الحَـــلْـــقـــة الــتــاســعــة عــشـــر ❤️ للكتابه الشاعرة شهرزاد😍😍😍
روايــــة #غاليتي ❤
(( الحلقة ماقبل الاخير )) ‼️
منجي يكح ورقد على ظهره : نعنشكلك دهشتيني
غاليه مقعمزه وتضحك مسكت سير الروب : قطعتتته
منجي يضحك : ياخد سوي
غاليه تضرب فيه بالمخده : والله تشوف
منجي قعمز وكرها بالقوه : قرب منها يحكيلها بصوت واطي : ماتبش اتبطلي
غاليه تبرم في وجها وادف فيه : تي حوووول ثقيل
منجي يقرص فيها ف اجنابها : تي والله السنين الي قعدتهن بروحي انطلعهن منك عامص
غاليه تضحك : وشن دخلني انا
منجي قرب باسها : اس
غاليه بصوت واطي : نبش نسكت
منجي ضحك : ماتعاندش خيرلك را نعضك
غاليه ضرباته على كتفه : را نكرلك اللحيه
منجي قرب منها : را نخبشك بيها
غاليه اتعيط وتضحك : حووووول والله اتبز
____________
2:30 م
سعاد اتغدى مع نعيمه والبنات
صفاء تاكل : انرنو عليها ماتردش علينا
سعاد فنصت فيها : بديتن فيها من توا
مروه ضحكت : ياماما نبو نطمنو بس
نعيمه ضحكت بصوت عالي : عليك جيل
سعاد اتهزب فيهن : اشقن بقرايتكن امتحاناتكن بعد اسبوع
صفاء : تي باهي ياماما وانتي اتذكري فينا بالهم
سعاد اتنهد : الله يسامح غاليه كانت حاضر نعم
مروه تضحك : الاجيال يختلفن ياماما 😌
____________
غاليه راقده في السرير ومتغطيه
منجي طالع مالحمام ينشف في شعره
غاليه بحتت فيه وضحكت : نعيماً
منجي بحت فيها : الله ينعم عليك
غاليه ماسكه الورغان بيدها : ابرم وجك نبي انصبي
منجي ضحك : بعد شنو ابرم وجك خلاص الهناك شفته
غاليه عزقت فيه المخده : اصلك بارد
منجي طلع برا : جعان
غاليه لبست روبها : اصبر شويا اندير دوش وانجيك
خشت للحمام ابتاع دارهم وسكرت الباب عليها
منجي طلع للصاله يبرم بحت في الاكل الي امس لقاه بايت
فتح التلاجه لقى شكلاطات وعصائر
خش للدار جاب تليفونه وبدا يتصل ....
___
امينه ادير في عدالة الشاهي
هناء تشرب ف الشاهي : ياناعليا راسي
رشا تضحك : وينه هو غريبه مافش عياط
هناء : خداه مني احمد ركبه معاه
عيشه : ان شاء الله ربي يعطيها يامينتي اكيد خاطرها
ساره : من تنزيلتها معش حملت هي صح ؟
امينه مدتلها طاسة شاهي : لا من يومها ماحملت
هناء : شكلها مالرعشه قطعت الخلف
امينه فنصت فيها : تحركي من مكانك ارزيني فيك
عيشه : بطلي ياامينه دعاء هذي ام وليد توا يصيرلها حاجه تنقهري فيها
امينه حطت البراد : اتنطق الميت بحتي كيف تدوي
