المخلص "باللهجة العراقية "

البارت العشرون

المخلص..
البارت العشرون..
بقلمي رسل..
rasolaa7

انستا Rasolaa7

چا هو الگلُب شيريد
خاطر تكتمل قصتة
درُب ما بي نهاية
وسالفه وانت..

-ودخلت للغرفة وهو وياي قبل لا يطلع كعد بمستوي
باس راسي.. لا اله الا الله..

-محمد رسول الله
عليا ولي الله حجيتها وهو ابتسم وطلع..

-ودخلت بقلب عاجز يرجو رحمة ربه صفنت على حالي يمكن عايشه واتنفس واقاوم بس علمود علاوي
والا لو ما جان موجود جان تمنيت ما اطلع من هذا الباب بعد جان تمنيت الموت لان اعرف كلش زين بي
راحتي هالدنيا الي يكولون هالدنيا صح فانيه بس تهد حيلنا تنزل دموعنا تهدم قوتنا يلا تفنى ما تفنى بسهوله
وهنياله الي يطلع منها بقلب سليم وهو مظلوم مو ظالم..

-وبدت العمليه والاطباء فوك راسي اشوفهم واني بالي مو يمهم بس جسد وخلصت واني اتقيدت تعبت وعيوني تغفي كملوا وطلعت لغرفة خاصه ودخل المخلص مبتسم باس راسي.. سلامة كلبج..

-علاوي شلونه عفيه خابرت زينب..

-عوفي ماكو احن من زينب ما ينخاف عليه انتي شلونج؟!..

-الحمد لله حجيتها وهو صافن عليه وكانو حسبه بباله
تنهد وفرك وجهه كعد قريب عني.. تعبانه يوجعج شيء؟!..

-هزيت راسي ب لا..

-لج لا تكابرين اكو واحد يطلع من عمليه وهيج يحجي..

-والله ما احس بشيء بس فخذي يوجعني ونحلانه..

-بقينا كم ساعه وطلعنا جان يمشيني بكرسي متحرك  واني احس بخمول اريد بس انام سندني وصعدت بالسيارة رجعت ظهري وهو رجع الكشن شوي وكفنا بازدحام وجان طفل يبيع مي قريب على جامتي.. الله يخليك حبيبتك اشتري عمو فدوه اشتري شوف ما بايع ويرفع بالبطالة اشتري مني يحجي ويتلفت يخاف واحد يجي ويبيع النا قبله..

-علامات الفكر والبؤس محتله ملامحه ومضيعه طفولته وعبالك قناع فوك ملامحه هالوجه مو بهذا المكان متعوب من صغيره بهذا عمره وهيج شايل حمل من تكبر شنو مصيرك..

-منظره لجم كلبي المتعوب نزلت دمعتي واني اتذكر الشارع وايامنا هالوكفه هاي وتتوسل بالرايح والجاي حتى يشترون منك تمثل الذل على اصوله هي هاي
الوكفه الي ضيعت طفولتنا..

-هالطفل اليوم رجعني كم سنه هذا مكاني وهنا اخويه
اخلي قريب اخاف عليه هناك بنت خالي والكلينكس بيدي ونتوسل بيهم وعيدنا من يصير ازدحام عبالك طفل وصعدته مرجوحه عبالك تكبيرة الجامع تعلنها
عيد..

-مرت عليه كل ذيج الايام مثل مقطع الفيديو من تعيده
هيج حالتي بهالحظات وكانو رجعت لذاك العمر وهذا اخويه بصفي وكل شوي صايحه عليه حتى يرجع يمي
لان السيارات سريعه وهو طفل ما يفهم كل همه يلعب.. 

-شبسرعه كبرنا شسوت بينا الايام عيني على الطفل
والدمعه تنزل اتخيله اخويه اخ لو بيدي ما اخلي طفل
يوكف هالوكفه بس مو بيدنا والعيشه صعبه حيل اكو
بيوت تتحسر على اللكمه واكو بيوت ما تعرف طعم
اللحم والفاكهه واكو الي ينام ودمعته بخده الفكر صعب
وبس الي يعرف شعوره راح يفهم قصدي..

