" بقلمي نجم اليل "
#عشقت رجلاً متزوج
#البارت - 37 - والاخييررر
كانت تلك النهاية...
.
حنين...ابوي هدي ومشه علي يريد يلزمه بس هو بسرعه جط من الحايط ..
اني احس رجليه تجمدن كلي كمت رجف ابوي اجه هجم عليه لزمني من شعري .. .
وسحلني ع الصاله احس شعري نشال من مكانه ..
دفعني ع الكاع وكعت وهو تقدم جان يرفع رجله ويدوس ع رجليني بكل قوته..
صحت صوت من شدة الالم يمكن سابع جار سمعني ..
كلها اجت ع صيحتي هو اجه لزمني من شعري احسه تكطع بيدة ضربني سطره
حتى اذني كامت تون ...
ويصيح ..
ابو حنين...شسوين وياه بنت الكلب ساقطه كح**
كمت ابجي واصيح...
حنين...يبه والله ماعندي شي وياه ولا اعرفه والله والله
كلت هيج ضربني دفره ع بطي وكال بصياح
ابو حنين...لا جذبين بنت الخرا
كمت ماعرف الضرب منين يجيني وامي صوتها تعبان ودكله عوفها وعمتي ومره عمي ..
وجدتي مره تضرب بسمار ومره دافع مره عمي تخابر ع عمي يجي ..
جدي يبعده بس ابوي يرجع واني كل هذا اصيح والله ماعرفه ماعندي شي وياه..
هو ماخله فشار ماخله غلط امي كامت تدفع بي وتحجي علي هو دفعه امي وكعت
بالكاع كامت ماتحركت ركضت عليها حضنتها مو مستعده لاي خسارة ياارب
كمنه نعيط فوكاها وعمتي ومرة عمي ..
راحت عمتي جابت مي رشت عليها ياله صحت رجع ابوي سحلني يضرب بيه
راح وجاب صوندا طبكها طبكتين اجت اول ضربه ع ضهري .. حسيت نشال ضهري ..
كمت اصرخ ورحت يم رجله اتوسل بي.
وهو مستمر يضرب ويغلط جان يدفعني وتجي الضربه ع وجهي احس وجهي
راح يطك طلع دم من خشمي هو بعده جدي وراح اجاني جايب بلايس .
ولزم ايدي يريد يشيل اضافري بالبلايس
اخذ اصبع احس روحي ماعت واصرخ
اجه عمي دفعه ويحجي علي طلعه بره
اني بقيت متمدده وامي ومره عمي فوكاي ..
هو اجه جايب واير يبريد يجلطه علمود ينتلني كمت اصرخ بلا وعي بهذا الضرب.
نساني حتى اسمي
جان كل شي بيه ينادي لمحمد اله صوتي ..
لو هو جان حماني
عمي كاله
-شنو تخبلت هيج مسوي مو حرام عليك
ام حنين...ادري انت هيج والله مال الخبال انشاء الله جعل ايدك والكطع مو جاي تحلفلك البنيه
ابو حنين...نجبي والله لاتموت اليوم ادفن الها كبر هي وعايشها بنت الكوا...
تواعد والله لاشرب من دمج
تقدم لعندي وبيده السجين جان كذلتي طويله تغطي وجهي هو لزمها وعتها بالموس تخبلت بالصريخ
اجه تهجم عليه مره ثانيه وعمي بعده هو دفع عمي وضربه ..
وجه سحبني فرني فر ودفعني لطخت كصتي بحافه الباب احس دخت مكدر حتى اوكف
ماحسيت غير ضربه ع راسي ونكسر العود مال النشافه ع راسي احس راسي خدر وكام ينمل بعد ماحسيت بشي ...
لحد ماحسيت السياره وكفت بالباب ويمي امي ومره عمي وعمي يسوق حاطين مغذي وكوه كاعده من الالم
جسمي كله يحركني ويوجعني ..
نزلنه وامي ودتني بغرفه جدتي وهي تنام وياي ابوي كام يصيح ..
يردني يمهم يكول هناك كبرها كمت ارجف
امي دكول خبال تخبل انشاء الله ايدك بالكسره
رحت ويه امي فرشت وتمددت يمها بحضنها جنت كلي ارجف وهي تقراة علي ..
وهو مستمر يغلط ويفشر تمنيت الموت كمت حتى ادعي ع حالي اموت ..
اليل كله مانمته لنص اليل .. مكدرت اكتم
كمت اشهك وابجي بصوت عالي وارجف
امي كعدت تقراة علي وتهديني ..
ضلينه كاعدين هي خطيه تعبانه انوب اني صرت عليها .. واني كل اليل اتشاهد
اذن فجر واني ابجي وامي حضنتني وتبجي وياي وكالت
ام حنين... يامي انتي الله لا ينطي الجان السبب ويلكها بحضه وجعل اليد النمدت عليج بالكسر بجاه هل اذان انه اكول وربي قبول بقيت ارجف عيني ماشافت النوم ..
امي راحت تركتني تصلي خفت كلش مجرد اشوف حالي اني وابوي بوحدنه اخاف يكعد ويكتلني
امي صلت وكالت ..
ام حنين...يمه ماتصلين اكومج ..
هزيت راسي بلا ودنكت هي كالت
ام حنين...هذا من الخوف خفتي وجتج الله لا ينطيهم كامت امي تحسب
ضليت متمدده ماطلعت الغرفه وابوي يفتر جنت متمدده وامي قفلت الباب لان ابوي بعده يتحسب الي
خابرت ع مريم .. وكالت الها ..
ام حنين...دزي ساهر بسرعه ع البيت لا تتأخرين ترا اختج تموت ..
كالت هيج وسدته شويه واجه ساهر ابوي طالع ..
اجت مريم شافتني تخبلت كوه لبستني العبايه ومشينه ع بيت خالي ..
وامي اشتكت ع ابوي عند خالي وخالي كال هسا اشوفها هاي هيج مسوي الله ياخذه
بعدها امي كالت نروح ع رنا احسن اخاف يجي يسوي مشاكل ..
ساهر اخذنه وصلنه ومريم وامي مشني طبينه وعمتي تفاجئت
سلمن عليها اني فوتتني امي للغرفه خلتني اتمدد ...
كوه تمددت .. ضلت امي تحجي لعمتي
واني بعدني خايفه وارجف من اتذكر
شلون جاب الواير يريد ينتلني ومن جاب البلايس يريد يقلع اضافري
جتني نوبة بكاء بهستريه
ام حنين...كافي يامي جعل ايده بالكسر انشاء الله
كالت هيج وباوعت ع عمتي وكالت
ام حنين...هذا اخوج اكبر خبل مجرم والله حرام علي ..
البنيه كل اليل تبجي وتشاهك حتى تشاهد كامت تتشاهد الله لا يوفقه
رنا...اي والله خبل محد يسوي سوايته غير الخبل ..
شوف خطيه صاير بوجها
كالت هيج وطلعت جانو جهالها يباوعون علي بستغراب وخوف
وجه عمر شافني وكال ..
عمر...هاي منو مسوي هيج
ام حنين...محد وليدي هي وكعت من فوك
عوفوها ياله طلعو
بنت عمتي كالت ..
-تردين شوفين وجهج
اني هزيت راسي باي لان وجهي احسه شثكله وماشفته
اجت عمتي طردتهم ..
