#مبرر_خيانة 🔥
Part 3
الكَاتِبة هَامِي
_______________
العِشقُ المُحرم 1
شنو لمخليني نتحمل معانة هذي ؟... ليش مانخلص روحي من كل لي عايشته..!
كيف يعني؟
إنتحار مثلاً دقائق بسيطة وروحك تطلع لِسماء حتى ربك وملائِكته يغفرلك العذاب لي عايشته...
سألتها لروحي مع صراع فكري وانا نفتح في الدرج شفت فيه أدوية ...
صح براء مع كل العذاب هذا أختصري وأنهي حياتك ..
شنو لِكان مصبرني على المر هذا ..؟؟!
جاوبت الخير والشر لجواتي ...
يمكن لأنه حياتي هكِ زي حياة كل الناس سبق وقتلكم انه زواج امي وبوي ومشاكلهم وضرب خوتي لنا نحنا البنات وعرايكهم في بعض كلللللللللللل شي عايشته هو كان يهيئلي عن الحياة لبرا حوشنا يعني كل الناس هكِ نفس عيشتنا هلهم كثروهم وصعبت عليهم التربيه ؟ ولا اثنين متجوزين متفاهموش وبعدها انفصال نهائي وضحية اطفالهم !!
كل فكري كان انه حياتي هي نفسها حياة كل الناس ...
لما نتعب نغمض عيوني ونتفكر انه بنكبر وفي مستقبل مخليني نقاوم ...نتخيل انه مفش حد متحكم في اني نخدم ونطلع مصروفي بروحي مفش إهانات مفش ضرب ....
مجرد نتخيل نتريح...
مؤمنه إنه لكل شي نهاية والحياة مراحل وأكيد المرحلة هذي ح تنتهي ...
يعني في تطور عن قبل وانا صغيره كنت ننضرب كل يوم وتوا ممكن مرتين في الأسبوع نكبر شوي اخره ح يخف اخره صح ؟!!!
ضحكت على غبائي ولعنته وانا نصكر في درج ...
مانقدرش ننهي حياتي وفي رقبتي اخواتي صغار خلتهم امي عمرهم 3سنوات وتوا عمرهم 14سنه ،، يكفي خالد وعبدالسلام لضاع مستقبلهم اول ماكملوا من اعدادي سيبوا قرايتهم وبدو يشتغلوا من لسان بوي لأنه مش قادر على مصاريفنا ومصاريف عياله من مرته جديده... يخدموا اي شي ومنعرفوش شن خدمتهم اصلاً اهم شي عند بوي انهم يجيبوا فلوس وبدو يدخنوا بسرقه والله اعلم شن تاني مخبي ...
كل مانشوفهم قلبي يتقطع على خوتي لضاعوا شلت همهم مع كل قرش يجيبوا نقول يارب يستر من وين مصدره رغم مكسبهم القليل ...
____________
ياريتنا مزلنا صغار ....
كانوا ذكرياتي معاهم ولعبنا في شارعنا هم النبض الشرياني لتجديد الروح لجواتي
...
هم الذكرة لوقت تخطر على بالي ترتسم الإبتسامة على شفايفي لا إرادي ...
ياريتنا قعدنا صغار ماكنش تحاسبنا على الحرام ولا فهمنا معنه... وماكان يعقوب تغير علي ...
______________روتيني
كنت قبل لنطلع المدرسة نوض من الفجر نظم الحوش ونبخره ومانخلي شي عشان مرت بوي ماتفتح فمها علي ....نطلع للمدرسة لكانت مهربي الجميل نحاول ننسى فيها كل ضغط حوشنا ....برغم اني كنت نتعرض لتنمر من طالبات اكبر مني.....
وسألت نفسي ليش يضايقوا في معرفتش يمكن لأني مجهولة من نوع لمنطلعش ولا يعرفوني ولا يمكن لفت نظرهم منظر ملابسي القديم وباين فيه الفقر ...او لأنه ياسين مايفرقش في ولا لحظه ولي يتعرضلي يتعارك معه!!
