المخلص "باللهجة العراقية "

البارت الحادي عشر

المخلص..
البارت الحادي عشر..
بقلمي رسل..
rasolaa7

انستا  Rasolaa7

-تصويت وتعليقاتكم على الفقرات حبايبي..

لستُ حـزيـن لـكننـي مـرهق!..
فأنا لم اعد قادر على ان اعود كما كنت!..
فتلك الأحداث التي حدثت!..
قد فعلت الكثير بجوف قلبي!..

-رجع التفت عليه.. وينج انتي لج دورت الدنيا عليج
وين اختفيتي واني بس اشهك بدموعي وما مصدكه
انو الصدفه جمعتني بي مره ثانيه وبوكت اني
بامس الحاجة لوجوده..

-مسحت دموعي بتعب ليلي ما نايمته وفراك ابني
اخذ طاقتي كعدت دايخه واحس الدنيا تفتر بيه نزلت
دموعي وامسحهم واحس روحي راح اغيب عن الوعي
هو انتبه الي اخذني من ايدي وكعدني المكان هوسه
صاح عليهم.. برا لطشتوا ما اريد اشوف واحد هنا..

-راد يطلع هذا الضابط العصبي واني بلعت ريكي حلكي يابس وشفافي مفطره.. خلي يجيبلي ابني لا تخلي
يطلع الله يخليك..

-تركهم وباوعلي بنظره مستغرب.. جبتي وشلون اقصد وينه؟!..

-هزيت راسي بتعب واشرت على الضابط هو صاح
فداء الطفل هسه اريده هنا..

فداء.. ومن افشر تزعل مني بحلكي حجايه مالي دخل
لو تزحلكت من حلكي ولطشت بكصتك..

-هو ضحك ودفعه واسمعه يهمس ويا بكلام ما فهمت
منه غير بس كلمه بعدين هسه روح..

-رجع عليه وصافن واني فرحانه احس جبل من الهم
انزاح عني موقفي واني بنص ذول القذرين صعب ومنو راح يصدكني ما مصدكه روحي شفته بحيث بس
صافنه عليه  ودموعي تنزل..

-كعد لمستواي وصارت كعدتنا قريبين على بعض بينا
مسافه قليله ابتسمت بقهر.. رجعنا مثل قبل بس المكان
يختلف عبالي متت بذاك اليوم انتظرتك هواي وما اجيت
الدعاء الي انطيته الي صار الي هويه ودائما اذكرك
بيها..

-الله باوعلي وخلصت منهم والمكان صار بس ذكرى
وره كم شهر قصفناه ويكولون سامي جوه تنهد باخر
كلامه شكد دورت عليج بكل واجب بكل شبر نحرره
ونتقدم عليه اكول يمكن هنا هسه اشوفها وانتي فص
ملح وذاب..

-دخل فداء شايل الطفل وروحي رفرفت عليه مثل
الطير نايم والدمعه بعينه مسحت دمعته وبسته ليش تبجي بعد ما اعوفك بكلبي مكانك تنهدت شلون ردت انطي الهم غبيه اني هالطفل منو الي غيره ومنو اله
غيري..

-ابوس بي واشمه عبالك مفاركته دهر مو ليله رفعت
راسي جان المخلص صافن عليه وعيونه حمره انقهرت عليه هو هم فاكد ابن بس محد يكدر يداوي كلبه ويرجعله ابنه..

-مد ايده لزم اذانه المكان الطري ابتسم.. شكد حلو ولج هذا شسمه؟!..

-علي حجيتها وفداء ضحك ويسوي مثل الهنود سوري
والله العظيم سوري..

-المخلص ضربه على كتفه وهو يفرك بمكان الالم
ومكشر كرك حرام مو ايد..

-انجب وغطي عني كم ساعه وارجع بس امن عليهم
حجاها واشرلي اكوم ويا رجع كتب على ورقه واخذ ورقه شكهه وذاك العصبي نكلب فطير يس يضحك واني ما فاهمه شيء..

-قبل لا نطلع انطاني شماغ خليته على راسي وطلعنا
صعدت ويا وابني بحضني عيني عليه وكلبي معصور
صح خلصت والحمد لله بس شنو مصيري بيت خالي
وين راح اشوفهم يصدكوني مظلومه لو هم ياذوني ويحكمون على ابني بحكم قاسي..

