| هفوات الحياة | ' باللهجة العراقية '

البارت الخامس

#هفوات الحياة
#بقلم : الراوية
#البارت الخامس

بسم الله الرحمن الرحيم ❤

صلوا على النبي ❤

.

زينب..

حچت عمتي كلمتها و اني عبالك واحد ضربني على راسي.. بقيت اباوعلها و احس الغصه خنگتني
عمي انتفض من مكانه و اتجهه عليها و ضربها براشدي و هي گامت تحچي و تصيح
و مراد گام من مكانه و صفگ بيده و گال بصدمه

- عشتي يمه عشتي خوش تخطيط
عمري ما توقعتچ هيچ

و اني بعدني گاعده بمكاني.. و احس الدنيا ادور بيه و ترجع تذبني بالگاع.. مراد تقدم عليه و اخذني من ايدي و فوتني للغرفة

گعدت على الچربايه و اني ساكته بدون اي ردة فعل.. مرات من كبر حجم الصدمه تخلينا ما نگدر ننطق حرف

و اني هيچ چانت حالتي.. اي كلمة ما گدرت احچيها.. اباوع ل مراد يروح و يرجع بالغرفة
و القهر و العصبيه مرسومه على وجهه.. وگعت دمعتي على خدي من وصلني صوت بيبي الي تنعي و تبچي على ابويه الي ما صار عنده ولد
و الناس طمعت بفلوسه و ورثه.. دموعي نزلت و اني اردد بداخلي اريد ابويه و امي..

انفتح الباب على غفلة و دخل عمي..
و بدون اي كلمة اتجه عليه و خلاني اوگف على حيلي
و گال

- زنوبة بنتي البسي عباتچ حتى تجين وياي

- وين يابه

حچاها مراد الي تقدم و لزمني من ايدي الثانيه
بيبي على صوت عمي الي گعد يستعجلني و مراد يگول يابه اتركها.. لأن حسباله راح ياخذني لأهلي دخلت للغرفة و گالت

- ابو مراد وين تريد تأخذ البنيه

عمي ترك ايديه و باوعلها و گال

- لكاتب العدل.. و أخذها لأبوها و امها حتى يتيجل البيت و السيارة وقف

ختم كلامه و رجع باوع ل مراد و أشر بيده و گال

- و حرام على مراد ياخذ شخاطه منهن

مراد من سمع كلام عمي تنهد براحه.. باوعتله و غصيت ببچيتي
عمي گبل اخذني للكنتور و گال البسي عباتچ
لبستها و اخذني بيده و طلعنا.. و بيبي گالت ما تروحون اذا ما اجي
و على السريع لبست عبايتها و طلعت ويانا

صعدنا بالسيارة و عمي گوه يسوق
و اني گاعده ليورا و دموعي توگع على خدي.. من القهر و الحزن الي بيه.. و كل ما اتذكر كلام عمتي
او بالاحرى سمومها الي بعدها ادگ بگلبي مثل المسامير يزيد بچيي

مسحت دمعتي من انتبهت ل بيبي تگول لعمي  بترجي

- يم اخوك إذا سمع والله يموت من القهر

طول عمي يلا جاوبها و هو يگول

- لعد لو يعرف انو الحيه مرتي اخذت بنته علمود البيت و السياره يموت بمكانه..

تقدمت ليگدام شوية و گلت بغصة

- عمو خلينا نرجع.. بابا مأمن ما طول اني عدكم
و إذا سمع راح يشيل هم.. الله يخليك عمو رجعنا للبيت

- اي ابو رجعنا لخاطر زنوبه..

