#مياس_قلب_الشهم
للكاتبه #لبنى_الموسوي
طلعت للصاله لگيتهم ملتمين ويا يوسف .. گعدت وياهم بس بالي مو يمهم فكري كله يم عماد
جهاد.. خالو شصار وياك
شهم.. بعدين افهمك
جهاد.. ليش بعدين
شهم.. وتالي وياك جهاد .. تعبان وراسي ديموتني لتلح زايد
الحجيه.. يمه على كيفك ويا روحك ليصيرلك شي
شهم.. لتخافين حجيه
دگ جهازي بهلاثناء .. طلعت من جيبي ع السريع وما صدگت ماهر ديتصل
شهم.. الووو
ماهر.. ها حبيبي
شهم.. بشرني
ماهر.. ابشر خويه هذا وينه بين ايدي
شهم.. الله عليك !!
دقايق واكون يمك مسافة الطريق
ماهر.. ماشي انتظرك
شهم.. يوسف گوم ويايه
جهاد.. وين خالو
شهم.. بعدين جهاد بعدين
طلعت اركض اخذت سويچ سيارة يوسف منه وسقت بكل سرعتي
دقايق وصلتله .. قبل لا ندخل طلبت من يوسف يلبس مناظره والشفقه حتى ليعرفه الساقط
دخلت على ماهر لگيت عماد گاعد يمه .. عاينت علي انصدم بس شافني لأن ممتوقع هالشي هزيتله راسي بابتسامه
ماهر.. ها شهم هذا عماد
شهم.. عاشت ايدك حبيبي ما قصرت
ماهر.. بالخدمه
بس شتريد تسويله
شهم.. عاينتله وضحكت : ادلله لأن يستاهل
ماهر.. استلمه لعد دلله على راحتك
سلمت على ماهر وتشكرت منه هواي .. اخذت عماد وطلعت دا اصعده بالسياره دفع ايدي راد يشرد ضربته عكس نيمته بمكانه
عماد.. شتريد مني ××××
عوفني لا ابتلي بيك هسه
شهم.. هههههه لا يابه بيك خير !!
دگوم يلا راويني عضلاتك يالبطل
گام يركض رفع ايده ديضربني حطيت بي بوكس رجعته على يوسف .. سنده قبل لا يوگع جره من ياخته وصعده بالسياره
وصلنه للمركز اخذته بوجهي لغرفة التحقيق خليته هناك ويا يوسف ورجعت الغرفتي اتصل بابو مياس صار لازم انهي كلشي
شهم.. الو
اشرف.. هلا شهم شلونك
شهم.. الحمد لله
اشرف.. مياس شلونها
شهم.. زينه
ابو مصطفى رايدك تجيني هسه
اشرف.. خير خو ماكو شي ؟!!
شهم.. خير ان شاء الله بس ضروري نتشاوف حتى تعرف السالفه
اشرف.. مو اني بالشغل حاليا
شهم.. ابو مصطفى دا اگلك ضروري
اشرف.. ماشي بويه
وين تريد اجيك ؟؟
شهم.. لمركز ××××
بس توصل اسأل اي شرطي عن غرفتي يدليك تلگاني منتظرك هناك
اشرف.. ان شاء الله نص ساعه واكون يمك
سديت الخط منه وطلعت ع السريع دزيت على محسن دقيقتين يلا اجاني
محسن.. نعم سيدي
شهم.. هاي وينك محسن !!
