#مياس_قلب_الشهم
للكاتبه #لبنى_الموسوي
- هل تعرف معنى ان تعيش واقعاً لايشبهك مرغماً على العيش به وكل محاولاتك للتخلص منه بائت بالفشل 💔
هكذا هي حياتي
_________________
عفتهم يتناقشون وصعدت فوگ .. طبيت لگيتها نايمه ع الچربايه تبچي انقهرت عليها كلش
رحت يمها خليت ايدي على راسها حتى اهديها
شهم.. حياتي انتي .. كافي تسوين بروحچ هيچ
وداعة امي زواجي منها شكلي .. متصيرلي مره غيرچ طول ما انتي بگلبي وعلى اسمي
نهى.. مو بيدي شهم والله مو بيدي
اغار عليك لدرجة ما اتحمل اشوف اسمك يقترن باسم مره غيري حتلو بصوره شكليه
شهم.. شسوي بس گوليلي
اتجاهل وصية اخويه واخلي مرته تضيع من بعده يم الناس الما ترحم
نهى.. يعني افهم من كلامك بعدك مصر تتزوجها ؟؟
شهم.. ليش اكو غير حل برأيچ
نهى.. ماشي راح اوافق بس بشرط
شهم.. وشنو هل شرط ؟؟
نهى.. تتقرب مني هسه
شهم . فتحت عيوني عليها : نهى شبيچ ؟!!
نهى.. عاين شهم لو تنفذلي شرطي لو بهل لحظه اگوم گدامك الم ملابسي واروح لبيت اهلي
شهم.. لتخبليني يمعودةةةةة
انتي تعرفين كلش زين وضعچ ميسمح بهل خرط الدتحچي
نهى.. لا يسمح مراح اموت لتخاف
شويه اتخربط وبس اخذ علاجي اتحسن
شهم.. نهى الله يخليچ
نهى.. شهم لو هيچ لو طلگني احسن
شهم.. لا اله إلا الله
ولچ بابا اعقلي .. شنو ناويه على روحچ الليله
نهى.. ها شگلت ؟؟
شهم.. طبعا لا
نهى.. ماشي لعد گوم وديني لاهلي هسه
شهم.. صدگ تحچين ؟؟!
نهى.. اي والله وتحرم عليه طبت هذا البيت طول ما اني عايشه
شهم.. زين ليش بس فهميني !!
نهى.. شعندي باقيه وياك اذا مالي اي فائده
وجودي يمك ماله داعي بعد .. عيش حياتك تزوج وخلف جهال وحقق الشي الما گدرت احققه الك ويا غيري
شهم.. والله كلشي ما اريد
لا زواج لا جهال .. اريدچ الچ وبس
نهى.. لتتعب نفسك شهم ..شبعت من هالكلام اني
خلينه نخصم الموضوع اليوم لو تتقربلي مثل اي رجال ومرته لو تطلگني احسن
شهم.. طلاگ تحلمين اطلگچ تسمعيني لو لا ؟
وبعد اياني واياچ اسمعچ تلفظين هالكلمه مره ثانيه افتهمتي
نهى.. لعد تقربلي
شهم.. ولچ والله اخاف عليچ
نهى.. لزمت وجهي : والقرأن ميصيرلي شي
صح راح اتخربط بس اتحمل لخاطرك
شهم.. بس اني ما اتحمل اشوفچ تتعذبين گدامي
بعدين هذا الشي راح يسببلچ مضاعفات بالمستقبل
نهى.. عوف المستقبل خلينه باليوم وبس
إلا اذا چنت ممشتاقلي ودتتحجج
شهم.. اني ما مشتاقلچ !!!
ااااخ .. ربچ وحده يعلم شلون ميت من شوقي الچ
نهى.. لعد شمنتظر هايني گدامك
شهم.. نهى عفيه...
ما خلتني اكمل كلامي لمن تقربت مني وحطت شفتها على شفتي
ما گدرت اقاوم اكثر ... رحت وياها لغير عالم ونسيت كلشي حتى مرضها
بعدت عنها شفتها عرگانه وتتنفس سريع .. خليت ايدي على صدرها بخوف
شهم.. حياتي شبيچ ؟!!