حچتها بيبي.. و هو بقى يباوعلي من المراية
اخر شي جر حسرة و رجعنا..
من قربنا نوصل للبيت التفتت عليه و گال

- اذا سألت الكوبرا گوللها رحنا للمكتب
و وقعت على ورقة تنازل عن البيت و السيارة

هزيت راسي ب اي.. و بيبي گالت

- لا توصي حريص

من دخلنا للفرع انتبهت ل مراد الواگف عند الباب و هو يروح و يرجع بمكانه
بس شافنا وگف بمكانه.. نزلنا من السيارة
و هو تقدم عليه و لزمني من ايدي.. و فتنا جوه

عمتي شفتها هي لمحه بسيطه.. چانت مخنزره و الي يشوفها يگول هاي مصابها چبير.. ما رحتلها گبل دخلني مراد للغرفة

تركت ايده و باوعتله و گلت

- مراد اني بعد ما عندي صبر

سكتت و مسحت دمعتي و كملت

- مليت والله.. صبري خلص و بعد كلامها ل عمتي اليوم
شتريد تسوي امك بيه

هو تنهد و گعد على السرير و گال

- اني اسف.. اعتذر بالنيابه عنها و عن أفعالها بحقچ

حچه كلمته و دنگ.. و هو يحاوط راسه بأيدي.. تقدمت و گعدت بصفه
باوعتله شلون خجلان مني بسبب تصرفات امه بحقي.. اني ما مصبرني و ما يخليني اترك البيت و ارجع لاهلي
هو و الطفل البطني.. ما اگدر اتركه ل مراد.. هو صار كل دنيتي.. ما شفت شي منه مو زين.. حنين عليه و ما مقصر وياي و اهم شي يحبني
يعاملني معاملة الاب ل بنته يخاف عليها من الهوا الطاير

سكتت لحظات قبل لا اگول

- مراد.. خلي نطلع ل بيت وحدنا

التفت عليه و هو يعگد حواجبه و اني كملت بترجي

- راتب و عندك و الحمدلله رب العالمين رازقنا
و اني متأكده عمي ما راح يعترض.. لأن هو يشوف كلشي بعينه

- زينب.. كلشي توقعي بس طلعتي من البيت مال اهلي مستحيل

سكت ثواني و رجع كمل كلامه بحسره

- اعرف دتأذين من امي.. و الله يعينچ شلون صابره و متحمله.. و عمرچ ما اجيتي و شكيتي
و هالشي خلاني احبچ اكثر.. و اتعلق بيچ

لزم ايدي و كمل و هو يباوع بعيوني

- شفتي هواي من امي و رغم هذا ما حچيتيلي شي.. و كلشي ديوصلني من شهاب من معاملة امي الچ.. زينب اي شي تريدينه مني حاضر.. عيوني انطيهن الچ.. انتي مرتي و حبيبتي و ام ابني
بس سالفة طلعه من البيت.. لا ما اگدر و شيليها من بالچ

اجيت ابچي بس گوه كتمت دموعي و اني اگول

- زين ليش

- زينب.. باچر عگبه الناس تبدي تضحك عليه و تعير بيه.. والله شنو ترك اهله و هو ابنهم الچبير علمود مرته

سكتت و ما نطقت حرف.. و لا فكرت حتى انو اناقشه.. لأن ما الي طاقه و صدمتي بعمتي بعدها تضرب براسي..
و اعرف نفسي اذا اناقشه او احچي كلمه الخ ما راح تأثر لو تغير شي

غيرت ملابسي و هو يباوعلي ينتظر كلمه مني.. بس خيبت ظنه و اني اتجهه للتخت و مددت عليه و لفيت راسي و نمت
بوقتها دنيا عصر قريب ال3 و نص

و نمت عبالك قتيله.. حتى على العشا ما گعدت و لا صليت..

گعدت الفجر.. و اني شبعانه نوم.. التفتت و شفت مراد نايم و هو حاظني.. و دافن وجهه بشعري..

على كيفي وخرته عني و گمت.. دخلت للحمام توضيت و رجعت للغرفة مديت سجادتي و صليت..
من كملت بقيت دقايق گاعده على سجادتي.. نزلت دموعي على خدي و رفعت ايدي و گمت ادعي ربي يلهمني الصبر و السلوان..