-والله كرهت روحي من كدما افكر شكد الحياة صعبه
وكفنه بازدحام الناس ضاجت والسيارات حركت الشارع بالهورنات واني بس صافنه احس عقلي مزدحم اكثر يمكن السير كلش ساعه اقل ويفض الا عقلي
ازدحامه شنو الي يفضه..

-التفتت عليه.. وين رايحين؟!..

-لبيتنا حجاها واني باوعت عليه مصدومه هو ضحك
امي هناك وخواتي اليوم جايات لا تخافين..

-متردده احجي واخاف اروح هو رجع التفت عليه.. ام
لسان شو صايره كمله..

-هنيالي لو كمله جان ما تعبت هيج..

-خلصت وهاي الله خلصج منهم واني عبالي ملاويتهم
كلما اشوف واحد منهم فاطس اكلهم هذا فطس على
ايد زمرد ام لسان..

-ضحكت يا زمرد هو اني حتى المكان الي كاعده بي
ما اعرفه شنو ووين..

-صفن على الشارع يسوق وره مده رجع حجه.. تحبينه
اقصد علاوي؟!..

-اغلى من روحي.. حجيتها واحس بي تنهد براحة..

-وانطلقت بمصير جديد
مصير مجهول
مصير يحتم عليه التحمل ومواجهه الافكار
والمعتقدات الي ما تفرق عن دا..عش
كلمات تنحفر بالذاكره
وتترك اثر جبير بالكلب..

نورا..

-واكفه كبال المرايا واباوع على شكلي اباوع على عيوني ذبلانات وحتى سواد جواهم وشعري الي طولان واصل لنص ضهري وصاير خفيف كلش اتنهدت واني اتذكر قبل ابد ماجنت اطوله لشعري دائماً قصير يوصل لنهاية الكتف جنت كل ما يطول شوي اركض على امي واخليها تكصه وهي خطية تحجي عليه ومتقبل اكصه بس وره كم ساعة ترجع وتبوسني.. يلا تعالي ما ينطيني كلبي ازعلج..

-اخ شكد مشتاقه الحنيتها لصوتها لكل شيء بيها هواي
مشتاقه لاهلي اخويه اختي الي كسرة كلبي بيهم ما يجبرها شيء..

-مسحت دموعي وعيني اجت على جسمي الي صاير نحيل صفنت على حالي واني اكول بداخلي معقولة الهم والحنين هيج يغير الواحد والله بهاللحظة اتمنيت اغمض عيني وافتحها واشوف نفسي بين اهلي امي ابويه اخواني ودوامي صديقاتي بيتنا وحياتنا القديمه ضحكات الناس هوسه الفرع وحتى صوت ابو الغاز الي مرات
يلح ونضوج منه الكل شيء حنيت يلعن الحروب الي ما تجي منها غير بس المواجع وما تخلف غير بس ذكريات تهب علينا بدون اصحابها وتحرك كلوبنا..

-فتحت عيني نزلت دمعة حسيتها حركت جفوني من حرارة كلبي شنو صار لو دا..عش مدخل للموصل او اني مداومت بهذاك اليوم لو لو لو لو الي لو شكد احجي بيها تضل حسرة على اشياء اتمنيناها ومصارت ولا عمرها راح تصير مسحت دموعي واني التفت على الباب الي دخلت منه سمر.. يلا تعالي اكلي شنو راح تبقين هنا اليوم؟!..

-ركزت بوجهي واجت عليه.. نورا حبي مو كافي دموع اعرف حقج والله بس شوفي حالج شلون صايرة يعني قابل اذا سويتي بنفسج هيج راح يرجعون لا صدكيني لازم تصيرين قوية الحياة من تشوف واحد ضعيف تقسى وياه لابعد حد لهذا خليج قوية حبيبتي لا تتقوقعين داخل حزن مراح يتقدم شيء ولا حزنج راح يزول..

-شوفي واشرت على الساعه الي معلكه على الحايط.. هسه اذا اشيل الباتري (البطارية) منها واتركها يوم ويومين وحتى سنوات راح يوكف الزمن وتتوقف الحياة؟!..

-الساعة من تتعطل الزمن يمشي مراح يوكف الها وينتظرها تتصلح انتي هيج اريدج كلما الحياة تقسى عليج استمري بالقوة لا تبينيلها ضعفج ابد لان الحياة مراح توكف علمود واحد ابد دائماً تلكيها بأستمرار لذالك احنا لازم نستمر بالقوة حتى نكدر نتغلب على صعابها ونعيشها الله يلوم الي
يلومج والي عشتي صعب والموقف اليوم اصعب
بس خليج هيج قوية..

