#المراهقة_والاربعيني
الجزء الثالث
الحلقة ٢
البارت ٩١+٩٢
اخلاص ما بقت طريقه و الا جربتها ويا صراع عسى و لعل يتقبلها و يحسبها على الاقل زوجه ، بس هو كان موقفو واحد رغم مرات اشوف يغير طريقتو وياها ، يحاول يعوضها عنو بالفلوس ، جثير ينطيها فلوس بس لحتى يرضي ضميرو بهجرانها ، بس هي بقت تهتم بي و تستجدي العواطف منو و تنتظر اللحظه اللي يدحك بيها
صح اكرهه بس مرات استخطيها ، تفكر انو لو رضت الحجيه و اشتغلت زين ممكن الحجيه تأثر على صراع ، تشتغل شغل مال حمال لدرجة مستعده تجر حمار من اذنو بس لحتى صراع او الحجيه يكولها عفيه
شايله البيت كلو على راسها مرات استغرب شلون تكدر و هي مره تشيل كونية طحين كامله و تمشي ، شكد مغثوثه من زواجو بيها و اتمنى اليوم اليطلكها بس صراحه من يوم التظوجها و هي شالت كل شغل البيت عني ، او اني سحبت ايدي و خليتها مثل ما رادت هي تخلي روحها هينا ( خدامه )
بقيت اهتم بنفسي بشعري بجسمي بغرفتي ، لدرجة صراع ما كام يشيل عيونو عني كل الوقت مرتبه على اخر حبايه ..
صح مرات استخطيها ، بس حالي حال كل مره تخب زوجها بأنانيه و تريدو الها بس و محد يشاركها ..
فدوم احاول ابعد اخلاص من عينو و ابقى بس اني گبالو
رحنا عزيمه لبيت عمو ، احس الكل يدحك عليه بنظرة حقد و اثنين من عماتهم فاتحو موضوع وياي انو :- حرام عليج هاجرها بسببج هي مره و انت مره ، خليلها حتى لو يوم بالاسبوع و ما ينحسب عند الله هاجرها
ما قبلت ، بقو يحجون عليه .. استثقلت الموضوع و بقيت ابجي و خابرت صراع :- الو
-الو صراع
-شكو يولي شبيج تبجين
-هسه تجي تاخذني بسرعه مليت من عدهم
-حاجوج على موضوع اخلاص مو ؟
-اي
-هسه جاي لحظه
شويه و فات للبيت و ابن عمو وياه و وكف بالهول و صاح :- وين عمي عزام
ردو :- ابشر ابو حرب
-عمي هاي كبالك و اريد الكل يسمع ، انا مو خرگه حتى النسوان تمشيني و اخذ رأيهن يقبلن لو لا ..
-حشاك ابو حرب افا
-لا عمي عماتي ما خلن حشى ، من يكعدن ويا حرمتي ويكللها خلي يصل مرتو و ما يصير هاجرها انا ما اقبل و خليها بعلمكم ، انا من ساعة الخطبت ما اخذت رأي احد و اتزوجت و وصلت و ما اخذت برأي مره .. مو انا التمشيني مرا ، و لو هجرت فهذا قراري انا و ما اقبل احد يدخل بقراري
فاتحتوني انتم و سكتت و عديتها و فاتحتو مرتي و راح اعديها الا حرام بالحرم لو تنعاد يا اخلاص طلاكها على اديكم مفهوم ؟
-شني يا عمي انت تريدلك حجه اطلكها حرام عليك ما يصير تراها بنت عمك و هي اولى منك من الغريبه
-اهااا هذا الدك و المدكوك ، لا تحجولي بالحرام و لا تمثلولي وجوه الدين يمي ، من دحام هجر نوريه صار ٥٠ سنه محد بيكم عرف الله و كالو يا رجال ليش هاجرها خاف ربك ؟ بس من وصلت لاخلاص و منكم و بيكم لا هنا حرام و مايصير ، شوف عمي تحللون شيء و تحرمون شيء هذا الحجي ما يمشي يمي ، انا ما ما جاهل و تجون تحاجوني و قسما عظما موضوع اخلاص لو انفتح مره لخ الا اطلكها و اطلع من العشيره كلها ، كافي احترمتكم و تزوجتها لخاطر عمومتنا و خاطر ما اسبب بمشكله بين العمام هذا حدكم ... يلا يمه انه انتظركم برا مستعجل وراي شغل ، اودعناكم
حجاها و طلع و هم طلعو وراه يحجون و يتعذرون منو ، لبست ملابس و اخلاص تبجي و اختها ادعي عليه و تكول :- عسى بعمرج ما تشوفين الفرحه و ربي يكسرج مثل ما كاسرتها ..
