منطقه 13
البارت الاول
للكاتبه مريم السعدي
...........🌹🍁.........
سلمان --- سلمان-- سلمان ووجعه كومم
ها بويه
كوم. ووجعه ابوي كوم وي اخوتك على باب الله
صار بويه كايم
يله راجح يله محمد كوم وياي
صباح عراقي. خالص خالطت عبق رائحه الشاي الجديد اللذي تغليه امي على نار كدفىء حنانها مع رائحه التراب المبتل بماء المطر . وصوت قرآن امي الهادي بايات القصيره يطرب مسامعي.
ها يمه صباح الخير
هله يوم. يله تعال تربع تريك تكعد يم الجوله تدفيك
لا يمه مرتاح
راااجح
اي ايي جييت جتي اتغوسل
يمه محمد مراضي يصحه تعبني
عوفه يمه هذا ممتعافي خلي اليوم يرتاح
كلشي مابي شو من ميطلع للشغل يكضيها تدبج بالفرع ياهوالفات وتحرش بي. عايق محد يكدرله
ميخالف يمه خطيه
كيفج ومديت ايدي
شحلاتها الصبح بيض وطماطا وابويه ياكل دبس وراشي كاعد على رجل وثاني اللخ ولابس حزام الفتق وعيونه تجدح غضب ويباوع لراجح ويباوعلي.
واحنا ممسوين شي ونتراجف لدرجه اخاف اساله شبيك يابه. كملنا اكلنا وراجح حافه الخبز دويره مياكله وعاط بي ابويه فززني وانكلب استكان الجاي على رجلي هو منا يركص الاستكان كعدته ممضبطه وي الماعون لان كزازه مو اصلي. والخاشوكه فافون
نتر ابويه
ولك راااجح طايح الصبغ تاليها وياك هالسوله الكشره هاي شنو حواف الخبزه باجر الله يعمي عيونك
شبعت يابه كملت كرصتي
اكل هاااي النووب يللله
اي يابه صار
وضل يعلس بيها وحدها وامي تباوع من جوه عينها عليه بقلق صبت استكان لخ وتباوع لحلكه
همست
اكلها يمه وفوكها جاي حتى تنزل
اخذ الاستكان الثاني ويباوع لعين ابويه راضي لو لا
سلمان كملت
اي يابه
كوم بسع على راضي خلي ينفخ تاير البايسكل بنجر
اي يابه
وكمت طلعت واني احك براسي الصبغ بعده مجلب بشعري صارت بيه سوله امشي واكشر باطراف شعري الصاير بيها صبغ نفخت التاير ورجعت للبيت
شفت راجح ينتضرني وبيده المالج. والعربانه وطاسه العماله ببطنها والجفوف باوعتله كال
اليوم الجوف الي البارحه انت لبستهم
اي صح الك دمشي اطلع كبالي اذب البايسكل وارجعلك
اوك
لتوكف وي. هذا الكلاوجي السختجي. وبعدين تتمالخون وتلمون العالم وتصير بالموالج
لا خلي يولي
ذبيت البايسكل ولحكت اخويه فرعنا من الصبح صوت الجلف بي مال طرامي كلمن طرمته هلكداتها والمي يجري من جوه بيبان البيوت الصغيره بنص الدربونه المجري كاص الشارع بالنص على طوله والمي مخبوط قاصر على تايت وعلى غفله تجيك روجه دهله ريحتها تذبح
الطرشي خربان عد بيت ابو محمد ابو الطرشي
وصلت راس الفرع وكفنا بالمسطر اقل الربع ساعه واخذونا لبيت نبني وصعدنا بالسياره.