-صفنت عليها واني ما اعرف شنو اكوللها بقيت بالغرفة لان اخجل اطلع منها واشوفكم بعيني واني اعرف سبب مشاكل بيتكم اني تنهدت ونزلت وياها
واني خجلانه منهم..

-رحت على زوج خالتي كعدت يمه جان يباوع اخبار
وحسيت وجهه ثكيل عليه.. عمو زعلان عليه؟!..

-لا يابه بس اني من حجيت هيج كدامهم علمودج انتي
حيرتيني لا انتي الي راضيه تروحين وياي ولا انتي
الي تقبلين بهالحل والولد ما دام متفق ويا ابوج هذا
هو مبين خوش زلمه..

-يعني ما زعلانين مني والله احبكم اسالهم شلون كل
يوم جنت بامل ارجع يمكم بس عمو ابويه ما اكدر
اعوفه وانتم والله حقكم تامنون على حياتكم بس
تفهموني اني من نار كلبي هيج حجيت هو حسيته شوي
فك قربني عليه باس راسي.. الله يريح كلبج عمي..

-التفتت على خالتي تمسح بدموعها رحت يمها واسولف وياها مو قصدي اكسر الهم كلمه بس عندي اوافق على
علي واقبل بكل شيء بس ما ابتعد هيج بعد عن ابويه..

-ثاني يوم وهو اليوم الي اتفقوا بي نعقد بعدما خالهم
هدا الوضع بين العائلتين وكالهم باجر نعقد الهم عقد
سيد بالكاظمية وابن اختي بضمانتي وبنيتكم بنيتي
كم كلمه منه بحنيه دخلت لكلبي مثل نسيم الهوا العذب..

-وره ساعتين اجوي علينا وسمر دخلت للغرفة.. دكومي لج مبوزه انتي شايفه جماله بس عيونه الزرك
تخليني اوافق بدون تردد نوب ما راضيه..

-ضحكت وكمت وهي تتغزل ضربتها على كتفها..راح
يسمعج سامر وعود خلي يفيدنج العيون الزرك..

-وخري ناس مو مال شقى على اساس اني مجذبه عبالك شاردين من الجنه هو واخوه شبي حضي اكلج
صدك صيري خوش جنه وامدحي بيه حتى ياخذوني
لاخوه..

-سمر الرجال متزوج..

-هزت ايدها هو هذا حضي كومي عيني على الاقل
وحده منا تحصل رجل بلا اني راح اروح يم الحلوين..

-شوكت تعقلين بربج حجيتها وهي ضربتني.. عفت
العقل الج..

-سلمت عليهم وطلعنا اني وخالتي بسيارة سامر اما بيت علي صعدوا ويا كرار مشت بينه السيارة واني اباوع من الجامة للطريق اول مرة راح ازور بيها امام مااعرف شعوري شنو واحس الحياة كل ساعه مو كل
يوم مسويتلي مفاجاة..

-وصلنا للكراج نزلنه واني مشيت ويا خالتي والحجية من تقربنا وبينت المنارة والاضوية دمعت عيوني من المنظر الساحر للعيون كلما نتقرب اكثر عيوني تنبهر
بالاجواء والناس قبل ما ندخل اشترتلي خالتي حرام صلاة لبسته والتفتت على الحجية..

-صلاوات على محمد محروسه من العين شحلاته
الستر للبنيه..

-دخلنه جوه للحضرة دمعت عيوني على الخشوع وخصوصاً اني اول مرة بحياتي  ازور تقربت من الشباك ودموعي تنزل واني ادعي اول شيء دعيت انو بابا يرجع سالم الي وبعدها دعيت كون الله يصبرني استمريت ادعي رفعت عيني على وحدة من الزوار انطتني جكليت 2 شكرتها واني مااعرف شنو جانت تحجي لغتها ايرانية ما اعرف باكستانية بس قهرتني جانت تبجي بجي هاي الناس لغز صعب وكل واحد حاير بهمه وكل واحد من عنده وجع بكلبه بس الله يعلم بي..

