عزيزي القارئ فضلاً وَ ليسَ أمراً أضغط تصويت،
فستان أحمر
تحسين لقمان
رَجعتْ راسي ليوره على ألسريع ْ وَ بسرعة البرق دخلت للغرفه قفلت الباب وكعدت وراهه،
صدري يصعد وينزل من وره الخوف أحجي ويه نفسي وارجع شعري بيدي ليوره،
" لا يالله بس لا شافني اكيد شافني "غمضت عيوني واني اتذكر الشفته كدامي وين انطي
وجهي شسوي وين اروح كل هاي ألاسئله اجتي بالي ومالهه اي جواب،اندكت الباب حيل واسمع خاله ام مازن تصيح
_فتحي الباب عاهره فتحيهه لج
جسمي صارت بي رجفه من كل الانحاء وبنفس الوقت خايفه تنزلني جوه يمهم، او اطردني بره
خارج البيت كمت على حيلي وفتحته علكيفي، دخلت عليه لزمتني من شعري جرتني عليهه
ام مازن: لج اني شنو كتلج، كتلج منعاً باتاً اطلعين بره وكتلج تولين لغرفتج وتقفليه زين كلت لو لا
مياده: كلتي كلتي بس لان استغربت ركص واغاني ومادري شنو اخذني الفضول
ام مازن: سمعيني زين، خاف عبالج اني منى واتعامل وياج بلطف وَ حنيه وهذني هلدروبْ
كلش متوهمه، اني هنا ايدي والاسلاح وادفنج بچوله بس الله يعلم بيج واضيفلج شي ،ادفن وياج اربع جلاب ،
الي شفتي والي سمعتي متدخلين بي ومعليج بي اطلاقا وكعدي بغرفتج تره تعمين على روحج ويصير وياج الصار ويايه
مياده: هاهيَ بس عوفيني علكيفج،
ام مازن: هاج هديتج بس ها منعا باتا تتنفسين وتحجين واطلعين راسج مفهوم
مياده: تأمرين امر، هاهي معليه بس اني عفيه معليه لتتقربولي معليه اني ممسويه شي
ام مازن: تردين محد يتقربلج للتتقربين من عدنه اذا طخيتينه نطخج واني بلغتج بعد .
دارت وجهه عني وراحت،رحت على السريع قفلت الباب وراهه ورجعت على الجربايه حطيت راسي
على المخده ودموعي تنزل على خدي واجتافي تهتز بكل قوه من اثر الانهيار، حسيت نفسي اني
بغابه وامشي ماعرف وين الطريق العام الي يخلصني منهه، حسبي الله ونعم الوكيل على منى
الجنت معتبرته الام والصديقه والاخت بس شيفيد العتب،
اسمع انواع المفردات من جوه ،و اطول الضحكات والكهكهه، واشتم انواع الروائح الكريهه ابدا ماشامته بحياتي
من كثر البجي دخت كمت جريت الفرشه الي جانت عباره عن لحاف ديباچ ابيض سمين دخلت كل جسمي جواه
وكرفصت روحي وصارت رجليه قريبه على بطني وضميت راسي بالحاف كلش زين وغمضت عيوني
متلاشيه الضحكات والمستنقع الداير مدايري نمت نومه عميقه و مريت بطيف ،الغرفه عباره عن
لون أحمر ومتروسه فساتين حمر، وكل اجواء الغرفه حمره وافتر بنصهه أحاول ان اصيح،
اطلع الساني، اعيط لكن محد يسمعني، او بالاحرى صوتي ماطلع نهائيا وكعت بالكاع منهاره من كلشي
منهاره من المحيط، منهاره من ضعفي،فزيت على صوت رجلين يمشن بالممر واسمع الباب الي بصف
غرفتي نفتحت ونسدت والباب الثانيه كذلك، كل الي عرفته ان دخلوا للغرف باوعت من الشباج
للحديقه لكيته الدنيا دنيا ليل، طميت روحي وكلت بكلبي "شكد نايمه اني من امداني "
هذا ليل شطوله وين اروح وشنو اسوي بهاي الغرفه ماعرف، درت وجهي على الحايط الثاني لكيت
تلفزيون توجهت بأتجاه وشغلته بسرعه طلعتلي قناه مال قرآن خربت ضحك كلت بكلبي
