#مياس_قلب_الشهم
للكاتبه #لبنى_الموسوي
عفتهم ورحت للمطبخ حتى اسوي العشه ويا البنات
وگفنه نشتغل ونسولف بيناتنا فجأه انصدمنه من سمعنه شهم ديصيح بصوت عالي
ركضنه للصاله بخوف ... شفنا ديصيح على مهيب ظلينه صافنين من الصدمه !!!
شهم.. سد الموضوع ولتناقشني بي بعد
مهيب.. ما اسده شهم ،،، اني مصر على قراري مجرد جاي ابلغك مو اخذ رأيك افهم هالشي
شهم.. ولك لتخبلني انت واعي على نفسك شدتحچي لو الضربه اثرت على راسك
الحجيه.. مو بكيفك مهيب .. ما ارضى عليك اذا سويتها وروحه لأبوك
شهم.. هسه غير يحچي ... ليش ساكت !! سمعني صوتي خلي افهم شبيك
شنو هالقرار المفاجئ ،،، الشي الصار بهل يومين اله علاقه بقرارك ؟؟
مهيب.. لا شهم صارلي اكثر من شهرين دا افكر بالموضوع بس زواجي من مياس خلاني أأجله شويه
ومو وحدي راح اتطوع
شهم.. شنو يعني مو وحدك ما فهمت ؟!!!
مهيب.. جهاد ويايه
انضربت على راسي من اجه مهيب وگلي اريد التحق بالحشد الشعبي ... بس الصدمه هاي چانت لا شيئ يم صدمتي بجهاد
شهم.. درت وجهي علي متفاجأ : شنو هالحچي خالي ؟!!
منال.. احد يفهمنه شديصير !!!
شهم.. تعالي خويه ،،، تعالي شوفي ابنچ واخوچ شديخربطون
مهيب.. شهم ترى احنه مو هذولاك الجهال الربيتهم على ايدك
كبرنه و واحدنه صار بطولك يعني كلمن بينه مسؤول على تصرفاته بعد
لذالك ابد مالك حق تتدخل وتمنعنه
شهم.. لتخبلنييييييييييي
مو كافي الخطر الأني بي بحيث يوميه انام وبراسي الف فكره اذا متت شلون بيكم ومنو الكم من بعدي
يعني وكأنو ما كافيني حملي حتى اشيل حملكم ويايه
منال.. خويه بروح ابوك فهمني شديصير ؟!
شهم.. ابنچ واخوچ يريدون يتطوعون بالحشد الشعبي
منال.. يا يمه ،،، عزه العزاچ يمنال على هالخبر
جهاد يمه تخبلت شجاك ؟؟
مهيب احچي شبيكم ناوين تموتونه من القهر
هو اني سمعت مهيب يريد يتطوع بالحشد لو مدري شصار بيه ... احس جسمي كله ينفض اريد احچي ويا ما اگدر بعد لساني انعگد من الخوف
درت وجهي علي شفته يعاينلي .. اشرتله براسي والقلق مبين على ملامحي دنگ وجها بلا ميحچي شي
شهم.. شوفوا ثنينكم
احچيها الكم من الاخير احسن الي والكم تشيلون هالفكره من راسكم لان مستحيل اقبل بيها .... لهنا وانتهى النقاش سدوا الموضوع بعد
تفاجأنه من گام مهيب على حيله وصيح على شهم بصوت عالي
مهيب.. مو بكيييييفك
كافي تتحكم بينه سوو هيچ ولتسوون هيچ
تعالوا منا ولترحون مناك
هذا اي وهذاك لا
هذا مسموح وهذاك ممنوع
كافي اختنگنه منك ومن استبدادك
لتصير اناني تفكر بس بنفسك وتتجاهل وجود البشر يمك
ما انساها الك شلون منعتني ادخل للكليه العسكريه بحجة خوفك عليه
شهم.. حجه !!!!!!!
مهيب.. اي حجه
مچنت تريدني اصير احسن منك .... دائما تريد تظل انت الاول بكلشي والباقي كلهم جواك
شهم.. مع الأسف عليك خويه اذا تفكيرك بيه طلع بهل مستوى الضحل
مع كل الأسف والله
حچه هيچ وخله وصعد فوگ .. الكل ظلوا يلومون بي الحجيه ومنال ونهى وحتى سمر
الحجيه.. عيب عليك السويته باخوك يمهيب
هسه صار شهم اناني وميفكر بس بنفسه ؟!!