-خليت الجكليت بيدي والحجية جانت منتبهه.. هاي مراد بنيتي ان شاء الله ينطيج مرادج ابتسمتلها ورحنا صلينه وقرينه الزيارة وره تقريباً اقل الساعه طلعنه ولكيناهم منتظرينه..

-مشينه ويا علي الي اخذنا المكان وجان اكو شيخ كاعد سلمنه عليه وبعدها خالهم حجه وياه لان بالبدايه استغرب شلون اعقد بدون اهلي بس من فهمه خالهم قرر يعقد والشهود كرار وسامر بدأ الشيخ يحجي بكلام العقد واني ادموعي تصب كل بنية تتمنى امها واختها وياها بهذا اليوم اما اني حتى اهلي ماكو ولا واحد منهم مسحت دموعي وجاوبت السيد وتم العقد وصرت زوجة علي ومااعرف بعد شنو الحياة ضامة الي من مفاجآت..

-خلص العقد وكلها تبارك النا جنت خجلانه ارفع عيني واشوف تعابير علي ما اعرف اذا جان فرحان او لا ما اعرف اذا يحب او اكو وحده باله واحنا فرضنا هالشيء عليه اسئله هواي ابالي بس اخجل ابوح بيها وخصوصا بعد صار الي صار..

-ودعنا الامام وطلعنا ودعت خالتي بالدموع وسامر الي سلموا علينا ورجعوا للبيت صعدنا اني والحجية وعلي  ورا وكرار وخالهم كدام خليت راسي على جامة السيارة واني احس نفسي ضايعه كلبي يوجعني اباوع على الناس وعلى البنات الي يمشون بالشارع وانقهر على نفسي وأهلي احس نفسي تعبانة ومااريد أعيش حتى الباجر مااريدة يجي لان صرت انصدم هواي بهالحياة كل الي أتمنى بهاي اللحظة
انو ارجع طفلة صغيرة طفلة  مو هامها شيء بهاي الحياة غير اللعب واركض ورا بياع الشعر بنات وبعدين اتعب واركض على حضن امي حتى انام تعبت ياربي والله تعبت نتبهت على دمعة نزلت على خدي مسحتها بسرعة قبل لا احد يشوفها لان صرت اكره العجز الي اني بي..

-روحي تعبت حيل وراسي صار يأذيني احسه باي لحظة راح ينفجر عدلت كعدتي وخليت راسي على كتف الحجية كل الي اريده هسه بس اغفه شوي عسى ولعل انسى شوي من الم كلبي و وجع  راسي مااعرف شكد مر من الوقت وحسيت على الحجية تكعدني نزلنه واني اباوع على البيت الي كلما تضيق الحياة عليه مالكه الامان الا بيه  واجه على بالي شلون اول مرة دخلته ابد ماتوقعت ادخله واني وحده  منهم زين شلون راح اعيش هنا احس روحي دخلت غصب على حياتهم وخصوصاً علي الي يمكن يكون مجبور او مشفق على حالتي او يمكن ما جان مفكر يتزوج او يعقد بهذه الطريقة باوعت للحجية اكيد جانت تحلم تزوج ابنها وتسويله احلى عرس بس رغم هذا للامانة جانت فرحتها بينه جبيرة..

-دخلنا واتلكتنا لارا الي اول ما شافتنه هلهلت شفت على وجهه فرحة الاخت الي نحرمت منها ركضت حضنتني وهي تباركلي.. مو كتلج صعبه تعوفين لارا متعرفين شكد فرحانة يعني راح تبقين يمنه مااصدك كرصوني حجتها لارا وهمه ضحكوا عليها..

الحجية..يمة على كيفج ويه البنية تعبانة اخذيها ترتاح ..

-من عيوني كم نورا عدنا احنا ورجعت اندارت على الحجية وهي تكول بس والله بعدني ممصدكه خاف
مسوين مقلب بيه..

-رحت وياها على غرفتها وهي تحجي وتحجي واني ماعندي طاقة اجاوبها لارا حبي تعبانة بس خلي انام ومن اكعد احجيلج كل شيء بالتفصيل وعد..

-هي كامت بغضب.. والله مو صوجكم صوجي اني فرحانة الكم وانتو ما تتحاجون انخمدي انخمدي النوم
لو يفيد جان فاد اهل الكبور خلي اولي..

