مياس قلب الشهم

البارت السابع والعشرون

#مياس_قلب_الشهم

للكاتبه #لبنى_الموسوي

يتألم البشر .. ينامون متألمين يستيقظون متألمين
حتى المباني تتألم حتى الجسور والزهور تتألم
كل شيء في هذه الحياة يتألم بطريقه او بأخرى
حتى الارواح تغادر الدنيا بألم فراق الأحبه 💔💔

________________

مرت الايام بصعوبه لأن موت نهى كسرني واخذ كل حيلي

وصلت مرحله ما اطيق اگعد بالبيت لان كلشي بي يذكرني بأيامي وياها بلأخص غرفتي

لذالك صرت اخلص يومي بالشغل حتى اتعب نفسي ومن ارجع يا دوب اشوف بنتي واصعد انام على وجهي گبل بلا ما افكر بشي

صار يوم الاربعين چنت گاعد بالمعارض اجاني يوسف

يوسف.. السلام عليكم

شهم.. وعليكم السلام حبيبي

يوسف.. شلونك

شهم.. برحمة الله

يوسف.. اگولك انت شايف خلقتك بالمرايا لو لا ؟؟

شهم.. ليش شبيها ؟!!

يوسف.. گول شنو الما بيها
يمعود فوت زين من يمي لعبت نفسي منك

شهم.. ما عاجبك لتعاين الچهرتي

يوسف.. ههههه شهم بشرفك

شهم.. يوسف فك عني ياخه ما ناقصك وروح ابويه

يوسف.. والله حرام عليك الدتسوي بنفسك حتى الله ميرضاها

شهم.. ليش شمسوي قابل ؟!!

يوسف.. ها تريد اعددلك
ماشي استلم لعد

دفنت روحك بالشغل من ماتت نهى لحد اليوم بحيث حتى ظهرك انكسر

بنتك هاملها يا دوب تجي اخير الليل تبوسها وتصعد الغرفتك حالك حال الغريب

اهلك .. گلي بالله من شوكت گاعد على سفره وحده وياهم ؟؟
ميحتاج لتصفن اني اجاوبك .. من قبل لتموت مرتك لان حضرة جنابك متلفي للبيت إلا تالي الليل بحيث حتى ميلحگون يشوفوك

شهم.. الضاهر الحجيه ممقصره وياك
مسويتلك جدول يومي تحچيلك بي اخباري من اگعد لحد ما انام

يوسف.. هو هذا الـ الله گدرك علي

شهم.. شتريد مني يوسف

يوسف.. اريدك ترجع شهم القديم الي چنت من اگعد ويا انسى حتى روحي من گد الونسه والضحك

شهم.. بعد كلشي صار !!! صعب كلش يرجع

يوسف.. يا اخي اصحى على نفسك
لا مهيب ولا نهى يرضون بالشي الدتسوي بروحك

هذا امر رب العالمين وبتصرفاتك هاي دتعترض على امره بلا متحس على روحك

اسألك سؤال بس بروح اعزازك تجاوبني بصراحه

شهم.. تنهدت : اسأل خويه اسأل

يوسف.. وحدك لاحك الوجع من هل مصيبه

شهم.. لا اكيد

يوسف.. لعد ليش كلنه گدرنه نتجاوزها إلا انت ؟!!

شهم اسمعني مثل ما انت فقدت اخوك اني فقدت اختي
ومثل ما فقدت مرتك اني فقدت ابن عمي واخويه الصغير العشت ويا احلى ايام عمري

مع ذالك اگوم واگعد اصيح الحمد لله والشكر على كل حال لان هذا حال الدنيا ومن ربك الصبر والنسيان

اصحى على روحك خويه حتى توگف فوگ راس بنتك وتداريها بماي عيونك

خلي نهى ترتاح بگبرها لمن تحس بيك مرتاح ومريح الطفله الچانت تحلم بيها كل حياتها وبنفس الوقت ترحم امك من العذاب لان دتموت بسببك وانت متدري

شهم.. سويت الثواب الگتلك علي لو لا

يوسف.. شنو عود دتضيع السالفه
عموما اي سويته والكل سأل عنك .. عفت ولد خالتك يمهم واجيت اشوفلي چاره وياك