طلعو يركضون ..
شويه وبنت عمتي جابت المرايه اخذتها وديه ترجف من الخوف ..
باوعت ع وجهي نرعبت شمرت المراه وصرخت امي ركضت علي ودفعت بنت عمتي وتهدي بيه ..
ماحسينه غير طبه محمد وندى ..
واني ابجي انوب دموعي كامن يحركن جروحي البوجهي .. كمت ابجي وصارخ
حنين...يمه يحرك يحرك يممةة عفيه يمةةة
هي حضنتني ..
**** مريم
مريم...خطيه حنين ماتستاهل الي جاي يصير وياها ابوي شمسوي بيها ..
يمكن لو مابوي ادعي علي
هي خطيه صرخت ومحمد طلع طبت ندى ونهدي بيها بس هي ماتسكت وحقها ...
جان فوك عينها مرومه ومنتفخه وجها كله كدامت وجروح وخموش هذا عده الفاف الي شادين بي راسها من الضربه مال الباب امي كالت ..
كلش نقهرت عليها حتى ماحولت اهديها كمت ابجي عليها وع حالها شكلها صاير مرعب ..
امي كامت تقره عليها واني كرفصت ابجي عليها يمكن لو تتخبل محد يلومها شافت الموت بعينها ..
طلعت بره ابجي مكدر اسمع صريخها الله لايوفق الجان السبب انشاء الله
ومحمد كالي ..
محمد...شبيها اختج ليش هيج صاير بيها..
بقيت ساكته وماحجي هو رد كال .
محمد...احجي شبيج شنو محمود سوالها شي كولي
كال هيج بنفعال ومبين خايف من شي من نبره صوته
وكتله ..
مريم...ماعرف البارحه وحد اجه هاجم ع البيت وابوي مشبعها كتل وهي تحلف لاعليها ولا تعرفه ..
واني احلف عليها..
هو رد بنفعال
محمد...وهذا ابوج هيج يسوي مخبلها والله مو صاحي .. .
امي طلعت تبجي
مريم...شلون صارت
ام حنين...كوه هدت ونامت ..
محمد...شنو صاير ليش هيج كاتلها
امي كالتله ..
ام حنين...الله لاينطي كسرها تكسر مره يريد ينتلها ومره يشلع اضفرها ومن البارحه مانامت
ولا اكلت شي بس ترجف وتبجي والله حتى شهاده كامت تتشاهد ع حالها خلاها
مريم...امي كالت اخر كلمتين ونهدت بالبجي رحت حظنتها وهي كامت تبجي بصوت عالي ودكول ..
ام حنين...ولج اختج راح تضيع مني
ندى وعمتي كالن اسم الله ليش تفاولين ..
محمد كال .. هي وينها كعدوها خلي احجي وياها
كال هيج وراح للغرفه تبعنه كلنه كعدها وهي خايفه طبيت امي ومحمد كال ..
بس خلي احجي وياها نفتهم منها ..
طلعنه بقى هو وامي وحنين ..
**** حنين
كوه هدني ونمت وكعدني محمد وامي بصفه سد الباب واجه كعد جان مبين خايف
جنت محتاجته حيل يمكن لو ما امي كاعده جان حظنته .. وكال
محمد...شوفي انتي تعرفينه احجي لا تخافين احنه كلنه وياج
حنين...والله والله ماعرفه انتو ليش ماصدكون
كلت هيج وكمت ابجي هو ضل يحجي وياي ..
محمد...اي كافي والله مصدكينج لا تبجين ارتاحي سمي باسم الله تعوذي الشيطان
ام حنين...الله لا يوفقه
سكتت وطبت مريم جان مبين خايفه .. وكالت
مريم...يمه ابوي دره يكول خلي ترجع ع البيت لا اجي اكسرهن
ام حنين...لا ارجع ماشوفين سوه بختج ارجعها ع الموت ..
مريم...هو كال اذا ماتجي اجي هناك ادفنها
حنين...اني كمت ابجي ولزمت امي وكتلها ..
حنين...يمة عفيه ماريد اروح اخاف والله يمة اذا تحبيني لاتروحين اخاف والله ينتلني والله
نهدت بالبجي هي تحضن بيه محمد يكول اسكتي مايسويلج شي ..
بعدها دك مبايل مريم ومبين ابوي رفعت السبيكر وكال ...
ابو حنين...اليوم ترجعين انتي وبنتج الصكط والله اذا مارجعتن والله اجي اموتها هل بنت الكلب ..
اني نبلع صوتي من سمعت صوت ابويه
عمتي اخذت المبايل
تحجي ويه بس هو حتى ع عمتي غلط ..
وكالت امي العصر نجي وسدته عمتي ومحمد كالولها ليش
هي كالت اخاف يسوي مشكله ..
طلعو وتمددت بس اريد انام ماكدر
غطيت راسي وصديت ع صفحه
شويه واسمع صوت ندى ومحمد بالغرفه واسمع ندى دكوله ..
ندى...محمد مالك علاقه لا دخل حالك عوفهم
محمد...نجبي شنو تخبلتي ليش مو خطيه
هي ردت بنزعاج..
ندى...ماشفت ابوها يهدد
محمد...وشنو يعني نتركه يكتلها ..
دك مبايله وكال الها
محمد...دمشي اطلعي عني ماتعرفين تحجين اطلعي ولي عني ...
هي طلعت وهو يخابر بالغرفه .. ومبين من صوته معصب ..
اني كلش نقهرت اذا مساعده وهي مو راضيه يساعدني .. لعد يريد نزوج اكيد تعارض هو مو الي .. ليشش ياربي
يعني عند الانسان الي ارتاح اله ومسدوده بوجهي .. هو هيج اني مالي حظ
رفعت الغطه وكومت حالي هو شافني انها اتصاله ..
هو باوع علي وكال
محمد...حنين اذا تعرفينه احجي لا تخافين
حنين...بعد شيفيد
محمد...احجي
حنين...حجيتله كلشي بسرعه وكتله ع ابو البسطه ودليته يريد يطلع وكتله ..
حنين...ترا قررت
هو باوع علي ببرود وكال ..
محمد...مو وكته هسا هذا الحجي
حنين...لا
هو رجع كم خطوة وكال
محمد ....شنو لا
حنين...يعني لا ماننفع انت بطريق واني بطريق واخذت هل قرار لان فكرت ومسدودة من كل النواحي الله يوفقك ..
محمد...اهوو نجبي كمتي تخربطين وين لحكتي تفكرين مو وكتها هسا
حنين...اني كتلك بعد ..
كتله هيج وكمت ابجي يريد يجي رفعت ايدي وتغطيت ابجي ..
حسيته اخذ حسره شكبرها وطلع ..
ومانمت موتني الام اتلكاها من جسمي من راسي لو من كلبي
بجيت ع محمد كلشش حتى امي كامت تحجي كالت كافي والله اذا سوالج شي
ماخليج
عضيت شفتي بقهر وانه اتذكر ندى تمنعه يساعدني كالها وصدك اني افكر بغيري ومافكر بنفسي ..
للعصر اجه محمد ورحنه بسيارته اني وامي ومريم لان ساهر رجع ..
رجعنه وكل الطريق ارجف وخايفه امي نتبهت ع اديه يرجفن كالت كافي يمه اهدي ..
