المخلص "باللهجة العراقية "

البارت السادس عشر

المخلص..
البارت السادس عشر..
بقلمي رسل..
rasolaa7

انستا  Rasolaa7

لا غفران في موقف
جعلك تشفق على نفسك..

-وهو يحاول يفهم مني اخذني لحضنه وهو يهدي بيه حتى يفهم شكو بهاي الاثناء دخلت الحجية وراها  لارا  وليلى وشكلهم سمعوا صياحي واجوا ونفس اسئله
علي شكو واني احس نعكد لساني بس اردد بابا..

-شعور صعب وتحس روحك تنسلب من جسدك من تعرف الخطر يحيط باهلك وبالاخص من باقي على
امل شوفة واحد منهم هنا روحك تفرفح لمجرد ما تعرف هو بخطر او يمكن ما عاد موجود..

علي.. متفاجئ من انهيار نورا اريدها تحجي شنو الي صار ووصلها لهذا الحال ما تكدر ولا اني الي فهمت منها شيء قبل دقايق عفتها مثل الورد شنو الي كلب حالها حاولت وياها شگد بس حتى تحجي ماكو من شفت حالها وبجيها زاد اخذتها لحضني واني اهدي بيها بس اريدها تحجي شنو شصاير مجانت تكدر تجاوب  ياربي هالبنيه ما ترتاح يوم اذا مو بجي وصدمة تفرفح روحها على صوت بجيها انفتح الباب ودخلت منه امي ولارا وليلى الي جانوا يتسألون شكو وشبيها هو اني خلي اعرف شنو بيها وبعدين عود اطمنكم خو نظرات الوالدة ما احجيلكم عنها حسستني سبب حاله نورا اني..

-هدت شوي ولارا انطتها كلاص مي اخذتها امي وهي تقرأ ايات على راسها جانت تحجي بتعب ودموعها على خدها وطلع صوتها من بين شهگاتها وهي تحجيلنا عن الي صار..

-والي فهنا منها هو صديق ابوها متصل عليها لان ابوها موصي قبل لا يطلع اذا صار عليه شيء بلغها وكايللها قبل كم يوم ابوها وكم شخص مقررين يطلعون من الموصل وبنص الطريق متعرضين لهجوم من الجرذان اكو مقتولين بلحضتها واكو معتقليهم هو مبلغها بس ميعرف ابوها مستشهد او معتقل كل الي عرفه حاجي الها وهم
جانوا بمنطقة بيد التنظيم باحدى القرى..

لارا.. عيني على نورا وشلون فرفحت روحها على ابوها وكل شوي اتحسر على حالها ما صدكت شوي طلعت من حزنها تالي رجعت للقوقعة وبقوة انقهرت عليها كل يوم قبل ما انام تسولفلي عليه ومن خلال حجيها تبين هي شكد متلهفه على شوفته..

-لو شكد تتصل عليه علي ينقهر عليها يكول ما تمر ليله اذا ما اشوفها تتصل واكثر من مرة من يشيله تفرح وكأنوا الدنيا مو سايعتها واذا ما رد تضل تتنهد واحس بيها تضل تبجي ولساعات متأخرة يلا تنام صار هذا روتينها اليومي  الي هو الأمل بعودة ابوها وشوفته..

-امي من شافت حالتها اخذتها يمها بالغرفة وضلت تقرأ قران على راسها وتهدي بيها ليلى وكرار اطمنوا عليها وصعدوا..

-اما علي بهاي  الليلة ما غفت عينه للصبح ما غمضت عينه وهي بهاي حالتها كل شوي يجي عليها واشوفه يبوس راسها ويتطمن ويطلع شكد قهرتني بحالتها بس اخوي كسر كلبي بخوفه وقلقه عليها عبالك وحيدته وشايل همها هيج جان قلق عليها..

نورا..

