عزيزي القارئ فضلاً وليس أمراً أضغط تصويت لنشر المزيد من احداث الروايه،
فستان أحمر
تحسين لقمان
رجفه سريعه مشت بجسمي , كلت بكلبي شنو اطلعني وياهه ولا تالي ماتالي اطلع أبوك
دخلت عليهم بالصاله باوعتلي وكالت
مهره : مياده شلون ادخلين هيج ياعيوني
مياده: هسه انتي الي يهمج شلون دخلت هيج
احجيلي شنو تردين اطلعيني وياج اني قابل جايه لهنا اشتغل عندج
كام الحجي وكال : مياده مياده السانج يامياده لتنسين الكاعد كدامج
باوعتله صفح ونصيت صوتي : ماناسيه منو الكدامي , بس شنو اطلع ابوك
كال : اي طلعي تونسي وبعدين شراح تسوين بس تساعديهه بجم شغله وهي
راح تبوك الي تريده واطلعون من البيت ,
كتله : الي يريد يتونس خو مو يطلع يبوك هاي لاصايره ولا دايره بس يمك يحجي مطلك
كامت مهره وكالت بصوت عالي : حبيبتي والله اني كولش مكبره حجمج ان رضيتي وان
مارضيتي اول وتالي ترحين ويايه يلا روحي عن خلقتي بين ماكمل جم شغله ونطلع نبوك
طلعت من الصاله واني اهز بيدي والله يالله هاي العائله كلهه تتعاطه شي ومتأكده انُ هم
مو بكامل ارادتهم العقليه لكيت كدامي نوكيا وصابرين وجم بنيه واكفات يشدن
شال على خصرهن •
صابرين العبده: يلا يلا مياده هاج هذا الشال شدي مثلنه على خصرج
وشمرتلي الشال بالهوى لزمته على السريع كتلهه : شكو شكو شراح تسوون ، جاوبتني ياسمين
ياسمين : تدريب صباحي شويه ندرب وانتي جديده متعرفين تركصين عاد تتدربين ويانه ,
مياده : يا يا ياسمين تخبلتي اني هنا جايه خدامه لو رقاصه شنو تخبلتو
صاحت نوكيا السمره : لج ماما دتعاي هي شويه هزت خصر وهزت ركبه وينتهي الموضوع يلا يلا ويانه
طلعت مهره من الصاله وكالت : هاي شنو بنات بعدجن لحد الان لا شادات الشال لا واكفات عدل
يلا ماماتي بسرعه راح نتأخر على التدريب •
شفت نفسي اخذني الواهس او بالاحرى ضايجه شسوي اخذت الشال وشديته ,
ياسمين: لج مياده هذا ماينشد هيج تعاي يمي اني اشده الج,ضحكت ورحتله
كتله : خبره خبره ماشالله ,
كالت : لا بس متعوده من زمان هسه انتي بعد جم يوم تصيرين استاذه وتخرجين جيل على ايدج
وتكومين تنافسين مهره وهضيمه •
ضحكت من كل كلبي , بنيه ماعرفهه كالت: اي اي واخيرا شفنه ضحكتج ,
باوعت عليهه لابسه فستان لون بيجي وشاده الشال وتهز ركبه كتلهه : شسمج انتي لحد ألان ماتعرفت عليج
كالت : عيوني وياج ثريه الدنبكجيه
كتلهه : والنعم منج عيوني , شنو شغلج ادكين اضاهر
باوعتلي صفح وكالت : اي عيوني ادك واهز واسترزق ,
كتلهه واني مبتسمه : حبيبتي الله يكثر رزقج واطورين الي ادكين بيهن
ثريه: امين امين وكولي يبعد عني شغل الحرام
ضحكت وكتلهه : امين عيوني , باوعت لياسمين كالت : يلا هسه نشد تمام
مياده : علميني عليه علمود اسوي وحدي مره ثانيه خاف انتي ماموجوده
ياسمين : باوعي عيوني تحطين هاي الطبكه الاولى من الشال وبعدهه تحطين هاي الطبكه الثانيه فوك