هذا الرجال الضحه بعمره كله في سبيل يربيكم ويحميكم من الدنيا وشرها تالي من تالي هيچ يتجازه يا حيف تربيته بيكم يا حيفها والله
نهى.. ليش مهيب ؟؟!!
شنو معنى كلامك هذا !!
انت اكثر واحد تعرف بشهم يفكر بالكل يلا يفكر بنفسه
شنو الخلاك تحچي ويا بهل طريقه الجارحه بس فهمني
سمر.. والله خطيه خالي ميستاهل منك هالكلام
منال.. انت براسك غيره من حچيت هيچ لو نشالت خلص
مهيب كافي اسكتوا عاااااد
سمعت خطوات ع الدرج ... رفعت راسي شفت شهم مغير ملابسه بس وجها ميتفسر من العصبيه
نزل ع السريع .. طلع من البيت بلا ميجاوب الناس الديصيحون ورى واولهم امه
الحجيه.. شدعي عليك مهيب
زين هيچ كسرت اخوك ،،، حاچيني يستاهل منك هالشي لو لا
مهيب.. فرك وجها حيل : استغفر الله رب العالمين واتوب اليه
جهاد.. مهيب روح الحگه لتخلي يطلع وهو ضايج
مهيب.. خل يروح احسن ،،، الجو مكهرب بيناتنا هسه
لا هو راح يفهمني ولا اني اگدر افهمه واحنه بهل وضع
منال.. بس مهيب
مهيب.. گام على حيله : رايح لغرفتي انطمر لحد يگعدني ع العشه
خله وراح .... ظلينه صافنين ورى حايرين بيناتنا ليش تصرف بهل شكل ويا شهم !!!
الحجيه.. يمه شلون بيه .. ولدي تخاربوا من تالي عمرهم
منال.. يوم لا تحچين هيچ
كل الموضوع مهيب مضغوط شويه بسبب الصار ويا بهل يومين .. هسه يگعد بينه وبين نفسه ويعرف غلطه
نهى . بعديش ؟؟ بعد ما جرح اخو وكسر گلبه
جهاد.. مرت خالي عوفچ من هالحچي
هسه يتصافون وكلشي ينتهي بس طلعوا منها انتو حتى لتخربوها ازيد من هالخراب
عفتهم يحچون ورحت لغرفتي ... چان گلبي دينعصر من الألم على شهم ومن الخوف على مهيب بعد ما قرر مثل هالقرار الخطر
فتحت الباب شفت مهيب متمدد ع الچربايه وايده على وجها
مياس.. مهيب گاعد
مهيب.. اي
مياس.. اگدر احچي وياك
مهيب.. تعالي
رحت گعدت ع الچربايه گام من نومته وگعد گبالي ... لزمت ايده حسيته ديرجف خفت علي كلش
مياس.. حياتي شبيك ترجف هيچ ؟!!
مهيب.. تعبان
مياس.. ليش شيوجعك ؟؟
مهيب.. گلبي
مياس.. حضنته ع السريع : اسم الله على گلبك عمري انت
اذا على شهم فأكيد يسامحك من يعرف بيك تراجعت عن قرارك لان هو من خوفه عليك منعك من هالشي مو اناني مثل ما گلت عنه
مهيب.. مياس
مياس.. ها حبي
مهيب.. ما اتراجع عن قراري .. مصر اروح للحشد افهمي هالشي انتي وشهم حتى تختصرون التعب عليه
مياس.. وخرت من حضنه وعيوني نملت دموع : شتحچي مهيب !! شنو يعني مصر تروح ؟؟
لعد واني ؟!! ما فكرت بيه قبل لتقرر مثل هيچ قرار
مهيب.. مسح دموعي بأيده : مياس حياتي انتي ... بس اسمعيني
العراق هسه بوضع صعب حيل ،،، كلشي بي مهدد بالضياع والاندثار
مقدساته
دياناته
اثاره
ثقافته
اهله
ناسه
هيبته بين البلدان
اذا انتي لگيتي من يخلصچ وينقذ شرفچ من الانذال فهسه اكو الف حره غيرچ تنتظر منه ننقذها من ايد داعش
لمن اني اگعد لأن اهلي يخافون عليه وغيري يگعد لنفس السبب ... العراق منو اله ؟؟ ومنو يطلعه من محنته غير ولده
الوضع ميحتمل السكوت والازمه الاحنه بيها متنحل بالخوف
مياس ارواحنه مو اهم من بلدنه وامهتنا وخواتنا وبناتنا
ليش نتسمى زلم اذا نشوف الاغراب يعتدون على شرفنه و وطنه ونوگف نتفرج ... خلي نلبس شيله ونگعد بالبيت احسن النه لان عيب تظل هالشوارب ع الوجه ،،، وضرب على شاربه
مياس.. بچيت بحرگه : واني منو الي اذا صارلك شي لا سامح الله ما فكرت بهالشي ؟!!
