قمع المشاعر

البارت 15

قمع المشاعر.... البارت الخامس عشر..
للكاتبة زهراء ( روزايه)....

شجن... شمرت التليفون ونزلت من الجربايه ونسيت رجلي ماتمشي نسيت اي الم بيهه الالم الي بداخل كلبي اكبر واعظم بس مشيت خطوه وحده وكعت انفعلت حيل كمت ادك ع وجهي واشلع بشعري واصيح اني السبب..

لزمتني قبس وحوطت اديه عن لا ارفعن لشعري ماجنت اسمع منهه شدكول الحركه الي بكلبي خلت عيوني عميه وما اشوف شي..

اذيت نفسي حيل واحس حيلي انتهى واني اصرخ لج قبس اخذيني يمهم لاتعوفيني هنااا؟؟
قبس.. راح تموتين شوفي حالج شسويتي مايصير هيج تفاولين علي بالشر اعرف تحبي مقدره شعورج بس كومي غسلي وادعيله راح تموتين واكيد غيث مايقبل تاذين روحج..

شجن.. باوعتلهه واكلهه اني السبب اني لو ماحابته ماصار هيج اني غبيه اني موته اني اكتل روحي اذا صار بي شي تعرفين شنو احبه ؟؟

قبس.. والله اعرف بس ياحبيبتي راح تموتين وهسه تجي امج وابوج شيكولون عليج انوب تزودين همج كومي حبابه وتمالكي نفسج انتي بريئه وطاهره ادعيله الله يستجاب من عندج...

كومتهه من الكاع واني ساندتهه رجعتهه ع جربايتهه ورجعت راسهه ع الحايط وصارت تشهك بعبره رحت للمطبخ جبتلهه مي وفاديه رايحه يمهم .

انطيتهه شربت بس بللت شفايفهه الي يبست من الحرگه والهبطه سديت باب الغرفه وكعدت بصفهه لازمه ايدهه الي ترجف وصايره مثل قطعه ثلج افرك بايدهه واهدي بيهه بس دايره وجهه للحايط..

ماجنت اعرف بيهه تحبه وشفت كدامي انسانه مولعه بالحب واصله لاقصى مرحله بي الله يشافي ومايفجعهه لان شجن ماتستاهل كل هذا؟؟

مددت ع فراشهه ودارت وجهه للحايط وضمت راسهه واني ع نفس كعدتي اباوع لنفسهه شلون يصعد وينزل بسرعه والشهكه الي لازمتهه شلون راح تخفيهه عن اهلهه..

فاديه راحت وبعد ما اجت لحد المغرب واذن الاذان سمعت الباب انفتح كمت بسرعه رجعت الغطا عليهه وهي فزت تريد تكوم كتلهه سوي نفسج نايمه اي شي ترى بس يشوفوج يعرفون لان انتي منهاره..

شجن.. قبس اريد اكوم خلي اشوفهم وخري عني ..
.. هسه تجي فاديه تسولف يمج واسمعيهه بس هدي حالج فدوه ..
كوه رجعتهه لمكانهه وغطيتهه وفتحت الباب تلكيتهم ام بشار وفاديه بس جايين بس ام بشار منتهيه حته حلكهه يابس ..

قبس... الله يساعدكم خاله بشري خومابي شي؟؟
ام بشار.. شبشر سوده عليه يعمه يابو گلب الطيب وين جانت مضمومه الك يالعريس مالحكت تفرح ..
فاديه.. يوم كولي يالله كلكم تنوحون وهو بعده عدل ميصير هيج والله موزين علي..

قبس.. ام بشار راحت تغسل وهي تبجي وجريت فاديه ماريدهه تجي للغرفه بس مالحكت عليهه تسحب بيه وتصيح شجن وينج..
قبس.. نايمه شجن خطيه انهبطت بشري شلونه؟؟ جانت واكفه بنص الغرفه وتسولف واكيد كل كلمه دكولهه ملح وينزل ع جرح شجن..