-طلعت لارا و شكلها زعلت يلا بس اكعد من النوم اعرف شلون أراضيها خليت راسي عالمخدة و هاي المرة الاولى الي انام بيها بدون ما تهجم عليه الذكريات
من كدما تعبانه غفيت بلحظتها..

-فزيت وره كم ساعه على صوت لارا وهي تكعدني
حيل هاي شكد نمت..

-يلا تعالي تعشي ترى امي مسويتها حصار علينه اذا انتي ماكو يعني  ماكو عشه  وهاا ترى اني ما نسيت اني ما احجي وياج بعدني بس هاي علمود بطني ودارت وجها عني..

-ضميت ضحكتي ولزمت ايديها واني.. كم لارا اني عندي وعيونج جنت تعبانه هسه وره العشه نكعد ونسولف للصبح يلا عاد فكيها زعطوطه وبس تتزعلين..

-جذبي جذبي عليه بعد للصبح حبي ترى صار عندج غرفة يعني انتي هسه طلعتي من غرفة لارا وصرتي بغرفة علي..

-ميخالف هم اجي يمج..

-اكلج شلون تكومين لو امي راح تسويلنا زفه بهاي
الليله..

-اروحلها فدوه الحجية يلا كايمة وياج..

-نزلت والحجية تسأل شلون صرتي وليش هالكد نايمه طمنتها وكعدنا ناكل وجود كاعد بحضن علي متعلق بي بشكل لارا تكول من التحق وطول بدوامه جود تنحس
ويدور عليه بالبيت..

-كملنا العشه طلعت اغسل على المغسلة حسيت عليه وراي..شلون صرتي؟!..

-ابتعدت واني خجلانه منه ولا عبالك صار حلالي الحمد لله ..

-اذا ماعندج شيء تعالي ورايه للحديقة اريد احجي وياج..

-ماشي..

-طلعت للحديقة وهو كاعد على المرجوحة من تقربت سوه مجال واشر بيده انو اكعد هنا كعدت يمه واني مية فكرة اجت على بالي بخصوص شنو يريد   يحجي وياي  وخصوصاً قرار الحجية الي صدمنا بعد ما طلبت منا انو الزواج ميكون بس على ورق كالت مااريد احد يحجي عليكم بكلام باطل ولا تخافون تتأقلمون عادي ياما ناس تزوجوا وهم محد يعرف الثاني ولا شايفه بعدين حياتهم صارت سعيدة والله مااعرف شنو غايتها بس الله يستر واني تفكيري غير عنها..

-اتقربي  بوية ما اكلج ليش هالخوف حجاها بضحكة خفيفة واني ابتسمت على كلامه وتقربت منه..

-اريد اعرف رأيج من كل الي صار والي تردينه يجرالج ؟!..

-يمكن مراح تصدك اذا اكولك مااعرف شنو اريد والله احس بنفسي ضايعة والله صرت اخاف من باجر شنو ضاملي بس كل الي اتمنى تتحملوني منا لما يجي بابا واروح ويا وفضلكم هذا مراح انسى طول عمري والله صح لو كالوا  مرات الغريب احن عليك من القريب واني هذا الي شفته هنا يمكم..

-تروحين ويا؟!..

-اي ما اريد اثكل عليكم اكثر من هيج وثانيا مااريد اتركه وهو هسه ماعندي ولا عنده غيري..

-ان شاء الله خير بويه ويرجع بالسلامة شنو هالحجي بعد لتعيدي انتي صرتي منا..

-زين بس سؤال اخاف الحجية تشك بزواجنه  و شلون راح اكوللها  اني اروح منا بس يرجع بابا ؟!..

-شوفي نورا صحيح كل شيء صار بسرعة
ويمكن بطريقة انتِ كبنية متحبيها
بس الضروف هيج حكمت صحيح بالبداية جانت الفكرة بس نعقد بس  من بعد كلام رجل خالتج تبدل الحال ترى امي وخالتج وحتى خالي بعد ما يمشي وياهم بس على الورق كل الي اريده منج كدامهم نتصرف عادي ولتخافين مراح لا اتقرب منج ولا شيء وهذا كله لمصلحتج  اخاف يجون جيران واقارب حتى ما يسمعونج كلام وترى امي من اهل كبل يعني صعب تفهميها اتركيها للوكت والله كريم بعد وثقي بيه هنا راح تكونين بأمان اكثر وابد لا تضغطين على نفسج ولا تفكرين احنه اشفقنه عليج ابد انتي من اليوم صرتي وحدة من هالبيت وهذا هو يجرالج الي تردي
كل الي اريده منج شنو تحتاجين تطلبينه مني مو من غيري لان انتي من اليوم صرتي مسؤوليتي شرعاً وامام الله  وكل هذا الحجي مااريده يطلع خلي بيني وبينج والله الحجية اذا سمعت تروحين بيها حجاها بابتسامة..

