المراهقة والاربعيني الفصل الثالث

المراهقة والاربعيني الجزء الثالث الحلقة الاخيرة

#المراهقة_والاربعيني

الجزء الثالث

الحلقة الاخيرة

بارت ١٠١

لما فسخ الغرفة، جانت جديدة و حلوة مشتريها للخانم ب٢ مليون ونص، طلبها نائل كالو:-  خويه الغرفه اذا متريدها انا اخذها، لان غرفتنا تاخت من ورا لعب الجهال و تكسيرهم
كالو صراع: كدامك

حاولو العمام يدخلو بس من سمعو اخلاص هيج متصرفه و مداينه و متجاوزة على صراع كل عين ما بقتلهم يحجون ويا صراع لو يرجعوها فمحد اجا.

من صدك ممصدكه اني خلصت منها و ضل صراع بس اليه....
ورة اسبوع من طلاك اخلاص انعزمنا عد بيت عمهم عزام جان ذابح و عازم العمام، و صراع كال:- نروح ومعليج بأي احد

لبست احلى لبس عندي و طلعنا و صلنا هناك لكينه اخلاص و اهلها موجودين، و هي واخواتها لو بودهم ياكلوني، هيام كالتلي: لتهتمين
فتركتهم و بقيت على ايد هيام بالمطبخ اشتغل وياهم، فاتت اخت ام سعد تصير خالة اخلاص و هي لافه العبايه جوه ابطها، دحكت بوجهي و ردت حجت بالمطبخ:- اريد احد يدربلي على ابو حرب عندي وياه سويلفه
دزت واحد من الموجودين، شويه و اجا صراع :- امري خاله
-ما يامر عليك عدو يبعد عمري يا خاله رايدتك بسويلفه لوحيدنا
-جوا نسوان زحمه افوت اذا تريدين تعالي هين يم المكيف ماكو احد و انا خادم
راحت وياه وهيام ندستني و اشرتلي على اخلاص و اختها طلعن وراهم، راحن يمهم، اشرتلي هيام و مشت اي يعني (تعاي وراي)
رحنا وكفنا نسمعلهم و خالتها تكلو :- جايتك و طالبتك و ادريك ابو طلبه ما ترد احد
-اذا اكدر ليش لا بعيني

شاف اخلاص دار وجهو، كالتلو :- والله حالها يا خاله يكسر الخاطر، رجعها على ذمتك و انا بنفسي لو غلطت اطلكها منك
-خاله لو اطلبين ماي عيوني يرخصلج بس انا و بنت عمي كرصتنا خلصت و ماكو نصيب بعد
وكعت اخلاص يم رجليه تتوسل و تبوس وتكلو:- غلطت سامحني لا تكسرني ويكولون مطلكه  بروح حرب عليك
ابتعد منها و انحرج خالتها تتوسل و هي يم رجليه و تبجي، التفت الخالتها وكاللها:- اعذريني داكلج ماكو نصيب
جان خالتها تجر حجابها من راسها و اطلع شيباتها  و تصرخ و تكلو :-هالشيبات لو الهن حوبه لا تردني يماااااي
جر الحجاب ع السريع و خلاه على راسها :- محشومه خاله و لو تريدين راسي الركبه سدادة بس والله هالشي مو انا المصعبو انا من ساعة التزوجتها ما رايدها و الها يوم ترد اهلها و انا خبرتها بيوم عرسها و كلتلها مردج لاهلج اليوم لو باجر، مو بيدي، الله ما كاتب
جر راس اخلاص و باس راسها و كال الها:- من اليوم هي اختي و عفى الله عما سلف شتريد شتطلب لا تتردد بحسبة هيام بس رجعه اعذروني

عافهن ومشى فات من عدنا و طلع، و جان تهد عليه اخت اخلاص و تكلي:- كلو منج يالمسمومه الله لا ينطيج ان شاءالله

بعدتها هيام مني و كالتلها:- شو وخري شمو تايهتلج صدك ما تستحن رجال من يوم اللزكت روحها و ورطتو بخطبتها و هو يصيح ما اريدها بعد بعد هالعلكه ليش عفيه نفس ما عدجن كل كرامه غدي
و تكاونن هن و هيام شلون تكلهن بلا كرامه و تعالى الصوت و طلعو الزلم و زكح بينا صراع و كال:- تهيرن ع السريع خل اردكم ما نريد مشاكل و تخرب العمام من ورة نسوان