اشرتلي على گلبها بلا ما تحچي شي عرفتها اختنگت .. گمت مفزوع جبتلها جهاز الاوكسجين ركبته الها ع السريع
شهم: اعاين عليها انتهت : تحرك شهم راح تروح من ايدك بسبب غبائك
شلت الموبايل خابرت يوسف بالگوه رد
شهم.. وينك يمعووووود
يوسف.. خير شهم صاير شي
شهم.. اختك تخربطت ولك
شوفلي صاحب وين خلي يلحگها
يوسف.. شتحچي انت ؟!!!
هسه جاييك مسافة الطريق
شهم.. استعجل عفيه
يوسف.. جاي جاي
سديت الخط منه .. لبستها ملابسها واني اعاين عليها شلون دتنازع الموت گدام عيوني
طلعت للدرج صحت منال
شهم.. منااااال
منال.. ها خويه شبيك
شهم.. تعالي اصعدي بسرعه نهى تخربطت
منال.. لطمت على وجهه : عزه العزاني
بعدني گاعده بالصاله اسمع نقاشهم واني ساكته .. تفاجأت من سمعت شهم صاح لمنال لان نهى تخربطت
صعدت وياهم ع السريع .. خايفه ليكون سبب هل شي خبر زواجي من شهم لان ساعتها مراح اسامح نفسي لو شما صار
دخلنه للغرفه .. اعاين عليها نايمه والجهاز على وجهه بس چان منظرها يخوف بشكل
التفت على شهم يروح ويجي بقلق ولازم الموبايل بيده ما اعرف ديخابر منو
الحجيه.. ارتاحيت وليدي
هاي مريتك راح تروح منك خلي مياس تفيدك عود
شهم.. يمه الخاطر ربچ عوفيني بضيمي
منال.. خويه تصرف البنيه دتموت
شهم.. شسووووووي ... شسوي بس گوليلي حتى ما اگدر اخذها للمستشفى وهي بهل حاله
هسه يجي اخوها يتصرف .. خابرتهم بالطريق راح يوصلون
شويه واجوي اخوان نهى .. ركض اخوها الدكتور خلالها ما اعرف شنو على وجها بعدين سوالها حركات بصدرها قريب الخمس دقايق عاينت عليها صحت
مياس.. گعدت ... عاين شهم گعدت
شهم.. ااااف
الف الحمد لله والشكر .. الف الحمد لله ربي
يوسف.. شسويتي بينه ولچ
اجيت اموت إلا شويه من خوفي عليچ
صاحب.. شصار شهم .. ليش هيچ تخربطت ؟
شهم.. عاينت النهى : من عنادها
صاحب.. شنو يعني !!
شهم.. دعوف هل موضوع وگلي شلون صارت خو ما عليها خطر
صاحب.. لا لتخاف ان شاء الله ماكو شي
يوسف.. خاله متشربينه شي مو ريگنه يبس
الحجيه.. هههه يابعد خالتك تعال ليه خلي احضنك
يوسف.. حضنها حيل : افييييش يحضن الخاله شگد حنين
الحجيه.. اخ منك انت فد واحد .. اعوذ بالله
يوسف.. ليش خاله والله العظيم ماكو افقر مني
صاحب.. كلششششش
ديلا خلونه نطلع لازم نهى ترتاح شويه
مياس.. تقربت من شهم : اگدر ابقى يمها
شهم.. اي بس لتتعبيها
مياس.. ان شاء الله
الكل طلع رحت وراهم سديت الباب ورجعت يمها .. لزمت ايدها امسح على شعرها وهي تعاينلي بنظرات تقهر
مياس.. سلامتچ حبي الف سلامه
كافي تسوين بروحچ هيچ والله من باچر ارجع لاهلي بس گومي على حيلچ
نزلت دموعها ... دارت وجهه عني بلا متجاوبني
مياس.. كوني على ثقه نهى مو مياس التغدر باختها
الوجع الحسيت بي بحياتي ما اتمنى احد يحسه غيري
فشلون تتوقعين مني اضوگه لأقرب الناس الي
اني خسرت مهيب واعرف كلش زين شيسوي احساس الخسارة بالشخص فلتتوقعين اخليچ تعيشين العشته بيوم
باچر من الصبح اخلي شهم ياخذني لاهلي حتى ينتهي عذابچ
اطمأني حياتي راح تطلع مياس من حياتكم وللأبد
ردت اگوم حسيت عليها لزمت ايدي .. درت وجهي متفاجأه من حركتها
نهى.. لتروحين
مياس.. شنو قصدچ !!!
نهى.. اني قابله تتزوجين شهم .. ماكو داعي ترجعين لأهلچ
مياس.. صدگ والله !!