" ولكم هي شنو تضحكون على ربكم، وينكم وين القرآن بريئ منكم ومن افعالكم"
لزمت الريمونت وكعدت ادور بين القنوات على شي طلعت، قناة السومريه جان طالع عليهه
مسرحية الخيط والعصفور لحگت على هذا الموقف من جراده مسويه كصايب وكاعده ويه عصفور
كلهه "انطيني المي عطشان" وهي تكله " اني هم عطشانه اشرب انت قبلي" وهو يشيل المي يشرب
كدامه وهي تصيح يمه "هني ومري ،هني ومري. هني ومري " خربت ضحك عليهه كملت الليل
عليهه وماخذه راحتي بالغرفه طول وعرض , الى ان ثكلت عيوني ونمت مره ثانيه نومه عميقه ورحت لعالم ثاني ،
كعدت الصبح على صوت مازن هو ويدك الباب
مازن: مياده مياده كعدي نزلي سويلي ريوك
مازن: مياده وينج صدك جذب جايبيج للنوم شو كعدي يمعوده
شلت اديه بثكل فركت عيوني بكل قوه صحصحت وكتله : نازله هسه وراك روح
لميت شعري شلون ماجان ونزلت على السريع وكبل للحمام غسلت وجهي وحلكي ورحت للمطبخ
دخلت لكيته كاعد على ميز الطعام مشيت بالمطبخ اني وساكته جريت الطاوه من على السنك
وحطيته على الطباخ وبديت احضر بالريوك كملته وصبيت الجاي ووديته للميز
كتله : تفضل تامرني بشي ثاني
مازن : بالبدايه يكولون صباح الخير مو كالبين الخلقه الي يكلك واحد ماكل عشاهم
مياده : عن نفسي ردت اكلك صباح الخير بس اذكرت كلامك اول ماجيت للبيت كتلي لتناقشيني الصبح لان أتعارك ويا ذبان وجهي
مازن : بعد بعد اكليني بكشوري شبيج من صباحيات الله
مياده : اضافه لهيج شي بالنسبه لموضوع العشه الي حق اطنكر لان البارحه فعلا ماتعشيت لان حضرتك متقبل انت وامك انزل جوه علمود ماشوف النماذج الي تجيبوهه
مازن : شوفي يابت مدري منو
مياده: قبل لتحجي حتى لو خدامه يمكم بالبيت ماسمحلك تهيني وحتى لو اصلي معدوم من الوجود الي اسمي والي كياني الخاص
مازن: واني ابدا ماهنتج بس هاي الحقيقه بنت مدري منو ميحتاج هاي الهوسه كلهه واسمعيني
زين احنه هذا شغلنه لتكونين على بينه تامه علمود اذا مايعجبج اطلعين خارج البيت ويكون بيتج الشارع وخلي الرايح والجاي يحجي وينام وياج
مياده: تكدر تحجي بسرعه وبدون هاي الالفاظ
مازن: احنه ناس اني وامي معروفين بمصطلح عد ناسنه البغدادين الراحه والنفس والطيب وذوله اكو
ناس احنه نعرفهم كلش زين ميخافون الله يمعوده يسمونه بمصطلح العركجيه بس احنه مياده نحب نعيش حياتنا نفس منريده
مياده : مازن شنو تحبون تعيشيون حياتكم اكو واحد يعيش حياته بالحرام وعن يا حياه تحجي عليهه اذا بالحرام
مازن : مياده سمعيني خل اكلج شي " الله بالخير
جاوبته " الله بالخير
مازن: بويه عيوني يامسلم ياكافر يايهودي يانصراني ياصوفي يابوذي هاي حياتنه تريدين تعيشين يمنه اهلا وسهلا متردين ذيج وينهه الباب لتتوقعين احد مانعج على الطلعه ووين متردين ترحين روحي
عيوني خانتني ونزلن دموعي واني افكر صدك البلايه ام واب يضيع بالحياه
كتله: متخافون من الله من الشرطه
مازن : عجيب بابا ياشرطه يابطيخ وبالنسبه لله احنه نخاف منه وندري راح نتحاسب والله كريم