محسن.. اعتذر سيدي ما ادري بيك موجود بالمركز اليوم
شهم.. اطلبلي الصيانه بسرعه
محسن.. موجودين سيدي اليوم دوامهم
شهم.. خل يجون الغرفتي لعد
بسرعه بسرعه
محسن.. صار معلوم
رجعت دخلت شغلت اللابتوب ع السريع ثواني واندگت الباب
شهم.. تفضل
- نعم سيدي دزيت علينه
شهم.. اي حبيبي تعال
- أامرنه
شهم.. اربطلي كاميرات غرفة التحقيق بغرفتي
- عندك الرمز
شهم.. طبعا
هاك استلمه مكتوب هنا
- بلا زحمه بس خلي اگعد بمكانك
شهم.. اي تفضل
گعد يشتغل اقل العشر دقايق كمل .. تشكرت منه وطلع
ظليت گاعد بمكاني انتظر اشرف بس تأخر كلش قريب الساعه يلا اجه
اشرف.. اعتذر تأخرت عليك بس والله ما قبلوا اطلع من الشغل إلا بالتواسيل
شهم.. معذور خويه
اشرف.. خير گول ظل بالي كلش
شهم.. تعال اگعد بمكاني
اشرف.. صفن عليه باستغراب : ليش !!!
شهم.. دتعال اگعد ولتستعجل
دقايق وراح تعرف كلشي بس انطيني صبر
تقدم باتجاهي گمت وخليته بمكاني .. عاينت علي جفل بس شاف صورة عماد باللابتوب
رفع راسه مصدوم دگيت على چتفه
شهم.. منو هذا تعرفه ؟؟
اشرف.. عماد !!!
شنو
شبي
يعني اقصد شيسوي هنا
شهم.. هسه تفهم كلشي بس الاريده منك تظل گاعد تتفرج لحد ما ارجعلك
اشرف.. ليش وين رايح انت ؟؟
شهم.. يمه
اشرف.. شهم شديصير
شهم.. اصبر الصبر حلو
اشرف.. والله خبلتني
هسه شسوي اني بس فهمني
شهم.. ظل گاعد گدام الكاميرا لتتحرك منا لما ارجعلك .. هذا كل الاريده منك
اشرف.. اظل عمي .. خلي اشوف وين تريد توصل من كل هذا
عفته وطلعت لغرفة التحقيق اول ما دخلت گام عماد باتجاهي .. قفلت الباب ودرت وجهي علي
شهم.. ها تريد تحچي شي
عماد.. ليش جبتني لهنا ؟؟
شهم.. لا والله
يعني افهم من سؤالك تريد تقنعني متعرف ليش جايبك لهنا
عماد.. ومنين دا اعرف قابل
شهم.. مياس
عماد.. شبيها مياس ؟؟
شهم.. ليش دتلحگها بكل مكان
شتريد منها بالضبط فهمني ؟؟
عماد.. كلشي ما اريد
وما لاحگها اصلا .. منين دتجيب هالكلام !!
شهم.. عماد شوف
اني اعرف بيك تريد مياس من زمان
واعرف كلش زين شلون كاتل نفسك عليها لذالك مستعد اطلگها وتتزوجها انت بس بشرط
عماد.. وشنو هذا الشرط ؟!!!
شهم.. تحچيلي شلون خططت انت وخالتك علمود تسلب شرفها منها حتى تجبرون اشرف يزوجها الك
عماد.. مو صح هالكلام
شهم.. هاي فرصتك الوحيده اذا ضيعتها من ايدك لتترجه مني فرصه ثانيه
عماد.. شلون يعني ؟؟
شهم.. يعني تجاوبني بصراحه الك مياس
لا والله تظل تلف وتدور عليه ساعتها اعذرني بالراح تشوفه مني وانت حر بلاختيار
عماد.. زين اذا كلامك صح وتريد تعوفلي مياس ليش دتفتح هالدفاتر القديمه ؟؟
شهم.. اريد انتقم منها
عماد.. من منو تقصد
شهم.. من مياس
عماد.. ليش تنتقم منها ؟!!!
شهم.. طعنتني بظهري
عماد.. صدگ تحچي !!!!!