-الفقير محد بحاله وعبالك ساعه معطله بعد محد يباوع
الها هيج جانت اغلب بيوت منطقتنا الفقيره تعب وكد
علمود العيشه والعيشه صعبه بس الله ساترنا
جانت اكو ضحكه على ملامحنا جان واحد يسال على
الثاني بس حتى هالحياة البسيطه انسلبت من عدنا ودائما
ضحية الحرو..ب هم الفقراء هالبيوت البسيطه تهدمت
الاطفال والناس الي تشرد والي تعذ..ب والي نق..تل
وهي هاي نتيجة الحرب..

-انطاه المخلص فلوس وهو فرحان التفت عليه زمرد هانت كافي كلبج تعبان عمي رجعولنا ام لسان شني هاي..

-واني زدت بالبجي اشرت وراي على الطفل ما هانت
ولا تهون ما انست ولا تنسي هاي الوكفه والحر والبرد
علمود الف لو ربع وبذله نحصلها وهو كله كلينكس لو مي وين حق الطفل وين حق الفقير..

-لج كافي الله موجود كافي كلبج تعبان رجعت راسي
على الكشن نعسانه والظاهر بدا مفعول المسكن بس حتى مفعوله انتهى بسبب منظر الطفل والمخلص كلما اجتي عينه عليه يتنهد..

-ما اعرف شنو مسويه بدنياي
ما اعرف منو الي داعيلي دعوه صادقه
والله خله هالشخص بطريقي لوما هو ما اتخيل روحي
باي شارع كاعده اني وابني..

-رجعنا للبيت كبل نمت هواي بحيث ما ادري بالدنيا وره ساعات فتحت عيني بتعب فخذي يوجعني واسمع صوتها تحجي ويا..

-شلونها؟!..

-وهو رد عليها.. نايمه من اجينا لهسه مفجوعه نوم..

-خليها ترتاح سوده عليه وينها وين هالتعب جا ابنها
وين؟!..

-يم زينب وجر حسره..

-اتقربت عليه باست راسي وشكلهم راحوا صوتهم اختفى واني وحدي خليت ايدي على مكان كلبي شكد تعبان كلبي بس روحي وجعها اكثر..

-ودخلت زينب الي بيدها علاوي كعدت بصفي ونزلت دمعتها زمرد ادعيلي انتي مو مظلومه وبشده ادعيلي
بطفل ينور حياتنا والله تعبت من الكلام الي يجرح لا القريب ولا الغريب يرحم وعبالك هو بيدي..

-خاف احجي شيء وهم مثل اخوج تكولين ام لسان..

-هي ضحكت احجي بردي كلبي ما عليج..

-انتي صوجج والله اي واحد يغثني بكلمه اطلعه من تفكيري قبل لا اطلعه من حياتي انتي الخلل بيج تفكرين
بيهم وبكلامهم هواي اي الكلام يجرح ويدمر النفسيه
بس مو معناها نوكف حياتنا على كلام ناس ما تستاهل..

-زينب محد يفيدج غير نفسج هاي مو اختج الي مهتمه
بكلامها ترى اول الناس تتبرى منج لو صار عليج شيء خلي كلامهم جوه رجلج وامشي دوسي على كلبج لا تفكرين بيهن ابد صحتج اهم والطفل اذا مقسوم الج راح
تشوفينا وغصبا على كل شامت واذا ما مقسوم اتاكدي
ربج باعد عنج شر انتي جاهلته لا تفكرين بالناس فكري
بنفسج وبيتج وبس..

-مسحت دموعها والشهكه ملازمتها شكد قوية انتي والله اتمنى يرزقني شوي من هالقوة..

-تنهدت مو قويه زينب بالعكس اتكفخت من هالدنيا هواي بس اكتشفت اذا سكتي وما قاومتي راح تنداسين اكثر واكثر..