دكت ع خالي يتلكانه لان خفت كلش من ابوي
وصلنه ونزلنه اول ماطبينه لكينه لازم الصوندا وطابكها طبكتين
لزمت امي من طارف ثوبها فتنه ومحمد فات ويانه وكال لا تخافين ..
فتنه وابوي كام وبيده الصوندا تقدر وضرب من جوة طخت برجلي كوة
سكتت ماصرخت خالي ومحمد صارو كدامه هو دفعهم ويعيط
ابو حنين...بنت الكلاب تطلع
خالي لزمه ورجعه هو ومحمد
خالي اكبر من ابوي وعلاقتهم زينه وهو ويحترم خالي فسكت ..
محمد...مو هيج تنحل المشاكل استهدي بالله اسئله وجاوبك ..
ابو حنين...ختولي والله لادفنها هي وعايشه تتواعد بنت الكلب ..
محمد...لا لا مو هيج يموعد ترا مو جدامك بناتك احسن تربيه والكل يحمد منهن والله ..
خالي...اي والله جاك تخبلت هيج مسوي بيها
ابو حنين...بالله رجاً عوفونه
محمد باوع علي وجه الكلام الي
محمد...انتي تعرفين هذا الهجم
حنين كلش نفعلت ومليت من هل كلمه صوتي صار بي بحه من البجي وكتلهم بصوت عالي
حنين...والله والله ماعرفه والله العظيم اذا الله بكبره انتو مصدكون احلف بيمن بعد
كولو بيمن بس حسبي الله ونعم الوكيل
امي حضنتني ماكدر احس تعبت
ابو حنين...ها المسرحيه تنتهي جذابه مو شفتج
حنين....يابه والله والله من جعل لا اشوف الصبح اذا اعرفه لو مواعدته بشنو احلف ياسلام يكفار يايهود يامسيح هذا الله الفوكي انشاء الله
يبرجدني اذا اعرفه وحق لا اله الا الله ماعرفه
كتلهم هيج بصياح لان تعبت وصلت حدي
محمد ...كافي مصدكينج والله
ابو حنين...شوفي هذا ابن الكلب الجاج الكي لو من جوة الكاع وتتزوجينه وراسج فوك رجلينج
كلهم عارضو اني بقيت ابجي واندب بحظي محمد كلش نفعل ..
وجدي كام يرزل بابوي حتى جدتي حجت علي كالت مدام حلفت امي كالتله والله اذا زوجها مابقى وياك دقيقه
خالي سكته بس اني الضليت ساكته
محمد خزرني هذا يدني احجي شحجي وشكول اني بي حيل ..
ضلو يحجون علي وامي فوتتني ارتاح واني من البارحه مانايمه
فتت نمت بسرعه شكد مادخت ..
***مريم
الكل عارض ابويه وخالي حجه علي ومحمد وامي تريد دك ع خوالي بس خالي ماخلاها
اخر شي سكتو يعوف سالفه الزواج جان اكثر شي محمد وامي معارضين ومن بعدهم خالي ..
سكت وهما للعشه وراحو لزموهم
واني اريد ارجع بس مرة خالي وخالي كالولي ضلي يم امج واختج خطيه مايكدرن
وساهر ماعارض بقيت وياهم امي باليل كل شويه تكعد تتفحص حنين واني هم
بس ضلت نايمه ..
وثاني يوم تغدينه وهي ماكعدت امي كالت اتركيها ..
رحت اريد اشوفها كلش خايفه عليه
كمت ابوع عليها اذا تتنفس او لا لان كلش قلقت عليها
للعصر ياله كعدت وبقت بالغرفه ..
ابوي مو زينه معاملته وي حنين كلش
ضليت يمهم 3 ايام ورجعت
***** حنين..
ابوي صار كلش مو زين وياي يكومني برزاله ويكعدني برزاله ..
تلفون ممنع تلفزيون ممنع سهره لل9 ممنع
طلعه ممنوع حتى بيت خالي ممنوع بيت عمتي ممنوع نحكم عليه مؤبد حتى مبايل امي اي احد ممنوع
الي يشوفه يكول اني الي ذنب ومواعدتة
كلش نقهرت صار فوك الشهر كوه راحت الاثار ..
بيبي تسمعني حجي واسكت وابلع حياتي صارت عبارة عن بيت اكل ..
اليل شكد عليه مر كل جروحي يتفتحن بجروحي يوميه اعيد شريط حياتي ..
لا من زغيره تهنيت ولا من حبيت ولا من كبرت شوكت
مر الشهر والشهرين واني بس كاعده حتى سوك ممنوع يمكن لو الهوى بيده جان هم منعه مني كلش قسى وياي ..
بهتت كل الوان الحياة حتى محمد اذا قبل اشوفه او اراسله هسا ماكو شي
احسن ربي يوفقه مو الي هي كوة
اجت عمتي رنا سلمت وطلبت مي لمحمد
رحت حطيت بالسراحيه مي ومشيت اني وبنت عمتي ودتله واني وكفت يم الباب ..
انتظرها جان كلبي طاك ع شوفته بس اريد المحه لو من بعيد
مدري بقيت واكفه حسيت احد تنحنح عدلت حجابي اريد ادخل احس ايد لزمت عاكسي.
باوعت شفته محمد شفت الهفه بعيونه وكالي بهمس ..
محمد...شلونج
جاوبته بهمس
حنين...زينه
محمد ... شوكت تجين هناك ..
نزلت راسي بيأس وكتله ..
حنين...بعد ماطلع ع احد ابوي منعني انساني محمد شوف حياتك
محمد... انتي تخبلتي ماعوفج والله وكلشي واله حل انتي بس وافقي ..
حنين...بلا مانعيش بوهم ونضحك ع حالنه
شوف حياتك ونساني لازم نتقبل مالنه نصيب .. بس اريدك دوم توكف وياي
عفيه ..
كتله هيج ونزلن دموعي مجاي اشوف شي من دموعي سمعنه دكه الباب عفته ورحت ركض
فتت رحت ع غير مكان مكدرت اتحكم بدموعي ..
ضلت عمتي كم يوم وتريدنه يمها بس ابوي مايقبل .. ضلت تحجي علي
وكلهم حجو علي وقبل بس اكيد مع اوامر..
وهي تخصني ..
ممنوع اكعد من عند الشباك ممنوع اضل طابه طالعه هناك ممنوع التلفون كلشي ممنوع ..
عاد امي كالت ..
ام حنين...ترا صارت عليها سم مو روحه اذا هيج مانريد حتى بطلنه .. مانروح
ابو حنين...طبج مرض وبعد احسن ..
حياتي صارت ماتنطاق نهائياً ابوي ع كلشي ويشك ..
حتى اذا تاخرت بالحمام كام يشك بيه ويخلي عمتي تحفصني اخاف عندي مبايل ..
ماكو شي بحياتي غير اكل نوم يعني لو ميته احسن
يعني لكل انسان واله طاقه تحمل بس يجي يوم وتنفذ طاقته وصلت مرحه كمت ادعي ع حالي بالموت ...
لدرجه اول ماسمع الاذان اكول يارب اموت واخلص اخذ امانتك ...
من كلشي أيست تعقدت وعقدني ..
يعني مرات اجوع اروح ع المطبخ اكل يكول شعدها تاكل وحدها
ويدز احد يمي يراقبني ...
ضلو يحجون علي وكالوله لا البنيه تسوي بحالها شي ومفاد ..
