#مياس_قلب_الشهم
للكاتبه #لبنى_الموسوي
اجيتك ، وآنه اجيلك من تغِثني الناس ❤
بيوم عرس جهاد گعدت من الصبح على صوت موبايلي وهلاهل النسوان
رفعت راسي بالگوه باوعت للساعه بعدها بثمانيه .. شلت الموبايل من الميز شفت ماهر ديتصل فتحت الخط بسرعه
شهم.. ها ماهر
ماهر.. صباح الخير
شهم.. صباح النور
بشر اكو خبر عن هذا الكلب
ماهر.. لا والله لحد الأن ماكو اي خبر عنه
بس وين يروح نلزمه اول وتالي بس اصبرلي شويه
شهم.. شصبر يا ماهر
عرس جهاد اليوم وما اعرف ليش گلبي لاعب منه
خايف ليخرب الفرحه علينه ادري بي ناقص ويسويها
ماهر.. لا يمعود شيريد يسوي قابل
ع العموم اني وجماعتي يمك لتشيل هم الشي
شهم.. تجي للغده مو
ماهر.. ما اعرف عندي شغل مهم لذالك اتصلت ابلغك
اذا ما اجيت ع الغده فأكيد اعوضها بالزفه المهم متزعل عليه
شهم.. لا حبيبي وليش ازعل
انت هم معذور شغلك الفوگ راسك
بس اتمنى تجي .. حاول الخاطر الخوه
ماهر.. من عيوني عضيدي
شهم.. تسلم عيونك خويي
يلا اخذ راحتك
سديت الخط وگمت بوجهي للحمام .. غسلت وطلعت ادور على ملابسي تذكرت گلت المنال تكويهن يمكن ظلن يمها
نزلت جوه محد اكو بس امي بالصاله
شهم..صباح الخير حجيه
الحجيه.. يسعدلي صباحك وليدي
شهم.. وينهم شو ماكو
الحجيه.. جهاد بغرفته
ورنا دتريگ جهالها ورجلها بالمطبخ
ومنال وسمر ومياس بالغرفه ديجهزن نفسهن للعرس
شهم.. بيا غرفه ؟؟
الحجيه.. بغرفة سمر
شهم.. ها خوش
عفتها ورحت الغرفة منال اخذ ملابسي .. فتحت الباب بسرعه لأن مأمن ماكو احد وچان انصدم بهذاك المنظر
مياس گاعده بلا ملابس تقريبا ومدري شدتسويلها منال
ما عرفت شسوي من الارتباك .. ويا طبتي گمزت هي
هالدور الموقف زاد سوء اكثر واكثر
درت وجهي دا اطلع چان انضرب بالباب ضربه تسوه كل عمري
شهم.. لزمت راسي : ااااخ بويه راسيييييي
منال.. اسم الله خويه شجاك ههههه
شهم.. حجيييييييه
شگول عليچ هسه
اني مو سألتچ وينهم گلتي بغرفة سمر
الحجيه.. من بعيد : واني شدراني عبالي بغرفة سمر لان شفت مياس طبت بيها قبل شويه
مياس.. اريد البس ملابسي بعد ما اندلهن وين
باوعتله داير وجها صحت المنال بسرعه : منااال ناوشيني التراك رحمه الدينچ
منال.. شجاكم نثولتو ثنينكم
هذا وينه يمچ اخذي احد لازمچ
شهم.. يمعوده ناوشيني ملابسي اريد اولي
منال.. طب اخذهن خويه ايدي مدمره
شهم.. صدگ تحچين ؟!!