-يبعد كلبي نامي ارتاحي اني هم دوختج ولا تفكرين
بعلاوي راح اخذه يمي جوه..

-غمضت اهدي حالي وفتحت لا فدوه امج ما تحبه لا تاخذينه خلي يمي ما قصرتي ويا..

-ولج لا تصيرين كلش امي نايمه وبس اني وياسر
خلي يمنه شالت ايد علاوي وتلوح بيها باي ماما اليوم
خلي بابا يمج اروح يم عمه..

-ابتسمت وهي اخذته وطلعت الله يجبر بخاطرج يا زينب..

-شوي ودخل ابو تراب الي ابتسم بوجهي وكعد بصفي اخذ ايدي وشكل المغذي جنت متمدده وعيني تراقبه اشو هذا بلحضه رفع ثوبي واني دفعته بقوه حركت رجلي وفخذي تاذه اخ حجيتها وهو صاح..

-شبيج ام لسان عقلج وين شطح اريد اغير الضمادة هاي بيها دم خرب بعقلج لج نترست دم..

-وهو هيج جفلتني هاك شوف كلبي شلون يدك..

-شو خلي اشوفه حجاها وغمز..

-دفعته بتعب ومددت رجلي.. والله انت فد واحد
سرسري ما تنلام عمه نبع..

-شو انتي مستفلكه الوضع كلش سرسري شنو مو لسانج اعضه..

-وخري ايدج يلا وخريها شو..

-سكتت يكلي ام لسان وهو ما ينكدر للسانه
فتح الضمادة وغيرها وكل شوي رافع عينه عليه بقلق
يتفحص معانيي.. سباعيه ام لسان ولج شدعوه هالكد
حليوه..

-ترى مريضه حرام عليك هيج تباوعلي وتحجي وتتغزل..

-دولي مرتي وبكيفي..

-عيوني بدت تغفي ورجعت نمت واخر شيء اتذكره هو وجهه بعدما مدد بصفي وسحب راسي خلاه على ايده عفيه رجال يموت على الحضن ومن اكله سرسري
يزعل وما يقبل يمكن امه قبل لا تجيبه جانت حاضنه ابوه ماكو غيرها..

-ثاني يوم جنت احسن وهو وياي علاجي انطانياه وحتى الضمادة غيرها وندك الباب صرت حافضه دكت فداء وجانت ويا مرته اجوي يتحمدون على سلامتي..

-ومرته جانت طابخه الغده وما مخليه شيء ما جايبته
وياها شكد حبابه هالبنيه..

-طلعت سلمت على فداء الي باوعلي ورجع باوع على
ابو تراب تذكرني بسعدي من اشترى سياره مسكربه
خويه شجاج كل يوم مهبطتنا..

-فداء انجب صاح بي المخلص وهو ضحك وكعد
ماكو دقيقه ورجع اكلك اليوم لزمنا اخو سوسو ****
وداعت خشمك الي اكبر من لشه جدي هي ارجل منه
يمكن لاعبين بالاعدادات..

-ولك شلون بيك انت لسانك ما تكدرله..

-ضحكنا اني ومرته وكمنا وهو مستمر كل كلمه والثانية لو فشر لو شطح بتفكيره بس والله يغير الجو
بسوالفه لو كعد كبالنا نخلصها ضحك وعبالك واحدنا
خالي من الهموم..

-ومرته تهز بيدها باوعتلي.. تدرين هو هيج حتى من ضايج حتى من يستشهد واحد من جماعته يكول هو العمر كم يوم عليمن مكدر خلكي وخلكم اليوم هو وباجر
احنا وراه..

-الله يحفظه الج حجيتها وهي رفعت ايدها امين..

-بقوا يمنا للعصر يلا راحوا بعدما شبعنا ضحك من رجلها الي ما سلم واحد من لسانه..