امي دكت ع خالي لان حتى هي تعبت وي ابويه اجه ورزله كاله تعدل لا والله اخذها هي وامها
احترم نفسك عاد موتها هم محسوب انت ع البشر هيج مسويه ..
حرام عليك هيج دافنها
خالي لزمني من كتفي واني مدنكه وكاله
-شووف باله هاي بنيه هيج حابسها معقدها ومعقد الكل تخبلت ..
اني صارت انفاسي سريعه ومدنكه وكمت ابجي وعفتهم يرزلون بابوي ..
وخالي كله تروح اذا رضيت او لا
تحضرو ومشينه
رحنه هناك بقينه 3 ايام وصادفت محمد بالدوام ..
وابوي دز علينه يكول كافي رجعنه
ورجعت لمثل السجن من سجن لسجن ..
اجتنه مريم وكلش فرحانه طلعت حامل كلش فرحنه الها ..
ومرت ايام عشتي جحيم بالبيت بسبب ابويه مرات نروح ع بيت خالي ..
وبيوم اجت مريم صار الها شهرين وجت يمنه تسير وعدها ابر جانو كلهم طالعين ..
بس اني ومريم وامي ضلينه ..
ومريم لازم تضرب الابره اني نمت وهنا راحن ع جارتنه لان دكتوره لان هاي الابر يردلها شوي شخص مخصص
امي ماتعرف الها ...
طلعن كعدت ع دكت الباب الخارجي اكول جاني صوت ولد زغير وكال ..
:- خاله بس اريد مي عفيه عطشان ..
حنين...لحضه
رحت احطله مي بطل زغير واني اكول صرت عاجوز يكولي خاله هههه
طلعت فتحت الباب نطيته بس ايدي من الباب جان يندفع طبو 3 زلم ..
خفت شفت واحد حاط سجينه ع ركبه الولد الزغير...
خفت كلش حطيت شالي ع وجهي وكلت ..
حنين...محد هنا
جان واحد منهم يهجم يسد حلكي ويسحبوني جان الشارع فارغ ..
كمت اتبرغث بس لزموني ثنين ماكدرت صعدوني بالسياره واحد صعد يسوق واحد كاعد بالصدر
وثنين وياي خلوني بالنص ومشو ..
واني ابجي واحلفهم يعوفوني ..
شفت السيطره كلت اجاني الفرج هسا اكول ..
واحد بصفي حط المسدس ع خاصرتي وكال ..
-قسماً بالله اذا حجيتي شي هذا افرغه براسج
حسيت الحراره وصلت لراسي ..
كلشي خسرت حياتي ماله اي طعم حبي واماني مو الي ماعندي شي اخسرة بعد ..
وكتله ..
حنين...والله لاصرخ والمهم عليكم ..
اني كلت هيج هذا البصفي بحافه المسدس ضرب راسي
احس كمت ادور دوران اريد افتح عيوني ماكدر بعد ماحسيت بشي ..
***** مريم
مريم...رحنه اني وامي نضرب ابره وامي خايفه ع حنين
جان كدامنه ثنين نسوان خلصن ضربنه وبنيه نطت لامي كلاص مي وكع من امي
تعذرنه وطلعنه وامي مو ع بعضها تعجلني وكالت ...
ام حنين...اخخ ولج يمه صدري يوجعني خايفه امشي امشي
مريم...قابل شكو يوجعج
ام حنين...خايفه خايفه امشي
مشينه وهي تعجل بيه وصلنه لكينه الباب مفتوح وبطل مي واكع امي طبت ركض تشوف حنين واني مثل الخفت ..
شويه وامي تصيح اختج وين ..
صخاام بوجي وينها
مريم...مو نايمه بالغرفه
ام حنين...ياغرفه يمعزايه ماكو
درونه ماكو حتى فوك بالبيتونه دورنه السطح مانكدر ندخله ابوي قفله من سالفه حنين ..
امي طلعت بالشارع جان ولد واكف يطلع عمره بال11 سنه هيج وكال ..
- خاله اجو زلم اخذو بنتكم بسياره سدو حلكها واخذوها
هو كال هيج امي كعدت بالشارع تبجي وتلطم اريد اكومها ماكدر ..
خابرت ساهر يجي خابرت ابويه وخالي ..
ماكو ربع ساعه الكل مجمعين وامي تبجي واني مدري شبيه ابوي بس يفشر ويحجي ع امي هاي تربيتج وهاي مدري شنو
خالي حجه علي ومانعرف وين نروح دكيت ع عمتي رنا
ساعه واجت هي ومحمد
وكنالهم الكل نخبص مانعرف شنسوي وين نروح وين هي منو اخذها ..
والولد كل شويه نساله محمد كرفص كباله وكاله بقلق ...
محمد.. متعرفهم شكلهم من وين
هو جاوبه بخوف
-عمو والله ماعرفهم حطو السجينه يم راسي وكالو كول اريد مي عطشان وكلت وهو طبو عليها هي غطت وجها كالت محد هنا بس واحد سد حلكه وجروها لسياره ..
محمد لزمه من ياخته وكاله بعصبيه ..
محمد...وانت ليش هيج تسوي ..
الولد كام يبجي يكول خفت يضربوني ابوي طرد الولد ويفشر علي ..
بعدين تقسمو ابوي يروح ع مكان ومحمد ع مكان وساهر وخالي ..
يدورون وصل خبر لكل العشيره هذا الي يسلم هذا الي يذب حجي واكوم واتعرك وياهم
امي ضغطها هبط وحطينه الها مغذي بس تبجي ..
راحو ع المستشفيات عماير حتى ع الملاهي راحو ماكو احد مالكو دكول فص ملح وذاب .. ومارضو
يكولون لشرطه ..
وباليل كاعدين وكل شويه واحد يخابر ..
جان يندك مبايل جدي جدي ماسمع زين اله يفتح الاسبيكر ...
فتح ويخابر جان يجي صوت واحد وكال ..
- بنتكم يمي وهاي كرصه اذن لابوها ...
احنه مانعرف شي يحجون وياه سده
امي نهارت واشرت ع ابوي بصبعها وكالت اله
ام حنين...اذا صار شي ع بنتي الخطيه بركبتك وماستحلك ليوم الدين ..
بعدها تخربطت جدي وخالي كامو يصيحون ع بوي شمخبص ابوي عبالك واحد ضاربه ع وجها
عمي بالدوام اني امادري حنين هسا وين شتسوي ماتسوي عايشه ميته شسوو الها امي جاي تتخربط .
رحت اني وعمتي ومحمد ودينها ابوي طلع يدور ع حنين..
نطوها علاجات وهم مغذي اني تخربطت هناك وهم شكلو الي مغذي ..
محمد خطيه دفع الحساب وماعافنه
3 ايام واحسهن ثلاث سنين حنين مانعرفه الجو متوتر ماخلو مكان مادورو محمد من اجى مارجع خطيه يدور
كلنه كاعدين ع نار وهذاك الرقم هم خابر مره ..
وبس نسمع صريخ بنات يعني مو بس حنين كومه بنات كلنه نهارينه
امي بس تتخربط ..
اني وساهر ومحمد اليل كله سهرانين والمبايلات يمنه ياله انام ساعه واكعد الكي
ساهر ومحمد سهرانين ينتظرون اتصال شي ..