نهى.. اي
وهسه ممكن تعوفيني وحدي محتاجه ارتاح شويه
مياس.. اكيد عمري
گمت من يمها ممصدگه السمعته : شلون وافقت فجأه والله عجيب
نزلت من الدرج ودمعتي بعيني : شكرا يا الهي وحدك تعلم شچان حـ يكون مصيري لو رجعت لسميحه وعماد
عاينت الكل بالصاله .. بس شافني شهم گدامه اجاني ع السريع
شهم.. ها شلون صارت
مياس.. لتخاف زينه الحمد لله حتى حچت ويايه
شهم.. وشگالتلچ ؟؟
مياس.. گالت اني موافقه تتزوجين شهم
شهم.. اي ادري بهل شي
غيرها شگالت ؟؟
مياس.. شنو تدري ؟!! حاچيني شهم شلون غيرت رأيها فجأه مو لحد قبل كم ساعه مچانت قابله
شهم.. المهم غيرته مو المهم شلون
مياس.. لا صدگ
شهم.. كافي مياس لتلحين زايد
مياس.. شبيك ضجت .. اسفه مو قصدي
عافني ورجع للصاله .. گعدت على كتر اسمع الهم يحچون بموضوع زواجي من شهم بس انصدمت من شفت اخوانها مأيدين زواجنا گدام الحجيه
نص ساعه واستأذنوا .. اخذت كتبي ورجعت للغرفه الهي نفسي بيهن بين ما انعس وانام
بعد ما راحوا اخوان نهى صعدت فوگ شفتها تگلب بالتلفزيون
شهم.. شلون صرتي احسن ان شاء الله ؟؟
نهى.. اي الحمد لله
شهم.. اروح اغسل لو تردين تطبين قبلي ؟
نهى.. لا انت اغسل
اخذت ملابسي ورحت للحمام .. رجعت للغرفه ما لگيتها شويه ودخلت لافه الخاولي على شعرها
شهم.. نعيما
نهى.. والك هم
شهم.. ليش ما انتظرتيني اطلع وتغسلين
نهى.. ماكو فرق .. هنا لو جوه نفس الشي
شهم.. فتحتلها ايدي : تعالي حياتي
اجت تركض حضنتني وانهدت بالبچي .. ادري بيها دتتأذه بس شبيدي اسوي
شهم.. حياتي كافي .. الله عليچ كافي
كون الله ياخذني اذا افكر بمره غيرچ وانتي بحياتي
نهى.. اسم الله عليك
اسفه والله .. ادري اذيتك هواي بهل فتره
شهم.. لتحچين هيچ
رفعت وجهه الي : عايني نهى وابو فاضل العباس وتدرين بيه ما احلف بي إلا بالشدات
زواجي من مياس سببه وصية مهيب وخوفي عليها من الناس المتخاف الله لا اكثر
بعدين انتي من كل عقلچ تخافين من مياس تاخذني منچ ... ولچ هاي ذهب صافي متگدر تأذي نمله مو هالنوب تأذي اختها
نهى.. خلص اني وافقت سد الموضوع بعد
شهم.. لعد فكيها ما اريد اشوفچ بهل حاله
نهى.. ها يعني افهم من كلامك تريد مزاجي يتعدل
شهم.. اي طبعا
نهى.. جرتني للچربايه : تعال عدله الي بطريقتك
شهم.. ههههه نهى تخبلتي مو قبل شويه وصلتي للموت شبسرعه نسيتي
نهى.. واذا متت فدوه الك
شهم.. اسم الله عليچ .. لتحچين هل شكل ترى تزعليني منچ
نهى.. هههه صار
بس ممكن اسأل سؤال
شهم.. ههههه اي طبعا .. تفضلي اسألي عيوني
نهى.. طوقت رگبتي بأيدها : شنو رأيك بالصار قبل ساعه
شهم.. هههههههههه شبيچ حياتي شو صايره سرسريه فد نوب
خربتي مع الأسف عليچ
نهى.. هههههه غير بسبب حبك
شهم.. دوم الضحكه حبيبي
اريد اگلچ شي بس وعديني متضوجين
نهى.. خير ان شاء الله
شهم.. اوعديني اول
نهى.. ماشي اوعدك
شهم.. بعد باچر لازم التحق خلصت اجازتي
نهى.. صدگ تحچي ؟؟
شهم.. ها شو ضجتي ؟ وين الوعد لعد
نهى.. شگد وترجع
شهم.. ما معلوم يمكن شهرين ويمكن اكثر لان اجازتي چانت طويله فلازم اعوضها
نهى.. واني شيصبرني بشرفك