بقيت لحظات گاعده و ادعي و اناجي ربي.. قبل لا اگوم و اتجهه للمطبخ

تنهدت من شفت تل الصحون مالت العشا.. شكلها عمتي سوت عشا و تركتهن
گمت غسلت المواعين و گمت نظفت البيت..
كملت التنظيف و هما گعدوا.. سويت الهم ريوگ
و ما تريگت تحججت انو تريگت قبلكم. فتت لغرفتي و نظفتها و رتبتها و لميت الملابس الوصخه..

من طلعت من الغرفة متجهه ناحية الحمام
سمعت بيبي الي باتت اليوم عدنا
تحچي وي عمتي.. وگفت لحظات و اني اسمعها تگول

- شلون يهون عليچ هي تسوي الريوگ هاا

- حجيه شكو بيها مو هي كنة البيت

- ولچ من اخذتچ لأبني هماتين هيچ عاملتچ

ما جاوبتها عمتي.. و رجعت بيبي تحچي بقهر و حسرة

- ام مراد.. هاي فقيره و ما عدها عين تگدر تخليها بعينچ و تردلچ الكلمه.. خافي الله بيها
و ما عدها والي بس الله موجود فوگ بسابع سماه

وگعت دمعة من عيني و ما تحملت كلام بيبي..
فتت للحمام غسلت الملابس و صعدت شريتهن فوك
و اني گوه اخذ النفس.. لأن صعدة الدرج متعبه

نزلت و غسلت صحون الريوگ.. و شهاب و مراد راحوا للدوام
گمت اسوي بالغدا بدون نفس.. كملته و هي تصب بي.. لا ا حس بي طعم و لا رائحه.. المهم حشو مصران

بيبي العصر اجا عمي الصغير و أخذها..
و من رجع شهاب شايل علاگة بيده.. اجا يمي و انطانياها و امه گاعده تباوع و هي الفضول قاتلها..

- هاچ زنوبة هديه مني

حچاها و اني ابتسمت.. لأن تعودت على شهاب و هداياه
يگول من اشوف شي گبل تخطرين على بالي..
چان جايب جنطه سوده و بيها فيونكه حمره.. نازكه و كلش حلوه

- والله ما ادري شلون اشكرك شهاب..

- لا تشكريني.. هديه من اخ لأخته

ابتسمت و دمعت عيني و رجعت اتشكر بي و عمتي تزفر و الوضع مو عاجبها..

أخذت الجنطه و خليتها بالغرفة.. و گمت احظر بالعشا.. اجا مراد
و گالي حظريلي ملابس اريد اسبح
سبح و راح للغرفة يريد ينام.. كملت العشا
و من صبيته رحت گعدت مراد..

التمينا كلنا على العشا  و گعدت يم مراد.. صح عندي زعل منه بس سكتت و ما عاتبته
لأن احس نفسي اذا احچي و اعاتب راح اسوي مشكله.. و اني كاتمه بگلبي هواي حچي..

مراد ورا العشا رجع فات للغرفة.. ما حسيته همين ضايج من أمه و سالفة البارحه.. الي ما نسيتها
و يمكن عمري كله ما راح انساها.. الي يخليني استغرب و اتعجب تصرفات عمتي و كلامها.. و لا حسبالك البارحه ذابه بوجهي كلام يخلي العاقل يتخبل..

كملت تنظيف المطبخ و صبيت الهم چاي.. و اخذت استكانة الچاي مالت مراد للغرفة

من فتت چان متمدد على الچربايه.. من شافني تعدل و اني انطيته اله

- محتاج شي؟

- سلامتچ

حچاها.. و اني رحت للكنتور اخذت ملابسي
و فتت للحمام.. گعدت جوه الدوش و ما حسيت الا دموعي واگعه.. صبرت نفسي و گلت كلشي يهون لابني..

