#مبرر_خيانة🔥
الكَاتِبة هَامِي ❤🥀
Part11
إنتقام 1🔥
شخص واحد يكسرك وباقي البشرية تدفع الثمن 💔
________________
وتوا شن يصير لو خربت الجواز هذا انت بتخطبني وعيلتنا توقف قصادها عادي ؟، حبك قوي لدرجة توقف قدام خوك وتقول نحبوا بعض ونبي ناخذها؟!
يعقوب رخى ايدي..
ماتخيرنش ارجوووكِ ، انتِ تعرفي مشاعر ياسين اتجاهك .... وامي وسراج وخالد موضوع صعب براء صععععب
قعدت ندف فيه نبيه يطلع
وليش جااااااااااي تقولي ماتخذش غيري اذا صعب عليك تختارني ليييييش ..شن هاا الأنانيه لعندك يااااخي ارحممممم شوي ياريتك ماااااااجيت ياااااريتني ماااااعرفت نذالتك وحقاااارتك وضعفك انااااااا... يلعن قلبي لحبك وقعد يستنى سنين على بابك حافظت على كل شي في بس عشان ربي يعطيك لي وفي الأخررررررر تقولي صعبببب املا لييييييش جاي شن تبيني .....
يعقوب يبكي ... حراااام عليك متظلمنش بوي ماااات براء وهو يوصي في نطلع الموضوع من راسي ومنجرحش خوي افهميني
-مسحت دموعي ورفعت ايدي لباب
اطلع برااااا يعقووووب اطلللللللع منبش نشوفك في حياااااتي ، انااااا كرهتك انا نلعن في ساعه لرفعت فيها تلفون ورديت عليك صوابعي ياريت نقطعوا ولا كتبت رقمك ااااااااطلع وملكش علاقه مع من بنكمل حياتي برررررا
وصل للباب. وهو يشوفلي وانا في عيوني شرارة الغضب🔥
متكرهنش براء انا وربي لخالقني مانبي غيرك متظلمنش
قربت منه ومشيت ايدي على وجه غمض عيونه
عارف ايدي هذي ؟ وعد مني ح تمشي على وجهه غيرك وعد مني يعقوب نحرق قلبك هذا " ضغطت بأصبعي اتجاه قلبه"
أنت لعطيتني مبرر الخيانه يعقوب كله بإيدك أنت
مسك ايدي باسها ودموعه نزلوا عليها
نعرفك مستحيل تكوني هكِ ، العيون البريئة هذي مستحيل تأذي
فكيت ايدي منه ..لا يعرفوا يعقوب زي ماعرفت نخلص ايك طول هالسنين نعرف نخون وعندي مبررات تسد عين الشمس منك ومن زمان ... بيني وبينك مات الكلام اطلعععع توا معش نبي نشووفك
التفت بيطلع بخذلان
-أاااه ، على فكره لأني مش قليلة خير في حد ساعدني واي حد ليه فضل علي يأخذه .. بما إنك ساعدتني في الماضي بدل مانتعرف على حد غيرك عرفتني عليك وحميتني من هند هههه شن تحب نعطيك المقابل يعقوب؟ شيك ولا كلمة شكرآ اطلع برا تكفي؟!!
يعقوب قرب مني يهدد بأصبعه ... ماتقولش كلام تندمي عليه
نزلته ايده ... مش ح تكون اكثر من ندمي على 7سنين ليعدو ...
طلع وطربق الباب ورا طحت على الأرض وانا نخبط على وجهي يمكن لكنت فيه حلم... يمكن كان من خيالي ... في حاجه تحرق في في نااار جواتي ...طلعت وانا مانشوفش في طريق ولا نسمع في لينادي في ....مشيت ....ومشيت ....ومشيت ،،،، منعرفش وين كنت نبي نوصل صوته في وذني كيف نطق كلمة منقدرش! كيف قال نحبك انتِ بس؟؟ بس مش ليك منقدرش نوقف قدامهم انا اضعف من هكِ...
عقلي يلوم وقلبي يعذر ...دوامة في عقلي وتهت فيها ...كل لصار معي قووواني الا كلامك يعقوب الا رخوتك بي انت كسرتني دمرت كل شي حلو وبرئ في انا اكيد اليوم متت....
