مياس قلب الشهم

البارت الثالث

#مياس_قلب_الشهم

للكاتبه #لبنى_الموسوي

صار عندي فضول اعرف شديصير بيناتهم تسحبت لغرفتها على كيف حتى اتسمع عليهم وانصدمت كلش من الشي السمعته

عماد.. شلون باشرف اخاف يأذيني اذا عرف بهل سالفه

سميحه.. ولك انت اثول هو هذا هم بي حظ حتى تخاف منه الله وكيلك كلشي ميسوي غير يشيلها ويشمرها عليك وهيچ اني اخلص منها واستفاد براسها وبنفس الوقت انت تحصلها ببلاش وتخليها خدامه جوه رجلك طول العمر

عماد.. متأكده يمعوده لتورطيني هي صح عاجبتني واريدها بأي طريقه بس مو على حساب حياتي

سميحه.. امشي ورايه وانت مغمض وشوف اذا ما ربحت ،، بس هااا من هسه اگولك قبل لا تطلع مياس منا اريد الفلوس بيدي

عماد.. طبعا بيچ خير وتتدللين بس خلي احصلها مو روحي طلعت

سميحه.. زين لعد اسمع شراح احچي وياك ،، الخميس الجاي اروح لاهلي الصبح واخذ الجهال ويايه .. راح امنعها تطلع للشغل وتبقى وحدها بالبيت انت استغل الفرصه وتعاللها وسوي الاتفقنه علي والباقي خلي عليه

عماد.. واني شلون اطب للبيت وانتي ماكو

سميحه.. طبعا انطيك نسخه من المفتاح هو هذا هم سؤال تسأله بشرفك ،، وبهل طريقه نخلي اشرف يتأكد چان بينك وبين بنته علاقه لذالك نامت وياك فما راح يشك بأي شي بعد

عماد.. خوش لعد بس ارجع واگولچ ترى السالفه وراچ واذا ورطتيني نروح بيها ثنينه

سميحه.. انچب لك حچي زايد ما اريد اسمع منك سوي العليك وعوف الباقي عليه المهم تاخذها بلا متخلي احد يحس

عماد.. ماشي صايرين عيوني

اسمعهم وجسمي يرجف من الخوف شديصير وشنو هذا الحچي السمعته عقلي مديشله !!! ركضت قبل ليطلعون ورجعت للمطبخ

وگفت يم الكاونتر لزمت بي لان حسيت روحي راح اوگع من الصدمه سمعته سلم وراح شويه واجتني سميحه

سميحه.. ها ولچ شعندچ واگفه هنا

مياس.. حاولت اتدارك الموضوع حتى لتشك اني سمعت كلامهم وگلتلها : شويه راسي يوجعني ودخت لذالك وگفت ارتاح

سميحه.. عفيه راس شفتچ وشفتيني تصيحين راسي يوجعني وانتي عرج ما بيچ

عفتها تحچي ورحت تمشيت للغرفه ،، طبيت وسديت الباب ورايه بس احس نفسي بغير عالم حتى ما سمعت شدتحچي ويايه

گعدت على المندر ولزمت راسي ،، شنو شديصير يعني هذا النگس يريد يعتدي عليه ويخلي ابويه يشك بيه بس علمود يتزوجني غصباً عني وعنه

ظليت اكل باظافري من الخوف حتى الدم حسيته جمد بجسمي .. لا بيه اسكت وانسى الشي السمعته ولا بيه احچي لان متأكده راح تگلبها عليه سميحه مو صعبه عليها السالفه هاي شيطان بهيئة انسان

شويه وطبت تصيح عليه لان تتخبل اذا تشوفني گاعده تريدني اكرب ٢٤ ساعه حتلو اطلع شغل من جوه الگاع المهم اشتغل

گمت اشتغلت وسويت الاكل ،، اجه ابويه وصبيتلهم العشه بس ما گدرت اگعد اكل وياهم من الخوف الدا احس بي

اشرف.. بابا ليش متجين تاكلين

مياس.. بالعافيه بابا ما اشتهي

سميحه.. لتخاف عليها تاكل العيش والجريش طول النهار طبيعي متشتهي تالي الليل

اشرف.. بالعافيه خلي تاكل شرايده منها

صفنت على ابويه ما اگدر اگوله اصلا مراح يصدگني لان سميحه تلوفها عليه بأي طريقه محد بالدنيا يعرفها ويعرف شرها بگدي