...نطلع من المدرسة نجهز الغداء وونغسل المواعين ونقعد على قراية خوتي علاء ويحي كبرو وصلوا أعدادي خفت عليهم يضيعوا زي خوتي نراقب فيهم على طول ودايره بالي من وكلتهم و قرايتهم حتى اصحابهم مش اي حد نخليهم يرفقوا تعلقت بيهم لأني ربيتهم عمركم شفتوا طفلة تربي أطفال؟؟!!
نكمل منهم ونطيب العشاء نشوف لناقص بوي وخوتي ونخش نقرا ،،، مهما ضغطت على سالمة في شغل الحوش ولا في طلباتها ماهملتش قرايتي مرات ننحرم من النوم ونسهر لصبح نقرا كنت نشوف في كتباتي هن خلاصي الوحيد هن لينتشلني من عذابي وتحكمهم في حياتي ...
مرن يومين ما يحكيش معي يوصل في وهو ساكت ونروحوا وبرضوا ساكت ... من أول ماصارحني انه يحبني وتعاركت معه لأنه زي خوي وهو قالب علي ....
في غيابه زعلت وبكيت بقهر حسيت بنقص كبير في حياتي زي ما حسيت لما غاب عني يعقوب حسيت باالكسرة ..بس هو لي اختار انسحب من حياتي بدون سبب قلت يمكن لأنه برزت شخصيته وكبر كان خجول وانطوائي عكس ياسين ...
كرامتي ماسمحتلش نسأل يعقوب ليش رسميه هذي بينا ؟!!
❤❤❤الكَاتِبة هَامِي ❤❤❤
بعد العشاء خالد وعبدالسلام زي العاده مش قاعدين وبوي مع صاحبه في مربوعه ...
مشيت لي سالمه قتلها ماشيه لي سلوى نبي منها كراسة ...قالتلي باهي مطولش
لبست وشاحي وعباتي وطلعت عندهم طقيت فتح يعقوب ...معرفتش ليش ارتكبت كان ليل وظلام مش وضحات ملامحه كسرت الصمت لقعد دقايق
احمم نبي ياسين قاعد؟؟
تحرك من الباب ومد ايدا لداخل بمعنى خشي ..بس ليش ميحكش معي؟
فته وخشيت لقيت امهم وسلوى سلمت عليهم وطلعت انا وياسين لجنان
لي امتا متحكش معي
ياسين:: منعرفش انتِ لدرتي جو الأستعباط ودرتيلي دسكة الخوت ...
-ياسين فوت جو هذا وخلنا زي ما كنه منقدرش نتحمل جفاك
ياسين:: مش ح يتغير شي براء ولقلته مش ح نتراجع عليه ... تبي تفهمي ولا لا قاعد نحبك ومش زي حبي لي سلوى
حطيت ايدي على فمه خفت حد يسمعه وبديت نبكي
ياسين الله يربحك متوجعش قلبي انت عارف حياتي كيف وضعنا شنو خلينا كيف ما كنه ومتحرمنش من خوي لحبيته اكثر حتى من خوتي لي من دمي ...ماساد معامله يعقوب بتخليني حتى انت ..
ياسين خفف حدته وحن علي
باهي خلاص هو على اساس بيتغير شي يعني معش تبكي تحرقي في بيهم ...
ابتسمت بفرح وانا ندمع لأنه اقتنع او حاول يقتنع!
-تذكر لما كنه صغار وقت نبكي تبكي معي 😄
ياسين:: وتذكري انك كنتي ومازلتي غبيه😂
-والله ماغبي غيرك لو ما انا ما وصلت لثانويه😝
ياسين:: هاهاها ها😒 ... مش يعني انك شاطره في قرايتك معنها انك ذكيه انتِ بذات كتلة غباء 😑
ضربته على كتفه
خلني ساكته متخلنش نحكي عار طفولتك من كان يقول كبزه😂 عند ماوصلت صف ثالث وانت تنطق الخبزه غلط😂
ياسين :: متفتحش جبهه على روحك والله الا نخليك تبكي بدموعك وانا نفكر فيك تذكري لما الأبله قالت اللون الاسود زي شني قلتي مرعي لمعانه😂 والولد قعد يبكي مسكين وتعاقبتي وقتها 😂😂😂
ولا نفكرك بِ ...