شهم.. صار مثل متريد .. بس لتلح زايد

يوسف.. العصر مرلي نروح للحلاق سوه

شهم.. خليها على غير يوم

يوسف.. لا شهم اليوم يعني اليوم

شهم.. ماشي عود نتخابر

يوسف.. يلا متجي ويايه

شهم.. لا اخيك .. روحي طافره بخشمي مالي خلگ لأي شي

يوسف.. براحتك
صار لازم اگوم دينتظروني

شهم.. الله وياك سلملي ع الكل

يوسف.. يوصل

بعد ما راح گعدت افكر بكلامه ساعه كامله لحد ما لگيته هو الصح : عشت عمرك تفكر بالكل قبل لتفكر بنفسك شهم .. شجاك هسه وصرت اناني لهل درجه

امك
بنتك
مياس
اهلك والناس اليحبوك
كلهم بحاجتك .. مو كافي الضيم العاشوا بي كل هالفتره حتى تجي تزودها عليهم بتصرفاتك هاي

شهم.. جهاااد

جهاد.. نعم خالي

شهم.. ظل عندك شغل لو لا

جهاد.. لا خلصت
ما الله يهديك وتجي ويايه للبيت

شهم.. اي راح اجي

جهاد.. احلف بالله !!

شهم.. ههههه ميحتاج احلف هاي گمت گدامك

جهاد.. لا وتضحك فوگاها
الله عليك خالو اني بحلم لو علم اگرصني خلي اتأكد 

شهم.. راح اهفك بعجل حتى تتأكد

جهاد.. لا لا صايرلك شي انت لان ابد مو طبيعي
بركاتك يشيخ يوووووووووسسسسسسسف

شهم.. ههههه وجع لتصيح دشوف العمال شلون گاموا يعاينون

جهاد.. خالي لو ما عيب إلا اهزلك چوبي هنا

شهم.. شو خل ارجع اگعد اشرفلي

جهاد.. لا لا الله عليك
سكتت والقرأن بس امشي

شهم.. ديلا فضني

رجعت للبيت گلت المياس تصب الغده ومن شفت الفرحه بعيونها وتذكرت جهاد وتصرفاته لمن عرف راح ارجع ويا تأكدت من نفسي شگد جنت غلطان وظالمهم ويايه

خلصنه الغده سألت مياس عن نهى لأن ردت اشوفها قبل لا اصعد بس للاسف چانت نايمه

رحت لغرفتي نمت گبل من التعب لأن مدا انام هالفتره زين .. حسيت على صوت موبايلي يدگ رسائل

عاينت الساعه بلاربعه إله خمسه .. اخذت الجهاز شفت رقم بالوتساب فتحت البرنامج وانصدمت بصور مياس بالشارع وعماد لازم ايدها

گمت على حيلي اگلب بالصور مثل المخبل واحس عقلي طفر من راسي .. فجأه انحذف الوتساب من الرقم

دگيت علي ع السريع طلعلي مغلق هنا اني تخبلت صدگ وبعد ما گدرت اسيطر على اعصابي

طلعت ع السريع اصيح مياس شفتها دتصعد الدرج جايه تگعدني .. عطت حيل

شهم.. ميااااااااااس تعالي بسرعه

صاحني ورجع للغرفه .. ظليت جامده بمكاني صافنه وخايفه بنفس الوقت لأن شكله چان ميبشر بخير بحيث اعصابه چانت واضحه على ملامحه الحاده

نزيت من مكاني من سمعته صاح

شهم.. وينننننننننننننچ

صعدت بخطوات بطيئه لأن مدا اگدر احس بجسمي من الخوف بحيث بالگوه وصلت للغرفه

طبيت لگيته داير ظهره مدري شديسوي بس حس عليه عاينلي بخزره وفات من يمي رگع الباب حيل فززني من مكاني

مياس.. بتردد : ش ااا شبيك شهم !!

شهم.. خليت الموبايل بوجهه امرر بالصور : شنو هذني ؟؟!