الطبكه الاولى علمود يصير ثخين الشال افضل
وتشدي على الخصر حيل علمود تبين تقاسيم الخصر وعلمود تكونين اكثر اغراء للزبون •
مياده : والله فدشي
ضربتني على جتفي وكالت : قابل أغشج اني ياعيوني انتي وتره ها اني ياسمين مو شويه
صاحت ثريه : يلا يلا بنات سون دائره راح ابدي ادك
مهره : لا لا اوكفي البارحه ركصهن جان ما أدري شلونه ابد ماحبيته ماحسيت اكو طعم
بنات اريدجن هيج ترفعن صدرجن بيدجن وتتقدمن على الزبون شويه شويه
اني هسه لا طالعه ولا راكصه مجرد تخيلتهن يسون هيج استحيت من يمي يعني صدك ماعدهن أي
مستحه •
صابرين العبده باوعت على مهره وكالت : اكلج عيوني انتي شايفتهم شيسون من نركص
ماشايفين والله كمية التخلف الي عدهم جبيره وانوبه اطلعلهم اسويلهم هيج
لاعيني عذريني مهراوي اني صدري اريده للشدات•
صاحت عليهه : لعد ينكطع من راتبج , يعني بنات اني ارجع واعيد واحجي وياجن انتي بنيه كاعده
تستلمين راتبج كامل ومكمل غير تحللين خبزتج ياعيني يلا من هسه تكلي منو تريد تهز صدرهه
ومنو لا علمود اسجل اسامي واكطع من الرواتب •
نوكيا السمره : اني مره من يوم يومي اختصاصي هز ركبه وخصر شنو جديده هاي تعالن لزمن
صدرجن وسون حركات
مهره : يغبره يصخله كلما تهزين اكثر , تحصلين اكثر يحطلج الخمسه والعشره جواه
شتردين بعد وهذا كله الج تاخذي
نوكيا : ها ذا هيج يلا يلا علميني اني اهز صدري ماكو اشكال
ياسمين : واني هم علميني
سجلت الاسامي مالتهن , وصلت اليه وكالت : اي عيوني انتي شنو شتهزين
مياده اني خليني خدامه اجيب بطاله كلاصات
مهره : عيني هنا ماعدنه هيج شي كلنه نركص اكو من الي يوزع البطاله والكلاصات
مياده : ماكدر اني لعد ,
مهره : يلا اخذي ملابسج وبره اوكفي
صاحت ياسمين : لحظه مهره تره الحجي جابه لهنا خدامه مو راقصه والبنيه كاعده تكلج خليني
خدامه اودي البطاله والكلاصات شنو هي وليه •
صاحت عليهه : واني من شوكت امشي برأي الحجي وست مياده هنا الكل تركص وتبزخ
لتخليني اخلي الحجي هم يهز وياجن تهي بهي , طالعتلجن عين ساقطات
مياده : يلا يلا ماريد مشكله قابله
مهره : من البدايه وكولي راضيه رايدلج زفه
وكفت مهره كدامنه واحنه تصفطنه على شكل سره وراهه وثريه واكفه على صفحه حاطه الطبله
وكاعده ادك كالت مهره : بنات شسوي من حركات تسون ورايه الان تضبطنه يلا ثريه ساقطه دكي فضيني ,
كلنه نباوع على مهره وشتسوي نسوي وراهه , هزت ركبه احنه هم هزينه كامت ادخل بطنهه
ليجوه واطلعهه بشكل سريع بالكوه ضبطتهه,
بعدين صاحت : بنات بنات من تسون هاي الحركه ام البطن, تبدن تحركن ايدجن باتجاه البطن
وترجعنه ليوره معناهه حركة السجاجين يعني تتخيلين سجينه بيدجن وتضربن البطن
وحاولي من تسويهه تميلين خصرج لليمنى واليسرى يلا يلا ورايه سونه
وفعلا سوينه وراهه الى سوت غيرهه , هزت جتف واحنه وراهه نهز , كالت : بنات اكطع
