المخلص "باللهجة العراقية "

البارت الواحد والعشرون

المخلص..
البارت الواحد والعشرون..
بقلمي رسل..
rasolaa7

انستا  Rasolaa7

يبعد اليوجعني منين ما جان
انا المحترك من غير دخان..

-صعدني غصب وعيني تصب دم مو دمع امي نورا
ليلى بيتنا كلها تبجي واني متبنجه وصعدت ويا وانطلق
وين وشنو مصيري ما ادري بس الي صعقني هو انو الي كبالي هذا ابويه الي عشت عمري بانتظاره وخيب
ضنوني واني اسمعه يحجي بعصبيه وياهم شلون ينطوني وهو ما عنده علم..

-يسوق وعيني عليه والمشاهد الي جنت مخزنتها بالي ومتمنيتها من طفولتي لعمري هذا تنعاد بالي مثل شريط
الفيديو بدون توقف..

-طفله بعمر السبع سنوات اول يوم دوام جف ايدها الصغير ضايع بين جف ابوها يمشون وهو يوصيها بابا هنا انتظريني من يطلعون مو ترجعين وحدج
خلي بالج ويا المعلمه شنو تحجي ركزي بكلامها
اكلي اكلج كله بالفرصة مو توصخين ملابسج
لا تخافين من البنات بيهن الي راح تصير صديقتج والي
يحجي وياج لا تسكتين روحي للمعلمه واشتكي وبعدها
يبوسها وهي تدخل للمدرسة وعينها عليه..

-ويخلص الدوام وترجع فرحانه والطريق كله تحجيله
شنو اخذوا لو المعلمه شنو حجت وياها منو صارت صديقتها وهو مبتسم ويشجعها..

-وتخلص مرحله عمريه كامله بصيفها وشتائها وتكبر
هالبنت ويكبر وياها حلمها وتجي كل شيء يصير تحجي لابوها الي مثل ضلها رسمتله صوره هيهات بيوم اهتزت بداخلها..

-وتكبر هالبنت وتكبر وياها احلامها وصورة هالاب ملازمتها وياها اكثر من الضل الي باوقات يتخلى عنا
ويتركنا وحيدين بمنتصف الطريق..

-ومرت الايام والسنين وهالبنت من طفله تلتفت على كل الاباء عسى ولعل واحد منهم هو واحد منهم الي راح ياخذ بيدها ويحقق حلمها وتصير الصورة واقع
الى كتورة وخطوتها تغيرت من اعتاب المدرسة والجامعة الى مستشفى بابهى صوره وهي بلابكوتها
الابيض لون الرحمة..

-وفجاة تعصف الحياة بيها الحياة وتتكسر اطارات وزجاج هالصورة ويتحول الحلم حقيقه بس اي حقيقه حقيقه مولمه لا هذا الابو مثل ما تصورته ولا ايده تحمل دفو وحنيه الي جانت متخيلتها..

-عيني عليه وصوتي ما يطلع ما اعرف من صدمتي ما
اعرف شنو الي جاي يصير دموعي ما بطلت وهو يحجي وياي اريد افهم منه شيء ماكو احس روحي بغربه هذا مو مكاني ولا هذا ابويه..

-اريد بس صوتي يطلع راح تطلع روحي وهو ما طلع
هواي اسئله ضامتها لهذا اليوم هواي وين جنت ليش
عفتني شذكرك بيه هسه ليش من فرحت وضحكتلي الدنيا طلعت بوجهي وين جنت ياربي راح اتخبل راسي
صدع وهو ما ادري شنو يلغي صدع راسي..

-هواي مشه بينه هواي ساعات واني كلبي ينقبض روحي فرفحت دموعي تصب ووصلنا البيت لا صغير
ولا جبير صاير بنص فرع ما عرفت احنا وين وباي منطقة ونزلني ودخلت ويا واني بغربه تهشم الروح..

نورا..

-الحجية تخربطت علينا من ضغطها بيت بلحضه
نكلب كلاب كل شيء مر وصار بلحضه مثل لمح البصر بحيث ما مستوعبين الي صار الحجيه الي كل شوي وصاحت وين جان منين طلع توه تذكر عنده بنيه والله اليوم اخلي كرار يهدم بيته فوك راسه..