فتحت عيوني من الصدمه لمن شفت صوري ويا عماد وهو لازم ايدي يمكن بالسبع صور وكل صوره چانت توحي الشي مختلف عن الثاني

رفعت راسي صافنه بوجها محتاره شلون اشرحله الموضوع .. دنگت منه خايفه شفته قابض ايده من العصبيه عرفته ديحاول يسيطر على نفسه حتى ليأذيني 

مياس.. شتريد احچيلك

شهم.. شوكت طالعه بدون علمي !!!

مياس.. بالفاتحه مالت نهى الله يرحمها تحديداً ثاني يوم بلليل لمن تخربطت واخذوك ايهاب وجهاد للمستشفى

شهم.. وليش طلعتي ؟

مياس.. انكسرت الممه مالت نونه وچانت جوعانه كلش ومحد يمي فـ اضطريت اطلع اشتريلها ومن دا ارجع شفته لهذا الميتسمه

شهم.. لتقطرين بالحچيييييييييي

مياس.. رجفت من صوته : على كيفك عفيه والله گلبي راح يوگف

شهم.. احچي مياس
احچي ولتطلعيني من طوري

مياس.. حچيتلك شتريد بعد

شهم.. جريتها من ايدها ورفعت الموبايل لوجهه : وهاي الصور شنووووووووو !!

مياس.. نزلت دموعي : والله هو لزمني ومن گتله عوفني الله يخليك رفع ايده وابتسم مثل مدتشوف بالصور
ها وعاين الايدي شايله جيس مال صيديله حتى تصدگ

شهم.. عتيت ايدها حيل : ممچذبچ اني
بس اريد تفسريلي سبب تصرفاتچ الغبيه حتى لا ابتلي بيچ هسه

مياس.. شتريد احچيلك بس گلي .. والله راح اتخبل 

شهم.. شصار بيناتكم بالضبط

مياس.. كلشي ما صار
رحت اشتري الممه ومن رجعت حسيت واحد لزمني من ورى .. درت وجهي تفاجأت بعماد يضحك بوجهي

گتله عفيه عوفني رفع ايده وابتسم ركضت للبيت وقفلت الباب ورايه هذا كل الصار

شهم.. وليش ما حچيتلي بوقتها

مياس.. انت چنت متخربط واخذوك للمستشفى بهذاك الوقت
خفت اگولك خصوصا لمن عرفت من جهاد بسبب ضغطك ردت تنضرب جلطه اسم الله عليك

شهم.. لطمت وجهي بأيدي : بطلي غباء
بطلي غباء
بطلي غباااااااااااااااااااااااء

لا ارادياً دموعي گامت تجري لمن صيح عليه .. نزيت بمكاني من عاط بيه وجرني من ايدي حيل

شهم.. وگفي بچي وكمليلي السالفه

مياس.. عفيه شتريد تعرف بعد ؟؟ والله حچيتلك كلشي

شهم.. شصار وراها لان ممعقوله يعوفچ من كيفه اذا مچان مخطط المصيبه براسه

مياس.. لا ما صار

شهم.. لتچذبييييييييييييين

مياس.. شهگت بحرگه : اي صار بس هد ايدي وجعتني والله

شهم.. كافي يمعوده كافييييييييي
يلا هديتها بس احچي بسرررعه

مياس.. ثالث يوم الفاتحه بعد ما طلعتوا كلكم وظليت وحدي .. اندگ الجرس رحت اشوف من الشباك لگيت ورقه بالگاع طلعت ع السريع اقراها وچانت من عماد كاتب بيها :

ها يا حلوه شلون تردين اطب للبيت
تفتحيلي الباب
لو اطفر من الحايط
لو تختصرين عليه كل هذا وتجين ويايه بارداتچ

شهم.. بس لا فتحتيها !!

مياس.. لا طبعا

شهم.. لعد ؟؟!

