#قلبان يجمعهما السحر
#البارت الثاني والعشرون
بقلمي #نور الشمري
#أشعُر أَنْ حَواسِىْ تَوقَفتْ عَنْ العَمَلْ
فَعُدتْ لاَ أَسمَعْ شَيئاً وَإِنْ كَانْ المَكَانْ يَملأهُ الضَوضَاء
ولاَ أَستَجِيبْ لِأىْ نِدَاءْ
حَتىَ قَلبىْ تَبَلدْ وأصبَحْ لاَيشعُر حَتىْ بـَ الألَمْ
أُريِدْ أَنْ أتَحَولْ لِشيء لَيسْ لَهُ وجُودْ وَلاَ يُرىْ
فَقَطْ أُريِدْ أَنْ أختَفِىْ وَلاَ يرَانِىْ أَحَدْ ....
انصاف : نصر دز ورقة طلاكي !!! هههه الله شنو هااي ماصالي اسبوع من اجيت وماصدك دزها راسااااا ايي ليش لا شيسوي بوحده طفله ع كولته عمرها راح يصير 18 بنضره طفلللله صح مدخلت الـ 18 بس مابقه شي هههه وهذه احلا هديه عيد ملادي واو
شلت الورقه وباوعت عليه وكل حرف منها اريد احفظه اطبع الكلام هذا يا عقلي اطبعه ببالك ولا تنساه نزلت راسي وماعرف دموعي شلون نزلت شلون سمحتلها تنزل
انتبهت ع التاريخ صالي راح اقبط السنتين اني مزوجه نصر الله شكد حلوو هههه سنتين واطلك عفت عمار الي ماعرف شنو يحجي واخذت الورقه وطلعت بطرمه ماعرف شنو كال وشنو حجه تركته وطلعت شي واحد الي اعرفه بس
الشي الكدامي نصر خلص راح يتخلى عنج انصاف صدكي وشيلي من قلبج اتتبهت ع التاريخ
2017 / 2 / 3
احفظي هذا التاريخ يااا انصاف لان هذا التاريخ حبيبج نصر دز ورقتج وباعج برخص وكانج وحده من الشارع بس اماعوف ابني اله لا والله ماعوفه واني اله من اليوم راح تكون انصاف جديده
مسحت ادموعي ووكفت ع رجليه احاول اقوي روحي شنو يعني واذا طلكني شنو واكفه الحياه عليه لو ماكدر اتنفس بدونه لو شنو واذا احبه مستحيل اهين نفسي اكثر
دخلت للصاله عمار كاعد حاط راسه بين رجليه ومبين الحمل والحزن عليه حبيبي سوده عليه شيتحمل ويتحمل بعد كل هذا كعدت بصفه
- عموري لا اسوي هيج عادي واذا طلكني شنو يعني قابل اول بنيه لو اخر بنيه اطلك عادي بس اهم شي ابني وطزز بلباقي
جنت امثل القوى كدامه ولو لا وجوده جان دموعي نزلن ونهاريت جنت اصبر روحي كوه واهدي نفسي
حظني حيل وهمس وعيونه مليانه دموع الي كاتلني يانصاف اختج الي هدمت حياتج ااخ والله لو ما خوف الله جان ذبحتها وذبحت نفسي واخلص
- اشششش شنو هلحجي هذااا هاا لعد اني وين اروح دير بالك اجيب طاري الموت والله ماسامحك اذا جبت طاري مرة الثانيه
حظني وصار يمسح ع راسي ااخ يابابا وينك محتاجتك هواي محتاجتك يا بابا محتاجه حظنك وسوالفك وكلماتك وانت اطيب جروحي بيهن محتاجه تمسح ع راسي وتمسح دموعي
عفته وكمت عمار صار هو ابوي وهو اخوي جنت اكول ماعدي اهل غير عمار ونصر وهسه شخطت اسم نصر وخليت اسم ابني وماعدي بعد غيره عمار وبرهومي حبيبي صالي اسبوع ماشايفته شنو حاله هسه حبيبي
غفيت واني افكر والف فكره وفكر ببراسي كعدت الصبح اليوم الجلسه مالتي اليوم اشوفه اسبوع ماشايفته اسبوع
وكفت كدام المرايه واني اباوع ع شكلي وين جنت ووين صرت من طلعت من هذا البيت جنت احلا ابنيه بلعالم بريئه طفله ماعرف شي عن هاي الدنيا القاسيه الي علمتني ناسي منو واحبابي منو الي اطتني درس بعمري ماراح انساه
ضعفانه وسواد جوه عيوني وحته شكلي مو قانوني عبالك هيكل عظمي عدلت نفسي ولبست ثوب طويل وحجاب اخذت غراضي وطلعت واني اقوي نفسي انتي قويه انصاف مو رجال الي يهزج مو رجال الي يخليج
تبجين دم انتي انثى قويه مو نصر الدين الي يكسرج كسري انتي اتغدي بي قبل لا يتعشه بيج وخلي يندم ع كل لحظه وع كل كلمه كالها
كلمات عمتي ونصر خلوني انسانه بارده ومدمره نفسيا وجسديا بس بنفس الوقت خلوني اقوى واطوني درس عمري ماانساه
باوعت ع عمار يباوعلي بشفقه ودموعه مبينه بعيونه ابتسمت بوجهه ماريده يحس بكسري وقهري لان الي بي كافي خل اواجهن بنفسي اني
وبدون مااحد يساعدني طلعت وياه واني امشي خطوه وارجع عشره بس شجعني عمار الي كال طالبي ببابنج ولا اسكتين والحظانه الج لان ابراهيم بعده صغير