ليوم الحساب وهسه عرفتي حياتنه ولاأوضحه الج اكثر احنه شغلنه قمار وبنات وعرك تردين
تتقربين يمنه تتأذين تصعدين لغرفتج وتقفليه عليج محد يوصلج ثقي بربج
مياده: بس الي كاعدين تسوا كلش غلط واتمنى تراجعون نفسكم,واني باقيه يمكم تدري لاام لااب ولاميتم وين اروح، نفس متردون هاهيَ
ابتسملي وكال : احنه نحتاج وحده ويانه تشتغل منا ورايح ،واني اليوم الصبحيه كلت لامي عليج كلت خو مو تضل تشتغل هيج بالبيت غير تساعدنه بأمور السهره وهيج شي
تقربت باتجاه الميز ضربته بيدي حيل وصحت بوجهه
مياده: مازن لتشوفني ساكته اطلاقا ماراضيه على اي شي وبقائي هنا خدمتكم بالامور المنزليه وبس مو اني الاشتغل شغل الحرام ومدري شنو
كام على حيله كال وهو صاك على سنانه بكل قوه
مازن: مو بكيفج الي يريد يضل هنا يشتغل حاله من حالنا
مياده: بس انت قبل شويه كتلي متوصلين يمنه علمود متتأذين شنو الاختلف هسه
مازن: واني كاعد اكلج بس تحضرين امور السهره ماكاعد اطلب منج تنامين ويا احد
صحت بصوت عالي : مازن اياك وبالك تقلل من احترامك وبالاخص كدامي
دار وجه وطلع من يمي تاركني اني وبركان العصبيه الصار بداخلي باوعت منا ومنا كلت بكلبي يلا هي بس احضر الغراض واصعد معليه بيهم
وشيصير خل يصير عاد اكسب فلوس واكون حالي براسهم واطلع من يمهم ومن مستنقعهم ,
رحت فتريت على البيت نضفته ورتبته وفتحت الشبابيج هويته علمود تتبدل الريحه الموجوده بالبيت ,
دخلت للغرف شلت الملابس والكلنيس الواكع بالكاع والريحه لا تطاق ابدا وصلت لغرفة مازن
دكيت الباب محد طلع وماجاني صوت منهه ابد عاد دخلت ليجوه وجان انصدم بالشفته بنيه تطلع
شويه اطول مني بيضه كلش لابسه بدلة نوم بيضه مفتحه من كل الجهات ونايمه حطيت ايدي
على حلكي هاي شتسوي نايمه على فراش مازن طلعت من الغرفه واني دايره وجهي للباب مال
الغرفه قدمت ايدي على الكيلون وسديته على كيفي درت وجهي جان الكه مازن كدامي شهكت
بوجهه وحطيت ايدي على صدري من الهبطه كال وهو عاقج حواجبه
مازن:مياده شنو تسوين بغرفتي
جاوبته و اني ابلع بريكي : ردت انضفهه ولكيت بنيه نايمه
مازن: مره ثانيه من تردين ادخليهه تبلغيني اليه فاهمه لو اعيد
مياده : تره اني دكيت الباب واله شويه تنكسر بيدي بس محد كال ها ولا كال منو
مازن: واني ماكاعد اكلج دكي الباب لا وانما كاعد اكلج بلغيني وشوكت تبلغيني من تشوفيني كاعد ازقنب على الريوك بلغيني فاهمه لو هم الغي اعيد
مياده:هاهي عيوني مثل متريد من رخصتك رايحه اكمل تنظيف
وخر عن طريقي كاعده اروح للمطبخ اغسل المواعين جان اسمع الباب مال غرفته انفتحت واسمعه
تكله: ها مزوني صباح الخير اني كعديت
وهو يجاوبهه: عيون مزوني صباح الحب
كلت بكلبي هاي الشوارب كلهه والضخامه وتعقيجت ْ الوجه تاليهه طلعت مسوياتك احبابك مزوني ,
استغفرالله ربي توجهت للمطبخ ولزمت الكاونتر جلفته جلف من هذا التمام طلعته يلمع لمع تقربت باتجاه السنك وجريت حسره وكلت
" صدك جذب هم مواعين هسه ذني شيغسلهن " لبست الجفوف لان ماما منى معلمتنه من نغسل مواعين نلبس جفوف علمود ايدينه متتشكك من وره الزاهي والقاصر وباقي المنظفات الي