مياس.. ركضت لداخل البيت وقفلت الباب
شويه ورجع الجرس يندگ
رغم شفت ظل بنيه جوه الباب بس ما فتحت لان خفت عماد مسلطها عليه لحد ما اتصلت انت وگلت تبارك بالباب افتحيلها

شهم.. هذا الحچي شلون متحچي الي بس فهمينيييي

مياس.. والله خفت عليك لان مريض وبنفس الوقت چنت لاهي بمصيبتك يعني مو ناقصني اني ومشاكلي

شهم.. وليش ما حچيتلي بعدين ؟؟
زين عوفچ مني .. ليش ما حچيتي الايهاب او جهاد ع الاقل حتى يتصرفون ويا قبل لتصير كارثه واحنه ما حاسين

مياس.. ليش اني دا اشوفك حتى احچي
اما عن ايهاب وجهاد فـ استحيت احچيلهم والله صعبه

شهم.. حجج مياس حجج
انتي لو تردين تگوليلي بالصار چان لگيتي الف فرصه وفرصه حتى تحچين بيها بس ظلي جبانه وثوله .. ظلي ولچ ظلييييي

حچه هيچ وكفخني على راسي بقبضة ايده بحركه خفيفه .. عاينتله ومطرت عيوني دموع دار وجها عني وعاط بيه حيل

شهم.. اطلعي بسررررعةةةةةةةةةةة

نزلت اركض وما اشوف گدامي من البچي .. عاينت التبارك واگفه صافنه ع الدرج وشايله نونه

اخذتها من ايدها ورحت الغرفتي ع السريع .. خليت نونه ع الچربايه حللتها وگعدت اعاين عليها بس دموعي متقبل توگف من القهر الچنت احس بي وما اعرف شنو السبب !!

يمكن لأن حسيت بلأهانه او يمكن حسيت بنفسي صدگ غبيه واستاهل كل الديصيرلي

اندگت الباب .. مسحت عيوني وصحت : تفضل

تبارك.. حياتي انتي زينه ؟؟

مياس.. اي حبي

تبارك.. ليش دتبچين ؟! وليش شهم چان يصيح عليچ ؟؟
احچيلي اذا حابه تفرغين گلبچ

مياس.. بصوت مخنوگ : بعدين عفيه

تبارك.. ماشي حبي ع راحتچ بس اهدي شويه ..
اگول اگدر اظل يمچ لو لا ؟؟

مياس.. طبعا تعالي

گعدت ع الچربايه تلعب ويا نونه واني اعاين عليهن .. گدرت التهي وياهن شويه وانسى الصار

نص ساعه واندگت الباب .. خليت الحجاب على راسي واشرت التبارك

تبارك.. تفضل

دخل شهم بس ما تفاجأت بي لان چنت متوقعه جيته علمود يشوف بنته
گامت تبارك طلعت بسرعه وبقينه وحدنه

سد الباب وتقرب لنونه بلا ميعاين عليه
گعد ع الچربايه لزم ايدها يلعب وياها .. تدنيت منه لان صار بصفي كلش

شهم.. شلونها الحبابه ؟؟
دتنامين لو المغص ميخليچ
حياتي من فدوه رحت الهل وجه الحلو

صفنت علي شلون يحچي وياها وهو مبتسم اول مره اشوفه يحاچيها من اجت للدنيا لليوم مجرد چان يبوسها ويروح

بعدني صافنه عليهم لحد ما انصدمت من گلي وهو مدنگ عليها :

شهم.. اسف

- بعد ما صعدتلي مياس وفسرتلي سبب هالصور ما گدرت إلا اكفخ راسها على الغباء الشايلته

عاينت عليها دموعها نزلت بسرعه .. ما تحملت درت وجهي وطلبت منها تطلع لان ادري بروحي من اصير عصبي افقد السيطره على تصرفاتي

مچنت حاب أأذيها بس مو بيدي الشي الصار طير عقلي من راسي بحيث گوه لزمت نفسي عنها

اول ما نزلت شلت موبايلي ورجعت اگلب بالصور و ويا كل صوره اصعد للسما وانرگع بالگاع من القهر

شهم.. ولك عماد وين تروح مني
وچفوف ابو فاضل اذا الزمك إلا اعدمك حياتك يا ناقص

رجعت خابرت الرقم هم مغلق اخير شي قررت اتصل بصديقي يشتغل بالمكافحه بلكت يگدر يوصل اله ويريحني