-نص ساعه ودخل كرار الي اتصلت عليه ليلى دخل للبيت يرعد الوجه احمر عبرنا وركض على الحجية وكعد بمستواها.. يمه شنو هذا الي سمعته ووين جان
هذا شلون يدخل بيت ما بي رجال وياخذها منجن غصب شلون؟!..

-وهي ترد بتعب ما ادري يبعد امك ما ادري سحلها ولا حشم كبرتي ولا جن هالبنيات يتوسلن بي وسوده عليه اختك راحت روحها تمشي ويا مثل المبنجه..

-كام بغضب ويفرك بوجهه والله احركه والله ما اعديها
اله بسيطه الجلب توه تذكرها وين كاعدين احنا والله لاخلي يندم على دخلته على البيت وعلى هاي شوطتكم
النذل ما فكر ما كال بيت مابي بس نسوان مترهي بنتي
وبنتي هو يدري عنها يعرف بنته هال**** استغفر الله
ربي..

-الموبايل بيده يدك وهو روحه مفرفحه من الاعصاب باوع علينا هاي بس لسان خايف ياذيها منو يكول هو منو يكول شفتي زين يمه عقل ما ضل براسي والله مدري شلون وصلت الكم..

-على كيفك يمه هو ابوها اتذكره عنده وحمه بخشمه بس الي مخبلني شنو توه تذكر بنيته منو الي موصله..

-هي حجت هيج وهو طفر اني اعرف منو بس خلي يطلع الي بالي صح الا اسكطهم واحد واحد..

الحجية.. يمه راح اتخبل مو مختفي مو محد يعرف عنا شيء شطلعه صخام وجهه..

-هينه اذا ما سحلته بس خلي اندل مكانه وارجع لارا..

نورا..طلع كرار من البيت بعدما حذرنا نتصل على علي الي اليوم التحق بقينا وحدنا والحجية تلوب وجود
يفتر يدور على لارا وعلي خصوصا عمه شكد متعلق
بي بحيث يفززنا من النوم بدكاته على الباب وصاح ايلي ريد يمك.. علي اريد يمك وهذا علي متخبل عليه
مكزكز على سوالفه ومن ياخذه لحضنه يشمه وصاح
افيش يا ريحه هلي..

-ساعه ساعتين وكرار ماكو نتصل عليه ميرد علينا
كلوبنا نار واحنا ما نعرف لارا وين اخذها ابوها والاصعب والي محيرنا انو محد يعرف مكان ابوها لان جان مختفي ومكانه مو معلوم..

-دك تليفوني واسم علي منور الشاشه توترت شلون ارد عليه خاف سمع ونوب يسألني بس شلون وكرار ما قبل واحد يحجيله تنهدت وفتحت خط واجاني صوته افيش يا ريحه هلي..

-وين اشتميت ريحتنا..

-حجه بصوت ناصي.. معشعشه بخشمي ريحتكم اي
شلونج امي شلونها الخبله شو دكيت عليها مترد مداومه
اليوم..

-اي بالدوام بخير احنا انت شلونها الاوضاع يمكم احجي وابتعد عن صوت عمتي الي تنحب وتبجي والله كسرت كلوبنا..

-مشتاق بويه هواي مشتاق لحضنج هيج كون حضنه
تكسر ضلوعج وما تبرد ناري..

-سكتت خجلت وهو ضحك خدودج شتعلن يابه بشرفي مال كرط مو بنيه طركاعه ونزلت على كلبي..

-علي والله راح اسده كافي حجيتها وهو يضحك عليه
لج كافي خجل حسي بيه الخاطر الله..

-علي ما اسمع الو علي حجيتها واني اتهرب واسد التليفون من اجاني صوت كرار عصبي وهو يسب بعمام لارا وابوها وشكله ما عرف مكانها ولا عرف شيء واضح من اعصابه وتوتره..

