الحَـــلْـــقـــة الــرابـــعـــة 🌹 للكتابه الشاعرة شهرزاد😍😍😍😍😍😍😍😍😍😍
روايــــة #غاليتي ❤
مروه في النص مقعمزه بحتت في المسجل : حي عندك خيط بتاع تليفون مده لياا انحط انا
المنجي مده لها : حطي حاجه كويسه
غاليه قربت منها بصوت واطي : هاتي انقولك شن اتحطي
مروه : شنو ؟
غاليه حطي ابتاع اليسا عيشه والسلام
المنجي سمعها : مروه عطيني الخيط شويا انحط حاجه بعدها حطي انتي
غاليه كشخت وحطت راسها ع القزاز
مروه مداته له : حط حاجه سمحه را تقعد شينا
المنجي ولع اغنية اجنبيه وعلاّ الصوت
البنات قعدن يصفقن ويصورن
وغاليه قلبت وجها : عليك صداع 😓
________________________
امال اتكنس قدام الباب : شفت شاليه صاحبك نظيف ولا لا ؟
وسام مقعمز قدام الباب : والله ماني عارف مافتحتهش
امال : صبي ابرم عليها
وسام يضبح لخوه الصغير : عدي يامنذر شوف الفيلا الي احدانا
المنذر لابس شورت وطالع : تي نبي انعوم انا
طلعت حنان : عطيني توا نمشي نا ياوسام
وسام : افتحي الرواشن بس هويها هكي عشان اتغير بنتها
حنان بحتت مالباب : سجى اتجي معايا
سجى اتستف في المواعين : لالا عدي بروحك ولا خودي لينا
وسام : توا من بعد المسافه يعني اتعازمن
حنان طلعت : توا نمشي بروحي وناخد وليدي بلا جميلة حد ....
ومسكت ولدها من يده واتمشي فيه : هي دووودش دووودش 😍
_____________
11:00 ص
هناء سقمت قمعيزتها : واخيراً
غاليه تحاول تفتح الباب مش قادره
المنجي بحت فيها : داير تأمينه مايفتحش من برا
صفاء : باهي هياا افتحلي بسرعه نبي انصور سناب ونحنا انزلو في الحاجات
المنجي ضحك ونزل : توا نفتحلك وانزلي افتحي الباب لأختك
غاليه اضايقت : هناء انزلي افتحيلي
رجب درس السياره وفتح الروشن : تعال يامنجي نزل عمك مختار
المنجي : امي خودي عمتي سعاد وكملن طول توا تلقي وسام طالع خودي منه المفتاح
امينه رفعت السله في يدها: هيا سوعيده
المنجي طلع تليفونه وبدا يتصل
وسام فتح الخط : وين يامانجا
المنجي : اطلعلي برا يالوس وجيب المفتاح
وسام صبا وبحت في امه : امي وصلو العرب
امال : خلاص خليهم ايتريحو توا وبعدين في العشيه نشربو معاهم قهوه وانسلمو عليهم
___________
غالية تمشي بشويا واتكر في كراعها
هناء تمشي وراها : احسن حاجه السياره مش بعيد من المكان
مروه شايله الصاكو : ودايرين طرق للمشي
صفاء : الزرع والورد يبي تصوير وسيلفيات 😍
غاليه شايرتلهن ع الفيلا : اهياا هي شفت ماما في الروشن
مروه : كبيره بكل عليك جووو
صفاء : توا انقول هذي ابتاعنا شريناها 😍
غاليه بحتت فيها : فعلا انك تافهة وتفكيرك سطحي 😒
امينه تفتح في الرواشن شافت المنجي و وسام شايلين مختار مشت فتحتلهم الباب
المنجي يحكيله : عمي مختار تقعد هنا في الرواح ؟
مختار : لا خلوني جوا قدام التلفزيون توا بعدين كان صحلي نطلع بالكروسه
رجب شايل الكروسه وخاش وراهم
البنات ركبن فوق يجرن
غاليه راكبه ع الدروج بشويا
هناء مسكت دار كبيره : هذي دارنا انا وغاليه
صفاء حمقت : لالا الكبيره لنا