شهم.. هههه قابل جديده عليچ هل سالفه يا گلبي
نهى.. هي مو جديده بس حقك متعرف شيصير بيه من اول التحاقك لحد مترجع
شهم.. بستها من خدها : ميخالف عمري تحملي لخاطري
نهى.. مجبوره ما عندي غير حل
شهم.. وبعد اكو شغله
نهى.. شنو هي ؟؟
شهم.. بما اني راح التحق فلازم اعقد على مياس باچر قبل لا اروح
نهى.. اي وشنو المطلوب مني
شهم.. ساعديها نهى
تدرين بيها مالها احد غيرچ بهذا البيت
حاولي توگفين وياها وتدرسيها هم لان امتحاناتها قربت كلش
نهى.. ان شاء الله
شهم.. يلا خلي ننام
ظليت ادرس لحد ما نعست .. گعدت الصبح غسلت وطلعت للصاله ع السريع لان بالي ظل يم نهى
شفتها گاعده وياهم ارتاحيت .. سلمت عليهم ورحت للمطبخ گعدت اتريگ وحدي اجتني منال
منال.. ها حبي ليش گاعده وحدچ ؟؟
مياس.. احسن حياتي
منال.. گعدت يمي : دريتي بالخبر الجديد
مياس.. لا خير ان شاء الله ؟؟
منال.. بعد ساعتين يجي السيد يعقدلچ انتي وشهم
مدري شصار بيه من سمعت بهل شي .. صفنت بوجها شويه ودنگت بلا ما اجاوبها
منال.. شبيچ ؟!!
مياس.. كلشي ما بيه ..
تردين اساعدچ بشي ؟؟
منال.. لا حياتي روحي اقري لان اذا ظليتي گدامهم محد يخليچ بحالچ
مياس.. اوك
رجعت الغرفتي .. گعدت ادرس لحد ما سمعت الباب تندگ
مياس.. منو
شهم.. شهم
مياس.. لحظه انتظر
ذبيت الحجاب على راسي .. لميت الكتب ع السريع وفتحت الباب
مياس.. ها شهم
شهم.. السيد بلاستقبال اجه يعقدلنه
مياس.. وابويه
شهم.. موجود طبعا
مياس.. هسه اجي وراك
شهم.. لتتأخرين
مياس.. اي ان شاء الله
راح وسديت الباب ورى .. درت وجهي للكنتور فتحته طلعت صورة مهيب منه حضنتها وشبعت بچي
مياس.. شفت شصار بيه بعد ما رحت
ليش مهيب مو الف مره گتلك لتعوفني وحدي محد الي من بعدك
وبكل مره چنت تسكتني وتگول ما اعوفچ بس شنو چانت النتيجه هاي اني ظليت وحيده والدنيا دتكفخ بيه من كل الجهات
مسحت دموعي وطلعت غسلت .. رحت للصاله الكل گاعدين يعاينولي بعصبيه .. تجاهلتهم ورحت للاستقبال وگامت منال ورايه
منال.. ها حبي جاهزه
مياس.. اي
منال.. لعد خلي انطيهم خبر
دگت الباب طلع شهم .. بس عاين الوجهي خزرني
شهم.. هاي ليش دتبچين
مياس.. لا منين باچيه
شهم.. وعيونچ الرايحه شنو معناها
منال.. اعذرها خويه ترى السالفه مو سهله عليها
شهم.. لا حول ولا قوة إلا بالله العلي العظيم
ديلا اوگفي يمها شويه ويسألها السيد على موافقتها
منال.. صار
وگفت بالخمس دقايق انتظر لحد ما سمعت السيد سألني .. وافقت ع السريع ورحت الغرفتي حتى اطلع ضيم گلبي بالبچي
صار الظهر صليت وطلعت اساعدهم بالغده .. اول ما شافتني الحجيه استلمتني
الحجيه.. ها يالحياله
اول ضحكتي على مهيب الله يرحمه ومن راح افتريتي على اخو المسكين وخربتي بيته
رنا.. خاله شتترجين منها
اذا ٢٤ ساعه چانت تفتر بالشوارع حالها حال ال××××
اكيد متعلمه ع الزلم ومتگدر تعيش بلا رجال
سمر.. خو تروح تاخذلها واحد من الشارع مثل شاكلتها ليش تجي على خالي وتاخذه من مرته
نهى.. مو كافي ترى زودتوها كلش
رنا.. هههه شنو بس لا ناويه تدافعيلها ؟!!
