مساء الورد ياورد شلونكم،،مشتتتتتاقتتتلكم مووت اريد تفاعل جميل مثلكم،،انطلقوا حبايبي،،متابعة طيبة
البارت الحادي والعشرون
فيّد عبدالله
مهرة،،ثاني يوم واتصلت بية حوراء رديت عليهة مشتاقتلهة
حوراء،،ولج صدك كل هاي المشكلة من ورة حسين اني اعلمة وليش ما گلتيلي اني كلبي شايل ومعبي منة اخلي خواني يسحلوه
مهرة،،اوكفي اعصابج الولد ما سوة غلط
حوراء،،خرب حياتج وما سوة غلط اني الة
مهرة،،شخرب حياتي قل ادب حجة كلمة مو حلوة اتصرف تصرف مخل بالاخلاق بكل احترام حجة الولد واني جاوبتة بكل احترامي بكامل حشمتي وادبي
حوراء،،من وراه طلعتي زعلانة ورحتي
مهرة،،لا مو من وراه من ورة اخوج يعني اني شكو انسان احجي وياه معناهة دااخون واسوي حرام المفروض غيث يعرفني شنو ويعرف اخلاقي كلش زين
حوراا،،ليش ما كتيلة شراد حسين
مهرة،،لان المفروض ميشك من الاساس يجي يسألني اذا عندة ثقة بية مو يجي يتهمني ويگلي رشا كالت وما صدگت واني مريض والله اعلم شتسوين من وراي واحلفلة عالقران وميصدك
حوراء،،غلط واتسرع وانتي العاقلة اني راح اوضحلة كلشي بس ارجعي
مهرة،،توضحين او لا هذا شي راجعلج وهاي خصوصيتج المهم اني حافضت عليهة من ناحيتي ،،بس مال ارجع مستحيل اني شلون اامن بي بعد يمكن باجر عگبة لو وكفت اشتري قنينة غاز يكلي عندج علاقة وية ابو الغاز
حوراء،،مو لهدرجة عاد مهرة
مهرة،،تدرين المشكلة وين انه محد يحط روحة بالميزان انتي لو تزوجتي ووكفتي وية اي احد اقاربج او اقارب زوجج واجة زوجج واتهمج باخلاقج الي تعبتي انتي واهلج حتى تحافضين عليهة ويجي هو بكل بساطة يكلج انتي مو شريفة تقبليهة على روحج
حوراا،،لا
مهرة،،لعد ليش تردوني اتقبل حجايتة وكأن شيئا لم يكن،،زين يلا غلط واتسرع هسة ماهدء وعرفني اني منو ما راجع حساباتة واتذكر منو وشنو مهرة،،الله اعلم بس شسويت حتى احافظ على نفسي،،بس اسألي كليلة شلون اتزوجت مهرة وليش بهذاك الوقت ساعتهة راح يعرف شكد اذاني وجرحني
حوراا،،كافي ياعمري صوتج راح
مهرة،،كلكم ماحاسين بية صعبة ومتنبلع استحي من نفسي من اتذكر كلامة ،يدگن بگلبي حجاياتة
حوراء،،بس حبيبتي لو ادري مامخابرة بس من عرفت من ورة حسين اتخبلت
مهرة،،حوراء الولد من يحجي يدير ضهرة علية كدما محترم ترة اني اعرف كلش زين احافظ على نفسي واعرف منو الي يستحق احجي وياه باحترام وادب
حوراء،،كلة من وراية لو محاجيتة بالكلية وفاضة هالسالفة الگشرة
مهرة،،هاي هية شكاتب الله نشوف مرات المواقف توجع بس تبين صدگ النفوس شضامة
حوراء،،والله غيث يحبج ويموت عليج
مهرة،،الحب مو كلشي بالدنيا الاهم منة الثقة وللاسف انكسرت بيناتنة الثقة،،حمودي كعد من النوم اروح اغسلة
حوراء،،ماشي براحتج بوسيلياه شايلين البيت ورايحين حتى امي بس تتصفن وتدمع