مهيب.. حضني حيل : الاعمار بيد ربچ تعددت الاسباب والموت واحد
يعني اذا ما متت بالحشد فأموت مدعوم او حتى بفراشي بلا سبب لو الله كاتبلي الموت بهل عمر
مياس.. اسم الله عليك لتحچي هيچ ... وگمت اشهگ
مهيب.. كافي لتبچين فطرتي گلبي ،،، وداعتچ ما اعوفچ لا هسه ولا حتى بعد ما اموت وتذكري كلامي
مياس.. شنو تضحك عليه !!!
مهيب.. ما عاش اليضحك عليچ
جرني لجسمه حيل : مشتاقلچ موت
مياس.. واني هم مشتاقتلك
بس تراجع الله يخليك ... ما اتحمل اخسرك لان ساعتها من صدگ اموت
مهيب.. حط ايده على شفتي : اششششش
لتحچين هيچ اسم الله عليچ
مياس.. لعد گول تراجعت
مهيب.. ما اتراجع عمري
ردت احچي منعني من اخذ شفتي بشفته ... حاولت ابعده حتى احل الموضوع ويا بس ما گدرت لان فقد عليه
رحت ويا لغير عالم ونسيت كلشي بين احضانه ... بس كمل مني تذكرت الصار فجأه ونزلت دموعي بحرگه
مهيب.. شبيچ حبي اذيتچ ؟؟
مياس.. اي
مهيب.. حضني حيل : اسف والله اسف
ليش هيچ بعدچ تتأذين اخذچ للدكتوره ؟!!
مياس.. اذيت گلبي مهيب مو جسمي
مهيب.. صدگ تحچين ؟!!
مياس.. اي ،،،، عوف هالسالفه الله يخليك
مهيب.. اذا تحبيني سدي الموضوع لان راح تعبين نفسچ بلا نتيجه
مياس.. يعني مصر ؟؟
مهيب.. گومي عمري طلعيلي هدوم حتى اغسل
گمت حضرتله الملابس طب غسل وطبيت ورى ... نص ساعه گاعده بالحمام لا دموعي ترضى تجف ولا گلبي يرضى يهدأ لحد ما استسلمت للواقع : خلص مستحيل يتراجع اعرف بي شگد عنيد والبراسه يسوي لو شما صار
غسلت وطلعت دا اطب للغرفه سمعت مهيب ديقره قرأن بصوت عالي
فتحت الباب ورحت گعدت ع الچربايه اسمع اله حتى ارتاح لان جربت القرأن هو الشي الوحيد اليگدر يريح الگلب ويزيح الهم منه
ما اعرف شگد مر وقت على هالوضع لحد ما صدق ودار وجها عليه
مهيب.. نعيما
مياس.. الله ينعم عليك
مهيب.. ليش گاعده هيچ مو تستبردين
مياس.. صوتك حلو
مهيب.. هههه وهاي انتي چنتي تسمعيلي طول ما اني اقره
مياس.. اي
لف السجاده وگام شغلي الصوبه ... اخذني من ايدي گعدني گبالها وجر الخاولي من راسي ينشف بشعري
مهيب.. مياس
مياس.. ها حبيبي
مهيب.. ما اعوفچ والله لتخافين
مياس.. ما خايفه
مهيب.. وهالعيون الرايحه من البچي شنو تفسيرها ؟!!