طلعت من الحمام و رجعت للغرفة.. نشفت شعري بالمنشفه و اجيت امشطه بس هو صاحلي

گعدت بصفه و اخذ المشط و گعد يمشطلي شعري..
و هو بين لحظه و اختها يسحب خصله و يشمها و يرجع يمشط

و اني ما حچيت و لا ابديت اي ردة فعل

كمل تمشيط.. و خلاني التفتت اله.. حاوط وجهي بيدي اثنينهن و گال

- بعدچ زعلانه مني

ما جاوبته.. لأن صدگ هذيچ اللحظه ما اعرف اذا چنت زعلانه او لا
هو تنهد و گال بهدوء

- زينب.. اخاف عبالچ اني نفس امي
لذلك تزوجتچ

- لا مراد.. اني اعرفك شنو

- اقسم بالله.. و وداعتچ عندي
ما چنت اعرف بمخططها الخبيث.. من طلبت منها تروح تخطبچ ما حچت بالعكس بينت فرحانه.. و ما شكيت و لا لحظه انو براسها هيچ سالفة

- مراد لا تبرر.. گتلك اني اعرفك شنو
عمتي الله يهديها

- آمين

حچاها و رجع تنهد و گال

- زينب طول اليوم احسچ ضايجه مني
فكيها و ارجعي ام ضحكه حلوه.. لو بعدچ زعلانه علمود سالفة العزله؟

اجيت أگله اي.. بس سكتت
لأن شفت القهر بعيونه.. مهما يكن هو ما عليه بسوالف و افعال امه

- لا حبيبي مو زعلانه.. شلتها من بالي

ابتسم و سحبني ل حظنه و هو يشبكني و يدفن راسه بين خصلات شعري..
حظنته اني هماتين و سندت راسي على كتفه.. و عيني دمعت من گال

- والله ما ابيعچ مقابل كنوز الدنيا.. زينب احس روحي صارت متعلگه بيچ

مرت ايام و چنت ادوس على نفسي و اسكت.. صرت بالشهر الخامس
امي انتبهت للتغير الي صارلي.. بس ما بيدها شي تحچيه
مرة اجتنا مرت عمي الوسطاني
گعدنا نسولف و گامت عمتي للحمام.. باوعتلي زوجه عمي و گالت بحسرة

- اوف يا زينب شلون صاير بيچ.. و فوگاها امچ القهر كاتلها
الحجيه مسولفه الها عن فعايل عمتچ..

- عمه.. هاي قسمتي و نصيبي.. ما طول مراد زين وياي الحمدلله

- و عمتچ !! زينب.. لا تسكتين احچي لأبوچ هو يتصرف

فاتت عمتي و زوجة عمتي سكتت و تركت الموضوع و رجعت تحچي طبيعي
بس اني الي ما رجعت طبيعيه.. ما مقهوره على نفسي بگد ما مقهوره على امي و تأنيب الضمير الي ملازمها

اكيد هسا تخلي الوم كله عليها.. لأن هي الي قنعتهم انو اتزوج مراد...

ثاني يوم العصر..اجا مراد و چان مستلم الراتب
و هو شايل حلويات و مكسرات..
گعد بالغرفة و انطاني الفلوس.. ما چان ينطيني مصروف خاص بيه.. لا من فلوسه اخذ
و چان دائماً يحلفني و يگلي بروح اخوچ انو اي شي تحتاجينه اخذيه
و لا تگليلي لأن فلوسي هي فلوسچ..

بس اني ما چنت احب ابذر.. هو ما مقصر وياي بشي من ملابس و احتياجات خاصه..
چنت اخذ بس الف علمود  اشتري حلويات..

مرة العصر اجا يطلع شهاب من البيت.. صحتله من باب المطبخ و هو وگف ينتظرني حتى اجي يمه
انطيته فلوس و گلتله

- شهاب بطريق الرجعه.. جيبلي حلويات من المحل القريب هنا

هز راسه و گال

- تدللين زنوبه.. بس فلوسچ رجعيهن

- شهاب والله عندي فلوس مراد انطاني

- اعرف زينب.. بس فلوسچ يرجعن
ظميهن يفيدنچ بغير وقت

حچاها و مشى من گدامي و اني ابتسمت من سلم و طلع..
فتت من باب الصالة.. و لگيت عمي و عمتي گاعدين
عمي سألني على شهاب و گلتله طلع
گعدت يمهم.. و عمتي ساكته و بس تزفر
و عمي گعد يحچي وياي.. و گال بديتي تحظرين جهاز لأبنچ