فاديه.. مسويله عمليه بس صار ٣ ساعات ومامنتبه من البنج وهذا الخايفين منه كايلهم الطبيب اكو اشخاص مايكعدون من البنج يظلون بغيبوبه واكو يستمر شهر شهرين ويموتون اسم الله علي ..

قبس.. لا اسم الله ع شبابه شنو حادث؟؟
فاديه.. ما ادري ياقبس هي ام وائل جنهه مخبله الشعر وشكت ثوبهه وتصيح بس تعال اروح اخطبهه الك واحنه بس صافنين مانفتهم شصاير بيهم..

بس ساره مرت وائل كالت جايته طلقه برجله بس منو الضاربه مايعرف وحته من ناقلي للمستشفى جان منتبه وصديق وائل هو الي ماخذه للمستشفى ومسويله عمليه ولسه مامنتبه قبس غيث ووائل متعودين عليهم ونحبهم يارب مايصير بي شي..

شجن.. جنت مغطيه راسي واسمع فاديه هيج ابدي اكوم واملخ نفسي اختنكت واني ابجي جوه الغطه ياربي اذا مقدر علي اخذ من عمري وانطي ..

هيج حب لعنه صار ماحصل مني بس المشاكل هيج انسان عنده اخ حيوان وناقص غيره مثل وائل ماكو الله لاينطيك ولا يهنيك مثل ما اذيتنه...

قبس.. البيت هدوء وحته محد اتعشه بس اني كمت سويت لفه لشجن لان عدهه علاج شكد توسلتلهه حته ماطلعت راسهه من الغطا ماتريد تشوف احد وحته امهه اجتهه كتلهه نايمه جنت احاول باي طريقه حته لاينتبهون عليهه بس الحمدلله فاديه من النوع المطفي وماينتبه...

بهاي الليله كلساع افز واحس نفسي مسوؤله عنهه اكوم من افراشي اطمن عليهه الكاهه تبجي وبس احاجيهه تكلي غيث!!!

شجن.. ماغمضت عيني ابد وكلما اتذكر رساله وائل انهار ضايعه ماعرف شسوي اخاف من وائل الي سوه هيج باخو الي ربا بيده موبعيده علي يتهمني وحتلو حجيت لبشار خاف يعادي اخوي وياذي ما اعرف شتبع وشتصرف بس خلي يطلع بسلامه ...

ثاني يوم الساعه ب٩ اجت فاديه كالت غيث منتبه وزين ولوتشوفين وائل شكد بجه خطيه جان مثل المخبل وهو يصيح غيث  جانت تحجي واني العنه بكلبي الف مره شلون منافق وجذاب يعني هيج اله قدره ع التمثيل موطبيعيه..

اخذت نفس وشويه بدت حالتي تستقر ظليت استغفر وادعي مايشوف شر دعيت من كل كلبي اذا بيه شر لغيث ياربي ابعدني عنه ..

ظليت يومين على هذا وضعي ضامه نفسي عن اهلي واحاول اتجنبهم وهم هم جانو ملتهين ويه بيت خالي والحمدلله قبس موجوده يمي ع الاقل كدرت تفهمني ..

اسمع من فاديه الي سكنتهم كالت اليوم طلع وزين وهوايه ناس يمهم كرايب امه واصدقاءه واني اجيت وخطيه مرت وائل وحدهه وهذا وائل بس يتامر فوك راسهه...

حرام ادعي ع بشر بس يستاهل واحد يفتح صدره ويدعي بحركه كلب وحرامات هيج انسان الله منطي مره وجهال يخبلون ...

جنت ادك ع غيث كله يطلعلي مغلق معقوله ماعنده جهاز زين مافكر بيه وكال خلي اطمنهه؟؟ جنت بعدني اسولف ويه نفسي واشوف تليفوني ضوه فتحته جانت رساله من رقم غريب مكتوب شجونتي ؟؟

عرفته غيث بسرعه اتصلت بالرقم وكلت الو حته يتاكد اني !!!
غيث.. اروح فدوه هالصوت الحلو
... بسرعه بجيت غيث ليش هيج سويت بيه تدري بيه متت بهاي اليومين ..
... قابل بيدي ياشجن لو رايدهه لروحي مادري منين اجتني وعبالك الطلقات التايهه مسلطه بس علينه اني وياج...