-الدنيا ابد مو عادله من تصب ظلمها وضيمها على واحد تبقى تدك عليه لما تنهي قوته وهيج حالتي بلحضه
سماع الخبر من صديق ابويه الخبر وصل لمسمعي مثل الصاعقة اختنكت اريد اتنفس احس الهوا ما يدخل لريتي
علي يحجي يحاول وياي بس يريدني اهدا واني ما اكدر
احس نار وحركت كلبي شكد بجيت بس ولا دمعه خمدت نيران كلبي..

-هو بس ابويه الي بقالي وعايشه على امل شوفته نوب
هيج اسمع يا قوة بعد تبقى ويا جسم الي يتحمل الحجية
اخذتني يمها بالغرفة وقرات قران على راسي كملت واني راسي بحضنها باستني.. يمه شجاج ليش تفاولين
عليه صل على نبيج واذكري الله وادعي لابيج يخلص
من هالشدة..

-مددت بمكاني وهي خطيه جانت قلقه عليه مسحت دموعي وسويت مثل ما كالت دعيتله هواي وامنته يم
ربي من كل عدو بهاي الليله ما كدرت انام كلبي يوجعني وكلما اهدي حالتي كلبي يرجع يشتعل نار على
ابويه ولو غمضت عيني شوي وافز..

-علي جنت احس عليه يخلي ايده على جبيني يتحسس
اذا مصخنه او لا لو شفايفه الي على جبيني تقشعر بدني
واحس باحساس غريب وامثل النوم اخجل منه ما اعرف كم مره اجه للغرفه بس قلقهم وخوفهم عليه
عبالك وحده منهم من سنين هالعائله عجيبه بحبها وحنيتها نفر نفر منهم زرعوا حبهم بكلبي بوقت قصير
وتعلمت على وجودهم لوما هم جان ما عرفت شصار
بحالي وبيد منو وكعت بس الحمد لله الي عوضني بيهم..

-الصبح من كعدت قررت كافي حزن ليش اتفائل بالشؤم لابوية على كولت الحجية يمكن مسجون يمكن شارد منهم زرعت امل جديد بداخلي انو يمكن يطلع عايش رغم اعرف كلش زين الموت اهون من انو تكون معتقل بيدين هذول الوحوش اني الي شفتهم بعيني وشفت اساليبهم الهمجيه والي بعيده عن الانسانية بشكل..

-كلش زين اعرف شنو يعني يأخذونك الجرذان يعني تنحرم من الحياة يعني تنذل وتتعذب بأبشع صورة ناس ما عدهم لا رحمة ولا ضمير ومايرحمون لا صغير ولا كبير خسرنا هواي من ناسنا على ايدهم دمروا مناطق
هيمنوا على عقول الشباب حرفيا دمرونا دمار..

-ومن جهه ثانية افكر انو خطية بيت الحجية كل يوم حايرين بيه واني منكده عليهم  وخصوصاً البارحة شلون شفتهم خايفين عليه وكوه عيونهم اخذت نوم طلعت للمطبخ وشفت ليلى تحضر بالريوك تقدمت عليها وصبحت عليها وكفت يمها اساعدها ..

-عوفي ارتاحي اني راح اكمله شلون صرتي البارحة ضل بالي اني وكرار عليج..

-الحمد لله زينه جاوبتها وابتسمت بوجها حسيتها شوي استغربت حقها الي يشوف حالي البارحة مراح يتوقع انو اطلع من الغرفة ولا من قوقعتي بعد بس رحمه الله
موجوده وهو الي ينزل صبره علينا باوقات تحس روحك الحياة سدت بوجهك كل ابوابها..

-كملنه وصاحت ليلى عليهم حتى يتريكون اجت الحجية وجانت فرحتها بيه غير حتى كرار جان مستغرب حالتي وبعد ما سألني على حالي كال.. نورا روحي كعدي علي شعجب لهسه نايم ؟!..