منال.. شكو بيها
ترى هاي مرتك لتزودها عاد
شهم.. مياس گومي ناوشيني ملابسي
ردت اگوم جرتني من ايدي گعدتني بسرعه واخذت بدي التراك مني
ظليت بس بالبجامه والفانيله الداخليه
منال.. خويه مياس هم اديها مدمره اذا ناوشتهن الك راح ينعدمن فطب انت اخذهن احسنلك
شهم.. لا أله إلا الله
شلون ويا هاليوم شلعان گلب من اوله
طفرت منال ع السريع .. سحبت ملابس شهم خلتهن بصفي
باوعتله واگف وداير ظهره يمكن ياخذ خيره يطب لولا اخير شي دخل بس وجها بالگاع
شهم.. وين ملابسي فضيني
منال.. هذني بصف مياس
رفع راسه دياخذهن انصدم من شافني بنفس المنظر تقريباً .. دنگ اخذهن وطلع ع السريع
حسيت بروحي صخنت من الخجل
مياس.. ليش هيچ منال ؟؟ والله عيب السويتي
منال.. كرمينه بسكوتچ
خلي شويه يحس بأنوثتچ حتى تتحرك مشاعره الچ
گمت قفلت الباب ورجعت يمها .. بدت تشتغل بيه بس الدمعه بطرف عيني لأن الموقف الصار چان صعب عليه كلش
قريب الساعه يلا خلصنه .. لبست ملابسي وطلعت اتلفت اخاف اشوف شهم مره ثانيه لأن خجلانه احط عيني بعينه بعد الصار
مياس.. خاله وين شهم ؟؟
الحجيه.. غير ملابسه وطلع حتى ما قبل يتريگ
مياس.. ها زين
رحت اركض الغرفتي اول ما طبيت حست نونه .. شلتها ابوس بيها مثل عادتي كل يوم
غيرتلها وسويتلها الممه وانطيتها للحجيه حتى اغسل
طلعت من الحمام اباوع النفسي بالمرايه حيل متغيره لأن صارلي فتره ممسويه وجهي .. نشفت شعري ورحت السمر حتى نجهز نفسنه
ساعه والبيت انترس بلاقارب .. ظليت يمها بالغرفه لحد ما صار العصر
منال.. مياس امشي بدلي البنتچ حتى امكيجچ قبل لا اطلع للقاعه
وانتي عود سوي شعرچ لأن ما الحگ بعد
مياس.. ميحتاج انتي مشغوله
سمر تعرف تمكيجني .. حتى شوفي مكياجها شلون حلو
منال.. لا اني اسوي
ما عندي شي هسه الحگ ارتبچ
طلعت من يمها شفت نونه بحضن بيبيتها ام امها .. سلمت عليهم واخذتها الغرفتي ابدل الها
طبعا اني اشتريتلها نفس بدلتي بيضه وقصيره والحذاء ابيض مطعم بأحمر .. لبستها ورجعت للصاله انطيتها الهم ورحت المنال مكيجتني
اول ما خلصت باوعت الروحي بالمرايه .. تفاجأت من شكلي طالعه ولا العرايس
درت وجهي على منال مصدومه
مياس.. هاي شنو منال
والله ممصدگه شغلچ حلو الهل درجه
منال.. ههههه لعد شحسبالچ
يلا رايحه اني الباقي عليچن
سوينه شعرنه وطلعنه بالملابس العاديه لأن ملابس الحفله قصيرات
لذالك قررنه اني وسمر بالقاعه نبدل حتى لنتبهذل بالطريق
اجت السيارات علينه .. وصلنه للقاعه بوجهنا الغرفة التبديل
غيرنه البدلات ورتبنه نفسنه اني وسمر ورنا
شويه وبدن البنات من الاقارب يجن يعدلن بنفسهن ويانه
سمر.. ميوس طلعتي فد شي وربي
مياس.. هههه وانتي طلعتي كيكه
كون يشوفچ هذاك الرجال بهذا المنظر .. وغمزتلها
خجلت ودنگت بلا متجاوب .. لزمت ايدها وطلعنه لأن اختنگت من هوسة الغرفه
اول ما فتحت الباب صارت ام يوسف گدامي لأن گاعده مقابيل الغرفه .. ابتسمت النه من بعيد
اخذت سمر ورحتلها
مياس.. اسفه خاله طول اليوم نونه عليچ تعبناچ ويانه
ام يوسف.. شتحچين يمه غير هاي بنيتي
بعدين تعالن گلنلي شنو هالجمال هذا
اللهم صلِ على محمد وآل محمد
مياس.. ابتسمتلها بخجل : شكرا خاله
قنصتها تعاين السمر طرت فرح .. اخذت نونه وشاورت سمر حتى تگعد يمها شويه والحمد لله من سمعت كلامي
رحت ادور على منال
اباوع للنسوان عيونهن عليه لدرجة تقيدت وحسيت اكو شي مو تمام بالموضوع
شفت منال من بعيد رحتلها ع السريع
منال.. يمه فدوه للبنوته وامها
شطالعات ولچن مثل السيت هههه
مياس.. ههههه والله عليچ سوالف
اگول شبيهن النسوان يباوعنلي ؟ بيه شي ؟!!