وكفنه كلنه ننتظر نسمع شتكول : باوعن أول مادخلن على المعازيم توكفين بالنص تنطين تحيه
للكل مو تسوين التحيه مالتج مال ذوله المثقفين الي ميخافون الله لا ماما بهاي الطريقه ,
توكفين بالنص وتصفطين رجليج حشك كلش وترفعين ايدج ليفوك وتهزين كل جسمج يعني
رجليج تنهز بطنج تنهز وبعدهه الخصر والصدر لحد الركبه , وايدج مو تضل مرفوعه مثل الصنم
يالخوثه لا ترفعين بيهه شعرج وتضلين تحركين بي ومن تهزين جسمج ادورين حوالين نفسج
علمود تبين تفاصيلج للكاعدين ويحمون شويه شويه الى ان يبدون يورقون الي بجيبهم
كالت ثريه بصوت عالي : ها خواتي ها
كلنه ضحكنه وكلنه : ها ها
ثريه : تونس خويه تونس سد البرده وسد الباب وتونس خويه تونس
ولزمت الطبله ادك بيهه وصابرين دخلت بالنص تصيح :هجع هجع روح روح
وياسمين : هلا هلا ليجوه ليجوه يلا يلا صابرين روح روح
نوكيا السمره : اكطع , بنات بنات
كلنه : ها ها
نوكيا السمره : اها اها تحضر خويه تحضر
جيب الحفاظات وتحضر خويه تحضر
وصرنه كلنه ندبج بالنص ووحده تسوي حركة السجاجين ووحده تهز الخصر ووحده تهز الجتف
الى ان صاحت مهره بينه : بس بس ساقطات والله عيني انتن تعلمن بلد كامل وجماله اني الغبره
كاعده اعلمجن يلا يلا ولن عن خلقتي ,
كلهن اطشرن وكلماً راحت لشغله تسويهه وصابرين العبده ونوكيا السمره , وحده كايده ايد الثانيه
وصايره بمقابيل الثانيه ويركصن وثريه كاعده على الدرج ادكلهن ,
وذني منتهيات من الركص ,سمعت وحده تصيحني من بعيد درت وجهي لكيتهه مهره
كتلهه :ها عيني صحتيني
مهره : اي تعاي للغرفه مالتي
مياده : وينهه هي
مهره : تعاي ورايه ومعليج
مشيت وراهه دخلنه بممر , كلت بكلبي
"عفيه بيت شكد بي ممرات " دخلنه للغرفه
كالت : اكولج عيوني صح الي سمعته ان ام مازن تصير امج
بلعت ريكي وكتلهه : ها منو كلج منين جبتي هذا الحجي
مهره : شوفي عيوني اني ماكو شي ينخفي عليه ابد واني ميهمني امج ام مازن واله ان جانت
خالتج او عمتج ميهمني ابد، اثنينكم اذبكم بأقرب حاويه مال زبل , الي يهمني انتي
حطيت ايدي على صدري ورفعت حواجبي كتلهه : اني اني ليش شتردين مني
ضحكت وكالت : شبيج ماما خفتي ماكو شي هيج مجرد شغله صغيرونه ,
مياده : مثليش هاي الصغيرونه
مهره :مثلا اريدج تزوجين ولد
رجعت ليوره وكتله بصوت عالي : شنو شنو ازوج واحد شبيج انتي لتشوفيني ساكته ومادري شنو
اذا انتي تكدرين تسويلي كلشي ثقي بالله اني اكدر اسوي شغلات ميخطرن على بليس ابد
افتهمتي لو لا •
صفكت بيدهه وكالت : عفيه عفيه اريدج هيج عصبيه وتصيحين و تهددين اريدج مثلنه عفيه ,
هاي الصياح والعصبيه بعد شويه اريده تطلع كدام ابو سالم اريده ينتهي
باوعتله واني فاتحه عيوني مستغربه منهه شلون حيه كتلهه : انتي شنو من بشر متكليلي وكعتي كلبي والله
مهره : كافي بلا لغوه اضاهر انتي مو مال مجال المهم عيوني , البارحه الي شفتي من الشباج ماريد