واليوم الثالث الظهر كاعدين بالحديقه
دك تلفوني رفعت بدون مانتبه وكلت واني طالعه روحي ع حنين
مريم...الووو خيير
اجاني صوت حنين تبجي وصوتها خافت كلش وتبجي ودكول ..
حنين...مريم عفيه لحكولي لا اموت ..
ان عطت حنين كلهم اجو علي يتراكضون محمد اخذ المبايل بسرعه يحجي وياها
يحاول تدلي بس هو مدري شيحجي يهديها ...
رفع السبيكر وكال ..
محمد...انتي وين هسا نجي عليج وينج
هي ردت علي بصوت ناصي وتبجي ..
حنين...ماعرف ماعرف ماندل ماعرف احد بس لحكولي عفيه راح اموت
كالت هيج ونسمع صوت طركعه ونسد الخط ...
طلعت ارواحنه امي نهارت من سمعت صوت حنين وهيج دكول
ضلينه نتصل ع الرقم يطلع مغلق ...
شويه وندك مبايلي اريد ارفع اخذو مني ..
طلعت مو حنين شمرو عليه ..
جاني صوت رجال كلت منو وياي محمد اخذه بسرعه ..
رفع السبيكر .. كالهم تجون ع هذا العنوان تلكون بنتكم والنه حساب ثاني ويه ابوها ..
بسرعه راحو 3 سيارات محمد هو وابوي وساهر وخالي وبعد انوب من اقربنه ..
كعدنه ع نار نتباجه مانعرف شحالها وليش هيج سوو ..
***** حنين
بعد ماحسيت غير بمكان اضلم غرفه شويه جبيره وبيها شباك من فوك زغير مثل المستودع ..
ويا بنتين يعني 3 بنات ليش محبوسات مانعرف شي ..
ومقفوله الغرفه مانعرف شي يجونه زلم يشبعونه كتل ويطلعون . .
ومن كثر الكل نغمى عليه كمت ماعرف شكد صارلي شكد ماننتكتل وماكو اي شي نعرف بي ..
ومره كعدت لكيت البنات الثنين ماكو
وجان اكو مبايل بسرعه اخذته جان صرصر ..
ماحافظه رقم حد بس محمد بس كلت مستحيل ادك علي اخاف تصير مشاكل
بينه وبين ندى لا مادك بقيت اعصر براسي اني حافظه رقم مريم ..
ضل رقم مو حافظته كمت اجرب بسرعه ودك وانتظر ..
حجيتها انوب سمعت صوت محمد ابوي ماسمعت صوته ؟
واني وحاجيهم صارت اصوات عبالي اجى احد ..
فقلت المبايل واجه اخذه شاف المكالمه ضربني دفره ع صفحتي خلاني اتلوى
وطلع يحجي بمبايله ..
شويه وطلعوني بره كالو هسا اهلج يجون وشردو واني دايخه وهنا ماكو احد كلش خفت ..
كعدت بصف الحاويه رجيت عليها ..
*** محمد
محمد...اجاني الخبر ومدري شسوي وماكو بيدي شي
وامها خطيه انوب اسواء من حالنه ..
وبعد مصارت الاتصالات نطونه العنوان رحت واني متخبل الف فكره دور براسي
صوتها خوفها بجيها هي خوافه خايف لا احد سوالها شي والله امحي من الوجود اول مره بحياتي احس هيج مكسر كسره كلبي طاك عليها ..
وصلنه ع العنوان السيارات شويه مكان ضيك ..
نزلت كبلهم اركض ابواع يمين يسار اصيح بسمها اخاف لا نطونه عنوان غلط ..
لتفت شفت خيال حد يم حاوه ركضت ..
خليت المسافه خطوتين وصلت وتفاجئت
شفتها هاي مو حنين هي ميته صاير بيها ترجف دنكت حضنتها ترجف اريد اكومها ..
ماتكدر وتبجي وترجف بحضني مثل العصفوره انكسر كلبي عليها
طفرت دمعتي عليها حضنتها قوي وابوس براسها شلتها ورحت تلكوني ماخليت احد لزمها ..
خليتها بسيارتي ..
اني اسوق خليتها وره وابوها صعد وياي طلعنه وبالطريق كال الها ..
ابو حنين...احد لمسج يولي ..
عصبني حيل وكتله وروحي طالعه ..
محمد...يمعود وكت هل حجي ماشوفها شلونها ...
هو سكت هي تون .. انينها وصل لكلبي اريد احضنها واقفل عليه تعذبنه ثنينه
***** مريم ..
مر وقت طويل ونسمع صو السيارات كمنه نتراكض اني ماكدر اركض حامل وماكدر ..
نفتح الباب وطبو محمد وساهر كايدينها يمشونها بس صاير بيها ...
جسمها مزورك وجها خارطه من كثر الكتل ماتكدر حتى تمشي ..
كمنه نبجي هذا اليبجي هذا الي يهلهل ويطش جكليت وكفوها بالباب ..
ومحمد جايب طلي حطه جوه رجلينها وكال ...
محمد...هذا لسلامت حنين وبنات ابو مريم شريفات واخلاقهن الكل يحمد منهن مافد يوم سمعنه حجايه مو زينه عليهن
ذبحو جوه رجليها وطببوها جوه وصارت الهلاهل مدري منين تجينطرشت
فوتوها ع الغرفه مددوها امي يم راسها ...
وهي ترجف اصاير بيها شكلها مرعب من الكتل
الله لا يوفق الجان السبب ومحمد من صدك وكف وكفه مانسها اله وكلنه مديونين اله ...
بس هو كفو ومو غريبه علي حتى بسالفه محمود وكف وياها ..
كلنه تشكرنه منه وامي تشكرت منه ..
***** حنين
حنين يومين ياله كدرت استوعب واكعد وامي يمي وحنين بيت خالي ..
ونسوان يسلمن وبيوم الثالث اجن نسوان يسلمن ..
جنت بعدني بفراشي مرات افز خايفه بس امي ومريم ماتركني ..
جنت متمدده بس مو نايمه ونسوان كاعديت يتهامسن .. ويحجن
وحده منهن دكول الله اليعلم شسو بيها يمكن لعبو عليها وشمروها ..
وهذا مو اول مره اسمع هيج كلام ..
كعدت ع حيلي
جان القرآن يم راسي مرات امي تقره علي
اخذته جانو الكل كاعدين نسوان واقاربنه حتى ابوي وخالي محد تركني ..
لزمت القران
وحطيته كدامهم وحطيت ايدي علي وكلت ..
حنين...وهذا القرآن كلام الله الي مايجوز يحلف بي لا صدك ولا جذب الى وكت الضروره ...
اقسم بآيات الله اني شريفه وطاهره ومحد لمسني والي يطعن بشرفي يلكاها بحضى ..
كلت هيج ونهاريت كمت اعيط ع مريم تجي تاخذني ماستحمل بعد الله ياخذ كل انسان هيج يفكر
كامو يحجون علي اهداء ومصدكيني اجت مريم اخذت بأيدي ومشينه واعرج امي اجت مشتني ...
اسمعهم يحجون ع النسوان ويمكن فشلن خلي يولن يستاهلن ..
طلعت ع غير غرفه واني اتحسب ع كل واحد هيج يحجي والي سوه بيه هيج ..
شويه وطبت عليه ندى ومحمد يسلمون كعدو واني ماني مقهورة ع الحجي الي يطلع عليه من اول يوم ...
