#خطوات_نحو_الجحيم (الجزء 2)
،،،،،،،بقلم الكاتبة زينب ماجد ،،،،،،،،
الحلقة_3
أعلم ..
ان الذي أستقتلت عليه يوماً
سيكون قاتلك ذات يوم .. 🖤
العراق_ بغداد
الثالثة ظهرا
مخلد: هاي شنو يابه اليوم منين طلعت الشمس
ابتسمت له و گمت من مكاني دا استقبله ، وسع عيونه متفاجئ : ولج هاي شصاير بيج
-سكراب الله وكيلك ههههه
سلمت : اشونك اشلونك زين
ابتعد مني : لا لا صدك شصاير وياج ليش هيج حالج ايدج شبيها ؟
-تعرضت لحادث سيارة
-اهااااا تحجين صدك انت ؟
-اي والله ، اكعد استريح خل نشوفك و تلحك تسمع اخباري
كعد و هو صافن بأيدي و يباوعلي بأستغراب : ادري ليش ما خابرتي ليش مكلتي شنو بعيده لبنان طيارة نص ساعه و احنا يمج ليش هيج مستسهل الامور انت
-صار اللي صار و هياني رجعت لهنا
-امج سافرت يعني ما تسافرين وياها
-جان زين لو اكدر اسافر، الكلب اخذ بنتي و خربط كل اوضاعي
-اعترض على سفرها يعني و سحب الحضانه ؟
-لا مو هيج بس تعرف مالك و وساخته كدر يقلب كل الامور لصالحة ..
-امممم جا علينا سيدي !! مو گلنالج من البداية يمت الكائنات مجرم هسه عرفتي وصخ ؟
-الحجي ميقدم ولا يأخر اللي صار صار المهم لازم استقر هنا اشتغل و ارتب وضعي لحتى ارجع ارفع دعوة و اطالب بيها .. لهذا رجعت لهنا
-شتشتغلين ؟
-ما اعرف لهسة ممفكرة من وين ابلش و من وين ابدي ..
-شوكت وصلتي
-مصار ساعتين
-تغديتي اكلتي ؟
اندار عليهم ؛ يابه غدا شنو شو واكفين ، ما تعزبون احد انتم ؟
ضحكوا، و سأله عمو عثمان : متغدي انت ؟ حتى نخليلك وياها
-لا والله وين متغدي، الله وكيلك هاي جيتي من الدوام خابرني الوالد كال بت شاكر عد بيت عمك عثمان اجيت عليكم كبل
التفتلي : هسه شنو تبقين هنا تروحين وياي هناك لبيتنا
-لا عساك سالم فترة ابقى هنا لبين ما ارتب وضعي
-لا سهلة ان شاءالله لا تشيلين هم كملي غداج و روحي وياي هناك و ان شاءالله اللي تردي يجرالج
ابتسمت و كلت له : تسلم الله يحفظك ان شاءالله
-شو تسلم !! شنو ولج اني غريب و تتشكرين مني ، باعي لج لا عبالج شاكر مات و ما بقالج احد هنا ، ثقي بالله هالرگبة سداده شتريدين و شتأمرين و وين ما يعجبج بيتج و مطرحج
عثمان: لا افا عليك اني بمثابة ابوها و كل احنا هنا اهلها ان شاءالله و انت هم اخوها و ما تقصر.....
-اني اخوها !! شو تصرح بكيفك عمي من يمتى اني اخوها ؟
كلها ضحكت بصوت عالي ، و اني هزيت راسي و اضحك و عمو يكوله : انك لفي ضلالك القديم
دار وجهه مبتسم و هو يحك راسه بسويج سيارته
جابوا الغدا تقدمت للصينية، و هو كام من مكانه : يابه فد مخدة رحمة لوالديكم ما اكدر اكعد من بنطروني ..
حطوله مخدة ، سحب بنطرونه من يم ركبة و كعد : يا الله ، لا تستحين اكلي
رفعت له راسي : انت منو كالك مستحية كل شويه و كايلي لا تستحين
-العفو يابه عبالي تستحين، نسيت انت ما تستحين
- مخلد !!
- اسفين يمعوده بعد ما نحجي
عثمان : شلون صار الحادث
-ما اعرف كنا طالعين اني و جياد المغرب
مخلد : منو جياد هذا نفسه ابو حلك الاعوج اللي يگلي انت بلا زوء
-لتحجي عليه مخلد شبيك، غير لو اكو منه .. و كف وياية وكفه ما وكفها بشر بعمر ما انسى معروفه
بقى يهز براسه معاجبة، حجه ويلع عمي : مخلد انطيها مجال تحجي دا نفتهم السالفة
-عمو ماكو سالفة جنا دنمشي فجأة بوجهنا سيارة خلتنا نتكلب بالسيارة لو لا ربك ست لكان احنا اثنينا ميتين ما اعرف شلون الله نجانا ..