منال.. حقهن يباوعن انتي شفتي نفسچ شلون طالعه
عسل وروحه الابويه
مياس.. ههههه ماكو عسل غيرچ
شوكت تجي العروس شو تأخرت ؟
منال.. هسه على جيه
خابرتهم بالطريق ديجون
بهلاثناء انفتحت الباب وطبن تبارك وخواتها .. ركضت لغرفة التبديل انتظرها هناك
ثواني وطبت للغرفه .. بس شافتني ابتسمت واجت ع السريع حضنتني
مياس.. عمريييي
فدوه لله طالعه تخبلين
تبارك.. وانتي هم حياتي
ظلي يمي لترحين عفيه ترى خايفه كلش
مياس.. ميخالف خلي انطي نونه البيبيتها وارجعلچ
تبارك.. انتظرچ لتتأخرين فدوه
مياس.. من عيوني
رحت وديت نونه لأم يوسف ورجعت لتبارك اساعدها
صورنه كومه صور ورگصنه وغنينه لحد ما راح حيلنه
مر الوقت بسرعه حتى ما حسينه بي شلون مر من گد ما تونسنه بيومها
اجه جهاد لبسها الذهب وگصوا الكيك سوه بس شنو خربت من الضحك علي لأن چان خجلان كلش بحيث وگع الكيكه على بدلتها وحتى ببسي ما گدر يشربها من الارتباك
صار وقت الزفه وانخبصنه خبص .. شلت هم النونه راح تنمرد اذا اخذتها ويايه
اخير شي قررت ارجع للبيت علمود لا تتبهذل المسكينه خصوصا صارت نحسه لأن نعست
ام يوسف.. ها يمه مياس ليش واگفه هنا
روحي بدلي راح تجي الزفه
مياس.. لا خاله ما اروح اني
خطيه نونه تنحست كلش مو مال ابهذلها ويايه
بس منتظره اشوف احد يرجعني للبيت
ام يوسف.. لا شنو هالحچي
انطينياها عنچ وروحي لبسي .. اني راح ارجع للبيت واخذها ويايه
مياس.. ليش مترحين للزفه ؟!!