-جاوبت الحجية..لا يمة لتكعدي عوفوا نايم خطية البارحة لوجه الصبح يلا نام من يكعد نسويله اكل..

-اتريكنه وعزلنا المطبخ والبيت واني ويا البنات واكثر شيء اساعد ليلى لان حامل وتتعب بسرعه تقريبا بالـ 11 كعد علي الي من شافني لمحت ابتسامة ارتياح على شكله يمكن جان متوقع بعدني بداخل قوقعة الحزن مالت البارحة سألته الحجية انسويلك ريوك وهو كال لا ما اشتهي انتظر الغده وياكم اكل على الواهس جنت واكفه
وهو غسل وجهه واجه عليه.. شلون صرتي؟!..

-زينه احسن من البارحة..

-تطلعين وياي شوي نفتر ونرجع؟!..

-هزيت راسي ب اي والله ما اكول لا اصلا محبوسه
ومخنوكه هو طك اصبعه كبال وجهي.. بالعجل لا تاخريني..

-ركض لبست ورجعت وهو يضحك عليه.. الجنس اللطيف بالطلعة تصيرن اسرع من بيب بيب خو لارا
تلبس حذاءها بالسيارة..

-طلعت ويا صعدنا بالسيارة وهو شغل قصيدة جانت
الباسم الكربلائي..

-يا ابا الحسن ما تدري
صرت اشتريها بعمري
شوفة ضريحك يا حيدر
شوفة ضريحك
بعمري اشتريتك
لا تضن نسيتك..

-صوته جان رهيب اول مرة اسمع هيج صوت بهالحنيه والقصيدة عالم ثاني هو يسوق وكل شوي عينه عليه..
حلوه هاي قصيدتي المفضله اذا تطلعين اليوتيوب وتشوفين مشاهداتها يمكن فوك النص اني..

-مو احسن من الاغاني؟!..

-ابتسمت اني اسمع هواي اغاني ما ادري..

-اني استحرم ابوي جان يمنعنا من الاغاني وهيج على
فطرته جان يكول الطرب واللهو يبعدنك عن ربك ويقربن الشيطان منك ساعتها اغسل ايدي منكم
وجنه اني وكرار من وره ظهره نسمع لحاتم اكثر شيء
صوته جان حنين بس من صرت اسمع محاظرات عرفت فعلا كلام ابوي هو الصح والغنا والطرب حرام
لان نوع من اللهو عاد تركتهن ما اكلج كلش بس نحاول..

-جنت صافنه عليه واسمع بانبهار حلو الواحد من يخاف
الله لان الي يخاف الله بحلاله وحرامه ما ينخاف منه
ابد وبقربه كل الامان يصير..

-من شافني صفنت صاح.. ها ولج بس لا عبالج همجي
شو طالت صفنتج؟!..

-لا ابد بالعكس شيء حلو..

-رجع بعينه على الطريق واني صافنه من الجامه عيني
على الناس عبالك جنت محبوسه ما متعلمه على البيت اني جنت اغلب وقتي بالدوام لو طلعات ويا صديقاتي
ما جنت محبوسه هيج..

-نزلنا يم محلات افترينا واشترى هو كم قطعه وحتى
الي والارا اخذ من طلعنا دخلنا مطعم نتغدى حسيت روحي فعلا ارتاحيت وهو صافن بوجهي بحيث اذا
ابتسم يبتسم وياي..

-من رجعنا جنه بالباب وفات ولد شاب من شاف علي
سلم بس استغربت على علي حتى ما رد السلام..

-هو اتقرب وعاد السلام رديت وعيني على علي الي مبين مو طايقه هو الولد جان مستغرب.. شبيك لك حتى
السلام مترده..

-جعفر انت بالذات لمصلحتك ابتعد عني خوش؟!..

-هسه غير اعرف ليش شبيك علي؟!..

-من الاخير ما اتشرف احجي وياا واحد يخون ثقه جاره وصديقه روح عن وجهي احسن ما تشوف شيء ما يعجبك ساعتها محد يلومني..