-الحادث متعمد ؟
-التحقيقيات اكدر انو نعم متعمد
-منو المستهدف
-ما اعرف .. المهم تركت كلشي هناك و اجيت ما اكدر ابقى بلبنان اكثر .. كلت اشوفلي شغل هنا و اخذلي شقة و استقر
-وليش شقة ؟ بيت عمي هنا و بيتنا هناك تكدرين تاخذين غرفة و تستقرين !
-ما تقصرون، بس بعدني مماخذة قرار ثابت اشوف اشوف تصفى الامور
-ان شاءالله ،كملي غداج و كومي وياي هناك هم البنات ملتمات و عماتي اذا سمعو انت هنا كلهم يجون
عثمان: لا خليها هنا شكو ماخذها
-بيت عمها الجبير هناك هم زحمة من ابوي يكول ما اجت عليه .. انا افضيلها غرفة هناك و تكعد لا تخافين سهلة
... كملت غدا و رحت للمغسلة دا اغسل اجا وكف مخلد هم يغسل ، اخذ الصابونة من ايدي و كال : يلا عيني همي نفسج دا نروح
-خليها غير وقت تعبانه
-اي ارتاحي هناك
-تسلم مقدره استقبالك و لهفتك بس والله منايمه ابد، راسي صاير هالكبرة و اذا اروح وياك هم تعال سلم و سولف و يجروها عشا ما بيه بس انام و بالليل اذا كدرت اجيكم
-اها براحتج لعد، امرلج بالليل اخذج
-ان شاءالله
-محتاجة شي اجيبلج ؟
-ما تقصر فدوه الگلبك يحفظك الله
-هلا بيج .. نشف و دار مشى طلع لبيتهم .. اني طلبت من مرت عمي بس انام لان نعسانه
فضولي غرفة عمي .. فرشولي و نمت نومه طويلة من التعب .. لثاني يوم الصبح الساعه سته الا .. يلا صحيت
اباوع كلها نايمة ..
فتحت الباب و طلعت للطرمة ، الشمس هسة بدت تطلع و الجو ربيع يجنن ، و الهوا منعش حيل، يعني يحلى للواحد يوكف و يتنفس بس.
دخلت جوا .. رفعت شعري ذيل حصان و رتبته و لبست تيشيرت و جينز وباته و طلعت اتمشى بشوارع الاعظمية
و عجبتني روحي بكل مكان اوكف اتصور و اباوع صوري و امسح .. اتمشى و اتذكر ايامنا اني وبابا من جنا نجي مشي لبيت عمي
لحظات تدمع عيني و بنفس اللحظة اضحك و شريط الذاكرة يفتر بدماغي ... ااااه شيرجع ذيج الايام
على كد ما ذكريات بسيطة شكد تتمناها ترجع و تتخلص من واقعك اليوم ..
من عجائب الانسان بصغرة يتمنى يكبر و من يكبر يتمنى يرجع صغير و يعيش الأيام الجان يتمنى بيها
.. وكفت على محل صغير يبيع جرك و صمون بكل انواعه و لحم بعجين و كاهي ، و اكو مره عُربية كاعده على جانب المخبز كبالها صينية كيمر .
كعدت يمها : اشونج حجية
-هلا ييمه هلا يبعد امج
-فدوة لحجاياتج خالة
بقيت احجي وياها و هي تجاوبني و لهجتها عرب تجنن .. اخذت منها بماعون بلاستك كيمر و صاحت ع الولد بالمحل يجيبلي كاهي ..
اجا الولد جايبلي كاهي و سألني : العفو ما اعرف وين شايفج ؟
-بالتلفزيون
-اعلامية ؟
-هيج شي
-اهلا وسهلا نتشرف بجيتج، بس ليش كاعده بالكاع .. هسه اجيبلج كرسي
-تسلملي فدوة الگلبك يا طيب ، حلتلي الكعدة ويا الحجية و بسطت بالكاع
هو وكف و عامل لاخ اجا وكف يحجي، و الحجية اشون سوالف عليها و هم يطلعون بلسانها و يزعجوها
و مستمتعه هوايه بكعدتي وياهم ..