طلعت في تاكسي للحوشنا فتحت الباب بعيون مضببه من البكى ورااااسي بينفجر من كل شي..... ماشيه لداري وسالمه وراي تتكلم منعرفش في شن تقول خشيت دار صكرت على وجها .... حطيت ايدي على راسي من الألم ...طلعت ندوش تعبااااانه جسمي كأنه هارستني سياره كل مافي ميت ....
تحت دش بكيت وكأني عمري مابكيت الوجع لحسيتا كان اول مره نذوقه ... الميه لتنزل تغسل في أفكاري قبل ماتغسل جسمي حلفت بيني وبين نفسي وانا نمسح في دموعي ونشوف في المرايه هذن آخر دموع ح ينزلن عليك يعقوب واااعد ما في راجل ينزل دموعي وديني لا إنتقامي منكم ح يكون دم دمار لكل ذكر كرهني في حياتي من بوي ... خالد ... مهند لي يعقوب .... وغيرهم ... يومها شفت في المرايه بنت اخره مش براء تأكدت وقتها انه لمقدروش يهدو عيلتي هده يعقوب نهى كل الخير لي جواتي ...
__________
خشيت لدار لحقتني وانا نمسح في شعري ..
سالمه :: كنك انتِ من اول ماروحتي وحالتك حاله ونحكوا معاك متردش
عزقت المنشف ورديت عليها
نعم شنو في احكي مطالبك كلعاده؟؟!
سالمه:: وكنك تعاركي .. هذا بوك وهذوم خوتك مش طلباتي وحدي
ضحكت .. هو انا الأخت الوحيده وانا منندرش ولا شني ؟ وبوي هذا راجلك وانتِ اوله مني حبيبتي انك تراعي وتهتمي بيه املا علاش اجوز ؟!
سالمه بصدمه... كنك اليوم ايش جد عليك ولا عشان جايك عريس فلووس شفتي روحك علينا
-اطلعي برا انتِ وتخاريفك هذن انا مش بحاجه لا راجل ولا فلوسه .. والله تنعطالي جائزه نوبل لتحملت قرفكم طول هاالسنين
سالمه:: بلا دوا فارغه وعطيني فلوس نوصي على حاجات للأولاد وانا نبي ندير تحليل الغده متع كل شهر
قعدت نمشط في شعري ...
وانا شن دخلني بيك وبعيالك! عندك راجل عدي اطلبي منه وبعدين تعالي نقولك عيالك كبار مش صغار على شغل هم مش خير من خالد وعبدالسلام لبطلوا من قرايتهم واشتغلوا واصرفوا على ارواحهم ربي عيالك حبيبتي وهو انا لقتلك اضنيهم !؟
نظرتلي بغل وطلعت خبطت الباب ...
عزقت المشط ورفعت موبايلي نتصل بِ هديل ..
الو هديل
هديل:: وينك انتِ مشفتكش لما طلعتي كيف روحتي من غير ما تقوليلي
-اووف هديل مش وقت اسئلتك وقولي بكره في رحلة ولا ولأ
هديل:: لا مفش ممكن نهاية الأسبوع....
فتحت سالمه الباب عزقت دبش
وهذا يلي تفلسفي دبش خوتك نوضي اغسلي
-ماشي دولي بكره نكلمك ...صكرت من هديل ،،
وانتِ قصدك بحركاتك هذن تبيني نرد نحن عليكم لا وراسك اغسليهم .. لا ياروحي بلعكس زدتي اثبتيلي قد شني انتِ كلبة فلوس
لميت دبش وازيتهم بِ الألوان عشان نغسل وسالمه تحرق🔥
طلعت ندور اذا في حاجات اخره مسخه ليهم فتحت دولاب خالد لقيتا منكت على بعضه ماعرفت نظيفه من المسخه الا من ريحه ....
تلمست حاجه في اخر دولاب طلعتها كان سلاح نصدمت من امتا عنده سلاح وشن يدير بيه؟؟ زدت ندور اخره لقيت ثلاثه اخره واحجام يختلفوا ؟!!!
زعما يبيع فيهن ؟ يعني يتاجر ولا شن قصته !! رديتهن مكانهن وطلعت نكمل في الغسل وانا نفكر فتشت جيوبه لقيت ورقه وهنا كانت الصدمه......💔
❤❤❤الكَاتِبة هَامِي ❤❤❤
بعد أيام في اليونان🔥
لبست سروال قماش ابيض على بلوزه زهريه ...