وسمعت تليفونها يرن : عطيه ليا يارشا الله يربحك وراك قاعد ع المكتبه
رشا مسكاته بحتت فيه وضحكت : منجي
امينه كراته منها وفرحانه : اس اس
هناء تضحك : افتحي المايك
امينه فتحت الخط : كيف يفتح هو
هناء جت تجري وفتحت المايك
منجي : امي الوو
امينه : معاك الو صباح الورد ياحبيبي
منجي : نهارك مبروك ان شاء الله
امينه : هاا شن صار
منجي كح : مافش غداء ولا كيف ماحد دزلنا
امينه انصدمت : كيف ماجكش الغداء دزيتلكم مقعد مع عماد
منجي يضحك : المسج يدير فيها للجماعه كلهم اكيد لحسوه
امينه شهقت : عاطهم دااا السفره ماناقص عليها خير درناها
هناء تضحك : طح سعدهم خدو سفرة العرسان
امينه : اسمع توا اندزلك مقعد اخرى توا غير قولي
منجي : نعم
امينه : شن صار معاكم
منجي يكح : خلاص ياامي دزيلي الغداء
البنات يضحكن
رشا : را يموت الراجل معش تسأليه
امينه : وين غاليه به
منجي : ادير في حمام
قعدن يعيطن البنات
امينه اتفنص فيهن : اسس اس يافرخه انتي وياها
منجي : خلاص ياامي
امينه : اين خلاص لازم اتجو اليوم
منجي : لالا اين انجو
امينه : غير اسمعني ضروري اتجو نبو انصبحوها البنيه عيب
منجي : انا عادي هي توا اديرلي قصه وتبي كوافير و ييييه علينا عاد
امينه : اسمع توا تجيك اختك مع الغداء واديرلها مكياجها وشعرها
منجي : باهي نسألها قبل مرات ماعندهاش نيه تطلع ولا تعبانه
امينه قلبت وجها : باهي نرجا فيك رد عليا توا
منجي : اوكي تشاو
غاليه طلعت مالحمام جاته في الصاله قعزت احداه
منجي بحت فيها وباسها في خدها : نعيما حبيبي
غاليه : الله ينعم عليك
منجي : كلمت امي قلتلها وين الغداء قالتلي دزيتلك سفره مع عماد وعماد لحسها بلي فيها
غاليه ضحكت : وشن يصير توا خلاص توا ناكلو اي حاجه
منجي : لالا قالت توا ادز اخرى عريس خليني ندلع
غاليه ضحكت : ادلع حقاتك
منجي بحت فيها : حبيبي
غاليه اتنشف في شعرها بالمنشف : عيونها يابيبي
منجي : امي قالتلي نمشو اليوم قلتلها بلكي غاليه تعبانه ومش قادره تطلع
غاليه : لا يابيبي ليش ماقلتلها باهي عيب
منجي تنهد : باهي قلت انشوفك عارفك تعبتي امس في الليل شويا ومش قادره اتحركي
غاليه : لالا عادي توا اندير شعري كان عرفت ونعدو
منجي مسك شعرها يلعب بيه : توا تجيك هناء قالتلي
غاليه : خلاص به بس قوللها تجيب اوسيفه معاها علي ماعديت لبست و لميت الاكل الي قاعد ع الطاوله من امس مش عارفه كيف انسيناه
منجي طلع تليفونه ويرن على امه ..
