#هفوات الحياة
#بقلم : الراوية
#مشهد
بسم الله الرحمن الرحيم ❤
صلوا على النبي ❤
.
المشهد الأول
اربعة اشهر و إني بيت اهلي..اربعة اشهر عشتهن و محد قصر وياي ب أي شي..اي شي احتاجه اني و ابني موفرينه..من ملبس و مأكل و طلبات طفل ما تخلص
بس غصة و قهر كاتمتهن بگلبي..و ما اريد ابينهن لأحد حتى محد ينقهر لو يضوج و خصوصاً ابوية و امي..و امي بالاخص حتى ما يوجعها تأنيب الضمير
خالي ما قصر لا هو و لا زوجته و أولاده يوميه يزوروني و يطلعوني من ضوجتي..
اباوع ل نفسي و اني بهذا العمر بحظني ابني..المفروض هسا بالمدرسة
بين كتبي و اقلامي..انقهر مرات و انهضم من اسمع صوت الطالبات و هنّ يضحكن و يسولفن من صديقاتهن من يمرن من گدام بيتنا
أيام مرت و كملت الشهر الرابع و اني عندي اهلي
لا اندگ باب و لا انرفع تلفون منه..و چنت اگول اصبري زينب ربچ يفرجها و يحنن گلبه
چان يوم اربعاء..چنت گاعده بالصالة و بحظني ابني الساعة بال١٠ و نص الصبح..و امي تحظر بالغدا
اندگ الباب و اني طلعت..صحت منو
و اجاني صوت يگول اني
رديت اله و اني مستغربه هذا الصوت
- أمر اخويه محتاج شي ؟
- زينب صادق موجوده
حسيت بانقباض بگلبي و گلت بشفايف ترجف
- اي إني منو حظرتك ؟
- اني جاي من المحكمة و ياي تبليغ اريدها توقع غلى اوراق..
بس سمعت هيچ كل حيل ما بقى بيه..حسيت عيوني غوشت و نفسي ضعف..سندت نفسي على الحايط و اني اخطي خطواتي بضعف و صحت لأمي الي لبست عبايتها و طلعت..بقيت گاعده بالمطبخ و اني احس نفسي راح افقد
قبل لا تدخل امي و عيونها مدمعه
و بصعوبة حچيت و إني أسالها
- شكو ماما ؟
- بيت عمچ مشتكين عليچ
و يوم الأثنين لازم تروحين للمحكمه
عضيت على شفتي و بچيت و اني اخلي ايدي على شفتي..ما چنت اتوقع هيچ راح يصير
بس صار و إنتهى...
صار يوم الأثنين و رحت اني و والدي..من دخلنا للقاضي
باوعت بالوجوه چنت ادورله..ادور حتلو لطيفه
بس هو ما اجا..و إلي عرفته انو موكل محامي..
.
المشهد الثاني
خلصت الحفلة و المعازيم راحوا
چنت بعدني لابسة فستاني و قبل لا ابدل ملابسي
دخلت للهول و گتلهم افتحوا جنط النيشان
چنت متقصده هالشي ردت يوصل الخبر الهم و يموتون بغيضهم..حتى يعرفون اني أقوى من ما توقعوا..
بديت افتح بالجنط و النسواين يباوعون و يصلن على النبي..جنطه لأبني و ٣ الي..
اخر شي فتحت زوجة خالي علبة الذهب گالت انزعيه حتى تغيرين ملابسچ
و بالعلبة چان الوصل مال الذهب بقيمة ٢٧ مليون دينار..ابتسمت و اني اتذكر انو هو تاجر و متمكن و رب العالمين رازقه و دائماً يساعد المحتاجين و الفقراء
.
السلام عليكم شلونكم حبايبي 🤩👀
ادري اشتاقيتولي لحد يگلي احم احم
يا ربي باعوا الثقة😭💔
المهم ما حبيت اتأخر عليكم اكثر من هيچ
ف نشر المشهد من القصة الجديده
طبعاً لحد هسا مو كلش مقتنعه بالاسم و يمكن اغيره
اما الغلاف مؤقت علما اصمم واحد
طبعاً قبل لا نبدي رحلتنا بالقصة الجديده
ف هي حقيقية ١٠٠ بالميه..و بطلتها متابعة ويانا ان شاء الله
كل فرحانه بيها لأن اول رواية توصلني و اكتبها ف شكراً ل ثقة البطله انو انقل قصتها
النشر بصراحه ما أعرف شوكت ابدي بي
لكن راح ابدي احظر بارتات من هسا و من يصير موعد النشر ابدي بيهن ان شاء الله
و ها نسيت شنو رائيكم بالمشاهد و شنو توقعاتكم ؟
و بس والله ادري بنفسي سولفت هواي 😭💔
و بالاخير نلتقي على خير احبتي 😘😘