احد يعرف بي واذا احد عرف بي موتج على ايدي واسحلج هيج سحله نفس ماسحلته للرجال
البارحه •
شهكت وحطيت ايدي على حلكي كتلهه بصوت
عالي : هاي شلون شلون عرفتي اني شايفتج
تقربت عليه وحطت ايدهه على صدري ضغطت
عليه وهي تباوعلي كالت : الكدامج مهره مو شويه, اعرفج شنو تردين تكولين قبل لتفتحين هذا حلكج وتحجين ,
وهذا الشي لتعتبري تهديد لا وانما انذار بسيط ,
مياده : بس فهميني شلون عرفتي بيه ,
مهره : ماما انتي تفتهمين لو لا, وداعتج اعرفج حتى من تتصرفين بالغرفه
ميياده : هسه ماريد اعرف شلون عرفتي بيه لان متأكده ماراح تكولين سؤالي الاهم
ليش سحلتي هذا الرجال الجبير •
ماكملت كلامي حطت ايدهه على حلكي وكالت : الي يريد يشتغل شغله لازم يكون صبور و عنده سريه
الحيطان اله اذان ديربالج مو اي شي ينحجي ماما•
وخرت ايدهه من حلكي وكتلهه : زين على الاقل فهميني يعني شلون شنو احجي وياج ,بالأشاير
ضحكت وكالت : من اكو شي ويطَلب السريه شاوريني واني اعرف شسويلج
باوعت بعيونهه سود طوخ وهي مربربه , باوعتله بنظرات تحدي قربت راسي يم اذانه وكتلهه
: اريد اعرف عنج كلشي
لزمت ايدي واخذتني , ليجوه داخل الغرفه بعد اكو باب جانت
كتلهه : هاي باب شنو
كالت : باب الحمام تعاي ندخل
كتلهه : واكو واحد يدخل الحمام شنو شبيج انتي مخبله
كالت : اششش الحيطان اله اذان سكتي
رحت وراهه فتحت الباب , طلعت غرفه صغيره وخنكه كلش وبيه صور وبيه جربايه وحده
وكلنيس بي دم ومعدات طبيه وكطن ومكاصه , استغربت من الغرفه وليش
كالتلي حمام وبعدين طلعت الغرفه ,
كالت : اكعدي على الجربايه احجي وياج
رحت كعدت على الجربايه اول ماكعدت طلعت طكطكه من الجربايه ,
اباوعلهه سدت الباب مال الغرفه واجتي كعدت كدامي بالكاع
وكالت :هاي الغرفه الكدامج منهه اني طلعت
مياده : شنو يعني شلون طلعتي منهه
مهره : بهاي الغرفه اخذو عذريتي وبهاي الغرفه
اعتدوا عليه وبهاي الغرفه ماتت حياتي
حطيت ايدي على حلكي وكتلهه : وليش كاعده تحجيلي الي ,
كالت : لان قريبا راح يصير بيج الصار بيه
حطت ايدي على صدري وكتلهه : وليش يصير بيه الصار بيج
مهره : الايام هي تكلج مو اني
مياده : زين احجيلي عنج بس عفيه شغلي مروحه اي شي لان كلش اختنكت يمه صدك جذب
كامت فتحت مروحه وكالت : الزبائن يحبون الحراره لازم تتعودين منا ورايح
كتلهه : على نفسهم خو مو كلشي يردون لازم اسويلهم
مهره : المهم اني جنت بنيه عاديه واحب الحياة نفس ما تريد اي بنيه بالوجود ,
بس ولد الحرام التموا عليه وخربوا حياتي كلهه وكرهوني بكلشي
مياده : بس انتي تكدرين تعيدين الحياة الي ترديهه وجوز تكدرين تسويهه الافضل
و الاحسن وامج وابوج وياج •
مهره : اني تركتهم خوفا عليهم ماريدهم يتأذون بسببي
مياده : شلون يعني ليش يتأذون بسببج
مهره: لأن الي خطفوني ناس مو صغيره لا أني ولا أهلي اكدر اوكف بوجهم جنت مجبوره اسوي