______________________
وسام يدق ع الباب بكراعه
هناء تضحك : عيب عليك بلكي يديرو في حاجه
وسام ضحك : خوك المسخ مش مسلفني خير خليه يذوق شويا
منجي فتح ويضحك : والله مانك تمام
وسام يضحك : تي وييييين ياراجل مباراه ع القايله وعارفنا جايين ان شاء الله غير حطيت اقوال
منجي تحشم قدام هناء : خشي انتي خليني انأدبه شويا
هناء بحتت في وسام : هات السفره باهي راكم تقلبوها
غاليه مصبيه ورى الباب : اهلا
هناء حطت السفره ع الطاوله : ياقلبي نجك ليااا
غاليه اتسلم عليها : وين اوليدي
هناء تسلح في محرمتها : اسكتي يالولي مارقدني امس طول الليل واعي واليوم خداته اميره راقد عندها فوق افتكيت من هرجته
غاليه : باهي نبدا توا نلبس
هناء : كولو قبل باهي مزال بدري
غاليه تفتح في السفره اتبحت في الاكل : ماشاءالله بعدك امس ماتعشيناش
هناء تضحك
منجي خش وسكر الباب : شنو جايبه معاك
هناء : غداء ملكي مانحكيلكش
منجي قعمز ضحك : تي وين العز
وبحت في غاليه : جيبيلنا كواشين وجيبي بيبسي مالتلاجه حاطين عصير طبيعي مش جوا بكل مع العصبان
غاليه خشت وجت : هاكي ياهنيوه كاشيك
هناء : لا والله متغديه ماني متحشمه منكم
منجي : تي غار قعمزي كولي فكيني مالطروح
هناء : توا نشرب قازوزه بس
غاليه جت تبي اتصبي : انجيبلك كبايه
منجي كرها من يدها : قعمزي كولي توا تجيب بروحها
هناء تضحك : هضا بدا من توا يقلب في مراته علينا
غاليه تاكل وتضحك : انا انعبي فيه عليكم من امس
منجي مدلها لحم بيده : افتحي فمك هاكي
غاليه : نبش لحم يابيبي
منجي فنص فيها : افتحي فمك قتلك
غاليه فتحت فمها وكلتها
منجي : والله وكالك ماهو وكال لا خضره لا لحم لا شي مش معقوله هكي
______________
5:30 م
منجي يدق ع الدار : غاليه
غاليه تلبس في عبايتها : خش تعال
منجي لابس عربي : شن رايك
غاليه ضحكت : نجك لياا اول مره انشوفك بيها
هناء ضحكت : مايحبش يلبسها مع انها سمحه فيه
منجي يلبس في ساعته : واتيه ؟
غاليه خدت شنطتها : اها هياا
منجي يضحك : راك اطيحي بالكعب الي لابستيه
هناء : تذكري فرح احمد ؟ 😂
غاليه بحتت في المنجي وضحكت
منجي : عارفه ياهناء انها ولا زلقت ولا شي يوم فرح احمد خبطت فيها انا طيحتها
هناء بحتت في غاليه : ياكذاااابه تقوليلي تعكفت
غاليه تضحك : وانت ماتعرف تمسك السر بكل
منجي يضحك : ومابتش اتقولها لحد لانها فرحت اني اضبطتها وطيحتها
غاليه تضحك : بااارد كنت نكرهك ايامها
منجي ضحك وخدا مفتاح السياره : هيااا اطلعن
_______
امينه اتبخر في الحوش
عيشه : نزلتي سفرة الطقم
امينه : عليش انزلها خليها انزلها لما اتجي
عيشه : لا لازم تعرضيها ؛ هي امها مش دايره ارداده ؟
امينه : انا مش جايبه الا للعروس الذهب غالي والله ماقدرت نا جبت ورجب جاب
عيشه : ماشااءلله ان شاء الله ماتفقدكم
امينه اتضبح : عدي ياسويره نزلي سفرة الذهب من فوق تلقيها على سرير انويجي
وسمعت الباب دق طلعت تفتح : هاكي البخاره ياعويشه
طلعت تفتح ف الباب