-هسه غير اعرف شصاير؟!..

-شهكت واني اشوف علي لزم الولد من ياخته وانطاه بوكس.. لانك نذل وخاين وعينك نكسه..

جعفر.. من حجه هيج عبالك سطرني هسه يلا وعيت واني اكول ليش لارا مختفيه توسلته حتى بس نكعد بمكان واحجيله حتى يفتهم مني وساعتها شنو حكمه حقه وبعد ما لحيت عليه هواي يلا وافق دخل البنيه للبيت وطلعنا كعدنه و شرحتله كل شيء وانو اني شاريها لأختك ابد لا تفكر اخونك وانت تعرفني كلش زين مو راعي سوالف مراهقين ولا اظحك على بنات العالم شوي بدأ يهدأ بس راسه وجان اعتذاري ووعدي اله هو يوم الجمعة من اجيب واهلي وناسي واجي اخطبها
منه ساعتها تعرف بغلاتكم عندي وشلون شاري بنتكم بروحي مو اني الي اخون ثقه اخوي..

-اي خوش بس تبقى طايح حظ و****..

-ميخالف مقبوله منك ابو حسين..

-هسه تصافينا ابو صماغ..

-امشي ولي سرسري كون لارا ما ترضى ساعتها اتفل بنص وجهك واضحك عليك..

-تقب.. قاطعني وهو مخنزر عليه بعيون البزون.. اكلان تبن زايد لا تاكل..

زمرد..

-خليت علاوي بهدوء بعدني ما صرخت وجان يخلي
ايده على حلكي ومثبتني بقوة واني ارفس جواه مثل
الدجاجة قبل لا يذ.. بحونها...

-حالي مثل الغركان الي يصارع على شمه هوا الولد جان ضخم كلش وكرشه يطخ بجسمي ودموعي تصب
لحضه اشوفه هو ولحضه تصير صورة ذاك القذر بعيني ما اكدر اعيش هالشعور مرتين اذا بذيج المرة
كدرت اقاوم هسه ابد صعب والله صعب نفس الشعور ينعاد والاذيه نفسها سواء اذيه الروح او الجسد بشر اني والبشر شكد يريد يتحمل..

-ايده القذرة على حلكي اختنكت ارفس بي وهو ولا كانو عيونه على ركبتي وعلى شفايفي بكل شهوه وقذاره وما هزته لا دموعي ولا حالتي يعني والله منتهيه جنت معقوله ما كسرت خاطره..

-ينزل بقميصي من جهه صدري ويتلمس وعيونه صارت حمره ادفع بي وعيني على ابني اتمنيته جبير
اتمنيت علي مو بهذا عمره ويدافع لامه روحي تعلكت
بي وباوهام وامنيات مستحيلة..

-والنذل دنك على اذاني يهمس.. جماره انتي شني مو مره غضب صوت ما اسمع لا اكتل ابنج بس تفتحين حلكج اخلي رجلي بطنه هي دقايق واطلع منا هسه عليمن خايفه لو ما انتي م***** ويضحك باستهزاء..

-عضيت شفتي بالم ودموعي تصب اني مو رخيصه ولا رخصت نفسي بيوم والله متت من الجوع اجتني اوقات انام بيها بدون اكل وما مديت ايدي لاحد ولا رخصت نفسي مقابل اي مغريات للحياة ليش هيج يصير وياي ليش الناس تباوعلي بهاي النظرة القذره الي امقتها ليش هيج يحجي ويحسسني اني وحده
مرخصه نفسها..

-وبهالحظات واجه دعاء المخلص على لساني اردد بي وكم مره اعيد البداية يبس ريكي وهالنذل يتلذذ بعذابي وعمه نبع صلاتها صارت بهاليوم صلاة شيخ جامع ولج عمه وينج تعالي شوفي حالي تعالي خلصيني منه..