-ندك الباب وطلع شوي ورجع جعفر يمي ما اريد صوت دخلوا هو وجعفر ونسمع اصواتهم العاليه وذاك مفرفح ويحجي باعصاب.. شلون يعني ما تندل هو وين
شنو تايهه ياخذها عمامها ما يعرفون بي وين لا تخبلني
كوم وياي كوم والله احرك بيوتهم وما اطلع الا يحجون متاكد اني واحد منهم يعرف ابنهم هذا اكيد يعرفون شيء عنا يندلون مكانه تكوم وياي لو اروح وحدي..

-وطلعوا وتركونا بقلقنا لا ساعه ولا ساعتين وهم ماكو
التليفون مال عمتي ما سكت ما ضل واحد ما اتصل عفيه خبر هيج طش بسرعه ولو هي عمتي ما خلت واحد ما اتصلت بي..

-وكل هذا واني كلبي مخليته بيدي خايفه على لارا وخايفه على علي الي هناك بين السواتر والحرب ولو
سمع ما اضمن رده فعله وهي عزيزه كلبه..

زمرد..

-افتر بعلاوي الي مريض ومتنحس كلش لو ذبيته شوي من حضني يخبصنا خبص نوب لا زينب يمي ولا ابو تراب الي بالدوام اخذته غسلتله وحبيبي يشكيلي بعيونه
ومبرطم واني مدمعه عيوني هيج كون اشيل الالم منه
واخلي بيه..

-شربته خافض حراره وكوه خلاني وبعدما غص يلا
خليته على رجليه واهز بي اريده ينام شوي لان هلكت
حتى ايديه تعبت من شيلته وبس افتر وهاي صار يومين على هالحاله..

-مرتين اريد انزل اروح اكول لعمتي علي مريض ومن اتذكر شلون دفعت ايده وتكول وخر هالنغل مني اتراجع وضاله بحيره وعلى الخافض حراره..

-لليل انتهى يتقيا وحرارته ارتفعت كلش كلبي نترس خوف عليه لبست وغطيته زين ونزلت لعمتي دكيت الباب وفتحته شذى الغثيثة تنهدت اصبر بروحي مو وكتها والله مو وكتها تطلع بوجهي واني بهالتعب..

-خير شكو نازله؟!..

-دفعتها وطبيب ما احس غير سحبتني بقوه الا شوي جان وكعت اني وعلاوي.. وين مو احجي وياج لو طلع عينج اخوي مدري ساحرته مدري مبتلي بيج..

-رفعت راسي عليها مريضه انتي مو صاحيه على هذا
تفكيرج وخري مني لا ابتلي وافرغ ضيم كلبي بيج..

-بهاي الاثناء اجت عمتي شذى منو دك الباب سكتت من شافتني عضيت على شفتي بقهر والله صعبه بس الخاطر علاوي اليوم اني كبالها..

-عمه علاوي مريض فدوه تعالي وياي اخذه للطبيب صارله يومين متعلعل حتى بنومته..

-هي صفنت وشكلها ما عاجبها الوضع واني اردد يارب حنن كلبها وين اطلع وحدي بهالليل واجاني ردها
الي جان عباره عن السكوت بعدما عبت براسها شذى يمه مابي شيء ولو طلعتي ما راح ياكلون راسج الجيران من وره ابن الحرام هذا..

-من شفتها سكتت شلت ابني وطلعت تنزل دمعتي امسحها واواسي نفسي بنفسي والوم بروحي شلون نزلت نفسي الها وارجع واكول الخاطر ابو تراب نبهني ما اطلع وحدي وخفت على سمعته بس من توصل يم ابني كلام الناس ونظرتهم كلها وره ظهري اخليها..

-طلعت واسمع صوتها وراي اوكفي ولج خلي اخابر على ابن اخوي ياخذنا رجعت وياها بس ما دخلت بقيت
بالطرمه وهي اتصلت شوي واجا ابن اخوها ولد شاب
عيونه على عمتي والمخلص عبالك ابنهم كلش يشبهم..

-اخذنا ومن نزلنا اسمعه يكلها هي هاي مرته شو مبينه حبابه ليش تحجون عليها لعد وهي ترد عليه انت معليك
بهاي السوالف ابقى هنا نشوف شبي ونرجع..