شهم.. اي وكافي اسأله اجه دوري اني اسألك وانت تجاوبني
عماد.. بس فهمني حتى اگدر أأمن بيك واحچي براحتي
شهم.. ماشي بس خل يكون بعلمك هذا اخير جواب تاخذه مني
عماد.. اي ميخالف
شهم.. مياس ضحكت عليه ولعبت دور البرائه بحجة تريد تحافظ على شرفها منك ومن خالتك حتى تستعطفني وازوجها الاخويه مهيب الله يرحمه
فگالتلي هواي شغلات عنك متسر الخاطر بس اكبر شغلتين .. الاولى تريد تعتدي عليها والثانيه بينك وبين خالتك علاقه غير شرعيه
عماد.. ال×××× ال×××× چذابه بعينها هال ××××
لزمت نفسي عنه بالگوه واني اسمعه يفشر عليها لأن ما ردت اخرب الشغل على نفسي
شهم.. عوفك من هالحچي واجه دورك تجاوبني
عماد.. زين ما گتلي ليش تريد تتأكد من كلامها
شهم.. اسألتك كثرت عماد
عماد.. بس جاوبني على هالسؤال واحچيلك كلشي والله العظيم
شهم.. مو گتلك طعنتني بظهري واريد الزم عليها نقطه
راح احاسبها على كلشي وبعدين اسلمها الك وانت حر تتقبلها بعيوبها الراح تعرفهن مني بعدين لو تتركها مثل مراح اتركها اني
عماد.. عيوبها ؟!!!
شهم.. اووووو راح تنصدم بيها بعد وبعد
خلي يكون بعلمك مياس اقذر منك عماد لذالك انت وياها تتوالمون كلش
عماد.. ماشي شتريد تعرف ؟؟
شهم.. صح انت اتفقت ويا خالتك علمود تسلب شرفها وتجبر ابوها يزوجها الك
عماد.. اي صح
شهم.. شلون سولفلي
گعد يسولفلي بالمحاولتين الفشلن بوقتها لمن حاول يسلب شرفها وشلون اتفق هو وخالته بس بالمرتين خرب اتفاقهم بسبب مياس
جريت كل الحچي منه حتى محاولة اعتدائه عليها لمن احترگت اختها واجه مهيب نقذها باللحظات الاخيره والاهم من كل هذا شلون اتفق هو وخالته حتى يخلاله الجو وينفذ عملته المخطط الها من زمان
عماد.. وهسه عرفت كلشي .. شتريد بعد ؟؟
شهم.. ليش سويتوا هالشي كله ؟!
عماد.. خالتي تريد تستفاد لان مواعدها بفلوس المهر تصير الها لمن تصيرلي مياس
شهم.. وانت ؟؟
عماد.. اني احبها لا مو بس احبها اموت عليها
مياس محفوره بعقلي قبل گلبي من چانت بعدها طفله ولحد هذا اليوم
شهم.. ماشي انتظرني شويه وارجعلك
عماد.. وين ؟؟!!
شهم.. هسه ارجعلك ما اتأخر
اجه دوري اجاوبك على اسألتك بس اصبرلي شويه
طلعت ع السريع رحت الغرفتي .. دخلت لگيت اشرف صافن على اللابتوب مصدوم من العرفه بس شافني گام على حيله
اشرف.. شنو هذا السمعته شهم ؟!!!
شهم.. مو كل السمعته صح
اشرف.. شلون يعني ؟!!
شهم.. مياس ماكو مثل تربيتها واخلاقها الحلوه ولا اكو معدن يشبه معدنها الطيب
حچيت كل هذا لان ردت اخلي يأمن واسحب الكلامه منه حتى تعرف بنتك المسكينه شگد عانت ويا هالزوج وانت ما تدري
اشرف.. وانت منين تعرف مياس بهذاك الوقت ؟؟
شهم.. تذكر يوم الوصلتها للبيت الظهر لمن تعرضت للتحرش بسبب مرتك
اشرف.. اي اذكر
شهم.. هو منا تعرفت عليها وبعدها شفتها بالشارع تبيع كلنس ظليت اشتري منها يوميه لحد ما اجت مره وطلبت مساعدتي علمود انقذها من الناوين يسوا بيها عماد وخالته
اشرف.. الله عليك شهم گول غيرها
رجع گعد ع الكرسي وحط ايده على راسه : شلون يعني ؟!!