غاليه تضحك : عليك غباااء هن الي فوق ثلاث ديار وحمام
هناء بحتت فيها : يعني كيف
غاليه : وحده فيها نحنا لأربعه و وحده ماما وامي امينه و وحده لخوك
صفاء : ييييه صاح انسيت الصبايا يبن دار
هناء : خلاص عادي نحنا الاربعه انديرو جو
مروه : الدار فيها سرير نفرين كيف يصير
غاليه : انا سرير مش شوري مانرقدش ع الارض بعد الضربه الي كليتها امس
صفاء قمعزت ع السرير : خلاص ارقدي انتي وهناء فيه وانا ومروه توا انفرشو لوطه
هناء ضحكت : ناعليااا ملي تفهم في الجو 😍
صفاء ضحكت : اسمعن تسمعني انكلم ولا حاجه فكونا مالبصاصه
غاليه فنصت فيها : اتكلمي في عينك
هناء ضربتها على كتفها : خليهن يعيشن حياتهن حتى انا كبركن كنت انكلم غير المريضه اختكن نفسيه
غاليه هزت راسها : لالا الي اتكلم انبص فيها
مروه بحتت في هناء : شفتي جو الفرخات الي ادير فيه غاليه 😒
هناء ضحكت : تي والله ماتقدر بعدها حي عليها مني
_____________________
أميره عند هلها
ومقعمزه في المطبخ احدا امها وخواتها
تسنيم : انا خش خاطري من لما خشش خوه ناااعلي عليك شخصيه احلى من احمد
اميره ضحكت : حاصل في روحه بارد مافيه جو بس حالته كويسه هذا تاخديه وتدعسي على جيوبه يلبسك الذهب
تسنيم ضحكت : باهي امتى ايروحو عربك
اميره : انظر عاد كم بيقعدو يوم غادي
نوريه : شن دايره معاك عمتك ؟
اميره : كل حد في حاله
نوريه : وراجلك ؟
اميره ضحكت : ماشي حاله بس كويس مايحبش يزعلني
نوريه : وانتي ردي بالك منه تو مفش في رجاله
اميره ضحكت : لا ماعليك فيا
تسنيم : انجي انبات عندك اليومين الجايات نبي انطيحه مش شوري
اميره : توا انخططلك في طلعه معاه اصبري عليا بس
نوريه : فكنا من قلة الادب وانتي راك تطلقي من ورى جرر اختك
اميره ضحكت : غير خليها بلكي تسقديها ورايا واتريحي
______________________
5:00 م
المنجي لابس شورت اسود وماليه كت سوده ونظارات شمسيه
قاعد يركب في الشمسية عالشط واحداه وسام مقمعز
صفاء ومروه شايلات كراسي وجن
وسام شافهن جايات صبّا : هلك جو انا نمشي انقول لأمي ترجا فيهم من امبدري ....
المنجي يحكي وفي فمه الدخان : خلاص انتلاقو بعدين
وصلن وبدن يفتحن في الكراسي و ينضمن في الطاوله
مروه بحتت فيه : قصدك ادخن انت
المنجي ضحك ونفخ الدخان : وعليش السؤال هذا يعني
مروه : شي فضول بس
صفاء برمت بحتت وراها : اهما جو
امينه حطت سفرة القهوه ع الطاوله : ماشااءلله الميه تقول قزاز
هناء كانت اتمشي في غاليه وجت حطتها قمعزت
غاليه داهشه : المشي واعر ع الرمله
امينه : كويس المشي ع الرمله توا تبرا كراعك
هناء اتبحت في البحر : نبي انعوم
صفاء صبت : انا خاشه توا 😍
مروه : ارجي ناكلو كيكه من ابتاع غاليه
صفاء كشخت : لالا انخشو توا بعد نطلعو ناكلو
مروه صبت : هياا باهي
هناء : صبي انخشو يالولي
غاليه هزت راسها : مستحيل انخش بكراعي هذي
امينه بحتت مقابل : جايات الصبايا اقعدي مع البنات توا
هناء قمعزت : ماعندش نيه انجامل
المنجي تباعد منهم وعدا بعيد بكل ..