حطيت عدسات انستازيا وميك أب خفيف دكنت الروج من ماك ولبست شنطه من شانيل وبخيت عطري من جادور ...
حطيت وشاحي مخربش ولبست كندره كعب وطلعت...
قعدت في كافي ...طلبت نسكافيه وماكرون وفي ايدي تاب نشوف في مسجات على ايميلي الوهمي..
طولتي الغيبه
حتى لو مسافره مفش نت لي مكان لوصلتيله
نور ردي
وينك ؟؟
صباح الخير استاذ عمر 🌷
صباح النور متابعتي الجميلة❤
وين الغياب😞
-🙈من ذوقك ... اممم مشااغل 😄
ممكن نعرف شن لشاغلك ؟،، نور مش من توا نعرفك ودائماً نتناقشوا في الكتب والقِرأه لكن عمرك ماهدرزتيلي على نفسك
-مفش مناسبه ولا في اهميه ... عمر مشغوله توا بنسكر ونحكوا بعدين مش ناسيه روايتك جديده وح نتناقش معاك فيها
سلام
_________
هديل قعدت جنبي
لتوا ماقلتيلاش اسمك مااقوااك من تقدر تقاوم أشهر كاتب ليبي عمر الوااافي واووو على كتباته واشعاااره يجننوا ولا عيونه نعليي من جمالوا طرف ياناس تحلفي عليه طلياني😍🔥 ...بالحق امه بريطانيه هك سمعت😳
- واووو عليك صرعتيني بيه شني انا هبله بنعاود الغلط لدرتا مع يعقوب من سنين ونفضح بروحي ونقول اسمي وشغلي وهو قادر يعرفني كم مره مشينا في نفس رحله ولا مره شافني هههه
قعدت نشرب في نسكافيه ونراسل في🔥🔥
هديل :: متبش تفتحي موبايلك من وقت لهربتي لتوا صرعني خواتك مكلمات
-لا مزال مش توا في عقلي موال بنغنيه هههه
هديل:: اخخخخ وخلاص ربي يستر من مواويلك ، غير كيف بتواجهيهم بس بعد لصار
- وانا شن دخلني بلصار كل من زرع حصد ،، غير قوليلي حصلتيلي لقتلك عليها
هديل:: ااااه بخصوص البنت قاعده جاهزه امتا ماتبيها تجيك
-والصور؟؟
هديل:: اتفقت مع صاحبتها تبعثهم لي اليوم شوي ويوصلوني وتستلمي نهاية لدمرت حياتك حبي🔥
-تمام بكل ،،
هديل:: شن مقرره ديري أول ماترجعي
-توا نقولك ........
________________
بعد ما خططت لكل شي قضيت عطلتي وماكلمتش عيلتي نهائي ...طلعت المزين قصيت شعري غيرت لونه لي بني غامق درت لمسات ولوك جديد طلعت على مولات نتسوق ماخليت في خاطري شي سنين وانا نخدم عمري مافرحت روحي حتى بي صنه عطر ناخذ ونعطي فيهم وحارمه نفسي لكن توا مشيت على كلام عبدالسلام لما قالي أهتمي بنفسك يابراء ... اي فكره او لحظه ضعف تمر على خيالي نهز راسي ننفيها ونتخيل منظر خالد وهو يتجرجر ويبكي يترجا في ننقذه من مصيبه لحط نفسه فيها... نبتسم قد شني حلو الأنتقام! حلو تشوف الإنسان لذلك وقتل روحك باالتعذيب زرع فيك الخوف وخلا نفسك غير سويه منهااار قدامك مذبوح عند رجلك انا قطعت عرق دم لبينا متقولش لأ حرام هذا خوك !...
______________
رجعت ليبيا طلعت من المطار للكافي لكان موعدي مع إنتقامي من لدمرت حياتي .... كنت باعثه صور لجوزها وقتله ح يلاقيها في الكافي مع لتخون فيك معه
خليت شناطي السفر في سياره هديل ونزلنا قعدنا في طاوله مقابلينها شفت صاحبتها لي متفقين معها صبت من جنبها وجا الشاب لمتفقه معه يسأل فيها على مكان مع خشت راجلها شافها واقفه معه وهووووب خشت في بعضها 🔥
شفتها تبررله ان مش زي مافهم كان في ايده الموبايل لي فيه صور محادثاتهم كل الأدله ضدها ضربها كف رمى عليها طلاق وطلع قعدت تبكي خذيت مناديل ومشيتلها
تؤتؤتؤ ماعاش من ينزل دموعك هنوده خوذي امسحيهم
رفعت راسها على شوي ماكنتش عرفتني
أنتييييي ....