هناء خشت : وين وليدي
امينه : قاعد يعيط خشي اجريله
غاليه ابتسمت : اهلين
امينه اتزغرت وسلم عليها : لولولولولولولي ماشاءالله ربي يرعاكم مالعين احويته
منجي ضحك وخش للسور يسلم على امه : احويجه
امينه اتبحت فيه : ماشاءالله ع العربي خايل فيك نجيلي وليدي طول في عرض
منجي يضحك : من في جوا
امينه : سعاد والبنات و خالاتك وعماتك وشويا مالجارات
منجي : لا معناها نطلع انكسد مع الجامعه قدام الباب
عيشه طلعت اتضبح لسعاد : تعالي اهم جو
سعاد طلعت اتسلم عليهم
غاليه اظبطتها : حبيبتي ياماما
سعاد باستها : ماشاءالله تهبلي طالعه
وخششتها معاها جوا : تعالي اسلحي قبل ماتخشي
امينه خشت اتبحت فيها ومبتسمه : اطلعي شعرك كنك رافعتيه
غاليه : قبل نبي نخليه هك
سعاد فكتلها المساكه : لالا فكيه
___________________
#بعد_أشهر 🌹
6:30 م
منجي خش للحوش وسكر الباب : غاليه
حط الشكاير في المطبخ
وخش للدار لقاها راقده
قعمز احداها وباسها على شعرها : حبيبي
غاليه ناضت بحتت فيه اضبطاته وقعدت تبكي
منجي انفجع : شن يابيبي كنك
غاليه متضبطته وتبكي : معش تخليني بروحك تعبانه انا
منجي اضبطها : باه باه بس اهدي شويا كنك حبيبي من مزعلك
غاليه تبكي : انا معش متحمله شي تاعبه
منجي حط يده على بطنها : هضا كله دايرته فيكي الشيطانه الي في بطنك
غاليه تبكي وماتبش اترد
منجي اضايق : يابيبي يومين ثلاثه واتردي لنفس القصه بكاء وخلاص ؛ تحسي في حاجه ؟؟ مريضه
غاليه : لالا نفسيتي تعبانه واعصابي تاعبه مش متحمله
تليفونها رن
منجي خداه : اهي اميره اترن ردي عليها
غاليه تبكي : مانبش انرد على حد كبدي زاعمه بكل
منجي فتح الخط : ايوه
اميره : اهلا شن الجو
منجي : والله قاعد انعاني في بنتي البكايه
اميره تضحك : كنهاااا
منجي تنهد : والله ماني عارف يااميره وحلت معاها
اميره : مش طالعه هي
منجي : لا مش طالعه قاعده ف الحوش
غاليه حاطه وجها في المخده وتبكي
اميره : توا انكلم احمد وانجيها يامنجي ماعليك
منجي : خلاص مش هانطلع لعند اتجي انتي
اميره : اوكي .. بااي
منجي سكر وحط تليفونها ع الكوميدينه
حط يده على شعرها : ماتضغطيش على بطنك هكي قعمزي كويس
غاليه تبكي : خليني بروحي
منجي ايتأفأف : استغفر الله العظيم عليك نكد ؛ عليش دايره في روحك هكي بس
غاليه تبكي
منجي رفعها من ايديها حول المخده واضبطها
غاليه تبكي : تعبانه يابيبي
منجي غطاها ويلعبلها على شعرها : ساهله حبيبي الي متعبتك كلها كم يوم واتجي ؛
غاليه تبكي : معش متحمله انا نقعد هكي
منجي يبوس فيها على راسها واضبطها بالقوه : اشششش هيا انردو نرقدو هي
ويمسحلها في وجها بيديه
غاليه سكرت عيونها وحطت راسها على صدره
منجي يحكيلها بصوت واطي : حبيبي انا نني هي
________
7:00 م
اميره ادق ع الباب ومصبيه ترجا
منجي فتحلها الباب : مرحبا
اميره خشت : اهلين شن جوكم
منجي تنهد ويحكي بصوت واطي : تعبت انا معاها كان نحسابها تبي ادير فيا هكي لما تحمل را قلتلها مانبش عيال