فتنا نبدل و كضبتني اخلاص من شعري و تصرخ مثل الوحدة الراكبها جني :- و تصيح طلكتيني يالكح... طلكتيني
جروها مني و كمت اصرخ بوجهاا:- ما اخذتو منج انت الاخذتي مني و حركتي كلبي و ما خليتي سالفه ما سويتيها بيه نسينتي الما عندو اب عندو رب ينصرو و يكف وياه ما يكف ويا الباطلين، انت الاخذتي مني و وكعت ابني بسببكم و خسرت صحتي و عافيتي وراحة بالي من وراج بس لا عبالج ادوملج، الدنيا ما ادوم لاحد و رجع الحك لاصحابو
جريت الشال و ابجي لبست وطلعت و هي تصيح وراي :- والله الا اهجج و حق الله بسماه يا ليليان فلا اخليج ترتاحين
صعدنا السياره بس ابجي محد حجه بس هيام نطقت:- بعمري ما شايفه هيج قلة مستحى نسوان تكتل روحها ع الزلم غدي اي والله
رجعنا للبيت ورد رجع لبيت عمو، اني صعدت لغرفتي نمت، و حتى من اجا بليل ما فتح السالفه ولا ذكرها حتى من ردت احاجيه:- كال الموضوع انتهى و الردتي صار و طلكت اخلاص، انسي موضوعها و ايالج وبالج بعد تشكي و تتشكين هيان البيت فضالج و صرتي انت الكل بالكل لا ام سعد ولا اخلاص ولا الحجي اشبعي بيه. 

ثاني يوم بعد الغدا كاعدين بالمطبخ وعمتي تشرب جاي، جنت امسح العلب مال البهارات و نور مفرغة الثلاجة اتنظفها
فات عمي وايديه ورا ظهرو كعد صبيتلو جاي
للعلم هو راح ابيت سعد يعيش يمهم بس هو يصبح الصبح من ٨  يجي ويمر علينا ويكعد.ويا الحجيه يتريك و يرد يرجع و يخلص اليوم يروح ويرجع علينا اسمو عايش عند سعد
المهم اجا كعد  عصبي وفتح الموضوع مال صراع ويا عمتي و شوفي شصار بينا و الشيطان دخل بينا و يدحك عليه و يحجي،  اخرها اندارلي و زكح بيه :- انكلعي صبيلي جاي
ورجع التفت العمتي

كاللها ...احجي ويا ابنج خلي يرد بنت عمو ويرجعها
شنو!! افتهمنا هو ابو البيت  بس مو يحكمنا تالي من اللي من دمنا و لحمنا تطلك 

الحجية:- وما تحجي ويا انت لو بلسانك عظم
- ها يالعلوية طلعلج السان وصرتي تستقوين بابنج
والله وكت الي طلعلج حس
- الساني يطلع بالحك
- حك الي يحكج دا ذلوني انت وابنج، هو محد ديدفع صراع علينا الا انت وهذة المصلاوية الي لاحسه عقلج وعقل ابنج
عمتي استفزتو وكالتلو:- والله هذا الموجود الي يعجبه اهلا وسهلا والي ميعجبه الله وياه كافي جزعنا من المشاكل يعمي حتى الولد بعد ما اريدو خلي جاعد على هاليتيمة العندو الخلفت نعم الله و الما خلفت ارادة الله لا اريد اخلاص ولا اريد زمرة اخلاص.

اني رحت صبيتلو الجاي و دا اقدم، ليش ما كام هيج ودفر ايدي هي والاستكان و كالي :- والله لاخلي يطلكج اذا ما اديحج فلا اطلع دحام ماجذبت ام سعد من ادكول بلا اصل
عمتي ما قبلت  و تكلو :حرام عليك هاي انت الحاج بيت الله تطعن بشرف اهلها
تلاغو هو وعمتي، اني عفتهم وطلعت شغلت الماطور ارش الحديقة وحيلي يرجف  من كلامو
اخذتني صفنة وفزيت على ايد صراع تحاوطني
هذا طبعه من يجي من برا ويشوفني ملتهية وممنتبهة يجي يحضني ويفززني
- بشنو سرحان الحلو
- مسرحانة بس ابوك جوا يتوسل بعمتي حتى ترد اخلاص و  دا يتكاونون
- اهااا دطفي الماطور وتعالي صبيلي غدا لشوف سالفة هالاخلاص الي مجاي تخلص
فات قبلي سلم على ابوه وكعد واني اصب بالغدا
نور بس ادحك وعمتي عافت وكامت للهول
خليت الغدا عالميز، وعمتي صاحتني دخلت انطيتها حبة ضغط
واسمع صراع يكلو :- والله ماترجع لو ينزلي ملك من السما
فتت اجيب ماي العمتي ، شو عمي يكولا:- والله عيب عليك متباهي بروحك شكبرك شعرضك واديرك هذة يول ....ويأشر عليه
بنت عمك الكل يحلف بيها تسوا راسها الهذة الماتستحي
يول دحك على حالك جان هسه عندك درزن جهال
شمستفاد منها بلا اصل