حسيت نفسي لازم ارجع ، فكمت نكثت ملابس و استعجلت بطريق الرجعة .. و صلت الفرع شفت مخلد يفتح بسيارته يريد يطلع
-صباح الخير
رفع راسه و عقد حواجبة : شمطلعج بهالساعه ؟
-وييي رجعت هسه، طلعت قبل الستة
-شكو ؟
-هيج افتر شويه منها حركه غير استرجع ذاكرتي بهالشوارع الطيبة .
-ها و هيج طلعتي ؟
باوعت لنفسي : ليش شبيه ؟
اخذ نفس و هز راسه و تقرب يمي يتمشى وياي لبيت عمي ..
-لجين حاولي تحسبين طلعاتج هنا و تراعين الظروف هنا بغداد مو لبنان و الامور تختلف
-قصدك مطلقة !!
-ما مجبورة تسمعين كلام يغثج فحاذري
-بس اني مسويت شيء بس تمشيت
-اعرف بس تعرفين ناسنا تتمنى الكلمة
-كلامك هذا يخوفني و يخليني اعيد النظر بأستقراري هنا
-على شنو دا تعيدين النظر، تره مجتمعنا مو سجان كل القصة المره لازم تكون حذرة بخطواتها لأن محد يرحم الا تريدين تشتغلين بكيفج الشغل مو عيب اذا جانت شغله شريفة و محترمه ليش لا
حجاها و تقرب مني و هو يحط ايده على اكتافي و يمشي، باوعت لأيده و ورجعت باوعتله : بس انت دا تسوي شيء عكس اللي دا تكوله
-شلون يعني ؟
نزلت ايده من اكتافي، ضحك : ما حظنتج بالشارع خليت ايدي على كتفج لان وصلنا للبيت و صار لازم ندخل
انطيت ظهري للباب مال بيت عمي و وكفت كدامه و كلت له : مخلد اتمنى تخلي شغلة ابالك و متنساها ، رجوعي لهنا ما يعني شيء اخر
-قصدج مو الي ؟
- افهمها بالطريقة اللي اتعجبك بس حبيت اوضحلك هالامر حتى لا تتأمل بيه
صفن بالكاع و رجع باوعلي : طريقي طويل
-ما بيناتنا طريق يجمعنا .. انت رجال متزوج و عندك اطفال اتمنى تخلي هالامور ابالك و تبطل التفكير بأنانية و تخليني اعيش بحياة بعيده عن المحاسبة و المشاكل لان هالامور لا تخدمني ولا تخدمك
ضحك بأستهزاء و باوع للشارع : كلتيلي ماكو طريق يجمعنا
-مجرد صدفة بشارع
-هسه خلي هالامور عنج، كدامج امور اهم تفكرين بيها، حاولي تستعيدين حياتج و وضعج و اللي تحتاجي لا تترددين بطلبه
-تسلملي
اخذ نفس: اروح لدوامي ، ارجعلج الظهر اخذج البيتنا
-عمو موجود ؟
-اي موجود
- لعد اخذ راحتك انت ، شوي اسبح و ارتب نفسي و اجي اشوف عمو و اسلم عليه
-من هسه لجين دا تبعديني عنج
-مو قصدي بس لراحتك اني ليش ترجع تعبان و تبتلي بيه
-اني مطالب منج راحتي ولا طلبت نرتبط ، دا اسوي هالامور من طيب خاطر، بس دا احس كلش متضايقة من وجودي شبيج ؟
-ابدا مخلد لتعتبرها هيج ، بس ما اريد تتأمل و ترجعلك عواطفك و تبعدك عن عائلتك .. اني مرة و احس بالمره اللي زوجها يهوى غيرها و كلش اعرف شعور الخيانة و ما اتمناها لعدوي، لهذا دا اوضح الامور من البداية حتى لا نختلف بعدين
-ما نختلف ان شاءالله فوتي هسه و الله كريم
فتت و اومأتله ( بيباي ) وراح قفلت الباب و فتت، لكيت عمو كاعد : ها عمو صباح الخير
-هلا عمو صباح النور وين جنتي
-طلعت افتريت شوي
-هسه اكعد عمتج تسويلنا ريوك
-لا لا خليها ترتاح اني تريكت برا كيمر و كاهي من يم حجي كاعده اباب فرن و الحمدلله، اذا تريد اسويلك ريوك
مقبل اني اسويله، بس اصريت وكفت سلكتله بيضة و جاي حار ، بس شنو احس معدتي كامت تگلب.. ابد ممتعوده على اكل دسم و هنوب اكلت گيمر و كاهي انحمست حمس ..