اميره تضحك : لالالا تحرك من مكانك العيال نعمه ; وعادي ديما تصير هي وحمها واعر بس
منجي يلبس في كندرته : انا عندي شغل مهم وكنت نرجا فيك ماقدرتش نطلع وانسيبها
اميره : وينها هي توا
منجي يحكي بصوت واطي : راقده في الدار ومن طلعتي بعد الغداء وهي راقده ماكلت شي
اميره : توا انديرلها حاجه تاكلها ماعليك انت
منجي فتح الباب : توا انرن عليك بعدين طمنيني عليها
اميره اتسكر في الباب وراه : عدي شغلك والله ماني مخليتها بروحها ماتخافش
منجي نزل مالدروج : هيا اوكي
________________
مروه اتسيق وسط الحوش
سعاد فتحت الباب وخشت : وين يامروه الميه واصله برا كنك بسم الله
مروه : هذي صفاء مفروض اتسيق الدروج انا ذبت ياماما قديش مني
والباب دق
سعاد ردت تفتح : منو
منجي : افتحي منجي
سعاد ابتسمت : اكيد اختك جت سيقي بسرعه راهي تزلق
فتحت الباب لقت منجي بروحه
منجي سلم عليها : خير ياعمتي شن دايره
سعاد فتحتله الباب : خش كنك برا
منجي خش جا يبي يسلح كندرته لقى اميه
سعاد خشت للمربوعه : خش بيها توا تبل شخشيرك
منجي خش وراها للمربوعه
سعاد : وين غاليه كنها ماجت
منجي قعمز ومتضايق : عمتي ديريلي حل انا والله على قد ماني متضايق مالوضع على قد ماني خايف عليها
سعاد استغربت : كنكم متعاركين ؟
منجي هز راسه بمعنى لالا : لا تاكل لا تشرب طول النهار نوم و كانهي ناضت تقعد تبكي انجي انقوللها كنك تقعد اتعيط خاطاني ماتقربش مني ماتحكش معايا
سعاد ضحكت : هضا وحم متأخر جايها ؛ الله غالب عليك لازم اتحملها واتوسع بالك شويا معاها عارفها حساسه ومن غير شي ديما تبكي
منجي اضايق : انا انتحملها راني مش جاي نشكي منها كان ماتحملتها انا من يبي يتحملها انا نبي نطمن انتي امها بلكي تحكيلك في حاجات انا مانعرفهنش طمنيني
سعاد : سلم وليدي ان شاء الله ماتفقدك اطمن المراه الحامل ديما يقعد عندها لخبطه في الهرمونات وتتعب بذات هي في نهاية شهرها اكيد خايفه
منجي : تتعب و اتلخبط لكن مش هكي تبكي طول النهار ولا تاكل لا تشرب والله حتى شغلي ماكيف الناس وانا انخمم كنها وشن فيها
سعاد تضحك : والله ماتخاف اهو انا امها قاعده عادي غير خايفه وتدلع عليك شويا
_______________
اميره دايرت شربة ماجي ابتاع الكيس عالسريع
وحطتها في سفره ومعاها توست بالجبنه
وخشت بالسفره للدار : غاليه
حطتها ع الكوميدينه واتنوض فيها : صبي يابايره
غاليه يادوب فتحت عيونها وبحتت فيها : ميرو امتى جيتي
اميره : كنك مرعشه الراجل شن جايك لقيته وجه اصفر
غاليه قعمزت اتلم في شعرها
اميره : طح سعدك ياغاليه بحتي عيونك كيف منفخات
غاليه : الوحم جايني عليه مش طايقته وكارها روحي لاني كارهته
اميره تضحك : معناها الفرخه هاتطلع وجها منجي يعني نسخة هناء ! بعدين اين وحم وانتي في التاسع
غاليه ضحكت : ياسامطه اعصابي تعبانه لاني مش طايقته ضميري يأنب فيا شن اندير ياريتني ماحملت
اميره ضحكت : معش تقولي هكي بحتي انا قاعده انتمنى من ربي ان يعطيني ليا ثلاث سنين وربي ماعطاني