شجن.. هسه شلون صرت رجلك خوماتاذيك انتبه عليه مو مثلي؟؟
... لا زينه والطلقه سطحيه بس ماكعدت بالبنج تاخرت وقلقتو لا اكثر انتي شلونج حبيبتي؟؟
... اني زينه اذا انت زين غيث الله عليك اذا تحبني انتبه ع نفسي ..
.. وانتي هم اذا تحبيني ماريد تبجين ولا اريد اسمع هذا الحزن بصوتج وبس شويه الخطار يقل واصير زين اجي اشوفج لان مشتاقلج حيل ..
شجن.. ان شاء الله انتبه ع نفسك لازم اسده لا احد يجي
غيث.. تمام مع السلامه..

شجن.. الحال مثل ماهو رفضت نهائيا ادرس هاي السنه لان هسه احنه بشهر ١٢ وماسويت مسند لرجلي وانطيت وعد لبشار السنه الجايه اداوم ...

غيث صار زين واجه علينه بحجه عمر جنت كاعده بالغرفه واجتني قبس كالت كومي غيث بلاستقبال روحي بحجه تسلمين علي واني الهي امج وفاديه...

طلعت كلت لماما راح اسلم ع غيث اتحمدله ع السلامه وجان عمر طالع بس كاله جاي انتظرني اخذت عكازاتي ورحتله جان كلبي يدك سريع يمكن لان صار فتره ماشايفته...

طبيت للاستقبال فتحت الباب جان كاعد ورافع رجله ع رجله الثانيه ولازم الكعب مال رجله ويگلب بالموبايل..

رفع راسه شافني كدامه بسرعه كام والتفت خاف احد يشوفنه واتقدم باتجاهي واني مبتسمه بوجهه..
شجن.. الحمدلله ع السلامه كلت لماما بس اتحمدله لاتجي..
غيث.. الله يسلمج حبيبي ليش هيج متغيره وين خدودج ووجهج اصفر ؟؟
شجن.. غير من ورا حبك وهذيج الايام السوده..
... ياحبيبي كولي يالله مويوميه احجي وياج واطمنج ليش هيج هامله نفسج..

شجن.. جان كلش قريب عليه باوعت بعيونه ياربي الدقايق الي اشوف بيهه هاي العيون ماتنحسب من عمري  انسه كلشي بيهه ايده انمدت ع خدي الايسر وحرك بظهر اصابيعه ع خدي صابتني قشعريره بسرعه غمضت ورجفت شفايفي ونطقت كوه لاغيث ...

ابتعد بسرعه وكال روحي لا يجي عمر ولاتزعليني المره الثانيه اجي الكه هاي الخدود مورده ...

هزيت راسي وابتسمتله وطلعت كلما اشوفه احسه مليان هموم بس مايشاركني بي ولايحجيلي واعرف وائل يضغط وماثر علي وموضوع الزواج هو همه الوحيد...

رجعت للغرفه واني اتلمس بخدي واتحسس بمكان لمساته  ومبتسمه انفتح الباب قبس الشي الحلو بيهه ابد ماتحجي ولا عدهه فضول بس كتلهه شكرا كالت العفو...

مرت الايام بطيئه وهاي احنه هسه بشهر الواحد والبارحه خلصت  العده مال قبس انقهر عليهه شلون محبوسه وبيبي وجدو اجو من بيت عامر يظلون شهرين ويملون ويجون ...

كمت احس احساس غريب ودائما ايدي تشكلي وتكوم ترجف لو افز نص الليل مفزوعه ومرات تجيني حالات انطوي ع نفسي ويمر يوم عن يوم ما احجي اي كلمه اخس نفسي موطبيعيه وكانو تشكلت عندي حاله نفسيه اوشي ما اعرف شنو اسمي...