بصراحه چنت ناسيه هالشغله.. گلت بعد وقت
بس عمي گال من باچر نبدي نجهز و اني بيدي اخذچ للسوگ

و صدگ سواها و ثاني يوم اخذني و اخذ بيبي وياي.. لأن عمتي گالت ما اخطي عتبة باب البيت

رحنا و اشتريت حضاين و قطع قماش و ملابس..
چنت فرحانه و اني اشوف احجامهن الصغيره و اتخيل شلون راح يطلع ابني يشبهني لو يشبه ابوه..

رجعنا و تلگانا مراد و الضحكه على وجهه.. و هو بقلب بالملابس و شهاب يضحك و يرجع يقلد عليهن
كلنا البسمه مرسومه على وجوهنا.. بس عمتي مكتفه ايديها و گاعده على جهه و هي تخوزر بينا
بس تجاهلنها و ما اهتمينا بيها...

ورا العشا.. فتت للغرفة و خليت ملابس الطفل بجهة باب الكنتور و اني ابتسم و الفرحه ما واسعتني.. ما چنت متحمسه بجيت ابني مثل هذا بس من شفت الملابس الصغيره تمنيت هسا اولد

دخل مراد و شافني ارتب بيهن.. ضحك و گال
ُ
- من هسا اخذ كل تفكيرچ

التفتت عليه و گلت

- مراد كلش متحمسه انو اولد.. يعني باوع شگد حلوات
راح يطلعن عليه يجنن

ضحك و هو يحظني من وراه و يخلي راسه على كتفي و گال

- ان شاء الله تولدين و تگومين بالسلامه
و اهم شي تمام الخلفة

بقيت ارتب بيهن و هو على وضعه.. ضحكت من گال

- بس ترا هاا من هسا ما اريدچ تهمليني علموده

سديت الباب و التفتت عليه و گلت

- ما اهملك شلون الواحد يهمل نفسه..

حاوط وجهي و رجع گال

- زينب اني اليوم گلتلچ احبچ لو لا؟

- بلي گلتلي من طلعت الصبح للدوام

حچيتها بضحكه و هو حظني و گال

- ما اريد يجي يوم و ما اگلچ بي انو شگد احبچ

غمضت عيوني و اني اشبكه اكثر و احس بأمان يحاوطني نفس كل مرة ياخذني ل حظنه..

مر كم يوم و چنا گاعدين بالصالة كلنا.. شهاب اصر أنو الا نلعب محيبس

گعدنا احنا التلاثه.. و جدي و عمي گاعدين يضحكون علينا و يكولون لا تتعاركون ترا محد يفاككم

و عمتي كالعاده گاعده و ضايجه.. لأن شهاب و مراد يضحكون وياي و يشاقوني.. لدرجه گامت تحچي و تضوج من شهاب لأن يعاملني بحسن و كاني اخته..

لعبنا.. و اول مرة فزت اني.. و ثاني مره شهاب..
و الباقي كله مراد.. اخر شي اكتشفت انو شهاب يغششه
ضجت و گتلهم و اني اخلي المحبس بالگاع

- كافي تغششه شهاب.. ترا والله اشور بيك

عمتي من يمها گالت بسخرية مبطنه

- يمه ابني دير بالك.. لا تعثرك العلويه بختها

گاموا يضحكون و گال شهاب و هو يلتفت عليه

- زينب شبيچ.. مو احنا اتفقنا الي يفوز يشتري بقلاوة على حسابه.. و اني ما اريد تفوزين حتى ما نخسرچ

مراد تعدل بگعدته و انطاه فلوس و گال

- اخذ روح جيب انت و تعال

- هاا شفتي لا اني و لا انتي خسرنا فلوسنا

ضحكت عليه و هو راح.. بقينا ننتظره
رجع فارغ الايدين.. و هو كله طين

گمنا نضحك عليه و هو گال ما شفت الطين و زلگت
و صاير عباره عن طينه وحده.. راح سبح و غير ملابسه
و رجع.. ما چنت منتبه اله من فات
و على غفلة حسيت بضربه على گصتي و ريحة زفر فايحه.. هو گام يضحك و اني نفسي لعبت من شفت البيض على گصتي

