دخلنا اني ومروه ورقية وسهاد للغرفة دنبدل
جان عندي فستان كلش حلو اخذته بعرس اسامة
لبسته وحطيت مكياج واسولف وية البنات واضحك
وكلهم متفاجئين انو قبل كم يوم جانت حالتي تعبانه وهسه عادي ..مايعرفون شنو ابالي.
لبست هذا الفستان
وحطيت بس ايلاينر و حمرة ماروني طوخ وجنت متقصدة لأن اعرفه يتخبل من احط حمرة طوخ.
راحت الحجية و سهاد وية ضرغام لبيت العروس واحنا شوية تأخرنا لأن كعدت امكيج بثينة ماتعرف تحط مكياج وهي ملامحها تجنن بس ماتعرف تبرزهم.
مكيجتها وكملت وطلعت تجنن.
لبسنا العبي مالتنا و اجه فلاح دياخذنا و انتبهت عليه اتفاجأ من شاف بثينه.. اول مره يشوفها بهيج مكياج والطريق كله يباوع عليها ..حسيته بده يميل الها.
ضرغام:-
اخذت الحجية وسهاد ورحنا لبيت العروس لأن البنات اتأخرن
استقبلونا بالهلاهل و عقدلنا السيد و بعدين دخلت وانه اول مره اشوف العروس
شكلها عادي سمرة و كصيرة وشوية متروسة
وعدها شامة فوك شفتها ..
اباوع عليها فرحانه وتبتسملي وماتدري اني الهم ماكلني اكل ..
ورة نص ساعه تقريباً اجن البنات جابهم فلاح
فاتت رقية باست ايدي و سلمت عالعروس اسمها هند.
وبعدين دخلت مروة وبثينة ... و وراهم دخلت الطركاعه مالتي ...
اووويلي ربي شلابسه وشطالعه ردت اموت وانه اشوف عيون النسوان تاكلها اكل
لابسه فستان ماروني و چتافها طالعه وهي بيضه
وفوك القهر حاطه حمرة ماروني والشعر الاشكر مرفوع.. ظليت صافن عليها هاي شجاي تسوي بية؟
معقول لهالدرجة ماتحبني وهيج فرحانه وجايتني بهاللبس والمنظر .
بلسم:- دخلت واني الابتسامة شاكة حلكي
اباوع على ضرغام يباوع ويبلع ريكه
رحت بست العروس وضحكت بوجهها وكلتلها مبروك عروستنا و ضرغام واكف مصدوم
و رحت على ضرغام ابتسمتله وصافحته وكتله الف مبروك و بسته من خده .
ضرغام بصدمة:- الله يبارك بيج.
رحت ابتسمت للموجودين وكعدت بصف الحجية وجان تشاورني.
الحجية:- ولج يالمكموعه سودنتي الرجال ..شعامله انتي؟
بلسم:- ضحكتلها وكلتلها احسن حتى يتندم .
كرصتني من ايدي اذتني ههههههه بس ماتدري بيه اني مشتعلة بنار.
كل مااندار على ضرغام الكاه يباوعلي خصوصاً كلساع وحده من النسوان تسأل عبالهم ممتزوجة ويريدون يخطبوني ومن يعرفون اني مرت العريس يتخبلن.
ضرغام:- اعاين بلسم و روحي لايبه واعاين هند ضايجة من عرفت بلسم مرتي . بس ماتدري هي مرتي بس عالورق.
حنيت هند و لبستها نيشانها و النسوان يهلهلن وهاي الطركاعه تهلهل وياهن ولا عبالك رجلها العريس. شطت شوط .
خلصت الحفلة و رجعنا لبيت الشيخ حسن راحت بلسم وماشفتها لثاني يوم .
الصبح يدوب تريكنا و بدلنا ثيابنا ورحنا ناخذ العروس ونرجع للبصرة عبن الطريق بعيد ..
طلعت كدامهم وانه حتى لمحة ما لمحتها لبلسم.
رحت واخذت العروس و فلاح و عمران وجماعتنا يمشون وراية.
وصلنا للبصرة ونزلت العروس ودخلتها للبيت وانه رحت يم الزلم للديوان استقبلوني وذبحو الذبايح و اشتغلت الهوسات و بلشو بالغدا
اتغديت وياهم بالديوان و خلصنا وصار لازم اروح للعروس..