مهرة،،بوسيلياهة واتعذريلي منهة هواي،،مع السلامة،،سديتة ورحت لحمودي سبحتة وكعدت اوكل بي نام بدون ميتغدة، ،حابسة روحي بالغرفة مال الجهال احس متقيدة رغم همة امانة الله حبابين وكلش طيبين. بس ماادري احس روحي صايرة ثقيلة وين مااروح اسبوع والوضع سكتة غصون تروح وترجع للدوام هية وقائد بس قائد العصر ماعندة مكتب فخطية كام يطلع حتى اخذ راحتي واني ملتهية بحمودي وحسوني ما قبلت توديه للروضة يونسوني جنت كاعدة الصبح وخابرني خالي گال صح مشتري للبيت كتلة بطلت ماابيعة هسة لان من كلت لغصون تتابع التعويض اني جنت هاملة هالموضوع وموابالي بس هسة لا سعيت بي ومن يطلع كلت ابيع البيت والتعويض واخذ بيت مرتب بس الشغلة تطول الظاهر فلغيت بيعة البيت هسة ،،خالي شك بالموضوع وظل يسأل ويلح شكو وليش فسولفتلة انه صار سوء تفاهم بيني وبين زوجي وردت ابيعة واروح لخالتي بكربلا استقر يمهه وصدك هالفكرة جانت ببالي وكلش مقتنعة بيهة
خال مهرة،،دير بالج تسويهة لا تنزلين راسنة خالي ترضين امج واخوج تجيهم حجاية وهمة بگبرهم
مهرة،،خجلت من نفسي ومن تفكيري وهالشي خلاني اعيد حساباتي جنت راح اغلط غلط يخسرني هووواي حتى لو الي حق يضيع،، حاولت انطي فرصة لحياتنة سوة وكلت يمكن اني صدك اتسرعت وماعرفت اتصرف صح وظلمت غيث خلي انطي مجال يهدأ ونتفاهم ،،وعدة شهر والوضع نفس ماهوة غيث مااتصل ولا حاول يتواصل وياية اما البقية كلهة تخابرني خاصة مهدي وحوراء حتى خالتي تتصل تتطمن علية وعلى صحتي اهتميت بنفسي والي ببطني وحمودي مالي غيرهم ذولة دنيتي بعد،،الايام ماجنات تبردني من ناحية غيث بالعكس جانت تقسي گلبي اكثر وتخليني اندم اكثر انه اعتقدت بيوم هو اماني وسندي محد سند غير رب العالمين ماكو اعتماد على اي بشر هاي الجانت الفكرة المترسخة ببالي ساعتهة،الملل ملة حياتي وبعد غيث اذاني كلش جنت متعلقة بي وخاف جنت احبة قاط صرت احبة قاطات بعد ماعشت وياه بس هو مختفي،،صايرة وكآبة واعصاب ما تنطاق حتى البقع البوجهي تروح وترجع من اضوج واحترگ والطبيب اصلا كال علاجهة نفسي اكثر مما طبي فجانت تختفي وتظهر ،، وبيوم خابرتني حوراء طبيعي تسأل مثل كل مرة واني ارتاح من اسولف وياهة
حوراا،،اليوم شفت حسين
مهرة،،اييي
حوراء ،،مااتحملت الصارلج وطگيت بيه وكمت احجي
مهرة،،اووف منج وتالي
حوراء،،انصدمت بي شلون اتفاجأ وانصدم وانتفض بودة يذبحني لج خزرني خزرة متت بدمي تدرين شگلي
مهرة،،شگال
،،،،،،،
حسين،،انة شو فدمرة طايح من عينج شعبالج انة ناقص غيرة وناموس واباوع لمرت اخوي ام محمد مرت اخوي الغيث شون اباوعلهة بنضرة نگسة
حوراء،، ماتباوع بس انتة سببتلهة مشكلة
حسين،،ليش ماكالت لاخوج انة شردت ترة انة بالحلال ردتج يا بنت عمي
حوراء،،وانتة ليش ورطتهة مااجيت وحاجيتهم
