همم و هو متمدد على صفحته و مخليه المخده جوه ايده..باوعت ل ريتاج الي رفعت حاجبها يعني احچي يلا

- مراد خلي اگص شعري

سكت لحظات و طول.. اخر شي هز راسه و گال

- عود من اموت گصيه

اني و ريتاج اثنينه گلنا اسم الله عليك
و هو بقى ساكت.. و اني ضجت و گمت لان من اسمع بطاري الموت اختنگ و اضوج..و اتذكر اخويه

طلعت من الغرفة و تركت حماتي عنده
رحت گعدت بالصالة و من سألني عمي وين مراد و ريتاج گلتله جوه هسا يجون..

دقايق و طلعت.. هي گعدت بصفي و ملت عليها و گلت

- هاا شگال

ابتسمت و گالت بصوت ناصي

- رجلچ قافل.. حچيت وياه و منا و منا بس بالاخير يسدها بوجهي و ما گدرت اقنعه

زفرت بقهر و هي ضحكت و رجعت گالت بنفس النبرة

- يگول شلون تگصه.. عمري ما شايف نفس شعرها
اتلفلف بي و انام

ابتسمت و هو ضحكت و گالت بشقة

- صحيح يتلفلف بي و ينام

- ما تعرفين سوالف اخوچ

ضحكت باخر كلامي.. و هي رجعت گالت و ابتسامه على وجهها

- والله حچيت وياه.. و گلتله ديتعبچ و راسچ من ورا نساوتچ و حملچ ديتعبچ لأن ثگيل.. و هو گال اني اغسله الها و امشطه بس لا تفكر اگصه

تنهدت و بقيت ساكته.. يعني قافل من صدگ
بوقتها من صدگ زعلت.. حسيت مراد اناني
و ما فكر بيه و بوجع راسي.. بس المهم يتلفلف و ينام.. هنا ابتسمت و اني احاول ارجع اخذ موقف منه.. بس مو بيدي احبه و ما اگدر اتخيل الدنيا من دونه

من فتنا ل غرفنا حتى نام.. چنت گاعده على الچرباسه و هو گعد بصفي لزم شعري و گال

- زينب.. شتريدين يجرالچ بس شعرچ مو بس خط احمر لا منطقه حمراء بحالها..
اذا گصيتي شعرچ ف معناتها گصيتي گلبي

سكتت و ما جادلته.. لأن اقتنعت انو شنو يصير ما راح يغير راييه.. رجع تنهد و گال

- زينب جمال المرأة بشعرها.. ف لا تگصينه زين ؟ لأن والله من كل عقلي احب شعرچ هواي

ابتسمت و هزيت راسي ب اي.. و هو حظني و رجع گال

- اعرف يضوجچ بالشغل و اذا اجونا خطار من غير شغل البيت و ما تلحگين تحكين راسچ..بس من يوم و رايح اني اغسله و امشطه زين ؟

- زين

حچيتها بخفوت و هو باسني من راسي و گال

- الله يحفظچ الي يا عمري انتي

بقيت ساكته و ابتسامه ناعمه على وجهي.. چنت اظن انو كلامه انو هو يغسله و يمشطه هيچ مجرد كلام لا أكثر

بس الصبح من گعدنا چان يوم جمعة.. دخلت حتى اسبح و هو على غفله فات وياي.. فتحت عيوني و گلت

- مراد شبيك.. اطلع هسا احد يشوفنا

ابتسم و هو يحاوط وجهي و گال

- ترا انتي مرتي.. و اذا شافونا سوية

استحيت منه من گال

- يلا عمري على السريع حتى اغسل الچ شعرچ
حسبالچ كلامي ما احققه

و صدگ حققه غسل شعري و هو يدندن بنبرة خافته.. حسيت نفسي طفله و هو يغسلي شعري و يگول غمضي عيونچ لا يدخل بعينچ شامبو

كملت و من فتحنا الباب حتى نطلع.. صار عمي بوجهنا
تمنيت الگاع تنشگ و تبلعني من ضحك عمي و هو يگول

- عفيه ابني خليك ذيب

حچاها عني و مراد گام يضحك.. تفشلت و استحيت
طبيت للغرفة و تركتهم يضحكون عليه..