-وهسه يلا بوية كومي فوتي الجو برد خاف تتمرضين..

-وصلت لباب المطبخ التفتت عليه..علي..

-عيوني؟!..

-شكراً شكراً على كل شيء كلتها ودخلت بسرعة للبيت..

-ابتسمت على شكلها وهي تكول شكراً والله مرات تحسها طفلة ومرات عجوز والدنيا شايلتها فوك راسها  ضليت اباوع وراها الى ان اختفت واني حاير بيها
وبوصية ابوها وبشغلي الي بنص الموت..

زمرد..

-وصلنا لبيتهم واني خجلانه منه وما اعرف رده فعلهم
شنو حضنت ابني لصدري ونزلت هو قفل السيارة وفتح بابا الشارع دخلت وراه بخطوات متعبه ومتردده
مو مكاني ولا بيتي وناس لاول مره راح اشوفهم بحياتي..

-هو صاح من باب المطبخ.. يوم زهراء وينكم اجاكم
خطار..

-اجتي بنيه يطلع عمرها نهايه العشرينات حلوه تلم بشعرها ها خويه اليوم من وكت وهلا بخطارك حجتها
وتباوعلي باستغراب..

-هي ركزت على الطفل الي بيدي وهي ضربت على
خدها.. ولج يمه تعالي شوفي ابنج طلع صدك متزوج
لا والنوب حتى طفل عندهم..

-هو صاح بيها.. ام العلوم هسه انتي شفتهمتي والعباس ما تصيرلج جاره..

-اجتي مره على صوتهم جبيره باوعتلي بنظرات ما
عرفت افسرها شنو خجلت منهم يمكن هو فرض وجودي عليهم وما عندهم خبر حسيت بنظراتهم علامات استفهام هواي..

-تفضلي يمه زارتنا البركه حجتها المرة ودخلت وياها
كعدتني بالصالة ذبيت علاوي على التخم وهو بس
يبجي استحي ارضعه بوجودهم تالي من شفته فرفح
نزلت الشماغ على جسمي ورضعته والحجية نظراتها
تتنقل بين الشماغ وبين ابنها..

-هو كام طلع وهي راحت وراه وبقت البنيه يمي انطتني
مي وراحت وراهم وبقيت وحدي اني وابني ويا مصيري المجهول..

-متت بدمي واحس الدم صعد الراسي من سمعتها
تحجي ويا بكلمات كسرن كلبي الاجزاء مثل قطع
الزجاج اسمعها واني جسمي كله يرجف شلون تحجي
ويا وتكله ومدخل ابن حرام بيتي ولك يمه ابن دا..عش
هذا تفهم يعني شنو لو لا هيج صارت يابو تراب تدخل
ولد الحرام النوب تدخل الي فجعوا كلبنا للبيت..

-باوعت على ابني شنو ذنبه طفل وهيج يتلقب وهو مو
ذنبه ليش هيج تكسر كلبي بكلامها اعرف نظره المجتمع عن هالشيء بس من تنجرح ويوصل المسامعك صعب والاصعب من انت مجبور تكمل
وكانو ما سمعت..

-اجتي زهراء سدت الباب ووجها قلق عبالها ما سمعت
بوست علاوي.. ارجع للشوارع واكعد بخيمه وابيع
كلينكس واحارب الناس والمجتمع كلها لعيونك يا روح
امك انت اذا كلها تصير ضدك اني يمك..

-اني ما راح اخلي كلامهم يأثر عليه ياما ناس ولد اصل
وباعت ضمايرها من دخل التنظيم لكاعنا يا ما ناس
بلحضه تبيع شرفها ونفسها التربية معليها بالاصل التربية عليها بالاساس الي يبنونه الاهل والافكار الي
يزرعونها براس الطفل يمكن مرات يكون ابن الحرام
هذا المصطلح الي ينعتون بي الطفل البريء يمكن
يكون احسن من هواي ناس يمكن باجر استند عليه
يمكن لو جارت الدنيا عليه هو سندي من بعد الله..