ام يوسف.. اي مالي خلگ يمه
مياس.. اذا علمودي مو مهم والله
ام يوسف.. لا بنيتي مو علمودچ
اني تعبت واريد ارجع ارتاح .. جيبيها وروحي بدلي بسرعه قبل ليجون الزلم
مياس.. ماشي خاله
راح اجيبلچ جنطتها تلگين الحليب والممه بيها
الله عليچ اذا بچت خابريني اعوف الزفه وارجعلها بأي طريقه
ام يوسف.. الله ينطيچ العافيه حبيبتي
ما غلطت نهى الله يرحمها من وصت انتي تربيها
اثاريها تعرف بيچ طيبه وراح تصيرلها ام واكثر
مياس.. بنتي هاي خاله .. قطعه من روحي وگلبي
ام يوسف.. الله يخليچ الها وينطيچ على گد نيتچ الطيبه
مياس.. رحم الله والديچ
رحت جبت جنطت نونه اخذتها وراحت بسرعه قبل لتصير الهوسه
رحت لبست بنطرون اسود وسويتر اصفر طويل للركبه بس ما مسحت المكياج
اجت الزفه .. طب ابو تبارك سلمها الجهاد وطلعوا
ظليت ادور على سمر بالگوه يلا لگيتها من الخبصه
مياس.. سمررر
سمر.. هاي وينچ صارلي ساعه ادور عليچ
مياس.. واني هم والله
اگلچ ويامن نروح ويا شهم لو شنو ؟؟
سمر.. لا ولچ خالي يزف جهاد
مياس.. لعد
سمر.. امشي خلي نلحگ على خالي ايهاب قبل لا يحجزوا هههه
مياس.. يلا يمعوده مو وكت ضحك
طلعنه ع السريع شفنه الزلم مجتمعين گدام باب القاعه
لمحنه ايهاب من بعيد .. رحناله ع السريع
سمر.. خالو عندك مجال نروح وياك
ايهاب.. لا خالو رنا وخواتها كلهم ويايه
سمر.. لعد شلون
ايهاب.. اصعدوا بالكوسترات
سمر.. اي هسه اشوف
ايهاب.. لتظلون تفترون
اذا ما لگيتوا مكان وياهم روحوا الشهم يشوفلكم واحد من الولد قبل لتتحرك الزفه
سمر.. ان شاء الله
رجعنه لباب القاعه لمحنه شهم من بعيد .. اول ما شافنه خزرنه مدري ليش
تقرب النه ع السريع .. ظليت صافنه علي حسبالك هو العريس لابس قاط اسود وطالع يخبل علي
شهم.. ليش دتفترن بنص الزلم
سمر.. خالو باوع الكوسترات مليانه نسوان
وخالو ايهاب ويا مرته وخواتها .. احنه ويامن نروح لعد ؟؟
شهم.. چان اجيتن وگلتلي بدل هالمعمعه هاي
بعدين شنو هالمنظر الدا اشوفچن بي ؟!!
ما عرفتن تمسحن المكياج قبل لتطلعن
ما جاوبنا شي حتى ليعصب زايد .. صاح على يوسف من بعيد اجه بسرعه
يوسف.. ها شهم
شهم.. منو يصعد وياك بالسياره
يوسف.. لحد الأن ماكو احد
شهم.. زين لعد اخذ سمر ومياس وياك
ما اوصيك عليهم بعد
يوسف.. لتوصي حريص خويه
رحنه صعدنه ويا يوسف اني وسمر وثنين من خواته هم اجن ويانه
بدت الزفه والجو احترگ بوقتها .. اعاين على يوسف مخبل بالسياقه والمشكله حاط گوره من گور شهم
مياس.. يوسف عفيه لتسوي بينه حادث
يوسف.. لتخافين
انتي تونسي وعوفي الباقي عليه
دغيت سمر حتى تحچي ويا .. عاينتلي واشرت براسها بمعنى لا
گرصتها حيل چان تعيط وتفضحنه
يوسف.. هاي شكو
شبيچ سمر
سمر.. ما ادري يمكن گرصني زنبور
مياس.. كتمت الضحكه بالگوه : سوده عليه منين اجاچ هذا ؟!!
هسه وكته
يوسف.. انتي متأكده
لأن اذا صدگ راح تتأذين من گرصته
سمر.. لا ممتأكده
صف السياره ونزل ع السريع .. فتح الباب واشر السمر تنزل بس شنو اني اريد اغص إلا شويه
يوسف.. انفضي ملابسچ وشوفي المكان الحسيته بي ألم خو ممورم
سمر.. ظلت تنفض بملابسها : لا لا كلشي ما بي يجوز حشره عاديه
يوسف.. يلا صعدي لعد
صعدت ورجع شغل السياره .. ساق بسرعه حتى يلحگهم
الطريق كله سمر تباوعله بس هو ملتهي ويا جماعته لحد ما وگف فجأه
سمر.. شو وگفت ؟!