-براء حبيبتي ايوااا انا براء منكش واهمه ليش تبكي هنودا منظرك بايخ قدام الناس كيف ضربك راجلك هكِ خزي عليه عطي دا ان شاء لله وكسره في ايده 🙊🙁
هند صبت :: انتِ صح انتِ والحقيره سُكينه متفقات علي ...
دفيتها تقعد على كرسي
هششششش اهدي نحنا في مكان عام سااادك فضايح اليوم ... باهي قوليلي هند شن طعمته الظلم حلو ولا مر؟؟
هند.......
-جااااااااااااااااااوبي قووووليلي ياااااصاحبتي يلي درتك اختييييي في هذك زمااااان شنو طعمتها خيانة الصحبه هااااا؟؟؟؟ شنوووو ؟؟؟ صعبه صح وااااعره بكل تحلفي وتبكي وتترجي وتقولي مش انا لدرت هكِ والله ماااأناااا ولقدامك مايصدقش💔 ظلم واعر هند وداااار الزمان وجربتيه
جيت بنمشي رجعتلها
قبل نسيت على فكره حتى هو خاين را وهذن محادثات بينا وفي حتى تسجيلات صوت يعني انتوا اثنين طنجره ولقت غطاها فعلاً شابووووا لي اختياركم لبعض 👏
هند :: براء ارجوووووك اسمعي لصار كان في الماضي متخربش بيتي توا يحكي لي اهلي واهله وموضوع يكبر
-وانااااا شنو هااا شنو طول هاالسنين وانا عااايشه نبرر لناس اني شريفه بسببك انتِ بسبب وساختك عشت نبرر في ذنب انا ماارتكبتش تمشي تنحرقي ميهمنش عيشي شوي من لعشته متخفش انتِ وحده رخيصه ومكثرهم رخاص لي زيك توا تلاقي لي يلمك 🔥
لبست نظراتي وطلعت خليتها تترجى وتبكي تنقهر وتنكسر وكل لعشتا بسببك عشتي اليوم ياهند بردت على شوي شوفتك بِ الحاله هذي وياريت لو بإيدي اكثر...😏
_____________
ركبت السياره فكيت شفره لكنت نراسل بيها راجل هند وكسرتها فتحت روشن عزقتها ........
وصلتني هديل للحوش نزلت شناطي فتحت باب ....
كانوا أمي خواتي واولادهم وكلها لامه......
فتحيه:: الحمدالله على سلامه باهي لذكرتي انه عندك عيله
امي تهجمت علي:: وين كنتي ياضااااله وييييين طول هااالمده مختفيه الله لا تربحك حشمتينا قدام راجل هربتي من عرسك
-بعددددي هك عرس شن لتحكي عليه هذا لي همك انتِ؟؟؟؟ العريس االريتش بس لي همك باهي وين ولدك ياااامي وين خاااالد هاااا قووووليلي؟؟؟ ولا هذا بخخخخ نبي نعرف بس ليش خلفتينا ليييييش جبتينا على أم دنيا هذي اذا انتِ مش قد الضنوه تضني ليش وتعزقي تعرفي انتِ ماتفرقش عن الأمهات ليعزقن في صغارهن على فكره مفش اي نووووع من الفرق بينه وبين ضنوة الحراااام تعرفي خااالد انا لبلغت عليه وخليتهم يجرجرو زي الكلب زي ماكان يجرجر في من شعري لتقطع على يديه غدرت بيه زي مااااغدر بي وغرس سكين في بطني معلم لتوااااا ومززززززال يااامي مزااال الحبل على الجرار عند مانحرقكم كلكم🔥
ضربتني كف ...
الله يلعنك ياكلبه تحبسي خوك هذي اخرتها ياوسخه
-بعدي هك على اساس هامك ماهو بسببك ولدك ....