نزلت دموعي بسرعه ... حضني من ورى وگام يبوس برگبتي
مهيب.. تسكتين لو اعرف شلون اسكتچ
مياس.. فتحت عيوني ممصدگه : شلون تسكتني تتراجع عن قرارك يعني ؟؟
مهيب.. لا
مياس.. لعد شلون !!!
دارني علي ع السريع وباسني من شفتي حيل
مياس.. ههههه وهاي الطريقه راح تسكتني عود
مهيب.. طبعا خو جربتيها قبل شويه وهسه هم راح اذكرچ بمفعولها لان شكلچ نسيتي
سحبني ودفن راسه برگبتي .. دفعته بضحكه حتى امنعه بس لطش ولا يقبل يوخر
مياس.. هههه مهيب بشرفك
مهيب.. شنو حبيبي ؟؟
مياس.. هستوني غسلت ما بيه حيل ارجع اغسل مره ثانيه
مهيب.. اني اغسلچ بيدي
مياس.. ههههه بس فهمني انت متتعب ؟!!
مهيب.. وياچ ؟؟ توووو
مياس.. مخبل والله
مهيب.. بحبچ حياتي
جرني للچربايه ووو ( يلا بنات بلا زحمه اطلعن خلي نسد الباب ع العرسان 😁😁 )
رجعت غسلت وهو طب ورايه ... گعدت اتصفح بالفيس من ضوجتي حتى انسى شويه بس ماكو الخنگه متقبل تفارگ صدري
صارت ال١٢ سمعت صوت الباب انفتح عرفت شهم رجع .. خليت حجابي على راسي وطلعت اركض
مياس.. شهم
شهم.. ها بابا
مياس.. ممكن احچي وياك شويه
شهم.. اي طبعا ،،، تعالي للاستقبال
مياس.. اسبقني وجايه وراك
رجعت للغرفه شفت مهيب متمدد يريد ينام
مياس.. حبي
مهيب.. نعم حياتي
مياس.. شهم رجع
مهيب.. اي وبعدين ؟؟
مياس.. گوم اعتذر منه
مهيب.. ميخالف على باچر
مياس.. لا هسه
مهيب.. مياس تعبان
مياس.. بداعتي
مهيب.. گام من مكانه : صار تأمرين أمر
مياس.. راد يطلع لزمته من ايده : هذا شهم لتنسى مهيب
مهيب.. هز راسه : وين هو ؟؟
مياس.. بلاستقبال لان گتله اريد احچي وياك
مهيب.. باسني من راسي : احبچ
مياس.. واني اموت عليك
بعد ما عرفت مهيب وجهاد يردون يتطوعون بالحشد تخبلت من خوفي عليهم
حاولت بكل ما بيه حتى امنعهم بس بلأخير انصدمت برد مهيب عليه لمن اتهمني بلأنانيه
اختنگت كلش ... صعدت غيرت ملابسي وخابرت يوسف لان ماكو غيره يفهمني ويخفف عني
التقيت بي حس بيه ورأساً سألني ... حچيتله كلشي بلكت ارتاح وتخمد نار صدري بس تفاجأت من رده عليه
يوسف.. شهم اسمحلي انت غلطان
شهم.. صدگ تحچي !!!
يوسف.. اي
يا اخي كبروا استوعب هالشي
اعرف بيك تخاف عليهم اكثر من روحك بس لتتصور تحكمك بيهم بهل شكل راح يخليهم يتراجعون عن قراراتهم
اسأل
افهم
ناقش
حل
ما نحلت خليها على ربك ... بس مال تجي تمنعهم وتفرض رأيك عليهم بلا ما تسمع منهم فبهل طريقه تكون فعلا دتخسرهم وتخسر احترامهم الك
حقه مهيب يشوفك مستبد واناني لان انت فعلا مستبد واناني بخوفك عليهم
ميصير كلما ضجت من شي او ما عجبك شي توگف بوجهم وتمنعهم منه بلا ما حتى تتعب نفسك وتتناقش وياهم
ماشي على مبدأ (نفذ كلامي ولتناقش) .. هذا المبدأ مشه عليهم من چانو جهال اما هسه صعب يمشي عليهم شهم
يعني بغض النظر عن خوفك عليهم ... هم غلطوا بشي لمن قرروا يتطوعون بالحشد ؟!!