الحقيره چانت تريد تأذيني ببنتي وبشرفي بس حتى تستفاد هي وابن اختها النگس
شهم.. مع الأسف
واعتذر منك .. ادري صدمتك بس صار لازم تعرف كلشي
اني سكتت كل هالفتره لأن ردت عماد يوگع بين اديه لان متأكد لو گايلك چان شرد وبعد مستحيل اگدر اصيده مره ثانيه حتى احاسبه
اشرف.. گام على حيله : اني الاحاسبةةةةة
اليوم اذبحه واشرب من دمه الهل ××××
شهم.. لزمته ع السريع : عوفه عليه ابو مصطفى
مثل ما مياس بنتك فهي مرتي واليمسها يمسني لذالك وداعة عيونها راح اخذ حقها من عماد على اتم ما يكون
اشرف.. شهم عوفني خلي اروح اربي واعلمه شلون يتجرأ يمس عرضي وبنص بيتي
شهم.. ما واثق مني ؟؟
اشرف.. لا طبعا بس
شهم.. لا بس ولا شي
بالنسبه العماد دباره عندي الدور والباقي على سميحه انتي الراح تاخذ حق مياس منها مو غيرك
اشرف.. عض اصبعه : ااااااخ يا سميحه اخ
شهم.. بس ابو مصطفى لتنسى هاي المره تظل ام جهالك
ربيها وحسابها وسوي كلشي بس بلا فضايح علمودك قبل الكل
اشرف.. بسيطه يا سميحه ال××××
عافني وطلع ع السريع ... ما اعرف شناوي يسويلها بس تستاهل كل الراح يصير وياها لان السوته هي ابد مو قليل واجه الوكت التتحاسب بي على كلشي
رجعت العماد دخلت وقفلت الباب ورايه .. نزعت ساعتي ومحابسي وحتى التشيرت ظليت بطرگ الفانيله الداخليه
عاين عليه وگام يرجع ليوره من الخوف .. انطيتهن اليوسف وتقربت سحبته من ايده حيل
عماد.. شبيك شهم شتريد تسوي ؟!!
شهم.. گتلي تحب مياس موووو
عماد.. اي احبها
شهم.. خليت بس بوكس طار سنه بنفس اللحظه : شلون تتجرأ توگف گبالي وتگلي احب مرتك
گام على حيله يمسح الدم من حلگه ويضحك بصوت عالي .. استفزني كلش ركضت علي حطيت بي دفره رجعته للحايط
شهم.. ساقط ولك اني تعتدي على شرفي حتى تلوي ايدي وتنتقم مني
بسيطه يا عماد .. راح اراويك الانتقام شلون يصير بس اصبرلي
ركض رفع ايده راد يضربني لويتها ع السريع .. رجعتها ورى ظهره ولزمته من رگبته اختنگ بيدي
شهم.. ×××× من كل عقلك تگدر تسوي عملتك وتشرد
مو شهم الينضحك علي ولا شهم اليعتدون على عرضه ويطلعون سلامات من السالفه
نزلت بي ضرب واني اصيح : شلون تتجرأ تمد ايدك على بت اختي سمر
شلون تتجرأ تضحك عليها وتحاول تسلب شرفها بس حتى ترضي ×××× وتريح ×××××
ليش سويت هيچ ؟؟ جاوب ولك جاووووب
احچي بسرعه قبل لا اكتلك بيدي وساعتها محد يفيدك غير روحك
عماد.. يا سمر هاي
شهم.. يا سمر موووو ؟؟؟
هسه اگلك يا سمر بس اصبرلي
اجه يوسف جرني منه لان راح يموت بأيدي واني ما حاس على نفسي .. نزع المناظر وعاينله ارتبك بس شافه گدامه
شهم.. ها عرفت هسه يا سمر لو بعدك مغشم روحك
عماد.. تستاهل كلشي يصير
محد گلك انت واخوك ال×××× تاخذوها مني من بعد صبر السنين
شهم.. نزلت بي ضرب : ولك انت تحچي على مهيب
اليوم اعدمك العافيه يا ×××× يا ×××××
××××××××××
وخرت عنه بعد ما جنزته .. ظل يتلوى بالگاع قريب الخمس دقايق لحد ما رفع راسه وگال بصوت گوه ينسمع لان حيله راح