-واخذوا مني وطلع عنده التهاب بصدره وعلاج وابر
ورجعنا واني مخليته بكلبي وابن اخوها يسوق ويضحك
عليه كل شوي ويلتفت خاله خنكته ما نبوكه والله جانت
روحه مرحه وحتى عينه ما خلاها بعيني..

-من نزلت تشكرت منه وهو رد على بختج مرت الغالي
امانه شتحتاجون بس خلي خالتي تخابر عليه..

-عفتهم يسولفون وصعدت علاوي من العلاج ذب نفسه وصدره يخرخش الجو غير غطيته زين ومددت بصفه
سارحه بافكاري وبمصيري ويا ابو تراب هاي راح يصير كم شهر وهو صابر عليه زين الى متى واني شوكت اخلص شوكت ارتاح..

-كلما اكول ارتاحيت وتحسنت نفسيتي ارجع لنقطه الصفر بحلم لو ذكرى من هالذكريات البشعه الي دمرت روحي..

-بيت خالي طلعتهم من تفكيري بس مرات غصب يمرون على البال وتحن روحي لبناته لخالي لمرته عشرة عمر وياهم هيج بسهوله يتخلون عني شلون انطاهم كلبهم الومهم الوم الغريب لو اللوم على حضي..

-كم يوم والحمد لله ابني تحسن على الابر والعلاج انومه واشتغل ومن يكعد لازم اكابله البيت ضوجه وكل الوقت وحدنا حتى شهيه ما عندي للاكل من الوحده الي محاوطتني وهالشعور يتعب النفسيه..

-يضيك صدري وامد سجادتي وساعات اني ادعي وابجي الوحده وهدوء البيت يرعبني ترجعني لمواقف اجاهد حتى انساهن..

-مددت على سجادتي وعلاوي غافي واسمع اصوات
صوت همس اصوات تروح وتجي بعدني ما مستوعبه
يندك الباب كم دكه ويختفي الصوت اكوم بخوف واتردد
افتحه ومن اصيح منو ماكو صوت راح اتخبل والله هذا
صوت الباب..

-اسبوع خلصته واني برعب الحمام اخاف اروحله ونوب زينب رجعت لبيتها ومحد يمي وكل يوم اني بعذاب من وره الاصوات والباب الي يندك بنص الليل واخاف اتجرا افتحه ولا اكدر احجي منو الي راح يصدكني اكيد راح يكولون مخبله..

-اليوم الصبح فتحت قران بالبيت ونضفت وعلاوي عينه عليه ويرفع باديه يريدني اشيله..

-ولي ما احبش اني ولي ما اريدج احجيها واهز راسي
وهو يضحك بصوت من كلبه..

-رجعت عليه سبحته وبوطره ولسبته اوفر كبران شوي حبيبي وصاير بعد احلى اتذكر امي من جانت تكولي انتي كلما تكبرين تحلوين اكثر وعلاوي الظاهر طالع
عليه حبيبي وابن كلبي..

-انفتح الباب وعرفته من خطواته وصوت السويج الي
يفر بي بيده مد راسه الله يساعدهم حجاها وذب قميصه
ومدد على رجلي واخذ علاوي بحضنه يشم بي ويبوس.. شنو هالريحة ولك كواد..

-ليش تغلط على ابني؟!..

-ام لسان شعليج..

-شلون صار؟!..

-لا الحمد لله هسه هواي افضل وطلعت ويا عمه صدك
اتصلت عليك ما ترد..

-اي وصلت الاخبار هي وبهاراتها..

-ضحكت.. شذى كالتلك مو حجيتها وهو تنهد ورجع يحجي ويا علاوي الي مكيف بي ويكركر وكل شوي ومخلي اصبعه بعينه..

-رفع راسه عليه تزعلين من اكلج كواد نفكست عيني..

-طفل ميخالف دشوفه شلون فرحان بيك..

-هو غير ينكرط هو وامه ادري شاردين من الجنه
كو****..

-هسه الا تغلط علينا دفعت راسه من حضني وهو رجعه..بكيفي عندج اعتراض؟!..