ما رديت عليها و رجعنا للبيت ، اخلاص ما بطلت دعاوي اليوم كلو تمشي و ادعي عليه و كفت اسوي الجاي بدال نور و هي تكولي :- اصبريلي يلصفيره لا ما هجج من البيت فلا انا اخلاص بنت صالح
وبقت تحجي و تعيرني بأصلي لان مو عربيه
ما رديت عليها لان صراع عصبي و خفت نروح بيها سوا ، كلت من نكعد اكلو عليها و على دعاويها و اخلي يتصرف
لليل اجا هو تعبان بس لبس دشداشه و تمدد عكسي و و بيدو الريموت يدحك اخبار ، و اني امدده من الجهه اللخ و ادحك بالموبايل و اقرأ قصص على برنامج اسمو (واتباد)
ضوا الهول الفوك جان مشعول فضار ع الارضيه فجذب نظري ورا الباب من جوه رجلين مثل كانو شخص واكف يتسمع ، ركزت عرفت هذا نعال اخلاص احمر ..
كلت هي الجابتها النفسها بجزات دعاويها الا احرك كلبها .. نزلت من التخت و نزعت الثوب ، صراع انصدم :- ها يولي شكو شو تعرينا
-استحريت
-افا تستحرين و انا موجود ، والله حقج يابه من جيت وانا ما ملتفتلج شو حدري .. سحبني الو واني كمت اتمضحك وياه و هلكد ادلعت و كل شويه يكولي :- يول صوتج اليسمعج يكول كاضبلي بزونه بشعر شباط فضحتينا ول يابه
و اني اضحك وياه لحد ما دحكت هي ماكو .. حسيت انتقمت منها العوبه ...
كعدنا انسولف اني وياه و كلتلو على كل كلامها و كتلو عيرتني بأصلي ... كال :- ملج علاقه عوفيها شما تحجي و انا اردها
ثاني يوم الصبح كعدت قبلو سويتلو ريوك تريكنا مع بعض و طلع ، صعدت ع الدرج عدارجع الغرفتي انصدمت بأخلاص كن باجيه و العيون حمر و اجفانها سود و مخزره عليه و كأنها تريد تاكلني ، خفت منها ع السريع درت وجهي و رحت لغرفة الحجيه جريت مخده و غطا و نمت بالگاع
لهناك كعدت على فهودي ابن نائل يضرب بوجهي ، تعدلت اخذتو بحظي و ابوس بيه
الحجيه :- ليليان نايمه هينا شو ، متزاعله انت و صراع ؟
- لا يوم الله ليجيب الزعل بس من طلعت صراع الدوامو تكاسلت اصعد و نمت هينا
ما حجت ، و كد ما مزاجي مرتاح رحت اني اسوي الريوك و مكعده اطفال نائل تلاثتهم ع الطبله و القنهم نشيد ( يا بط يا بط اسبح بالشط ) و نور تفوت و تطلع تضحك ، خليت الاكل بالكاع و صحت الحجيه و الحجي و كلهم جمعتهم بالهول يتريگون بس اخلاص مقبلت تكعد
و خلصت ورحت نظفت البيت و طلعت للكراج اغسلو و الهيتفون بأيدي اخلاص ما نزلت ابد ولا اشتغلت عود عناد ، مهتميت ..
