قمع المشاعر

البارت 16

قمع المشاعر.... البارت السادس عشر..
للكاتبة زهراء ( روزايه)....

(بارت طويل تعويض مال البارحه )

شجن.. ليش شمعنى بالذات قبس؟؟
بشار.. سالتج موتردين عليه السؤال؟؟
شجن.. لاا مايوم اخذت تليفوني وقبس ابد ماتدخل باي شي وحته ماتسال ..
بشار.. الرسائل رايحه لوائل وهو متزوج وعنده ٤ جهال موقصه اشك بيج يعني مستحيل واحد يصدك او يعقل هالشي بس شلون وصلت من تليفونج هاي الي اريد اعرفهه..

شجن.. بس بابا يكول وائل كايلهم صديقي وانت دكول وائل؟؟
بشار.. لايابه ابوج وعمج من فقاريتهم يصدكون بكلشي وائل عنده رقمين واحد مره دك عليه من عنده وخازنه بتليفوني وعنده رقم عام هذا الي الكل تعرفه فهو من جايب الرسائل لابوج ومشوفه رقمج وع اساس رقم صديقه ابوج شمعرفه يجي ويدور وكل كلمه تنكال براسهم يصدكوهه ..

ولو صدك يريد مصلحتج جان اجه وكالي عليمن هاي السالفه رايحه لابوي ولعمي عامر يعني غايته يفضحج يشهر بيج هذا الي اريد اعرفه شنو مشكله وائل حته يجي هيج يحجي ومن دكيت الرقم بتليفوني طلع اله يعني اكو وحده متفق وياهه حته يشهر بيج ودازتله رسائل من تليفونج والشي الغريب هاي الرسائل صارلهه بحدود ٣  او ٤ اشهر  يعني من اجتنه قبس لذلك اجت ابالي ..

شجن.. لا بشار قبس والله مو من هالنوع موصارلهه ٤ اشهر يمنه بس ابد ماطلع شي منهه موحلو تخيل اذا شافت فاديه تشاورني تطلع تعوفنه ع راحتنه ولاتمد ايدهه ع شي مو الهه حته بالاكل شتخلي كدامهه تاكله اني ملاحظتهه متمد ايدهه وتاخذ ونفسهه عزيزه لاتظلمهه...

بشار.. ماظالمهه ولا جاي اتهمهه بس شك لا اكثر وان شاء الله  غلطان ولا اتمنى تطلع هي هذا الموضوع ما تحجين بي كدام احد حته هدى لاتحجيلهه اريد اعرف شجاي يصير معقوله اني ملتهي عنكم بالدوام وما ادري بشي شنو غايه وائل وليش هيج ضدج حته من صار الحادث مالتج ومن طلبت من عنده مايدخل زعل ولحدالان وجهه ثكيل اني وائل ما ارتاحله ابد بس المشكله ابوج الي يصدك بي ..

شجن.. هزيت راسي وطلع بشار ياربي تعبت شنو من مصيبه وائل يعني هذني السنتين الي اكتشف بيهن احب غيث شوفني انجوم الظهر ماكو مصيبه ماشمرهه براسي وخاف اسولف لبشار كلشي واكيد بشار مايسكت واصلا يكول ما ارتاحله وخاف يروح بيهه اخوي لان هيج انسان مريض كلشي يطلع من عنده وموبس بشار حته عمر مايسكت واخاف ع اخوتي الي انطا كلبه يضرب اخو وماخاف يتعوق ويروح شبابه لو اني الي ضاع شبابي وما انقهر معناتهه هذا الانسان مملي حقد ..

ظليت كاعده بمكانه وما اعرف شسوي منا نار غيث وشلون اذيته بس بسبيل اخلص من وائل ومنا بشار مخلي براسه وسالفه الرسائل ومنو هاي الي تسوي هيج اني تليفوني ما انطي ولاواحد عدنه ياخذ تليفون بدون مايكول ..