حسين،،بهاي انة غلطت وهسة رايح اصحح سوء الفهم الصار
حوراء،،اوكف شتسوي
حسين،،اروحن لاخوتج واكللهم رايد اختكم وبنت عمي على سنة الله ورسولة
حوراء،،ومنو كالك اني اقبل
حسين،،ليش متقبلين شعندج
حوراء،،هواي فروقات بيناتنة
حسين،،مثليش
حوراء،،اني اطباعي مترهم وياكم ولامتعودة على عيشتكم
حسين،،وبشنو تختلفين يابنت عمي كلنة من طين ترة وان چان على كعدتج انة مشتري بيت هنا وجاهز بعد
حوراا،،ودراستي
حسين،،كمليهة شاريد منج
حوراء،،بس ما مقتنعة
حسين،،خلص انة ما اذب روحي عليج ردت تفهمين و
حوراء،،هو انتة ذبيتهة وخلص
حسين،،يعني تشوفين تمسكي بيج ذاب روحي انة ردت افهم وافهمج الما واضحلج بس الظاهر غلطت هواي بحگج وبحگ نفسي لوتصيرين الهوة ياحووور مااشتمة بعد
حوراء،،وعافني يامهرة وراح بس احس كل حيلي يختض وگلبي يدگ حييل مااعرف ليش رغم جنت مااطيق حسين بس من سوة هيج ونضرتة ونبرة صوتة خلتني ارجف مدري شبية
مهرة،،اممم وكعت الغزالة
حوراء،،لا شنو مااطيقة بس خوفني
مهرة،،وهسة شصار من حاجيتيه
حوراء،،مااعرف راح لغيث ومهدي بالاستقبال واني اجيت خابرتج
مهرة،،الله كريم،،لليل وماكو شي ولا تغير شي لدرجة شكيت اذا اصلا حسين ما فاتح الموضوع زين اني ليش مهتمة وانتظر يتصل ويبرر موقة والصار نسيت شكد هان كرامتي لحدما طلعت من بيتهم يهددني مااطب بيتهم بعد بحياتي،،ثاني يوم خابر مهدي يسأل علية طبيعي ما جاب طاري الموضوع واسمع غيث يصيح عليه يابة رجف گلبي لصوتة رجفة هذا گلبي شلون بيه شگد يحبة حتى بهاي اذيتة واحبة،،كتلة گول لغيث اريد اكعد بالشقة وراح اخذ المفتاح من غصون
مهدي،،شلون وحدج ميصير
مهرة،،ليش مو كعدت اول ما تزوجنة
مهدي،،بس
مهرة،،حباب حاجيه اريد اريح اعصابي هناك وامان ونظام
مهدي،،احاول يلا يصيحني غيث اطلعة للحديقة
مهرة،،صار زين
مهدي،،اي احسن بعد اسبوع نذب البراغي ويسوي عمليتة الثانية
مهرة،،الله يگومة بسلامة
مهدي،،ارجعي والله متدمر هوة بس ميحجي
مهرة،،مو بگدي روحلة عيني خطية يضوج ديربالك عليه وسلملي على خالتي،،سديتة منة واني نفسيتي زفت ثاني يوم توسلت بغصون تاخذني للشقة تعبت واني احس روحي خطار يمهم خابرت مهدي وكتلة راح اروح گول لغيث تعبت والله خلي يرحمني ويعتقني واروح انچب واكعد هناك ،،لليل خابر مهدي گال ميقبل وجان اسمع غيث يصيح بصوت
غيث،،ليش طلعتي من بيتج لعد
مهرة،،انطي التلفون مهدي خلي احجي وياه
مهدي،،هاك غيث على كيفك وية البنية
مهرة،،احس كمت گوة اتنفس ارتبكت بس جمعت قوتي وحجيت،،احمم الوو
غيث،،الوو،،شلونج ام محمد
مهرة،،الحمد لله شلون صحتك
غيث،،زين ما متت
مهرة،،اسم الله طلعت لا ارادي ،،احمم ردت اخذ اذنك اروح اكعد بالشقة
غيث،،واني ماقبلت
مهرة،،ماشي هاي هية مشكور ومتقصر
غيث،،شفتي عنادج لوين وصلنة