اني بيها صدك فااار دمي ووصلت حدها  عندي يغلطون و يهدون عليه و يضربون و اني كلشي ما مسويتلهم، فقبل ليرد صراع اني رديت بدون وعي وبدون تفكير وبدون ما افكر بالعواقب، ونسيت الاحترام والعيب والقدر طلعت من ثوبي
لان اعصابي طلعت عن حدها

- اصلي يشرفكم ويشرف شكو واحد بعشيرتكم، الله خلقا بس حيفن عالوكت الذبني يمكم الا انتو مو من ثوبي
صراع يزكح بيه:-  كااافي اسكتي
واني متواصلة بالكلام :-شجاب الجاب بس غير دنيا اتواكحت وياي وخلتني بلا سند من عمت عين الترراب اللم اهلي وخلاني بالذلة يمكم
اني احجي و صراع يقاطعني يكولي: ولج سدي حلكج عاد
فقدت عليه وكمت اصيح كتلو :- لا ما اسد حلكي لشوف، كاافي ترى مو جارية عد ابوك ولا عدكم كل الكام ضربني و غلط هليه و طعن بشرفي
يعير بيك لان تحبني و هو  لو بي خير ميخلي ام سعد اتسوك بي سنين وهسه اجا يطلع عضلاتو علينا عيب كافي خلي يحترم شيباته ملينا

ما لحكت ارفع عيني ليش ما صراع دافر الصينية ومطفر شكو صحن و لازمني من شعري قبل لا استوعب اول جف يجيني الثاني والثالث، نور تعيط وعمتي اجت تسحب بي وهو لازمني من شعري ويكفخ وعمي يكلو:-  ربيها حل بيها عساج بالموت يل بلا حيا

ما اتذكر منو خلصني بس حسيت عمتي تدفعني للهول
لزمتني المحجل كالت :- اطلعي ابخت الله، هالبيت ذابين بي عكدة مشاكل من احترك على روسكم ان شاءلله
طلعت ما افسر دربي ذبيت روحي عالسرير وابجي، انتبهت و ادحك الفرشة دم و الكاع كلها دم باوعت على روحي بس شفتي مشكوكة اتفحص روحي مثل المجنونة الفاقدة عقلها مابيه شي
انتبهت على رجلي من الاسفل مفتوحة فتح وتصب دم
من حلاة روحي كن دست عالصحن ومجروحة وما حسيت بالم
باوعت وكأنما شي عادي ولا اجعل صاير شي
والله وكتها استغربت من روحي
جنت عد اهلي اذا انجرحت جرح بسيط بالسجينة
اكلب الدنيا بالعياط واذا شفت نقطة دم البيت يكوم ما يكعد. هسه ما ادري شنو اختلف يمكن من القهر و الضيم الصارلي اسنين حاملتو كمت ما اهتم بألم على كد الالم اللي بداخلي بالنسبه الي الالم الخارجي لا شيء

... كمت امشي طلعت من الدرج ادور شي اشدها اجا اكبالي سيت نوم ابيض باسناني شكيت منا وكعدت اشد بيها خلصت، انتبهت على روحي بالمراية والله العظيم خفت  من وجهي
ما عرفت روحي، مجمل الوزن الي نزلته ب 25 كيلو بدون ما احس من طلعنا للاردن بديت افقد وزن
ادحك وجهي وارم من الراجديات
وكتها من صدك ولاول مرة اكعد ابجي على روحي عزة عليه نفسي كل عمري ابجي لان حقي مغبون بس ولا مرة بجيت على شكلي وحالي الا بهالمرة ...