-اي عندي ما اقبل ترى اكلك سرسري..

-ذب علاوي وكلبني وصار فوكاي.. شنو هالسمعة بلا
هالسرسري شمحصل لا حلك لا صخام بكصه عمج هي حضنه ومانه علينا بيها ام لسان..

-وخر والله اصيح والم الناس عليك دمعت عيوني وخر
عفيه مني شو اختنكت والله ادفع بي واحس الهوا ما يدخل لريتي دفعني وكام واني شبعت بجي شبيدي يربي
شبيدي الله يلعنكم هسه انتم دمرتوا حياتي وشبابي ليش ما كتلتوني وخلصتوني ليش الله لا يوفقكم الله يعذبكم
بنار الدنيا قبل الاخره..

-جلاب زبايل ك**** احجي واحس جسمي كله يرجف تهسرت هيج كون واحد منهم كبالي واطفي بي نار كلبي الي ما خمدت ولا راح تخمد شعري تكطع وعلاوي يصرخ واني اصرخ واسب بيهم هو رجع والقلق بوجهه حضني وبعد ايدي الي جنت اضرب بوجهي بيها.. شبيج يمعودة عمي تشاقينه وياج شلون
بيج ولج..

-كلبي يوجعني روحي محتركه شبيه يعني شبيه ليش ما متت ليش ما كتلوني وخلصوني المن عايشه..

-اش لا تحجين هيج شو مسحي خشمج نخبط ويا دموعج شنو هاللعبان النفس حجاها ويدغدغ بيه الى ان ضحكت يلا ابتعد باس راسي كومي غسلي وبدلي راح تجي زينب عليج تطلعين وياها..

-وين؟!..

-شمدريني تريد تروح للسوك مدري للحفافه اني ادري
بسوالفجن كومي لا تاخرينها على جيه..

-كمت وصلت للباب ورجعت التفتت عليه.. اسفه والله بس مو بيدي كلبي يختنك والله ما اكدر..

-روحي ام لسان لا تفكرين هيج الله كريم..

-تنهدت وطلعت سبحت وبدلت واسمع صوت زينب
تحجي ويا سلمت عليها وهي استعجلتني نطلع باوعت عليها وعلاوي؟!..

-عوفي يم ابوه بس سويله ممه..

-هو هز ايده هي هاي تاليها اريد انام ارتاح هذا راح
يسطر راسي بس تتاخرون اشمره منا..

-بوسته وسويت ممه واوصي بي تالي زهك صاح بينا
تطلعن لو اطلعجن دفرات..

-صاح عليه.. اخذي فلوس منا واشر على كنتوره..

-اخذت مبلغ وطلعت وياها بالبداية حجزت وبعدها فترينا اشتريت ملابس وهي وياي اخذي هذا وهذا حلو
عليج يمعودة كافي وهي ماكو متسمع مني ما خلت شيء اذا ما كالت اخذي منه وكل شوي وكالت لعيون
اخوي مو لزراك عيونج..

-بعدها رجعنا على الصالون حددت اطراف شعري ورتبته بدون ما تكص منه هواي سوت وجهي الي اول مره بحياتي اسوي اشتعلت شعل ما خلت شيء ما خلته
بوجهي بحيث صار يلمع من النظافه..

-طلعنا منها مسطوره وراسي مصدع بس النتيجة تخبل
والطريق كله اني بحيره اتمنى افتح كلبي واحجيلها اتمنى اشارك احد بهمي الي جاثم على صدري..

-تالي من حجيت الها شلون اصده وشلون نفسيتي تدمر
زينب والله مو بيدي احس ملك الموت يسحب بروحي اختنك والله مو اكره اخوج بس روحي تفرفح وينعاد
عليه كل يوم عشته ويا ذاك النذل..

-هي بجت وتصبر بيه وتنصح واتقبلي مره مرتين
تتعودين زينب على نياتها واني كلبي مشتعل محد يحس بغيره الالم ما ياذي غير صاحبه وشعوره مستحيل احد
يكدر يوصفه لهذا اكتفيت بالله كريم وما طلعت كل
الي بكلبي..