عماد.. اي اني اعتديت على شرفك علمود مياس بس حتى اجبرك تعوفها لمن تعرف شصار بيكم بسببها
يوسف.. يا كلب يا ساقط
يحچيها بكل عين صلفه ال××××
ركض يوسف يضرب بي بحرگه واني اتفرج نص ساعه انتهى بين ايدي .. وخرته عنه ع السريع وسحبت سلاحي
رفع راسه مصدوم من حركتي .. عاينت بعيونه النرسم الخوف بيهن وخليت طلقه بفخذه صرخ حيل
شهم.. بعدك ما شايف شي لا والله
وتأكد هاي اول طلقه مني بجسمك النگس بس مراح تكون اخر طلقه يا عماد
شرفي وعرضي ولوعة گلب مهيب الله يرحمه والخوف الحست بي مياس بسببك طول السنين الراحت راح ادفعك ثمنه غالي .. والثمن راح يكون روحك يا نذل
طلعت ع السريع دزيت على محسن شويه واجاني يركض
محسن.. نعم سيدي
شهم.. هذا القذر الجوه اكله طلقه برجلي صيح الدكتور يعالجه وبس يصير زين ذبه بلانفرادي منا لما اجي تسمعني لو لا
محسن.. اي صار سيدي
شهم.. محسن اي شي يصير انت مسؤول
هالشخص بالذات اريدك تخلي عينك علي ٢٤ ساعه ولا لحظه تغفل عنه ولا لحظه
محسن.. تأمر
شهم.. يوسف جيب غراضي وتعال
مشيت الغرفتي دخلت ورگعت الباب حيل لأن رغم كلشي صار بعدها نار گلبي واجه من عماد
رحت سديت اللابتوب شويه ودخل عليه يوسف .. اخذت منه غراضي لبستهن ورجعنا للبيت سويه
اول ما دخلت شفت الكل مجتمعين بالصاله بس مبين القلق على وجوههم .. استغليت الفرصه حتى اخصم موضوع سمر وياهم
جهاد.. خالو وين رحت ؟!!
والله گلبنه خلص واحنه ننتظرك تجي تشرحلي الموضوع
شهم.. مياس صيحيلي سمر
مياس.. شتريد منها ؟!!
درت وجهي خزرتها .. خافت وتحركت بسرعه راحت تصيحها شويه واجت هي وياها
شهم.. اولا كلكم تعرفون سمر غلطت غلط چبير وكل الراح احچي هسه ميبررلها الغلط السوته ولا يمحي العار الركبها بعد عملتها السوده
بس مع ذالك لازم تسمعون كلشي حتى نسد هالموضوع نهائياً ونلملمه بيناتنه احس ما يكبر وبعد منسيطر علي
الولد الضحك على سمر هو نفسه عماد .. تعرفون منو عماد لو لا
جهاد.. منو هذا عماد خالو !!!
شهم.. نفسه الولد الراد يعتدي على مياس من قبل
وحضرت جنابك انت وكل الگاعدين يمك شيشتوا مهيب الله يرحمه عليها وتهمتوها بشرفها من غير متكلفون نفسكم وتسمعون منها الصار بالضبط
وهاي رب العالمين حب يردها الكم بنفس الطريقه ويضوگكم من نفس الوجع الضوگتوا الهل مسكينه لأن حاشا ان يضيع حق المظلوم او تهون علي دمعة اليتيم
جهاد.. خالي شدتحچي !!!
شهم.. مثل ما سمعت جهاد
جهاد.. گام بسرعه : وينه هذاااااااا
وينه ال×××× بس دليني علي خلي اروح اشرب من دمه الهل ××××
شهم.. اگعد جهاد
ارجع واگلكم اني ما حچيت وياكم إلا لان اريد اسد الموضوع نهائيا وينتهي كلشي بهل لحظه مو العكس
جهاد.. شلون يعني خالو ؟؟
تريد يعتدي على شرفنه ونعوفه بلا حساب
شهم.. لا طبعا
هذا وينه يمي وبين اديه
اوعدك جهاد يوميه اخذ حق مياس وسمر من بين ضلوعه بس اطلع من السالفه انت وخليني اتصرف بمعرفتي لو ما واثق من خالك
جهاد.. لا طبعا خالي ما قصدت هالشي
شهم.. لعد اسمع كلامي اترجاك
جهاد.. صار خالو
ايهاب.. وليش سوه هيچ ؟!!