-عمو اريد اروح لقبر بابا ، محتاجة هالشيء هوايه
-اي عمو هسه اكمل و نروح
.. ديحجي اندكت الباب، رحت اني فتحت الباب، طلعت عمتي اخذتني بحظنها و كامت تبجي و تشم بيه و تكول : يا ريحة الغالي يا لجين يا عمه
اني هماتين مخنوكة و ما اعول على الله احد يبجي حتى انفجر و اطلع البداخلي .. حظنتها و كمت ابجي بقوة
دخلنا جوه و كعدت مرت عمي ، و عمو هم اجا كعد يسولفون و هي تسألني عن صحتي و اخباري ..
طلبت منها نروح لقبر بابا ، فرحت كالت : يلا ما عندي شي
اخذت جبه سوده و حجاب من مرت عمي و طلعنا للمقبرة ..
وصلت قبر ابوية، الدموع وحيدهم نزلو .. كعدت يمي و دنكت ع القبر و كمت ابجي بصوت عالي : بابا دخيلك بس ارضى عليه بابا
وحيدتك لجين اني بابا المدلله مالتك ، بابا والله تعبت هوايه انذليت هواية .. محتاجتك كلش هواية بابا
انت الجنت تكولي لجين ضوا دروبي ، لجين شمعة حياتي .. انت الدللتني و مخليتني احتاج الاي احد ارفع راسي و اعاند الدنيا و ادري انت بظهري .. كلش انكسرت بغيابك بابا اخذو بنتي و صحتي خسرت كلشي بابا ما اريد بس رضاك عليه ..
بقيت كاعده كبال القبر وكانما احاجيه .. ممنتبهه للي يمي التفتت لكيت حتى عمو يبجي ويايه ..
باس راسي و كومني
-كافي عمو ما يصير هيج الميت يعذب ببكاء الحي ، والله يا عمو راضي عليج، هو بس جان يتمنى شوفتج بأخر ايام و ما صارت قسمة و هاي ارادة الله اصبري بنيتي و احنا وياج لا تهتمين ..
كمنا من القبر رشيته بمي و قرينا القران و ودعته و رديت، بس شرديت جنازة على كد ما بجيت و انهد حيلي على قبره ..
اصعب شعور هو شعور الندم ..
الندم مو على نفسك لا .. الندم على معصيتك لشخص افنى كل عمره حتى يسعدك تالي تفضل عليه انسان كلشي ما تعرف عنه و تبتعد و تخلي كل ليله و كل يوم يتعذب على فراكك و خلانك اله ..
فعلا ما استحق الله يوفقني
اني خذلت رجال قضى كل عمرة يشتغل حتى يخلي العالم كله يتمنى يوم من عيشتي، وكف بعين كل انسان يحجي عني .. جان اب و صديق و حبيب و كلشي هو ..
لو شكد ما احجي و اشرح ما اعبر عن ندمي على خذلاني لأبوية بس لحتى اتزوج شخص الاحبة ..
.. بالطريق خابر عمو عمران على عمو عثمان و اسمعه يكوله : هي ليش ما تجينا شنو طابتلها الكعده عندك، صدك ما عدها احترام ما تكول امر على عمي الجبير و اكعد ابيته شنو جايه عليك ، شنو اني ما الي احترام بعين بنت شاكر لو منتظرتني اني اجيها و استقبل حظرتها
و عمو عثمان يرده : مو هيج يا ابو مخلد بس البنية تعرفها متحب مشاكل و اني ما عندي احد بالبيت لهذا اجت عندي، و احنا اليوم يم قبر ابوها و هاي جيتنا ، راح نجيكم هسه
... قفل الخط وياه بعد صياح من عمي
-عمو ... عمج عمران هم حقه من البارحه جايه و ما سلمتي عليه ، نفوت عليهم نسلم هسه ؟
-عمو كلش تعبانه و بطني دا تأذيني و ايدي تنز من الالم خليني هسه بالليل نروحلهم
-عمو هي ساعه نمر نسلم و نطلع و نتكفى الشر
عمتي : كلام عمج صحيح خل نفوت نسلم ساعة زمان حتى لو ما بيج حيل شنسوي تعرفين عمج عمران و عصبيته
-لا هاي هي براحتكم يلا ..
.. نزلنا عليهم دكينا الباب، فتحلنا مازن استقبلنا بالهلا و المرحبا و تفضلوا ... دخلنا لكيت عمي كاعد بالصالة ..