-رجعنا للبيت صعدت وهي توصي بيه البسي الابيض يطلع يخبل عليج لا تلمين شعرج اليوم اخوي ينسطر
والحمزة شهالحلا ولج اقري سوره الفاتحة لام البنين ع وسمي باسم الله لا تفكرين هواي هي توصي واني اهز براسي باي..

-طبيت للبيت الي هدوء ومظلم البيت المخلص فتحت باب الغرفه وابتسمت فرحانه على المنظر الي كبالي غافي وعلى ايده علاوي ونايمين ما يدرون بالدنيا طشت لو رشت ايده الثانيه لازم بيها الممه الي اقل حركه وتوكع منه اخذتها منه على كيفي وطلعت عفتهم نايمين..

-غسلت وجهي وخليت حمره حمرة جان لونها طوخ
وكحل اسود برز لون عيوني شعري على طوله ما خربت الشسوار وطلعت السيت الابيض التردد والحيرة
الي اني بيها بس الله يعلم بيها..

-لبسته ولفيت الروب خجلانه ومتردده خاف اتفشل خاف اصده شلون لو رجعت عليه الحاله يارب شلون
بيه..

-وارجع واتذكر كلام زينب دللي البسي خطيه يجي تعبان خلي راحته يمج نسي العالم بقربج اهتمي ودللي
وكلي بيدج من يلبس ساعدي وايدج ويا تفاصيل يحبها الرجال من مرته ويتعود عليها مثل الطفل الي متعود
على امه واهتمامها وساعتها كلبج يرتاح من تشوفينه
هو مرتاح..

-طلعت سويت عشه واذن ضميته بالفرن ورحت كعدته يفرك بعيونه وصافن على وجهي كام وصل للباب ورجع التفت عليه اشتعلت عشيرتج على هالشفايف نوب صابغتهن عايزات هن..

-ضحكت وهو طلع يتوضا كعدت علاوي لان اذا بقه نايم يسويلنا حفله بالليل ورجعت للصاله جان واكف يصلي اني كعدت وهو صاح الله اكبر وياشر بيده اطلعي برا هزيت ايدي وطلعت..

-دقايق واجا يمنا بالمطبخ اشتعل عمج حتى صلاتي
طارت بركبتها ربي اني الي عليه صليت حتى الشيطان ما سواها وطلع بوجهي هيج واني اصلي..

-ضحكت من كلبي وهو ياشر بيده خبال والعباس ترى
صلاتي بركبتج..

-مديت ايدي على ركبتي وينها ما اشوفها اخذت علاوي وشردت من اتقدم عليه.. هسه ادليج وينها تعاي جبانه
بطرك اللسان وعلي..

-بالليل وره العشه وبعدما نومت علاوي وهو كاعد يكلب باوراق ويمه اللاسلكي ويحجي ويكتب فتحت عيني من الطرف الثاني فشر نوب لسانه متبري منه
وكله بالخط العريض التفت عليه واشرلي برا..

-كمت واني اتافاف روح شوف اليوم منو يدخل الغرفه
كل شوي واشر برا زعطوطه كباله السرسري اني اعلمك نومت علاوي وفرشت بصفه ذبيت الروب ونمت..

-ما اعرف شكد مر وقت لان غفيت وفزيت على لمساته جان حاضني ومتمدد بصفي من حس عليه كعدت همس.. متاكده؟!..

-مغصتني بطني ودفعت ايده وهو رجع يمشي ايده
على جسمي بهدوء زمرد افتحي عينج لج عينج خليها
بعيني يا بعد عيوني عيونج..

-من صارت صدك ضغطت على نفسي تحملت تالي
اختنكت كلش صح هالمره هواي ضغطت على نفسي
بس لهنا حدي
الاصوات الي ترعب
الهتافات
راياتهم
عباراتهم
البنات الي يطلعونهم من الغرف بدمهن
اصوات الي تعنفوا منهم
هو وكرشه توسلاتي بي من ما رحمني واخذ اعز ما املك كلها نعادت عليه وجن الي صار اليوم واليوم انتهت احلامي..