- هاي حتى بعد ما تشورين بيه
بس شوري و شوفي شاسوي

توي خاتم كلامه.. و يلزمه مراد من اذنه و يگول

- يلا گول توبه

گام يضحك و اني اضحك عليهم عبالك جهال متعاركين.. و جدي و عمي اصلاً ما حاولوا يفاككون بينهم لأن يعرفون سوالفهم

گام شهاب يصيح توبه توبه

تركه مراد و شهاب باوع ل عمتي.. الي مطنگره
ضحك و گاللها و هو يأشر عليه.. من گمت حتى اسبح و الا ما اغسل لأن صرت بيضه متنقله

- يمه ديري بالچ ترا كنتچ تشور و انتي شفتي بعينچ الصار..ف اللهم اشهد اني بلغت

وگفت يم الباب حتى اطلع و ما احس الا عمتي شامره گلاص المي على شهاب
و هي تصيح عليه

- شگد غثيث يا الاغم.. بطول ابوه و سوالفه سوالف جهال

طلعت و اني الضحكه مرسومه على شفتي.. سبحت و غسلت ملابسي لأن إذا بقى عليهن زفر البيض يخربهن

شريتهن بالحديقة لأن ما گدرت اصعد فوگ.. و دخلت للغرفة
لگيت مراد بالغرفة گاعد
من شافني گال

- تعالي امشط الچ شعرچ

گعدت و هو گعد يمشط الي و يضحك على سوالف شهاب.. سوالي جديله
و گال و هو يمسح على شعري

- كلش احب شعرچ.. ف لا تگصينه و لا تلعبين بلونه لو تصبغينه

هزيت راسي ب اي.. و اني اصلاً بالعرس لا صبغته و لا ميشته
لأن لونه عاجبني..

الصبح گعدت و سويت ريوگ الهم.. و مراد گال تروحين لأهلچ؟
اني ما كذبت خبر و گلت اي
گال من اجي من الدوام الگاچ متحظره.. طلع هو ل شغله.. و اني كملت شغل البيت
اباوع من الشباك عمتي مخليه كرسيها بالحديقة و تشرب چايها..

سويت الغدا و كملت كلشي..رغم دخلت الخامس بس لحد هسا نفسي تلعب و اتنسى
و ظهري مرات احسه يريد ينكسر بالنص من الوجع

على الغدا گلتلهم مراد راح ياخذني لأهلي.. عمي گال

- روحي بنتي ما بيها شي

بس عمتي وجهها انگلب و انزعجت حقها.. اذا اروح منو يشتغللها بالبيت
اذا هي خيط بالگاع ما تشيله.. ما ادري ليش تغيرت من بعد هذيچ النداره چانت شايله بيتهم شيل على رأسها..

اجا مراد العصر و اني غيرت ملابسي و رحنا الهم..
تلگتنا امي ب الهلا و مرحبا.. دخلنا للصالة و گعدنا و بابا چان ويانا...

گعدت ماما تسألني عن حالي و احوالي.. باوعت ل مراد و گلت

- الحمدلله ماما مرتاحه

باوعلي مراد بنظرة حسيت الحسرة بين ثناياها..

تركته هو و بابا بالصالة و رحنا اني و ماما للمطبخ
و هناك گعدت تسال بيه.. اكيد تعرف شنو حالتي. بس اني ما ردت اشغل بالها و گلت

- ماما عفيه لا تخافين والله ماكو شي
اي عمتي مرات تتعصب و تصيح من اسوي شي غلط
بس هي علمودي حتى اتعلم

جرت امي حسرة  و گالت

- يمكن ظلمتچ يا بنتي بهذا الزواج

- لا ماما لا تگولين هيچ.. والله مراد ما مقصر وياي بشي

- اعرف يا امي مراد ما مقصر.. بس اني على معاملة عمتچ.. گاعد يوصلني حچي من نساوين عمامچ