بلسم:-
طول الكعده واسمع النسوان يتبسبسن بيناتهن علية ويكولن خطية هم فصلية وهم اجتي عليها ضرة . اختنكت حيل واني اباوع بعيونهم نظرة شفقة.
ضرغام:-
دخلت للصالة ونسوان المنطقة كلهن موجودات ويهلهلن شفت الحجية بست ايدها وراسها و
اخذت هند و جاي اروح لغرفتي
وهناك شفت بلسم واكفة بالباب ابتسمت بوجه هند وفتحتلها باب الغرفه
اندارت علي وبعمري ماراح انسى نظراتها
عيونها بيها دمعة عتب و شفايفها عليهن ابتسامة بس كلها كبرياء
وجان تكلي اتفضل شيخي شايف كل الخير
باوعت عليها انربط لساني جان بودي اخذها بحضني واكلها احبج بس كرامتي ماتسمحلي..
عافتني وراحت شفتها صعدت فوك
وانه دخلت وسديت الباب ..
شفت هند واكفه
صفنت عليها هسه انه شسوي؟وشلون تورطت بهالورطة لأن ادري بروحي كلبي مستحيل يحب غير بلسم بس هند صارت مرتي .
بستها من راسها ونزعت عباتي و عكالي و نيمتها عالفراش
واني نايم وياها تخيلتها بلسم ... فضينا السالفة وطلعت وفاتن النسوان للغرفة يهلهلن
دخلت سبحت وطلعت لكيت النسوان راجعات والبيت تقريباً فرغ .. بس بلسم ماكو . رجعت للغرفة لأن هلكان من تعب الطريق كبل نمت..
بلسم:- دخل للغرفة واني صعدت لغرفتي واول ماسديت بابي طكيت بجي واني اتخيله وياها
وشلون يبوسها و يحضنها.
ضرغام:- كعدت من النوم ساعه ٦ وشفت هند صافنه عليه من نايم
كلتلها ليش ماكعدتيني؟؟؟
هند :- شفتك مرتاح بنومتك ماانطاني كلبي اكعدك.
ضرغام:- كمت من الفراش وطلعت شفت الحجية كاعده دتقره قرأن
و سهاد و البنات بالمطبخ.
لعد بلسم وين؟
سهاد :- والله يا خوي ماشفناها صعدت لغرفتها وبعد مانزلت.
ضرغام:- رقية اصعدي شوفي خالتج بلسم اخاف بيها شي.
رقية:- حاضر يابه.
صعدت رقية و ورة دقيقتين نزلت.
رقية:- يابه شفتها نايمه .
ضرغام:- اعرف بلسم من تنقهر تحب تنام.
صليت صلاة العشاء و طلعت هند كعدت يمنا بالصالة وكلساع تسولف وياي وتضحك وانه مامركز وياها بس اضحك بوجهها اجاملها .
اتعشينا واني بالي يم بلسم ردت اصعدلها بس هند ماتعوفني وين مااروح وراي.
دخلنا للغرفة وهند غفت وانه حاولت اغفى ماكدرت .. طلعت للحديقه حسيت نفسي مخنوك بقيت كاعد عالكرسي وصافن و استرجع المواقف من دخلت بلسم للحنة مالتي
ومن استقبلتنا اباب غرفتي .
بردت الدنيا كلت خلي ارجع ادخل للبيت و وية دخلتي رفعت عيني ولكيت بلسم فاتحة شباك غرفتها وكاعده على دچة الشباك. اوووووف يا بلسم لو تدرين شنو بكلبي.
بلسم:-
نمت واني الدمعه بعيني ما حسيت الا ساعه ٩ بليل. فتحت شباك غرفتي وكعدت عالحافة حسيت نفسي مخنوكة اريد اتنفس.
وفجأة شفت ضرغام جان بالحديقة و ديريد يدخل للبيت ورفع عينه على شباك غرفتي و باوعنا واحد عالثاني و نظراتنا تحجي و كلها عتب.
ماتحملت سديت الشباك و البردة و رجعت كعدت عالجرباية ومحتصره حيييييل.
بقيت كاعده للفجر صليت و قريت قرأن شوية ارتاحيت و رجعت نمت..