امال ابتسمت : السلام عليكم
امينه سلمت عليها : خيرات كيف حالك شن دايره
امال : الله يسلمك والله الحمدلله
امينه : هذي جارتي سعاد وهذي بنتها غاليه
امال ابتسمت : شفتها في الفرح معاك
و سلمت علي سعاد : كيف حالك شن دايره
سعاد : سلم حالك احبيبه
امال : هذينا بناتي ياامينه هذي حنان و وهذا ولدها مراد
وهذينا سجى ولينا
_________
6:30 م
صفاء ومروه يعومن
مروه راقده على ظهرها : كم لياا معش خشيت بحر
صفاء ضحكت : تي سنين
مروه : بإذن الله مش هانروح الا وانا سوده فحمه
صفاء : ايييه مش غير هانخلل في المية والملح
المنجي جا قرب منهن ويبحت فيهن : خشن جوااا شن تعومن ع الشط
مروه ضحكت : مانعرفوش
صفاء : تعال علمنا
المنجي قمعز ع الشط : شويا وتوا انخش
الصبايا مقعمزات بروحهن هن وحنان
والبنات دايرات دائره بروحهن
لينا مش متحجبه مقعمزه اتبحت في المنجي
غاليه اتبحت فيها ومتضايقه منها
نغزت هناء في جنبها
هناء بصوت واطي : كنك
غاليه وشوشتها : بحتي كيف اتبحت في المنجي
هناء ضحكت : بعدك عليك سماحه اتحسيها خايله عليه
غاليه قلبت وجها : مش كل حاجه الشكل
هناء : تي كنك ديما قالبه وجك انا نحكي عادي
سجى ابتسمتلهن : وسام من يومه يعيط نبيكم اتعرفو على هل المنجي و يقوللنا عنده اخت تعرفن عليها
هناء : والله حتى لما جت امكن في الفرح امي ياما دارت قالتلها ليش ماجبتي معاك البنات
سجى : ايامها كان عنده اسبوع مرات عمي ماقدرنش انجو ...
وبحتت في غاليه : انتي مواليد كم
غاليه ابتسمت : 95
سجى ضحكت : ماشاءالله عطيتك اصغر
لينا ابتسمت : اندورو لخويا لنا فتره ماعندكنش عروس
هناء ضحكت : عندي غاليه 😍
غاليه خبطتها على يدها وضحكت : لا انا مرتبطه
لينا بحتت فيها : باهي تمام
هناء بحتت في لينا : لينا ناخدوك للمنجي
لينا ضحكت : وشن معنى انا يعني
غاليه ابتسمت : من تبحيتك فيه من امبدري 😏
لينا انصدمت وجها انحمر : شنوو ههههههه لا مابحتت
هناء ضحكت وقرصت غاليه : مسمطك يالولي ماتزعلش منها ديما بصارتها ثقيله ؛ انا هكي عجبتيني من امبدري
لينا ابتسمت : سلمك
سجى : بعدك لينا تحب الفصيله هذي جو الطول والشعر الاسود الكثيف واللحيه
هناء ضحكت : ياحنه سمح طالعلي
لينا ابتسمت وبحتت فيه : لا هو ماشاءالله عليه
غاليه قلبت وجها و قعدت اتهز في كراعها
(( المُشكِله أن تَكوني أُنثَى مَعجونَه بالغِيرَه !
وَ تأتي أُخرَى لتُخبِرَكِ أنّ حَبيبكِ وَسيم !* ))
__*
امينه بحتت في المنجي : نويجي نصبلك قهوه
المنجي هزبها راسه بمعنى به
امال بحتت فيه : تعال سلم يامنجاا
المنجي ضحك وصبا
امال ضحكت : وسام طول النهار يحكي عليه مانجا جابلي مانجا دارلي ماشي مع مانجا
المنجي : كيف حالك ياعميمه
امال : نجيه حبيب عميمه انا طيبه كيف حالك انت
المنجي : الحمدلله تمام
امال بحتت في مراد : شفت مانجا ياميرو ؛ في الحوش يمسك التليفون ويقول انلكم في مانجا صاحبي
المنجي ضحك وخذاه رفعه : اووووباااا صار اتكلم فياا في الحوش
مراد يضحك
سعاد مسكت الموس : نويجي نعطيك كيكه
المنجي : من دايرها
سعاد : غاليه دارتها
المنجي : لا خليها توا مانبش
غاليه بحتت فيه وانصدمت
المنجي نزل مراد عند امال و خذا القهوه
ومشى شربها بسرعه و سلح ماليته وقعد بشورت
لينا اتبحت فيه ومبتسمه
غاليه رقالها بكل وبحتت في هناء وشوشتها : خوك ماصدق يعرض في جسمه
هناء ضحكت : يعني تبيه ايتمرن في صاله ع الفاضي خليه يعرض حقاته ياماما 😌
المنجي خش زقب في البحر و يعوم
لينا : سهفتني الميه اتخشن تعومن ؟
غاليه سكتت و كشخت : انا كراعي مانقدرش
سجى : انا عادي
هناء ضحكت : حتى انا عادي انخش
لينا صبت : هياا باهي
امال : وين ماشيات فكونا مالتمشاي ع الشط توا خوك يشطح فينا
سجى : لا نبو انعومو
امينه اتبحت في لينا : نجيها ماشاءالله .. كم مواليدها ياامال
امال فرحت : سلمك مواليد 93
امينه : اممممم ربي يحفظهن لكي
غاليه خدت كرسيها وقمعزن قدام ع الشط و قعدت اتفرج عليهن واتراقب في لينا ..