هزيت راسي فرحانه بهذا الشي اييي خلص ماريد نصر ولا اي شي بس ابراهيم مشينا بسياره وطلعنا البغداد بغداد الي ماشفت راحه بيها بيوم بغداد الي من دخلتلها وخلتني انسانه ثانيه واعيه ع هذا العالم الظالم بغداد الي خلتني اعرف امي واختي شنو من بشر بغداد الي خلتني احب انسان ماحبني بيوم وخلاني مجرد امرأه مكسوره بغداد الي زرعت القوه بداخلي بعد ما حطمتني بغداد الي خلت الشخص الي دكله كلبي يذلني ويتهمني لكن هيهات يذلني اكثر
لان مو انصاف الي تنذل بغداد الي حبيتها مثل واسط بس ماشفت حنيه بيها بلعكس جانت قاسيه وياي وتضربني ضربه وره الثانيه الى ان خلتني انثى قويه اعرف كل شي بهذا الدنيا واعرف عدوي من صديقي والي يحبني من الي يكرهني
مرت الساعات وصلنا للمحكمه الجلسه جانت الساعه 10 ونص وهسه 10 بقينا بسياره ماريد انزل واشوفه خليني هناا اذا اشوفه راح يرجعلي الحنين والشوق والحب الي وعدت نفسي البارحه
من شفت ورقة الطلاق اطمهن بهاي الحديقه وما اخليهن بيوم نقطة ضعف الي غلطانين الي يتصور اني ضعيفه وعدي نقطة ضعف غلطانين الي يتصور اني ماعدي اب
اني عدي اخ يسوه راسهم كلهم كمش ايدي يهدي بيه واني ابتسمله همس يطمني
- لا تخافين اتصلت بمنصور صديقي محامي شاطر حيل راح نلكي جوه وان شاء الله يساعدنا انتي بس طالبي ببراهيم وخليها اتفض من اول جلسه لان اذا طولت راح يبقه يذلج نصر واعرفه زين اذا انجرحت رجولته
مايعرف ابوه من امه يلا ننزل حبيبي واهم شي اريدج قويه
ابتسمت بوجهه وهمست مادامك يمي ماخاف من شي نزلت واني كامشه ايد عمار واسند نفسي بي واقوي روحي واهمس بكلمات بداخلي انتي كدها يا انصاف انتي كدها ومحد يكدر يدوسج ع طرف
دخلنا للجوه واجه صديق عمار بقه يسولفون وكال لا تخافين قضيتج سهله اذا اثنينكم تردون الطلاك بس يبقه الطفل هو من حقج بس لا تنسين هو عده نفوذ وسلطه ويجوز يستخدمهن
صفنت ع كلامه معقوله يسويها نصر لالا هزيت راسي برفض واني اباوعله
- لا غلطان حضرة المحامي نصر مو من هذول الي يستغلون منافذهم وقوتهم اعرفه
عمار : انتي غلطانه يا انصاف وماتعرفين نصر زين يمكن ماعشتي وياه كفايه ويمكن اكثر ايام عشتيها وياه بوجود السحر لهذا ماعرفتي شخصيته النصر
نصر يستخدم اي شي في سبيل يربح ومايخلي احد يهينه نصر عده استعداد يجرم ولا احد يمس رجولته فاهمه
اذكرت من كتله انت مو رجال وكلمة ذكر هواي عليك شكد استفزته هذه الكلمه لدرجه ضربني راشدي خله اذني تصوفر ولحد لان احس بيها ونه وصوت
بس مااحجي اي شي لان ماريد عمار يتعارك وياه يمكن صح مااعرفه الشخصية نصر الحقيقيه بس اعرف داخله نظيف ومايسوي الغلط مهما يكون
حسيت بصوت اقدام وراي درت وجهي بسرعه وصار كدامي مجرد ماشفته اتلاشت كل قواي الي جنت ابنيها بهذا الاسبوع
واتلاشى كل كلامي عن القوه اااخ شكد مشتاقتله ياربي احس روحي طير يطير شكد كلبي حقير لان بمجرد ماشافه اتمنه يحظنه ويبوسه اتمنيت انام بحظنه وانسه كلشي
اتمنيت اشكيله عليه ويعاقب نفسه بنفسه بس اضحك ع روحي بهاي الكلمات راسا درت وجهي ماريد اضعف ماريد ماريددد
لازم اكون قويه مايهزني هيج شخص اذكرت كلماته الي الي وصفني وكاني وحده من شارع وكاني وحده مو زينه اكرهه يا كلبي اكرهه
حسيت بشخص وكف يمنا رفعت راسي سند
- شلونك عمار شلونج نصوفه
- هلوو ابو همسه الحمدالله شتشوف
- الله كريم تنحل تنحل والله ماراضي شكد حجيت وياه وهو ماكو معاند اله يطلك خلي بس بعدين من يعرفون الحقيقه هو وامي راح يندمون
صفنت عليه وباوعتله ليش انت مصدكني سند
- هههه اعرف كلشي كوثر سولفتلي كلشي حته قبل لاااا نصر يعرف من اجه واعتذر مني ورفضته سولفتلي كلشي وعرفت شكد انتي جوهره نادره
ابتسمت بوجهه مجامله ههه حماي يصدكني وزوجي مامصدك شكد حلو هيج شي شعور حقير ونذل يخليك تتمنه الموت ولا هذا الموقف حسيت بعمار يحاجيني درت عليه وياي تحجي