خلصت المواعين رحت للغرفه تمددت والخنگه مسيطره عليه واحس كلشي بيه يوجعني حتى دماغي

حايره شلون اتصرف بعد بس اربع ايام وهذا الحقير يجي ينفذ خطته هو وخالته وياخذ مني اعز شي عندي وتنتهي حياتي قبل لا تبدي اصلا

ساعه مرت على التفكير بلا ما اوصل النتيجه لحد ما اجو اخواني نيمتهم وظليت على هالحاله لحد ما نمت بالگوه

گعدت الصبح وطلعت للشغل بلا ريوگ حتى الماي ما اگدر اشربه من القلق والتفكير

وگفت بمكاني كالعاده شفت سيارة هذا الرجال من بعيد

وصل يمي نزل الجامه وهو مبتسم

شهم.. صباح الخير

مياس.. صباح النور

شهم.. بابا فد باكيت بلا زحمه عليچ

مياس.. عاينت للسياره الباكيت مالت البارحه موجود على حطته ،، مو هذا عندك شتسوي بي

شهم.. شنو تحاسبيني ؟!! انطيني باكيت وبلا حچي زايد

مياس.. عرفته يريد يساعدني شلت باكيت كلنس وانطيته اله ،، هذا تفضل

شهم..  طلعت فلوس انطيتها واني گلبي ينمرد عليها ما اتحمل اشوف هيچ ظلم گدامي والديصير وياها وهي بهالعمر اكبر ظلم عاينتلها وحچيت .. ما فكرتي بكلامي ؟؟

مياس.. فكرت وشكرا الك وقت الاحتاجك راح اخابرك ان شاء الله

شهم.. براحتچ يابه ،، يلا مع السلامه

مياس.. الله وياك

راح وصفنت ورى ،، شلون بيه اگوله يساعدني لو تنگلب السالفه عليه لان سميحه مستحيل تفوتها الي ... اكيد اذا عرفت راح تطلعها بيه بس بغير طريقه

صافنه وافكر اگوله لو لا واذا ما گتله شراح يصير وشلون اگدر اخلص من هالورطه ،، سمعت صوت احد يحچي يمي

- بسسس وين صافن الحلو

مياس.. وگع گلبي لان بالي مو يمي چان درت وجهي وشفت هذا الساقط واگف بصفي ،، انت شنو الخاطر ربك لزگه خو ما لزگه

- هو اكو واحد يشوف هالجمال وميلزگ بي وچ انتي مثل العسل شگد مناكل منه منشبع

مياس.. ولي منا ترى صبري بده يخلص وراح تشوف مني شي ميعجبك ابد

- تدرين البارحه الليل كله ما نمت واني اتخيل شلون بستچ صدگيني لحد الان اتذكر طعم شفتچ مدا اگدر انسى

مياس.. يا حيوااان يا حقيررررر ،، صدگني راح يجي اليوم الي سويته بيه الله يرده الك بعرضك وتذكرني ساعتها .. احچي ويا وجسمي ينفض من العصبيه على گد ما استفزني

- شبيچ اهدي هي بوسه قابل شسويتلچ متگوليلي ،، بعدين تردين تقنعيني يوميه واگفه بالشارع بنص الزلم محد منهم اخذ منچ شي منا منا

مياس.. الله ينتقم منك ،، الله ينتقم منك يا ساقط

عفته ودرت وجهي گعدت ع الرصيف واهز برجلي من العصبيه

- راح اروح هسه بس خليها ببالچ مراح اعوفچ اذا ما حصلت الاريده منچ وهسه تشوفين

راح وبس رفعت راسي عيوني گامت تجري ما گدرت اسيطر على نفسي بعد

مياس.. يا ربي شسوي بروحي اني .. منين اتلگاها من سميحه وعماد لو من هذا الما اعرف منين طلعلي لو من الشارع اليوميه اشوف بي اشكال الوان ومحد منهم راضي يرحمني

دا احچي ويا نفسي وگفت يمي مره وبيدها علاگة مسواگ

- خاله شبيچ اكو احد مضوجچ ليش تبچين

مياس.. لا خاله كلشي ما بيه شكرا لسؤالچ

- اخاف مريضه اوديچ للدكتور بنيتي

مياس.. لا خاله والله كلشي ما بيه بس حارتلي وما اگدر ارجع للبيت إلا ابيع هذا الكلنس كله