طبت قبس لكتني كاعده اهز برجلي من التوتر باوعتلي وسكتت هاي مظلومه اكثر من عندي شنو ذنبهه حته يشكون بيهه واذا وكعت بمشكله يجوز محد يصدكهه لان ما اعرف شراسمين ابالهم عليهه ابد ماحجت ظلت اتابع تلفزيون بس اني اباوعلهه شكد مهمومه مبينه كل علامات الحزن مرسومه ع وجهه حته ماتدري بنفسهه اشوف عيونهه وحواجبهه من تعكدهن مثل الجاي تفكر بشي ...

ثاني يوم اجت ماما جابتلي تليفوني وظلت تسال بيه تريد تعرف شي اخر شي كالت حته ابوج سكت لان وائل حاجي لبشار وظلت ورا اخوج وخلي انشوف السالفه شنو ماما بيهه طبيعه ماتضم اي شي على هدى ومخابره هدى ومسولفتلهه ثاني يوم اجتنه هدى وهي وماما يخمنن منو التسوي هيج ...

السالفه طشت وكلهه درت حته جدي وبيبي بس الحمدلله يثقون بيه جان رحت بالرجلين بس قبس ساكته نهائيا ماتشارك ولاتحجي تسالهه تجاوب ماتسالهه تظل ساكته وحته من يفتح الموضوع تروح للغرفه وكانو ماتريد تسمع وتصير شاهد ع كلشي ...

بشار بدوام وعمر هم  بس فاديه مامداومه اليوم كلنه كاعدين بالصاله ونسمع صوت الباب حيل انسد كامت بنت هدى كالت خالو عمر اجه ..

بس شلون طب مثل العاصفه عود نكول ع عمر يختلف عن بشار صياح غلط تريد ماما تفتهم من عنده ماكو

عمر.. اني هالكلب وائل يجي ويوكف كدامي بالشغل ويكلي اختك هيج منو هو حته يتهم اخواتي اشرف من عنده ابن اخوج هالكلب اذا عتب البيت وحق الله ابتلي بي خلاني ما اعرف شحجي ولوما مخابر بشار وفهمني جان اجيت ع شجن ورجعت عليهه فهميني ابن اخوج شيريد يدخل بالصغيره والجبيره هااا منو هو مسوؤل عنه وماندري..

ام بشار .. ع كيفك يمه حالنه من حالك مانعرف جاب رسائل واجه ويكول من خوفي عليهه اجيت انبهكم ابن خالكم وجبير بالعمر قابل غايته ياذيهه هي مثل اخته بس حته نعرف منو سوه هيج؟؟

عمر.. لا مومثل اخته لوصدك ذره غيره عنده ما شهر بيهه رايح لعمي عامر ولبشار ولابوي وانتم كلكم تعرفون وامه تلكيهه ماخلت وحده ماكلتلهه هذا يستحي ؟؟ هذا اذا ما احترم نفسه والله ارتكب بي جريمه يسد حلكه وينجب ومايجيب طاري اخواتي هالقذر هذا؟؟

ام بشار.. اسكت لا اطب امه وتسمعك صارت هاي السالفه هسه من خوفه عليهه شمسويلكم وتكرهو وترعدون علي انت واخوك ..

عمر.  هذا لان ابن اخوج شنو فرقه عن غيث مو هم اخو واصغر من عنده ومايوم غيث ذكر اسم وحده من اخواتي ع السانه ومن نمشي اني ويا وانشوف ابنيه واباوع يكلي لاتباوع عندك اخوات لو غيث بمكان وائل يسوي هيج ويشهر باختي نكر الزاد والملح الي اكل من خيرنه ..

تدرين ظليت لا اخذ ولا انطي وجان غيث واكف ودافع عنهه عبالك اخته وتضاربو بنص الشارع وسمعت غيث يكله هذيج المره تهمته وسكتنه وهالمره عدتهه شكد ناقص انت يعني ابن اخوج مسوي بنتج علج بحلوكهم ومانعرف السبب..