- وين بالج متكليلي سالي ساعه احجي وياج وانتي ماكو فاقده بغير عالم
دتعاي تعاي المحامي راح يسئلج كم سؤال مشيت وراهم وبقو يحجون واني ارد بكلمه لو كلمتين واسكت صار وقت الجلسه ونادو باسمائنا
مشيت بخطوات واثقه من نفسي بس حبي الحقير دايخليني احن واتراجع
وارجع اخلي كلماته ترن بعقلي واكرهه وكفت كدام القاضي و و هو ع بعد كم متر عني جان مبين عليه الجبروت واكف عادي ولا كانما شي صاير يلعب بمحبسه ويباوع ع القاضي
ويرجع يلعب باي شي يصير قريب من يمه واعرفه من يسوي هيج يعني متوتر هههه
هيج اني اوترك يانصر الدين لعد اكلهاا وشوف انصاف شنو راح اسوي بده القاضي يحجي هواي بس بالي ماكان يمه الى ان وصل السبب الطلاك واني هنا اصنمت شنو جوابه
شنو جوابه راح يكون باوعتله واني خايفه من جوابه
- حظرة القاضي اسباب عائليه مشاكل 24 ساعه ومحد مرتاح
- وبرأيك هذا القرار الصحيح ليش اتهدمون بيتكم من وره كم مشكله صارت واني متاكد وراها نسوان اسمعني بابا هذه حياه وعمر وبينكم طفل محد يخسر غير هذا الطفل
شنو ذنبه يتربه بعيد عن امه وابوه ها يكون متشرد كل يوم بمكان شكد راح يتعذب هلطفل
- رجائا حضره القاضي خلينا انفض الشغله لان ماكدر اكمل حياتي ويه انسانه مخادعه
ابتسمت من كال هيج وباوعتله بكره وهمست
- اسمحلي حضرة القاضي ومنو كال اني اريد ابقه وياك ترا اني هم ما اريد اعيش ويه شخص اناني حقوووود
- منو الحقود هاا ولج مو سمعتج باذ
- بسسسسسسس هدووووء شنو هايي انتم بمحكه مو منتزه اذا هيج ما متلائمين شكو ازوجتو وخلفتو لعد اذا مو كد المسؤليه
سكتت والكل سكت عم الهدوء لدقائق وبعدها رجع القاضي مرة الثانيه حجه وسئلني تردين الطلاق
- باوعتله ورجعت باوعت ع القاضي بشموج وجاوبت نعم اريد الطلاق بس اريد حظانة ابني لان بعده صفير
نصر : مو هي بكيفج كل
- هدوووووووء شنو هاي استاذ نصر هيج اتخليني امشي وياك بلقانون واطلعك بره
سكت نصر ورجع كمل كلامه القاضي وياي جان جوابي ماريد اي شي منه فقط ابني وهو كان جوابه شتريد اطيها بس خل تتركني اني وابني نعيش بسلام وبعاد عنها
شكد اذتني هاي كلماته يعيش بسلام هو وابنه وبعاد عني الله شنو هاي لعد شكد اني غبييه الي حبيت واحد حقير وحقود واناني
بقه القاضي يحجي وتم اعلان طلاقنا واصبحنا مطلقين قانونيا من كال هلكلمه القاضي حسيت ردت اوكع جلبت باي شي صار كدامي
وقويت نفسي ورجعت اهديهاا النفسي بكلمات من طلعت هذا الكلمه وتم تسجيلها يمهم اني مطلقه هسه حسيت طلعو كلبي وذبو من جسمي ومن هليوم هذااا ماعدت عدي قلب مجرد جسد بلا قلب
طلعت واتئجلت محكمة الحظانه مال ابراهيم ع الاسبوع الجاي جنت ميته شوق عليه واريد بس اشوفه
قبل لا نركب بسياره سمعت صوته وهو يصيح
عمار
وكفت بدون ما التفت عليه اتقدمله عمار وراح يمه بقو يحجون واني مطيتهم ضهري حته مركبت بسياره لان راح اشوفه اذا ركبت
من خلصو اجه عمار ومبين عصبي ركع باب السياره حيل ومشه
- شبيك عمار شحجه هذا بعد
- ههه يكلي خلي اختك تتنازل عن الحظانه لا افضحكم بلعراق كله واخلي العالم تتفرج عليكم مااصورت بيوم من الايام يجي ونصر يهددني
اااااخ لو ما انتي جان كسرت سنونه
ابتسمت وهزيت راسي اي وهو يطفي عينك وهيج واحد يردها للثاني لحد ما الله يفرجها ابتسمت اثنينهم عصبيين ااه يالله يعني هسه اني طليقت نصر اذكرت اني بعدني مرته بلعقد السيد يعني شرعا اني مرته
باوعت ع عمار عمار ماكالك شوكت يطلكني من السيد حظرته دار وجهه عليه بسرعه شنووو مو مطلكج
- شوكتت لاااا
وكف السياره حيل ودار عليه لا تخبليني انصاف هو كال من جنا بلمحكه من طردتتها من البيت طلكتهااا بـ ٣ صفنت ما طلكني وما نطقها هذا اتخبل
شوكت كالها هو اصلا ما سمعته كال طلاك مو بعد يطلكني بـ ٣ لا هذا مو صاحي اكيد اتخبل اكيدددد