شهم.. ماهر خويي شلونك

ماهر.. هلا والله عاش من سمع هالصوت

شهم.. تعيش حبيبي
رايدك بشغله مستعجله

ماهر.. هنا الحچي يعني متذكرني إلا وكت المصالح

شهم.. اگلك لتظل تلغي لغوه زايده
مو دتشوفني ماكل ××× باثنين اديه على شنو هالحچي الزايد منك بعد

ماهر.. هههههههه بشرفك انت شهم لو مبدليك
ولك اول تالي شبيك تسودنت

شهم.. اخيك اسمع مو وكت شقاك الماصخ

ماهر.. هههههههه يلا يلا
احچي اسمعك

شهم.. عماد مجبل سرحان

ماهر.. قاطعني : هذا وين يشتغل بتنظيم القاعده

شهم.. من اشتعلت عشيرتك اذا تحچي صدگ
اني گاعد افور وانت نازل دگ شقه
يابه مو وكتك والله العظيم مو وكتك

ماهر.. هههه احچي شبي صخام

شهم.. گاعد ادور علي من فتره بس ماكو كلما يظهر يرجع يختفي بلمح البصر

ماهر.. عندك رقمه ؟؟

شهم.. اي عندي بس مغلق

ماهر.. ميخالف انطينيا

شهم.. هسه ادزه الك برساله

ماهر.. ما گتلي شعندك ويا ؟!!

شهم.. سالفه طويله نتشاوف وافهمك
بس اخيك اريده بأقرب وقت

ماهر.. تتدلل بس هااا من هسه اگلك عليها عزيمه هاي

شهم.. عمي الي تريده بس خلي الزمه بيدي

ماهر.. اعتبره جوه رجلك صار مو بس بيدك

شهم.. الف رحمه على هذاك الاب الطيب

ماهر.. ويرحم الوالد صديقي

شهم.. يلا تريد شي

ماهر.. رايدين نشوفك لتصير بياع

شهم.. هههه مع الأسف والله اني بياع ولك ؟!!
عموما اوعدك نتشاوف بس خلي افرغ شويه

ماهر.. ننتظر ونشوف بياع لو لا
ههههه يلا اخذ راحتك

سديت الخط ودزيتله رقم عماد .. گعدت بمكاني تذكرت مياس انقهرت عليها كلش ادري تصرفاتها نابعه من طيب گلبها وخوفها عليه من عماد ومشاكله

نزلت جوه ما لگيتها بالصاله .. رحت لغرفتها اول ما دخلت صارت عيوني بعيونها المنتهيه من البچي

انقهرت من نفسي كلش لان اذيتها .. گعدت العب ويا بنتي لحد ما اعتذرت منها بلا ما احس على روحي

ما جاوبتني رفعت راسي عليها شفتها صافنه بوجهي عرفتها انصدمت من تصرفي

شهم.. مو قصدي اضوجچ بس انتي لازم تعذريني لان الشي الصار چبير كلش وچان ممكن يتحول الكارثه لو ما الله ستر بوقتها
والسبب الاول والاخير بيچ مياس مو بعماد

مياس.. اني ما قصدت اضم عليك بس والله چنت تعبان ومريض .. ما ردت ازيدها عليك بمشاكلي

شهم.. بويه شعليچ بيه
واذا مريض شاكيلچ اني حتى گاعده تستخطيني

مياس اسمعيني .. هذا الصار ما اريده يتكرر مو بس بموضوع عماد ،،، لااا
اذا اعرف ضامه عليه اي شي مره ثانيه راح اخرب وياچ وينتهي الاحترام البيناتنه وهاي اني حذرتچ

مهما چان الوضع حتلو دا انازع گدامچ هم تجين وتحچيلي ومالچ علاقه بالباقي تفهمين لو لا