يوسف.. نرگص العريس ونرجع نتحرك
نزل وظلينه بالسياره ننتظره
شويه وسمعنه صوت اطلاق نار كلش قوي وقريب بنفس الوقت
فتحنه الباب ونزلنه ركض
باوعت للشارع مخبوص
الزلم تركض بسرعه والكل يصيحون تصوب تصوب تصوب
گمت ادور عليهم مثل المخبله .. ماكو لا شهم لا جهاد لا يوسف
مياس.. يا ربي شصااااار
سمر.. ولچ شكووو
شبيهم يركضون هيچ احد يفهمنه
سهى.. يوسف وينه ولكم
يووسسسسسف
باوعت من بعيد شفت العالم ملتمه بمكان وديعاينون للگاع بس من الهوسه كلشي ممبين
منى.. صخام هاي شكو
منو واگع هناك ؟؟ يا ربي دخيلك
سمر.. هذا خالي
مياس شوفي هذا خالي
مياس.. وينه وينه
سمر.. هذاك ولچ ديخابر
لمحته من بعيد ركضتله ع السريع .. ما صدگت شفته گدامي بخير وسلامه
وصلت يمه دموعي جرت من الهبطه
مياس.. شهم شصااااااار
التهيت من الصبح بهوسة العرس ..
بين الغده وبين استقبال العالم وخبصة الزفه مر الوقت ع السريع
طلعت الزفه قريب الثمانيه
بس مدري ليش چنت خايف ولأول مره ينقبض گلبي بهل شكل
بنص الطريق نزلنه جهاد نرگصه
شالوا الولد يرگصون بي واني اتلفت داير مدايرهم بس اريدهم يخلصون ساعه گبل حتى ارتاح ويهدأ بالي
ماهر.. شبيك خويه
اهدأ ماكو شي ليش مضخم السالفه
شهم.. ولك ماهر هذا عماد فد واحد نغل .. تعرف شنو يعني نغل
اكيد مخطط ينتقم مني بعد ما شرد ومستحيل يلگه فرصه انسب من هاي حتى يرجعلي الضربه باضعافها
ماهر.. گول يا الله حبيبي
بعدين جماعتنه كلها هنا بس يتجرأ ويسوي شي معناها ديقره الفاتحه على روحه وهو ما حاس
شهم.. اي بس
دا احچي سمعت صوت رمي .. باوعت للولد نزلوا جهاد
واگف على حيله بس عيونه مسوربه شويه ووگع من طوله بالگاع
شهم.. جهاااااااااااد
ايهاب.. لا يا الله
ولكم هاااي منو الرمممممممممممه
علاء.. محد رمه اني حذرتهم من هالشي
يوسف.. گوم جهاد تسمعني
گووووم
شهم.. ماهر هذا عماد
ماهر اريده حتلو جثه
تسمعني لو لا .. اريييييييبيده
ماهر.. صار خويه
هسه الزمه ما طوله قريب منا بس انت لحگ على جهاد ليصيرله شي
ركض ماهر هو وجماعته يدورون على عماد واني خابرت الاسعاف لأن قريبه علينه المستشفى كلش
هستوني خلصت المكالمه اجتني مياس تسأل شصار والدموع بعيونها
شهم.. شجابچ هنا
ارجعي للسياره بسرعه وقفلوا البيبان عليكم
مياس.. عفيه بس گلي شصار
گلبي راح يوگف والقرأن
شهم.. جهاد تصوب
رادت تعيط خليت ايدي على حلگها بسرعه : اششش منا العالم
فوتي للسياره وقفلي الباب شويه وجايكم لتشلعين گلبي
مياس.. اي بس لتتأخر الله يخليك
شهم.. ماشي يلا روحي بسرعه
راحت وظليت اباوع وراها خايف من عماد .. شفتها صعدت هي وسمر اتطمنت
ركضت على جهاد شفته مفتح عيونه والزلم ملتمه عليه
شهم.. شويه وخرووووو