شبيك صافن بوجهي متجاوب ؟؟؟
شهم.. لا
يوسف.. اذا منو الغلطان هسه ؟!!
انت .... نقطه راس سطر
لتضوج من كلامي بس دا احچي هيچ لمصلحتك ... كلام مهيب ما اجه من فراغ شهم
مهيب حس نفسه اختنگ من تحكمك بي
يعني حسره علي يقرر قرار وينفذه بلا ما يرجع الك حتى توافق علي
زين هو رجال وهالشي صعب علي ... كل قراراته معلقه على موافقتك واذا ما وافقت معناها يتراجع عنه بلا ما تكلف نفسك وتناقشه حتى
شهم.. صح كلامك يوسف
بس والله ما متقصد اتحكم بيهم مثل متگول
خوفي عليهم يجبرني اقسي وياهم واستبد بعض الاحيان
يوسف.. حتلو مو قصدك بس الواقع شيگول ... انت دتتحكم بيهم والسلام عليكم ورحمة الله وبركاته
شهم.. حيرتني اكثر من الحيره الچنت بيها
يوسف.. لتحتار ضلعي ... لا توگف بطريقهم عوفهم يسوون اليردوا وخليها على ربك
اصلاً المفروض منك تفرح ربيت زلم خشنه ينشد بيهم الظهر
ابد مو سهله الواحد يضحي بروحه ويروح للموت برجله إلا اذا كان رجال من ظهر رجال
شهم.. اااخ بس لو تشوف النار الشابه بيه هسه چان فهمتني وعذرتني بعد
يوسف.. وسفه عليك اذا اني ما افهمك منو اليفهمك لعد ... بس تگدر تگول انت ما فاهم نفسك ههههه
شهم.. ههههه عود حچيت
يوسف.. دضحك يبعد اخوك
ذب حملك ع الكريم ماكو احسن منه
شهم.. ونعم بالله ... اي انت شلونك مشتاقلك حيل
يوسف.. اسأل عنك حبيب گلبي
اني الاكثر والله ... چنت ناوي اليوم اجيك لان عرفت من نهى برجعتك بس انت سبقتني
شهم.. ههههه حتى تعرف بمعزتك اول يوم رجعت اجيتك بوجهي
يوسف.. خاف جاي السواد عيوني واني ما ادري
شهم.. ههههه لك لا والله مو هيچ السالفه
يوسف.. هههه اتشاقى وياك حبيبي ... المهم شفتك مو مهم ليش
ظلينه نحچي لحد ما حسيت نفسي ارتاحيت كلش ... يوسف مو مجرد ابن خاله هو بالنسبه الي اخ واكثر
رجعت للبيت تالي الليل طلعت مياس من غرفتها وصاحتني تريد تحچي ويايه
رحت للاستقبال انتظرها .. شويه وانصدمت بمهيب من دخل عليه
گمت فتت من يمه حتى اطلع لزمني من ايدي يمنعني
مهيب.. اسمحلي شويه
شهم.. شتريد
مهيب.. اسف
شهم.. صفنت بوجها والعتب واضح بعيوني : اسف !!!
مهيب.. حضني حيل : مو قصدي والله العظيم ... تدري بيه شگد احبك واريد خاطرك
شهم.. اشك بهالشي بعد السمعته منك اليوم
مهيب.. لا شهم لتحچي هيچ
وروحه الابويه ما قصدت اجرحك او أأذيك بس انت مدتفهمني
شنو يعني كلشي اگلك تجاوب بـ لا !!