خابرت خالو اشهك كتلو:- اذا عندك ذرة محبة لامي تعال اخذني والله خالو تعبت
كال :- اني بالانبار جايج
ماكو نص ساعه و اجا خالي و تصايح صراع و خالو، نزلت شافني انجن خالو وكام يصيح و صارت كونه بينو وبين صراع
و قسم خالو كال :- ما تبقين و لو بقيتي اتبرى منج
اخذت ذهبي و فلوسي و العقد مال البيت السجلو ابأسمي و نزلت
صراع انجن من شافني طلعت، رفع ايدو و هو يحذرني و يكولي :- والله ثم والله يا ليليان لو طلعتي من البيت بعد ما الج رده عليه
-عساه بالحرك هو البيه ما اريدكم و لو عندك ذرة كرامة طلكني ما اريدكم تفتهم شنو ما اريدكم ما اريد اريد تعبت منكم تعبت عوفني طلكني خلصني منك ما اريد

و اني اصرخ و هو يصرخ جرني خالو وطلعنا لأربيل، جان الجو شتا و بارد و ليل و السيارة تمشي ما جنت افكر بأي شيء بس بنفسي و اتذكر كل لحظه مرة عشتها وياهم

من لما بوكوني الذهب و ضربني و حبسني بالمخزن
لو لما طردتني ام سعد بالمطر
لو لما حبستني برا بالشمس
لو لما تهمتني بنتو بعارها و وكعت اني بيها و انضرب
لو لما جنت ما اعرف شنو زواج و هو يضرب بيه و تاليتو اغتصبني
لو لما خسرت اهل و بقيت تحت ذلتهم
لو لما تهجرت و عافني سنه بالعذاب
لو لما تكالبو عليه بغيابه و ما خلو جرح ما جرحوني بيه
لو لما رجع و تهموني بموت بنت سعد و انخرس صوتي
لو من وره شهواته و نزواته خسرت طفلي
لو من شك بيا بيحيى و فلش وجهي و هجيت بالشوارع من ضيمو
لو لما كسرني و اتزوج عليه
لو لما خاني مره لخ و وكع ابني
لو اتذكر خوفتي وكت الطعنتني اخلاص بشرفي و تهمتني ويا ابن عمو

وغيرها و غيرها و غيرها ....
شريد اتذكر لحتى اتذكر العمر عشريني و الشيب غزا راسي من القهر على صغر

وصلت اربيل و بقيت فترة اسبوع، و رفعت دعوة طلاك على صراع و متنازله عن كل حقوقي طلبت (الخلع)
خابر خالو يكفر و يغلط و يسب و يكلو مرتي باجر جايها و اخذها من عيونكم و اريد كو** يكف بوجهي

كام خالو طلعني لعمامي متواصل وياهم بدهوك، و كال الهم:- هذة بنت اخوكم كيت و كيت حالها و هيج تأذت و ما الها احد و زوجها هدد يريد يهد علينا و هو ابن عشاير من الانبار لو بقيتها عندي مسؤلية

اجا عم اليه اسمو ميخائيل اخذني وياه بليلة ظلمه باردة لدهوك، دخلني بيتو، جانو عندو ٢ بنات و ٢ ولد بس ولدو ما هين، عايشين واحد بأميركا و الثاني بألمانيا طلعو بالهجرة وهاجرو لما هجروهم الدواعش من الموصل و عمو سكن دهوك

ما اعرفو اني ولا مره شايفتو بس كلش محبوب و شكلو مسالم، دخلني البيت ورحب بيه و زوجتو رحبت بيه و بناتو صغار ، سوو اكل و حلويات  و كعدنا ع الطاوله ناكل و ضحك و سوالف خفيفه
على الفور حسيت بأنتمائي الهم، حسيتهم يشبهوني يشبهون البرائة البداخلي،
خمس سنوات عشت ويا اهل صراع ولا يوم حسيت اني انتميلهم لو يشبهوني، البداخلهم غير البداخلي و عقولهم غير عقلي و حتى اشكالهم و اجسادهم ما مثل نفس طبيعتي
اما بيت عمي، ما نزلت وجهي من وجه عمو على كد ما بينو شبه بابا، ضحكتو تصرفاتو، حتى وجه يحيى شفتو بوجوهم

سألني عمو اذا اني مسلمه او مسيحية، كلتلو :- لا اني مسيحيه ما اسلمت
تعجب شلون و ابوج و اخوج و اسلمتو، كلتلو :- اي بس ماما دلتني على دين المسيح و ربتني عليه