نستعملهن بالغسل ولبست الصدريه وفتحت حنفية السنك وبديت اشتغل التهيت بالغسل ماحسيت اله
وصوت بنيه ورايه كمزت درت وجهي لكيته بنيه ايه من الجمال نفسهه الجانت نايمه على فراش مازن كالت بصوت انوثي
: صباح الخير حبيبتي " دخل وراهه مازن
كال : ها ياسمين تعرفتن لو بعدجن
جاوبتهه : اهلا حبيبتي صباح النور
مازن : بنات خل اعرفجن علمود اروح اجيب صناديك السهره , مياده اعرفج ياسمين وياسمين هاي مياده الحجيتلج عنهه اتمنى ماسمع مشاكل منكم
مياده: شكو يمه واسوي مشاكل وياهه ماكله ورثي كاتله سيد ومادري بيهه
ياسمين : روح مزوني حبيبي بيتك بيدنه لتخاف
مازن: صدك مياده، ياسمين منا ورايح تساعدج بشغل البيت واضافه لهيج شي تعلمج على امور السهره اني رايح محتاجين شي
ياسمين : الله وياك روحي
مياده : تسلم الله وياك
درت ضهري عليهه ورجعت كملت غسل المواعين وهي ساكته اباوعله منا ومنا
أشوفهه واكفه على الطباخ تحمي بالجاي وسوت ريوك لروحهه
كالت: مياده عيوني تاكلين ويايه
درت وجهي شفته مسويه بيض وطماطه واني مامتعشايه كاتلني الجوع
كتله : بلي اكل بس خاف اضوجج
ياسمين : لا عيوني تعاي يلا , تلحكين على الشغل وخير من الله لوكت السهره تعاي ناكل نشوف تلفزيون
مياده : يلا لعد جايه
عاد صدك تركت الي بيدي ورحت للكاونتر نشفت ايديه من المي بكلنيس النشاف ورحت على الميز
كدامهه ,وبدينه ناكل الى ان هي كطعت الحاجز الي بيناتنه
ياسمين : شوكت اجيتي مياده
مياده : مصارلي هواي البارحه اجيت وانتي من شوكت هنا,
ياسمين : اني صارلي سنين هنا
مياده: بس البارحه مجنتي موجوده واصلا ماشفتج
ياسمين : عيوني اني اجي بس من يكون مازن تعبان كلش ومنا ورايح راح اكون موجوده يمج وتكابلين خلقتي واكابل خلقتج
ضحكت وكتلهه : ها يعني انتي نفس طينتهم هماتين شرب ولعبان نفس
هزت جتف وكالت : وشبي الشرب عيني اكلج داده عيوني لدورين سوالف الشرف براسي احنه هنا كلنا نعرف شنو شغلنه وشنو نسوي
مياده: بس انتي بعدج شابه شنو الجابرج تسوين بروحج هيج
ياسمين : كل انسان وعنده اعذاره عوفيني اني انتي شتسوين هنا ملمن شريفه وجلدج يحكج من هيج سوالف
مياده: عاد اني يتيمه فتحت عيوني بالدار وبلغت العمر الي لازم اطلع من الدار اذا ماجاني عريس
وعين عينج جابتني ام الدار لهنا علساس اشتغل خدامه يم خاله ام مازن والبارحه اكشفهم بعيوني محولين بيتهم دك وركص وبنات وونسه
ياسمين : عيوني اكللجياه من الاخير تردين تعيشين بخير وبركه شربي . وركصي ودكي ولبسي مصلخ وداعتج تعيشين ملكه يم مازن
مياده : لا حبيبتي شكرا خليت هاي الشغله لاصحابهه
ياسمين : وداعتج هاي السوالف كلهه بعد تنسيهه وتصيرين منه وبينه واذكرج بمقوله اذا سامعته مدري لا
المهم تكول "من عاشر قوما اربعين يوم صار منهم "
مياده: اني متفقه ويه مازن وخاله معليه بأمور السهره بس اليوم مازن كلي انزل احضر السهره وارجع لغرفتي واقفل الباب