تقدمت ردت اسلم و مرته كرجية حجت : بعد وكت هسه يلا تذكرتي عمج لو ما عاتب هم ما تمرين من يومج ما عدج احترام لاحد
مهتميت لكلامها بست راس عمو و سلمت بس هو ضايج سلم عليه من وره خشمة مثل ميكولون ..
سلمت على كرجية و ع البنات و الجهال ، حسيت راسي اندار على كد ما سلمت .. دخت كلش
كعدت و عمتي گرجية ما بطلت كلام : شو اليوم لابسه جبه و مستورة شعجب مو عوايدج
ردتها عمتي : شبيج يا گرجية دا نكولج البنيه جاية من قبر ابوها و تعبانه عاد كفينا من الكلام الماله نفع
-و احنا شحجينا يا امل واحد يبتلي تطلع من السانه كلمة
دا يحجون فات مخلد اطافرو جهاله لحظنه و هم يصيحون (بابااااا) فرحانين بجيته .. هو باسهم و نزلهم و حجا : هلا يابه شلونكم
سلم عليه عمي، اني حاطة راسي ع التخم و كاعده و عيوني مبقبقة من البجي و كوه كاعده، سأل : شبيها لجين ؟
-زارة گبر ابوها ورجعت تعبانة
تقرب من يمي حط ايده على گصتي : اهاااا يابه هاي مصخنه ؟
كرجية : مو كالولك جانت يم كبر ابوها لعذ شتريدها ترجع مجمده
ما اهتم الحجيها دنك يباوعلي : شيوجعج يابه
شو اني بس گالي شيوجعج بجيت ، هو تخبل : اهاا شبيج تبجين احجي صاير شي
كمبص و كعد كبالي : احجي شيوجعج اخذج للطبيب
اني كمت اشهك احر بخشمي و ابجي و اكح ، من قوة الكح حسيت راح اتقيئ كمت بسرعه و رحت للمغسلة زعت اللي اكلته الصبح كله يلا ارتاحت بطني
هو ما بطل كومي هل اخذج ، و راح تموت و تعاي امشي و اني اشرله ( لا )
غسلت وجهي و اندرتله : مبيه شيء مخلد بس جنت ماكله گيمر و دسم متحملته معدتي كلش ضايقني
-و انت تبجين من ورا كيمر
-لا بس نفسيتي تعبانه جنت يم كبر بابا و بجيت هوايه
-يلعن ابليسج سميتيني عبالي مدري شبيج كلت تزوهرت البنية لو شوف شصاير وياها ..
انداريت مرته واكفه كال الها : غداكم وين ؟
حجاها و هو يفوت كدامي للصاله .. جاوبته : هم يتغدون ؟
كرجية : شنو ما متغدين ؟
عمتي:- لا والله هاي جيتنا من المقبرة
مخلد: عزيمة حضيري هي ، مو كلتلكم حضروا الغدا ممحضرين ؟
طيبة : لا شلون ممحضرين دقايق و السفرة تنمد
كعدت بس بعده راسي يدور، انمدت السفرة رفضت اكل لان برياني و فوكه لحم و مركة فاصولية .. و اني من الكيمر متت هنوب اكل هذا الاكل شيصير بيه
لحو كلتلهم بالعافية: مخلد سوا لفة صغير بلحم مبي شحم و كال : هاج اكلي
-لا ما اريد
-دكلي اذا ما اكلتي بطنج توجعج هاي ما بيها شحم حتى تكملين و ننطيج علاج
-اخذتها من ايده و بقت بأيدي و حاطة راسي ع التخم اغفي
بس مرته مشالت عينها منه و هو مشال عينه مني، مد ايده : كال هاي مصخنه عمه نكمل اكل و نروح ناخذها دكتور هم نشوف شنو علة ايدها و هم ناخذلها علاج لصخونتها ..