ثاني يوم خابر خالو كال صراع جا عدهم و يهدد و يكولهم مرتي اريدها و اطلعولياها من جوا الكاع و الا والله ادفنكم واحد واحد

كايلو عمو طلعت لتركيا هناك اخذها يحيى
مجاوبو:- اني راح ابحث و ادور لو عرفت اهي بعدها بالعراق  والله اهجم بيوتكم

للاسف عمي بسرعه خاف و كال:- عمو اني ما اتحمل مشاكل و عندي بنات و اخاف على عائلتي راح احصلج رقم يحيى يجي ياخذج

وافقت، وفعلا اتصلو على يحيى و كالوله اختك :- كذا حالها تعال اخذها
كاللهم :-باجر من الصبح اني جايها بس انت بس وصلياها لكذا مكان لان اخاف ادخل العراق

طلعني عمو من الفجر و التقيت يحيى بعد ما مرت ٥ سنوات و اني ما شايفتو، وقتها نسيت كل السواه بيه حظنتو حيل و كمت ابجي بحظنو من كل گلبي، و هم حظني و بجا
اخذني بسيارة  لتركيا متت و لعبان نفس خلصت الطريق استفرغ لحد ما وصلت حتى ما شفت البيت شلونه نمت فورا بالصاله
ثاني يوم كعدت رتبت الشقه، كلش حلوه و اثاثها مرتب تركي، نظفت كلشي وشفت خضروات سويت تبسي و تمن جان موجود اكياس
هو اجا الظهر صاح :- ايباااه وين رجعتيني
-ليش وحدك ما تطبخ
-ليليان اني هنا عايش بالضيم، الغربه ذبحتني لا اكله مثل العالم لا كعدة لا تنظيف لا احد احجي وياه
-ليش ما اتزوجت
-احب وحدة سوريا بس ما حاجين بالزواج، بالعكس اكيف تظلين يمي على اقل واحد يشيل اللاخ هنا اني اشتغل و انت تشيلين البيت و اقتل الغربه الاني بيها
-اني يحيى بعد ما اكدر ارجع لصراع دمروني
-لا ترجعين اطلكي و عيشي هنا و كملي دراستج و خليولي
-انت شتشتغل هينا ؟
-الصبح اشتغل بالمخبز ارجع انام ساعه و العصر اطلع اشتغل بالمكتبه، الى نص الليل يلا ارجع
بقينا نسولف و نضحك و صبينا اكل و كعدة و ذكريات الطفولتنا، و ساعه نبجي و ساعه نضحك
انوبه اني لان غسلت الملابس فلبس بلوزة من عنده بس طويله عليه حيل و ارداناتو تسحل، فمن بجيت مسحت خشمي بالردن مال البلوزة و هذا عاف البجي مالو ونزل بيا رزاله و غلط و بلوزتي و ايع و كششتيني و ما لكيتي غير بلوتي الجديدة
رحت نزعتها و اجيت طريتها بنص وجهو وكتلو :- من امداك و امدا ابلوزتك
-والله معليه تغسليها و تكويها هم مو بس تعرفين تمسحين بخشمج بيها
-يا فدوة شنو اشتغل عندك ؟
-ها رجعتي ما تتسخريلي ؟
ضحكت و هو هم ضحك و كعدنا نسولف و تعاتبنا ع السواه بيه و هو يحجيلي ندمو و على انظمامو لداعش يكول:- انا ما جان اعتقادي هشكل، اعتقدت من انظم اتصيرلنا دوله اسلاميه قويه مستقله عن العراق ونعيش حال افضل و نخلص من الحكم الفارسي علينا ، بس ما هذا اللي تبين و التوضح ان هم اساسا ما ينتمون للاسلام عدهم اهداف سياسيه و كل كلامهم القتل حتى اذا اختلفت عليهم يقتلوك فشردنا منهم اني و كم واحد ويانا و طلعنا من العراق

.....بقيت عايشه بتركيا من يطلع يحيى انزل للشارع اتمشى شويه الجو ثلوج و الطبيعه تختلف كليا عن الانبار، عيشه غير العيشه، الحياة تختلف الوجوه تختلف كلشي هينا مستغربتو و حابتو

بس.... رغم الالم الشفتو يبقى اليل وجع و ذكريات تترادم مثل امواج البحر ابالي وياخذني حنيني لغرفتي و لمكاني ولكعدتي على تختي و لصراع اللي ادور والكاه نايم جنبي