- جاوبييي طلكج لو لااا
- لااااا عمار ماطلكني ولا نطقهااا
-متاكده
- اي والله متاكده
- بسيطه لعد بسيطه نصر يضحك علينا موو طلكج محكه وخلاج لا انتي مطلقه ولا انتي المزوجه
جان يسوق ومبين عصبي ناررر صحت بي شنو يعني عماررر شنووو
- شنوو هذا واحد ملعب دايلعب بعصابج واعصابناا كلناا طلكج محكه وبس علمود كداما لعالم انتي مطلقققققه بس ماطلقج سيد علمود يذلج بسهووله
ومايخليج تزوجين وتبقين ذليله عده بس يحلم يحلم والله اني اعلمه مااطلع ابن ابوي اذا ما خليته يطلكج طلاك كامل
خفت من عصبية عمار اكثر من خوفي من نية نصر شنو قصده بهذا التصرف وليش كال طلكتها معقوله يكون كلام عمار صح اي لعد شنو اتوقع منه
رجعت للبيت وكبل للغرفه ماريد اشوف لا رانيا ولا امي اذا شفتهن اطلع حركتي كلها بيهن هن سبب دموعي هاي هن سبب بعادي عن ابني
بقيت ابجي طول اليوم ع ابراهيم وع حظي المصخم ليش مايكعد يعني نصر حاب يذلني لا يرحمني ولا راح يخلي رحمة الله تنزل عليه استغفر الله ربي واتوب اليك استغفر الله ربي
بليل دكت كوثر عليه ماجان عدي واهس احاجيها بس من لحت رديت
- فتحي كامرا عدي حجي وياج بسرعه ولج
- اوووو كوثر عوفي رحمه الاهلج مالي خلكج
- اوكي لعد هذا برهومي يسلم عليج
من كالت هيج اريد اكمش المبايل بعد مااكدر اريد انطق واكله برهومي حبيبي هاي اني نو مو اتكلي نو هاي اني ياحبيبي
كوه كمشته عدل للفون وفتحت كامرا جان كاعد بحظن كوثر ومبين جان يبجي من خشمه الاحمر يا بعد روحي منو وياك يا ماما من شافني برطم وكام يضرب بكوثر ويصح نو نو مماما
ضحكت من بين دموعي من كال ماما هو ابد ميكول ماما يروح امك انت مشتاقلي هااا بقه يبجي ويريد يجيني بس بعدين مل وسكت بقه يسولف ويناغيو يضحك ويدردم يحجي وياشر بدايه واني اكله اي اي
وهو فرحان حبيب كلبي يمكن اذا اجه فرحان اكثر مني بقيت اسولفله وهو نايم بحظن كوثر الى ان غفه بقيت صافنه عليه شكد مشتاقتله ياعمري شبكت التلفون وكمت ابجي
- يلا حبيبتي لازم اسده نصر ع جيه يجي ياخذه لا تخافين هو يضوج هناك وكامت عمتي اجيبه يم همسه شويه يفك
كل ميجي اتصل بيج هزيت راسي مشكوره كوثوره ماانسالج هذا المعروف طول حياتي
- انجبي لج اني اختج لا اضلين تحجين هيج عبالك غريبه
- لا والله انتي اختي الماجابتها امي
- حبيبتي يلا مع السلامه
- هلا بيج سلمت عليها وسديته وبقيت اضحك وابجي خلص حبيبي مابقه اسبوع واخذك يمي لا تبجي ياعمري لا تبجي غفيت ع صورة ابراهيم
ومرت ٣ ايام اني كلبي يلوب ع ابراهيم اريد بس اشوفه لان بعد ماتحمل والله شوكت يخلص الاسبوع مادري جنت اخلص يومي كله ياما بلحديقه يااما بلمطبخ ولحد لان محد يعرف بيه هنا
لحد ما طلعت لعمار افتحله الباب وصارت خالتي ام جوري كدامي من شافتني اجت عليه بوستني وسلمت عليه وطلعت
- خليج بعد وكت خاله
- لا حبيبه ارجع البيت فارغ مابي احد من تججي جويريه اجيبها واجيج
- ماشي خاله هلا بيكم
سديت الباب وباوعت ع عمار الواكف ليغاد عني
- شتريت خاله ام حسن
- متريد بس سلمت عليه اي ماكلت وكالت ماكدر ابقه البيت فارغ من تجي جوري اجيبها واجي
- اها خوش طالعه الاسواق اني محتاجه شي
- لا سلامتك
طلع وسديت الباب وراه وبقيت ماعرف شسوي هيج وكت جنت اكعد اغدي برهومي واوكله شوربه لو مركه منو دايوكلك هسه يا حبيبي منو يمك هسه منو يداريك
كوه حبست دموعي وصبرت روحي بس 4 ايام واخذه منهم للعصر اجت جوري وامها سلمت عليهم وجوري صافنه عليه
اخذتها وطلعت لبره كعدت ع المروحه اخ يا مرجوحتي تذكرين من جنا نكعد عليج ونسولف ع ابوصلعه هسه راح اسوالف عن معاناتي وحزني وياه كلشي عكس ماتمنيت
- شصاير ولج والله خوفتيني عليج شوفي شكلج شلون صاير
كعدت اسوالفلها كلشي صار وياي من يوم الي ازوجة الى هذا اليوم والمحكه ماخليت شي ماسولفته الها احجي وابجي