- انتي عندچ اهل

مياس.. اي عندي ابويه ومرته واخوان ثنين

- زين لعد انطيني هذا الكلنس اني اشتري منچ

مياس.. كله

- اي كله حبيبتي حتى ترجعين للبيت ترتاحين لان مبين عليچ تعبانه وصدگ الدنيا حاره شيگعدچ هنا منا لما تبيعي

مياس.. گمت من الگاع بسرعه والفرحه نرسمت على وجهي ،، شكرا خاله الله ينطيچ العافيه

- رحم الله والديچ بنيتي

مياس.. اخذت منها الفلوس وشفتها هواي متسوگه وفوگاها الكلنس صعبه عليها تشيلهن كلهن ،، خاله انطيني عنچ اساعدچ شويه

- اخاف ازحمچ حبيبتي

مياس.. لا خاله ماكو اي زحمه بس وين بيتچ

- هنا كلش قريب

شلت المسواگ وياها خمس دقايق ووصلنه خليته الها بالباب شكرتني ورادتني اطب ارتاح ما قبلت

رجعت للبيت ع السريع ممصدگه بعت الكلنس كله وخلصت من الشارع وضيمه

اول ما طبيت تلگتني سميحه لان راجعه من وكت

سميحه.. ها ولچ شو اليوم هم من وكت

مياس.. بعته كله مو زين

سميحه.. من گلت عندچ شي ويا واحد وديدفعلچ مقابله زعلتي وسويتي روحچ شريفه براسي

رحت عنها بلا ما اجاوب لان بس اترادد وياها بعد ما اخلص من لسانها

مرت الايام مثل ما هي وصار هذا الرجال يجي يوميه الصبح بنفس الوقت يشتري مني باكيت كلنس علمود يساعدني

صار يوم الاربعاء وگلبي انتهى من الخوف لان باچر الموعد حتى ينفذون خطتهم الحقيره

طلعت الصبح للشغل وكالعاده اول ما وصلت اجه هذا الرجال يشتري مني

شهم.. صباح الخير

صفنت بوجها بلا ما اجاوبه ،، اريد اگوله بلكت يساعدني بس والله خايفه سميحه اذا عرفت مراح ترحمني قابل هو شيريد يسوي اذا خلصني من عماد فمستحيل يگدر يخلصني منها

شهم.. صبحت عليها مرتين وهي مو يمي ،، شبيچ بابا صاير شي وياچ ؟؟ اني مو دا احچي يمعوده شبيييچ !!

مياس.. صحيت على صوته ،، اسفه ما انتبهت شگلت ؟؟

شهم.. باباتي وين صافنه ؟؟ احچي تردين شي لتستحين مني اعتبريني مثل ابوچ

مياس.. لا شكرا ما اريد شي

شهم.. ما راح اضغط عليچ بس رقمي يمچ شتحتاجين اني حاضر وهسه انطيني باكيت خلي اروح تأخرت

شلتله باكيت واخذت منه الفلوس .. سلم وراح

مياس.. ليش ما گلتيله مياس هاي چانت فرصتچ الوحيده حتى تنقذين نفسچ من هذا المأزق ،، يا ربي شريد اگوله يعني ؟! زين وسميحه اذا عرفت بي راح تسكتلي لا والله فلا تسكت ويمكن تذبني بسالفه اكبر من سالفة عماد بألف مره

رفعت راسي ليفوگ ونزلت دموعي .. الهي ساعدني ما عندي غيرك مكسوره اني ومحد يجبر كسري غيرك يا جبار الخواطر يا الله

صار الظهر بطلعان الروح لان لعبت نفسي على گد ما تحارشوا بيه

رجعت للبيت سويت الغده واشتغلت لحد ما هلكت حتى نوم ما گدرت انام من گد ما افكر بالموضوع شراح يصير وشنو لازم اسوي كلشي ما اعرف

بالتسعه بلليل چنت گاعده بالغرفه ولازمه دفتر اشخبط بي من ضوجتي حسيت سميحه طبت عليه و وگفت بالباب تعاينلي

مياس.. ها خير تردين شي

گعدت يمي مبتسمه حسبالها ما ادري بقذارتها هي وابن اختها النگس

سميحه.. اريد احچي وياچ شنو ممنوع

مياس.. لا ليش ممنوع احچي اسمعچ

سميحه.. باچر لتطلعين للشغل ظلي بالبيت

مياس.. وليش ؟!!