-دفعني بقوة على الفراش الي بصف علي واني ضربته
بقوة على بطنه وهو ولا كانو دافن راسه بركبتي ويشم روحي طلعت بهاي الاوقات العصيبة قذارته ما كدرت استحملها بعد بس رفع ايده اني اتهسترت بالعياط يمكن صرخاتي سمعوها المنطقه كلها اريد اسكت ما اكدر طلع المكبوت كله بهالصرخة وهو ما يعرف شنو
يسوي ضربني على حلكي نزف دم رجع كفخني دفرني على بطني كل هذا حتى بس يسكتني..

-هو اتوجهه للباب وانفتح الباب ودخلت عمه نبع الي مرعوبه هي شافته وهي ضربت على صدرها بقوة حالتي حالة وهو النذل دشداشته مفتوحه الدكم ويلهث دفعها وراد يطلع وهي سحبته بقوه من ايده شكد جان هو قوي بس بقوتها وهي مفرفح كلبها كدرت تسحله.. الساقط الك**** عينك على هالمظلومة ولك شكلت لروحك من دست بيتي وبوقت الصلاة ما خفت من ربك والله لحشم عليك العالم واريدن اشوف منو يرضاها..

-تحجي وترزل وهو ساكت واني اون جسمي بارد وراسي احسه نمل مسحت الدم من حلكي وعيوني غمضن بتعب كوه افتحهن كلبي يوجعني وجسمي يون عليه وعلاوي فرفح من البجي اريد اكومله هي كم خطوة ما كدرت واجتي عمه نبع خلته بحضني وطلعت
وعبايتها تهفي وراها وما ضلت لا مسبه لا غلط ما غلطته على هالساقط..

-مددت بتعب ودموعي تنزل غصب عني تعبت وحق كل مظلوم وحق كل شخص يحبه الله تعبت لك امي اسكت فدوه اروحلك ما كدرت اشيله وهو يريدني افتر
بي جسمي يوجعني واخاف يوكع مني..

-مددت رجليه وخليت المخدة وخليته ارتجيت على الحايط وانوم بي وصفنت بروحي ليا عذاب جابتني امي هي هاي الدنيا الي نصارع حتى نطلع من بطن امهاتنا عليها على شنو وهي كلها ظلم وغدر وقهر..

-شكد جنت مرتاحه
شكد تعبت يلا غيرت من نفسيتي هنا وصرت اضحك
وانام بلحضه وبموقف واحد رجعت للصفر..

-فزيت على صوت عمه نبع الي دخلت للبيت واباوع لروحي على كعدتي وعلاوي حبيبي غافي ودمعته بخده والله ينكسر كلبي من اشوف دمعته ما اريده يصير مثلي
محد يحبه ومحد يتقبله ومن مكان المكان..

-كعدت عمه نبع وتضرب على رجلها بغضب.. شفوته
هالناقص الغيرة للبيت لج السانه اطول منه ويكلهم هي
اشرتلي ودخلتني..

-نزلت دمعتي بقهر شنو اشوف بعد اصلا ما انصدم اذا
هيج يحجي باوعت عليها.. لان حيوان مو رجال طبعا
ينكر فعلته بس بروح محروكه وادعي عليه من كلبي
يعيش هالموقف وهالشعور حتى يعرف انين الروح
ووجعها حتى يعرف يعني شنو يدنس شرف غيره
حتى يعرف حوبه المظلوم شكبرها عند ربه..

-على كيفج ويا نفسج خاله انه خابرت على ابو تراب
وتسودن يكول بس خلي اوصل احركه هو واهله هال**** ابن الكلب..

-كمت كوه دايخه انطيتها علاوي ديري بالج عليه حجيتها وهي باوعتلي بخوف.. شجاج عمه شو جنج صخنتي سوده عليه والله ما شفته من طب للبيت جان
كسرته وكصيت**** ولا اخلي يعتب الباب البيت..