رغم حقارته و المه واوجاعه الي، بس ما اكدر انساه ولا اطلعو من بالي ابقى احن الو مثل الحنين العصفور لعشو
يجيني الليل و اشغل هيثم يوسف ( اضعف كدامك)

تبقى دموعي تجري عليه مثل الطفل المفارك ابوه، و كلبي يخلقلو الف عذر حتى يحن و يكولي:- هو ليش يدور عليه و خابص الدنيا لو ما يحبني يسوي هيج ؟
و ابقى اشتاق و اشتاق و اشتاق و اتذكر اوجاعه و ابجي

مره جنت دا احجي ويا علي..
للعلم بس هو اتراسل وياه البقيه كلهم كطعت وياهم.
فدا احجي، اتصل بيه، تفاجئت هو اكثر شي يتراسل ميتصل
رفعت الخط و جان يجيني صوت صراع :-الو ليليان؟
بقيت ساكته للحظة بلعت بلعومي من الخوف
رد كال:- احجي شنو تخافين
-شرايد
-وين انت
-عوفني صراع
-ولج شعوفج يولي شعوفج جنيتي انت ولج لا ليلي ليل ولا نهاري نهار بفراكج، ليش رحتي
-من ايدك
-لا مو من ايدي من غبائج اكو وحدة تكول لعمها ما بيك خير
-هسه شرايد ؟
-يولي دليني مكانج بيا ديره خل اجيج
-بتركيا
-اعرف تجذبين
دزيتلو فيديو الي و اني امشي بالثلج و اصور الشوارع لصديقتي، شافها تنهد:- ولج والله لو بالصين اجيج كليلي انت وين ليليان كافي
-انساني وطلكني
-والله ما اطلك ولج مريتي بنتي انت من كل عقلج اعوفج تحلمين

ما قبل يتركني ولا يسد الاتصال بقي يحجي ويشكيلي فراكي و اشتياقو الي، اكذب لو ما كلت حنيت، بس ما اكدر فكرة ارجع و اعيش تحت ذلتهم ما اريد
خاصه بعد ما شفت تركيا و انفتحت عيني على غير عالم و غير حياة تنتظرني و ارجع ؟ مستحيل
بس الاشتياق يذبحني

فبدل ما امنعو مني، صرت يوميه نتخابر و نتراسل و نفتح كام وليل نهار هو وياي حتى من انام انام كدام بعض و اكاميرا مفتوحه اليكول عشاق ممتزوجين و من يكولي دليني ما اقبل

دا اشتغل و اجت التقويم كبالي بالمطبخ، تفاجئت و كعدت استوعب، صار شكد العادة مالتي متاخرة ؟
حسبت، طلعت متأخرة ١٥ يوم و اني ممنتبهه

خابرت يحيى وطلبت تحليل حمل، ما حجه من اجا من المخبز جابلي، بس قست طلع كدامي خطين
طرت من الفرح، رحت ركض خابرت صراع كعدتو من النوم و فرحان واصيح و هو يكولي :- يولي بس اهدي و فهميني شكو ؟
-صراع حامل اني حامل
هذا كمز من التخت و يكول:- بدينج بصلاة محمد عليج، دكولي والله ، الله عليج حامل ؟
و اني احلف و اركص
-يول اربزي ابمكانج لا يكع من اشتعلو  اهلج ولج صدك حامل ؟
-اي والله شبيك
-ليليان خاف تلعبين علي
-اكول والله و المسيح و القران اني حامل
كام يصيح :-يا الله
وما اسمع غير خطواتو ع الدرج و هو يمشي فتح الباب وكعد امو :- يمه يمه اكعدي ليليان حامل 
-يا صلاة محمد صدك ؟!!!
- اي والله يمه هاي هاي احجي وياها 
اخذتو و تحجي وياي:- ولج يمه صدك حامل
-اي والله يوم طلع عندي
خطيه كامت تصلي ع النبي و فرحت حيل و تنصحني لا تكفين لا تشيلين ثكيل و هو يصيح اتسطحي يولي لا تتحركين جثير ولا اطلعين برا تره الثلج مو زين ع الحامل
كتلو والله جذاب شجاب هاي على هاي
-يولي مثل ما اكلج