سميحه.. دا اشوفچ هالفتره كلش تعبانه انكسر خاطري عليچ فگلت اخليچ ترتاحين فد يوم ،، واني هم باچر اريد اروح لأهلي صارلي هوايه مرايحتلهم واخذ الجهال ويايه ظلي انتي بالبيت اشتغلي وطبخي الغده حتى من يجي ابوچ الظهر يلگه كلشي جاهز

مياس.. حچيت على طبيعتي حتى لا تشك بيه اعرف ،، اي والله رحم الله والديچ صدگ تعبانه ومحتاجه ارتاح بالبيت

سميحه.. تتدللين عيني يلا اگوم انام وانتي نيمي الجهال من وكت حتى من الصبح اگعدهم

مياس.. تدگين ويايه ناعم ست سميحه عود تريدين تضيعين السالفه ،، نفضت راسي وجاوبتها .. اي ان شاء الله

طلعت مني شمرت الدفتر وراها ،، يا حقيره يا قندره يا بت القندره حسبالها ما اعرف بقذارتها وقذارة تفكيرها بس اني اعلمچ ما افوتها الچ وروح امي

گمت اخذت اخواني نيمتهم وتمددت افكر شراح اسوي باچر

دموعي گامت تنزل مثل الشلال بحيث حسيت راسي راح ينفجر من گد التفكير والبچي ويا ريتني توصلت الشي

طلعت بره حتى اغسل وجهي لان اختنگت ما شفت احد الكل نايمين

غسلت وشربت ماي ،، طبيت للغرفه صار الموبايل گدامي

مياس.. اخابره لو شنو ؟؟ يلا مياس كافي قرري القرار الاخير ترى ما ظل شي على موتچ كلها كم ساعه وكلشي ينتهي

لزمت الموبايل وايدي ترجف من الخوف طلعت رقمه من جوه الحصيره ضميته هنا حتى سميحه لتشوفه

دگيت رقمه بجهازي ورمشتله لان شي اكيد ما عندي رصيد مثل العاده

انتظرنه دقيقه ما خابر ،، يا ربي كون يتصل خلي ارجع ارمشله بلكت يعرف بيه

رجعت رمشتله مره ومرتين وتلاثه ماكو ما اتصل

مياس.. شمرت الموبايل وشبعت بچي ،، خلص مياس خلص انتهيتي بعد

دا احچي ويا روحي دگ الموبايل ،، فز گلبي ويا دگته عاينت هذا رقمه

مسحت دموعي بأيدي وفتحت الخط خليته على اذني بلا ما احچي شي

چنت گاعد بغرفتي اني ونهى دنتابع فلم اجنبي سمعت موبايلي دگ سريع وفصل

نهى.. شنو هذا موبايلك ؟

شهم.. اي

نهى.. خلي اگوم اشوف منو

شهم.. اگعدي حبي هي ترميشه خلي نكمل الفلم

شويه ورجع موبايلي يرمش

نهى.. شو دوخر مني خلي اگوم اجيبه نشوف منو

شهم.. ولچ حضني اهم لو الموبايل

نهى.. هههه طبعا حضنك بس ترى الفار گام يلعب بعبي شعندك اعترف ليش تخاف اروح اجيب موبايلك

شهم.. ههههه الله يشافيچ ،، روحي شوفي عمي لتسويها عليه طلابه

گامت دتجيب الموبايل رجع رمش شفتها تعاين على الشاشه وگالبه وجهه

شهم.. ها منو ؟؟

نهى.. خزرتني وهي تگول ،، رقم غريب !!

شهم.. وشبيچ هيچ تعاينيلي

نهى.. منو هاي ؟؟

شهم.. هااااااي ؟!!! انه اخوچ چن السالفه صارت صدگ هههههه

نهى.. لتتمضحك وتضيع الموضوع منو هاي الدترمشلك بهيچ وقت

شهم.. نهى بطلي هالحركات شنو معقوله تشكين بيه فد يوم اني داگ الناقصه وياچ حاچيني

نهى.. اني ما گلت هيچ

شهم.. لعد شنو معنى كلامچ هذا

نهى.. هاك الزم خابرهم متشوف شلون ديلحون بالترميشه

شهم.. ما اخابر اليريدني هو يتصل ما فاتحها سبيل اني

نهى.. براحتك

شمرت الموبايل عليه ورجعت تمددت يمي ،، ثواني ورجع الرقم يرمش

نهى.. ترى هاي ما طلعت خابر وفضني اريد اعرف منو لان اليوم ميجني نوم للصبح اذا ما عرفت