مياس.. اي
ان شاء الله متتكرر

شهم.. ارجع واعتذر منچ على الشي الصار فوگ

مياس.. لا عادي مصار شي

شهم.. يلا لعد اريد چاي منچ قبل لا اطلع

مياس.. من عيوني

شهم.. تسلم عيونچ

گمت من يمه وهو ظل يم نونه .. طلعت لگيت تبارك گاعده وحدها بالصاله بس شافتني گامت

تبارك.. ها حبي تصالحتوا

مياس.. هههه ومنو گلچ احنه زعلانين

تبارك.. لا بطه ... هاي وصوت شهم چان واصل السابع جار

مياس.. هههه اي تصالحنه
شنو ما گعد جهاد ؟؟

تبارك.. عوجت حلگها : لا شيگعده هذا

مياس.. تعالي نسوي چاي حتى ترحين تگعدي يشرب ويانه

تبارك.. لا عيني اخجل اطب الغرفته وهو موجود

مياس.. هههه دمشي لچ

سويت الچاي وصحت شهم .. دا اروح اگعد جهاد فتح الباب وصار بوجهي

مياس.. اجيت اگعدك

جهاد.. گاعد من زمان

مياس.. تعال اشرب چاي ويا خالك

جهاد.. هسه اغسل واجي وارچ

رجعت للصاله شفت ايهاب هم موجود .. رحت الغرفتي گمطت نونه طلعت خليتها بحضني وگعدت يمهم

تبارك.. شهم شوكت يجن النسوان ؟؟

شهم.. بلليل اروح اجيبهن

تبارك.. اي حتى توصلني من طريقك

مياس.. وين ظلي متونسين وياچ

تبارك.. لا حبي ارجع احسن

مياس.. عاينت الجهاد : لعد خلي جهاد يوصلچ

جهاد.. رفع حاجبه مستغرب : وشنو الفرق !!

مياس.. مو خالك يتعب رايح جاي فانت وصل تبارك وهو يجيب النسوان

جهاد.. ماكو مشكله

درت وجهي على تبارك لگيتها صافنه علي بس ضايجه ما اعرف ليش .. للمغرب صلى شهم وراح يجيب النسوان

رحت الغرفتي نومت نونه بسريرها .. دا اطلع اجتني تبارك

تبارك.. حبي رايحه اني

مياس.. الله وياچ حياتي
بس الله عليچ لتگطعين تعالي دائماً

تبارك.. تتدللين
ممكن اخذ رقمچ لو متقبلين

مياس.. لا ليش ما اقبل بالعكس هيچ حتى نظل نعرف اخبار بعضنا .. وغمزتلها

تبارك.. ههههه والله انتي عسل

مياس.. انتي العسل
يلا انطيني موبايلچ اكتبلچ الرقم

تبارك.. تفضلي

شويه وراحت هي وجهاد .. ظل ايهاب يمي لان شهم وصى ميطلع إلا من يجون اهله

وگفت بالمطبخ اسوي العشه نص ساعه وسمعت اصواتهم بالصاله .. كملت شغلي وطلعتلهم

مياس.. الله يساعدكم

منال.. الله يسلمچ حبيبتي

مياس.. سويت عشه اصب لو بعد ؟؟

منال.. لا هسه تعبانين عود نرتاح واني احمي

مياس.. لا حبي شوكت متردون بس گوليلي واني احمي الكم

منال.. متقصرين ورده

ساعه يلا گدروا يتعشون .. ظليت گاعده يمهم اسمعهم يسولفون عن الاربعين للعشره ونص اجه شهم

تفاجأت من شفته مزين وراجع شكله مثل قبل واحلى بعد لأن صارله فتره مبهذل نفسه من ورى القهر .. فرحت كلش من حسيت بي بده يرجع الحياته الطبيعيه وگدر يتجاوز هالمحنه واخيراً

گعد يم الحجيه اقل الساعه وصعد فوگ .. سمعت صوت نونه تبچي رحتلها ع السريع ومنا بدت سهرتنا اليوميه للصبح هههه

