المخلص "باللهجة العراقية "

البارت الرابع

المخلص..
البارت الرابع..
بقلمي رسل..
rasolaa7

انستا  Rasolaa7

تعليقاتكم بين الفقرات+ متابعه الحساب حبايب..

اي ألم حل بك 
كي تهرب باستمرار..

-مو ابو تراب الي يدنس عرضه راح اوخر عنج شجنتي تتصرفين تصرفي لا تبينين شيء ابد ارجعي
على حالتج بس هاي المره اسمعي كلامي حتى اطلعج
منا سالمه..

-دمعت عيوني.. والله احلف؟!..

-وغلاة علي ابو تراب وغلاة روحه الترفه دام ما اشم
الهوا اطلعج منا لو اخر لحضه بعمري احاول..

-ابتعدت عنه ودموعي تنزل ما ادري شصارلي من التعب والقلق الى تنهيدة الراحة شعور ما ينوصف هيج بس الي يعيشه يحس بي احس نفسي جان مكتوم ورجعلي مثل الغريق الي يدخله هوا لريته..

-عبالك نفتح الباب وطلعت عبالك كل الي عشته حلم وفزيت منه يربي شنو مسويه بدنياي وتنقذني رفعت راسي ودموعي نزلت مو صعبه على رب العالمين الي نقذ يونس من بطن الحوت والي يرعى نمله باعماق الصخور قادر على كل شيء..

-التفتت عليه.. شجابك بينهم؟!..

-شغل وصوتج لا ترفعينه اتباعهم انذال ترى خلي اكمل
شغلي على خير..

-رجعت شعري ليوره فرحانه جنت عيني كوه اغمضها
اخاف يعتدي عليه بس هسا بعد ماكو خوف من سمعت
كلامه انترست امل..

-جنه واحد بصف الثاني بينا مسافه قليله
وساندين ظهرنا على الحايط راسي على رجليه وباوعتله وبصوت كلش ناصي.. هواي حجيت عليك
مو قصدي عبالي واحد منهم اعذرني عفيه..

-ابتسم هو انتي مو لسان عندج تكولين بيكيسي وخرطت بعد..

-تستاهلون ليش تحبسونا وتعذبونا؟!..

-هم رجعت عليه هو هذا هم حضي..

-بعد بس سؤال عفيه مو تكلي لسانج وتنصب عليه..

-احجي هو اني جبتها لروحي وحك علي تورطت
وتاليها نروح بيها وياشر على ركبته ذب..ح شورطني
وجفصتها يمج ومنا لسانج ما يصيرله جاره..

-مو خطر شغلك يعني شجابرك على هالشيء ليش
ما تقاتلهم مو احسن من هالشيء..

-زفر ومد رجله.. منو اغلى انسان عندج؟!..

-من بعد اهلي الي عافوني اخوي..

-اذا يوم رجعتي للبيت وشفتي اخوج مذ..بوح ودمه
بطوله وملامحه الحلوه متشوهه شتسوين؟!..

-بجيت نكسر كلبي اجزاء رجف حلكي ورجعت لذاك
اليوم وعبالك هيج كل المواجع بسؤال كم كلمه كفيله
تهدم كل الصبر والقوة الي بنيناها خلف ابتسامه كاذبه..

-خليت عيني بعينه شفت اخوي شفته وبهالمنظر واتعس جنت ابيع وهو يمي ثواني بس ثواني التفتت شهكت ما كدرت اكمل..

-اندعم؟!..

-داسه وطشر دمه نمرد مثل كلبي الي نمرد عليه ما شاف شيء حلو ولا حتى شبع لعب ويا الاطفال والي دعمه طايش ومشغل الاغاني ويسوق بسرعته عافه بدمه ونهزم فرفحت روحي واني اتوسله يكوم
نترس دم وعيونه الحلوه غمضت الناس التمت وما اسمع منهم غير بس كلمه الخطيه هاي الكلمه كرهتها
بذاك اليوم ما رجعته الي خطيه وخطيه وتالي هو عافني والي دعمه شرد..

-مسحت خشمي ودموعي باوعتله دمعته قبل لا تنزل بسرعه مسحها.. ليش تشتغلون خالج ليش يطلعكم وانتم بهالعمر ما يخاف عليج من الشارع؟!..