شهم.. ههههه اويلي من غيرتچ بس لو تخففيها چان ريحتيني وارتاحيتي ويايه

نهى.. هاك الموبايل وخابر

شهم.. يابه ما اريد اخابر هي گوه

نهى.. بداعتي

شهم.. اوف منچ انطيني عمي انطيني امري الله

اخذت الجهاز منها خابرت الرقم بسرعه فتحوا الخط

شهم.. الوووو

مياس.. ما گدرت اجاوبه احس شي لازمني وعاگد لساني بس شنو هو ما اعرف

شهم.. منو ويايه الووو تسمعوني

مياس.. اختنگت بالزايد سديت الخط وشهگت من البچي

شهم.. محد رد وبسرعه سدوا الخط بوجهي صفنت ع الموبايل

نهى.. ها شهم منو

شهم.. محد رد

نهى.. لعد والله بنيه بنيه .. احچي بسرعه منو هاي

من گالت بنيه تذكرت مياس لان اليوم الصبح حسيتها مو طبيعيه وشكلها چانت تريد تحچي شي بوقتها بس ما حچت

نهى.. وين صافن شهم مو دا احچي وياك

شهم.. هسه راجعلچ

طلعت من الغرفه ع السريع وظلت نهى تحچي ورايه بس ما گدرت اجاوبها لان بالي كله يم مياس

نزلت للحديقه ورجعت خابرت الرقم مره ثانيه

من سديت الخط انتهيت من البچي حسيت بروحي دا اعد اخير ساعات عمري وما بيدي شي اسوي

رجع موبايلي يدگ شلته شفت هذا الرجال ديتصل واستغربت كلش من اتصاله لان ممتوقعه هالشي ،، معقوله عرفني ؟!!

ما گدرت اجاوبه لان ما اعرف شاحچي ويا وشلون احچي واني بهل وضع

خلص الاتصال بس اتفاجأت من رجع خابر مره ثانيه

مسحت دموعي وگحيت حتى يتغير صوتي ،، فتحت الخط

شهم.. الووو

مياس.. بس سمعت صوته بچيت بلا وعي وصوتي صار مسموع

شهم.. من فتحت الخط ما حچت شي وبس گلت الو سمعتها تشهگ من البچي ،، مياس هاي انتي ؟!!

مياس.. ما گدرت احچي كلمه وزاد البچي لحد ما انگطع نفسي

شهم.. ليش تبچين مياس ؟؟! الله يخليچ كافي بچي احچيلچ كلمه شصاير وياچ احد مأذيچ ؟
كافي اني مو دا احچي وياچ جاوبينييي

سديت الخط لان بعد ما اتحمل اكثر ،، غلقت الموبايل ادري بي راح يرجع يتصل وموتت نفسي من البچي لحد ما طگ راسي وغفيت على نفسي

دا احچي وياها بلكت افتهم منها شي ما جاوبت وسدت الخط ،، نزيت من صوت نهى واگفه ورايه

نهى.. منو هاي شهم

شهم.. خرعيني شبيچ

نهى.. احچي بسرعه هاي منو الدتتوسل بيها حتى متبچي وتحاچيك

شهم.. شنو انتي واگفه تتسمعين عليه

نهى.. مو حقي اذا حضرتك تاخذ الموبايل عينك عينك وتنزل للحديقه حتى تخابر صاحبتك بكل وقاحه

شهم.. احترمي نفسچ نهى زوديتها كلش

نهى.. من انت تحترمني عود افكر ساعتها احترم نفسي

شهم.. يمعوده كافي والله ماكو شي من البالچ

نهى.. لتخبلني مو سمعتك بأذني دتحچي ويا وحده وتتوسل بيها

شهم.. يا ربي هسه هاي شحچي وياها

نهى.. احچي شهم احچي اني اريدك تحچي

شهم.. شو وخري عني خلي اصعد انام اشرفلي

طبيت للبيت گامت تركض ورايه وهي تصيح خلت اهلي يلتمون علينه

الحجيه.. شبيچ بنيتي ليش دتصيحين

نهى.. يمه تعالي شوفي ابنچ شمسوي وراضيه بحكمچ

الحجيه.. شمسوي احچي

نهى.. مصاحب عليه ويخابرها گدامي

شهم.. زودتيها والله زودتيها

الحجيه.. ههههه منو هذا يصاحب عليچ دسكتي خايبه اسكتي

مهيب.. لا نهى گولي غيرها ميسويها شهم لان تدرين بي شگد يحبچ

منال.. صح كلام مهيب ،، شنو يعني ما عندچ ثقه بشهم ؟!!