-كعدت على اعصابي واريد المخلص يرجع حتى
اطلع منا شوي ورجعت الحجية وهو وياها واحسه
يريد ينفجر من العصبيه اشرلي.. كومي وياي..

-كمت واني عيني على امه خجلانه منها وما اعرف
ليش هيج حكمت علينا طلعت ويا واحسه عرف بيه
سمعت يريد يحجي ويتراجع تالي طلعنا من البيت..

-بالسيارة التفتت عليه.. شكرا خلصتوني منهم بس اريد منك خدمه وحده موبايل اتصل على خالي بلكي احصله
بلكي عايش بلكي طالع من الموصل..

-ارتاحي هسه وعود بعدين حجاها ووكف السيارة
نزل طول اقل الساعة يلا رجع بيده علاليك خلاهم بالسياره وصعد مشى شوي جان اكو حديقه ومكان في
وكف السياره وطلع اكل من العلاليك.. اكلي..

-جنت جوعانه ما رفضت هو اني اصلا ما ماكله شيء جان جايب لفات كص وبيبسي اكلت اثنين ورجعت
على الثالثه هو باوعلي وطكها ضحكة.. حرام ماكو
انوثه فداء صاحبي وكبالي انطينا مجال وياج..

-خزرته واللكمه بحلكي.. جوعانه شنو جبتهن ومنيت
بيهن..

-لا يابه الف عافيه اكل حبيبي فداء..

-لا تستهزئ..

-ها اها هيج وارجعي ام لسان مخليتني على نار وما اعرف شتصرف وياج شبيج جنج عجوز..

-كملنا اكل وطلع بينا مسافه مو بعيده عن بيتهم وصلنا
لفرع ويم باب صغيره وكف السياره اتصل واسمعه
يحجي ويغلط تالي ضحك اي ضيف يابه لا تصير
مثل امي..خوش هنا يعني يلا ولي..

-يم سوسو د**** حجاها بضحكة وسد الجهاز
التفت عليه.. هذا بيت صاحبي بس مرته هنا ارتاحي
اليوم وباجر الله كريم واذا احتاجيتي شيء خلي تخابر
علينا..

-نزلت وهو دك الباب شوي وفتحته بنيه جانت لابسه
احرام صلاة شكلها ناعم سلمت عليه وهو كالها هاي
ام علاوي ما اوصيج بعد اخيج..

-رجع لدوامه واني طبيت وياها للبيت ابتسامتها حلوه وترحيبها احلى بعد كعدت بالاستقبال
واطلقت العنان لدموعي حتى اذا مثلت القوة حتى اذا
طولت لساني بس كلبي يوجعني واحس روحي وحيده
ومحد يريدني وهالشعور صعب واحد يتحمله..

-عيني على تليفونها و استحي اطلبه منها جنت اريد
بس اتصل على خالي لو مرته عسى ولعل اسمع عنهم
اخبار تطمن كلبي نار عليهم..

-شنو كلبي تفطر
شنو روحي فرفحت
شنو العبره الي تكسرت بداخلي
شنو ورقه سقطها الريح ونداست بالاقدام هيج
شعوري جان من سمعت ردها.. خاله ابقي وما راح
احجي لخالج شيء هم ما يقبل ويمكن يذ..حج وهم
عندي بنيات تردين توكفين قسمتهن لو رجعتي
انتي وهذا الي بطنج..

-وطلعت من الفجر خيبتي خيبه وابني على صدري
ما اعرف وين اروح دمعتي على خدي وافتر بهالشوارع برد وفجريه مغيمه مثل الغيم الي مغيم
على حياتي السيارات قليله الي تفوت وكفت بنص
الشارع اعبر واحس روحي رجعت لزمرد القديمه
زمرد الي تبيع كلينكس
زمرد الي رغم التعاسه جانت مبتسمه
زمرد الي تحملت مسؤولية من صغرها
بس فرق جبير هالمرة الطريق اصعب
والي بيدي مو باكيت كلينكس الي بيدي طفل
والاصعب من كل هذا مواجهتي الهالحياة واني
وحيدة لا اهل ولا عزوة....

يتبع....

علقوا ع الفقرات حبايبي انتم
وشنو رايكم وتوقعاتكم للاحداث؟!..

اللهم صل على محمد وال محمد❤️