المنجي يعوم جوا بكل بروحه وبعيد منهن ماجاش شورهن
________________________
10:00 م
وسام ابتسم : شن شكلها هذي اي وحده فيهن
سجى : نزيكه بكل دمها خفيف و هدرازه وعجبتني فيها على طبيعتها مش متصنعه
امال بحتت في وسام : الطويله عيوناتها كبار نفس عيون خوها تحسها
وسام : مش عارف انا ماشفتهنش اصلا
حنان بحتت في امال : حسيتها حتى امه عجبتها لينا اتبحت فيها على طول
لينا تحشمت وصبت دارت روحها ماشيا للمطبخ
وصبت برا تصنت
وسام : قصدك تاخذها للمنجي ؟
امال : على طول تسأل عليها واتبحت فيها
وسام : والله كان عليا مانلقى احسن منه نسيب
سجى : لكن البدل شين تخايل وسام ياخذ هناء و خوها ياخد لينا سامطه
امال : غير نحنا انشوفو البنت قبل وموضوع لينا مرات مايصيرش بلكي الراجل عنده وحده يبيها
وسام هز راسه : لا هو ماعنداش لكن على علمي مش مفكر توا ومايحبش الصبايا هو حاصل في روحه شويا
لينا فرحت وقالت بينها وبين روحها احسن مش ابتاع وجيج ..
______
رجب ومختار وكلهم قاعدين برا قدام الشاليه يشربو في شاهي و كعك وحاطين فاكهة
المنجي صبا ويلبس في سباطه
امينه : وين يمي ؟
المنجي غمزها : شويا توا انجي
امينه ضحكت وبحتت في سعاد : ماشي يدخن مايبيش يقول قدام بوه
المنجي طلع وخبط مروه على راسها
مروه بحتت فيه وضحكت
صفاء ومروه قاعدات ع الرمله وحاطات السماعات ويصورن
هناء نغزت غاليه : كنك اليوم كله قالبه وجهك عليا
غاليه : شي بس تعبانه نايضه بدري وهكي وخاطري نرقد
صفاء بحتت لقت لينا وسجى جايات
برمت على هناء : جن البنت المش متحجبه واختها
امينه : رجب افطن للبنت المش متحجبه توا انقولك بعدين عليش
هناء بحتت فيهن وابتسمت : كنكن غادي يابنات تعالن
سجى شايرتلها بيدها بمعنى تعالي
هناء صبت : صبي ياغاليه نمشو معاهن
غاليه : لالا فكيني
سعاد فنصت فيها : صبي مع البنيات
هناء : شن جوكن
لينا : تعالن نمشو ع الشط
هناء ضحكت : كان بعيد الشط مالشاليه را ماخلونش بس ميزته قريب
سجى : هي هذي وسام قلناله نمشو مع البنات قال به بس بروحكن لا
غاليه اول ماوصلت ع الشط قمعزت ودارت وجها للبحر وقعدت اتفرج ع الشط
البنات احداها يهدرزن
لينا بحتت قدام شافت واحد يمشي : في حد جاي من غادي حي علينا من
سجى لبست محرمتها : مش باين من بعيد
هناء برمت بحتت وضحكت : تي هذا منجي
لينا ابتسمت : فجعني قلت من هذا
المنجي خطم من قدامهن ومنزل راسه
هناء : منجي تعال سلم
المنجي تخزرط : السلام عليكم
هناء : هذينا خوات وسام
لينا ضحكتله : اهلين
سجى : خيرات كيف حالك