نهى.. لا والله بعد ما عندي ثقه لا بي ولا بحبه

ايهاب.. لا خيتي شنو هالحچي هذا شهم شلون تگولين هالكلام ترى چبيره بحقه

شهم.. خليها ايهاب خليها بس مو صوچها لا والله مو صوچها

مهيب.. هدي روحك شهم لتسووها مشكله اگعد تفاهم وياها ولتكبرون السالفه وهي متسوه

عفتهم وصعدت فوگ طبيت للغرفه بسرعه ورگعت الباب ،، ما اهتميت الكلشي صار بس شي واحد اهتميتله وفكرت بي شبيها ليش دتبچي معقوله صاير وياها شي ومتگدر تحچيلي

تمددت ع الچربايه والافكار تاخذني وتجيبني بس كون لا صايرلها شي والله خطيه صوتها وهي تبچي گطع گلبي

طلعت موبايلي من جيبي رجعت اتصلت بيها يلكت هدأت وتگدر تحچي ،، مغلق

شهم.. ليش مغلق ؟!! اووووف ربي اموت واعرف شبيها

بهلاثناء طبت نهى وشافت الموبايل بيدي

نهى.. ها خابرت حبيبة الگلب

شهم.. كافي نهى فكي ياخه عني ما ناقصچ

نهى.. بسيطه شهم بسيطه

شهم.. طفي الضوه اريد انطمر

درت وجهي وشمرت موبايلي ع الميز ،، غمضت عيوني بس بالي صاحي من تفكيري بمياس شصايرلها ليش چانت تبچي بهل شكل

شويه وسمعت نهى تشهگ بصوت ناصي

شهم.. شنو هاي دتبچين ؟!؟

ما جاوبتني وهي دايرتلي ضهرها

شهم.. استغفر الله رب العالمين واتوب اليك ،، اني منين اتلگاها والله راح اتخبل

بس حچيت هيچ زادت بالبچي اكثر سحبتها لحضني وخليت راسي على راسها

شهم.. يولي وداعتچ عندي ماكو شي
ولچ متعرفين شگد احبچ انتي ملكتي كل گلبي بعد ماكو مكان لغيرچ استوعبي هالشي

نهى.. چذاب شهم شحال لو ما اني سمعتك بأذني تحچي ويا وحده وتسكت بيها لان تبچي

شهم.. صدگيني مو مثل ما فهمتي

نهى.. شنو لعد فهمني

شهم.. ما اگدر احچيلچ

نهى.. ها شفت طلع حجج من جوه الگاع عود تمشي عليه سوالفك هاي

شهم.. نهى صارلنه شگد متزوجين احنه بس جاوبيني

نهى.. شنو يعني

شهم.. جاوبي صارلنه شكم سنه متزوجين

نهى.. ١٠ سنوات

شهم.. بهل ١٠ سنوات فد يوم خنتچ فد يوم باوعت على وحده غيرچ

نهى.. لا

شهم.. شصار لعد واجيتي هسه تشكين بيه فجأه

نهى.. تبچي وتصيح : سمعت بأذني والله سمعتك

شهم.. وروح ابويه وداعتچ بگلبي ماكو شي والسالفه مو مثل متتصوريها

نهى.. احچيلي شنو لعد

شهم.. ما اگدر والله ما اگدر

نهى.. وخر عني شهم روح نام وعوفني

شهم.. هههه ما اعوفچ خبله لتدفعيني كافي

نهى.. گتلك وخررر

شهم.. واني گتلچ ما اوخر ،، يولي والله العظيم احبچ انتي وبس كافي تسوين بروحچ هيچ خلي ثقتچ بيه مثل الجبل ميهزها شي