جنت بحاجة احجي وافرغ الي بداخلي جنت بحاجه كلش ماسه الهذا الشي دموعي ماوكفن واني احاجيها وهي طول مااسولفلها بس اي واي ابد وتهز براسها اخذتني بحضنها
وضلت تمسح ع رواسي وتهدي بيه
ابتعد عنها وهي تباوعلي صفح
- شو باوعي عليه لالا ماصدك هاي انصاف لج وين انصاف الاعرفها اني ولج خليج قويه ماتهزج ريح هيج اعرفج لا تخلين المشمت يشمت بيج وهسه كومي كومي لج
هذا ابو صلعه يخليج تبجين وسفه والله كومي
- هههههه لج ع كيفج وياه
- لا بلا لا بس ماتقبلين نحجي ع يمو الامبراطور اناني الحقود المتسرع
- انجبي ضربتها ع كتفها وصحت هذني كلماتي اول شي وعشتوو ليش اضوج هسه ع حوره واضوج
- ههههههه عفيه عبالي متقبلين احجي
- لا والله اقبل وابوسج هم هههههه
فديتج
اي ماكتيلي انتي شكو ماكو شصاير ماصاير وياج
- اووو اني يااختي داتصير وياي معجزات هههههه كل يوميه واحد خاطبني شكل كلهم بجفه وهذا الطنطل الملطلط ابو عيون زايغه البغدادي بجفه زاحف منحرف
- هاهاهاهاها هذا منو جوريه عليه هااا تعاي ولج
- اوكفي ولج خل اشوف امي شتريد
راحت تركض لان امها صاحت عليه لحكتها شفت خاله تريد تروح لحيت عليها تخلي جوري يمي لوره العشه ويجي حسن عليها لو اوصلها اني وعمار
بقت جوري تحظن بامها وتتوسل بيها تقبل اخر شي يئست وقبلت تبقه راحت واني بقيت وياها كمنا نسولف ونشاقى سويه جانت جوري نعمه دزها الله الي
جوري : من سمعت حسن وبابا يحجون بطاري خطبه عرفت المقصوده اني بس منو تعيس الحظ اللاسف ماعرفته بس هم يعرفون رأيي كلش زين مستحيل اقبل
باي احد خاصه حب عمار لسه بقلبي وماريد اضلم احد وياي واعرف نفسي مااكدر انسه عمار بسهوله دخلت عليهم وسكتو تريكت وياهم وطلع بابا كعدت ادرس بيومها
وحسن يبسبس كلساع ويه واحد ساعه ويه بابا وساعه ويه ماما ويبقون يبسبسون ومن يشوفوني اسكت هلمره العريس من طرف حسن وحسن اعرفه ماعد يقنع بيهم
بس يعرفون جوابي كلش زين لهذا محد جاب طاريه كدامي ولا احد فتح الموضوع وياي وهيج مشت الايام يوم يجر يوم وصداقتي ويه انه
زادت كولش وصرت اعتبرها اختي الثانيه بعد انصاف ماعرف ليش ماكرهتها يمكن لان ماشفت منها شي مو زين وتستحق اتكون مرت عمار
حته ماغار منها ولا اضوج منها لان مو بيدها هذا الشي قدر ومكتوب والي مكتوب ع الجبين لازم اشوفه العين
وهيج جانت تخلص ايامي بلبيت ادرس 24 ساعه وبلمدرسه ويه انه ابقه دائما امتحاناتي الشهري باست لحد ما فد يوم ياسمين البنيه الي اروح وياها
دائما ازوجت وانقلت لغير مدرسه اضطريت ارجع وحدي واروح وحدي لحد ما حسن يدبلي خط لو شو شنو جنت امشي وصلت لشارع العام
الي يفصل بين مدرستي وشارعنا شفت عمار طلع من الاسوق شايل باكيت جكاير استغربت هو ميشرب جكاير ولا مره شفته يشرب شلون دايشرب هسه اوووف عبرت ومشيت من يمه
بس من مريت بصفه احس كلبي يدك سريع يمكن صوته وصل اله سمعته همس بعد شوي من تجون النا اريد احاجيج كلمتين خيتييي جوري
عفته وكملت طريقي واني مستغربه ليش انروح الهم شكو معقوله راح يزوج سكته لا لا جان سمعت من حسن
زين شكو لا بس خاله بيها شي بقيت صافنه وشيريد مني ماصدك يريد يحجي وياي رجعت للبيت واني حابسه ادموعي من كلمه خيتي اني مو اخته موو اخته اتمنننه اصيح بعلووو صوتيي واكول اني مو اختككك مو اختكك كافي تكول خيتي كافيي
بس اللاسف مجتمعنا ما يسمع صوت الانثى رجعت للبيت واتلكتلي امي كالت انصاف هنا وراح انروحلهم العصر طرررت ونسيت كلشي حيل مشتاقتلها
واريد بس اشوفها واكعد وياها ومشتاقه لهذا الجعموص برهومي يمه يخبل مال كرط
العصر رحنا الهم نن فتحت الباب انصاف بقيت صافنه مصدومه مااصدك الي كدامي انصاف وحده ضعييفه جنها مومياء عيونها حمر دم وجواهن اسود وشكله تعبااان حيل
صفنت عليه شبكتني وضلت تبجي اخذتها وطلعنا للحديقه بره وبقت اسولفلي واني مصدومه بقيت اباوعلها مصدومه معقوله هيج الاخت اسوي