مهرة،،عنادي يعني اني الغلطت،،تشوفة غلط واتسرعت من دافعت عن شرفي كل وحدة عندهة تربية واخلاق مستحيل تتقبل احد يطعن بيهة
غيث،،ما طعنت بيج ولااشك بيج
مهرة،،لعد
غيث،،ما وضحتيلي الصار
مهرة،،وهسة وضح عندك موو
غيث،،اجة حسين شرح الصار واعتذر
مهرة،،اي وهسة
غيث،،انتي كبرتي الموضوع من طلعتي من بيتج
مهرة،،هسة اني الغلطت موو،،ماشي غيث التريدة يصير متريد رجعتي بكيفك
غيث،،اكيد بكيفي مثل ما اتحديتيني ووكفتي بوجهي وطلعتي اتحملي نتيجة اغلاطج
مهرة،،مع السلامة،،سديتة واعصاابي نار فوكاهة اني الغلط فوكاهة اني اللازم اتنازل وارجع يعني هو ماغلط ابد،،نمت بقهرر بس الله يعلم بي مااشي ياغيث ماخذك الغرور مووو عبالك مااعيش بدونك وارجعلك اتوسل والله لهسة ما عرفت منو مهرة،،ثاني يوم خابرت خالي كتلة اريد مفتاح البيت گال موجود شوكت مترديه خابريني، ،هالايام جنت منطيتهة فرصة اخيرة لغيث يثبت حبة الي وللاسف هم خذلني ولااتصل ولا منة اي خبر رغم كل الصورة توضحت عندة بس لهسة يشوف دفاعي عن نفسي تمرد وعصيان وكسر لكلامة محد يشوفهة مسألة كرامة،،حتى خابرتة قبل ميسوي عملية سلمت عليه شسوي لگلبي اليحبة مينطيني واخاف عليه جان ردة باارد مجرد الله يسلمج وانطة الموبايل لمهدي وطلع من العملية واني على نار وهو ماكو وخالتي خابرت ورة عمليتة باسبوع وكالت اجي ارجعج بيدي واسمعة صااح مثل ما طلعت وحدهة ترجع وحدهة هنا اتحطمت كل فرص غيث وانتهى كل موقف حلو بيناتنة نزلت دموعي بقهررر كلش عزت علية نفسي بعد كل السواه وجنت مستعدة انطي فرصة لحياة تجمعنة طلع ميستاهل كلشي ابد ميستاهل ،،كعدت من الصبح جانت غصون بالدوام هية وقائد وكتلهة من الليل اخذي حسوني للروضة تعبانة صدك حملي مدمرني جان خاصة بالثامن تعبت كلش كوة لميت غراضي اني وابني وخابرت خالي كتلة الظهر اخابرلك تعال اخذني اجوي الظهر وخابرت خالي بين مااتغدوا خابر خالي گال اني بالباب،،طلعت بلغت قائد الي اتفاجأ بجيتة اسمع صوتة بالاستقبال لبست شالي وعبايتي وطلعت اسحب بجنطتي
غصون،،ها مهرة شنو هاي
مهرة،،اجة خالي ياخذني
غصون،،صدك والله وين ترجعين لابن خالج الناقص
مهرة،،لا ارجع لبيت اهلي ينتضرني
غصون،،شنو هالحجي ميصير
مهرة،،لايصير المنطقة عرف والجوارين حبابين وهناك راحتي بعد، اني لو اهلي عايشين ماجان هسة اني يمهم شيسموهة كعدتي هنا
غصون،،غير اختي
مهرة،،حتى لو اختي اذا بيت اهلي موجود فكعدتي بي اولى،،كولي لغيث شكرا على كلشي، ،لاتضوجين مني حبابة اني احبج هوواي ومااريد ازعلج وتعاليلي دائما ترة اضوج
غصون،،شنو هاي منو كلج ترحين متطلعين اصلا
مهرة،،لااطلع مع السلامة حبيبتي،،اسمع خالي يصيحني سحبت جتطتي ورحت للاستقبال وغصون لبست شالهة ولحكتني
قائد،،مهرة شنو هالحجي وين ترحين صدك جذب