اذا هو ابوي اني بنص الموت يسألني هيج ..
ضلو شويه وندى طلعت هو ضل كاعد اجت مريم كال الها جيبيلي مي ..
راحت وكام اجه يمي لزم ايدي وكال ..
محمد...شلون صرتي
حنين...محمد عفيه لخاطري شوف حياتك والله مافيدك عوفني
محمد...اموت
حنين...لا اسم الله
محمد...هذا الحجي مو وكته هسا طيبي ويصير خير وانتي حياتي الي يعوف حياته يموت
بتعد عني وطلع ..
وسلمو علينه وراحو ..
مانسى مواقفه وياي للموت ..
بعدها اجت ايام سود ابوي كام يشك بيه
يكول منو يكول انتي بنيه ..
حنين...يعني مو حلفت بعد ع شنو
ابو حنين...انتي فاقده ماتدرين بحالج ..
ماجنت اتوقع هل كلام من ابويه يطلع نهاريت كلش ونفعلت يعني شنو اني بدون حساس ماعرف حالي ..
جان اكيد اكو اثار دم اثار اعتداء ردت اصرخ بوجها تمالكت نفسي ..
كمت افكر بالانتحار ماضل عندي حل غيره تعبت ليش هيج اني من دون الناس حظي
بيومها ضليت ابوع ع الكل اريد اشبع شوف منهم بقيت وي امي وكل شويه ابوسها واحضنها ...
لحد ماصار اليل صارت الساعه بال 12 ونص كلها نايمه كمت من فراشي ..
اخذت مبايل امي ضل اخر واحد اودعه
صعدت فوك لكيت الباب مفتوح
كلت اجط من فوك وهاي هيه حطيت رقمه اكيد كاعد لان هو يتأخر بالسهرة ..
رفع خط كال الو بقيت ساكته كال انوب الو اخذت حسرة ..
وكال لحضه بالله ..
بسرعه كال ..
محمد...حنين
كال اسمي واني خنكه بصدري مو كادره تطلع بجيت ع صوته وهو كال بقلق ..
محمد...خير صاير شي
جاوبتها بكاء..
حنين...محمد راح اموت عفيه سامحني
محمد...شكو شبيج شنو هل حجي
حنين...حبيت اودعك اخر واحد
محمد...لا ديري بالج
حنين...اذا جتك بنيه سميها حنين عفيه سامحني
محمد...والله اذا سويتي بحالج شي ماسمحج طول عمري ..
حنين...بكيفك
محمد....فكري زين شدكولين لربج مافكرتي بامج شيصير بيها .. مافكرتي بيه
حنين...بس والله تعبت تعبت ماكدر بعد طاقتي نفذت والله هذا احسن حل للكل ..
محمد...من شنو شنو التعبج
حنين...كلشي ماعندي حظ يتهموني والله حتى ابوي يكول منو يكول انتي بنيه واني احلف...
منعني من كلشي ويتهمني بكلشي ليش اضل عايشه ..
محمد...وحبنه
حنين...ماكو اي حب تضحك ع حالك تضحك عليه كل طرق مسدوده
محمد...لا تسوينها
حنين...شنو الي يمنعني
محمد...شوفي تعوذي الشيطان ترا حرام عليج فكري بينه كلنه و ..
قطعته اني وابجي جريت حسرة وكتله ..
حنين...تعبت محمد كلشي مو فاهمه من حياتي غير المصايب مصيبه وره مصيبه .. وحده اكبر من القبلها
محمد...مايخالف بس حرام
حنين...ادري حرام وادري غلطتي ماتنغفر بس تعبت والله اني هم بشر والي طاقه تحمل ..
يعني لشوكت ابقى
محمد...انتي بس وافقي
حنين...ماكدر ندى افضل اموت تدري من شفتكم من فوك كاعدين تخيت حالي بينكم بس مراح تصير هيج كعدة والله
كلهم يحاربونها كتلك ماعندي اي سبب ارفضك بس انت متزوج وزوجتك ممقصره وياك .. يعني ماكو اي سبب يخليك تزوجني والحب مو سبب كافي لزواج ..
محمد...انتي وافقي والله كريم
حنين...بقينه نحجي ضل يحلفني وينصحني ويصبرني وسديته باوعت لساعه بال1 ونص .. عززززه
نزلت ع كيفي ورحت لفراشي .. تمددت ..
بقيت ابجي كلشي مخربط بحياتي ..
وبعد كم يوم ابوي كال ..
ابو محمد...حنين تزوج
ام حنين...ادري انت جاك يهل زلمه مادكولي كورك وكور البنيه ماتخاف ربك جاي تحلف ..
ابو حنين...وانه مو مصدكها تتزوج يعني تتزوج
ام حنين...واني شايفه يجيها ابن الحلال يخلصها منك ومن ظلمك
ابو حنين...اجه
ام حنين...ومنو هو نعرفه لا وين هو وشكبره مانطي بنتي عمياوي اترك لعباتك هاي ..
ابو حنين...انتي الصمي بنتي وازوجها لليعجبني .. ورجال صدك رجال
ام حنين...لو بس اعرف منهو هذا الماخذ عكلك
حنين...أيست من كلشي تعبت والله تعبت وين ماتصفى خلي تصفى
ابو حنين... محمد
امي باوعت علي وعكدت حواحبها وكالت
ام حنين...وهذا يامحمد
ابو حنين...محمد يعني منو غيره ابن عمي
تفاجئت وفتحت عيوني ع وسعهن احس كلشي وكف بهل لحضه .. امي كالت
ام حنين...انت شتحجي هذا متزوج
ابو حنين...وذا مزوج شنو يعني اول وحده تاخذ ع ضره لو اخر وحده
ام حنين...انت شتحجي
حنين...احس عقلي وكف عن التفكير اجت ع بالي ندى وعطت ..
حنين....لا يعني لا ماتزوجه والله
كلت هيج ابوي كام ع حيله لزمني من شعري يهز براسي وكال بنبره حداة يم اذني ..
ابو حنين...تتزوجينه وغصباً عليج واذا ماطلعتي بنيه الي حساب ثاني وياج
احس دمعتي وكفت بطارف عيني وكتله بصرام ..
حنين...ماتزوجه ماتزوجه
هو جر شعري وضربني راشدي وكال ..
ابو محمد...شكد عرمه وصلفه بنت الكلب .. اريد بنت كلب ماتتزوج كلبه حقيره ..
والله ادفنج هنا فاهمة لو لا ..
كال هيج ودفعني ضليت ابجي .. هسا صاير هناك .. عائله تشتت
ليييششش كمت اخذ نفس وازفره ..
يمكن صح الخبر يفرحني ..
بس ع كد ما فرحت ضجت اضعاف ع ندى او ع الي راح اواجها
اني وامي عارضنه وابوي مصر امي خابرت خالي وجه خالي ..
كال شبيها مو زين لكيتو احد ياخذها هي بنتج ادري بيها والله واعرف اخلاقها ومتأكد من كلامها ..
بس صدكيني ياختي اذا ماتزوجينها هسا راح تشيلون خطاها البنيه طلعت عليها حجايه.. حتى اذا مو صدك محد يجي يدك بابكم .. بيوم
هسا اجيب مثال.. اذا جدامج قطعه قماش بيضه .. بيها وصخ وقطعه قماش بيضه نضيفه مابيها لو ذره .. ياهي تختارين
ام حنين...اكيد النضيفه ..