-خالي هم عنده عائله وحتى ابنه يطلع ويانا محد جان
يكدرلي يسموني ام لسان الي ما اكدرله لو يخوف اضل
بس اغلط واصيح اخذه بصوتي بحيث يشرد وخالي
هم جان مجبور يطلعنا اجار واكل ومولد والعيشه
صعبه وكومه جهال ما عدا اني واخوي شيصير هم
خطيه هو وحاله على كده..

-تنفست اكره ذيج الايام عدمت طفولتي غيرت شخصيتي دفنت احلامي وتعبت بيها تعب نفسي وجسدي جنت بالازدحام اسمع كلام خادش واغلس
مرات البعض من ترد عليهم تصير بمستواهم اتجاهلهم احسن ومره شخص صاح عليه وهو ماد ايده تقدمت
واني عبالي يشتري مني بس خابت ضنوني من دفعني
بقوه من بطني تاذيت كلش وتفشلت اكو عالم صيحت
عليه وهو يضحك..

-يمعودين يتجارون بيهم هاي عدها اكثر مني ومنكم
خلي يولون..

-بوكتها تاذيت كلش عتبت على اهلي الي راحوا وتركونا بهاي الدنيا القاسيه هم ارتاحوا واحنا الضيم
علينا هذا الموقف خلاني حذره وحتى صار عندي خوف من اريد ابيع الشارع ما يرحم الشارع بي الزين
والموزين بي الي برضاته والي مجبور وشكد صعب بس شفت العجب والاصعب والي ما يخطر على بال
انسان هنا..

-هنا عالم كلوبها مغلفه عن الرحمة
وشعاراتهم تقسي القلوب وعيونهم تشع رغبه وبعيدين
كل البعد عن الاسلام والبشرية..

-الشاب يكتلونه الطفله يغ**** الجامع يهدمونه الكنيسه يهجمونها لا دين لا مبدا لا رحمه مجرد اسلوب
انبنى على فتاوي تحريضية ومنهاهج حقد وكره و قت..ل..

-اعدامهم ب السيـ..ف وتعذيبهم بطرق وحشيه وكل هذا
يشجعون جنودهم على هدايا وهي السبايا بنات بعمر
الورد قدمونا لاقذر خلق الله الي حتى الكاع ما تتحملهم
من يدوسون عليها..

-طفله يغ**** اكثر من واحد ما عدا الي ويانا جم
وحده جانن حوامل بحيث شوفتهن بهالحال ترعب النفس وتكسر الخاطر الحبر يجف والاوراق تخلص
وحروف اللغه كلها تعجز عن وصف الي جاي نعيشه..

-رفعت راسي على صوته.. هاي شنو منين جبتيها؟!..

-باوعت العلك الرفيع ابتسمت بقهر واتذكرت نورا
قبل لا ياخذوني خلته بيدي سوته اثنين واحد الي واحد
الها..

-من وحده غاليه عليه عفيه حباب اطلب منك طلب
عدلت كعدتي وما عندي غيره اوصي على نورا..

-الغرفه نفسها الي اخذتوني منها بيها بنيه اسمها نورا
شكره وعيونها صفر عندها وحمه بخشمها احمر كلش
حباب الله يستر على عرضك بس شوفها وطمنها عني
خلصها منهم..

-شكالولج عليه اميرهم وما ادري بروحي الله يدز الها
ولغيرها الي ينقذهن ترى لا عبالج بس اني هنا..

-شهكت.. عليك الله كفو والله منكم حجيتها بفرحه عبالك
حررت الموصل هو صك على سنونه وايده خلاها
على حلكي خرب بحضي الك**** اذا احجيلج شيء
شلون ما اشوف نهايتنا على ايدج لسانج شبي ما يعرف
يسكت شلون بيه يربي شلون ورطه وتورطت بيج..

-شبيك هسه اني شحجيت فوك ما فرحت..

-بس اسكتي فرحت هي مو معرس خالج حجاها وكام
ارجعي لخبالج ارجعي لشخصيتج لا تخلينهم يحسون
على شيء..

-لا اله الا الله..

-جان واكف يم الباب التفت عليه ضحك.. صرتي منهم
ولج ام لسان..

-لا بس احنا متعودين الي يطلع نكله لا اله الا الله
وهو يرد محمد رسول الله حتى الله يحفظنا..

-محمد رسول الله
وبصوت خافت.. عليا ولي الله وطلع وقفل الباب..

نورا..

ما الذي يجب على الإنسان أن يقدمه مقابل ان يطمأن ،مقابل ان يهدأ،مقابل ان يغادره القلق..