مهرة،،لاصدك والله مارايحة بالشارع ترة بيت اهلي ذاك وخالي عينة علية وانتو ماراح تعوفوني اعرف
قائد،،مستحيل تطلعين منا بعدين انتي امانتي اخذتج من بيتج ارجعج لبيتج
مهرة،،موبيتي ذاك ابد ولاراح يصير بيتي بيوم واني ماراح اضيع كلكم تندلون وين راح اروح حتى غيث يندلة،،شكرا الكم تعبتكم هواي
قائد،،بلا عناد مهرررة ارجعي
خال مهرة،،عمي الله بالخير ترة كعدتهة ببيت اهلهة ارتب من كعدتهة ببيت ابن خالة رجلهة لو ببيت اهلهة لو ببيت رجلهة هيج الاصول واني مااعوفهة هاي بنتي،،يلا خالي
مهرة،،اي خالو مع السلامة واسفة اذا ثقلت عليكم
قائد،،راح اخابر غيث ويتصرف
مهرة،،عادي بلغوه بقراري اني من حقي اختار حياتي،،من رخصتكم،،طلعت وية خالو وغصون زعلت وطبت وقائد وصلنة للباب ومشينة هو يخابر،،بعدني بالسيارة ودك موبايلي غيث سويتة صامت وما رديت رجع اتصل مهدي وهم مارديت وصلنة ونزلت اني وخالي فتحت البيت وعصفت الذكريات هنا لعبنة اني وفارس وهنا بللتة بالصوندة هنا ياما وياما ركضت للباب شايلة طلبات الاكل اوصلهن وياما اتلكيت امي اركض اشيل منهة العلاليك من تتسوك طبيت للمطبخ اتخيل امي وصوتهة فارس وضحكتة من يصيحني فرسة متت بچي وين رحتوا وعفتوني
خال مهرة،،كافي خالي كافي يم الرحمن الرحيم همة،،، اليوم اني ابات يمج خاف تضوجين
مهرة،،اي خالو حباب
خال مهرة،،اروح والمغرب اجيج ماشي خالي
مهرة،،اي خالو براحتك طلع خالي وقفلت الابواب وبلشت ارتب بالبيت جانت الغراض الفوك منزليهن جوة ومرجعين البيت مثل ماجان همزين مابية اظل صاعدة نازلة نضفت البيت للعصر كملتة غسل وتنضيف بس كوة كمت اسند طولي حضنت حمودي ونمت فزيت الباب تتكسر كمت لبست شالي وطلعت صوت غصون فتحتة وهية اعصاااب
غصون،،لج وينج ردتي تموتيني وراح تموتين ذاك وهو بالبصرة
مهرة،،شكووو شبيكم
غصون،،يتصل ومتردين
مهرة،،اي مااريد ارد
غصون،،واني ليش متردين علية الف فكرة اجتي ببالي اني وقائد اجيناج ركض
مهرة،،صامت سويتة ونضفت ونمت ماادري
غصون،،راح تموتيني انتي
مهرة،،ليش ياعيني دتعالي طبي
غصون،،هاا شوفي خابر ذاك المتخبل منج ومني راح ايطيح حضي من وراكم،،الووو هاي مابيهة شي جانت نايمة ومتدري بتلفونهة اعصابك عيني شعلية اني انتو عنادكم ماكو مثلة،،،اي اي هاي وياك،،هاج مهرة غيث
مهرة،،اخذت الموبايل واول ما كلت الوووو،،جبهة حرب وانفتحت
غيث،،شلوون تسوين هيج،،شو انتي محد واكف بعينج لاعبالج وكعت ومااكدر اضبج اكسرج واكعدج بصفي والله شنو شورج من راسج هسة ترجعين يم غصون وباجر الصبح يرجعج قائد سمعتي
مهرة،،ترة اني مو طرشة اسمع بلا ماتصيح
غيث،،انت متخبلة والله ارجعي وية غصون هسة وباجر النة حجي
مهرة،،وليش ارجع انتة مو من طلعت كتلي تحلمين تعتبين هذا البيت خلص خليني يااخي وشوف حياتك مواني موخوش المن مچلب بية