ياسمين : انتي جايه تعلميني بسوالفهم اني اكثر منج هنا واعرفهم واحد واحد وخلي هذا الحجي يفيدج واله اكلهه الج هذا الاتفاق نكعي بمي وشربي ميه
كملت كلامهه ضحكت ضحكه عاليه وهزتلي جتفه شالت ايدهه كرصتني من خدي : اخخ فدوه لهل خدود
ابتسمت بوجهه وكملنه ريوك شلت الطاوه حطيته بالسنك نكعتهه بالمي ,ورجعت على كرسي الميز
كعدت
كالت " اكلج عيوني احنه ام مازن متقبل تنزل بنيه بهذا حالهه وشكلهه لازم نغير شكلج شويه "
مياده : وشبي شكلي وحالي عيوني راضيه اني بي شكرا
ياسمين : ماما انتي شوكت تفتهمين الي تريد تكسب فليسات تسوي المستحيل وبعدين اني شريد اسويلج شو دتعاي احفلج ارتب وجهج نصه عباره عن شعر
مياده : لا عفيه خاف اتوجع
ياسمين : لا بالعكس وداعت مزوني ايدي خفيفه حتى نوره المصريه سويتهه على ايدي وطلعتهه تجنن
مياده: وهاي نوره المصريه منو
ياسمين : عيناي هاي المصريه هم تشتغل ويانه بس تجي تتعرفين عليهه
مياده: لعد وين هي هسه وشنو هي مصريه
ياسمين : بلي عيوني مصريه وهي حاليا طالعه برزق
مياده : يلا هسه تحفيلي لو شنو
ياسمين : اي عيوني روحي لغرفة مازن تلكين جوه الجربايه صندوك جري تلكين بي مجموعة خيوط جيبيهن وتعاي يلا
ابتسمت الهه ورحت للغرفه فتحت الباب ودخلت لكيت كلنيس عباره عن لون احمر ماعرف دم لو
صبغ والريحه اكثر من كريهه ابو صابر لو احطه هنا ميتحملهه ,
عاد دنكت لمستوى الجربايه لكيت قواطي فارغه , ولكيت الصندوك جريته عليه ليكدام لكيت بي
انواع البطاله وهم مكتوب عليهن بالانكليزي ,جريت مجموعة الخيوط وطلعت ركض للمطبخ كتلهه
مياده: هاج ياسمين يلا وين اكعدلج
ياسمين : تعاي ورايه نروح نكعد بحديقة البيت الهوى هسه يجنن والبارحه ريحة البيره البحلك مازن لعبت نفسي
ضحكت وكتلهه : انتي الجايبه هاي المهانه الج ماكو داعي لهاي الهوسه كلهه صيري خدامه مثلي وكعدي وسكتي بس انتي متكدرين جلدج يحكج الضاهر
ياسمين : تعاي يمه تعاي كعدي على المرجوحه انتي كلش متوهمه احنه هم جنه خدامات وبعدين اطورنه تعاي كعدي كدامي
كعدت هي على المرجوحه واني كعدت كدامهه على الثيل حطتلي شلون الباودر لون وردي والعلج يلعب بحلكهه من هاي الجهه لهاي الجهه
مياده: ادري عفيه ميتعبج هذا العلج
ياسمين : لج ماما هاي كله للرزق شويه شويه تتعلمين اله اطلعج نچره واستاذه ماهره بهاي السوالف
سكتت وبدت تلف الخيط على اصبعهه الابهام لفات متكرره وبعدين لفته على اصبعهه البصف الابهام كالت : راح احفلج بطريقة المكص سهله وعلى السريع ومتاخذ وقت
مياده : عفيه اهم شي ماتوجع
بدت تحف وصدك جانت سريعه وعلكيفهه وابد ماتوجعت مدري اني مابيه شعر كطعت السكته الي بيناتنه و
كتله " متحجيلي عنج شويه امج ابوج وين , شنو سالفتج وشجابج هنا "
ياسمين : يمعوده هاي سالفه طويله شلج بيهه
مياده: دحجي يمعوده عاد نتعرف على بعض احسن ما ساكتين
ياسمين : عيوني اني من مواليد 1998
شهكت كتله : يعني شكد عمرج حاليا
كالت : من 98ولسنتنه هاي 2016 وانتي حسبي اني اكلج يطلع عمري ب 18
مياده : يعني بكدي لان اني هم 18
ياسمين : متاكده شسالفه مامبين عليج ابدا