شهم.. لأنه واحد نذل وهاي شغلته يضحك على بنات العالم ويستغل غبائهن حتى يحصل اليريده منهن بكل سهوله
ايهاب.. وشجابه على سمر بالذات !!!
شهم.. صدفه لا اكثر
ايهاب.. شلون صدفه هاي ؟!! والله عجيب
شهم.. المهم اسمعوني كلكم
ما اريد هذا الموضوع ينفتح بالبيت بعد اليوم ولا اريدك يا جهاد انت وخالك تتعرضون لاهل عماد واذا عرفت مخالفين الكلام يصيرلي غير حچي وياكم
جهاد.. ليش خالي ليش ؟؟
شهم.. ما اريدهم يعرفون ابنهم مسجون يمي
والاهم من كل هذا علمود سمعة اختك لو متفكر بهالشي حضرتك
ايهاب.. ماشي خويه صار معلوم
شهم.. وانتي سمر
راح ارحم بحالچ واخليچ تكملين الجامعه بس بشروط وهي :
جهاد يوصلچ ويرجعچ يوميه
حدچ للوحده حتلو عندچ محاظرات تعوفيها وتطلعين
موبايل ماكو
طبه وطلعه ماكو
صديقات انسي
واذا سمعت عنچ شي ولو هالگدوته محد يخلصچ مني ساعتها
مفهووووووووووووووووم
سمر.. اي خالو مفهوم
شهم.. يلا ولي لغرفتچ ما اريد اشوف خلقتچ الزفره گدامي
ركضت تبچي لحگتها مياس ع السريع .. عفتهم وصعدت فوگ غسلت وتوضيت وگفت اصلي هستوني تمددت دا ارتاح شويه اندگت الباب
شهم.. تفضل
مياس.. خو ما نايم
شهم.. لا
تعالي
بعد ما رجع شهم وگلهم عماد هو السوه هيچ خليت ايدي على گلبي لأن گلت مراح يرحموني اذا عرفوا الشي الصار اني السبب بي
بس الفاجأني شهم گلهم تعارف عماد بسمر چان مجرد صدفه
عرفته ديحاول يحميني كالعاده بهاي الطريقه
بيني وبين نفسي فرحت وضجت بنفس الوقت لان سمر مالها ذنب تصير طعم العماد الحقير
حاچه سمر وانطاها شروط قاسيه بحيث خلاها تبچي لأن اختنگت من معاملتهم الجافه الها طول هاي الفتره
رحت وراها للغرفه دخلت لگيتها تشهگ بحرگه ركضت حضنتها وما ادري شلون اهديها بعد كلشي صار
مياس.. حياتي كافي
سمر.. مياس شوكت ينتهي هالوضع والله اختنگت
اني بشر وغلطت ليش محد منهم راضي يسامحني
مياس.. لا حبي اكيد راح يسامحوچ بس الشغله يرادلها وقت شويه حتى ينسون الصار وترجع الامور مثل قبل واحسن بعد
سمر.. ما اتصور مياس ما اتصور .. وشمرت نفسها ع الچربايه تبچي
مياس.. والله كلشي ينحل بس اصبري شويه
اندگت الباب بهلاثناء اول ما فتحتها صار يوسف بوجهي يعاين السمر
يوسف.. شلون صارت
مياس.. زينه الحمد لله
دخل للغرفه وهي مستمره على نفس الوضع نايمه على وجهه وتشهگ .. تقرب منها جر الكرسي وگعد
يوسف.. سمر
ردت اطلع وگفني : ظلي مياس لتطلعين
وگفت بمكاني اعاين السمر وگلبي يتگطع عليها لأن الديصير وياها مو قليل ابد
يوسف.. سمر شو عاينيلي
سمر.. رفعت راسها : ها يوسف عندك شي بعد تريد تدوس عليه بي
يوسف.. ليش تحچين هيچ
سمر.. شتريد مني مو كافي السويته بيه لحد الأن
يوسف.. اني !!!!