كعدت الصبح سبحت ولبست دشداشتي و نزلت بس ضرغام وفلاح مموجودين عدهم شغل
شفت سهاد دتعزل بالمطبخ صبحت عليها هي والحجية و رحت داسوي ريوك
جان تطلع هند:- صباح الخير يمه(قصدها عالحجية)
الحجية:- صبحج الله بالخير بنيتي. تعالي اكعدي نتريك سوه.
هند راحت كعدت يم الحجية وتباوع عليه بطارف عينها. اني غلست لأن نفسيتي تعبانه ومالي خلك اركز وية احد.
حطيت الريوك وصبيت الجاي
شربت هند من الجاي جان تكول:- عووووع هاذ شنو الچاي كلش ماطيب.
سهاد:- ليش خيتي شبي الچاي يخبل طعمه.
هند:- لا يلعب النفس ثكيل ومج. كومي سويلي واحد غيره.
بلسم:- اني منزله راسي دااخوط بالجاي وبالي بغير مكان.
جان تصيح هند:- ويامن دااحجي انه؟
بلسم:- هاااا شكو ؟؟؟ حجيتي ويايه؟؟
هند :- لا ويه خيالي ..اي وياج طبعاً كومي بدلي الچاي ماطيب خففيه شوية .
سهاد:- چا خية ماعاجبج الجاي كومي انتي سوي واحد جديد ليش تصخرين البنية؟
بلسم:- مالي خلك لغوة ومشاكل اخذت استكان الجاي من ايد هند :- لا عادي هسه اكوم اسوي واحد جديد.
هند:- خففيه وحطيلي چيلتين شكر .
بلسم:- باوعت عليها وبكلبي استغفر ربي. بس سهاد تباوع عليها وتدردم وية نفسها.
خففت الجاي للخاتونه وحطيتلها شكر كملت اكل وغسلت مواعين ورحت دااغسل هدوم..
جان تجي هند شايله كومه هدوم شوكت وصختهن ماادري وهي البارحة فاتت للبيت.
هند:- هاج هذن غسليهن و هاذ الچرجف مال فراشي غسليه وحده ..وتغمزلي.
بلسم:- اني افتهمت قصدها و دمي احترك بس مااكدر احجي مااريد انطيها الي تريده لأن اعرف هي دتستفزني .
اخذت الشرشف من ايدها و عليته وحده بالمي وبعدين حطيته بالغسالة.
واني بالحمام و هدومي كلها مي فجأة دخل ضرغام عليه وبقه يباوع.
ضرغام:- شجاي تسوين هنا؟
بلسم:- دااغسل هدوم.
ضرغام:- ليش ما قافله الباب ماتكولين احد يفوت يشوفج بهالمنظر دشداشتج منكعه و لازكة على جسمج ؟
بلسم:- اسفه ..اطلع حتى اقفل الباب .
ضرغام دخل وسد الباب واتقرب عليه واني ارجع ليورة.
ش ش شكو شبيك؟؟؟
ضرغام:- ليش مانزلتي البارحة؟
بلسم:- جنت تعبانه ونمت.
ضرغام:- امممم يعني ماجنتي ضايجة؟
بلسم:- هه وليش دااضوج بله؟
ضرغام وهو يلعب بخصلة نازله على وجه بلسم (ماادري يجوز لأن رجلج تزوج البارحة؟)
بلسم وخرت ايده:- لا ليش دااضوج من حقك تتزوج وتصير عندك مره. وهسه تكدر تطلع؟ اريد اكمل شغلي.
ضرغام :- اي تدللين .
طلع وطبك الباب وراه حيل
بلسم:- تنفست بقوة لأن كل مايتقربلي احس كلبي يريد يوكف.
مشى اليوم وضرغام بين الديوان والبيت وست هند تحاول تستفزني بس اني متجاهلتها.
اتعشينا و هاي هند تتقصد تحشك نفسها يم ضرغام وكلساع تريد توكله بأيدها وهو ياخذ اللكمة من ايدها وياكلها لأن عيب كلنا كاعدين وهاي ماتستحي كلساع هاك حبيبي هاك كلبي وتباوع عليه عبالك صارلها سنتين متزوجة مو يومين.
يتبع