- البنت هيج قطعه بيضه يصير عليها اي شي محد يردها يكولج مدري شسو الها وشمروها اروح اخذ هذيج ماعليها حجي احسن
ياختي اجتج فرصه زوجيها وهي مو اول وحده ..
ام حنين...ياخويه ادري كلامك صحيح بس الرجال متزوج ومرته صديقتي شلون اسوي هيج .. منو يقبلها
وبنتي فاهيه والله هي مو حمل مشاكل وضراير ..
- اذا الرجال قابل وهو متأكد راح يعدل بينهم وليش مشاكل بنتج معززه مكرمه
وهي مالها اذيه ع احد اعرفها بس اذا هي ماتذي احد محد ياذيها ..
حنين...بس خالو هو متزوج وعندة ولد وجودي بحياته كله غلط والله ياخالو
- والله ياخالو اني نصحتكم والعلي سويته بكيفكم بس اجتكم فرصه وادري بيج ياخالو بس ناس ماترحم ...
اقل شي اقربنه اجو يسلمون ويطلعون عليج حجي شتترجين من الغريب ..
يكولون اخذوها سوو شي للبنيه ومحد يردها شمروها ..
وانتي ياختي اذا تتحملين خطيتها هذا شي ثاني ..
كال هيج وتركنه محتارين بس اكيد جنت اني ارفض امي بعد كلام خالي بدت تستسلم لكلام ابوي ومن جها
ماتكدر لان ندى صديقتها ... دك ع ندى مغلق
اني رفض ابوي كال والله لاذبحج
حنين...وعاادي اذبحوني ترا هاي مو حياة وانتم تتحملون خطاي
بسبب كلام ناس علمود فلان كال هيج وهذا هيج كال وانت صدكهم اني بنتك ماصدكني..
ابو حنين...اشوف كلام منو اليمشي ...
اجانه خبر ندى زعلانه ورايحه ع اهلها ..
جنت متوقعه هل شي امي دك عليها ماترد ..
تريد تروح عليها بس ابوي ماقبل ..
وكالو السبوع الجاي العرس ..
اني ابد مافرحت جان عندي عادي.. من جها فرحانه ومانكر فرحتي من اتزوج الانسان الاحبه ..
بس الباقي كله ضدي ندى شكول وشحجي...
جانت يعني فرحتي مو كامله مثل مااني ماقبل تجي فوكي مره اكيد هي ترفض وهل شي من حقها..
وجت امه وعمتي واخذني لسوك .. وامي وياي وبيبي .
امه مبين مو طايقتني الله يعيني عليها ..
وهو اجه
اخذنه حلقات واخذ وطقم كامل
بس اني ماحجي وياه ولا هو حجى وياي..
ومبين ضايج .. واخذنه ملابس اني اصلاً ماختاريت شي هنا وامي يختارن ..
وهو بس يصيح وطلع ماخذ غرفه وحده من زمان يبني بيها فوك السطح بنه غرفه ..
هذا الحجي من ابوي منعني وهو يشتغل بيها ...
المهم وبيوم الحنه حجزو البدله وحنه ماسوينه ...
دكول عزه ولا عرس ... وثاني يوم كوموني اخذني سحل ع الصالون
جنت بكلشي مو راضيه حتى بيوم عرسي
جان فكري كله هسا ندى شنو شعورها بهذا اليوم شنو ردة فعلها ..
زفوني اله وكعدت بالغرفه انتظر شويه واجه
مدري جان كلشي متخربط خايفه كلش عبالك لحضه اعادم
اجه تقدم علي جنت مدنكه راسي هو رفعه واشوف لمعه بعيونه
لزمني من اكتافي وكومني ورجع رفع راسي بأيدة
ابتسم وقرب وجها وانفاسه الحارة تلهث بوجهي ..
ماحسيت غير بدفو شفايفه جان يبوسني بجنون حسيت انفاسي راح تنكطع وهو مابعد
بعد عني وميل راسه يم ركبتي ويطبع بوساته بهدوء ...
حسيت ع ايده تفتح السحاب انفاسي تسارعت وحس راح انفجر من الخجل
لزم الفستان من الاطراف وهو يبوس بيه نزعه وووو
بروح ابوي طردوني من المنطقه موبس الغرفه هههههههههه
***** مريم
دخل محمد ع حنين وامي كاعده ع اعصابها اتأخر ياله نزل ..
انطه النيشان الامي امي لمعت عيونها بفرح وهلهلت ...
لزمت النيشان تفر بي وتصيح بنتي شريفه بنتي شريفه كلنه واكفين مانعرف نضحك نبجي ع امي
ابوي يضحك وعيونه تلمع بفرح رحت عليها اهمس الها يمه عيب فضحتي حنين ترا هي دفعتني وشايله نيشان وتركص ..
وتصيح والبعض يضحك .. واني ميته ضحك .
اشوف امي مدري ابجي مدري اضحك ندى خطيه زعلانه عند اهلها .. صح ماتمنينه هل شي بس بعد نصيب وصار والله يفرحهم ..
****
طلع محمد وعافني شويه واجه كعد وباسني من راسي وراح تمدد وسحبني لحضنه
حطيت راسي ع صدره وهو لازم ايدي ونمنه ...
اول مره بعد هل سنين انام مرتاحه ومطمئنه ..
حسيت بدفو حنيته قبل دفو حضنه بخوفه عليه بحبه ...
مرت ايام وحياتنه حلوة وندى صار شهر مارجعت هو راح عليها ماقبلت ..
الى ان فد يوم جابتها عمتي ام محمد ..
وجانت تضرب بيه بسامر من اول ماخذت محمد وهي هيج وياي ...
دائماً تسمعني كلام بس ابلع موس واسكت حتى لمحمد ماكول
البقيه بالبدايه محد تقبلني بس بعدين تعودو ..
عمتي رجعت ندى وطلعت ندى حامل كلشش فرحت الها من كل قلبي ..
جنت اريد اروح اسلم عليها وابارك الها ..
بس عمتي ام محمد ماخلتني كالت عوفيها وروحي ع غرفتج
كلش نقهرت بوقتها ابد مو زينه وياي..
اجه محمد واني جنت بالغرفه كتله اجت ندى كال جنت عدها ..
حنين...روح عدها خطيه
محمد...من شوكت هل حجي
حنين...من هسا ماريده تحس اخذت كلشي منها ..
محمد...ترا انتي هوواي مثاليه محد ضل هيج تخبلتي ..
عافني وطلع .. مرت ايام واشهر وندى ماتحجي وياي ومو طايقتني اصلا ..
محمد يجيب مرات وياه ملابس النه اكول اله ودي الها بالاول تختار
هو يضل يحجي اكوله علمود هي ماتحس انت جاي تفضلها هو يكول منو يكول هل حجي ترا هي هم زوجتي ..
ويضل يرزلني ويطلع مرت شهور ..
مريم جابت بنيه واني اهتم بعمر من يروح ع المدرسه ..
وصارت عدة مواقف بيني وبين ندى بعدين صارت علاقتنه رسميه فرحت كلش ..
لحد ماقوت علاقتنه عمتي دائما تسمعني بحجي واسكت ..
بعدين كامت تلح ع الحمال وجنايني كلهن حبلن باول شهر ..