ولچ اصحي هاي اليوم اخذت رجلچ منچ لتشوفيها تتمسكن گدامچ الله وكيلچ كلها كم شهر وتاخذ منچ الاول والتالي لحد ما تخلي شهم ميطيق يعاين بچهرتچ
سمر.. لتصيرين فقيره نهى
ترى مياس حيه على ساعه تلدغ وتغطي راسها قبل لتحسين بيها
خليچ حذره هاي تربية الشوارع كلشي يطلع منها
رنا.. گليلها بلكت الله تبطل فطاريه وتلحگ على روحها
احسن ما تجي بت الشوارع وتتربع بمكانها
منال.. سمر تسكتين لو اجي اخلي ×××× بحلگچ
رنا.. وليش داده
قابل شگالت هي حتى تحچين عليها
تريدين تحچين احچي على هال×××× الاخذت اخوچ من مرته
نهى.. انتي شعلييييييييچ
اني قابله تاخذه انتي شحارگ حمامچ بس فهميني
الحجيه.. عيب يمه ليش تصيحين على مرت حماچ
نهى.. لعد مو عيب لمن تحچي هالحچي على مياس
الحجيه.. غير دتدافعلچ .. هاي جزاتها تالي
نهى.. هو شكو قابل حتى تدافعلي !!!
اترجاكم اطلعوا من السالفه هالشي خاص بيني وبين مياس وشهم
لتتدخلون وتسولنه مشاكل من لا شيء
منال.. حقچ خيه بس جيبي اليفتهم
شهم.. شديصييييير ؟!!
هستوني راجع من الشغل واسمعلك اصواتهم بالصاله ديتعاركون .. طبيت مستغرب بس شافوني انصدموا كلهم
شهم.. شو محد تجاوب ؟؟ شديصير هنا وحده منچن تفهمني
نهى.. يحچون على مرتك تقبلها
شهم.. ومنو حچه عليچ ؟؟
نهى.. مو عليه .. على مياس
مياس.. فتحت عيوني على وسعهن من گالتله هيچ .. عاينت لشهم هو هم صافن عليها مثلي
الحجيه.. نهى لتسوين مشاكل من اولها
نهى.. مو اني الاسوي يوم .. انتو الدتحفرون المشاكل من جوه الگاع
شهم.. احد يفهمني القصه بسرعه
نهى.. رنا وسمر يگولن على مياس بت الشوارع و×××× وامك مأيدتهن
طفرت اعصابي براسي من سمعت هالكلام ... عاينت الأمي متعجب من كلام نهى
شهم.. يمه صدگ هالحچي الدا اسمعه بأذني
الحجيه.. يمه مو هيچ بس نهى تعبانه لذالك مدتعرف شتحچي
نهى.. لا هيچ ونص
عاين شهم رنا وسمر حاطات بالهم ويا مياس من قبل لا يستشهد مهيب الله يرحمه بس هسه صارن فدنوب بحيث الكلام اليحچنه بحقها مينسكت عنه ابد
شهم.. تعالي سمر تعالي
سمر.. ها خالو والله ما گلت شي
اني مالي علاقه صدگني
نهى.. ليش منو الگال عن مياس
حيه تلدغ وتضم راسها
وتربية شوارع
انتي لو مو انتي ؟؟؟
بس سمعت هالكلام من نهى .. رفعت ايدي وضربتها راشدي لأول مره بحياتي لأن ما ماد ايدي عليها من قبل
مياس.. لا شهم عفيه مو هيچ
شهم.. لتتدخلين
سمر.. بچت بحرگه : تضربني خالو علمود هاي !!
شهم.. واكسر راسچ مو بس اضربچ
وكت التتجاوزين حدودچ تستحقين اكثر من هذا الراشدي تفهميني لو لا
الحجيه.. لا شهم ممرجيه منك تمد ايدك عليها
شهم.. يمه تحچين صدگ !!!
انتي شجاچ عمرچ كله ما حاربتي احد بهل شكل
ليش شديتي ويا هالمسكينه شسوتلچ بس فهميني
الحجيه.. اني من اول ما قبلت على دخلتها لهذا البيت
وتالي من اخوك مات اجيت انت تزوجتها حتى تخليها بخلقتي كل العمر خاف اني طايقتها
شهم.. اي لييييش ؟!!