جاوبته مرته : انت مو عندك طلعه لرحمن ع البيت ؟
خزرها خزره .. دنكت و ما حجت
بقى عمي عثمان : شبيج بنيتي و شنو اليوجعج
-عمو معدتي حيل مأذيتني بس من تقيئت ارتاحيت
حجت مرت مخلد : خاف حامل
و هو صاح بيها : انت شهالحجي التحجي و من سامحلج تدخلين اكوم ادفنج والله
عمتي جرته : على كيفك يمعود دعلى كيفك اكعد
بقى خازر بيها .. كامت من مكانها و طلعت
باوعت لعمتي، اشرتها بعيوني و هي تأشرلي بأديها بحركة: شبيدي ؟
لان احنا بطريق الروحه حجينا اني و عمي و عمتي لموضوع مخلد و كلتلهم ما اريد ابقى عدهم اعرف مخلد ما راح يبطل يهتم بيه و راح اخلق مشاكل بينه و بين زوجته
اشرت لعمو عثمان كام كال : دايمة ان شاءالله .. يلا امل كومي خل نروح للبيت لجين هم تعبانه ترتاح خطية
عمران : لا لجين تضل هنا ما تروح
- لا عمو تسلملي عساك سالم بس اروح ويا عمو افضل
-اني ادري جيتج هاي من وره خشمج الا انت كل احترام ما عندج لعمج الجبير المفروض من اول ما تجين تكولين هذا بيت عمي الجبير و ادك بابه و اكعد عنده بس انت الحقد تارس گلبچ
-لا عمو والله مو هيج بس ..
مخلد : لا بس ولا بسين دكعدي شعندج رايحة هو منو ابيت عمي بس روئ و كلها يومين و تروح لبيت رجلها ابقي هنا ويا البنات
-هو ان شاءالله من تروح اجيكم
عمران : عوفها عوفها هو الما يحترم و يريدنا شعدنه مچلبين بيه خليها تروح
عمو عثمان راح للمغسلة و صاح : ابو مخلدددد تعال تعال رايدك شويه
كام له عمي، و اني عمتي اشرتلي واكفه هي و مرت عمي .. كمت رحت يمهم : يعني هسه حرت شسوي لعمو عمران مدا يتفاهم
-والله يا عمه حقج اجيتي ترتاحين طلعت المشاكل اكبالج ، هسه عمران متكلولي شبيه اني الجبير و اما تحترموني ، هسه اكو احد كايله اني اكبر منك و كل شوي اني الجبير و اني الجبير
نزتها مرت عمها : اسمعي
التفتنا لعمو عثمان و هو يكوله : يا ابو مخلد افهم ابنك عيونه فاضحته يدور لجين مثل دوارة الأم على ابنها .. و مرته حامل و بطنها لخشمها يا ساعه يصير بيها شي لو بالطفل
-و احنا شعلينا منها .. تالي عمرنا نراعي مشاعر النسوان و الله شنو حامل ، مخلد رجال و الرجال يحب و يتزوج ٤ المره ما الها كلمه ع الرجال
-هسه ليش تجيب المشاكل لبيتك يا ابو مخلد ابعد لجين و خليها خطار تجيكم تمر تسلم عليك ساعة زمان و تروح
-عثمان اني مراقبك تحب تتصدى لكل المواضيع و تبرز نفسك ولا كان اني اخوك الجبير
-شهالحجي يا عمران انت منين تجيب هالسوالف
... انوب صارو يتراددون عمامي الاثنين و عمي عمران كام يصيح ، ادخلن عماتي بيناتهم و مازن اجا يهدي بيهم
تقدمت اني كلت لعمو عثمان : عمو روح اني ابقى هنا اساسا تعبانه ما بيه اروح هسه انام ، انت روح
سلم عليه اخذ مرته و طلع ، و عمتي تهز ايدها : و اني هم اروح
-بكيفج عمه عاد شسوي ابتليت
نزل مخلد : شصار وين عمي عثمان
عمتي : بعد وكت يعمه لو ماخذلك نومه و نازل
-عمه بس صعدت ابدل و ال ... استلمتني اكس مربع
-يعني كتلتك لا بشرنا
-لا عمه اني انكتل افا عليج قبل لا تكتلني شردت
-عفية بالنجر ابني
-عد عيناج عمه بالشرده اني ما انكدر حطيني تحت يمناج تلكين بس نعالاتي يطايرن و التراب يهفي
ضحكت بصوت عال : هاي من تالي صاير البيب بيب
-شسوي هاي الدنيا بعد
-ايدي تشهد تتذكر من كسرته
عض اصبعه : ااااخ الله لو حاضي بيج جان من زمان منومج بصف ابوج