-رجعت نمت واحس جسمي نحيل ما بيه ارفع ايدي
فزيت على اصوات اي هو صوته اميزه من الف صوت صوته الي اسمعه بس بوقت انهياري وكرهي
حتى لروحي بوقت تنتهي بي مقاومتي..

-ردت اكوم ما كدرت رجعت نمت وهيج خلصتها ساعات اني نايمه حسيت على ايده على جبيني وصاح
عمه هاي مشتعله نار..

-فتحت عيوني بتعب كاعد يم راسي وعلاوي بحضنه
وساكت عجيب هالشخص شكد يحب علاوي ما اعرف
اذا جانت شفقه منه او لا بس اني فرحانه انو اكو من
يحب علاوي ابني محبوب بس بعد اغلب ناسنا تحكم
على البشر بدون ما تفهمه هو شنو وتفرزن تصرفاته..

-وهذا الي صار ويا هذا الحقير ايده على حلكي ويهمس
بكلام قذر ومن بين كلاماته جانت هالنغل بلا منو
ابوه تستشرف براسي وهي لاعبه لعب..

-هالكلمه تجرح الروح
تفتت الكلب
الكلام قاسي وجرحه ياذي بس الناس متفكر من ترمي
على غيرها وعبالك بدون احساس..

-كومي ام السان كومي غسلي وجهج حتى نروح نسحل
هالجلب كبال عينج..

-كمت مثل الطفل الي يتعثر بخطواته هيج اني اتعثر
بخيبتي بس دام الله وياي ودزلي المخلص الا
اروح واخذ حقي من عيونه واريد اشوف شلون ينكر
عملته الجبان حيوان لو رجال جان ما سوه هيج..

-غسلت وجهي صوتي مبحوح وجسمي نحلان رجعت
وحتى علاوي ما شلته مريضه واخاف عليه والمخلص نظراته مليانه قهر وحنيه ما ابالغ ومستعدة اوكف كبال
العالم كلهم واكلهم ما شفت رجال صاحب نخوه وموقف بحياتي مثل المخلص الي جان النور الي ينور عتمه
حياتي اغلب مواقفه وبطولاته اني جنت اشهد عليهن
ومن اتعجب يضحك هو وماخذ الموضوع عادي..

-لبست حجاب وعمه نبع شالت ابني وطلعنا والمخلص
اعصاب بس ما حجه وياي كال بنص بيتهم وناسهم
احجي كل شيء لا تستحين ولا تخافين اني بظهرج
فضحي لهذا الخيخه..

-رحنا البيت حمه عمه نبع الجبير جانت الكعده بي ناس
هواي واني روحي مفرفحة كون امرغل راسه بالطين
واهينه كدام الكل وما يشفي غليلي منه دخل المخلص
وكال بس اصيح عليج تجين حتى تطيحين حضه بيدج..

-دخلنا يم النسوان الي ودهن ياكلني وبيهم الي من شكلهن الي يعرفن هالناقص شنو كلام البعض يوصل
لاذاني وعيونهن صلفه
شنو هاي الغريبة الي راح يتكاتلون ولدنا من وراها
وهاي وحده ما ضل جندي ما لعب بيها وتبيع شرف
هنا كلام صبرت عليه وتجاهلت لان هيج عالم الافضل
تتجاهلها ومن يطلع حقك ساعتها بس خلي عينك بعينهم
وشوف نظراتهم..

-اشتدت الاصوات وعبالك يتعاركون وهذا يصيح
وهذا الي يهدي بيهم والنسوان كلبها نار ما الومهن
كل وحده عدها ضناها لو رجلها غالي بس اني عندي
الشرف اغلى والبيت الي انطعنت بي ما اطلع منه الا
واني بالوجه الابيض..

-دخل المخلص سلم وباوعلي..يلا ام علي..