 

-جنت متمددة وكالعاده سولتي التفكير وهالمره افكر باهلي اريد بس فرصه احجي ويا علي ياخذني لمنطقتنا
لو اتصل على ابويه ويجي ياخذني والله ضاك النفس
والروح حنت لاحبابها هيج وينتهي هذا الكابوس وارجع
لحضنهم هيج وارجع لبيتنا واخواني وضحكهم دوامي
وصديقاتي احلامي كل هذا صار حلم صعب المنال..

-اندك الباب وكامت البنت واسمع الرجال يحجي وياها.. اخوها يريدها خلي تجي..

-كمت عدلت ملابسي وطلعت جان علي ماد رجله وحتى دم اكو بمكان اصابته ومرجع راسه على التخم
والعين مغمضها عبالي نايم بس الرجال تحمحم هو
عدل كعدته.. تعالي هنا عندي حجي وياج..

-كعدت والرجال هم كعد ويانا..

-شنو اسم منطقتكم؟!.. حجاها الرجال واني جاوبت
بفرح..(ال....) شنو يعني راح ترجعوني لهناك..

-تنهد وباوع على علي ورجع بعينه عليه.. شنو احجي والله ما اعرف شنو اكول المنطقه هاي صعبه كلش طبتها وتحت سيطرتهم والقناص منتشر على طولها واغلب ناسها تهجرت صعبه روحتكم لهناك
والله يا بنتي صعبه..

-بس عمو فدوه بس حسوا بيه اهلي هناك والله راح اموت واني بحسره شوفتهم خلي يكتلوني ميخالف بس
خلي اطفي نار كلبي بشوفتهم عمو الله يخليك حتى اذا
وحدي اروح اهلي ذول..

-حافضه رقم ابوج؟!..

-اي اي..

-مد الي تلفونه واخذته سجلت الرقم ودكات كلبي تقرا مليون جاوب بابا فدوه جاوب بس خلي اسمع صوت
الامان الي فقدته صار هواي خابت كل ضنوني من
طلع الهاتف خارج نطاق التغطيه..

-رجعت حاولت اكثر من مره ونفس الشيء اصلا
الشبكه هنا معدومه وكوه يحصلونها نوب رقمه مغلق
وين انطي وجهي ووين اروح رجعت الجهاز وبكل
الم.. عمو جهازه مغلق مدري خارج النطاق..

-والله بنيتي جان اخذتج بيدي بس المنطقه دمار الي
تحجين عنها وتاليها تروحون بالرجلين..

-بقوا يسولفون هو وعلي بعدها علي طلع ورقه من جيبه وطلب يتصل انطاه الرجال التليفون وهو اتصل
واسمعه يحجي ويا الطرف الثاني ومبين هو الي راح
يساعده يطلع منا من كمل تشكر من الرجال.. عمي تكدر تطلعنا منا حتى اذا نص الطريق..

-وبهاي حالتك تريد تروح وياك هالشابه لا عمي خليكم
هاليومين لما نشوف حل واشوفلكم الطريق حجاها
وكام طلع وتركنا ورجعت لنفس النقطه شلون اروح
لبيتنا محد يحس بيه..

-نورا تجين وياي ما عندي حل ثاني ومناك نشوف شلون نتصل على اهلج نشوف حل سمعتي بنفسج شلون
يحجي على المنطقة..

-زين هو يعرف احنا مو اخوان؟!..

-اي هو جان شاك وحجيت اله وصار هالسر بينا
احنا الثلاثه حتى اهله ما يدرون..

-زين انتي عندج كرايب ( اقارب) ببغداد؟!..

-اي عندي خالتي هناك بيتها بس ما اندلهم..

-خير ان شاء الله سهله هاي هسه بس خلي نطلع منا
ونخلص من هالغم والباقي ربج يحلها..

-وبيتنا واهلي عفيه حجيتها بروح متعوبه وعيون
مدمعه ما اكدر كل كلامهم ما جاي اكدر اتقبله خلصت
الليالي واني بامل ينفتح الباب واطلع واركض لبيتنا ولاهلي شلون تهدا روحي شلون اروح بعيد عنهم
واني ما اعرف اي شيء عنهم..

-اشك قميصي هسه يعني اني شحجي بويه انتي تفهمين
علينا لو لا..

-شوفي بس خلي نطلع منا بستر الله وساعتها اني بنفسي
ادور عن اهلج وارجعج لحضنهم..