بعد ما وصلت اهلي رحت قابلت يوسف لان ما گدرت اشوفه العصر

جبرني اروح للحلاق ازين ومناك رحنه للجم .. رجعت للبيت گعدت يم امي شويه وصعدت انام

اول ما طبيت للغرفه دگ جهازي عاينت ماهر ديتصل جاوبته بسرعه

شهم.. ها ماهر بشر

ماهر.. هذا مو ببغداد
بس وين بالضبط ما عرفت

شهم.. شلون يعني مو ببغداد وهو كل يومين والثالث ناط گدامي

ماهر.. يجوز يروح ويجي بس حاليا بغير محافظه مثل ما گتلك

شهم.. زين اذا دخل لبغداد تگدر تعرفلي بهل شي

ماهر.. اكيد

شهم.. زين لعد اني نهاية هذا الاسبوع التحق من ارجع اريده منك وعشمي بيك چبير

ماهر.. تاخذه من عيوني
چم شهم عندي تأمر وتتدلل حبيبي

شهم.. رحم الله والديك عضيدي

سديت الخط منه وارتاحيت كلش لان راح اگدر اوصله عن قريب .. ذبيت الموبايل وغيرت ملابسي دا انام سمعت صوت نهى تبچي

نزلت لان ما گدرت اشوفها قبل لا اصعد چانت نايمه .. دگيت الباب لگيت مياس شايلتها وتفتر بيها

شهم.. شبيها الحلوه صوتها صاعد ليفوگ

مياس.. شنو الجديد هاي سيمفونية كل ليله

شهم.. ههههه دانطينياها عنچ

اخذها مني يبوس ويشم بيها .. دمعت عيوني من سمعته يگول :

شهم.. ليش شالعه گلب امچ مو خطيه ولچ

ما اعرف شصار بيه لمن سمعت منه هالكلمه .. اكيد هي بنتي وكلشي بيه يحبها ويحس اتجاها بلأمومه

بس لمن طلعت الكلمه من شهم حسيتها تختلف .. حسيت ساعتها هي فعلا بنتي واني امها مو بس كلام

مسحت دموعي قبل ليتنبه عليه .. تمشى للچربايه گعد وخلاها بحضنه ظل وياها قريب النص ساعه لحد ما غفت بأيده

شهم.. هههه مياس شوفيها نامت

مياس.. ههههه ممسويتها قبل تدري

شهم.. غير چانت بحضن ابوها شلون متريدها تنام

گام حطها بالسرير وباسها بهدوء .. دار وجها ديطلع رجع بخطواته ليوره

شهم.. مياس

مياس.. نعم

شهم.. بعد چم يوم التحق

مياس.. ليش شهم مو وقت التحاقك بعد ما صار اربع اشهر على نزولك

شهم.. اني قدمته

مياس.. وليش سويت هيچ ؟!!

شهم.. عندي شغل هناك

مياس.. عرفته يريد يشرد من قهره : ماشي ترجع بالسلامه ان شاء الله

شهم.. الله يسلمچ
يلا ناميلچ شويه قبل لا تگعد الجنيه

مياس.. ههههه اي والله نعسانه كلش

شهم.. نوم العوافي

مياس.. الله يعافيك

طلع وقفلت الباب ورى .. نزعت حجابي تمددت هستوني دا اغفى دگ جهازي رساله

خفت كلش لان عماد سوالي عقده من كلشي .. اخذت الجهاز اشوف منو طلعت تبارك مراسلتني

تبارك.. حبي هذا رقمي .. تبارك

مياس.. اوك حبي

تبارك.. شلونها نونه

مياس.. نامت تصدگين

تبارك.. هههه اللهم صل على محمد وأل محمد لنروح نحسدها

مياس.. هسه تگعد يمعوده

تبارك.. ان شاء الله تتأخر شويه
يلا روحي نامي على نومتها ونحچي بعدين

مياس.. تصبحين على خير

تبارك.. وانتي بألف خير

سديت الجهاز ونمت بسرعه .. حسيت على صوتها تبچي عاينت الساعه بالثنتين : زين والله صارلها ساعتين نايمه

گمت سويتلها ممه وللسبعه الصبح يلا رجعت نامت .. اول ما نامت وگعت چفي على وجهي من التعب

مرت الايام بسرعه واجه وقت التحاق شهم .. بيومها چنت گاعده كالعاده لأن نونه منايمه للسته

طلعت واخذتها ويايه .. خليتها بالصاله ورحت اسويله ريوگ قبل لا يطلع

خلصت ع السريع اخاف تبچي .. صبيت الچاي وحضرت الميز رحت للصاله لگيت شهم گاعد وحاطها بحضنه