اني رجال مو طفل شهم ... حتلو خايفه عليه ما دام ممسوي شي غلط مو من حقك توگف بوجهي وتمنعني
شهم.. ما اتدخل بعد بيك ... روح سوي التريده انت حر
مهيب.. مو هيچ شهم دتأذيني والله
شهم.. حضنته والدمعه بطرف عيني : خايف عليك يالمسودن استوعب هالشي
مهيب.. لتخاف حبيبي ميصير إلا الكاتبه ربك ( أينما تكونوا يدرككم الموت ولو كنتم في بروج مشيدة)
شهم.. لتجيب طاري الموت على لسانك يول
مهيب.. هههه صار ... بس المهم رضيت عليه هسه
شهم.. الله يرضى عنك يخويه
مهيب.. يعني نتوكل بالله
شهم.. ربي يحفظكم ان شاء الله
مهيب.. حضني حيل : وروح ابويه اموت عليك
شهم.. بادلته الحضن : واني اموت عليك وليدي
مهيب.. يلا اصعد ارتاح تعبت اليوم بسببنه
شهم.. تصبح على خير
مهيب.. وانت من اهل الخير
راح لغرفته ظليت اعاين ورى مو بيدي اخاف علي اكثر من نفسي .. صعدت فوگ لگيت نهى كاعده تنتظرني
نهى.. ظل بالي عليك
شهم.. مو خابرتچ وگتلچ ويا يوسف
نهى.. اي بس هم ظليت قلقه لان طلعت منا ضايج وزعلان
شهم.. ليظل بالچ هسه حچيت ويا مهيب وانتهى كلشي
نهى.. صدگ والله يعني تصالحتوا
شهم.. اي
نهى.. الف الحمد لله ،،، يلا بدل هدومك حتى ننام
غيرت ملابسي .. طفيت الضوه هستوني متمدد يمها سحبت راسي لحضنها
نهى.. اگول حياتي
شهم.. گولي حبي
نهى.. شنو رأيك نتهور
شهم.. ههههه دگعدي راحه يمعوده ناقصني مصايب
نهى.. هاي شبيك ممشتاقلي
شهم.. نهى احنه نظل يوميه نعيد ونزيد بنفس الاسطوانه
مو مره جربنه وشفتي شلون وصلتي للموت إلا شويه
نهى.. واذا متت فدوه الك
شهم.. اسم الله عليچ .. ما اريد اسمع هالكلام منچ مره ثانيه
نهى.. يعني افهم من كلامك ما بيك مجال
شهم.. ههههه لا ما بيه
نهى.. ولا شويه
شهم.. هههههه شلون تالي وياچ
نهى.. زين تعال اشاورك
شهم.. وليش تشاورني هو منو الاكو حتى يسمعچ
نهى.. تعال ولتعاند
شهم.. هاي يلا شاوري
صدگتها وقربت اذني منها بس تفاجأت من لزمت رگبتي بشفتها
شهم.. اااخ ولچ هاي شسويتي
نهى.. ههههه طبعت حبي على رگبتك
شهم.. اگص ايدي اذا صاحيه انتي
گمت للمرايه عاينت الاثر برگبتي شكبره وچماله بالمقدمه
شهم.. لا نهى بشرفچ تحچين صدگ ؟!!
هسه اني شلون اطلع گدام العالم حتى الملابس متغطي عملتچ
نهى.. ههههه عادي حبي من شنو تخجل غير متزوج
شهم.. دوخري خلي انام اشرفلي
نهى.. ههههه تعال بحضني
شهم.. لا عيني بعد ما عندي ثقه بيچ تروحين تغدريني مثل قبل شويه
نهى.. ههههه لا والله راح اگعد عاقله بس تعال
شهم.. متأكده ؟؟
نهى.. وداعتك
شهم.. ماشي خل نشوف
تمددت بحضنها .. بسرعه طفيت من التعب دا انام حسيت اصابعها تمشي على رگبتي
شهم.. بصوت ناصي : نهىىىى
نهى.. ها حبيبي
شهم.. عفيه نعسان
نهى.. ههههه مو بيدي احبك
شهم.. واني اموت عليچ بس عوفيني حبابه
نهى.. هههه ماشي تصبح على خير
شهم.. وانتي من اهل الخير
بلشوا مهيب وجهاد يجهزون للتحاقهم بالحشد