نورا :

-فتحت عيني واني اباوع على الي متوسدة بحضنه ابتسمت بخجل من تذكرت شلون حضني قبل لا ينام ومن حس عليه خجلت همس.. علاج المريض حضن محبوبه..

-اباوع على لحيته الي توهه طالعه وشعره الي مكفش من النوم ورموشه الكثيفه ابتسمت واني لأول مرة وبعد شهور انام واني احس بأمان مشابه للأمان الي جنت اعيشه ببيتنا وبغرفتي وبوجود اهلي الامان الي فقدته من صرت بيد التنظيم جنا كل يوم اني والبنات الي مسجونات وياي نعيش برعب بسببهم كل يوم وحده منا تتوقع انو اليوم دورها وراح تنتهي كل حياتها واحلامها وبراءتها بس الحمد لله الي نجاني وخله علي بطريقي الله لا يرجع ذيج الايام الي حتى ما اكدر اتوقع حالي شنو لو ما كدرت انهزم بهذاك اليوم لو شكد ما اشكر الله على نعمة وجود علي واهله بحياتي احس قليل جنت بعدني افكر وصافنه على وجه علي فززني صوته..

-يتهنه الشاغل بالج بويه على هاي الصفنه..

-انت ؟!..

-والله بهاي اللحظة ودي الگاع تنفتح وتاخذني بدون شعور مني طلعت هاي الكلمة بس يمكن عقلي لان جان يفكر بي طلعت الكلمة احس خدودي صارت نار من ظحك وهو يتقرب من وجهي ويطبع بوسه على خشمي..

-اموت على الي يخجلون بس تردين الصراحة ما توقعت جوابج حجاها وهو يبستم..

-علي !..
صحت بي من فشلتي وهو ضحك وسوالي علامة الي اني معليه بأيديه والله صدك هو شعليه اني جفصت  تركته يظحك وكمت سحبني عليه.. وين وين تعالي وخري هاي من ايدي ضجت وياشر على الكانولا..

-بعد عندك ابره خلي اضربك بيها واشيلها..

-كمت من مكاني رحت سويت ريوك اله وخاله مبتسمه
وتدعي شكد حلو تفرح من تشوف واحد بينا فرحان واني احس روحي طايره ومن اتذكر كلامه ابتسم بخجل
واجتني ضربه من لارا..

-شعندج صافنه وايدج على الخد والابتسامه شاكه الحلك ؟!..

-ولي منا لارا مو وكتج..

-ها جبحج على وجهج اخوي الله ربج خو بعد نسيتي
لارا فد وحده خاينه خلي اروح يم جعفر وشوفي بعد منو يكلب وجهج..

-رفعت ايدي ربي عين جعفر على هالبلوه الي راح
يبتلي بيها..

-امشي ولي لج انتي وجعفر وعشيرته تروحولي فدوه
هزت ايدها وراحت واني اخذت الريوك ورجعت للغرفه وهي غمتني نسوان مفلفله شافت علي نست لارا
ومن نسألهن يلطمن وكالن لا تزوجن والله تعب والله لا عبالجن الزواج بس بدله وركص وهم بالغرفة مخلصينها ركضت عليها بعدما ذبيت الصينيه وسديت حلكها عزا فضيحة انتي..

-ولي لج قابل مجذبه حجتها وابتسمت وكرصت خدوي
حيل ولج فدوه شوفي الحب شلون مورد خدودج..

-كلبت عيني ودفعتها لا حبيبتي مو الحب هاي ايدج
بلايس وشلعتهن من مكانهن..

-رجعت للغرفة وهي تحجي عليه واني ميته ضحك عليها والله ما جذب علي من كال ضحكة وملح هالبيت
لارا..

-انطيته الريوك وبعدها ضربته ابره وشلت المغذي
وهذا عبالك مو تمرض لا نكلب طفل شكد ما تدلل علينا
وخاله مكيفه طايره بينا ولو كال اريد مي صاحت نورا
ركض يمه جيبيله ولارا ناصبه علينا..