خل يشم هوى شويه
شلته الحضني بسرعه : خالو حاچيني لتغمض عيونك
جهاد.. ما بيه شي خالي لتخاف
شهم.. عاينت الايدي صارت كلها دم : وين نضربت بأيدك
جهاد.. اي
شهم.. يوسف شوف الاسعاف وين صاررررت
يوسف.. هاي دا اتصل بيهم خويه
اجت الاسعاف بهلاثناء .. صعدوا جهاد على السريع وراحوا قبلنه
شهم.. يوسف اخذ امي وتبارك وياك وصعد البنات ويا صاحب
لازم اروح وراهم للمستشفى
يوسف.. ماشي خويه
روح انت وبس اوصلهم اجي وراك
شهم.. نزلي يمه ع السريع
الحجيه.. نزلت تبجي بحرگه : شصار ولك شهم
شبي جهااااد
شهم.. ما بي شي يمه
روحي ويا يوسف خليني اتحرك بسرعه
يوسف تعال اخذهن يمعووووود
يوسف.. يلا خاله
تبارك نزلي خيتي
اول ما نزلن شغلت السياره وبوجهي للمستشفى .. وصلت لگيتهم مدخلي للعمليات
ظليت انتظر قريب الساعه طلع الدكتور
شهم.. ها دكتور بشر
الدكتور.. ضربته مو عميقه
طلعنه الرصاصه وكلشي تمام
الحمد لله على سلامته
شهم.. الف الحمد لله والشكر
الله يسلمك دكتور .. رحم الله والديك
راح الدكتور وگفت انتظر گبال الباب دگ جهازي .. طلعته لگيته ماهر جاوبته بسرعه
شهم.. ها ماهر
ماهر.. مات هذا
شهم.. صدگ تحچي ؟!!
شلون
ماهر.. مو لگينا بس حاول يشرد منه فرموا الجماعه عشوائي لحد ما وگعت بي ومات بنفس اللحظ
شهم.. چلب وفطس
الى جهنم وبأس المصير
عاشت ايدك حبيبي ما قصرت
ماهر.. وايدك خويي .. بالخدمه اني
بشر شلونه جهاد ؟؟
شهم.. الحمد لله زين ماكو شي يخوف
طلع من العمليات بسلامه
ماهر.. الحمد لله على سلامته
شهم.. الله يسلمك
شويه وانترست المستشفى بعمامي وولدهم .. ساعتين تقريباً وكتبوا الجهاد خروج لأن حالته مستقره
اخذنا ورجعنه للبيت
مياس.. بعد ما رجعت للسياره وعرفت سمر بجهاد تصوب خبصت الدنيا بالبچي
حرت شلون اسكتها بس بلا فائده .. شويه واجه يوسف ويا تبارك والحجيه
فتحت الباب ع السريع اول ما شفته : ها يوسف
يوسف.. انزلي انتي والبنات اصعدن ويا صاحب بسرعه
سمر.. جهاد شلونه يوسف
يوسف.. لتخافين سمر ما بي شي ان شاء الله
يلا انزلن لتعطلنه
رحنه ويا صاحب ورجعونه للبيت .. اول ما وصلنه انگلب العرس عزه
النسوان كلها تبچي
منال اغمى عليها وبالگوه يلا گعدناها
تبارك شحالها حتى مكياجها خرب من البچي
الحجيه تشهگ وتدعي على السواها
مرت ساعات صعبه واحنه ننتظر خبر منهم .. ب ١٢ سمعنه الباب انفتح گمنه نركض ع السريع
باوعنه من الشباك اجو الولد ووياهم جهاد .. ما صدگنه شفنا گدامنه
طلعت منال تركض حضنته حيل
منال.. فدوه اروحلك وليدي
كون بيه هالشي الصار ولا بيك
جهاد.. اسم الله عليچ يمه شنو هالحچي ؟!! لتزعليني منچ
شهم.. خويه ما بي شي هاي وينه گدامچ واگف على طوله مثل الورد