كمت كلش انقهر هي ماعديتني ..
ورجعت علاقه ندى بأمي طبيعيه ..
وفهمناها وكلشي صار احسن ..
محمد يوم عندي ويوم عدها ..
وبيت اهل خالدة شالو ابوها مداين وطرو يبعون البيت كلش رتاحيت منها ..
وحياتنه ماشيه طبيعي بس عمتي دومها ضدي وتعيرني واسكت ماكول لمحمد ..
وهي بيوم ترزل بيه وسمع محمد حجى عليها .. كلش نقهرت دائما تعيرني ..
بالخطف واهلج شمروج علينه او بالحباله ..
اخذت كم مره تحليل منزلي وماكو اي نتيجه .. وتعبت نفسيتي كلش
ورحت ع اهلي كم يوم وهناك لتقينه اني ومريم كالت يولي شو تعبانه اخاف حامل
كتلها منين كل مره وماكو
بعدين هي وامي اخذني يحللن الي بس اني جنت متأكده ماكو شي ..
وطلعت كل التحاليل ايجابيه من فرحتي بقيت حاضنه امي وابجي ومريم هم ..
ورادن يبشرن محمد بس كلت الهن اني ابشره ..
واجه ثاني يوم اخذني للبيت ..
وصلني وكال هسا اجي..
اجه واني جنت اعدل بالملابس حضني من وره وكال ..
محمد...راح اجيب سبلت
حنين...جيبه وخلي بغرفه ندى
محمد...ليشش
حنين...علمود ماتحس انت بكلشي تفضلني
محمد...وشوكت نخلص من هل طنطانه هاي
حنين...مانخلص ابد
محمد...من انعل ابوج لا بو ندى لابو الحظ لابو الساعه السودة مدري شسوي وياج ..
ترا هاي مو حاله عايشه بمثاليه ورديه
انتي ليش هيج هاا حتى من جيت اتزوجج ترفضين ..
وكبل دكولين اهلي اهلج وافقو وانتي ترفضين وضليت متمسك بيج ماعفتج .. لاخر لحضه وانتي بكل فرصه تبعدين عني
اليوم عاجبني احط هاي الشغله بغرفتي ..
اجيب ملابس الج يعجبني عليج
هم ترفضين ترا طكت روحي والله هاي مو حاله من انعل ابوكم لابو ..
كال هيج وطلع طبك الباب قوي كلش نقهرت علي صح بس هو مايفهمني ..
اذا جاب شي النه يجيني اول هي اكيد تزعل وتحس فضلني عليها ونرجع مثل قبل وهو خطيه هم تعب
يروح يداوم يرجع من الدوام هم يشتغل ويتلكاني برفض كلشي .. حتى اول يوم من يجي بالدوام اكوله روح عليه وباخر يوم هم
هو يعصب بس من اليوم قررت وهاي هيه خلي يجي ..
بس هو ماجه للعصر اجه وبيده كانونه من وره الضغط كلش نقهرت علي ..
هو صعد وصعدت وراه فتح يريد ملابس
اني قفلت الباب هو سمع وكال بنزعاج ..
محمد...خلي الخرا مفتوح اريد اهج
من كال هيج اني رحت علي حضنته من ضهره وكتله
حنين...هاي زعلان
هو مارد
حنين...حمودي زعلان
هو مارد يريد يبعد ايدي وكتله
حنين...ليش زعلان ياحمادة
هو رد بنفعال ..
محمد...وخري عني احسلج
حنين...والله ماوخر وهسا ترضى
هو لتفت علي وكال
محمد..خير شرايده
حنين...اريدك ترضى ليش زعلان
كلت هيج ومديت بوزي هو حط ادينه وره ضهري وكال
محمد...وليش ارضى
حنين...قربت وجهي يمه وكتله ..
حنين...لان الزعل مو زين للحامل
هو فتح عيونيه وكال ..
محمد...شنو
حنين...ههههه اي
هو جرني علي وكال
محمد...جذابه
حنين...والله
هو لمعن عيونه بفرح وباسي بخدي ..
وكتله ..
حنين...هسا رضيت
هو باوع ع شفايفي بخبث وكال ..
محمد...هسا ارضى زين
ماحسيت غير شفايفه تحتضن شفايفي ويجرني للفراش ...
الكل عرف وفرح .. وعمتي كالت لاضلين صاعده نازله مو زين ..
كمت اقلل وندى جابت بنيه ... كلش حلوة
سمتها ع امها ومحمد كلش فرحان بيها ..
واني جبت بنيه .. سماها محمد عشق ..
كال علمود من واحد يكول بنت من
يكولون عشق محمد وحنين
وحياتنه كلها تمام الحمدالله اكو مشاكل بس مشاكل بي اي ثنين عاديه ومانطول زعل..
والف الحمدالله بعد هل معاناة الله رزقني محمد متفهمني ويحتويني حسسني بالامان الي ماحسيته عند اهلي
ورتاحيت اكثر من قوت علاقتنه اني وندى صح مرات عمتي تفتن بينه بس اني وندى متفاهمات ومانهتم الها ...
ومحمد الله يخلي النه ابد مافرق بينه او زعل وحده منه
وهاي حياتي ...
النهاية ...
ولهنا وتخلص قصتنه والله يسعدهم ياارب صراحه احيي محمد رغم شكد تعرض من حنين ع رفض بس بقه متمسك بيها وحافظ عليهن ثنينهن الله يسعدهم ..
وحنين اكثر واحد نرفزتني هي بعز الموت وماتقبل تخابر ع محمد تخاف ع علاقته بندى .. ع كولات محمد عايشه بمثاليه ورديه 😂😂👌🏻
حقاً من اجمل القصص والي كلش غاليه عليه من بينهم كلهم الها شي خاص عندي❤❤
وحبايبي والله البارت الاخر حقيقي .. مشهد الخطف حقيقي 100%100 وبيوم عرسها هيج كله كلشي حقيقه .. ختصرت بعض الامور لان طول البارت كلش فرحان خلصت الروايه بيون عيد ميلادي❤❤
والحمدالله عايشين مرتاحين ماحبيت اذكر لا اماكو ولا ركزت ع لهجه معينه للحفاظ ع الخصوصيه⚘
اتمنى ستمتعتو بهل قصه
الشعر بقلم المبدعه سمسمه💜smsma89
شكرا الها⚘⚘
واشكر الكاتبه سمو العراقSmoo-1997 هي الي خبرتني القصه تنعرض ع الفيس لان ماعندي فيس⚘
واشكر الناقله Ro88Altaee ست روعه الطائي ع نقلها للروايه ع الفيس ..
واشكركم كلكم نفر نفر كباب ومعلاك وتكه😂😂👌🏻
ونتظروني بيوم 15/4 بروايه جديده وحقيقيه ابطالها من بغداد والانبار ويتابعون وياكم القصه والبطله تابعت وياكم قصه حنين💜
اسمها حب قيد الانتظار⚘
نزل منها مشهدين ونشاء الله استمر بتنزيلها ومليئه احداث موجوده بحسابي ضيفوها للحاب يقراة
ادري بيكم بزعتو مني ومراح تقرونها😑👌🏻😂😂😂
بس تفتكم😁
وغلسو انتو شفتو البارت اطول من حياتي😂😂
الى القاء نجومي حشتاقلكم☆💜
..