-كمت ويا بعدما لبست عبايه من البنات لان اكو زلم هواي دخلت سلمت وجسمي يرجف الموقف صعب
بس مو زمرد الي تضعف وهم رحبوا بيه..

-طلعني من صفنتي صوت رجال جبير.. احجي بويه
شنو الي صار سمعنه منه وهسه نسمع منج خاطر هالوجوه الطيبة تشور علينا ونشوف منو المظلوم..

-الموقف جان صعب والعبره الي بداخلي كوه هديتها
وبديت احجي من لحضه الي شفته الى من ضربته ودخلت عمه نبع وهي الي جانت شاهده على حالي وفعلته وشلون جانت حالته من طلع من البيت..

-جنت ويا كل كلمه تنزل دمعه مني بدون شعور تنفست
اهدي روحي حتى اكمل عمو بس اريد اسال سؤال وهذا سؤال موجه للكل؟!.

-احجي بويه..

-لو فرضا وحده من بناتكم هيج يصير بيها ولا سامح الله تعيش نفس الشعور وتتوسل وتنتخي ودموعها تصب جوه ايده وهو بدون رحمه
يطبق قذارته عليها وبلحضه يوصل يفقد ويريد يسلب
شرفها لوما هي تنتفض وتخرمش ايده وتقاومه وتصرخ اذا تقبلون وبعدكم ما مصدكين انتبهوا على ايده وجهه صدره وساعتها تعرفون كلامه صح لو كلامي..

-كلها انظارها اتجهت عليه وهو يصيح جذابه هاي تريد تبليني مدري منين جايه هو منو الي داخل للبيت من دخلت لهسه مو عمه نبع ما تقبل اسالوها عمي شني اصلا ما شايفهه لا تذبين بلاويج عليه مو انتي الي اشرتيلي مو انتي الي دخلتيني شو اختلفتي..

-وكام واحد يطلع عمره بالاربعين شيب قليل براسه
دفعه برجله بقوه وجان يشك صدر الدشداشه ابتسمت
بنصر واني اشوف علاماتي هاي اخر شيء من قاومته
خرمشته الحمد لله الي نصرني عليه وطلعت بالوجه
الابيض..

-ما انتظرت اي حكم ولا انتظرتهم يحجون تقدمت وتفلت بنص وجهه وطلعت احس روحي راح اوكع
صح اخذت حقي صح المظلوم انتصر بس هالمظلوم
منو يعوضه الضرر النفسي منو يهدي من خوفه منو
راح يمحي منه الي صار..

-هيج مواقف صعب تجاوزها اني لليوم ما تجاوزت الي صار حتى يجي هذا يعمق جراحي ويزيد عليه
همي اني لليوم اغفى على اصواتهم وقذارتهم وهذا اليوم كملها عليه ليش شنو السبب هيج شهوتهم الحيوانيه تنسيهم ربهم وتفقدهم انسانيتهم هيج يشوفون
المراة ضعيفه وبس جسم ليش شنو ذنبي اطلع من شعور ادخل بالي اتعس منه..

-غسلت برا واسمع صوت المخلص واسمع اصواتهم وهذا الي يذمه وهذا الي يهدي والمخلص صاح يلا عمه طلعت وياهم وهو يحجي ويا واحد لابس عكسري .. اسحله من شواربه واخذه اي
سلمه بيد فداء ومعليك كله ابو تراب يكول شوف شغلك
بعد ما اوصيك..

-وصلنا البيت هو ما نزل التفت عليه.. دقايق جيبي
غراضج وتعالي كلمه ما اسمع بسرعه ام لسان لا تاخرينا ورانا طريق بالعجل....

يتبع....

لا تنسون التصويت وتعليقاتكم الحلوه حبايبي..
ارفعوا البارت غوالي..

البارت هدية للمتابعة بمناسبه نجاحها ولكل الناجحين والف مبروك.. hni1995n

اللهم صل على محمد وال محمد❤️