كلشي يكولوا الى ان صرت متمرنه عدهم والى ان وصلت لهذا اليوم وصرت ايدهم اليمنى
مياده : مادري شكلج بس بالعافيه عليج اذا انتي مقتنعه وراضيه شسويلج بس اني كل هاي
السوالف وماعرفت ليش كاعده ويايه ولا
وتحجيلي عنج يعني شنو هاي الثقه الزايده اكيد اكو شي
مهره : لان انتي منا ورايح راح تصيرين ايدهم اليمنى
مياده : ماحط ايدي بيدين ناس مرضى عقليا وجسديا كلش متوهمه
مهره : وليش تعتبريهم مرضى
مياده : لان فعلا مرضى
مهره : مايهمني بس حبيت انطيج راس قلم عن مستقبلج وين راح يكون ودنكي راسج جوه
الجربايه راح تلكين علاكه جريه ولبسي البيهه يلا بسرعه
ماخفت من كلامهه ولا أهتميت الهه ، دنكت جوه الجربايه واخذت العلاكه وكتلهه
مياده : اي شنو شبيهه هاي العلاكه
مهره : بيهه العبايه والبوشيه راح نروح على بيت ابو سالم هسه افضل بصفة مجاديه كل ماعليج
الي تسويلياه ان ُ اول مايفتح الباب الج اطلبين منه فلوس
مياده : وليش مو انتي اطلبين منه
مهره : ياخوثه لان يعرفني شلون اني اطلب منه ميصير ,
المهم من راح يدخل جوه مباشرتاً ادخل اني ليجوه وانتي ورايه
مياده : لحظه ستوب شنو ندخل هيج ادري ماعنده جهال ماعنده احد
مهلاره : معليج كلشي مدبر المهم اسمعي واكلي تبن تصيرين ورايه , السجينه بيدج اياج وبالج
ترجف ايدج او توكع منج ديربالج , ولتخافين تره هو كلش نعثوله
مياده : اكولج عفيه اني اخاف من هيج سوالف طلعي غير بنيه بدالي
مهره : لا لا سهله كل مافي الامر راح نهدده ونكعده على التخم وانتي تبقين فوك راسه ,
بالسجينه مالتج واي شي يسوي ذبحي ضربي شتردين تسوين بي سوي لجهنم يروح
مياده : يا يا تالي ما تالي اكتل واحد شنو تخبلت
مهره : عيوني ادري بيج عاقله وكذا اتخبلي اليوم علمودي
مياده :زين شنو لازمه سجينه لوه ايدي سوه شي ,
منهره : ماما اني وياج وولد بره واكفلنه وبعدين اني ويايه سلاحي
مياده : يا يا وعندج سلاح هم
مهره : حاليا مياده مو وكت اسئله وكمية الغباء الي عندج راح تبدي تنفرزني من نكمل المهمه بذيج
الساعه اسألي وصخمي حاولي تساعديني علمود يتم كلشي بخير وسلامه
مياده : تمام يلا هسه شنو اسوي
مهره : لبسي البوشيه والعبايه هسه
مياده : اعرف البس العبايه بس البوشيه ماعرف شلون البسهه
مهره جيبيه وتعاي يمي
طلعتهه من العلاكه ورحت يمهه , اخذته من ايدي وهي ساكته جرت راسي وخرت شويه شعري
رجعته ليوره وبدت تلبسنياها ,
كالت : كون يطلع براسج حظ وتفضيني على السريع
مياده : الله كريم , يلا كومي بدلي شو مابدلتي ,
مهره : كايمه كايمه
وفعلا راحت بدلت ورشت عطر ومادري شنو سوت , واني ضليت اعدل بنفسي شويه,
طلعنه من هاي الغرفه الي كلش صغيره , وبعدهه كالت
مهره : هسه نفس خطتنه الي اتفقنه عليهه اي شي مايتغير بيهه مفهوم لو لا ماكو داعي اعيد ,
مياده : لا لا مفهوم وان شاء الله يمشي كلشي نفس ما نريده يلا نتوكل
مهره : خاف تسألج وحده من البنات وين رايحه مدري شنو كليله مادري