-صرخت صرخة احس حبالي الصوتيه تكطعت واضرب بي اتهسرت يريد بس يقيد ايديه ما يكدر نار بكلبي نار اشتعلت ودموعي تجوي بخدي وهو اوف يا حنيته اوف حاضني واني اضرب بي واجاني صوته
بهمس زمرد عيني انتي كافي بس افتحي عينج ماكو
شيء والله محد هنا..

-واني اردد هذا هذا كتلوه هاي البنيه خلصها منهم خلصها كوم لك كوم واسد باذاني اصرخ ما اعرف حالتي تدهورت مو ذكرى جن اعصار وهب عليه كل شيء مر عليه شفته بهاي اللحظات اذاني ووشة الاصوات بيها عيوني الي بدت تغفي وهو حاير يضرب
على وجهي يحجي يريد واني اتخبلت..

-حالتي ساءت لدرجة مرتين ضربت راسي بتاج الجربايه علاوي الي يبجي وهو كام عليه خله الممه بحلكه ورجع عليه سحبني بتوسل وخله راسي على رجله رفعت راسي ودموعي تصب اقرالي الدعاء
الله يخليك اقراه شكد ما تكدر اختنكت والله اختنكت وبدا يقرا بصوته الي مليان حنيه رغم ما جان صوته حلو كلش بس يكفي حبي لهذا الدعاء منه هالدعاء الي جان منقذي باسوء حالاتي..

-(اِلـهي عَظُمَ الْبَلاءُ، وَبَرِحَ الْخَفاءُ، وَانْكَشَفَ الْغِطاءُ، وَانْقَطَعَ الرَّجاءُ، وَضاقَتِ الاَْرْضُ، وَمُنِعَتِ السَّماءُ، واَنْتَ الْمُسْتَعانُ، وَاِلَيْكَ الْمُشْتَكى، وَعَلَيْكَ الْمُعَوَّلُ فِي الشِّدَّةِ والرَّخاءِ، اَللّـهُمَّ صَلِّ عَلى مُحَمَّد وَآلِ مُحَمَّد، اُولِي الاَْمْرِ الَّذينَ فَرَضْتَ عَلَيْنا طاعَتَهُمْ، وَعَرَّفْتَنا بِذلِكَ مَنْزِلَتَهُمْ، فَفَرِّجْ عَنا بِحَقِّهِمْ فَرَجاً عاجِلاً قَريباً كَلَمْحِ الْبَصَرِ اَوْ هُوَ اَقْرَبُ، يا مُحَمَّدُ يا عَلِيُّ يا عَلِيُّ يا مُحَمَّدُ اِكْفِياني فَاِنَّكُما كافِيانِ، وَانْصُراني فَاِنَّكُما ناصِرانِ، يا مَوْلانا يا صاحِبَ الزَّمانِ، الْغَوْثَ الْغَوْثَ الْغَوْثَ، اَدْرِكْني اَدْرِكْني اَدْرِكْني، السّاعَةَ السّاعَةَ السّاعَةَ، الْعَجَلَ الْعَجَلَ الْعَجَل، يا اَرْحَمَ الرّاحِمينَ، بِحَقِّ مُحَمَّد وَآلِهِ الطّاهِرينَ)

-بعدها بايده اخذ يمسح على كلبي ويردد
اللهم بمحمد
اللهم بعلي
اللهم بفاطم
وهيج ردد كل اسماء اهل البيت عليهم السلام وصولا للحجة المنتظر عجل الله فرجه الشريف..

-واني عيوني تصب دمع مقهوره على نفسي
وعليه..

-رفعت راسي ومسحت دموعي صوتي كوه طلع مخنوكه من كدما بجيت.. طلكني عوفني ارتاح مني
وخلي اني هم ارتاح ما اكدر والله ما اكدر اعيش ولا الفرح والبسمه مكتوبات الي ما قصرت وياي امان الي
ولعلاوي بس لهنا وكافي عوفني اني ما راح اجيبلك
غير بس الهم والقهر..

-كملتي؟!..