المنجي يحكي ومنزل راسه : اهلا وسهلا
غاليه انقهرت ( الحقيرات والله نقهرها توا اتشوف )
وعدا المنجي وبدا يمشي
غاليه بحتت فيه وقلبها يدق : منجي
المنجي انصدم وبرم بحت فيها : نعم
غاليه مدتله يدها وابتسمت : تعال صبيني نبيك شويا
هناء اتبحت فيها ومستغربه
لينا وسجى يبحتن في بعضهن ساكتات
المنجي مستغرب بس قرب منها ومسك يدها وصباها
غاليه مبتسمه واتبحت فيهن 😏
ودارت روحها تعثرت : ااااه كراااعي
المنجي مسكها : بسم الله
جا يبي يفك يده غاليه مابتش تطلقها
استغرب وقال في عقله كنها دارت هكي
لينا بحتت في هناء : في بينهم حاجه
هناء ضحكت : غاليه والمنجي ؟ 😂😂
سجى : كنك تضحكي
هناء : هذوما توم وجيري عرايك 24 ساعه
لينا هزت راسها : من مسكتها فيه باين يبو بعضهم وانتي ماتبش تقولي
هناء ضحكت : والله مافي حاجه بس غاليه متربيه عندنا من وهي صغيره
لينا برمت واتبحت فيهم
سجى ابتسمت : انتي مرتبطه ياهناء ؟؟
___
المنجي مشى بيها قدام شويا
وغاليه كل شويا تبرم اتبحت وراها
المنجي برم بحت : كنك
غاليه بحتت فيه : معش اتبحت لاوره 😒
المنجي : وعليش ؟ وانتي كنك كل شويا بارمه
غاليه : هك نبي انشوفهن يبحتن فينا ولا لا
المنجي فك منها يده : نبي انقمعز انا تعبت مالمشي
غاليه قمعزت احداه واتبحت في البنات
المنجي برم بحت فيهن : شن في غادي كنك انتي
غاليه : شي خليني انبحت فيهن 😒
المنجي حط دخان في فمه ويولع فيه
غاليه كشخت عليه : طفيه عشان صدري مانتحملش
المنجي ينفخ في الدخان : مش عاجبك صبي
غاليه زعلت واضايقت : كنك اتعامل فيا هكي
المنجي يبحت في البحر وساكت
غاليه عيونها دمعن : ماتبش حتى اتبحت فيا
المنجي بحت فيها ورد حط الدخان في فمه : انا الي معش فهمتك
غاليه كرت من فمه الدخان وطوحاته في البحر : احكي معايا كويس كنك تغيرت هكي فجأة
المنجي ساكت ويحك في ايديه على بعضهن
غاليه دمعتها نزلت : نحكي معاك انا
المنجي ساكت
غاليه : باهي تمام ...... وجت تبي اتصبي
المنجي مسكها من يدها
غاليه قلبها دق وبحتت في يده
المنجي حول يده بسرعه : قمعزي فكينا مالنكد توا تمشي تبكي يحسابوني درتلك حاجه
غاليه قمعزت وقعدت ساكته وقلبها يدق ( مسك يدي ياناعليااا مسك يدي )
المنجي يحكيلها ويبحت في البحر : كيف مخليك حبيب القلب قاعده معايا هنا ؟
غاليه استغربت : كيف ؟ مافهمتش
المنجي تنهد : ابتاع الرسائل
غاليه اضايقت : كنت عارفه انك هاتحكي هكي بس والله مانعرفه
المنجي فنص فيها : وليش كاتبلك انك اترني عليه يعني يكذب هو
غاليه : مش كذب بس ...