شتاء سنه ١٩٨٥ هايه
لي من العمر ٢٨ عام
غير متزوج
واسكن بمنطقه من مناطق بغداد الفقيره
سلمان. رغم اني لم اسلم من حضي النحس
ارغمت على ترك دراستي لاعين والدي اللذي يعمل باعمال الزراعه والفلاحه والبستنه في مناطق بغداد ذات الطابع الراقي
يجول بدراجته. شوارعها ساعات كي يصل لوجهته لاجل لقمه العيش وانا بدوري مع اخوتي نساعده
---
مافد يوم جربت التكتبون عنه لو اللي اسمعه من جماعتي من نبني كلمن يغرد من صفحه واني وراجح صافنين نضحك اللي يكول
كمزتلها البارحه بالسطح
واللي طاير بخطوبته وبس يتبسم وغيرته متسمحله يحجي
واللي بس يتصفن بعلاج امه ولكمه جهاله شون حيوفرها
كلمن يبجي على ليلاه
محمد اخويه
مدلل امي يتمرض الصبح والضهر يصير قرد عمره ١٥ سنه واربع سنين راسب بالخامس تالي بطلناه يشتغل ويانا
احسن
بس لكالها خوش درب يوميه وصاح كلبي بطني رجلي ويصرخ وامي متتحمل حتى ابويه يسكت من يمه واحنا عايفيه على بعده صغير خلي باجر يكبر ويجر عدل
كملنا بناء البيت وطلعنا كلمن لبيته صعدنا نفرات ورجعنا لمنطقتنا ايدي كلها اسمنت البرد فطر جلدها وتدمت وتحرك بس تعلمنا وصلت للبيت وغسلتها مي حار وامي تفركها تفطرت والدم يجري واني كل الاحسه حكه دهنتها الحجيه دهن حر وملح. وحارت بيه يم الصوبه دفيت ورجلي الوكف بيها الدم مشه وتدفه يم الجوله كمت اغفي من الخمسه الفجر للخمسه العصر اغمض وافتح وامي تدهن ايدي انتضر اخويه يكمل سبح دافوت تمددت وصحت
راجححح لتخلص المي بالجدر طايح الصبغ
ايييي فهمنا
يمه تارسته الجدر لو نصه
لا يمه تارسته والالبريمز يشتغل على عين الصغيره هسه يطلع اخوك واسبح تدفي روحك
خوش نزعت قميصي مليان جص جسمي اكلني وطلع راجح ويفرك براسه
يمه راح الصبغ
اي يوم راح تعال ادهن ايدك
راجح-دصبيلي اول انخرطت
سلمان- طبيت سبحت احس روحي حوكع من دفو المي كملت وطلعت عدل لفراشي نمت
يمه ميصلللح تنام هسه كوم وكت وذان
يمه دخليني حتى الله يعذرني وروح ابوج
لا يوم مزين وجهك يصير اصفر
هسه علساس هو احمر هو مطكع مال شمس،
شبي جنه ورد نور محمد بوجهك يوم
ابتسمت وكمت اغفي خليت ايدي جوه خدي وغفيت حسيت على ابويه. ينزل المسواك من سله البايسكل ويحجي لامي على اسعار المواد اليوم
هاي لكيته كوتره كتله جيب الخمس كيلوات على كذا سعر
وامي تكول يا زين بلاش الحمد لله
كملت نومتي الغدا الاكلناه بيت البيت البنيناه جان كلش طيب واكلت هواي كملت نومتي رجعت حسيت على امي تطفي الصوبه علاء الدين وتفوت لكبتها كملت لنومتي بدفو البطانيه رغم انها تجكجك مال جيش بس خرب عراضها شكد تدفي غفيت براحه واشوف روحي بطيف ادفى من بطانيتي
بنيه تخبل سميره ومربربه تقربت مني على نومتي تبتسم ونزلت كصيبتها صفح كالت
انت سلمان
واني سرسرحت رحت اضحك وايدي على وضعها جوه خدي اي اني
وتلمست خدي بدفو اي ها غمضت وفزيت على صوت ابويه
سلمان
فزيت اكمز من فراشي وادور داير مدايري احس البنيه موجوده وابويه حيشوفها ملكيت غير ابويه عاكد الحاجب يباوعلي ويلف حزام الفتق على خصره
شبيك بويه خيرك حلمان شنو
ها لالا هه لالا بويه شنو بيش ساعه
ب٣ يابه نام بعد وكت داصلي نافله الليل
ها زين زين ورجعت تمددت ايدي على كلبي يدك بسرعه بسرعه غمضت وملامحها انحفرت ابتسمت وراح كلبي التفتت نطيت ضهري لابويه صار بوجهي راجح فاك حلكه ونايم فتحات خشمه تنفتح وتنسد من يتنفس غمضت ماريد صورتها تروح من راسي
مكدرت انام بيومها بعد --------
يتبع............
مساءكم عافيه مساءكم امل ويقين بالله
بلشت بالقصه لان ماعدي شي بس
شوكت ميصير مجال انزل الثاني
خلو ولو بالاسبوع بارتين خلوني عراحتي فدوه.
شكرا للمتفهمين منكم
مراح انطي وعد محدد وموعد حتى مااخلف بي كلما صار مجال انزل
يمكن هاي اقوى قصه اني اكتبها يمكن اكتب وايدي على كلبي
اتمنالكم متابعه ممتعه 🌹