نهى.. انطيني موبايلك

شهم.. هذا گدامچ اخذي

گعدت تگلب بالموبايل واني اضحك عليها والله النسوان مصيبه اذا يغارن

شهم.. ها لگيتي شي

نهى.. لا

شهم.. حتى تصدگيني من اگولچ ما عندي شي

نهى.. والسمعته هذا شنو

شهم.. شوفي نهى راح احچيلچ هالكلام وراها اريد الموضوع ينسد لان تعبتيني كلش

نهى.. احچي اسمعك

شهم.. هاي حاله انسانيه لا اقل ولا اكثر بس شنو هي وشلون وشوكت كلشي ما اگدر احچي اعذريني

نهى.. متأكد حاله انسانيه

شهم.. ليش اني مچذب عليچ قبل

نهى.. خلص صدگتك بس ما اريد الشي الصار اليوم يتكرر الله يخليك

شهم.. ولچ هو اني لو انتي مو لعبتي بيه لعب گدام اهلي وسكتت بس حتى لا اجرحچ او اغثچ لان تدرين بمعزتچ داخلي شگدها

نهى.. حقي والله شتريد لعد اسمعك تخابر وحده واسكتلك

شهم.. وهيچ تتصرفين ؟!!

نهى.. اسفه مو قصدي يلا سد الموضوع

شهم.. احسن

نهى.. لتگلب وجهك كافي

شهم.. هههه تعالي ولچ اخ بس لو ما احبچ چان تصرفت وياچ غير تصرف

نهى.. هههه همزين لعد تحبني

خليتها على حضني لحد ما نامت ،، عاينت للساعه صارت ب١٢ شلت الموبايل ورجعت خابرت مياس بس هم مغلق

ما اعرف شلون نمت من التفكير ،، گعدت الصبح تريگت وطلعت ع السريع حتى اشوفها

بالطريق وعاينت من بعيد لمكانها انصدمت كلش من ما لگيتها موجوده لأول مره

شهم.. شنو هاي ليش مموجوده اكيد صاير وياها شي ما بيها مجال ،، هسه شسوي شلون اوصللها مستحيل اروحلها للبيت

شلت الموبايل ورجعت خابرتها ماكو مغلق

شهم.. اويلي الله هسه شسوي بروحي اني ،، اريد افتهم ليش غلقته بس لو حاچيه شي اقلها اعرف شبيها

حركت السياره رحت للشغل وفكري كله يمها

بعد ما هلكت من البچي والتفكير گعدت الصبح على صوت سميحه

سميحه.. اني رايحه ويا ابوچ مثل ما وصيتچ اشتغلي شغل البيت وسوي الغده العصر ارجع فهمتي

مياس.. اي فهمت الله وياچ

طلعت وگمت وراها ،، شفتهم متحضرين ويردون يرحون

اشرف.. اليوم متطلعين للشغل

سميحه.. لا اني خليتها ترتاح خطيه تعبانه

اشرف.. زين تسوين ،، يلا امشي هم يا الله

طلعوا كلهم وظليت وحدي ،، رحت للمغسله حتى اغسل وجهي بس عاينت لروحي بالمرايه شبعت بچي

مياس.. يا ربي ساعدني ،، يا الهي الهمني بالحل شسوي هسه بعد شويه ويجي هالنذل حتى ياخذ شرفي مني

وگعت يم المغسله ونهاريت بالبچي نص ساعه لما انتهيت كلش

گمت ع السريع جريت السرگي من جوه وخليت الكرسي وره الباب

مياس.. حتلو يفتح القفل شلون يوخر السرگي من الباب إلا يكسر الجامه ومستحيل يكسرها لان الناس بالشارع وينفضح ساعتها

بديت انضف بالبيت بلا ما اتريگ بس حسيت جسمي گام يرجف ولزمني الضعف لان مدا اكل هلايام اي شي بسبب حالتي النفسيه

الدقايق تمر عليه عمر كامل ومنين ما التفت اتخيل عماد گدامي ،، حسيت روحي عايشه بنفق الرعب وكل زاويه بالبيت ترعبني

بس الله يعلم شلون مرت عليه هالساعات من الخوف الچنت احس بي واني ما اعرف شنو حيكون مصيري اذا گدر يدخل للبيت

صارت بالعشره الصبح كملت شغل البيت بس كلشي ما صار وما اجه هذا النگس

رحت گعدت ع الدرچ گدام الباب عيني عليها افكر واحچي ويا روحي لحد ما شفت قفل الباب انفتح ونزلت اليده .....

يتبع..