شجن.. اسمع عمر وكلبي يفور وهو يمدح بغيث ويحجي ع وائل شلون مشوه سمعتي كمت افرح بعيوني وامسح دموعي الي كامت تجري اخوتي صارو بموقف موحلو بسبب غبائي...

ام بشار.. كافي عمر شجن مريضه البارحه تخربطت روحو شوفو من سوت هيج باختكم واروحلك فدوه لاتندك بوائل خاف يعاديك..
عمر.. خايفه منه شنو هالحيوان هذا انتي الي انطيتي اكبر من حجمه ويا وائل يانعال ما اسكت الا يجيب منو هالساقطه الي متفق وياهه والله لو مو ابن اخوج ارفع عليه دعوه بالمحكمه واطيح حظه ..

ام بشار... طلع عمر وكعدت بالكاع دخيلك ياربي ادري منين اجتنه هالمصايب شوفن اخوجن شلون نار وبشار مايسكت ادري ياوائل تعال واحجيلي وين وليت فضحتنه..

فاديه.. لان زمال وحقير ونذل هذا مالاكي زلم تركعه بنعال ع شواربه هذنيج الجنهن مكناستنه القديمه ..

ام بشار.. ولج انجبي لااكوم اطيح حظج تغلطين علي بكد ابوج هو صارت بعد؟؟

فاديه.. يروح فدوه لتراب رجلينات ابوي هالمنحط هذا مايشوف حالتهه تكدر توصل الباب حته هيج يحجي واذا هو حريص هالنعال هذا ما اجه وكال عمه انتبهي ع بنتج لو عوزه يصيح بسماعه حاجه بالف...

وموبعيده علي باجر يجي ويكلج فاديه هيج توقعي كلشي من عنده لا ادافعين عنه ماما الله كال لاتقذفو المحصنات وشجن بنت بيت حرام علي وحوبتهه ماراح تتعدى..

ام بشار.. امشي من كدامي لا اكوملج كومي اخذي شجن للغرفه واياج اسمع صوتج بعد..

فاديه.. ماراح تسمعين صوتي مدام ادافعين عنه بس خلي يجي بشار وحق الله ما اسكت شنو هو ودافعيله وحاركه دم اخوتي وهاي المسكينه المفروض تروحين تضربي ع حلكه هو وامه موجايه ادافعين عنه..

هدى.. كافي فاديه واشرتلي كومي اخذي شجن واسكتي تعرف اذا اشتدت دكوم ماما تضربني..
ام بشار.. عمه احجي كلمه شسوي بنتي يتهمهه ابن اخوي وولدي متخبلين وائل يكلي عمه من خوفي عليهه ...

الحجيه.. شوفي يامنال لو صدك يخاف عليهه ما سوه هيج بس هذا عنده غايه وانتي اطلعي منهه ولا ادافعين عنه عوفي ولدج يتصرفون وحته عادل كاله ابو عوفهه ورا بشار اكعدي واسكتي ولا ادافعين كدام بناتج شفتي شلون فرفح كلب فاديه..

هدى.. يوم انتي جلبتي بوائل وعفتي منو دز الرسائل لازم تعرفون شنو هالسالفه وشنو وراهه يله تحجين يجوز وائل يريد ياذي شجن ويجوز كلامه صدك؟؟
ام بشار.. ما ادري خلي يجي بشار وانشوف

شجن.. عيني ع تليفوني الفارغ اتمنى اكدر اتصل بغيث بس بهيج وضع همزين نهيت كلشي جان اطورت الامور ويجوز غيث هسه مصدك اخو ..

لحد الليل اتعشو واني ماطلعت من الغرفه فاديه جابتلي العشه وقبس هم ماتعشت ومن اسالهه دكول ما اشتهي ...

اسمع صوت بشار برا يحجون اريد اطلع بس اخاف تالي كالت فاديه كومن برا ترى ماما شكت كلبي مستمره ادافع..

طلعت من الغرفه وبابا وعمو عامر وعمر كلهه كاعده صاحني جدو اكعد بصفه وقبس بصفي ...