شمسويتلچ حتى تكرهيها لهل درجه
الحجيه.. ما اكرهها بس ما اترتاح الها من الله
شهم.. لترتاحيلها على راحتچ
بس اترجاچ خلي الله بين عيونچ بيها وتذكري دائماً هاي وصية الغالي راح وما خله غير مرته امانه عدنه
الحجيه.. الله يرحمه
شهم.. عاينت السمر بعصبيه : اعتذري ولچ
سمر.. اسفه مياس
شهم.. هاي اول واخير مره اسمعچ تتجاوزين عليها
قسماً عظما اذا تكررت السالفه بس الله يخلصچ مني ساعتها
رستي هالكلام بعقلچ احسن ما احطچ براسي وتندمين بعدين
منال.. سمعتي خالچ شحچه لو لا
سمر.. اي
شهم.. وانتي رنا
حسابچ ويايه بعدين بس خلي يرجع ايهاب ونتفاهم
رنا.. والله خويه ما گلت شي
اني تصرفت بهل شكل من حرگت گلبي على نهى لان دا اشوفها شلون تتأذه گدامنه بسبب مياس
نهى.. كلشي ما بيه
لتذبين سمچ وتگولين بسبب نهى .. من يوم يومچ حاقده عليها بلا سبب
ايهاب.. السلام عليكم !!!
شهم.. وعليكم السلام
تعال خويه اجيت بوقتك
ايهاب.. خير ان شاء الله .. شبيكم ؟؟
شهم.. رد مرتك عن مياس لان زودتها كلش
ايهاب.. ليش شسوت
رنا.. والله كلشي ما سويت
ايهاب.. احچي شهم شصاير
شهم.. دتتجاوز عليها بغلط مال شوارع
ايهاب.. شنو هالحچي رنا ؟؟
نهى.. اي خويه ومو اول مره تسويها
دائماً بس هالمسكينه تسكت حتى لتسويلنه مشاكل
ايهاب.. تعالي للغرفه بسرعه
اعاين عليهم وخايفه لتصير مشكله چبيره بسبب هالموضوع .. من صاح ايهاب مرته انقهرت عليها لان شفت الخوف بعيونها
راحت ويا .. شويه وسمعنا ايهاب يصيح ويغلط عليها
رادت تروحلهم منال بس منعها شهم
شهم.. خلي يربيها شويه .. لتتدخلين
منال.. بس خويه
شهم.. مناااال
منال.. صار مثل متريد
صبينه الغده واجتمعنه كلنه بس رنا ما اجت .. اول ما خلصنه رحت الغرفتي حتى اقره
شويه واندگت الباب .. تفاجات بنهى وفرحت بنفس الوقت
نهى.. اگدر ادخل
مياس.. طبعا حبي
نهى.. حابه احچي وياچ اذا فارغه
مياس.. سديت الكتب : حتلو ما فارغه افرغ لعيونچ
نهى.. تسلمين حبي
مياس.. قبل كلشي حابه اشكرچ لان دافعتيلي گدام الكل
نهى.. هذا واجب حياتي لان الكلام الدينگال بحقچ ابد متستاهلي
مياس.. الله لا يحرمني منچ ولا من طيبة گلبچ
نهى.. مياس اعتذر حيل على كلشي صار بهل كم شهر
مياس.. قاطعتها ع السريع : اني الاعتذر نهى
والله لو ما وصية مهيب وخوفي من عماد وخالته فلا چان عرضتكم لمثل هالموقف
وداعة امي الما لحگت اشبع منها .. احبچ مثل وكأنچ اختي وصارلنه عمر سوه والله يشهد على كلامي
نهى.. واني هم احبچ والله العظيم
خفت كلش لا اخسرچ بسبب هل موضوع لان ادري بنفسي اغار على شهم غيره توصل للخبال وچنت متأكده
مياس.. قاطعتها : حبي نهى ممكن تسمعيني
نهى.. اي
مياس.. شهم الچ وراح يظل الچ طول العمر
لتتوقعين يجي يوم واخذه منچ .. هو بالنسبه الي
اب
اخ
سند
مو اكثر من هالشي
نهى.. حضنتني حيل : احبچ مياس
مياس.. يا عمري واني اموت عليچ وروح امي
نهى.. يلا عندچ شي حتى اشرحلچ
مياس.. ههههه همزين تذكرتي
صارلي اشهر تايهه بلياچ
نهى.. اسفه والله .. حقچ عليه سامحيني
مياس.. لتعتذرين حبي
احنه بيها ... هسه تشرحيلي كلشي فاتني ههههه
نهى.. مو تتدللين
يلا جيبي
مياس.. تفضلي
خلصنه الغده وگعدت يم امي وايهاب .. رجع انفتح نفس الموضوع الما اتصور أله حل ما دام الحجيه قافله على مياس
ساعه تقريبا گمت حتى اخذلي كسره .. دخلت للمطبخ بس منال تشتغل
شهم.. لعد وين نهى ؟؟ صعدت فوگ
منال.. لا يم مياس
شهم.. شعجب !!!!