سمر لتشمرين غلطچ عليه مو فوگ شينه گواة عينه
سمر.. ليش سويت هالشكل يوسف ؟؟
شنو هدفك من كل هذا بس گلي .. اكيد تريد تنتقم مني موووووو
يوسف.. انتقم !!
سمر.. اي تنتقم
لان حبيتني وما حبيتك ردت تحاسبني على مشاعري المو بيدي بهاي الطريقه
انصدمت كلش من عرفت يوسف يحب سمر .. عاينتله صار اعصاب گام من مكانه صم ايده وضربها على راسها حيل
يوسف.. غبيه وعمرچ كله راح تظلين غبيه
اني سويت كل هالشي من غيرتي وخوفي عليچ بس للأسف متستاهلين
بعدين مو صوجچ لا والله فلا صوچچ .. الصوچ مني لمن دست على كرامتي ورجولتي وظليت متمسك بيچ رغم كل عيوبچ
نسيت اهانتچ الي
ونسيت شقاچ الماصخ ويا صفاء بعرس علاء
ونسيت صوتچ التجرأتي وعليتي عليه
نسيت كلشي لأن چنت موهوم بيچ وبكل مره اگول تكبر وتعقل وتفهم مصلحتها بس الضاهر چنت اضحك على روحي
خلص لهنا وانتهت وياچ سمر اخذي راحتچ بعد
عافها وطلع رجعت تبچي حاولت وياها حتى اسكتها بس ماكو .. اخير شي طلعت وعفتها يجوز هيچ تفرغ گلبها وترتاح
رحت للصاله ادور على شهم ما لگيته عرفته صاعد فوگ .. صعدت الغرفته دگيت الباب علي شفته متمدد ردت اعرف منه شصار بالضبط
شهم.. صافنه شبيچ ؟؟
مياس.. شصار وياك
شهم.. لزمته لهذا النذل وجبت ابوچ خليته يسمع كلشي يعني عرف قذارته هو وخالته
مياس.. صدگ تحچي شهم !!!
شهم.. اي
مياس.. عززززززه .. وشگال ؟!!
شهم.. ما گال شي خله وراح للبيت يحاسب العنده
مياس.. عفيه گوم اخذني بسرعه
شهم.. وين
مياس.. اريد اعرف شصار وياهم بعد ما اتحمل
شهم.. مياس بشرفچ مو وكتها تعبان كلش
مياس.. ادري بيك تعبان بس والله اتخبل اذا ظليت هنا بلا ما اتطمن على ابويه
شهم.. بعدين والله نعسان
مياس.. جريته من ايده احاول اگومه : عفيه گوم الخاطري لان راح انفجر من القلق
شهم.. امري لله گايم
دروحي بدلي ع السريع بين ما اغير ملابسي
مياس.. اي اي
نزلت اركض غيرت ملابسي شلون مچان وطلعت للصاله .. لگيت شهم حاط نونه بحضنه ويلعب وياها بس شافني گام
شهم.. ها كملتي
مياس.. اي
شهم.. يلا امشي
مياس.. منال عفيه عينچ على نونه بين ما ارجع
منال.. ميحتاج توصيني حبيبتي اخليها ببطن عيني
الحجيه.. وين رايحين يمه
شهم.. اوديها الاهلها تشوفهم صارلها هواي مرايحتلهم
الحجيه.. والمعزايه ما عرفت تصبر لما ترتاح شويه
هستوك راجع من دوامك حتى ما لحگت تاكلك لگمه
شهم.. هي شدخلها اني طلبت منها تجهز نفسها حتى اخذها
الحجيه.. ظل دافعلها ظل
شهم.. يلا تردون شي
الحجيه.. لا سلامتك يمه
ما اهتميت الكلام الحجيه لان تقريبا تعودت علي كل يوم نفس الاسطوانه .. طلعت ويا شهم وصلنه البيت اهلي اول ما دگيت الباب فتحها ابويه بس شكله چان ميتفسر من العصبيه