حجه عمو عامر ماعرفتو منو دزت الرساله؟؟
بشار.. لا ماعرفناهه
عامر.. التفت على قبس وكالهه عمو خوما الج ايد بهاي الشغله

قبس.. من يوم الي صارت مشكله فرح قررت ما ادخل ولا اتعدى حدودي وحته سالفه شجن ما اناقش بيهه بس من سالني عامر هيج سؤال الي اصلا جنت صافنه ومامنتبه بعدين استوعب كلامه قصده اني ادز رسائل لرجال واتهم بنيه؟؟

لا والله ما اسكت لو اعرف تنكلب الدنيا ع راسي كمت وكفت ع حيلي بس من كدما عصبيه كمت ارجف حجيت بصوت عالي شتقصد انت ؟؟ اني ادز رسائل لرجال ماعرفه بسبيل اوكع بنت عمي..

انت مستوعب كلامك لو بس غايتكم تشمرون التهمه براسي لان اني بنت سميه؟؟ ليش تهتمني وتشك بيه اسالك ماشكيت بوحده من بناتك؟؟

عامر.. لاتصيحين واحترمي نفسج شلون توكفين هيج وتعلين صوتج عليه ماتستحين وعمامج وولد عمج وجدج كاعدين وانتي صوتج شعلوه سالتج انتي لان مانعرف تربيتج شنو؟؟

قبس.. محترمه نفسي كلش زين ومن يوم الي اجيت هنا ما ادخلت بشي لان اعرف راح تشمرون بلاكم براسي وتربيتي التحجي عنهه راح اعيد عليك محد رباني اني ربيت نفسي وما اسمحلك لا انت ولا غيرك يتهمني هيج تهمه تمس الشرف

قبس.. انفعلت حيل وما احس غير يكوم عامر يضربني راشدي فر وجهي فر ورفع ايده يريد يضربني الثاني وهو يسب بابا وماما ...

بس وكف بشار كدامه وسحبني ورا واني مخليه ايدي ع خدي ودموعي ماوكعت من الصدمه بس احس النار تاكل بيه..

عامر.. لاتوكف بوجهي بشار خليني اربيهه هالماعدهه تربيه؟؟
بشار.. منو سمحلك تضربهه؟؟ وانت منو حته تربيهه انت موتبريت من اهلهه وكلت ماادخل بيهه ..

عامر... توكف بوجهي وتجاوبني واني عمك الجبير؟
بشار.. اوكف بوجهك اذا غلطان ومامسموح الك نهائيا تمد ايدك عليهه حته اذا غلطانه قبس ابيتنه واحنه مسوؤلين عنهه ..

قبس.. بسرعه ركضت للغرفه بس طبيت كعدت بالكاع ع ركبي وكمت اضرب برجليه دموعي ماجاي تنزل بس نار وتلهب من عندي اسمع بشار وعامر بعدهم متعاركين بس ماجاي اركز بكلامهم اني ليش هيج عبأ على الناس وين ما اروح محد يريدني ليش خفلتوني ورحتو ..

انفتح الباب هدى وفاديه يكومني من الكاع بس احس نفسي ثكيله الغصه وصلت بلعومي بس ماجاي ابجي كومني ع الجربايه ويحجن لاتضوجين يبقه عمج ماريد اسمع اي كلمه من عدهن حطيت ايدي ع راسي ودنكت..

شكد مريت بايام سوده بس محد اتجرأ يضربني لاعزيز ولاساجده ولاجدي جان كل الي يريد يضربني ارجعهه علي لحدما تابو من عندي بس هسه من قررت ارتاح وامنت بيهم وكلت ارجع الهم هيج انهان من اول جمعه كعدو بيهه ...