بلعت غصتي و گلت بشبه ابتسامه

- ماما كلام الناس ما يخلص.. ما طول اني مرتاحه وي مراد اي شي ما يهمني

هزت راسها ب اي و من شافتني ضجت من الموضوع
لزمت ايدي و گالت

- تعالي اريد اشوفچ اشتريت كم شغله لأبنچ
شفتهن بالسوگ و عجبني

- ماما تعبتي نفسچ

- تعبچ راحه يا أمي.. ابن بنتي الوحيده شلون ما احظرله

اخذتني للغرفة و طلعتلي الملابس
چانن مرتبات و كلش حلوات.. خلتلياهن بعلاگه
و گالت لا تنسيهن اخذيهن وياچ

تعشينا و رجعنا.. مراد گال اذا تريدين تباتين باتي.. بس اني گلت لا عود غير مره

اخذت الملابس الي جابتهن امي و رجعنا

و من رجعنا تلگانا شهاب الي گال

- فاتتكم العركه

عگد مراد حاجبه و گال

- عركة شنوو؟

- جمانه اجت زعلانه و ابويه و جدي رزلوها رزالة غسل و لبس

مشيت وي مراد ناحية باب المطبخ و مراد ويانا
و گال مراد

- و اكيد ام لسان ما سكتت

- ايي ف ما تشوف صارت العركة.. هي ترادد و تحچي
اخر شي ابويه رگعها براشدي يلا سكتت

- لا حول و لا قوة إلا بالله

حچاها مراد و فتنا جوه للغرفة
بدلت ملابسي و طلعت سلمت عليهم
جمانه گاعده و هي مطنگره و جهالها يمها..

گعدنا شوية و كل واحد راح ل غرفته

الصبح گعدت من وقت كملت الريوگ ل مراد.. و شوية طلعوا جهال جمانه..
خطية شكلهم يكسر الگلب هم اثنين  يطلع أعمارهم بال 6 و 7 سنوات.. طگيت الهم بيض
و گعدوا يتريگون.. و گعدوا البقيه
و خليت الريوگ گدامهم

جمانه و عمتي على كولتهم اكلن و مسحن ايديهن بالحايط.. حتى الچاي صبيت الهن و من شبعن گامن و طلعن من المطبخ
باوعت ل جدو الي هز راسه و هو يگول

- حسبي الله ونعم الوكيل بيهن

كملوا ريوگ و شلتهن و اني گوه ادنگ و اخليهن على السنگ
رب العالمين دزلي الأطفال هذوله و گاموا هما ينطوني الصحون و اني اخليها على السنگ
غسلت المواعين و رحت رتبت الغرفة

من طلعت گلت بلكتن عمتي لو جمانه گلبهن حن عليه و گامن سون الغدا.. بس لا وين گاعدات بغرفة الگعدن.. و الله يعين الي گاعدات يحچن عليها

فتت للمطبخ و رفعت ارداناتي و گمت اسوي بالغدا
من قطعت الدجاجه.. گبل نفسي لعبت

گمت استفرغ و اني احس بطني تقطعت.. عمي صدفة دخل للمطبخ و شافني.. من سألني شبيه
گلتله و اني اغسل وجهي

- لعبت نفسي من زفر الدجاج

اني گلت هيج و ما احس الا عمي طلع من المطبخ و هو يصيح و يسب.. گلت ها هي راح يتعارك هو و عمتي

و گفت يم باب المطبخ الدخلي و اني اسمعه يرزل ل
بعمتي و هو يگوللها گومي انتي لو بنتچ سون غدا
بدل هالمسكينه

لحظات و طلعن اثنينهن.. و نظراتهن عليه يريدين ياكلني بسنونهن.
عمي لزمني من ايدي و طلعني من المطبخ

و هو يتوعد بيهن.. رغم صياحه عليها
الا انو شوية ارتاحيت و فرحت.. من عرفت انو عمي بظهري مو مثل مراد اني متأكده لو اجا و شافني چان گال كلمته المعتاده تحملي

جدي گاله على كيفك
و بس گال هيچ عمي انفجر و گعد يحچي على عمتي
و انها ما تخاف الله بيه.. اني دمعت عيوني و بقيت ساكته گلت ما احچي شي عمي اخذ حقي و هذا المهم..