شفت بوي يجر في كروسته يتفرج علينا
ليش تشوف؟ على اساس انت برئ يعني من ذنب ولدك تعرف شنو جريمة ولدك ؟؟
فتحيه تصكر في فمي وفريحه تجر في لدار خششتني جوا
فتحيه:: براء هذا شنو لي ديري فيه انا قعدت نخاف منك مش هذي اختي شن لقاعد يصير
فريحه:: انتِ وين كنتي وشن قصه خالد مره هذي ؟؟
خشت امي
-يييييي علينا شكلها الحفله مزال ماتمت شنو بتقولي اخره ولا تضربيني احسن ؟؟
امي:: صكري فمك واحترميني نا أمك سااد فضايح لدرتيهن لمي روحك احسنلك شن تسحابي روحك جايه من شارع
-والله ياريت شارع ارحم منكم
امي :: يابت.......
فريحه:: خلاص يااامي خليها تهدا توا نحكوا معها
امي:: فهمنها انها مش صغيره انه العالم تسهري انها عنست انها طلوعها هذا جابلنا سهاري ماشور شي اجوووزي ولمي روووحك الستره كويسه هذا كان لقيتي لي يرضا بيك
تراا بعدي هك فتحيه بنقولها حاجه ،،
توا االعالم لحكت هذي راا هي نفسها حكت عليك لما خليتينا اطفاااال !! وهم نفسهم حكوا علينا وقالوا علينا هذن بنات المطلقه ولي يجي يتقدم يوخر لما يسمع انه امنا طلقت وخلتنا وانه هلنا سمعتهم تعر .... وانا كان نجوز شن بنعطي راااجلي يااامي شن نعطي هااا قوليلي فم حااار مازال يتلذع من فلفل ؟؟؟
رفعت تيشرت " ولا بطن مغروس فيها سكين ولا جسم متشوه بنيران وكارهه اي راجل يلمسه من قذاااارت ولد راجلك ليتحرش بي وانا طفله انا كرهت جسمي ...ولا انسانه نفسيتها مهزوزه قلبها ينبض بدون احساس روحها شاحبه ميته كل ذكرياتها جحيم وبعد نجيب صغار ياااأمي شن نعطيهم قوليلي ياااامي على شنو نربيهم انا انسانه كل مافيني محطم كيف تطلبي مني نزرع جيناتي في ناس اخره ونهد البشريه معي امي انتي خلفتي اطفال غير سويين الكبير متسلط يتلذذ بتعذيب الناس يبي يسيطر طاغي متعجرف ولبعده عاش مدمن ومات مدمن عاجبتك نهايته؟؟ وفريحه ورثت كل شي منك ماهو مسكينه مش منها هذا عيب جينات مايفهموش هذي وراثه سلبيه ولا ايجابيه فتحيه تتحمل في الأمرين من راجلها وذرتها عشان متكونش زيك وتخلي صغارها لانها ملقيتش سند يوم لجت لعند بوي مجروحه تبي من يكون سندهامشى ردها لي راجلها زااااد كسرتها ولا انا هههه انا مش طبيعيه في شي منعرفش ليش عايشه لتوا وعليش عايشه شن وظيفتي انا خير ولا شر انا ضحيه ولا مجرمه ؟؟ ولا يحي وعلاء يااامي لربيتهم انا في كل موقف يصير ينقلبوا ضدي تطلع غريزة الذكوره فيهم علي اختهم لضيعت شبابها تشتغل وتوكل فيهم نحنا حتى مابينش ثقه عن اي ناس وعن اي جواز تحكي بس!!!
طلعت امي بدون ماتحكي كلمه.... تعرفوا كل كلامي قلته ومنزلتلش ولا دمعه انا كل لجواتي من دموع ومن خوف تحول لحقد وكره ......
كل بلاد نسافر ليها نقول ليش نروح ليبيا خلني وحدي هنا نخدم في سفاره ونعيش مرتاحه من مشاكل وحياتي لمش مفهومه كلها عقد.....
فتحيه:: الله يربحك اصحي ديريها ...براء كنك من يومنا هذي حياتنا والحمدالله توا خير من قبل
-صح الحمدالله توا خير من قبل .... رن فوني كانت
-ايوا هديل شنو صار
هديل:: البنت جاهزه وتوا قاعده معها امتا تبيها
-خلها تستعد الايام هذي ح تكون عروسه ههههه
_________
دوشت ودهنت جسمي وفتحت نت لقيت مسجات من الكاتب عمر الوافي نفس كلام وين غبتي قريتي الكتاب جديد شوفي الخواطر لكتبتهن وهكذاااا....