جانت كلما تجي ام وائل ما اطلعلهه ع هذيج السالفه مالتهه وعبالي تابت بس بيوم منهن الساعه ب١ الظهر ودنيا شته وتقريبا الدنيا راح تمطر ومغيمه..

بس اني وقبس وفاديه بدوام وماما اخذت بيبي لطبيب وجدي وياهن وعمر جان نايم واندك الباب ...

كمت اريد اشوف منو شفتهه من الشباك ام وائل فتحتلهه الباب وطبت جانت هادئه حيل كالت اريد احجي وياج اكعدي..

... شجن اجيت وحذرتج وبعده مافاد وياج واني عرفت كلشي جانت عندج علاقه بوائل وتريدنه يطلك مرته وياخذج ومن شفتي ماكو مجال من عنده حولتي ع غيث وهسه غيث يريدج ووائل يكول ما اخذلك هيج وحده..

ليش هيج هاي تربيه عادل شنو من اخلاق عندج واحنه نكول شجن حبابه تضحكين ع زلم وتفوتين بيناتهم وتخربين خوتهم ...

اني اليوم جايه  احجي لابوج ع كل سوالفج وهذيج مره وائل شابعهه كتل لان انتي براسه وخليتي يريد يشيل بيته حته يتزوجج بهذيج السنه ومن ماحصلتي لفيتي ع غيث ..

ادري بابني غيث يحبج ومايتنازل عنج بس لهنا وبس اني اليوم اوكفج عند حدج وهاي كعدتي منا لمن يجون ابوج وجدج واحجيلهم لازم يادبوج هم معوقه وبيج بله

كل عقلج اخذ وحده مثلج معقوقه لابني وكومه بنات يتمنن من كرايبي لوتظلين بس انتي ام الولد تضحكين عليهم جنت اشوفج من تجينه طلعتي تخربين عليهم..

شجن.. اعترف اني جبانه وضعيفه كوه جمعت الكلمات وكتلهه ما اسمحلج تحجين هيج وياي وائل هو حقير وعينه زفره وخلاهه ع طفله جنت كلشي ما اعرف....

قاطعتني وماخلتني اكمل كالت هذا الحجي احجي لابوج لوانتي لو احنه بالمنطقه بعدما اسكت ...

شجن.. خفت حيل ويجوز تتهمني ويجوز وائل يحجيلهم شي ويجوز غيث يتاذى ما اعرف شسوي بس كتلهه صدك ماتستحون تدرين بابنج هيج عينه وجايه تهدديني؟؟

شوهاي عاطت بيه ودك رزايل وتريد دكوم تضربني وفشرا عليه واني رجليه ماتساعدني كوه جريت العكاز ووكفت بس نقذتني قبس الي طلعت ع صوتهه...

بس جانت كميه الفشار مايلبس عليهه ثوب حته سديت اذاني ماريد اسمعهه واكو شغلات مافهمتهه شتقصد بيهه متعجبه شلون كدرت تنطقهن..

بس نقذتني قبس الي طلعت من الغرفه وجاوبتهه ولوتظل عليه تاكلني وماعرف شحجي.

قبس... من رخصتج خاله وين كاعده ابيت لوخان جغان شنو هالفشار هذا مومثل بناتج هي موعيب تقبلين وحده تتجاوز ع بنتج؟؟

ام وائل.. امشي انتي الثانيه بنت سميه الب...... جايه تعلمني العيب ..

قبس.. احترمي نفسج لا وحق الله اسمعج شي اخليج تستحين ع شيباتج امي نايمه بكبرهه شنو هاي النفسيه الي عندج وتفشرين عليهه يمج عاشت وياج؟؟

وواكفه بنص بيتنه وتهددين بيهه وتفشرين مره جبيره انتي والله العظيم اذا ماطلعتي بكرامه هسه اسوي سوايات اخليج طول عمرج تذكريهه...