غاليه تنهدت : ان شاء الله ربي يعطيك ويريح بالك يارب
اميره مسكت السفره : هاكي كولي وعدته اني اوكلك انا
غاليه مسكت كاشيك وبدت تاكل : مع ان ماعندش نيه بكل
اميره تضحك عليها : بحتي بطنك كيف الكوره تهبببل
غاليه اتأفأف : تضرب طول الوقت سحنت كبدي لا جت لا تريحت
اميره : وتيتي شنطتها ولا انوتيها لكي انا
غاليه هزت راسها بمعنى لالا : وانا قادره اندير حاجه اصلا
اميره صبت : وين الدبش الي شاريتيه
غاليه : الدبش الاخر عند ماما طبعا عشان الاسبوع اتجيبه لكن في افارولات وصاكو صغير وبودره وهكي في الدرج الثاني
اميره فتحت الدرج : هنا
غاليه ؛ اها هن
اميره تمسك في الدبش اتفرج عليه : ياناعليااا قلبي يالولي خيااال
غاليه ابتسمت : ان شاء الله المره الجايا انوتيلك انا دبش البيبي ياميرو
اميره طلعت تليفونها اتصور فيه : ان شاء الله يارب ؛ خليني انزل الصور ع السناب قبل ماتجي المفعوصه يشوفو دبشها
_____________
9:00 م
منجي رن الجرس بعدها فتح : السلام عليكم
اميره لبست وشاحها
منجي خش لقاهن في دار المعيشه : شن الجو
غاليه ابتسمت : اهلين
منجي بحت فيها : شن حاسه روحك توا
غاليه حطت يدها على بطنها : الحمدلله كويسه
اميره : مش اتقول اميره ماعندهاش كلمه وكلتها بالسيف و شوف كيف صحصحتها لك
منجي ضحك : تاريتك تفعلي والله
اميره : وتينا حتى شنطة الانسه الصغيره
منجي ضحك : والله جديات يعني خلاص
غاليه ابتسمت : باديه انحس ب ليه من توا
منجي بحت فيها : يعني انشيلك توا
اميره ضحكت : لاااا لية الجياب هاتلقاها اطير للسقف وتنزل يامينتي
منجي : باهي ماعطاتكش موعد معين هي
غاليه : الثلاث ايام هذينا قالتلي اليوم ولا بكرا ولا الي بعده
منجي : ان شاء الله خير
اميره طلعت تليفونها : انرن على احمد طول
منجي : خلي تليفونك احمد جاي متعشي معانا
اميره ضحكت : الله ريحتوني مالتطييب ولا انا الي نبي انطيب غاليه حامل
منجي : جبت معايا عشاء واتي حطيته ف المطبخ
الباب دق
اميره صبت : اكيد احمد نمشي نفتح
المنجي صبا : لا مش احمد قعمزي
ومشى يفتح في الباب
اميره : من الي جايكم توا
غاليه : والله ماني عارفه بلكي حد من اصحابه جايبله حاجه
منجي فتح الباب وضحك : تأخير نص ساعه ريتو الجو انتو
هناء ضحكت : والله ما مني من وسام
وسام يسلح في كندرته : ياراجل مطلعني مالقهوه تعالو ضروري ونبيكم كنك شن في
منجي ضحك : مافي شي انتعشو وانغيرو جو بس
وخدا منهم يوسف : وين يامسخ معش جيت
يوسف يضحك
منجي : يمشي ولا شن نظامه
هناء تسلح في محرمتها : يدب مع الحاجه ويمسك في الساس ويمشي
منجي : مش مزال بدري عمره توا كيف يمشي
هناء : هذا لهلووووبه نااار قريب حتى يطير مش غير يمشي
وخشت للبنات في دار المقعد : مفاااجأة
اميره ضحكت : اخرب عقلك هناااااء
غاليه تبي اتصبي : كيف جت الجيه هذي
هناء طبست عليها : قعمزي خليك ؛ منجي ياحنه يبي يغيرلك جوك شويا عزمنا عالعشاء قال تعالو تعشو