معقوله لهدرجه الغيره تعمي الحب ليش ليش هيج سوت جنت متوقعه رانظا راح اضر انصاف بهذا الزواجلان تغار بس ماتوقعت هيج اسوي
رانيا اعرفها كلش زين حقوده غيوره انانيه مايهمها شي بس مو لدرجه ان اسوي هيج باختها لا مااصدك
زين خالتي شلون رضت شلون قبلت ع نفسها هيج اسوي ببتها ولو امها بعد اضرب شنو سبب كرها الانصاف هيج ماعرف اذكر مره سئلت امي ع سبب
كره خالتي الانصاف وتعاملها بهذه القوسه وجان جوابها حيل مصدم من كالتلي
- من عرفت بروحها حامل بانصاف اتخبلت ورادت توكع الطفل بس ابو تمار الله يرحمه ماخلاها وكالها هاي روح شلون هيج اسوين
بس هي جانت حيل قاسيه جان جوابها اي هو احنه الاربعه وكوه عايشين مو بعد تجي طفله وتريد كومه متطلبات منين اجيب الفلوس الها اصلا شعدها جايه لهذا الفكر
وحاولت اكثر من مره اتوكعها وماكدرت لان جان ابو عمار واكفلها بلمرصاد وهيج ملت هي وتقبلت الامر ومن جابت انصاف
كامت تهملها وماديري بالها عليها ومن تتمرض ما اديللها بال بس ابو عمار جان الها ام واب وماخلاها تحتاج شي
امي تحجي واني ابجي ع انصاف بيومها ماعرفت شنو من كلب شايله ومتحمله كل هذا
كعدت ويه انصاف وكمت ساعه انصحها ساعه اهديها ساعه اضحكها واخليها تضحك وكلس ساعه شكل رانيا محبيت اتواجد وياها بنفس المكان
لان اصلا من البدايه اني ماحبها وبعد عملتها ويه انصاف كمت اكرهاا اكثر وهي هم يمكن حاسه بروخي لهذا خابسه نفسها بلغرفه 24 ساعه ومغطيه روحها بلبطانيه
كمت للحمام اغسل وشفت عمار بلمطبخ من شافني اشرلي براسه ع الحديقه وطلع
حرت اطلع وراه لو لا بس قلبي اخذني وراه طلعت وراه لكيته واكف ومطيني ضهره وجان يدخن
وحاط اديه الثلنيه بجيبه من وكفت وراه دار وجهه عليه بقه ساكت وبعدها همس
- جوري اريد منج مساعده اعرف بيج شكد تعزين انصاف وشكد تحبيها اريدج هلفترا وياها ماتركيها لو مهما يكون وتضلين وياها
اعرفها تعزج وماتردلج طلب لهذا نصحيها خليها توعى ع تصرفاتها وقنعيها تدرس وترجع للمدرسه بلكت اذا التهت بدراسه والطلعه والطبه تنسه شويه من همومها
ادري متقصرين وتمونين عليها لهذا طلبت منج هذا الطلب واعرف ماتردج
- بدون ماتكول اني وياها وماتركها ابد وحته جنت انصحها واسولف وياها قبل شويه واني راح اخلي حسن دائما يجيبنا الها وانت هم جيبها الي بيوم الي ماكدر اجي
هز راسه بمعنى اي ورجع يدخن ويباوع بلفراغ صار عدي قضول اعرف شوكت كاام يدخن اشجعت وهمست اسئله
- ائئئئ عمار
دار وجهه عليه وعيونه كافيه تشرح كمية الحزن الي بيهن همست واني اباوع بعيونه
- من شوكت ادخن ماشايفتك ادخن بيوم
- من وفاة والدي من التمت المشاكل فوك راسي كمت اذب قهري بجكاير
- الله يكون بعونك حاول تقلل منهن لان مو زين عليك
- هز راسه الي واني ردت امشي بس اذكرت اني ما مباركتله ع الخطوبه
درت وجهي عليه وهمست الف مبروك
بارعلي راسا ميتغرب وكال ع شنو ؟؟
- ع خطوبتك ماباركتلك حبيت هسه اباركلك بيهازالخير ان شاءالله
- شكرا
ابتسمت تك خد ومشت بس وكفني صوته وهو يوكل يو اللج
- انشاءالله بس كون مثل فارس طفولتي الي تمنيته وماحصلته لو مثله لو مازوج حجيت كلماتي وردت ادخل بس رجع وكفني صوته وهو يكول
- جوررري احبج .. بس اللاسف اقدارنا مامكتوبه تنجمع سوه ومو نصيبج ولا انتي نصيبي بس ابقه احبج من جنتي هلكدردتج
نزلت ادموعي وعفته ودخلت راسا غسلت وجهي ابجي ليششش ليششش هيج حظي مبنجر مزنجر وخايس طلعت من الحمام وصارت
انصاف كدامي وينج صالي ساعه ادور عليج وانتي ماكو ردت اسئلج شتردين عشه
- ها هناا بلحمام عادي اي شي تدرين بيه كلشي اكل ههه
بقت واكفه اسوي عشه واني يمها عرفت اسوي اكل بس الها والعمار احسن شي اسوي والله
طلعت بتيته وطماطه وكامت اسوي واني وياها جانت ساكته كسرت السكوت واني اكلها
- انصاف شنو رئيج اترجعين ادرسين وتاخذين شهاده
- ادرس!!!