هدى.. قبس هدي حالج هو هذا عمي عامر هيج لاتزعلين انتي مثل شجن ومستحيل انشك بيج ..
قبس.. عوفوني وحدي ودرت وجهي للحايط صح امي سميه وصح ما اعرف ماضيهه شنو بس ادري خالاتي عليهن سمعه وجدي يسمو بالمنطقه الكو.... بس اني حافظت على نفسي من كلشي لا يوم سمحت لنفسي احب ولايوم اتجرات ودخلت علاقه ويه شاب اشتغلت ودرست بس بسبيل ما اكون مثل خالاتي وبناتهن بس هم بعدهم يشوفوني بنت سميه وهاهي وماخذيني بنفس ذنبهه الماعرفه شنو؟؟

هدى.. كومي فاديه خلي نطلع عوفيهه وحدهه
فاديه.. لا ابقه هنا لان ما اتحمل عمج عامر .
هدى.. اااوف
فاديه.. طلعت هدى وكلبي معصور ع قبس ومنا شجن كعدت ع جربايتي واباوعلهه شلون مكرفصه نفسهه مثل الطفله الخايفه ومامتغطيه ودايره وجهه للحايط..

حاجيتهه قبس لاتضوجين عمو عامر يضوج من ابوج الله يرحمه وطلعهه بيج ترى محد يسمحلهه يحاجيج وشفتي بشار اول مره يوكف بوجه عمو ودافعلج لان يعرفج شنو الله عليج لاتضوجين طبهم طوب هم كلهم بساعه العصبيه يكومون يمسلتون ..

قبس.. اسمع فاديه بس ماريد التفت ولا اريد ادافع عن نفسي بس مجرد ما اتخيل شلون ادز رسائل لواحد ماعرفه واتهم بنيه مسكينه انجن لهدرجه ماخذين عليه نظره اني هيج محد تسويهه بس الساقطه..

قل الصوت البرا وصار هدوء واني دايره وجهي للحايط ومابجيت ابد اندك الباب واعرفه من دكته الهادئه هذا بشار  بس انفتح الباب لفحتني ريحه العطر الي ترس الغرفه ويحاجي بفاديه..

بشار.. نامت؟؟
.. ما ادري هي من طبت لسه دايره وجهه للحايط
قبس..تقرب وكعد ع جربايه شجن الي تصير بالزاويه يعني بكعدته صار يم راسي وعطره ملاني ملي .

بشار.. اطلعي فاديه!! قبس لاتغلقين ع نفسج هيج ولاتلومين عمج عامر لان بعده مايعرفج وراح اكون صريح وياج اني هم شكيت بيج لان الرسائل من يوم الي اجيتي بس مومعناتهه جاي انتهمج انريد نعرف الصدك وين!! كتلج لاتزعلين حته تليفون فاديه وهدى فتشتهن يعني هن مواخواتي بس اريد اعرف الحقيقه وين وعمج عامر من حجه هم جان بشك مثلي

وانتي الله يسلم السانج الي مابي دكمه اول وحده توكف هيج وتعلي صوتهه عدنه واصلا عامر من النوع الصعب واحنه نتجنبه حته ويه جدي هيج .قبس جاي احجي وياج التفتي عليه؟؟

قبس.. ما التفتت بس كتله ما الومكم حقكم تشكون لان امي وخالاتي منو؟؟

بشار.. اسمعه اخذ نفس عالي وكال هسه انتي عصبيه مايفيد الحجي وياج من تهدئين احاجيج وتغطي لاتنامين هيج!!!

قبس.. اسمع خطواته وصوت الباب وما التفتت بس جريت الغطه برجليه تغطيت وظليت ع وضعي اجت شجن وفاديه وحجن شكد وما التفتت وعبالهن نمت بس بهاي الليله ماغمضت عيني حسيت نفسي عاله ع الكل واستثقلت روحي واتمنى الله يسمعني وياخذ عمري ينطي لغير شخص محتاج اني ما اريد هاي الدنيا وماعندي اي هدف بيهه ..

قبس.. ثاني يوم كاعده بفراشي وكعدت فاديه ب٦ صبحت عليه وكامت تبدل وشجن نايمه راحت فاديه واني مالي نفس اطلع من الغرفه .

باوعت ع الساعه ب٨ ونص رجعت راسي ليورا واحس الم بداخلي مو شي يوجعني لا الم اليأس يأست من كلشي ...