وبعد اسبوع بالضبط اجه الوقت حتى يودعونه حالهم حال الأف الشباب الودعت عوائلها حتى تدافع عن ارض الوطن
ليلتها اختنگت كلش لان الفجر يلتحق مهيب وچنت خايفه من روحته بشكل مو طبيعي
مهيب.. مياس
مياس.. ها حبيبي
مهيب.. كافي تفكرين گتلچ ما اعوفچ كلها كم شهر وارجع
مياس.. الله يسمع منك
مهيب.. شو تعالي لحضني
مياس.. بس كال هيچ حضنته بسرعه ونزلت دموعي : راح اشتاقلك والله العظيم
مهيب.. مو بگد شوقي الچ يعمري
مياس.. لتروح مهيب الله يخليك
مهيب.. هم رجعنه
مياس.. شوف اذا صارلك شي ما اسامحك
والقرأن الكريم ما اسامحك لان انت العفتني بأرداتك
مهيب.. ههههه وداعة عيونچ كلشي ميصيرلي
بعدين تعالي گوليلي وين الوداعيه مالتي
مياس.. وداعية شنو ؟؟
مهيب.. هسه اني اگولچ وداعية شنو .. جرني من ايدي وباسني حيل
مياس.. مهيب
مهيب.. ها حياتي
مياس.. احبك
مهيب.. حط ايدي على گلبه : هاچ شوفي شيصير بيه من اسمع منچ هالكلمه
مياس.. دنكت علي بسته من صدره : الله يديملي هالنبضات ولا يحرمني منهن
مهيب.. ولا يحرمني من كلامچ المثل العسل
تقرب مني ووو ....
بيومها ما گدرت افارگه يا دوب بس غسلت ورجعت لحضنه .... ظليت على هالحاله للصبح حتى ما گدرت انام واني اتأمل ملامحه : شلون بيه اذا صارلك شي مراح اگدر اعيش بدنيا ما بيها انت
فتح عيونه الفجر ويا الاذان شافني گاعده استغرب
مهيب.. شو كاعده !!!
مياس.. ما گدرت انام
مهيب.. ليش دتسوين بروحچ هيچ ترى اني لا اول ولا اخر واحد يمشي بهل طريق
هاچ شوفي شهم گدامچ اشهر وهو بنص الموت بس الله حافظه لخاطر مرته وامه وراح يحفظني ان شاء الله لخاطر عيونچ الحلوه
مياس.. امين يا رب
مهيب.. يلا گومي نصلي حتى اطلع ما ظل وقت
وگفنه صلينه .. رحت تأكدت من جنطته خاف ناسيه حاجه وهو راح يتريگ ويا جهاد لان منال جهزتلهم الريوگ
شويه ورجع .. بس شفته گدامي بچيت بحرگه ،،، ركض عليه حضني
مهيب.. كافي بروحها لأمچ والله ما ارتاح اذا عفتچ بهل حاله
مياس.. اوعدني ترجعلي مهيب
مهيب.. اوعدچ ارجع وهسه تشوفين بس قوي گلبچ
رفعت نفسي اله بسته من شفته .. بادلني بلهفه لحد ما نفسنه انگطع
وخر مني .. شال جنطته راد يطلع كمشت ايده وعاينتله بنظرات رجاء حتى ليعوفني
مهيب.. لزم وجهي بثنين ادي : راجعلچ وداعة هالعيون راجعلچ
مياس.. راح اشتاقلك
مهيب.. لعد اني من هسه مشتاقلچ
رجع دنگ عليه باسني .. حضنته من خاصرته چان يسحب نفسه مني ويطلع ع السريع
ذبيت حجابي على راسي وطلعت ورى .. عاينت الكل بالصاله وعيونهم رايحه من البچي مثل حالتي
لفت انتباهي شهم واگف بالزاويه وعيونه تتحرك عليهم بلا ما يحچي اي شي عكس الكل
شويه وراحوله جهاد ومهيب .. حضنهم حيل ودنگ راسه حسيت بي لان ادري شگد يحبهم وخايف عليهم
مهيب.. شهم ما اوصيك على مياس امانة برگبتك منا لما ارجع
شهم.. لتوصيني على بنيتي .. المهم انت ترجعلنه بالسلامه
عاين على جهاد وجره الحضنه حيل