من صار الغدا اجيت اصب وياهن
بس عمي گالي بلهجة امر

- اگعدي انتي.. هنَ عدهن ايدين

سكتت و خلن الغدا..چنت خجلانه و بنفس الوقت خايفه..لا عمتي و بنتها ينتقمن مني بعدين..

عمتي خلت گدامي صحن مرگة و بيها جناح

بنص ما احنا ناكل عمي انتبه للصحن
و بدون ما ينطق حرف اخذ الصحن الگدامي و خلاه گدام زوجته
و اخذ صحنها الي بي قطعة صدر دجاج

حسيت عمتي عيونها صارت بگصتها.. گلتله عمو ما اريد بس گال

-اكلي انتي حامل.. غذي طفلچ

اكلت شويه منها گلت هسا تصير زقوم عليه
لأن نظرات عمتي و جمانه عليه.. و نظراتهن ابدا ما يبشرن بالخير

كملنا غدا و اني گلت اغسلهن
فتت للمطبخ و اليوم چان غدانا متأخر.. لأن طولن عمتي و بنتها بالغدا

گعدت اغسل بالمواعين و دخلت جمانه
ما حسيت الا واگفه بصفي و گرصتني من زندي
بچيت گبل من فعلتها و بشفايف ترجف گلت

- ليش شنو سويت !

- لا خطية ما سويتي شي.. زعطوطه و گمتي تقرين براس ابويه عليه و على امي

- بس والله ما حچيت شي..هو شافني اتقيء و عصب

گلت راح تتركني لأن انفتح الباب الخارجي
و ترجيت يكون مراد بلكي يخلصني منها.. بس هي صلفة ما دارت بال
و رجعت سحبتني من جديتلي و گالت باسنان مصروره

- اسمعي ست زينب جري عدل احسن الچ.. لا والله اشوفچ العين الحمرا

دفعتني گبل وي فوتت مراد و طخ ظهري بطرف السنگ

باوعت ل مراد و اني ابچي
هو جر حسرة و باوع ل اخته و گال

- شصاير

- ماكو شي خويه.. دنحچي

رجع باوعليو هز راسه بقلة حيله
طلعت جمانه.. و هو تقدم و گال

- اني هسا احچي وياها

ما حچبت و لا نطقت كلمه.. لأن انقهرت من سوايته
ليش من اول ما شاف ما حچه
ليش ما صاح بيها و گال عوفي مرتي

على السريع كملت شغل المطبخ من ورا خشمي.. و دمعي يصب على خدي

فتت للغرفة و  لگيت مراد گاعد على الچربايه
ما حچيت و لا كلمه

اخذت غير دشداشه لأن الي لابستها تبللت من ورا غسل المواعين
انتظرته يحچي.. يبرر موقف
يگول رزلتها و بعد شحدها توصل ل ظفرچ
بس هو فضل الصمت.. و اني هماتين فضلته

مددت بفراشي و اني اغطي نفسي و حتى راسي و اني اعض على شفتي كاتمه صرخه بصدري
صرخة قهر و حزن و خذلان

.

السلام عليكم ورحمة الله وبركاته ❤️❤️🙏

شلونكن حبايب عمري 🌿

ان شاء الله الكل بخير

اتمنى البارت عجبكم و نال رضاكم ♥️🌿

شنو توقعاتكم و أرائكم 😣🤔

و زينب و ظيمها من عمتها 🤦‍♀️💔

و مراد تتوقعون يتحرك و يجي يوم و ينفجر بوجهه امه علمود زينب؟

و بس والله نلتقي على خير احبتي
و ان شاء الله باجر انشر بارت
لان اتوقع النشر راح يكون يومي 😁❤️

❤️❤️❤️❤️❤️