جان ينفتح الباب ام بشار صباح الخير بنيتي..
قبس.. عدلت كعدتي صباح النور خاله..
.. كومي تريكي خلي اكعد شجن ..
.. ما اشتهي شكرا خاله
... ماكو ما اشتهي اني هم ماتريكت منتظرتجن يله يمه كومي اذا نوكف ع كل كلمه مانكدر نكمل حياتنه وعمج عامر طبعه هذا حته ويه مرته انتي مالج علاقه بي اهم شي احنه نحبج ..

قبس.. استحيت اردهه وفعلا جنت ما اشتهي نفسي مسدوده كمت للمطبخ بين ماكعدت شجن جدي وبيبي ماحجو بس بعيونهم اشوف اعتذار على شنو احملهم مسوؤليه تريكت وكمت انظف ابمكان فاديه لان جنت لازمه عده وما اشتغل ما اطلع من الغرفه كملت تنظيف ورحت لشجن كاعده صافنه حسبه تاخذهه وحسبه ترجعهه والمشكله هاي البنيه حيل سرانيه ماتحجي  اي شي..

البيت كله مهموم وشجن ماكو لاتشارك ولاتحجي متعجبه بوائل ليش هيج مسوي بيهه وحرمهم من حبهم مدري الواحد ينقهر ع شجن مدري ع غيث هي بنيه تعبر وتبجي بس الرجال اصعب وخاصه اذا حب حقيقي...

هالمره بشار رجع العصر ومن رجع جنت بالمطبخ سلم وفات وعمر هم موجود وشفت عامر اجه بسرعه ركضت للغرفه ماريد حته اشوف وجهه ...

شويه وصار الصوت وصوت عركه وزلم كلنه طلعنه من الغرفه لكينه ام بشار بالمطبخ وادك ع صدرهه وقافلين الباب من برا مايخلوهه تطلع..

جنت سانده شجن الي راح تخرب وتوكع وفاديه لازمه ادين امهه وهدى راحت بليل ع الاقل لوموجوده تهدي امهه والحجيه واكفه وتدعي الله يهديهم..

تقربت ع الشباك واشوف عمامي واكفين وبشار وعمر وواحد كالت فاديه هذا اخو فرح ووائل وغيث ومتعاركين ساعه ينرفع الصوت وساعه يقل بس غيث اكثر واحد متاذي بيهم مبين ع ملامحه...

ما انحس غير بشار يضري وائل بوكس وكعه بالكاع تكوم بالكاع وغيث اخو مافزعله بس يباوع وعمي عادل يجر بشار الي دفعهم كلهم ونزل ع وائل رفعه وتضاربو اول مره اشوف اثنين زلم يتعاركون وائل يضرب بشار بس عمر تلاحكه وصارت الهوسه وجدي يجر بيهم ..

غيث الجكاره بيده وطلع ماحجه ابد ولافزع لاخو وعبالك غريب ما ادخل بس يسمع فتح الباب وطلع قبلهم وعمي عامر جر وائل وطلعه وجدي لازم بشار يريد يرجعه..

اشوف عمي عادل يتوسل ببشار حته لايطلع ورا وكوه سحبو وطبو جوه جنه كلنه بالمطبخ بس انفتح الباب كامت ادك ع صدرهه ام بشار ..

ام بشار.. هااا بشار سويتهه رجال بكد ابوك وابنه بطوله تمد ايدك علي وتضربه موعيب..

بشار.. حجه بعصبيه وصوت عالي كالهه لا ادافعيله كدامي هالنذل هذا واحمدي الله ما كتلته وخليت دمه بطول خلي يحترم كبرته حته لا اهينه..

عادل.. اسكتي يامره لاتزوديهه علينه
ام بشار...ليش اسكت لان ابن اخوي هذا انداريت علي انت وولدك
عمر.. لخاطر الله ماتسكتين خبصتينه ابن اخوج وهو عار الزلم شو ناسيه تهم بنتج وجاي ادافعيله ..