شهم.. راح اشتاقلك يروح خالك
جهاد.. واني راح اشتاقلك خالي
سمر تعاين الجهاد وتبچي
منال واگفه يمه وخاله ايدها على ظهره
الحجيه راحت عيونها على مهيب
جو كأيب صعب ينشرح بكلمات بسيطه .. عشنه لحظات بس الله يعلم بوجعها
سلموا ديطلعون ركضت منال لزمت ايد ابنها وهي تبچي بحرگه
منال.. وليدي لتروح فدوه اروحلك
جهاد.. باس ايدها : ارجع يمه وداعتچ ارجع
منال.. مهيب خويه
مهيب.. باس راسها : نرجعلكم خيتي بس ادعولنه
راحت الحجيه حضنتهم ع السريع وانهدت بالبچي ... ثنينهم يحاولن يسكتوها بس متقبل تسكت
مهيب.. يمه بروح ابويه كافي شلون اروح وانتي هاي حالتچ
ادعيلنه نرجعلكم بالسلامه احسن من البچي
الحجيه.. ولك يمه شلون ما ابچي واني دافعتكم للموت بيدي
جهاد.. بيبي الله يخليچ كافي صدگي راجعين .. الله راح يحفظنه لخاطر دموعچ
الحجيه.. امين يبيبي امين
واگفه بالزاويه اعاينلهم بقهر وما اشوف بعيوني من گد الدموع البيها .. التفت مهيب عليه بس شافني بهل حاله اجه حضني گدامهم
مهيب.. كافي يا عمري لخاطري كافي
مياس.. دير بالك على روحك الله يخليك
مهيب.. صار بس انت هم لتبچين بعد لخاطري
ديري بالچ على نفسچ ولتطلعين من البيت إلا ويا شهم
مياس.. مسحت عيوني : الله يحفظكم ويرجعكم النه بالسلامه
ايهاب.. ديروا بالكم على نفسكم بعد منوصيكم
جهاد.. ان شاء الله خالي
طلعوا لجرف الصخر واخذوا ارواحنه بطلعتهم... اليوم كله گضينا بس بچي حتى ما گدرنه نخلي الاكل بحلگنه
لليل گاعده بغرفتي راسي انفجر من گد ما نحبت علي .. دگ تلفوني مهيب ديتصل
فتحت الخط بلهفه ممصدگه راح اسمع صوته
مياس.. حياتي
مهيب.. ها حبيبي شلونچ
مياس.. زينه وصلت ؟؟
مهيب.. اي وصلت وخابرت شهم هم ... ليظل بالچ الشبكه راح تروح مني فتره طويله
مياس.. شلون يعني بعد ما اسمع صوتك
مهيب.. تحملي عمري فتره وتعدي ان شاء الله
مياس.. ان شاء الله ... انتو شلونكم ؟؟
مهيب.. زينين حبي لتخافين علينه .. يلا صار لازم اسد الخط
مياس.. دير بالك على نفسك
مهيب.. وانتي هم ،،، احبچ هواي
مياس.. اموت عليك
سد الخط ارتاحيت شويه من سمعت صوته .. طلعت بلغتهم باتصاله حتى اطمنهم طلع جهاد مخابر امه ومنطيهم علم بوصولهم
مرت الايام بارده كلش بغياب مهيب .. حسيت حياتي صارت فارغه
بدونه صار كلشي عباره عن اسود وابيض بلا الوان بعد ما غاب عني بشكله وصوته
اكلي قل وضعفت كلش .. چان شهم ينتبه عليه ويعاركني من يشوفني ما اكل لذالك صرت امثل گدامه لمن نجتمع ع السفره حتى لا اشغل باله عليه لأن البي هو كافي علي وزياده
وبعد شهر بالضبط گعدت الصبح دايخه كلش ومالي خلگ لأي شي ... بالگوه اشتغلت ويا البنات حتى لتزعل الحجيه وتصيرلي مشاكل من لا شيئ
للظهر واگفه ع الطباخ اسوي الغده ويا نهى حسيت نفسي الدنيا افترت بيه وبعد ما اشوف شي گدامي
لزمت راسي اريد احچيلها حتى تساعدني ما سيطرت على روحي ووگعت من طولي ....
يتبع..