منال.. ههههه الله يهديها
شهم.. امين
خليت ورحت لغرفة مياس اشوف شديصير هناك .. دگيت الباب
نهى.. منو
شهم.. اني حياتي
مياس.. لبست حجابي ع السريع : خلي يتفضل
نهى.. تعال شهم
فتحت الباب شفتهن گاعدات ع الچربايه والكتب مطشره گدامهن .. فرحت كلش لأن دتشرحلها
شهم.. الله يهديچن
نهى.. ههههه ليش ؟ مخبلات مثلا
شهم.. لا حشاچن .. اني المخبل
نهى.. هههههه لا حبي حشاك
تريدني ؟؟
شهم.. لا خليچ وياها ما عندي شي صاعد انام
نهى.. على راحتك
طلعت من يمهم .. صعدت فوگ نمت للعصر بدلت ونزلت اطلع ما شفتهن بالصاله
الحجيه.. ها يمه وين
شهم.. اشوف يوسف ومناك نروح للجم
منال.. اگول خويه
شهم.. گولي خويه
منال.. رحت تطمنت على مياس لتكون نهى
ذبحتها
شنقتها
خنگتها بالمخده
ترى سالفتهن مو خاليه
شهم.. ههههههههههههههههه
هاي طلعه منچ منال .. والله عندچ سوالف
منال.. لا صدگ احچي .. گلبي لاعب كلش
شهم.. لتخافين چانت دتشرحلها الظهر
منال.. خو مو لحد الان
دروح شوفهن الله عليك
شهم.. متروحين انتي
منال.. لا عيني اخاف
شهم.. ههههه
ديلا مع السلامه
الحجيه.. الله وياك يمه
ردت اطلع صار كلام منال بأذني : معقوله صدگ تسويها نهى
شگول عليچ ام جهاد خبلتيني خاف اني عايز
رحت دگيت الباب صاحت مياس تفضل .. طبيت اشوفهن لازمات ورقه وقلم ومدري شيكتبن
شهم.. شنو هاي ؟؟
مياس.. اسم
حيوان
نبات
جماد
مدن
تلعب ويانه ؟؟
شهم.. ههههههههه خوش دراسه والله
نهى.. يمعود هستونه دنلعب لان تعبنه كلش
طول الظهر نشرح ونرجع ليوره
شهم.. هههه الله يساعدكم
يلا طالع تردون شي
نهى.. لا سلامتك بس مو تتأخر
شهم.. ان شاء الله
طلع شهم ... ظلينه نلعب لحد ما اخذنه الوقت وسمعنا يأذن
مياس.. ولچ عزه اذن
نهى.. لا بربچ شراح يخلصنه من سهامه اليوم
مياس.. انتي هينه إلا اني شراح تسوي بيه يبوووووو
نهى.. گومي واني بظهرچ
مياس.. لا حبيبتي
تقصدين گومي واني بوجهچ مو صايره لوتيه
نهى.. ههههه اگلچ احنه مترزلين مترزلين فخلي نصلي احسن
مياس.. ههههه هم صح
گمنه توضينه .. فرشتلها سجادتي واني صليت بسجادة مهيب
خلصنه وطلعنه للصاله ... اول ما شافتنه الحجيه رفعت العصا بوجهنا
الحجيه.. لوين جايات
نهى.. نشتغل يمه
الحجيه.. بعد وكت
امشن من خلقتي ما اريد منچن شي
نهى.. راحتلها نهى : خالاتي
حبيبتي
امي الغاليه
شمعة بيتنه ونور عيونه
الحجيه.. شتريدين ولچ
نهى.. والله احبچ .. عفيه لتزعلين مني
الحجيه.. خايبه وتالي وياچ
متنطيني مجال ازعل عليچ يوم على بعضه إلا ما تاكلين بعقلي حلاوه وتراضيني بنفس الساعه
نهى.. ههههه غير اموت عليچ
الحجيه.. واني هم ام لسان طويل
نهى.. ومياس
الحجيه.. شبيها صخمان
نهى.. متحبيها
الحجيه.. عاينتلي صفح : لا هم احبها بس ما اطيقها
نهى.. ههههه شلون رهمتيها الله عليچ
الحجيه.. ما اعرف .. گتلچ الاحس بي
نهى.. يلا هم انعم الله احسن من ماكو
ضحكت على سوالف الحجيه رغم تعاملها الجاف ويايه إلا اني احبها كلش ما اعرف السبب
عفتهم ورحت للمطبخ شفت منال دتسوي بالعشه
مياس.. الله يساعدچ حبي
منال.. الحمد لله ع السلامه يمعوده
مياس.. صفنت عليها : ليش ؟!!