يلا وخري خلي يطب يرتاح
منال.. اي تفضلوا تفضلوا
اول ما دخلوا گامن النسوان يهلهلن علمود سلامته .. التموا علي قريب النص ساعه
عفتهم ورحت ويا سمر الغرفة جهاد
دخلنه لگينه تبارك واگفه تباوع ع الباب بخوف .. بس شافتنه شهگت من البجي
مياس.. هاي شبيچ ولچ
هذا وينه اجه لتخافين
تبارك.. الله عليچ اجه
سمر.. اي توته والله اجه لذالك خلي نعدلچ المكياج قبل لا يطب لهنا
تبارك.. يمعوده اني بيا حال هسه
ويني وين المكياج .. بس خلي اشوفه حتى يرتاح گلبي
سمر.. هسه تشوفي وتشبعين من شوفته بس لازم نعدلچ ميصير يشوفچ بهالحاله
تبارك.. يلا سوي التردي بسرعه
گعدت سمر تعدل بمكياجها عشر دقايق لحد ما حسينه على جهاد طب للغرفه
مياس.. الحمد لله على سلامتك جهاد
جهاد.. الله يسلمچ مرت خالي
سمر.. شلون صرت خويه
جهاد.. زين خيتي لتخافين عليه
منال.. يلا بنات طلعوا عوفوا العرسان وحدهم
مياس.. دنگت على تبارك اشاورها : رخي نفسچ حبي لتصيرين مثلي تالي توگعين بيها
هزت براسها ودنگت بسرعه .. طلعنه منهم وسدينه الباب ورانه
درت وجهي للصاله مخبوصه بالنسوان
مياس.. شنو راح يباتون هنا ؟؟
منال.. اي
مياس.. والولد
منال.. لا كلهم راحوا بس شهم وايهاب كلمن راح بغرفته
مياس.. زين
رحت لام يوسف : ها خاله وين نونه
ام يوسف.. هذيچ بيد منى
ما نومتها هواي علمود لتشلع گلبچ بلليل
مياس.. اي عاشت ايدچ زين سويتي
اخذت نونه من منى ورحت بوجهي للغرفه .. غيرت ملابسي وملابسها وتمددت ع الجربايه العب وياها
بهلاثناء اندگت الباب
مياس.. تفضل
منال.. المكان ميكفي للنسوان لأن هواي ما شاء الله
راح يجن بغرفتچ هم
مياس.. اي هلا بيهن
منال.. اصعدي نامي يم شهم
هذني الليل كله يگضنها حچي وتكريز حب يعني مراح يخلنچن تنامن
مياس.. رفعت حاجبي : منال شنو السالفه
منال.. شبيچ !!
مياس.. متقصده مو
منال.. اي متقصده وما اريد حچي زايد
اصعدي نامي يم رجلچ وگوليله نفس الكلام الگلته الچ هسه
مياس.. والله استحي
اجت بسرعه شالت نونه وجرتني من ايدي .. اخذتني سحل للدرج انطتنياها ودفعتني حيل
منال.. اصعدي لا ابتلي بيچ
مياس.. مو بهاي ملابسي يمعوده
منال.. شنو شبيهن قابل
مياس.. يمعوده متشوفيهن خفاف ولاطشات على جسمي
منال.. اي هو هذا المطلوب
مياس.. ياااااا
زين خلي افل التسريحه وامسح المكياج ع الاقل
منال.. لا بالله
المن اني اشتغل طول النهار علمود حضرتچ تجين تخربيهن ع الحاضر
مياس.. منال والله ما اگدر اصعد هيچ
هسه بس يشوفني بهل حاله عباله متقصده
منال.. اي هو انتي متقصده
مياس.. ياااااااااااا
منال.. نزعت نعالها ع السريع : ووجعاااا
تصعدين لا بهذا هسه .. تدرين بيه مخبله وما عندي مانع
اسويها ترى وهاي اني حذرتچ