بقبنا نضحك و نسولف و كل شوي ينصحني و نامي ولا تتحركين وروحي دكتورة و خليني احولج فلوس خاف محتاجه
هو جذاب يريد بس يندل مكاني
بقيت على هالحال مرتاحه و احجي وياه يوميه و للصبح نسهر
الى ان اجا اليوم اللي اتلقيت مراسله ع الماسنجر (عندي موضوع مهم وياج) فتحت المراسله،
-منو  انت
- اتصل بيج
-غير اعرف منو انت
-مو مهم تعرفين منو اني، عندي اخبتر على زوجج متعرفيها اكولها الج اتصال و اروح
....من يمعت السالفه بيها صراع خفت، ع السريع اتصلت بيها:- شنو الاخبار و منو انت
:- انت ثوله و نايمه و رجليج بالشمس
-ليش وبعدين معرفتيني عليج؟
-معليج منو اني،، اني جايه اكلج رجلج متزوج وحده بغداديه من بغداد و عندو منها بنيه
-انت شدا تحجين
-والله العندي كلتلجياه، مشتريلها بيت و بالشهر يمرلها ٤ ايام و يحبها و هي معلمه و مطلقه و عدها ٣ اطفال
دزتلي صور الها وياه و هي بالسيارة، حلوه حيل حلوة و يضحكلها و ابنها بحظنو

لحظتها انجنيت كمت ابجي، اريد اكف على حيلي و اتصل بيه ما اكدر بالزور يلا كدرت اطلع حسابه و ادزله الصور
بسرعه شافهم و سألني :- من وينلج هذوله الصور
-منو هذه
-منين جبتيهم
-كولي منو هذة
-زوجتي ميادة بس ليليان اسمعي
كمت اصرخ و اغلط عليه و اصيح و هو يزكح بيه شلون اغلط
-من شوكت متزوجها و منو هذة
- من جنتو بالاردن، مره محتاجه و اتزوجتها
-مطلقه هم جهالها ما الهم ابو هم عدها وارد و هي معلمه لك ساعة السودة على اليوم الشفتك بيه يا خيوان كل همك نزواتك و اني اخر همك
-تادبي و احترمي نفسج ليليان الامر لا اليوم ولا البارحه و انا ما يربطني بيها غير عقد و هي زوجه الي حالها حالج و انا ما خاين كل هذا عمل خير و الله محلل ٤ ما ردتي اسمهان طلكتها رفضتي اخلاص و طلكتها شتريدين اكلج تم ممكصر عليج بشي فمعليج بعد انا منو اتزوج لو شنو اسوي من اعمال خيريه ،
-والله من دنعل ابوك لابو اعمالك لابو الزمرة الطلعت منها لابو ذاك اليوم شقت وجهك بيه يا حيوان
اني غلطت عليه هشكل لو هو انجن شلون تسبيني اليوم افعل و اليوم اسوي قفلت الجهاز و شمرتو   ضليت افور و اغلي وحدي و ابجي والطم على وجهي من القهر ، و فوك القهر مخلف منها و عندو بنيه

بيومها فقدت من صدك ومحد ويايه بالبيت اخيرها كمت بس اشكي للي ابطني و ابجي

وبعدها اتضحلي بعد ما اتصلت بعلي و هيام حجتلي، متزوجها قبل اخلاص ومحد يدري بيها غير هيام حتى الحجيه متعرف و نفس الحاله مطلقه ومحد الها و خطيه و تبريرات رافضه اسمعها بتاتا

من يومها انطوت صفحة صراع بالنسبة اليه انتهى
لو يصير نبي هم ما ارجعلو بعد
الله فتحلي باب لحياة ثانية بتركيا ارجعلو ليش ؟

سحبت نفسي و قطعت منو و طلعت من حياتو نهائي غيرت حساباتي و ارقامي ورفضت يتواصل ويايه لو اتواصل ويا اي واحد منهم،

   هو حار بيا طريقة يوصلي كتل روحه، يوميه يهدد خالو حتى ينطيه مكاني ويكلو يم اخوها يحيى و ما اندل اخوها وين ساكن هو اجا و اخذها

سمعت ان هو وكع و تمرض بالذبحه الصدرية و نام مستشفى و ما رف كلبي عليه على كد الالم العشتو
و اني الجنت اغار من اخلاص ليروحلها طلع عندو زوجه كل ما طك بعقلو راح لبيتو الثاني ارتاح و انتعش و اني بألف ويل ؟!