منال.. گلت نهى موتتچ على هالغطه
مياس.. ههههه لا خطيه چانت تشرحلي
منال.. الله يهدي سركم
مياس.. امين
وگفت اشتغل ويا منال شويه واجت سمر ما حچت شي يجوز بسبب كلام خالها
لليل گاعدين بالصاله نتابع مسلسل .. طبوا علينه شهم وجهاد سوه
الحجيه.. هلا بالغوالي
شهم.. هلا بيج حجيه
منال.. متعشين لو اسويلكم عشه
شهم.. تعشينه ويا يوسف
منال.. بالعافيه
شهم.. الله يعافيچ خيتي
اگول صار عدكم علم .. باچر التحق
الحجيه.. يا يمه وين رايح ومخلينه
شهم.. يوم صارلي اكثر من ست اشهر يمچ
صار الوقت ارجع لدوامي
الحجيه.. يمه من فدوه اروحلك بلا هالروحه
گلبي نلچم باخوك وما ظلي غيرك لتلچمني انت هم
شهم.. بست راسها : لتخافين حجيه
الكاتبه الله يصير بس گولي يا الله
الحجيه.. يا الله .. شعدنه غيره
- ثاني يوم وقتت الموبايل بالسته ونص حتى اشوف شهم قبل ليروح .. بعد الصار ويا مهيب گمت اخاف لا اخسره هو هم وساعتها صدگ اضيع
غسلت وطلعت للصاله شفته گاعد يتريگ ونهى يمه .. ردت ارجع حتى لا تتضايق بس صاحتني قبل لا اروح
نهى.. وين حبي
مياس.. صباح الخير
نهى.. صباح النور
تعالي تريگي ع الواهس
مياس.. لا بالعافيه ما اشتهي هسه
رحت گعدت على كتر .. اعاين علي وگلبي يفور من القلق
اول ما كمل الريوگ غسل واجه يودعهم
سلم عليهم واحد واحد ظليت اني اخير شي لان بعيده عنهم
شفته اجه باتجاهي والابتسامه على وجها
شهم.. ها يابه تردين شي قبل لا اروح
مياس.. لا بس ارجعلنه بالسلامه
شهم.. بدعواتكم ان شاء الله
مياس.. الله يحفظك انت وكل الابطال الوياك
شهم.. امين
سلم وراح .. ما اعرف شنو هالخوف البداخلي علي بس ان شاء الله يكون مجرد حاله نفسيه بسبب الشي الصار ويا مهيب
مر اكثر من شهر على التحاقه وماكو شي جديد بس يخابر نهى وهي تطمنه عنه وتوصل اخباره
علاقتي بنهى رجعت مثل قبل واحسن اما رنا وسمر فيستغلن الفرصه لمن اكون وحدي حتى يغثني بس مچنت اهتم الهن حتى لا تصيرلي مشاكل اني بغنى عنها
منال اخت ونعم الاخت بحيث كلما اريد اشتغل شي متخليني علمود ادرس زين لان امتحاناتي قربت
اما الحجيه فساعاتها براحاتها .. يوم ترضى عني ويوم احس لو بيدها تذبحني وتخلص مني
فد يوم چنت گاعده العصريه بغرفتي اقره وحدي لان نهى يم اهلها .. تفاجأت من طبت عليه بلا متدگ الباب ولونها مخطوف
نهى.. عاينتلي بوجه اصفر والصدمه واضحه على ملامحها : ولچ مياس....
يتبع..