اعتقد للسوك مهره تريد تشتريلي ملابس •
مياده : يعني هم ميدرون انُ رايحين نبوك بيت ابو سالم
كالت : لج سكتي ماما الحيطان الهه اذان , اكيد ميدرن اذا اكللهن راح يكعدن يطالبني
كل وحده تريد حصه خليهه سكتاوي احسن •
مياده : واني شنو عيني طرطور قابل ماريد مثلا
مهره : لا عيني انتي مره شريفه ونزيهه وذني فلوس حرام يسون اووا ,
هزت جتف وضحكت ضحكه عاليه وكالت
مهره : يلا نتوكل يالله
طلعنه من باب الغرفه نزلنه الدرج باسرع سرعه عدنه , لكينه نوكيا السمره كالت :
نوكيا : ها ها خير ياطير وين وين عيني
مهره : ومن شوكت عيني ست نوكيا توكفين كدامي وتسويلي وين وين
نوكيا : لا يعني اخذوني وياكم شي , تره تعرفيني شاطره بالهز أمري ومعليج اكبر شارب اوكعه
مهره : والنعم منج عيوني , طالعين حاليا للسوك نريد نشتري لمياده جم شغيله ,
نوكيا : اي كثريلهه لبسان لان اكثر شي تخلص صلاحيتهن عدنه ,
اول ماكملت كلامهه غمزتلي بعينهه , اني بلعت ريكي واستحيت شلون عدهه جرأه تحجي هيج ماعرف ,
صاحت مهره : يل يلا نطلع مياده
درت وجهي للباب وطلعت قبلهه , وهي ورايه
طلعنه وكفنه بالباب الخارجيه
كالت : تعاي ورايه بهذا الفرع هسه يجينه نطاح الاعور
استغربت منهه كتلهه : منو هذا نطاح الاعور
مهره : ايدنه اليسره امشي وسكتي
كامت تمشي واني امشي وراهه انوبه سريعه بالمشي اريد الحك عليهه ماكدر ,
كتلهه
مياده : ليش تمشين سريع شبيج هو هذا الفرع
مهره : حتى لو هذا ميصير نطلع طلعتنه مهدده بالخطر
مياده : الله يستر منكم يعني هسه البشر من يدري بروحه مهدد غير يكعد ويسكت ,
وكفت بنص الشارع , حطت ايديه على خصرهه وصاحت : اكلج ماحب وحده تحجي سكتي وامشي مثلي ,
سكتت ومشيت بصفهه وصرت احرك رجليه نفس ماتحرك رجليهه ,
دخلنه الفرع لكينه سياره سوده عاليه شويه ، دك هورن النه كالت
مهره : هذا نطاح امشينه بسرعه لج امشي
مشينه سريع ووصلنه السياره , كبل صعدنه شهكت او ماصعدت لكيت رجال شويه جبير وجه مشوهه
وعينه اليسرى ماهي مطفيه بس اليمنى
بلعت ريكي وكمت ادعي بكلبي
" ربي احميني من كل شر ومن كل مصيبه ,
اباوع على الولد شكله مو راحه ابد ,مهره كاعده بالصدر وتحجي ويا
مهره : عيني نطاح مروتك انطيني جكاره خلصت باكيتي
حنحن صوته وكال : هاج يابه واحلى جكاره لمهراوي حبيبة الكلب
صوته خشن كلش , ويخوف كلت بكلبي
" النوبه طلع واحد يحب الثاني والله زين
يلا هي بقت عليهم على هذا الشفته منهم والسمعته منهم كلش كافي ان اتوقع كلشي بعد ,
باوعت على المرايا اجتي عيني بعينه رئساً كال
نطاح : شو ماعرفتينه عنج يابه شنو هذا الجمال
صاحت مهره : اعرفك يكلبي الشريفه الطاهره ست مياده
ضحكت وكتلهه : الحمدلله ربي شهاده اعتز بيهه .,وغمزتلهه بالمرايا
ضحكت وكالت : هلا هلا عيوني بدت تغمز شويه شويه نوصل
نطاح : ها افتهمت اضاهر الاخت جديده