مرت ايام و نفس الحال.. مراد ما يقبل الا يغسلي شعري و يدخل وياي للحمام
بديت اضوج لأن منا عمتي تخزر بينا و الوضع مو عاجبها.. لأن الحمام بالممر و مشترك وي الكل
اما عمي ف يگعد يشاقينا

بس مره چان مراد بالشغل.. چنت واگفه بالمطبخ الظهر
فات عمي و وگف يمي و گعد يسولف وياي..
وراها سكتت لحظات و گلت بتردد و خجل

- عمي ترا والله مرات اخجل منك

هو گبل ضحك و عرف قصدي.. قرصني من خدي بلطف و گال

- زنوبه ترا ما بيها شي بالعكس هالشي من الزينات.. اذا ما عشتوا هاي اللحظات هسا بشبابكم
خوما تعيشوها من تصيرون شياب مثل حالي

ابتسمت و هو اردف و ايده تمسح على شعري

- احنا اهلچ و اهله..ف ماكو داعي للتقيد
و خلي مراد ياخذ راحته و لا تضوجينه و تصيقين خلگه

حچاها و رجع تقرب و گال بضحكه

- مو وياه مدرسات اخاف يروح ينحرف

فتحت عيوني على وسعهن و گلبي گام يلعب.. عود صدگ مراد يسويها ؟
بس لا.. مراد مو هيچ.

طبطب على كتفي و گال

- لا تخافين ترا مراد يحبچ و ما يبدلچ بكنوز الدنيا
ف اني اگلچ هيچ حتى اديرين بالچ

هزيت راسي ب اي و كلام عمي خلاني اغير رأيي

دخلت بالشهر التاسع.. و بدت التقلصات تزيد
و وجع بطني ما بطل.. عمتي نفس الحال
ما تساعدني الا عمي يصيج بيها و يگول ساعدي هالمسكينه

امي مرات تجي عليه.. و احس الوضع مو عاجبها
من تشوفني و شلون تعبانه.. اشوف بعيونها دمعه و شكلها متندمه على قرارها.. بس اني ارجع اطمنها

بيوم الدنيا ظهر.. واگفه عند الطباخ
حسيت بوجع اسفل بطني.. بالأول ما اهتميت
بس الوجع زاد اكثر.. تركت البيدي و خليت ايدي على بطني

گامت توجعني اكثر.. گمت ابچي و طلعت ل عمي الگاعد بالصالة.. وگفت يم الباب و اني أسند ايدي عليه و گلت ببچي

- عمي بطني توجعني

گام على حيله بقلق و گال

- بنتي شجاج

- يمكن راح تولد

حچتها عمتي و گامت همين.. عمي على السريع گال

- امشي للمستشفى

ما ادري شلون طلعت حجابي و عبايتي و طلعنا للسيارة..
احس روحي طلعت من الوجع.. من وصلنا للمستشفى رحنا للدكتوره و گالت عندچ ولاده بس تتأخر

گالوا اخذوها و المغرب ارجعوا

رجعنا بالطريق.. و عمي يطمن بيه
وصلنا للبيت.. و اتصلنا بأهلي
ربع ساعة و اجوا ابويه و امي.. بس شفت امي گمت ابچي وهي اطمن بيه حظنتني و تگول كلشي سهل بس لا تخافين

ما صدگت علما صارت الدنيا مغرب.. بوكتها من اجا مراد و شافني
حسيته شوية و يبچي.. توترت و خاف و هو لازم ايدي و يحچي وياي.. رجعوني للمستشفى و ايد لازمها مراد و ايد ابويه

من وصلنا هناك و فحصتني الدكتوره گالت ماكو ولاده.. باچر تعالوا.. عصب مراد بس عمي سكته
و رجعنا للبيت ابچي خايفه و ابچي من الوجع
مراد خطية ما تركني.. و حماتي هناء ويانا
هاي مو مثل ريتاج.. صح مرات تشبه اطباع امها بس سكوتيه و ما تتدخل

الليل كله اون و بطني توجعني.. امي نامت يمي بالغرفة و هي تسكت بيه.. الصبح بال7 تحظرت و رجعنا للمستشفى و نفس كلامهم البارحه

گمت بس اريد اخلص و اولد.. لأن ما متحمله الوجع
عمتي شوية سكتت عني و هي تشوفني بهالحال.. و مرات تصيح و تگول كافي بچي بعدچ ما ولدتي..