-مر اسبوعين تحسنت حالته تعلمت انام الا بحضنه ما يطلب شيء الا من غيري عودني عليه بشكل وتعود
عليه..

-اليوم جان كلبي معصور ومشتاقه لاهلي وقت غروب والجو كئيب يصير بهيج وكت خصوصاً اذا عندك احباب وشوق ذابحك عليهم صعدت الدرج وفتحت باب السطح اول ما فتحته لفحتني برودت الجو وريحه الشجر بعد المطر لان مطرت الدنيا العصر وهاي لأول مرة اصعد للسطح بس حسيت اريد ابجي وضايجة حيل  باوعت للسطح جانوا مخلين بي غراض قديمه سرير مال نفر واحد وجان اكو ترمس مي قديم وكم قطع اغراض وبايسكل جان التراب مغطيهم اتقربت اكثر من السياج واني اباوع على الشارع والناس والسيارات الي تمر اتنهدت بحزن اكره وقت الغروب كلش يهيج كل مو اجعي ويهدم كل القوة الي احاول ابنيها بيومي  باوعت جانوا اطفال 3 يلعبون كرة نزلت دموعي واني اتخايل ادم حبيبي وياهم شنو ذنبه ونحرم من الحياة ومن طفولته بسبب القذرين زين الطفل شنو دخله بالحرب احاول اتماسك بس مكدرت امسح دمعة توكع الثانية حسيت خطوات اقدام ورايه مسحت دمعتي والتفتت جان علي هو من شاف دمعتي وحالي ما حجه شيء واصلاً الحمد لله ما سألني لان لو حاجي كلمة وياي يمكن انهار من البجي هو اتقرب مني..

-تشوفين هذا البايسكل لسه اتذكر شلون حصلت عليه  خلصت كم شهر واني اتوسل بأبويه حتى يشتريلياه
بس هو جان ميقبل يكول انت وكح واذا جبته الك لو الكاك داعم طفل بي لو انت تدخل بي جوه السيارات مليت واني اتوسله زعلت بجيت وهو قافل تالي بيوم زعلت عليهم ورحت يم خالي بدون ما احجي الهم..

-وهو خطية ثاني يوم اجه عليه ورضاني واخذني وكال اخذ البايسكل الي يعجبك بس لا تسوي هيج بيا مره ثانيه
لا توكع كلبي عليك غير من خوفي عليك ما اخذته الك..

-واشتريته وصار عندي بايسكل وتعيقلت بي بالفرع وتالي كلامه تحقق كم مرة اوكع بي وكم مرة يجون يشتكون لابويه مني الى ان طفح الكيل وابويه كسره بيومها شكد بجيت وماقبلت عليه اخذته وضميته بالسطح كلت بس اكبر اصير فيتر واصلحه وبعدها بكم سنة توفى الغالي صرت من اشتاق اله اصعد هنا وابجي شكد حاولوا كرار وامي يذبوا ماقبلت تعرفين ليش عفته سكت شويه وبعدها كمل..

-حتى دائماً من اريد اقرر اسوي شيء اصعد واباوع عليه وافكر انو هذا الشيء راح يأذني وتالي ينكسر او اني انكسر لو لا صار ومثل ما تشوفين صار مثل الرسالة والتوجيه الصحيح  من ابويه الي..

-اتعجبت عليه وعلى تفكيره وتفكير يمكن صح اكو اشياء هواي جانت مجرد العاب بالطفولة بس من كبرنا اكتشفنه بيها عبر ودروس مفيدة وانقهرت عليه شلون يحجي بحسره كلب يمكن احنا البشر وبالأخص العراقيين بكلب كل واحد منا  قصة وغصة..

-اتقربنا على السياج صفن شوي وعينه سارحه بالمشهد
الي كباله.. ايبااه شكد جنا نلعب بهذا الفرع اني وجعفر  وعمار ولؤي بس الحياة من تمشي ويا كل يوم وسنه بيها نتغير وتختلف هواي اشياء بيها قبل جنه ابد محد يعوف الثاني هسه وين..