ضحكت وكتلهه : يلا علساس انتي المبين عليج اصلا ثقي بالله من دخلت عليج بالغرفه مال مازن
كلت هاي بطولي بس ولاتوقعت عمري من عمرج
ياسمين : المهم عيوني يارب عمرنه طويل ,
صحيت على الدنيا ماعندي اب كل الجنت الاعرفه من والدتي ان ابويه مات بانفجار بعلاوي بغداد
المهم عاد مشت الايام جانت والدتي تشتغل خبازه وهل قاسمه ربج من الخبز الي يجينه الالف و الالفين نحمد الله ونشكره
, وبيوم من الايام اندكت الباب علينه العصريه عاد رحت فتحت الباب وجان الكه ام سعد جارتنه
بالمنطقه معروفه وعليهه سمعه حشاج حبيبه زفت ,دخلته ليجوه تعرفين بسوالف المايات وَ الجايات
وشلونج وشخبارج ومن هاي السوالف هي وَ والدتي وشويه جان تكول لامي
ام سعد : حبيبه ام ياسمين اكيد سمعتي بالبيت الضخم الي انبنه بمنطقتنه بالفرع الثاني
ام ياسمين : اي حبيه سمعت شنو شبيهم
ام سعد: حبيبه عيوني لحكيلي الساكن بي اسمه حجي مطلك ويكولون عليه نفوذ وفلوس وضخامته ياضخامه وحتى يكولون عنده اربع عماير وشقق ,
باوعت عليه و كالت : عفيه ياسمين يمه لحگيلي بميه كلبي راح يوكف على الاخير
عاد ضحكنه اني وامي على سوالفهه وكسرناهه بسوالف الضحك والشقه ونكول منا ومنا جبتله المي ورجعت تكمل :
اي عيوني اكملج ام ياسمين فسمعت من جارتي البومه ام مهيدي يم الحفافه تكلهه رايد خدامه
وتدرين اني كلبي عليل مايساعد على الكومه والوكفه فكلت ام ياسمين المره طيبه واحسن
مكاعده تخبز بالبرد والحر تشتغل خدامه يمه , وتعرفين انتي الشغل مو عيب يابعد كلبي
ام ياسمين : على عيني وراسي ام سعد انشالله اليوم امرلهم واشوفهم يعني مجرد ادك عليهم الباب واكلهم اجيت على شغل الخدامه لو اكو سوالف قبلهه
ام سعد : لا حبيبه لاسوالف ولاهم يحزنون ترحين بوجهج بس شويه اها بيضي وجهج حطيلج حمره يكولون حجي مطلك هو وجهاله يحبون المره
البيضه المرتبه وتكليلهم اريد اشتغل يمهم
والدتي عاد ضحكت وكلتله : زين ام سعد ولو انتي جارتي واعزج الله شاهد بس انتي معروفه
بالمنطقه متسوين شي هيج بدون مقابل هسه انتي جبتيلي الشغيله رحم الله والديج وعلى راسي
كلج طيب من فوك ليجوه بس شنو تردين
عاد ام سعد ضربت رجلين امي وكاللتله هي
وتضحك : شبيج ام ياسمين عيوني ماريد شي مجرد اول شهر محبس ذهب من الحجي وراتب
شهريا خمسين الف، مية الف عاد انتي هم معروفه بطيبتج وكرمج
ضحكت امي وكلتله : والله انج ملعونه ولوتيه ام سعد واني اكول متجي هيج بس هواي منين أنطيج خمسين ومحبس ذهب
ام سعد : عيوني اني ماشامرتج بالشارع شامرتج بيت يلمع لمع وانظف من حياتي الي كضيته ويا ابو سعد ,
ومعليج دكومي اني اخذج بيدي وارجعج
ام ياسمين: زين هيج اروحلهم لو شنو
ام سعد : حبيبه حطيلج شويه بياض وحمره وكحله وأمشينه ومعليج اني متاكده بس يشوفج حجي مطلك يموت بمكانه
بوكتهه امي دارت وجهه عليه
كالت : ياسمين ترحين وياي لو تبقين هنا
بوكتهه كتله : اي يمه اروح وياج شعندي باقيه هنا متكليلي ,
والله عاد عيني مياده بدلنه ومدري شنو ورشينه العطر وامي خطت عيونهه بكحله واني هم عاد