بقينا يومين.. و ثالث يوم رجعنا للمستشفى
گالوا اكو ولاده بس شوية تتأخر انتظروا.. الحمدلله ما رجعونا للبيت چان انجلطت
جدي خطيه اجا ويايه.. و عمي و عمتي و اهلي و مراد
و شهاب اصر يجي هماتين... گال ما اعوف اختي بهاليوم.. اجيت ل بابا و گلتله خلي عمتي تجي
و خطية هي ما صدگت گبل اجت

خلولي مغذي و اني ابچي من چكت الابره.. ما چنت اعرف انو اكو وجع اكبر منها و هي الاولاده

عمامي اثنين اجوا الصغير و الوسطاني.. و جايبين بيبي وياهم
بالممر گاعده و اني اتلوى من الوجع.. امي يمي و تبجي و تباوعلي..
عمري 13 سنة و نص.. و اني شفت هذا الم الي ما ينحمل و الي كل عمري ما حاسه بهيچ وجع

الدنيا مغرب.. و اني گاعده و مراد بصفي لازم ايدي.. انداريت عليه و گلت

- مراد.. خلي ابو امين  صديق عمو يجي

- زنوبة شنسوي بابو امين ؟

- الله يخليك مراد خلي يجي
هالرجال صاحب بخت.. بلكي من يجي اولد

ما عارض و گام گال ل عمي الي ما اعترض
راح حتى يجيبه

و خطيه هو اجا من شافني گعد يدعيلي انو اجيب و اگوم بالسلامه.. چنت اظن اذا اجوا كلهم راح يخف الالم لو اجيب بسرعة.. چنت ما اريد اكون وحدي بهذا الموقف.. أريدهم كلهم حواليه

چانت اكو مرة چبيره بالعمر گاعده يمنا.. لأن زوجة ابنها بالولاده
من شافت الناس الي اجت وياي گالت و هي ترفع حاجبها

- عزا العزاچ صدگ چذب.. هلگدوتچ و مليتي المستشفى.. ما خليتي لا صغير و لا چبير ما احا ل خاطرچ.. ناقص بس الشيخ ما اجا و البيارغ و الهوسات الي يشوفچ يگول راح تخلفين ولي العهد

گمت ابچي و هي هزت ايدها.. امي گالتلها

-بنتي و وحيدتي.. و رجاءاً التهي بمريضتچ

و هي گبل سكتت بس اباوعلها شلون ادردم.. اريد اعرف شبيهن العجايز وياي ماكله حلالهن..

قريب الأذان حسيت بطلوگه.. و اجت السسترات و اخذني و گالوا قربت الولاده

دخلوني لصالة الولاده و اني ابچي اريد امي لو مراد
تمددت على السدية و اجت سستر و هي تگول

- سهله سهله

رفعت دشداشتي و هي ترجع تگول يلا بنتي سهل كلشي سهل

كلشي چنت اتوقع بس الألم و الوجع ما چنت اتوقعه.. لحظات تمنيت انو ما صرت حامل احس جسمي كله تكسر.. ولادتي صعبه و كلش
اسمع وحده من الممرضات تگول نسويلها عمليه و الستتر المسؤله تگول ماكو داعي.. شفت الظيم الأحمر
ابچي و من بين صرخاتي اصيح امي لو مراد
اريدهم يوگفون يمي على الاقل شوية تصير عندي طاقة.. ما اعرف شگد مر وقت و اني بصالة الولاده
و من بين صرخاتي العاليه و المبحوحه.. وصلني صرخات اخفت و أقوى حده

حسيت بارتخاء جسمي.. و الرؤية صارت مغوشه..احس جسدي كله مبلل و راحة دم.. گمت اصارع عيوني حتى ما تنطبق وحده على الثانيه
بس بالاخير غمضتهن و اخر شي شفته هي الستتر من شايله قطعة حمره ما واضحه

.

السلام عليكم ورحمة الله وبركاته ❤️

شلونكم حبايب قلبي❤️❤️

ان شاء الله الكل بخير♥️🌹

اولاً اني اعتذر كلش والله على التأخير الصار
بس والله ما چنت بالبيت.. طالعه ل غير مدينه
و ما عندي نت متواصل ف ما كدرت اكتب شي... اليوم العصر اجيت و على السريع كتبت و گلت لازم انشر لأن تأخرت هووااي

طبعا اتمنى البارت عجبكم

و شنو توقعاتكم و ارائكم ؟

و يا ترى عمتها ل زينب تحن و تتعدل ورا ولادة زينب لابنها لو تبقى على حالها ؟؟ 😒

و بس والله ما عندي اسأله 🙏😂

راح انشر ورا هذا البارت صور تشبيهيه للأبطال 😁♥️ ف انتظروني 😍🙏