ام بشار.. موزين نبهكم اختكم مظلومه ووحده تكرهه وسوت هيج موترجعون ع الرجال ..
بشار.. ابدال ماجاي ادافعين عنه روحي طلعي السوت هيج اسكتي يمه لا اروحله لبيته وارتكب بي جريمه لا ادافعين عنه كدامي..

قبس.. جان يحجي بعصبيه وفاديه ركضت جابتله مي شرب وخله الكلاص ع الطبله وكال اسمعوني كلكم وانتي اول وحده يايمه اذا لكفت وائل طاب لبيتنه خاف دكولين ماكال هذيج الساعه ادفنه بالباب وهاي سالفه الرسائل راح اظل وراهه لحدما اعرفهه منو واريد اشوف منو السوت هيج ولاتظلن قال وقيل وتاخذن منا وتردن منا ووصي هدى لاتظل تذيع وين ماتكعد

حجه هيج وكام وعمر هم طلع رادت تحجي امهم وسكتهه عمي اخذنه شجن ورحنه للغرفه بس تبجي ماحجت شي..

وفعلا انسد هذا الموضوع والرسائل محد عرفهه منين لان وائل ماقبل يحجي وع هالسبب متضاربين هو وبشار وبعد محد يجي حته جهال وائل مايجونه وغيث يخابر ع عمر ويطلعله وشجن لازمه الصمت وما ادري شلون متحمله الفراك وعبالك جاي تاكل بنفسهه ع البطيء...

شجن.. غيث من يوم الدزيت الرساله وحذرته مايراسلني لادز ولا سمعت خبر عنه ولاشفته غير يوم العركه وطلع وماظل واكف صار شهر كامل واتمنى اكدر احجي ويا واعتذرله عن كل جرح سببته اله اتمنى لو يفهمني ويعذرني ...

رجعت حياتنه طبيعيه وجدي بالينه بالعزايم يوميه مسوي ثواب لابو لو لعمه لو لعمو رضا وبيتنه مايفرغ ابد وهالمره سوه عزيمه جبيره وعزم بيهه هوايه ناس ومانعرف المناسبه شنو بس يكول بثواب ابوي..

قبل يوم بليل حجو. ويه بشار علمود السايق يجيب المسواك وخابر بشار علي جان مغلق تليفونه فكال راح اخابر غيث اني اخلي يتكفل بكلشي بين مانرجع من الدوام ...

وصدك خابر غيث وكاله باجر مر للبيت الصبح واتكفل بيهم لحد مانجي لان بابا وعمو عامر دوام وجدي بس لازم العصا ويريد كلشي تمام ..

ثاني يوم جنت كاعده واجت قبس كالت اجه غيث تريدين تشوفي ؟؟غمضت عيني وهزيت راسي مشتاقتله حيل اريد اعتذر من عنده..

قبس.. باعي محد اكو راح الهي امج واطلعي بسرعه لا احد يشوفج هو بالممر جاي ينزل بالمسواك .

شجن.. طلعت من باب الممر جان متروس صناديك مال مخضر انتظره يجي شفته اجه شايل علاك وسد الباب ورا ويمشي مدنك مارافع راسه

لحدما صار قريب رفع راسه شافني يمشي وعينه عليه لحدماصرنه وجه بوجه هذيج العيون الذبلانه واللحيه طويله ومامرتبه بلع ريكه وكال شلونج شجن؟؟

... الدموع اتجمعت بعيني وبكلبي كتله ياروح شجن بس جاوبته واني مدنكه كتله زينه وانت شلونك؟؟
غيث.. هاي كدامج زين موانتي تريدين هالشي واني ما اكدر ارفضلج طلب
شجن.. غيث اتمنى تفهمني وتسامحني؟؟

غيث.. ما اسامحج ابد وجر ايدي حيل ردت اوكع وسد الباب مال الممر وخلاني ع الحايط وهو كدامي يحجي ويأشر..