وناخذ ام سعد ونمشي لبيت حجي مطلك,وصلنه لبيت حجي مطلك المسافه جانت حيل قليله على
ماذكر جانت فرع او فرعين وره بيتنه , دكينه الباب طلعتنه بنيه وسطانيه
كالت: تفضلو مدام
ام سعد: هلا بيج يبعد امج حجي مطلك موجود
البنيه: بابا مطلك موجود بالطابق العلوي منو ابلغه
امي جاوبتهه : بلغي الخدامه الجديده
عاد البنيه راحت مايقارب اقل من الربع ساعه ورجعت
كالت : تفضلوا مدام للصاله الكبيره ودقيقه واحده ويدخل عليكم بابا مطلك
دخلنه ماجذب عليج يامياده جان البيت قمة الروعه الديكور والكامرات والخدم ومدري شنو خو
الاضويه مشتغله، ويا عبالج نفس الاضويه مالتنه ذني الجنهن خنفسانه لا حبيبه مياده ضوه البيت
جان يطلعج بيضه من كثر ماضواه عالي , دخلنه كعدنه والنشرات مال الصاله تلولي على راسج
وكلساع طالع لون جديد تحتارين عليمن تباوعين على ميوزه على التخم على الصخام خليني ساكته مروتج
مياده : دكملي حبابه كملي
ياسمين : المهم دخل الافندي حجي مطلك بدشداشته البيضه بكوه يمشي مدري شبي وام
سعد تبسبس يم امي
" شوفي شصار بالرجال بس شافج كام يتمايل من اليمنى لليسرى "
المهم ماطول عليج السالفه اتفق ويا امي على الشغل وهو يباوع عليه
حجي مطلك : اختي الكريمه ام ياسمين مو ذكريني بي حتى نسيته
امي عاد مبتسمه بوجه
كالت : عيوني اي ام ياسمين وهاي ياسمين بصفي بنيتي الوحيده
باوع عليه وجر حسره يمكن شويه وتهد البيت هد علينه , باوع على ام سعد ورجع باوع على امي
كلهه : لعد وهاي الميته اقصد المره تصير امج لو منو
هنا مياده صدك يعني اله شويه وافطس من الضحك ماتحملت الموقف ابد ,
جاوبته ام سعد : افه حجي مطلك اني جارتك بس بغير فرع واني جبتلك ام ياسمين
رجع باوع عليه وعلى ماما
كال " على هاي جيبتج الج كراميه معدله حجيه "المهم اتفقنه على كلشي وكمنه ردنه نطلع طلعت امي وام سعد واني وراهن تقرب
بصفي وهو بكوه واكف جان يكول ،
مازن : ها الله يساعدجن شو بالحديقه كاعدات
مياده : الله يساعدك جانت تحفلي ياسمين ونحجي شويه بأمور الدنيا, وغمزت لياسمين
ياسمين : يلا كومي ولج تعبيتني ندخل جوه ,
ليلاً :
بدت اجواء السهره شويه شويه تصير الى ان كلتلي ياسمين روحي صعدي اجه رجال ام مازن ,
ماكدرت اصعد ليفوك لان الدرج يم الباب ففتحت باب غرفة ام مازن دورت منا منا اريد اختل
ودخلت جوه الجربايه بس اريد اخفي روحي من الوجود
, وماحس اله ام مازن تدخل للغرفه هي والرجال ويتوجهون للجربايه واشوف من جوه الجربايه ام
مازن تنزع بملابسه وهو يبوس بيهه الى ان ناموا ثنينهم على الجربايه بهذا الوكت ماحس أله وتجيني الكحه
طايره ردت اسيطر عليهه بس ماكدرت ابد حطيت ايدي على وجهي وادعي بكلبي
"ياربْ ياربْ ماسمعوني "
صارت صنطه كلش ماحس أله رجال يباوعلي من فوك الجربايه عيونه مخوزره كال بصوت خشن :
ام مازن عيوني منو هاي الحلوه ..
يتبع ...
لا تنسوا التصويت والتعليق لنشر المزيد،
حساب ألانستكرام الرسمي: tahsin_luqman4
خالص مودتي لكم
تحسين لقمان