مياده : خدامه عيوني
نطاح : وهاي من شوكت الخدامات يعوفن الميوزه ويطلعن بجريمة بوك
مياده : عيوني مجبوره شسوي قابل بيدي
مهره : امشي نطاح امشي لتشوفهه هيج حرام توديك للشط وترجعك عطشان دوسلهه عيوني دوسلهه خلي نستعجل
نطاح : مو تدللين دقايق واخليج كدام باب البيت ,
وفعلا السياره تروح بين السيارات منا ومنا حتى وازت سيارات ثانيه واني كلبي راح يوكع من
الخوف حاطه ايدي على صدري وادعي لله يحميني ,
فزيت على صوت نطاح من يفتح الجامه ويصيح
نطاح: لك دطلع ابن المطي شكد فاهي
وذاك اشوفه يسويله بيده حركه افتهمته منه معناهه طاحظ ابوك , ونطاح يكله
نطاح : فاهي فاهي اعفط على هيج زلم,
و مال السياره عليه شويه وذاك اباوعله عيونه صارت بكصته وهم صدك هو مبين كلشي ماكو ,
وداسلهه نطاح طلعه كبل , اباوع على مهره ابد مو يمهه السالفه ,
الجكاره بحلكهه وفاتحه الجامه تاخذ نفس من الجكاره وتذبه بالهوى وتسوي
حركات مال وحده كارهه الدنيا •
ضحكت على شكلهه ورجعت عيوني على الشارع مر شويه من الوكت وكال
نطاح: يلا وصلنه نزلوا البيت الاول الثاني الثالث ادكو صاحب المهمه ,
لتخاوفون المنطقه متأمنه بكلشي عليكم تسون كلشي حسب خطتكم
مهره : هاج ولج هاي السجينه الكتلج عليهه ,
وعيوني عفيه من ندخل خل يدخل ورانه ولد او اي واحد خاف يصير اي شي •
مديت ايدي اخذت السجينه انطتنياها من وره الكشن وكال نطاح : لتخافين اني ادخل وراج
نزلنه بسرعه اني ومهره , وكفتني مهره اباوعلهه تشيل تراب من الكاع , وتذبه على العبايه
كتلهه : ها ها شبيج شكو شبيج
مهره : سكتي معليج , بيج وماعصرتي بحلكج من تحجين ضروروي فاهمه لو لا
مياده : تمام يلا نروح
توجهنه كمنه نمشي بصف البيوت , رئسا مهره
كالت: تغيرت الخطه
اني رئسا وكفت كتلهه : شصار شنو نرجع للسياره
مهره : لا من المحتمل نطلع مراقبين من جامات بيته ,
خلي ندك باب باب لحد مانوصل لبابه ,
وفعلا جان كلامهه بالضبط , رحنه على البيت الاول دكينا واخذنه منهم ربع دينار باوعت على مهره
وكتلهه : اكلج لنفرض اني مجديه من صدك هذا الربع وين احطه لخاطر النبي
رحنه للبيت الثاني , وماشاء الله سهلو علينه المهمه وكالو ماعدنه , كبل وصلنه لباب بيته
دكيناهه اول مره محد طلع رجعت دكيتهه , ومهره واكف بصفي منزله راسهه
كاعده تحجي وانفتح الباب مال البيت بسرعه
كال: تفضلوا خويه
باوعتله انسان مرتب انقهرت عليه رئسا
كتله : لله يامحسنين عندك انطيني ، سبع ايتام براسي , وكلهه تنحسب يم ربك
باوعلي وباوع لمهره وكال : صدك جذب خيتي مخلفه سبعه وهذا عمرج استغفرالله ربي هو مو صوجج صوج المرحوم الاغبر ,
انتظريني هسه اجيب •
راح دخل وترك الباب مردوده مهره
كالت: لتخافين أريدج تخبصي بالصياح ومعليج اني اشوف دربي يلا نفوت ,
وفعلا دخلنه وراه بسرعه
دخلنه للهول , شفته مرتب ويجنن واني و مهره واكفات بنص الهول نسمعه يدندل بالغرفه ,