ام وائل... طاح حظ هالتربيه السفره الي تخليج تحجين ويه مره جبيره هالحجي..

قبس.. المره الجبيره تكون محترمه مو تحجي كلام ماينكال لبنت بيت ..

ام وائل... رايحه اني بس انطيني صبر الا اهدم البيت ع راسج ياشجن واني الي واكفه ورا وائل هالمره الا اخلي يشوف شغله وياج؟؟

شجن.. طلعت وطبكت الباب وراهه التفتت قبس عليه كالت شنو السالفه شبي هذا وائل مدري نعال شو تهدد بيه خاف حابسته فد شي ...

شجن.. ماكو شي مايريدني اتزوج اخو ومحاربيني عفيه لاتحجين لاحد جنت احجي وارجف وهالمره مومثل كل مره ارجف مااسيطر ع نفسي وشي بداخلي ماعرف اوصفه

قبس.. شجن احجي شبيج اساعدج لاتظلين ساكته شو جايه تهدد وكفيهه عند حدهه تدري بيج فقيره ومستغله ضعفج...

شجن.. عفيه سدي الموضوع راح اروح انام بس اريد اهرب اريد اخلص من هذا الشعور الي بداخلي وهالمره ماراسلت غيث بسرعه نمت...

كعدتني قبس قبل الاذان اكعدي شجن ابوج وعمج عامر يريدوج ويكول خلي اتجيب تليفونهه كومه بسرعه اذا عندج شي من غيث امسحي..

شجن.. انهبطت هبطه بس اللع يدري بيهه بدون شعور والخوف مسيطر عليه مسحت كل الرسائل حته مال الشركه انطيت مسح للكل...

اريد اكوم اوصل للباب وارجع اكيد عدهم شي اول مره بابا يطلب تليفوني اكيد حجتلهم شي جانت قبس وياي وهي اطمني لاتخافين بس خوف بداخلي موطبيعي..

رحت لكيت بابا وعمو كاعدين وماما كالو تعالي وجيبي التليفون مديت ايدي انطيته لبابا وايدي ترجف ..

عادل.. شبيج بنتي ليش ترجفين؟؟
ام بشار.. هي صار مده هيج موكتلك يرادلهه مراجعه لطبيبهه بلكي ينطيهه علاج..

عادل.. بنتي اني ربيتجن وتعبت عليجن ومايوم قصرت وياجن ولا اسمح لواحد يحجي عليجن وخاصه انتي لان وضعج يختلف...
بس مال يجيني وائل ويشمر كلام ذم بحقج هاي ما ارضاهه اني ابوج احجيلي الصدك ولاتخلين الشك ينزرع بيناتنه وهااا بشار مايدري لان ماريد توصله وتعرفين اخوج شكاك...

شجن.. حجيت بتعلثم شنو صاير بابا ؟؟
... وائل جابلي رسائل بان انتي عندج علاقه بصديقه اني لا اجيت هديت عليج ولاضربتج لان اعرف تربيتي شنو بس اريد اعرف الصدك وين وشلون وصلت هيج رسائل اله وهاي كدام عمج صار الحجي..

شجن... بابا جذب والله ماعندي هيج اني وين اعرف صديقه واصلا ما اطلع من البيت بابا والقران جذاب وكمت ابجي ما اتحملت هيج تهمه..

عامر... شجن لاتبجين ربيناج احسن تربيه وعار علينه انشك بيج بكد الشعره بس يابويه رسائل من خطج شوصلهن لوائل اكعدي واحجيلنه جاي ويسوي بطولات براسنه مانقبلهه احنه واليوم هاي باجر اكبر منهه..

شجن.. عمو والله ماعندي شي هذا تليفوني يمكم والله ما اعرف منو داز اني ماسوي هيج والله مواني احس بلاعيمي راح يطكن وكمت ما اسيطر على نفسي انتبهو عليه كال بابا لماما كومي اخذيهه وعوفي تليفونهه يمنه ...