مياس.. اااااااف
منال.. يلا لچ
صعدت فوگ مجبوره .. وگفت يم الباب باوعت الروحي لابسه بجامه ستن لون احمر البارحه اشتريتها وفوگاهة مقسمه ع الجسم يعني فضيحه
مياس.. يربي هسه اني شسوي فوگ هل ملابس شعري ومكياجي الفضاعه
لا والله ما اگدر اطب هيچ .. لا لا ما اگدر ابد
درت وجهي دا انزل .. شفت منال لازمه النعال وواگفه باول المحجر
بس باوعتلي اشرتلي بي تهددني
مياس.. اف منال ااااااف
منال.. يلا يلا لتخليني اصعدلچ
استسلمت لأن ما عندي غير حل .. دگيت الباب مرتين فتحها شهم بس چان شكله نايم
باوعلي من فوگ ليجوه استحيت منه كلش
شهم.. صاير شي
مياس.. اي
جوه هوسه والنسوان اجن حتى بغرفتي
نونه تريد تنام وتعرف بيهن يسهرن فأجيت انومها يمك اذا ما عندك مانع
شهم.. فتحلي الباب : تفضلي
دخلت بخجل اباوع للغرفه حايره وين اروح .. حسيت علي سد الباب مدري ليش خفت كلش
شهم.. يلا روحي ع الچربايه نوميها خطيه
مياس.. وانت ؟؟
اذا تريد نام معليك بينه
اني بس انومها انزل ما اظل هنا
شهم.. عادي ماكو مشكله
مياس.. گعدت ع الچربايه وخليتها على رجلي .. تقرب يمنه گعد بصفي يلعب بأيدها ويحچي وياها
ظليت صافنه علي وعلى ضحكته وكلامه ويا نونه .. تفاجأت من رفع راسه باوعلي
دنگت بسرعه : لا يا ربي بس لا انتبهلي
شهم.. مياس
مياس.. بالگوه جاوبته : اا ش نعم
شهم.. شبيچ ؟؟
مياس.. هااا
ما بيه شي
شهم.. عماد مات
مياس.. رفعت راسي بصدمه : شنوووو
شلون مات ؟!!
شهم.. چانو جماعتي يلحگوا ومن حاول يشرد رموا علي فمات بسرعه
دنكت راسي مقهوره علي بعد كلشي سوا .. حسيت على شهم گام من يمي وهو يستغفر بصوت واضح
مياس.. مو بيدي شهم
اضوج احد يموت حتلو چان مو زين
شهم.. سدي موضوعه
راح بعد هو وربه هناك يتجازه على افعاله
مياس.. اي ماشي بس لتضوج
شهم.. يلا نوميها
تعبت المسكينه طول اليوم من الهوسه
مياس.. تعال تمدد
هسه بس تنام انزل اني
اجه تمدد ع الچربايه .. بديت اهز بيها لحد ما داخت وگامت تغفي
شهم.. ظلي هنا
اذا نزلتي تحس عليچ اكيد لان متعوده على ريحتچ
وهاي چربايتها هنا تگدرين تنومينها بيها
مياس.. واني وين انام
شهم.. هنا
الچربايه واسعه .. واذا تردين خلي مخده بيناتنه
صفنت علي ممصدگه كلامه .. دار وجها عني وغمض بسرعه
نامت نونه وديتها الچربايتها خليتها بيها ورجعت انام
طفيت الضوه وتمددت بصف شهم داير ظهره الي .. تقربت منه كلش لحد ما صرت يمه
عرفته نايم من انفاسه العاليه
ظليت صافنه علي .. گلبي يدگ سريع ممصدگه روحي نايمه بصفه
غمضت عيني واني اشم عطره لحد ما غفيت
فتحت عيوني الفجر الضوه هستوه طالع
خليت ايدي على راسي دايخه ما اعرف ليش
صحصحت شويه وچان انصدم.....
يتبع...