ليش شجن ليش هيج سويتي بيه تعرفين شنو انتي ؟؟ انتي هذا الهوه الي اشتمه وجر نفس عالي
عمري كله ماحبيت ولامفكر بيوم احب واول مافتحت عيني ادور ع محب انتي اول وحده كبالي هاي عيوني شوفيهن وياشر عليهن ممليات دموع هذني عيوني ماباوعن لغيرج ولايوم غمضن وما اجت صورتج كدامهن ليش هيج جازيتيني الف مره تعاركت ويه اهلي علمودج كتلج بس اصبري حته سلقه سحبت ع راتبي حته اطلعج وحدج وما اخلي احد ياذيج حته من اتعارك ويحجون عليج ما اجي اكلج حته لاتضوجين ويحترك كلبي اسهر للصبح احاجي بروحي ليش هيج سوت شجن شبدر مني وهيج عفتيني ودرتي ظهرج بدون حته ماتبررين ؟؟

احجي ولزمني من اكتافي اعرفج زين لاتخونين ولا عندج سوالف موحلوه احجي ليش عفتيني بنص الطريق وحته بعد ما اعرف ادافع عنج واخوي وامي مشمتين بيه اني الي اذا واحد حجه عليج اكلب الدنيا اخوي تضاربت ويا لان كال ماتاخذه فهميني لاتسكتين رحمه لامه محمد احجي شنو الخلاج هيج تسوين بيه ؟؟

انتي موتحبيني معقوله اني حبيتج اكثر لوجنت غشيم وما اشوفج حته ماريد افكر هيج ولا اريد اكول شجن خاينه احجي دافعي عن نفسج بهذا سكوتج راح تخليني افكر بغير اشياء واكرهج ..

شجن.. ماحجيت امداني اني المابيه خير وضيعته بس ابجي واباوعله شلون محروك كلبه

غيث.. روحي فوتي جوه ولاتشوفيني وجهج لان من اشوفج ارجع احن واني لازم البي طلبج ومااعوفج دار وجهه عني وهو يفرك براسه اني بسرعه طبيت بوجهي للغرفه حطيت راسي بالمخده وابجي اجت قبس تحجس وياي بس كمت املخ بنفسي ماعندي حجه ماعندي سبب مقنع اكوله حته يصدك شكول حته يروح يكتل اخو ويروح سجن لو انتظر وائل يكتله..

قبس.. حيرتني هاي البنيه اذا تحبه ليش هيج معذبه نفسهه ومعذبته عفتهه ع راحتهه وطلعت اشتغل ويه ام بشار ومرت عامر واجت هدى والبنات كلهن بالدوام ...

صارت الساعه ب١ جنت واكفه اغسل مواعين ع السنك وطب بشار سلم وراح لغرفته مامنتبهه وبالي سارح واني اغسل مواعين وعبالي بعد ماينزل المشكله من يمشي خطواته هادئه محد يحس بيهه ابد ..

المشكله جنت مامنتبه الماعون بيدي ابدال ما اخلي بالسله التفتت اريد اخلي بالثلاجه وهو فارغ

بس التفتت ما احس غير انضرب بكتفه جان واكف يشرب مي وماحاسه علي انتبهت ع نفسي شريد اسوي ورجعت ليورا

جانت الزوليه مال المطبخ خفيفه وناعمه وبيههه كراكيش مدري خيوط متعاكده داير مدايرهه من رجعت ليورا فات اصبعي بهاي الخيوط ووكعت ليورا اجه راسي من ورا ع حافه الكاونتر صحت ااخ راسي وبعدني لازمه الماعون

رفعت راسي واشوف بشار كدامي ثاني ركبته وهو يسالني اسم الله خوما تاذيتي ؟؟

قبس.. عطره وقربه وترني كتله لا مابيه شي ودنكت اريد اكوموهو ع كعدته كبالي وقريب عليه ويباوعلي بنظره غريبه!!!

جان ينفتح الباب التفت واشوف فرح واختهه واكفات والشرار يطاير من عيونهه .....

يتبببع.... متابعه ممتعه