-هزيت راسي بالموافقه ما عندي حل ثاني الولد ابتلى بيه راسي صدع والرجال ما رجع استحي اروح امدد جان بصفي مخده سحبتها ومددت لميت روحي وعيوني تصب اصعب موقف ممكن يمر بي الانسان هو انو يبجي على حاله وتقل حيلته..

-راسي على المخدة وبس اريد اغفه ما اكدر خوف وتفكير مأخذ عقلي الخوف من المجهول شلون راح اروح ويا علي وإذا طلعت على بغداد شلون راح أعيش بدون اهلي الي مدمرني افراكهم  اني ماعندي  احد بغداد  غير خالتي وحتى عنوانها ماعندي  او ولا مرة زرنا بغداد صعبة كلش اكعد بيت ناس ماعرفهم ومنا اني صرت حمل ثقيل على ابنهم زين هم شنو موقفهم وشلون راح يتقبلوني تعب عقلي يارب انت الي تعيني وانت الي تخلصني من هالغم..

-ونوب ياخذني تفكير والقلق على بابا الي تلفونة مغلق اتصلت عليه لو بيتنا الي ماكدر اروحله لان دا..عش مسيطر على المنطقة الي احنا بيها  مااعرف شكد مر من الوقت ضليت افكر باهلي وبمصيري  تاخرت يلا نمت..

-فتحت عيني على صوت ونين والدنيا ليل حيل شكد
نمت كمت شغلت الضوه واسمع علي يون ويهذي
خليت ايدي على كصته حرارته كلش مرتفعه ضربت
على كصتي.. خرب بيج نورا شلون نسيتي من شفت
الدم كلت اشوف جرحه خطيه..

-ما اعرف شنو اسوي والناس نايمين ما اكدر اطلع افتر
وحدي هزيته.. علي تسمعني علي عفيه كوم..

-فتح عيونه بتعب.. ها شبيج منو وياج؟!..

-محد بس كوم جرحك بي دم ميصير يبقى هيج..

-نامي ما عليه شيء زحمه نكعد الناس من نومهم..

-اهو هم عناد كمت طلعت ورحت لغرفه شهد دكيت
الباب ونوب ما اكدر ادكه قوي فتحته على كيف وقلقه
هسه الي يكعد منهم عباله دا..عشيه وهجمت على بنتهم..

-شهد شهد عفيه كومي هزيتها حيل هي طفرت.. شكو
منو.. صحصحت ها حبي محتاجه شيء..

-اسفه كعدتج بس اخويه مجروح ويون من الالم عفيه
اريد مسكن اذا عندكم ومعقم..

-خطيه كومتها من نومها راحت للثلاجة طلعت كطن
ورجعت تدور على معقم مالكت تالي حمينه مي حار
شوي واخذته تشكرت منها ورجعت يم علي..

-مدد رجله وطلع جرحه الي ملتهب وحالته حاله مسحته بالمي الحار ورجعت لفيته اله من جديد وانطيته المسكن
رجله جانت محفوره بس همزين الرصاصه بس جارحه
المكان والا جان حتى تسمم ممكن صار بدمه الله يلعنهم
ما خلوا واحد بحاله..

-ما تخافين من الدم شمره ايدج مبينه متعلمه على هالسوالف..

-ابتسمت.. اي ممرضه اني وهواي مصادفة هيج حوادث واصعب وحتى حوادث الانفجا..رات..

-ميته كلوبنا احنا العراقيين وداعتج..

-صفنت على كلامه فعلا والله ميته كلوبنا من حرب
الحرب من ازمه لازمه اصلا تعلمنا على هالسوالف
وحتى طفلنا ما ينصدم بيها بعد..

-شلون تصوبت؟!..

-هجوم صار علينا والي استشهد والي كدر يبتعد عنهم
تالي ما كدرت ابتعد هواي ووكعت بينهم وجان هسه
اني معدوم لوما ابو تراب..

-الله يحفظكم وتخلصونا من شرهم هواي اكو بنات
يتاذون هناك هواي عالم جاي تروح بسببهم..

-وبعد هاي حرب مو لعبه وعدوج حاقد مو بس
طامع بس ولد حيدر علي والعراق موجودين وان شاء الله بالمرصاد الهم..