مشت ايامي و اني اكافح و اضغط على نفسي بس حتى اتحمل و ما اخسر طفلي و ملتزمه دكتورة هينا بتركيا صح ما افتهم عليها بس جارة اليه سوريه تصير حبيبة يحيى  هي تاخذني و اترجملي
الحمد لله ثبت الطفل ابطني عكس ما جنت عدهم كل طفل واكعلي من قهرهم و اسحورتهم و عمايلهم،

ايامي تمشي و بطني تثكل، و كلما تمر ايام الضغط يزيد من صراع و اهلو على خالو يريد يغرف حابة الطفل و يهدد الطفل اله ما تاخذه ليليان

الف فكرة و خوف و رعب عشتو لا فعلا ياخذ صراع طفلي و اعيش بحسرتو طول عمري كل تخطيطي و افكاري شلون احافظ على طفلي

الى ان اجا اليوم اللي حان موعد ولادتي، محد جان ويايه غير يحيى و حبيبتو السوريه اخذوني للمستشفى و اسم صراع ما نزل من حلكي، على رغم حقارتو بس ما بيدي حبو بكلبي محفو و لو وكعت صحت صراع و بولادتي ما نزل من الساني بس اصيح ( الحكني صراع راح اموت صراع متت)
استخدمو ويايه ابرة تخدير موضعي للولادة لان يومين اني بس اطلك و تعبت فجيبوني بالابر

اول مشفت الطفل ابتسمت و انوبه بجيت، جنت اتمناها من صراع و هو يمي يبوس راسي و نحضن ابنه و اشوف فرحة صراع الينتظرها سنين، بس الله كتب هالطفل اليه وحدي ما اشاركه ويا احد

حسيتو تعويض عن اللي شفتو ... ادحك بوجهو و ابجي و ريما حبيبة يحيى كاعده يمي و تواسيني و تكولي :- اطلعي شوفي ما احلا متفكري بشي هلق بس بالطل و بنفسك و انسي كل يلي راح ونحن وياكي ما رح نتركك

شكرتها و خلت الطفل بحضني
-شو بتسمي
-ما اعرف جان صراع يريد اسم ابنو حرب
-اي حرب انت من كل عقلك طفل لساتو زغيؤ مبدو هالاسامي يلي مليانه عنف
- اسمي (ادم) ؟
-ادم!! كتير حلو يتربى بعزك و دلالك يعمري

بقيت ادحك بادحك بيه و ابتسم من صدك نسيت كلشي،صار الي روح و حياة ثانية و ضحكة كلما صديت لملامحو الناعمه، ما بيه شبه من صراع رغم جنت ابحث صراع بوجهو بس جانت ملامحو كلها اليه
ابيض و الشعر خفيف اشگر و العيون صفر
حسيتو هذا الطفل مخلوق اليه و بس
و يا فرحتي بيه ما واسعتني الدنيا
نسيت كل شيء بولادتة
و صار هو كل شيء...

مرت ايام نفاسي و رجعت لاربيل عند اقارب اهل امي مو عد بيت خالو نزلت، لان اخاف صراع يكضبنا
مشيت بمعاملة الطلاك، ما قبل يطلك الا انطي الطفل
مقبلت ... راد بس يشوفه ورفضت
خفت لا ياخذو مني و اموت
مل و هو يدور مكاني اني و الطفل ما اندلنا
طلبني بيت الطاعه و رفضت و رفعة قضية خلع و وتنازلت عن كل شيء و اطلقت ...!

خلص  الكابوس يلي اسمو (صراع ابو حرب) و خلصت من ألمي و مخاوفي ، ما جانت حياتي وياه الا مثل اللي واكع بنص بحر واجهتو الجمال و الحب و من داخلو ظلام و عذاب، و كل عواصف المشاكل اللي تمر اكول هذة اخر عافة و ترد اقوى منها، تعبت و اني اتحمل امواج الالم و اقاوم و اصبر لحتى اوصل بر الامان و اعيش، بس عمري مشت بر الامان و الراحة ويا صراع

خلص صار لازم انقذ نفسي بقارب و امشي بعيد عنه و عن حياته العشائرية و العادات و التقاليد اللي عمري ما تقبلت لو ردت اكون من ضمن هذة العادات

خلص لهنا و اكول انتهينا ...

رجعت التركيا و قررت ابدي حياة جديدة مع ابني و ادوس على كلبي اللي كل ليله يشتاقلو ويحن، لازم اعيش و لازم اكون
فالحياة امران... اما ان تكون انت
او تكون كما يكونون ...!

النهاية....