مياس.. حضنته بسرعه : شلونك بابا
اشرف.. هلا بنيتي عاش من شافچ
مياس.. والله مشتاقتلك كلش
اشرف.. مو بگدي يبعد ابوچ
تفضلوا
شهم.. لا مشكور اني انتظر هنا اخذوا راحتكم
اشرف.. عيب عليك قابل انت غريب
تفضل البيت بيتك
دخلنه سوه اول ما طبيت للصاله شفتها مگلوبها ع البطانه ما ظال بيها شي سليم .. درت وجهي على اخواني گاعدين بالزاويه ومنتهين من البچي ركضت حضنتهم
مياس.. يا عمري لتخافون فدوه رحتلكم
مصطفى.. بابا ضرب ماما وطردها مياس
مياس.. گوم حبيبي اخذ مياده وروحوا الغرفتكم اريد احچي ويا بابا شويه
گام بسرعه عاينت الابويه گاعد ع القنفه يشرب چكاير ومنزل راسه للگاع .. تقربت گمبصت يمه ولزمت ايده
مياس.. كافي تدخن مو زين عليك
اشرف.. ليش ما حچيتلي مياس
شلون تسكتين عن كل هذا ؟؟ شلون گدرتي تواجهين قذارتهم وحدچ
مياس.. درت وجهي على شهم : مو وحدي بابا
شهم ما عافني وساعدني حتى اخلص منهم بعدين حتلو حاچيتلك مراح تصدگني اذا متشوف بعينك لان سميحه
اشرف.. شبيها
مياس.. لا هيچ ....
ردت اگله ساحرتلك بس سكتت اخاف ازيد الطين بله والشغله ما تتحمل اكثر
فجأه سمعت صوت بچي گمت بسرعه وانصدمت بسميحه لدرجة ما عرفتها من گد الضرب الماكلته من ابويه
سميحه.. عاينتلي بحقد : عرفت انتي ورى السالفه يا ××××
الله ينتقم منچ ولا يراويچ الخير بكل حياتچ
شهم.. لتفشرين على مرتي لا اگوم امردچ برجلي
مياس.. عوفها شهم حقها مظلومه واني الظالمتها
سميحه.. هاي من وراچ ابوچ حرمني من جهالي
بس والله الا اندمكم على السويتوا بيه وهسه تشوفون
گاملها ابويه ع السريع نزل بيها ضرب واحنه نتفرج ما حركنه ساكن لان تستاهل اكثر بعد كلشي سوته
اشرف.. اطلعي بسررررعه
بعد ما اريد اشوف خلقتچ طول ما اني عايش
سميحه.. بسيطه اشرف اذا ما اندمك ما اطلع اني سميحه
اشرف.. امشي لچ بت ال×××× جايه تهدديني
احمدي ربچ ما موتچ بيدي بختچ بالجهال وإلا محد يمنعني عنچ غير رب العالمين
اخذت جنطتها طلعت وهي تبچي على تدعي على تغلط محتاره شتسوي من حرگة گلبها .. عاينت الابويه رجع يدخن سحبت الجكاره منه
مياس.. كافي بابا
حاچيني شراح تسوي وياها
اشرف.. اطلگها شسوي يعني
مياس.. واخواني ؟؟
اشرف.. شبيهم اخوانچ
مياس.. ناوي تبقيهم يمك
اشرف.. طبعا قابل اعوفهم الهاي ال×××× حتى يطلعون عوج مثل تربيتها
مياس.. زين منو الهم اذا انت طول النهار بالشغل
اشرف.. ما ادري مياس والله ما ادري
مياس.. عاينت الشهم : بابا اذا طلگت سميحه اني ارجع لهنا حتى اظل يم اخواني....
يتبع..