بس كومتني ماما وكعت بس ماانغمه عليه ارجف مثل السعفه واجاهه الريح اسمع صوت اسناني وهي طك واحد بالثاني بابا واكف ع راسي وعمو وماما تصيح اسم الله بس احس نفسي مذنبه وراح اتعاقب...

صاحت ماما قبس تعالي بسرعه واجت قبس هي وماما كومني واخذني للغرفه ورجليه تسحل بالكاع وبيبي طلعت من غرفتهه تصيح شبيهه شجن منو وياهه...

سدت الباب ماما وكعدت كدامي وهي تسالني احجيلي لاتخافين وعبالهه من خفت هاي الخوفه مسويه شي ماتدري هاي الحاله ملازمتني صار اشهر بس محد منتبه عليه...

طلعت ماما واني جنت بحاله يرثى لها وصممت اخلص من كلشي اريد ارتاح اتوسلت بقبس تنطيني تليفونهه وكتبت رساله لغيث..

غيث كلشي انتهى بيناتنه اني احبك حيل بس ما اكدر اكمل وياك لان تعبت من اهلك ولادز اي شي ع رقمي لان اخذه بابا اذا تحبني تحميني وتنهي كلشي بيناتنه لادز ع هذا الرقم ...

اتذكر هاي الكلمات زين ومن دزيتهه ما اكول ماجنت بوعي بس جنت عاجزه عن التفكير وما اميز اي تصرف صح لوغلط...

الي ادري بي تخليت عن غيث اثر خوفي وعجزي وضعفي وما انطيته مجال يدافع عني ولايدافع عن حبنه كل همي اخلص لان وائل مستعد يطلع عليه تهمه اكبر....

غطيت راسي مثل كل مره حته لا اشوف ولا اسمع ودرت وجهي للحايط وهاهي بعد ماعندي شي اخسره ابد ماجنت مستوعبه الي يصير...

قبس.. كلبي يحترك عليهه وما اكدر اساعدهه ولا هي تقبل تحجي شبيهه خلصت العده مالتي وماسامعه ولاشايفه لاعمر ولا بشار...

الساعه ٩ بليل شجن نايمه او بلاحرى تمثل النوم وفاديه تقره بغرفه امهه واني كاعده اتابع تلفزيون واندك الباب بسرعه خليت شال ع راسي وكمت ...

انفتح الباب واشوف بشار الي صار اشهر طويله ماشايفته شكد متغير مدري اني جنت مامنتبه علي شو بشعره خصلات شيب سلم عليه بكل هدوء وكعد...

بشار.. قبس من رخصتج اريد احجي ويه شجن؟؟
قبس.. لا عادي عفتهم وطلعت وما انكر خوفي ع شجن بسلا عرف بشار بشي؟؟

شجن.. جنت مسويه نفسي نايمه بس من سمعت صوت بشار احس كلبي كام يدك براسي بس كال شجن شجن كعدت ..

بشار.. اكعدي شجن خليني احجي وياج؟؟؟
...هاا صاير شي بس الخوف مبين عليه..
بشار.. حجالي ابوي وعمي عامر ورحت لوائل وسمعت من عنده شجن اني ما اسمح لنفسي حته اشك بيج احجيلي الصدك صاير هيج شي؟؟

شجن.. والله لااا بشار بابا مايصدكني والنبي مامسويه شي؟؟
بشار.. لاتحلفين وابوج مصدكج بس انريد نعرف منو الي سوت هيج ودزت من تليفونج وبالمناسبه الرقم الي دازين اله لوائل بس ابوج مايدري مجذب عليهم ويكلهم لصديقي ومعناتهه اكو وحده دزت رسائل لوائل اوو متفقه ويااا..

شجن.  منوو؟ اني ماطالعه وتليفوني يمي محد ماخذه..
بشار.. مامتاكد بس حسب تاريخ الرسائل اسالج قبس هم تاخذ تليفونج؟؟؟؟

يتببببببع.... متابعه ممتعه

شكرا عبير حبي على تصميم الاغنيه لغيث وشجن AbeerAL_Hussnawy