بست ايدي وجه و كفة و كتله : الحمد و الشكر الك ربي ما اخذتك
-ما طار طيرا و ارتفع الا كما طار وقع
-عمه فدوتك هالسوالف عوفها مرتك خطية و تحبك
-اي قابل شمسويلها يا عمه
-ابتعد من لجين گبالها
- ان شاءالله عمه الله كريم
.. اجت كعدت هي
فدرت وجهي لعمتي: عمه اني هذه الستلفة متصرفلي لازم الكالي شقة بيت لحالي اعيش ما اتحمل اعيش و اذب حملي على بشر
مخلد : انتظري خل اشوفلج بيت هنا قريب بلكت الكى احد يأجر و اخذه الج
-والله ياريت
-اذا تردين اجرلج بيتي
-شنو مشتري بيت انت ؟
-اي بالفرع الثاني و صغير و اريد اجره
-و ليش متكعد بيه ؟
-لا شكعد يمعوده الوالده معترضه على طلعتي و قررت اجره
باوعت لمرته ادبلت فد مرة و كأن تريد تنفجر .. معرفت شجاوب كلت له : الله كريم دشوف اشون تصفى اموري
فات مازن ع الأستقبال : مخلد الوالد يريدك
-هو وينه
-هو و امي بغرفتهم
... كام هو و مرته طلعت و مازن راح
بقينا بس اني و عمتي حجت : تبقين هنا عمه .. اني باجر اخابرج و اعزمج لبيتي و تعاي
-ان شاءالله
-يلا عمه اني اروح مناك البيت فارغ ، محتاجة شي ؟
-لا سلامتج ان شاءالله بس لا تنسين عزميني باجر و تخلصيني
-ههههههه لا لا و ادزلج سيارة هنا تاخذج بعد شرايده
-فدوه الگلبچ عمه
-حظنتني و هي تكول : يريحة الغالي انت
سلمة عليها و طلعت سلمت عليهم هي و راحت
رحت للمطبخ لكيت طيبة تقري بأبنها ، كعدت يمها : شلونج ؟
-بخير شتشوفين ههه
-ما تغير الحال ؟
-لا والله عمتي كرجية ما ترضى احد من ولدها يطلع و هم ما يهون يزعلوها و باقين
-شالقصة بيا عصر كاعدين اطفالكم كثرو
-اني و مازن بنينا غرفة لجهالنا و رتبنا وضعنا الا المسكين مخلد اشترى بيت و اثثه و كمله و عمتي عرضت محد يطلع ، و اليطلع اتبرى منه الى يوم الدين و لا هو ابني ولا جابته بطني و خل النسوان تفيده ، عاد بطل و كعد شيسوي المسكين
-و هاي اطفاله ينامون وياه بنفس الغرفة ؟
-اي والله
-اوووي شهالتخلف عفية العالم وين وصلت ، شنو قصتها عمتي ادري عمي ميحجي ؟
اشرتلي على المحبس بأيدها طلعته و رجعته لايدها عود : محبس بيدها
-عشتو و هو يصيح اني الجبير و اني الجبير
-واحد يحجي امانة الله مرات هو زين بس هي التحجي براسه ، اخوك هيج و ابنك هيج و هذا هيج .. و هو نقطة ضعفة احد يستصغر و هي لو رادت تأذي احد كالتله هذا ما يحترمك
-وييي ليكون لرزالتي هي سببها ؟
-لعد شعبالج، الا هو والله مشتاقلج و من سمع بيج البارحة بساع بشر مخلد و لبس راد يجيج و هي كالتله : لو تحترمك جان اجت لبيتك مو انت عمها الجبير، عاد ضاج و كعد ما اجا
-اووووو شلون سالفة هاي
انتبهت لابنها قبل جان يكولي انت حلوة احبج ، عصرت خشمه و كلتله : ها يحلو بعدك تحبني
ضحك ، اتشاقيت وياه : لا لا اني قفلت ما اتزوج انتظرك تكبر و تاخذني ماشي ؟
ضحك و يكولي : اي ماشي
- هههههه طيبة تاخذيني جنه الج لو تعامليني مثل كرجية
-لا يا مرايده روحي اخذج يخيه غير ابن كرجية يشردنا بليله ضلمة اني و ابني
-ههههههههههههههههههههههههههههه
كمنا نضحك بصوت عالي جان تطب عمتي كرجية، ع السريع طيبه و ابنها حطو روسهم بألكتاب يقرون
- خير ان شاءالله شو الضحك واصل لسابع جار
- لا عمه هيج دنضحك ويا علوش
-تضحكين هسه قبل شويه سويتي روحج مواته كدامهم
حجت و علوش ابن مازن فطير ضحك بقوه و طلع مخاط خشمه انفجرنا اني و طيبة ضحك