-شوفي واشر بأيده لبيت جان مثل المهجور او متروك حتى الحديقة مالته جانت متروسه اوراق شجر..هنا جانوا بيت لؤي بس بسبب الطائفية  نكتل بوكتها جان بداية شبابه اهله ما تحملوا وتركوا البيت وسافروا..

-تنهد وفرك وجهه تدرين مرات اكول كلبنا شكد قاسي وكدرنه نتحمل ضلع من ضلوعنا ينكسر ويختفي بس ليومها اني ماافوت من بابهم اروح من جهه الثانية رغم طريق الفرع يصير ابعد لهذا اليوم ما كدرت اواجه حقيقه انو هو راح وبعد ماكو دائماً من اصعد اباوع منا اتخيله موجود واحنا بعدنا  نروح للمدرسة سوه و نلعب ومن نتعب نكعد ببابهم وتطلع امه الله يذكرها بالخير تنطينه كيك وعصير جان طعم الكيك والحلويات الي تسويهم ما يتقاوم وهذا مكانه هنا كعدتنا هنا نتاسبق
هنا نلعب طوبه غيابه غيب لمتنا وضحكتنا وحتى جمعاتنا..

-مرات تضيك بينا اني وجعفر ونتخيله موجود ويانا بس بالواقع لا هو الي موجود ولا حتى بابهم ماعاد ينفتح ولا عاد لؤي بينا راح وانتهى حلمه ويا..

-جان يحجي ويتنهد فرك وجهه حيل واني ابجي الذكريات تدمر ياريت الي يروحون ياخذون ذكرياتهم وياهم راح فتح التانكي واخذ مي غسل وجهه..

-يلا بويه  كافي خلي ننزل لا الحجية ترزلنا وتسوينا كفار ترى صارت الصلاة حجاها بظحكة ابتسمت ونزلت ويا واني كلبي معصور قهر وشوك..

-من نزلنه صلينه ودخلنا للصالة من شافتنه الحجية صاحت وين جنتوا يمه ؟!..

-قبل ما نحجي سبقنا كرار.. يمة جانوا بالسطح والله من شفتهم رجعوني لأيام السبعينات من جان عمي يشوف حبيبته من السطح وياخذني ويا مرسال اوديله  رسائل شوك لحبيبته..

-ابتسمت بخجل على كرار والله هاي العائلة كلهم ما يفوتهم شيء ابد..

لارا..

-التوتر والنفسيه زفت بهاي اللحظات كاعده على الكرسي وكلبي دكاته مسموعه جابتلي نورا المرايا باوعت لروحي والله ذني غضب امهات الصالونات شلون يغيرن الواحد هسه جعفر يكول بطلت وين لارا منو بدلها..

-جان شغلها حلو وشعري شلون رافعته والله عاد ما قصرت واني كتلها اريد اطلع حلوه هو واحد كم مره يعرس بحياته..

-جان فستان الخطوبه بنفسجي فاتح حلو كلش والتسريحة والمكياج محلاياته رغم التوتر رغم الخجل بس فرحانه عشت هاللحظه حالي حال اي بنيه من جنت مراهقه واسمع من البنات هاي الي تحب وهاي الي تنخطب انقهر واكول يمكن لان اهلي ما يردوني محد
راح ياخذني ما جنت متوقعه انو هيج تعويض ربي مذهل وحلو..

-جعفر بفترة قصيرة خلاني اتعود عليه بفترة قصيرة
انطاني حب عمر كامل غزله كلامه لهفته الي ما يعرف
يخفيها كل هاي التفاصيل نغرست بكلبي واليوم اجا وقت حصادها وقت عقدنا وجعفر يتوج حبه بعقد الحلال..

-كعدت يمي نورا واني رجعت المرايا الها.. حلوه مو تجامليني اطيح حضج..