-وهيج مر كم يوم و احنا بيت ابو شهد الي كلمه الحق تقال ما قصروا ويانا بالعكس صاروا اهل النا بوكت الشده وهذا معروف الشيء عند العراقي الاصيل يفدي روحه لاخو وما يسأله انت منين لو انت سني لو شيعي لو ايزيدي لو مسيحي..

-من بعد هالكم يوم اجا علينا ابو شهد الي خبرنا بالليل
نطلع ومناك يذبنا قريب على كركوك وهناك يتلكونه جماعه علي..

-جنت صافنه بهالليله عيني ما اخذت نوم ابد وانتظر
ساعه الحسم حتى نطلع وابو شهد كل شوي وكال بعد
ودخلت شهد..

-اخوج وبابا يكولون هم يالله نطلع
حتى توصلون من وكت  والله ما ودي تروحين حبيتج كولش ان شاء الله توصلون بسلامة يارب..

-رفعت راسي للساعه جانت بالاربعه كمت وياها وطلعت غسلت وجهي اباوع على روحي شلون طلعت من بعدما سبحت البارحة وانطتني شهد ملابس من عدها احس جسمي جان بي طن من الوصخ من ورا دا..عش عدوهم النظافة بعدها صاحتني شهد حتى اتريك  كعدت بالمطبخ جانو مخلين اكل على الميز  كعدت ويا شهد الي كعدت ويايه تسويلي واهس والا هي لا تكعد ولا تأكل هيج وقت  بس كالت علمودج كعدت..

-حبيبتي مشكورة والله اني هم  ماكدر اكل بهيج وقت حجيتها لشهد وجانت أمها تحضر صينية اتوديها لعلي وأبو شهد التفتت عليه..

-حبيبتي وراج طريق ميصير لعد راح اسويلج لفات واخذيهم وياج وهااا قبل متروحين راح لبسي نقابج وعباية لان العين عليج وأنتي ما شاء الله ممقصر جمالج اخاف عليج منهم يمة  هسه انتم لو تقبلون وتبطلون عناد   وتبقون بعد كم يوم يمنه والله نخليكم بعيونا وحالج حال شهودة..

-رحت عليها وشبكتها ونزلت دمعتي بست رأسها فدوه خالة والله ذكرتيتي بحنان أمي الله يحفظك ما قصرتي ابد ماااعرف شلون اشكركم على وكفتكم ويانا والله خاله انتو على راسي ومراح أنسى  طيبكم  ابد بس والله لازم نرجع انتي بس ادعيلنا نرجع لاهلنا..

-من حجيت هالكلمة اتمنيت صدك الكه اهلي بنتظاري واشوفهم  وارجع الحضن أمي الي متلهفه عليه اتنهدت واستغفرت ربي ووكلته كل أموري..

ضربت على كتفي خفيف شهالحجي يمة الناس البعض يحليوة..

-بعدها ودعتهم وشكرتهم والله ناس قلة وجودهم بهالوكت وشهد انطتني رقمها بورقة حتى من نوصل اطمنها شكد رتاحيت يمهم الله يكثر من امثالهم وطلعت
سلمت على ابوهم الي اخذنا وانطلقنا ويا..

-وانطلق بينا ابو شهد وكلوبنا بيدنا كل صوت وكل
طسه تاخذ من حيلنا جان يفوت من الفروع ويدخل
بساتين بس حتى يضيعهم وصوت الرصاص يدوي
والهاونات وترجع تنعاد المشاهد المرعبه اغمض عيني
واريد بس نتجاوزهم اريد بس ابعد عن هالطريق..

علي..

-صعدنا ويا أبو شهد بعد ما ودعناهم مااعرف شلون اجازي هذا الشخص الطيب على وكفته ويانا توجهنا على طريق كركوك واني القلق مستحلني اخاف يلزمونه بسيطرة ويتعرفون علينه أنوب منا نورا الي صارت أمانة عندي
لو هذا الشخص الي برگبته عائلة اخاف يتورط بسببنا السيارة تمشي واني عيوني تشاهد بحزن الدمار الي خلفه التنظيم لو الشوارع الي شبه مهجورة و الجو تسوده كآبة موحشة استمرينا نمشي وهناك وجان
لمحنا سيطره الانذال لا بينا نرجع بعد ولا نتقدم واحدنا
صفن بوجه الثاني وجن رجع الغم خيم على كلوبنا....

يتبع....

حبايبي قلبي انتم النشر ان شاء الله  بين يوم ويوم
لا تنسون تعليقاتكم الي تشجعني..

اللهم صل على محمد وال محمد❤️