مهره اشوفهه اخذت مزهريه كسرتهه بالكاع مانحسه اله وهو فوك راسنه ,
راد يحجي صاحت مهره بوجه وهي مطلعه سلاحهه وموجهته تجاهه
: اياك اياك وبالك اطلع صوت من حلكك ثق بالله طلقه وحده ترس بوجهك اسوي
طرشانه مطشره بسرعه اغبر تحرك كدامي
صاح بيهه : منو منو انتي شنو هاي شتسون
صحت بي : اغبر كاعده تكلك تحرك كدامهه بسرعه واحد اثنين حدك للتلاثه ها ها
راح اوصل للتلاثه بسرعه تحرك كاعده اكول •
كال وهو يطكطك : انطيكم كلشي بس بنتي طفله نايمه على الجربايه مروتكم بس اهدو
صاحت بي مهره : تكعد على التخم وتاكل تبن وتنجب ومعليك لتضل نثيه كدامي تحرك بسرعه
اباوعله بسرعه راح كعد على التخم ايده رافعه على راسه ليفوك ,
واني ومهره واكفات كدامه نترقب منه اي حركه علمود نتصرف بس جان كلش خايف
مهره صاحت : شوفي شغلج , انت هيو اغبر
كال : ها ها شنو
مهره : اغم مطي نعثوله احجي فلوس سفرك وين حاطهن
كال: بجيس اخضر على الكاونتر بالمطبخ اخذي كلشي بس بنتي مروتج
مهره راحت وصاحت: عينج عليه بسرعه
اني طلعت السجينه من جوه العبايه ورحت يمه حطيته على ركبته
وكتله : اياك تتحرك حركه وحده تنهي حياتك وحياة بنتك الي لحد الان ماشافت شي من حياتهه
كال وهو يرجف :هاهي معليه ماحجي ماتحرك بس بنتي
كاعده ارجع اهدده , ماحس اله وهو يرجع يلوي ايدي ويكوم على حيله رئساً عطت اني عيطه
للستار , فجأه ماحس اله طلقه اجتي برجله بحيث على السريع صاح اخ ووكع بالكاع يون على رجله
رفعت راسي ليفوك لكيت نطاح صاح : بت الكلب واكفه يمه شنو تعاي ركضي يله
صحت بصوت عالي : مهره مهره وينج يمعوده,
اجتي مهره تركض كالت : يلا يلا بسرعه بسرعه نطلع منا ,
صحت عليهم: وهو خطيه كاعد يون شنسوي
اجتي ركضت عليه, جرتني من ايدي وصاحت :لج راح تجي العالم وهاي تكلي يون طبه طوب امشي بسرعه
نطاح : بسرعه ساقطات يالسلام بسرعه
سحلتني سحل من البيت وصلت لحافة الباب وسمعت بنته تبجي , رئسا وكفت ماكدرت اكمل
كرهت روحي حسيت غصه صارت عندي لاراديا كتلهه,
مياده : ماكدر ماكدر اكمل مو بيدي بنته تبجي لج مهره من شوكت اصير اني هيج
اجه نطاح تقرب عليه لطمني على حلكي وسحلني سحل , للسياره فتح الباب وشمرني بيهه
مهره رئسا صعدت ونطاح رئسا شغل السياره وطلع كبل ,
نطاح : اله شويه جان انتهينه الف الحمدلله عدت بسلامه انوبه انتي مهره شجاج
تجيبين وياج وحده جديده •
مهره : لك عيني هاي الساقطه اني اعلمهه دخل اوصل للبيت ,
بلعت ريكي نزعت البوشيه , اختنكت ضليت اباوع على الشارع واني كارهه الدنيا كلهه ,
شلون سويت هيج ماعرف شلون شلون •
وصلنه للبيت ووكفت السياره درت وجهي على الجامه الثانيه
لكيت سيارتين شرطه واكفات باب البيت والحجي وزلم كومه واكفه ...
يتبع ...
لاتنسوا التصويت والتعليق لنشر المزيد من احداث الروايه،
حساب الانستكرام الرسمي:tahsin_luqman4
مع خالص مودتي لكم
تحسين لقمان