-هي ضحكت.. تخبلين لارا حتى علي من نزل لمحج يكول لارا طالعه كيكه صدقه لربها..

-عزا بعينج وهيج شافني اني وهالطيحان حظ وتاشر على فستانها غير تحجين تنبهيني ولو انتي ايست منج علي طلع عينج كلش..

-اهو شراح يسكتها بعد ترى مجرد لمحج ولج فرحان
يكول امنت عليها ما الكه مثل جعفر نسيب..

-اويلي فديت رجلي اكلج مو تاخروا..

-غمزت الها وبنت خالها ضحكت ولج لارا مفلفله عيب
استحي..

-ولن مو هذا قصدي فاسدات بس تعبت من هالتسريحه
واللبس..

-شوي وصارت هوسه وكالوا وصل العريس كلبي صار دمام وبعد ما اسمع بس الهوسه والهلاهل اجتي نورا خلت الكيك كبالي ولج هذا جايب العشيرة كلها يمكن شلون حلو والله رفع راسج..

-دخلوا النسوان يهلهلون والهوسات خصوصا مره عمه الي مربي هاي عبالك ابنها بوستني وفرحانه وجان يكوموني بغرفه امي ودخلوا اخواني والشيخ وهو..

-جان الكبوس على عيوني واشوف بس ايده الي قابض
عليها ومره يرخي والشيخ يحجي الى ان عقد النا وهو
صوته رايح من الفرحة كوه طلعت كم كلمه رد عليهم
وكرار ناصب عليه وكمنا للصاله واشتغلت الهلاهل
وايدي بيده وكانو ملكت الطمأنينة كلها هيج دفو هيج حنيه شايل هالشخص..

-كعدت وهو بصفي همس.. شكد حلوه طالعه اهلهل
اكمز ما اعرف لج شسوي من فرحتي..

-واجتي مرت عمته جابت الذهب لبسنا الحلقات ولبسته
وايدي ترجف ونظراته الوكحه وترتني اخذنا صور
تالي طلع واحنا البنات بقينا وخلصناها ركص..

-اجتي نورا.. كومي وياي عيني العينتين استاذن من كرار يريد يشوفج شويه..

-يا ولج فشله منهم ولا اروح كافي ما شبع..

-دفعتني دفع للاستقبال طبيت وهو طفر سد الباب ورجع يمي باس راسي ونزل للكاع سجد سجدة الشكر
هنا نزلت دمعتي الموقف اثر بيه هواي لهالدرجة تحبني جعفر واني الي جنت مستهزئة بمشاعرك..

-رفع راسه ومسح عينه الي دمعت حضني وكعد وكعدت بصفه ونص جسمي بحضنه يبوس وفرحان فرحه من كلبه..

-رفعي راسج خلي عينج بعيني..

-رفعت راسي همس شهالعيون وهالوجه الي اموت عليه لارا ما تدرين ولا اني الي اعرف شلون اشرحلج شكد احبج..

-ليش اني المدرسة جانت متروسه بنات ليش اني بالذات؟!..

-ما ادري اكلها ما ادري بس ادري عن شيء واحد احبج هواي اكثر من روحي..

-باس راسي وهمس.. فرحان بيج يا صبري ويا تعبي ويا حلم عمري..

-احضنيني لارا خلي فرحتي تكتمل..

-حضنته واني خجلانه منه وبنفس الوقت كلامه اثر بيه
جعفر اريد اكولك شيء من هسه حجيتها بصوت رايح من الخجل..

-كولي عيوني الج..

-لا تقهرني بيوم اكتفيت من القهر بحياتي والله ابد لا تقهرني ولا تعيرني بابويه بالذات هالموضوع ما اريد واحد يفتحه..

-باس عيوني الي دمعت وبعد شعندج حجي طلعي الي كاتمته وخايفه منه..

-ابتسمت وكل شهر من تستلم راتب ما اريد منك لا فلوس ولا مكياج اريد وردة بيضه وياها نستله..

-ابتسم وبعد..