حطيت ايدي على فمه وقعدنا نتعاركوا
خلاص سادك نعرف ماتسكتش الا ماتجبد ملفاتي سود 😭😭
ياسين يضحك تستاهلي انتِ لبديتي شوفي انا توا راجل ماتفكرنش بشي من طفولتي 😏
-باهي تتفكر لما كنت تلم في بزوي"" حلزون"" وديرله سور ويطلع فوق الحيط وتقول كيف هربوا ياغبي😂😂😂😂😂
ياسين:: اخخخخخ كنت دايرهم خرفان😂😂😂
-ماهو لأنك ستيوبد😂💔
خلاص بطل ضحك توا بكره الأبله تسأل 😭
ياسين:: ييييي انا شن خششني معاك انجليزي بس😭
يلا توا نجيب جاكتي نوصلك وبعدها نقرا
-تمام نسبقك عند باب
كنت بنطلع من ممر جنان كان مظلم شفتا مصبي مريت من جنبه مسك ايديا وشبكهم في ايديه جمد دم في عروقي رعشة جسمي وقتها زي البرده كل لنسمع فيه دقات قلبي لساني ثقل معرفتش نحكي رجلي ميبوش يتحركوا !!!.. مشفتش لا ملامحه ولا تعابير وجهه مكنش مقابلين بعض كل واحد في اتجاه لكن ليش فكري انشل خفت يكون حس بقلبي ورعشته ؟ زعما هو كان يسمع فينا؟ ليش ميحكش توا وليش مسك ايدي شن يحس وشن يبي يقول وانا ليش منتحركش ونطلع بسرعة من هنا ليش حاسة انه بي اي لحظه ح يغمى علي ؟؟؟!!!!
قاطعنا من هدوء لمستنا ودقات قلوبنا العياط لكل الشارع سمعوا سحب ايديه وطلعنا نجروا ....
شفت بوي يعارك في خالد ولزه وكل شارع يسمع فيه
هذا صايع انا خلفت عيال حرام فاشلين جايني توا ياكل ويشرب مش متحشم على وجه راجل مايخدمش ويجيب مصروفه صياع لعنة الله عليهم يبوا يقتلوني لمدرتش امهم بيديروها في ...
هذا بوي وهذا كلامه لخوي قدام الجيران ومكنتش اول مره ولا ح تكون أخر مره كان مهزل بينا قدام الناس ومحطم شعورنا بكلامه الجارح لنا كلنا وخاصة عبدالسلام وخالد أدمروا نفسياً منه
خالد يبكي....
عمي صافي اب ياسين
عيب ياراجل هذوما عيالك متجش هكِ خاويهم فجعت هلك والناس عقاب الليل
بوي:: هذوما عيال حرام صياع غضب مايسمعوش في كلامي و........
صكرت ذاني وانا نبكي من عارنا وجريت نجري جوا
شنو لصار كنه باتي يعارك في خالد اخره؟؟
سالمه:: بوك مريض ومن يومه هك .. مكسد جاته على خالد
خش علينا زي ثور الهايج
ضربني كف من قوته طحت على الأرض
وين كنتي فى ليل يا...........
سالمه تبعد فيه وين تبي تكون يعني ماشفتها طلعت من حوش عيت الصافي كانت تبي كتاب مشتلهم وانت معاك واحد
هددني بِ اصبعه
مره اخره نقص رجليك جربي تطلعي بلا امري يابت.ال.....
ايديا على خدي ونهز في راسي وخلاص
قعدت نقرا ونبكي سألت سالمه على خالد قالت خذا يعقوب بايت عندهم وعبدالسلام روح وربي يحبه لبوي كان راقد وقتها ....
________________
ثاني يوم صبح طلعت من الحوش ويعقوب برا ابتسمتله نبي نقوله صباح الخير بس خش بسرعة لحوشهم وطلع ياسين ومشينا المدرسه وانا نسأل في روحي شن لتغير من مبارح لليوم ؟؟
مشى روتينا المعتاد ... لما روحت من مدرسه كانت مرت بوي تبي تمشي لهلها معها عيالها وبوي واخذهم كان يوم خميس ..