مياس.. صباح الخير

شهم.. صباح النور
هم ما نامت ؟؟

مياس.. اي بس هسه تنام هذا وقتها

شهم.. دنگت احچي وياها : شلون تالي وياچ بابا ؟! ليش متنامين حتى تخلين امچ ترتاح

مياس.. مرتاحه ليظل بالك
يلا انطينياها وروح تريگ الاكل جاهز ع الميز

اخذتها منه وراح للمطبخ يتريگ .. طلعت الحجيه من غرفتها بس شافتني دارت وجهه ما اهتميت الها وگعدت بمكاني

شويه واجه شهم يودعنه التموا الكل يسلمون علي .. چنت واگفه اعاينله وخايفه كلش من روحته اخاف يصيرله شي لا سامح الله واخسره حال حال كل العافوني وراحوا

رفع راسه شافني اعاين ابتسم واجه باتجاهي .. وصل يمي اخذ نونه يبوسها ويحچي وياها خمس دقايق يلا رجعها الحضني

شهم.. مراح اگولچ ديري بالچ عليها لان ميصير اوصي الام على بتها بس كل الاگدر اگوله الچ ديري بالچ على نفسچ

مياس.. وانت هم دير بالك على نفسك
وعفيه خابرنه دائما لتخلي بالنه يمك ما اوصيك

شهم.. صار تتدللين
يلا مع السلامه

مياس.. الله وياك

دنگ باس نونه ورجع سلم عليهم واحد واحد وطلع من البيت

بالعاده من چان يروح يتصل على نهى اول ميوصل لذالك چنه نتطمن بس هسه ما اعرف شلون اعرف بي وصل لو لا

ظليت طول اليوم الوب وادعي بلكت يخابر اي احد بينه حتى يرتاح گلبي .. للمغرب چنت اصلي اول ما خلصت دگ موبايلي

رحت للميز اركض وما صدگت من شفت شهم ديتصل بيه .. جاوبته ع السريع

مياس.. الو

شهم.. ها مياس

مياس.. هاي وينك يمعود

شهم.. اني وصلت ليظل بالكم
شو اتصلت على امي ما جاوبتني خو ماكو شي

مياس.. الحمد لله على سلامتك
لا كلشي ماكو لتخاف اكيد جهازها بالغرفه لذالك ما سمعتك من دگيت

شهم.. خو الحمد لله

مياس.. ليش هيچ تأخرت بلاتصال

شهم.. انشغلت من وصولي لحد قبل عشر دقايق يلا فرغت

مياس.. الله يساعدك

شهم.. ويساعدچ يابه
شلونها نهاوي نامت لا

مياس.. اي نامت اول ما رحت

شهم.. وانتي

مياس.. نمت الصبح ساعتين والظهر ساعه ونص

شهم.. ههههه يلا تحملي تكبر وتصير سوالف

مياس.. فدوه الها

شهم.. صار لازم اروح تردين شي

مياس.. لا سلامتك

شهم.. مع السلامه وسلمي ع الكل

مياس.. يوصل
شهم لحظه لحظه

شهم.. نعم

مياس.. عفيه اتصل مو تنسى

شهم.. ان شاء الله

مياس.. الله وياك

مرت اكثر من ٣ اشهر على التحاق شهم .. صار يتصل بيه كل يومين تلاثه خمس دقايق يسأل شلونكم ويسد الخط

طول هاي الفتره التهيت بين نونه والسهر وياها وبين تبارك الصارت تراسلني يوميه بحيث اذا فد يوم گطعت اني اراسلها لان تعودت عليها

فد يوم چنت واگفه بالمطبخ ويا منال بالثنتين الظهر دنجهز الغده انهبطنه لمن سمعنه صوت صياح رجال وبچي قوي بس چان الصوت بعيد كلش

طلعنه نركض نشوف شديصير عاينت للحجيه مستغربه مثلنه فجأه انفتحت الباب وفتحنه عيونه ويا فتحتها على الموقف الصار گدامنه .....

يتبع..