غاليه : زين مادار والله تغير جوي يابنات اميره ياما هدرزت معاها الله يربحها كنت تعبانه امبدري
هناء بحتت فيها : مزال وجك اصفر
اميره : شكالي منها منجي لا تاكل لا تشرب
غاليه بحتت شافت حد جاي مالباب : يوووووسف
اميره صبت تجري خداته : ياحبيبي وليدي انا
هناء : مش وليدك !؟؟ معناها استلميه خلاص
اميره اتبوس فيها : عطيه ليا يبات عندي اليوم الرزيل رايفت عليه
غاليه : بيش يكسرلك المترد الثاني غير الي كسره يومتها
اميره تضحك : خليه يكسر فداه
هناء : وتيتي شنطتك وحاجتك
غاليه هزت راسها بمعنى اها : اميره وتتها
هناء اتبحت فيها وتضحك : كنه خشمك كابر وعيونك صغرن
غاليه ضحكت : شفتي كيف متنفخه هن عيوني صغار من عند ربي اصلا
اميره : وين راجلك انتي
هناء : مع منجي في المربوعه
اميره مسكت تليفونها : انظر وين احمد طول اتحسيه خليني انشوفه
غاليه : اميره حطيه ليا هنا انبوسه السخيف بحتي يبحت في القزاز متسهف خاطره يكسر
هناء صبت اتلم في التحف : انحطهن ع المكتبه وقبل مانروح توا انردهن لكي را يدشدشهن
غاليه تضحك اتحط في يده على بطنها : شنو هنا عروستك اهياا
يوسف حاط يده على بطنها
ويزر فيها بصبعه ويناغي مستغرب ..
____________
1:00 م
منجي سكر الباب : مع السلامه انستو
وخش للمطبخ
لقاها اترد في الموعين في الدولاب : تعبتي اليوم
غاليه داهشه : لا والله البنات غسلن المواعين وردنهن غير هذينا الكبايات العمليات انرد فيهن مكانهن
منجي مصبي ع البار يحكي معاها : تغير جوك
غاليه ابتسمت : الحمدلله عادي غير تاعبه شويا
منجي ضحك : شن قالتلك الدكتوره لما عديتيلها امس ؟
غاليه ضحكت : ماقالت شي
منجي : قالتلك سهلي على روحك الجياب
غاليه ضحكت : منجي ماعندش لك جهد
منجي قرب منها اضبظها وباسها : حتى كان راجلك قالك نبيكي
غاليه : باهي خليني انخش للحمام بس و انغير دبشي
منجي به نسبقك للدار انتفرج ع التلفزيون ولما اتكملي تعالي
غاليه هزت راسها بمعنى به
منجي رد بحت فيها : الله الله الروب الاسود الشفاف
غاليه ضحكت : هضا الي شاطر فيه
منجي ضحك وطلع : ماطولش
منجي مشى رقد ع السرير و ولع التلفزيون ايتفرج
جاه اشعار ع الفيس مسك تليفونه وفتح النت
غاليه خشت للدار لابسه روب الحمام : منجي
منجي بحت فيها : درتي حمام قصدك ؟ نعيما
غاليه : لالا غسلت جسمي بس
منجي ضحك : وين الروب الحمر
غاليه اتأفأف : مافش ولا روب خش فيا شن اندير
منجي يضحك : تعاليلي بلا روب المهم المضمون الي في الروب جوا
غاليه ضحكت
منجي تنهد : باهي الي شفت ضحكتك حبيبي تعبتيني وراك ودهشتيني اخرى
غاليه جت قعمزت احداه رقدت على كتفه : اسفه يابيبي نكدت عليك بس انا خايفه نبي انموت بذات بعد قالتلي ولاده طبيعيه
منجي مسك يدها باسها ويحكيلها بصوت واطي : انا فداك معش اتأسفي المهم انتي عندي
غاليه قربت منه باساته : انحبك انا
منجي سكر عيونه : اخرى
غاليه : باساته
منجي : اخرى اخرى
غاليه تضحك : تي بطل
فتح عيونه اضبطها ويضحك بصوت عالي
غاليه : افطن بطني