-تنهدت ترى ما جاي اتشاقه كافي اني بزعت وكرهت
روحي حس بيه..

-نامي وانجبي حجاها واريد افتح حلكي هو مد ايده
وسد حلكي نامي كلت ام لسان يحجي ويدك على ظهري وعبالك علاوي جوه ايده كلما اريد افتح حلكي وضغط
عليه وصاح نامي بس خلصيني من لسانج غضب الله مو لسان..

-بصعوبه نمت هالليله من الخنكه ومن كل المشاعر الي عصفت عليه ثاني يوم من كعدت هو ما جان موجود
كمت بعدني ما مغسله وجهي والباب ندكت طلعت واشوف شذى وزينب وراها.. لج شذى والله اخابر عليه
شذى عوفي البنيه كافي سمج حتى عليها نافته عوفي
البنيه كافي عليها ضيمها..

-وشذى ولا عبالك واحد يحجي وياها دفعت الباب وطبت اسمعي لج اذا ما رايده اخوي شكو باقيه عنده ارجعي للزباله الي اجيتي منها اخذي هالنغل واطلعي
نسوان تتعاير ذاك حبلت منه وهذا تستنكف ومسويه
روحها تتخربط اذا تقرب منها..

-باوعت على زينب بقهر الوحيده الي تعرف بهالموضوع بلعت ريكي وزينب ضربت على فخذها
لج كافي راح اخابره هو يتصرف وياج..

-انجبي انتي الثانية نوب عليه العاكر بيج خير حيري
بروحج مو بهالشكولات هي حجتها وزينب نزلت دموعها هنا اني بعد ما تحملت سحبتها من شعرها
وضربتها راجدي فريت وجهه نار كلبي الي ما تطفه
طفيتها بيها..

-منو هي وتعيرني منو هي وتحجي هيج عليه ما عاشت ولا شافت الذل جوه ايدهم ما عاشت وهي تقاوم ارذل
خلق الله ما شافت الايام السود والرايات الي باسمها
ضاع شرفنا ما شافت ولدنا شلون يتذ..بحون على ايدهم
ما عاشت هالمشاهد ولا سمعت هالاصوات وتلوم
بينا نار بكلبي وكون اطفيها بيها واشوفها شلون تركص
على جروحنا..

-رجعت عليه وزينب صارت كبالنا واجتها كفخه من شذى الي صوتها فضيحة وتفشر علينا وكلامها سم
على اختها ضربتني بعيني احس برطوبه فوك حاجبي
وصاحت زينب بخوف.. لج شسويتي عزا بعينج راحت عين البنيه..

-واني من حلاوه روحي دفعتها كل قوتي نضربت بالحايط وعاطت من راسها مدري انشك مدري عنجر هي وكعت واني فوكاها شلعت شعرها عضيت ايدها كفختها تكفخ وهي تلعلع وزينب ترجف وجان يجينا صوته بكل غضب وعيونه مخنزره علينا بغضب..

لارا..

-يومين واني كلبي نار مشتعل صوتي أختفى نهائيا وروحي تون ما اريد هنا ما اريد شلون اصرخ شلون
يفهمني..

-اكل يجيب يتوسل واني غير المي ما يدخل معدتي
يتقرب مني يقنع ويحجي واني ابوج واني كارهته بطلت حتى امنيتي بشوفته بطلت ما اريدها..

-بالي وروحي وكل كياني هناك ذولاك اهلي ذولاك الي
شفت المحنه منهم ذولاك الي ترتاح نفسي بقربهم هنا
اختنك احس روحي بسجن والمصيبه ابويه سجاني..

-فزيت بنص الليل اروح للحمام واسمعه يحجي بالتليفون صنمت بمكاني وعقلي ترجم كل معاني الخوف واني اسمعه.. اي اني وعدتهم الهم مره بس خلي اشوف تاليها ما عليك منه هالمعيدي اني اقنعها كتلك عوفنه منه البنيه اني اقنعها وما تصير اله الهم....

يتبع....

لا تنسون التصويت وتعليقاتكم الحلوه حبايبي..

تعالوا انستا حبايبي..

اللهم صل على محمد وال محمد❤️