و هي تصيح: شبيجن تضحكن عليه
طيبة : لا عمه حشاج ليش نضحك عليج دا نضحك على علوش
فرت ايدها و طلعت ، بقينا نضحك و نصيح : اللهم يجعلها ضحكة خير
طيبة : صدك انت مو جنتي مريضة شصحاج
- لج عيني من المشاكل صحيت طار الالم مني
-هم زين رب ضارة نافعة
-لا بس والله تعبانه كاعده قبل السته فريت الدينا كلها مشي تنوب رحت مقبرة احس ميته تعب ياريت لو تفرشيلي نعسانه
-افرشلج بغرفة جهالي فوك ؟
-خاف ينامون بيها
-لا تخافين محد ينام اصلا مازن هاليام ينام جوا عود انومهم يمي
-ليش ينام جوا
رفعت ياخاتها و تكول : متعاركييين
- شو فرحانه ههههه شنو انت حتى بالعركة متفائلة
-شسويله لعد ابجي وراه هو اني كلبي خلصان ، اصلا خفتا وراحة اخلص شغل و اصعد انام مرتاحة لا اكو رجال يدور وراي احي بحي ولا دوخة راس
- هههههههههههههه هيج عنصر الا شعور صاعد عندج
-يا والله شبيج صايرة ثلاجة من يبوسني اصفن بوجهه و مرات تشكل عيوني و ينحولن
-ههههههههاااااااي تنحول ههههههه عزا بعينج صدك ضحكتيني
-من كثر الحب حبيبتي لعد شعبالج اتعلمي
- لا لا صايره كلش بلا احساس
-هاي التعيش ويا العيال خيه يا تصير بلا احساس يا تموت قهر ، و عابتلهم اي والله اموت ليش حتى يبقون جهالي مكفخة للرايح و الجاي خليهم يطبهم مرض
-نفسج كيانج ، النفس هم الها حق ع الانسان
-اووووو كل هذا نسيتة و داعتج كل همي اعتني بجهال اهلص شغل البيت اصعد اتمدد شوي ما الحك اباوعلي نص مسلسل غفيت
-تلام ماما من جانت ترفض مخلد، تكولي انت مدلله و ما تتوالمين ويا كرجيه و مخلد ما يعصي امه و تنسكمين ..
-والله تفتهم ، ليش ما طلعتي يمها ؟
-و بنتي ؟
-ما اعرف اريد ارتب وضعي و اجرلي بيت و استقر حتى اطلبها .
-يخليج مخلد ؟
-و الله ما اعرف كل همي بنتي .. هو اخر همي
فاتت مرت مخلد سكتنا و طيبة لفت السالفة : يعني امح بعد ما ترجع
-لا
-زين اشلون عايشه وحدها هناك
- عايشه يمعوده لا تخافين ع العايش بره خافي ع العايش هنا
- اي والله
- دكومي فرشيلي فدوة .. خل اكوم ابدل ملابسي، البس شيء خفيف
-انطيج دشداشة من يمي نظيفة ؟
-اي والله
كمت صعدت ويا طيبة لغرفتها، غرفة مخلد جانت مفتوحة صاحلي :لجين تعاي
رحت يمه : شلون صرتي
-شجيبلج عشا
-لا اريد انام تسلم
-مماكله شي انت
-ممشتهية بس نعسانه
-لعد اجيبلج لفة صاج اخاف تكعدين بالليل و تجوعين
-مشكور ...
عفته و طلعت من غرفته ، رحت لغرفة طيبة مطلعتلي ثوب قماشة فانيلة مريح ،كالت : بدلي هنا مازن طالع
طلعت و سدت الباب
بدلت ردت اطلع ، لفت انتباهي المكياج و العطور ع الميز و اني نقطة ضعفي هالسوالف ذوله
بقيت ارش عطر و اخط كحل و تاتو و اتمعمر بوجهي اخر شيء جريت كلينكس مبلل مسحت و طلعت
سمعت صوت عالي طالع من غرفة مخلد ، و اسمعها تكوله : ما تنطي بيتي الجين
و هو يصرخ : مو انت التحكميني البيت بيتي و اني حر احركه اجره انطي بكيفي
و هي ترد : والله يا مخلد لو انطيت لبيت الجين ساعه ما ابقالك بهالبيت
-و عساج لا تبقين اتهدديني انت ، لج بابا الباب يوسع جمال مو جمل واحد
... صفنت : يلا بالله هو هذا حظي ؟ وين ما اروح المشاكل كبالي ؟.. بالله لو باقية على ضيم ام جياد مو اشرفلي !
رحت للغرفة نمت ..
لهناك و حسيت احد يمي، فزيت و الكا مخلد واكف ويباوع بوجهي
فزيت بسرعة ....يتبع
☆☆☆☆☆☆
#زينب_ماجد