منجي وخر : والله ننسى فيها الفرخه هذي را
غاليه اضبطاته وسكرت عيونها
منجي مسكها من ايديها وخرها : لالالالا شنو ترقدي هضاا !!! نوضي نبيك في موضوع مهم
غاليه اتأفأف : تي ماعندش جهد 😫
منجي يهز في راسه بمعنى لالا : توا اتجيبي وننحرم انا منك قريب شهر كامل وراس امك سعاد تعرفيها
غاليه تضحك : صبرني ياربي
منجي باسها احدا وذنها : اس قتلك انا را ناكلك
غاليه تضحك : ادغدغ فيا هنا بطل
منجي عضها في خدها ويحكيلها بصوت واطي : ناكلك انا توا ولا شن اندير فيك
غاليه : مش تعشيت توا
منجي غمزها : تعشيت لكن نبي انحلي 😉😘
_______________
4:00 ص
غاليه فتحت عيونها حطت يدها على بطنها واتوجع
قعمزت في السرير وعاضه فمها
مدت يدها ولعت ضي الوناسه : منجي
بحتت مالقاتاش احداها
قعدت اتضبح : منججججي
منجي جا من دار المعيشه مفجوع : شنو يابيبي كنك
غاليه : وين كنت
منجي : اندخن برا ماقدرتش اندخن احداك عشان ماتتعبيش كنك يابيبي
غاليه اتحرك في يدها : مش قاااادره شكلي خلاص
منجي انصدم : كيف خلاص
غاليه اتعض في يدها : نبي انجيب يعني كيف خلاص
ااااااه يااااربي ساعدني عليك الم
منجي يبرم في مكانه : باهي كيف اندير توا
غاليه : تلقاني موتيه شنطتي في ظرفة الدولاب ااااه عليك اللللم يااااربي
منجي فتح الدولاب وطلع الشنطه
غاليه : افتحها فيها قفطان قطن هذا الي نبي انجيب بيه
منجي يفتح في الشنطه : تي هيااا ؛
طلعه ويلبس فيها : ارفعي ايديك حبيبي هياا
غاليه : عبايتي مالشاطار ورن على مااما وووووه علياااا خلاااااااص
منجي يجري ويكر في العبايه
غاليه وجها عرق ومنغصره : شنطة البنت وشنطتي يامنجي خلي تليفوني في جيبك
منجي لبس سباطه و خذا الشناطي ونزل يجري للسياره حطهن ورن على سعاد نوضها وركب يجري
فتح الباب لقاها في الصاله مصبيه ومطبسه ع الكرسي ماسكه فيه بالقوه
منجي مسكها من ايديها : هيا حبيبي
غاليه اتعيط : ااااه ياربي ساعدني
منجي يحكيلها بصوت واطي : تحملي شويا بس اوصلي للسيارع عيطي براحتك
___________________
6:00 ص
منجي مصبي برا و على اعصابه يبرم
اميره طلعت اتشوف فيه : خلاص ادعي كنك تبرم تقول زغده
منجي : خايف عليها هي تدهش من صدرها مش كويس عليها اتجيب طبيعي
امينه حطت يدها على ظهره : يعني انتي خير مالدكتوره توا ربي يقومها بالسلامه غير اصبر
منجي : يارب يارب يارب
امينه : قالتلك الدكتوره خش احضر معاها كنك ماخشيت
منجي هز راسه بمعنى لالا : والله مانقدر هانموت كان شفتها اتوجع
امينه اتبحت في المستشفى : ماشااءلله كم كلفت الجياب هنا
منجي : استغفر الله العظيم ياامي اصبري بعدين اسألي
امينه : مستشفى الامل تقول هوتيل ماشاءالله
منجي يهز في كراعه ومش معاها بكل يخمم في غاليه
سعاد جت تجري : يامنجي تعال الدكتوره طلعت
منجي صبا يجري يبحت فيها وساكت
الدكتوره : مبروووك بنوته زي القمر ماشااءلله
المنجي ابتسم : الحمدلله يارب ؛ وغاليه ؟
الدكتوره ابتسمت : ..........
_______________
#يتبع ....