- اي ادرسين شنو بيها عادي اتحصلين شهاده وهم تلتهين وتكضين وكت مو احسن من الكعده بلبيت
صفنت وهي ساكته عفتها تفكر بلموضوع حسيت بي طب وصار وراي همس
- نصوفه جوعان مو تتاخرون
- لا حبيبي هسه نخلص
مادرت اله ولا باوعتله احس كلبي يريد ينفجر وكوه حابسه دموعي
بقت انصاف اسوي بلعشه واني اساعدها الى ان خلصنا كعدنا نتعشه اني وانصاف بلمطبخ وهو بلصاله ماقبل ياكل ويانا وعرفت السبب اني هههه
عادي شنو يعني قابل اول مره خلصت عشه واجه حسن عليه وطلعت وياه جنت دامشي وره حسن وحسيت احد طلع من الدربونه الي بشارعنا ممبين شكله لان الشارع اضلم خفت وكعت على رجليه وصحت حسسسسن راسا اجاني حسن شكووو
اشرت ع الدربونه اباوع كلشي ماكو والله جان اكو احد هنا والله شفت خياله والله
- كومي كومي ولج تتخيلين كمت انكث بهدومي والدموع بعيني وكملنا لبيتنا اول مدخلت ركضت لغرفتي
ابجي ابجي ع كلشي صار وياي اليوم وحده وره وحده انصاف ومصيبتها وعمار وكلماته وهسه الخيال متاكده شفت احد بس وين راح والله ما اتخيل بشر جان بشر
بقيت ابجي بفراشي الى ان غفيت واني حايره ماعرف شلون بيه شكد اتمنيت اسمع كلمة احبج وشكد جنت احلم بيها هواي
وشكد جنت اتخيل من يكولها شلون راح اخجل وخدودي يصيرن حمر وشنو ارد عليه حته الكلام الي جنت حافظته علمود ارد عليه كل هذااا ماصار وصار شي مجنت متوقعته بيوم
نفس الكلمه جنت احلم بيها يكولها بس مو هيج مردت اسمعها هيج غفيت والدمعه بعيني كعدت الصبح بدلت وطلعت للمدرسه واني امشي ماحس غير ايد بيها كلنس انحطت ع حلكييي دخت وبعدها وفقدت الوعي وماعرف شصار بعد
نصر الدين : بعد ولادة ابراهيم الي خلاني صدك احس الحياة بيها طعم وخلاني احب البيت واحب كلشي وبعد ماترقيت وصرت نقيب
شغلي خف شويه خارج الدائره بس زاد داخلها يعني صار اغلب شغلي داخل الدائره وبديت اتعود ع وجود انصاف الي خلتني احسن عدي طفلين هي وابراهيم مو طفل واحد
وهيج مرت الايام ولحد مره طلعت بواجب ويه اصدقاء وياي وطول اكثر من اسبوعين
وقررت ارجع للبيت واسويلهم مفاجئه دخلت اللبيت هدوء اسمع صوت فوك عرفت امي داتنضف مشيت للغرفه سمعت صوت حجي وضحك برهومي ممبين الحجي فتحت الباب ع كيف شفتها مطيتني ظهرها وتحجي
وابراهيم يلعب بملاعيبه ويضحك بقيت صافن اسمع كلامها احس الشياطين اجمعت براسي اريد امسك اعصابي كوه ساكت متحملت
هيج انخدع هيج بسهوله جنت اشك بروحي بيه حاله نفسيه وبسببها هيج جنت اصرف وحجزت عد دكتور نفسي وجنت اريد اروحله كل هذا وماشكيت احد مسويلي سحر لان اصل
ما امن بي بس بعد كلامها خلتني اعض اصابعي ندم لان جانت عدي نيه احبها وارجع ابدي صفحه جديده وياها حمدت الله وشكرته من كدرت اكشف وجوهن
جانت بيه حاله اذا اعصب افقد اعصابي واكوم احجي لاخي لاطي وماعرف شنو احجي من شفتها هيج وكلامها وثقتها برغم من دوعها بس جانت قويه
خلتني افقد اعصابي واكوم احجي عنها كلمات ماكايلهن عمري كله بس ماندمت لااا حيل بيها وابو زايد
طلعت من البيت صح حسيت شي وطلع من حياتي ومكانها خالي بس ما اخليها تنتصر واعرف نقطة ضعفها ابراهيم
بيوم رجعت من الواجب وشفت امي كاعده وحاطه برهومي بحظنها وصافنه بست راسها وكلت
- ها حجيه وين بالج
- ولك يمه هاي مرت اخوك سند دوختي اكثر البارحه اجت وحجتلي كلام وكف شعر راسي ماصدكتها بس من صفنت بيني وبين روحي
واذكر تصرفاتها يطلع كل كلامها الكوثر صح بس هي عترفت كدامك والله حدوخ
- لا ادوخين ولا شي يمه هاي تلكيها لاعبه بعقل كوثر وتدرين انت كوثر شكد طيبه وكلبها طيب راسا اصدك
نسيتي من اجت هاي صديقة سند وكالتلها عوفي وعدي علاقه وياه وهو كلشي ماعده وهو الغبيه كومي اخذي همسه وروحي الاهلج يمعوده ليش
هم واحد يحب الثاني شكو حاطه نفسي بنص
كوه قنعناها ماكو شي بينهم وهاي وحده جذابه تلكين هاي هم هيج
- اي والله صدك زين برهومي شاون بي وولك يمه شلع كلبي وبس يصيح نو ونو
- نو شنو
- ع امه يسميها نو
- يتعوده يمه يتعوده شهر شهرين ينساها كايم اسبح سبحت واتمدتت بفراشي فكرت اله اخلي تندم ع الساعه الي وافقت اختها ومشت وراها