عمر الوافي تعرفت عليه من كم شهر على فيس لأني نقرا في خواطر وروايات تعرفنا في قروب كان ينزل فيه وانا من كثر مانقرا قعد عندي حب النقد ومن هنا تعرفت عليه معروف عنه انه مغرور ونسونجي وووو يعني باللنسبه لي كاتب نحب حروفه لا أكثر ... يحكيلي في حاجات عنه وعن بنته كيف تم انفصاله لكن عني انا مايعرف شي نهائي كل لي عطيتا له وهمي
رديت على مسجاته وهدرزنا شوي ... وصلي مسج على فوني من رقم غريب
عظم الله اجرك براء بكره جاينكم سامحيني طولت عليك بس تعرفي كنت في صحراء ...
شفت المسج ومسحته لثواني يبن ياخذني ذكريات وفعلاً تعكر جوي لما ذكريات وصلن لليوم هذك💔
استأذنت من عمر وصكرت نت ورقدت على مخدتي دموعي ينزلوا بدون صوت بدون احساس بدون رغبه ومنعرفش ليش نزلن!!
انا مش قتلكن ماعاد تبكن عليه..؟
_______________
ثاني يوم نضت ادوشت وطلعت حاجه جديده نلبسها ...
اتصل مهند......
ابتسمت فتحت الخط
اهلين ...
مهند:: الأخبار عندك مش كلمتيني قتيلي عروستك على حسابي
-اكيييد يااابرو عليا لو مانجوز خوي نجوز من
مهند:: خلاص معنها نتلاقوا ونتعرف عليها😍
صكرت الخط تفلت عليه ولعنته ....
خشت علي فتحيه وانا نحط في عطري
عيت عمي صافي برا جايبين غدا اطلعي سلمي عليهم
مقدرتش نصبي قعدت على كرسي وانا حاسه اني دخت ليش كلهم ؟ يعني هو معاهم يااارب ماا يكون معاهم ...
فتحيه:: صبي حتى هو قاعد ماعندك من ايش تهربي حتى هو فرحه قريب
رفعت راسي فيها بصدمه
ان شاء لله ينحرق ميهمنش ...اطلعي انتِ وانا توا نلحقك
طلعت فتحيه زدت رشيت عطر ضحكت للمرايه
انتِ بخير براء وتقدري ديريها قوي روحك ....خذيت نفس وطلعت....
كانوا كلهم في صاله بما انه متعودين على بعضنا ....
سلمت عليهن وانا نتصنع في الضحك كنت ممثلة عن جداره عكس النيران لجواتي ....
وصلت لي ياسين حضنته وسلمنا بلخد تعمدت نشوف ردت فعله🔥
طلعنا المطبخ انا وسلوى كانت مخطوبه لي واحد كان دكتورها في كليه قبل ماتتخرج ...طول الوقت تحكي عليه وانا مش مركزه معها.... تغدينا وقعدنا نهدرزوا ...
عمتي نوريه:: قبل سمعنا براء تبي تجوز خالد قاللنا قبل ماينحبس
رفعت عيوني فيه ...
ااااها ياعمتي قبل ماصار نصيب معه تعرفي مجايب خالد مكنتش نعرفه رفضت بس توا متقدملي رجل أعمال معروف وكويس عمي وافق وقريب نحددو العرس ان شاء لله انتوا اول معزومين
ياسين:: عرس شني براء؟؟
انا مع ابتسامه ...عرسي ياسين كنك نسيت انه كبرنا ولازم نتجوزو ولا شنو هههه
يعقوب......
#يتبع🔥🔥
الحلقه جايه إنتقام 2🔥🔥
شن جريمة خالد وكيف ح تكون جزاته؟؟
برأيكم هند ح ترد على انتقام براء؟؟🔥
من عمر وهل يكون ليه دور في روايتنا؟؟
وكيف ح يكون انتقام براء من مهند ؟!🔥
من عريس براء وشن ردت فعل يعقوب وياسين 😱
تعليقاتكم وتوقعاتكم ولجاي كله 🔥🔥
توا نشوف تفاعلكم اذا تبوا بارت اخره❤