-تجرات وحضنته اقوى حبني هواي حبني ولو شفتني ضايجة بس كلي بويه مثل كلمه علي..

-حضني وباس وجهي كله فرحان طاير واني تنهدت براحة تفاصيل بسيطه ويمكن غيره يضحك عليه لو حجيتها بس هو بحنيته بهدوئه خلاني ارتاح واحجي الي
بكلبي لحظات عبالك حلم وندكت الباب وصوت علي.. جعفر راح اطب اطلعك دفرات شبيك مشايف..

-وجعفر يضحك مسح وجهه وعدل قميصه طلعت فشلانه عيني ما رفعتها والولد دخلوا يمه ونسمع ضحكهم..

-يومين بس يومين فرحانه بيهن يعادلن عمري كله
يتصل ويشبعني غزل شنو يطبخون يدزلي بيد علي وعلي يضحك عليه ولج هذا طلعلج باليا نصيب وامي
تخزره صل على النبي..

-ما مر غير بس هاليومين وتفلش الباب علينا جنه بس
احنا البنات وامي بالبيت طلعت امي واحنا وراها واسمع صوت هز كياني هز وهو يصيح.. بنتي هي بكيفكم تزوجونها بنتي هاي والله اهجم هالبيت على راسكم..

-كلمه وحده كفيله تهدم قوتك
تصفن روحك
تذبل عودك
بنتي هالكلمه شكد حلوه تطلع من حلك الاباء وخصوصا من يكون مفتخر ويصيح بنيتي..

-بنته اضحك لو ابجي لو شنو اسوي اني هسه تذكر بنته شنو جان نايم واني ما ادري احس اذاني وشت ابتعدت كم خطوه ما عندي قوة اي اني بس لسان
اليوم اكتشفت ما عندي قوة المواجهة شلون يعني راح
اشوفه يشبه منو مثل ما اتخيلته لو لا راح ياخذني بحضنه لو بسجنه..

-ايدي ترجف ودموعي تنزل ضايعة ونورا تبجي وياي
ليلى تهدي بيه واني ما اعرف شنو يحجون دخلت للمطبخ كعدت على الكاع وبرودتها ما بردت كلبي..

-وصوته اقترب وخطواته اقرب ودخل وامي وراه
ما ضل عندي حيل اريد اكوم اريد اشرد هذا ابويه اشو مو مثل الصورة الي مخليتها ابالي وبكلبي عندي عتب
هواي كله نسيته بطلت كل شيء ما اريد بس خلي يروح عني..

-دموعي تصب وهو صافن عليه بويه لارا بويه اني
ابوج يبعد ابوج..

-رجفت شفتي.. ابويه منو الي عافني لو الي حتى وجهي ما شافه لو الي حرمني من كلمه بابا منو يا ابو احجي يا ابو منين طلعت ما عندي ابو غير حجي احمد..

-تقدم بعصبيه ضحكت ضحكة قهر جنت اضن اول ما يشوفني راح يحضني بس ابوي طلع مو حنين ابوي طلع ما يعرف بجرح كلبي سحلني واني ما عندي قوة
بعدني بصدمتي وامشي وراه وامي كطعت روحها
ليلى ونورا يتوسلون وهو صاح بيهن بنتي مو بكيفكم
بنتي..

-صعدني غصب وعيني تصب دم مو دمع امي نورا
ليلى بيتنا كلها تبجي واني متبنجه وصعدت ويا وانطلق
وين وشنو مصيري ما ادري بس الي صعقني هو انو الي كبالي هذا ابويه الي عشت عمري بانتظاره وخيب
ضنوني واني اسمعه يحجي بعصبيه وياهم شلون ينطوني وهو ما عنده علم....

يتبع....

هواي مشتاقه الكم..

لا تنسون التصويت وتعليقاتكم الحلوه حبايبي فجروا
البارت تعليقات الي مشتاقين للقصة..

اللهم صل على محمد وال محمد❤️