اله اخليها تعض اعصابيعها ندم واخليها تجظ تتوسل بيه ماااطلع نصر الدين
جانت ببالي فكره ماعرف اذا علمود اخليها صدك تنذل لو ماريد ابعدها عني واخلي غيري ياخدها ماعرف شنو الي اريده بس الاعرفه اريد اذلها
لهذا قرتت اطلكها محكمه وبس واخليها معلكه منا ومنا
ومنا ابتدء مشوار انتقامي منج يااا طفلتي
رجعت لغرفتي القديمه فوك جان بس ابراهيم كاسر كلبي
من رجعت من المحكمه ومن شفت قوتها واجوبتها اثبتلي شكد هي تختلف طلع طلع وجهها الحقيقي
رجعت بيومها وكبل ليامن وكعدت ادخن طلعت حركتي بجكاير من شفت تجاهلها الي ةجبروتها تثبتلي شكد غلطان اني طلع وره هذه البرائه بزونه تخرمش هههه بس الاسد يكدر عليها واعرف شلون اخليها تبجي دم
ومرت 3 ايام وره الجلس ومثنى كال الاسبوع الجاي عرسي من كال هيج صفنت هو ماطلك رانيا خلاها معلكه ببيت اهلها وجابلها ضره خوش استخدم طريقه ناجحه
ابتسمت واني افكر اي خوش طريقه اخليها تبجي دم واني اعرفها تحبني بس اتكابر ههه
انصاف : بليل من راحت جوري دهلت للغرفه وكمشت تلفوني رانيا نايمه هو من تنام ادخل الغرفه ادور اني بقيت اكلب بموبايلي
شفت البنات يحجن بلكروب دخلت عليهن واشوفهن يحجن عفتهن وطلعت
اريد ادخل ع صفحته وابطل مسويتله حظر وخلصانه من نشرت الفيديو ذاك اليوم وحظرته اخر شي اشجعت كمت سويت حساب جديد باسم ولد ودخلت لصفحته
وصدمني المنشور الناشره قبل دقائق جان عباره عن شعر
"ألف , حآء , بآء , كآف"
كيفمَا تشآء
آقرئهآ - أُكتبهآ
أنطقهآ - آشعر بِهآ
غنّهـآ ♥ُ !"
فـهي لكِ فقـط
T❤️N
لا يالله لا منو هاي بعد عليه وجماله حاط حرف التاء منو هااااااااي
اتخبلت سديت التلفون ونمت واني احس كلبي يفور نار كعدت الصبح ومن اذكر المنشور ردت اذبح روحي ماعرف شنو يسمى غيره ياترى بعدني احبه بعد كل الي سواه
لو لان عرف شلون يستصغرني كدام الناس طلكني منا وره اسبوع كبل الله عليك نصر الله كعدت اتريك وطب عمار شايل مثل البطاقه
باوعتله خايفه صاح رانيااااا
طلعت رانيا الي صارت تحبس نفسها بلغرفه وبس نايمه بس ولا ماثر عليها بلععكس سمنانه اصلا هنيالي والله
درت وجههي عنهم وسمعتها كالت هاي شنو عمار كعد كدامي شرب جاي وكال جابوها قبل شويه بطاقة عرس معزومه ع زواج مثنى
من كال هيج هيج راسا باوعتله اني وباوعت ع رانيا الي بقت واكفه مصدومه عافتنا وطلعت تركض للحديقه ومنا طلعت ع البستان ردت الحكها عاط بيها
- عوفيهااا تستاهل خوش كسرهاااا مثنى امشي بدلي عدي شغله وياج
- وين
- امشي بلا لغوه بدلت وطلعت وياه شفت هوسه بشارعنا سئلت عمار كال مادري تلكين شو منو متعارك يمعود
طلعنا واني صافنه وين ماخذني انتبهت طلعنا من واسط وهذا طريق بغداد درت عليه
- عماررر وين ماخذنيي
- مفاجئه شبيج
حجاها وابتسم واني بقبت صافنه واتنفس سريع خايفه من كلشي خايفه لا براهيم بي شي كل بالي راح يمه الى ان مرت الساعات وصلنا
بلوعت بيت سند باوعتله وهزيت راسي شعدناااا هنا عمار
- انزليي شبيج خايفه انزلي
نزلت وهو دك الباب فتحها سند مبتسم سلم عليه ودخلنا اشرالي ادخل اني اول احس كلبي يدك سريع من الخوف
دخلت واني خايفه بس وكفت مصدومه من شفت النفاخ والكيك ومكتوب عيدميلاد سعيد انصاف باوعت ع كوثر وجانت الصدمه واكفه وشايله ابراهيم ………… يتبع
،،،،،،، وللحكايه بقيه ،،،،،،
قرائه ممتعه احبتي
اخ شكد لعب نفسي الواتباد كلساع خلل ومابي نت كل البرامج يشتغلن وبيهن نت اله هو وفوكاها من وره الخلل انحذف بارت من 4000 الف كلمه بس يلا عدت كتابته من جديد والحمدالله النص الثاني كاتبته بلمذكره مو بلوات جان انحذف هم وجان لسه ممخلصه
وها شغلة لخ حبيت انوه عليها المشهد المستقبلي مال البارحه الي نشرته هواي سئلو شنو هاي ودخنا حبايبي انتم عنوني انتم هذا مشهد راح تلكو بلبارتات الاخيره من القصه اوك فهمتو يعني راح تلكو بلبارت الاخير لو القبل الاخير يجوز يتكون النهايه الله اعلم 😂😂😂 لالالا والله مو النهايه اشاقه وياكم هههههههههههههه هسه شريد منكم
تصويتكم وتعليقاتكم وتوقعاتكم
واعتذر ع الاطاله
#نور الشمري
#نوشه