المنجي بحت فيها : بس شنو
غاليه بصوت واطي : كنت نحسابه رقمك
المنجي استغرب : كيييف
غالية تلخبطت : لما عطيتني الخبزه لقيت الرقم فيها ورنيت نبي انتعارك معاك بس لقيته مش انت
المنجي سكت شويا واذكر ان يوم الي كان يشري في الخبزه الراجل الي يبيع كان يضحك للبنت الي كانت مصبيه والبنت تضحكله : يعني هكي تبيني انصدقك توا
غاليه عيونها دمعن : والله مانكذب عليك وراس بابا وفي تسجيل مكالمه الي حكيتها معاه قاعد في تليفوني كان تبي انسمعها لك
المنجي بحت فيها : وين تليفونك ؟
غاليه دموعها نزلن : في الحوش
المنجي خبط ايديه في بعضهن : اييييوه بدينا توا في الجوووو
غاليه تعصبت : لما انروحو خش خوده بروحك مالمطبخ
المنجي : وليش ماجبتيه معاك
غاليه حطت وجها على ركبيها : شاشته تكسرت و السبيكر معش ينفع قلت انجيبه ماعندي ماندير بيه وهو سامسونج قديم مافيش فايده
المنجي سكت وقعد يبحت في البحر
غاليه حاطه راسها على ركبيها و بدت تبكي
______________
لينا كل شويا تبرم و اتبحت فيهم
هناء : عرفتي ياسجى يوم المقابله ماتريحتش
سجى : سبحان الله هي ع القبول حتى انا صارلي هكي مع اول مقابله بس خطيبي هذا قلبي انشرحله دغري
لينا بحتت في هناء : طولت بنت جيرانكم
هناء : غريبه مش من عوايدها تقعد مع منجي هذا كله
لينا ابتسمت : بلكي عشان مايحصلوش في فرصه يقعدو برواحهم 😊
هناء ضحكت : لا والله ماتحطي في بالك بكل را غاليه والمنجي جوهم مش شور بعضهم بكل
سجى : هي حليوه ناعمه
لينا : لا مش سمحه
هناء ضحكت : لا سموحه غاليه وروحها محليتها زياده
لينا ابتسمت : قصدي انها ملامحها صغار كلهن يعني وقصيره
هناء : احلى حاجه فيها انها طشه
____________________
غاليه مزالت خاشه في بعضها وتبكي
المنجي بحت فيها : وقفي بكاء عشان نعرف نسألك على حاجه نبي نعرفها
غاليه رفعت راسها وبحتت فيه : عندك منديل ؟
المنجي ضحك : هاكي امسحي خشمك في ماليتي
غاليه ضحكت : لا دموعي
المنجي غمزها : هو خشمك لكن توا انتخايل انهن دموع
غاليه : باهي شن كنت نبي تسألني
المنجي بحت في عيونها : عليش بررتيلي ؟
غاليه استغربت : كيف ؟
المنجي : عليش بررتيلي وقلتيلي ان واحد ماتعرفش وقالتلي انسمعك التسجيل ؟
غاليه وجها انحمر وسكتت ونزلت عيونها
المنجي يبحت فيها : ليش ؟؟
غاليه بحتت في البنات
هناء شايرتلها بيدها بمعنى تعالي
غاليه : البنات ينادن فيا .... وجت تبي اتصبي
المنجي مسكها من يدها : قوليلي عليش عشان نطلقك
غاليه برمت جها وقلبها يدق : لأنك انت خويا الوحيد وانا زيي زي هناء
المنجي ابتسم : اممممم خوكي صار
غاليه : اها خويا
المنجي ضحك ضحكة شريره : باهي شن جوها البنت الي طالقه شعرها
غاليه فنصت فيه : لينا 😳😒
المنجي : سمحه و اسمها لينا اخرى 😍
غاليه اضايقت : سمحه لروحها انا شن دخلني
وبرمت اتبحت في البحر
المنجي ضحك : كنه رقالك ؟
غاليه : اصلا امك عاجبتها وتبي تاخذها لك مبروك من توا
المنجي : هضا المطلوب ميه ميه
وسام خطم عليهم وكح
المنجي برم بحت فيه : تعال يالوس
وسام يبحت ومستغرب من الي مع المنجي : لا خود راحتك
المنجي : تي تعال ياراجل ......
وسام : السلام عليكم
غاليه : وعليكم السلام
المنجي بحت في غاليه : خششي شعرك وصبي 😒
غاليه صبت واتسقم في وشاحها ومشت
__________
غالية مبتسمه تقهر في لينا
هناء بحتت فيها : وين التطويله هذي كلها
غالية ابتسمت : كنت نبيه في موضوع
لينا وسجى ساكتات
هناء ضحكت : مش من عوايدك يعني 😂
غاليه كشخت عليها : تصبحن على خير انا تعبانه ونبي نرقد
لينا بحتت فيها : شكلك طالعه من حادث من امبدري نبي نسألك ونسيت على فمك
غاليه ابتسمت : اها درت حادث من يومين
سجى : حمدلله على سلامتك
غاليه : الله يسلمك ؛ تصبحن على خير .... ومشت
سجى صبت : حتى انا واصله حدي هياا لينا نرقدو
هناء : ان شاء الله انتلاقو بكرا
_______
غالية مشت لقتهم كلهم راقدين والحوش ظلام
ركبت للدار لقت صفاء ومروه راقدات
خشت غيرت دبشها وتغطت ورقدت اتفكر في المنجي
وكيف مسك يدها سكرت عيونها وابتسمت
(( أحدهم عبث بقلبي ❤ فـ جعله ينبض بإسمه كل دقيقه ))
سمعت صوت باب الدار انفتح
سكرت عيونها ودارت روحها راقده ..
_______________
#يتبع