الحوش فاضي مفش الا انا ويحي وعلاء كنا طايرين من الفرحة واخيراااا يومين هدوووء
نظمت الحوش بنشاط وشغلت أغاني وطلعت مذكراتي وقعدت نكتب جتنا سلوى قالتلي سراج روح تعالوا تعشوا عندنا نديروا سهره زي زمان ..فرحت كنت مريفتله ولي 5شهور مش شايفته كان في كلية العسكريه ....
نظمت اموري وطلعنا انا واخواتي
حضنته وسلمنا عليه وقعدت نبكي كان ناقص بكل وتعب تدريب باين عليه
مسحلي دموعي وطبطب علي
والله انا بخير انتِ وامي وسلوى حساسات 😄
-الحمدالله لرجعت بسلامه والله مخلي مكانك
سراج:: خلاص فوتوا نكد نبي نطيبلكم الليله مكرونه على الحطب😍😂
-من امتا تعرف اطيب 😋
سراج:: من يومي يابنت معتمد على نفسي💪
فعلاً صح من يومهم هك يغسلوا ملابسهم بروحهم ينظموا دارهم يطيبوا لو امهم مش قاعده عمرهم ما طلبوا من اختهم ولا تسلطوا عليها
باهي ليش خالد وعبدالسلام مش هكِ ؟!! من السبب في اتكاليتهم وعدم مسئوليتهم على حاجتهم؟!!
قعدنا في جنان انا وياسين وسراج وسلوى ويعقوب وخوتي وامهم وبوهم
سراج يطيب ومعه بوه ولي شوفهم كيف بصارتهم يقولوا صحاب مش اب وابنه!!
عمى صافي:: مشاءالله يابراء لقيت مديركم ويشكر فيك براوا عليك يابنتي حتى تخصصك ليه مستقبل شن تبي تخدمي
رفعت عيوني في كان مقابلني نبي نتكلم قاطعني ياسين
تعرفهم الاثار تبي تشتغل مرشد سياحي تذكري يابراء 😂
ضحكت وشفت ضحكت يعقوب لي من سنين نسيتها يعني نفس ذكره لجت في بالي جاته توا ؟!!
-اهاا وانت معي يا شاطر توا نقولهم من بقايا طليان😂
ياسين:: لا انا كان كملت ثانوي ماكيفي حد😢
-في هذي معاك حق🙊😂
تعشينا جنب بعض صفره ليهم وصفره لنا نحنا نسوان وكل جو ضحك وذكريات حلوه
قعده خفيفه ولطيفه هادية بس ليش قلبي يرعش!!؟
شربنا شاهي أخضر طيبه يعقوب على نار ...
عمي صافي مدلي برتقال
خوذي براء
بحركه لا اراديه
يعقوب لا هذا حلو متكلش فيه عطيها حامض ..واشر عليه
فرحت وابتسمت انه مزال متفكر شن نحب وشن نكره ...
مزلت تذكر 😀
مكملتش كلامي الا هو صبى من مكانه يبي يطلع ونظرته تغيرت
ام ياسين:: وين ماشي
يعقوب عند باب
ماشي لي صالح نكسد معه
حزت في نفسي وقتها ليش تناقض هذا شن درت انا؟!!
كملنا سهريتنا وطيبوا كاكاويه على نار وهدرزنا وانا بالي مره معاهم وعشره لا
خشيت لحوش نلبس عباتي وانا طالعه قعمزت على دروج نلبس في سبيدرو ويعقوب يبي يخش وقف على نفس درجه لقعمزت عليها
وصارلي نفس شي جسمي فشل وقلبي ماوقفش طبووووول ....ولساني ثقل منعرفش ليش منحكش ؟؟؟!
قالي ....
وانتظريني على وعدنا خليك ماتنسيني عدي نجوم الليل وانتظريني ...
شفتا لي سماء ونجوم وفي لحظات اختفى ماكأنش موجود
وعدنا ؟!!
#يتبع
أرئكم وتوقعاتكم ....❤❤
واي شي حابيني ناقشه في روايه ❤❤
ليعجبني افكاره نظيفهم 😍