غيث،،اخي موو مااشي مهرة طالعلج لسان اني اعرف شلون ارجعج لعقلج
مهرة،،قصدج ترجعني جوة ايدك ،
غيث،،وغصبا عليج، ،روحي للشقة اكعدي
مهرة،،مااريد شكرا
غيث،،يارربي لا تخبليني ولج
مهرة،،غيث شتريد مني ليش ارجع
غيث،، يعني شاريد بيناتنة طفل
مهرة،،مو حجة هاي هو بعدة الطفل جاي مدري اموت وتخلص مني
غيث،،لج انتي شبيج تخبلتي اني الج
مهرة،،غيث انتة اساسا ماجاي تنطي مجال للتفاهم من تهدء تعال نحجي وساعتهة اقرر لو اكمل وياك لو لا مع السلامة،،سديتة وانطيتة لغصون الي تباوعلي متفاجأ
غصون،،والله طالعلج لسان ماعرفتج ولج
مهرة،،اعرفيني لعد ترة حتي البزونة من ياذوهة تتوحش
غصون،،هسة ابات يمج اني وقائد
مهرة،،هههه وعليمن حبي شسوينة لعد خو جان بقيت يمكم اساس،لاعيني اخذي راحتج خالي شوية ويجي يبات يمي اليوم،،غصون اني تغيرت الدنيا كدما كفختني خلتني اعرف اوكف بوجه اكبر واحد واطلع حقي من نص عيونة
غصون،،ياعمري انتي على كيفج وية روحج هو هم حقة ترة الله بس يعلم شنو الي مر بيه ذيج الفترة
مهرة،،محد اتخلى عنة هو الي عاف الناس الرايدتة
غصون،،اهدأي هاليومين واني متأكدة راح يجي وتتفاهمون
مهرة،،الله كريم،،اشوف لساعتهة شقرر
غصون،،يمة منج صايرة تخوفين،،اروح لقائد انشتل بالباب
مهرة،،سلميلي عليه ولايظل بالكم،،طبيت للبيت وشوية واجة خالي بقة بايت يمي والصبح طلع للشغل رجعت مددت بعد وكت وماعندي شي حتى حمودي بعدة نايم اندكت الباب كمت لبست شالي وطلعت صحت منو واجاني صوت مهدي فتحتة متفاجأة وانصدمت بي وبغيث واكف كدامي عالعكاز الطبي، ،بقيت اباوعلة وهو مبين اعصاب فوول
غيث،،عشر دقايق تلمين غراضج وتجين
مهدي،،تعال غيث طب نرتاح وتكعدون تتفاهمون
غيث،،ماكو كل تفاهم تلم غراضهة وتجي
مهرة،،شكد واكعة من عينك لعد اني مااستاهل دقايق من وكتك،،باوعلي وخزرني
غيث،،شلج بهالحجي الماصخ البسي وتعاي
مهرة،،واذا مااجي،،انتة جايني وانتة الي مسوي فضل كانه راح ترجعني ترة انتة جرحتني واذيتني وقهرتني ومو بسهولة انسة الصار اذا نسيتة
مهدي،،يابة مو عالباب نحجي،،اخذيلنة طريق ندخل جوة
غيث،،لا ما ندخل البسي هسة للمحكمة نطلع مو هذا الترديه يعني جاي ارجعج ومتقبلين شتردين نتطلك يلا البسي وتعالي
مهرة،،احس كمت كوة اتنفس صعبة هالكلمة كللش بس مادام طلعت منة مستحيل اتمسك بي مثل ما عافني بهالسهولة ما اتمسك بي لو يصير النفس ،،ماشي انتظرني، ،طبيت بعصبية لبست شون مجان. فستان حوامل وشال رتبت وجهي ماردت ابين كسرتي وخيبتي بدلت لحمودي اخذت مستمسكاتي وموبايلي قفلت البيت وطلعت صعدت بالسيارة وحمودي صعدة مهدي شو مشت السيارة مسافة حسيت بدينة نبتعد باوعت لمهدي وحجيت،،وين رايحين احنة دار راسة غيث باوعلي بطرف عينة
غيث،،للبصرة عندج مااانع......يتبع