سويت الغدا و يا نور و صعدت تحممت و رتبت نفسي ، اجا صراع اني على اخر حبايه رحت اصبلو غدا و اخلاص گابلتو ، حطيتلو الصينيه و كتلو اني هيج و هيج سويت جان يكول
:- لازم البزونه مرتاحه " يغمز "
ضربتو على كتفو :- عابتلك
ضحك ضحكه عاليه :- عفيه عفيه بمريتي يابه وين اكو منها
ام سعد :- يا عشتو اشتغلت يوم وكعت بيها مدح عجل شتكول على اخلاص اليوميه شايله البيت على راسها ، و اليوم مريضه حتى ما طلعت منها سلمتج خير شبيج
و هي تحجي دك جهازو ، رد و سفلها ما رد عليها خلص كلامو جان امو تگلو :- برزان صار عندو ولد لازم نروح لبيت عمك نباركلهم
-ان شاءالله حجيه
اخلاص :- شحلاتو خاله تكول وجه العافيه اشكر و العيون ملونه
صراع :- الله ينطي بنت العالم الحسنتلو النسل الا اخوج اجلح املح وين يطلع منو هيج انتاج
اندار ع الحجيه :ادعيلي حجيه الله يرزقني ولد من ليون و يطلع عليها اريدو هيج جمال كردي بدم عربي اخ ول يابه يطك بالگاع
الحجيه :- ييمه اشكر اصفر المهم الله يرزقك وليد و يسند كبرتك بيه حتى لو مو من ليليان يحتاجلك بزريه ييمه
-انا راضي بقسمتي يمه و متاني الله يرزقني منها و ان ما رزقني الو حكمه
مديت راسي بست راس جتفو و هو يحجي :- الله ليحرمني منك حبيبي
اخلاص ما طلع منها ولا صوت ، ذبت حركتها بالاكل ماعو مرگه كبالها وكعتلها تغمس و مدنگه ، يومها ما اشتغلت بقت اسمها تاكل ، عادتها من تضوج شكو شي كبالها تاكلو
فبليل جنا متمددين اني وصراع بغرفتنا ، اندكت الباب كام هو فتحها طلعتلو اخلاص تبجي و تكلو :- بطني كتلتني من الوجع
صراع :- و انا شبيدي عليج نزلي للحجيه بلكت عدها علاج الج
عافتو و نزلت ، هو سد الباب و طفى الضوا ، تمدد نام شويه و سمع صوت التقيئات مالتها عالي بالحمام ، كف الغطا و كال :- استغفرك اللهي شبليتني من بلوه
راح طلع و اني منعسه انتظرت يجي ماكو ، مرت نص ساعه و هو ماكو عاد كمت وراه رحت لغرفتها ، لكيتو كاعد على تختها ثاني رجل و منزل رجل و هي كاضبه ايدو و نايمه :- صراع نعست يلا
اخلاص :- خلي بس اليوم يمي احس نفسي راح اموت
عقدت حواجبي و دحكت بيه ، حجه هو :- جيبي فراش و تعاي هينا نامي دشوف اليوم وين توصل
... والله ما كلت باطل رحت جبتلي فراش و غطا و بطانيه فرشت بالكاع و نمت احتياطا خاف يصير بينهم شي وكتها تفيدني مستحى ؟!
عاد هو لهناك حس عليها نام تسحب منها و اجا حشك روحو بفراشي و خلاني على ايد ، كمت اتحرك بحظنو و اتحسس الدفو البي جان يكولي كومي يولي نروح لغرفتنا انا هينا ما اتحملج ، ضحكت و كمت وياه للغرفه
لثاني يوم نزلت لكيتها مكطعه روحها بجي يم الحجيه ، ادكولها :- دخليج حجيه كليلي شسوي شيريني ردتو يمي بس ليله يبقى وياي و ما تركتنا راحت جابت فراشها ونامت بنصنا و ادور اخذتو وراحت
الحجيه ضاجت حيل ، و رفعت وجها عني ما كامت تحجي وياي ، من حسيت هيج الوضعيه التزمت غرفتي ما طلعت منها ليما اجا الظهر صراع تولتو الحجيه
:- ما تخاف الله ما تادي حقوق حرمتك ، خاف ربك انت حجي ، جاهله هلكدها لاحسه مخك ، مثل ما ليليان مره و تريدك و تزعل ذيج هم مره و عدها احساس ، طول عمري افتخر بيك و اكو ما تغيرو النسوان تالي تحي وحده طولها شبر تمشيك شلون ما تريد
هو جان جاي من الشغل تعبان و حاول يفهمها انو تعبان سدي الموضوع لا تدخلون معليكم بس الحجيه انفتحت ، عاد هو انفجر و تولا البيت جلاليق و الغلط مالتو و الفشار خبص الدنيا ، انرعب البيت من صاح بعلو حسو :- اخلاص
هي نزلت ركض كضبها من شعرها ويفر بيها شلون تشكي منو و يكولها :- فوك ما الله ذبج على راسي و تشكين مني
يريدون يفرغوها من ايدو ما كدرو والحجيه تجر وتتوسل بيه و هو فقد و الحجي يكولها :- كلنالج عوفي تعبان ارتحتي ينوريه
عاد سحبنها كوه من اديه و هي كامت تصرخ و تملخ بشعرها و تكلو شيبتني ، الشيب حتى بكلبي طلع ، قصوري وياك شنو تعبت مليت انه مو عدوتك انا بت عمك الله من فوك يرحم و انت ما ترحم
و هو انجن شلون تجاوبو و تكف بوجهو رمى عليها يمين الطلاك و كال الهم بصراخ :- ما تضل على ذمتي اخذوها من وجهي لا اجيب اسلاحي و افرغو براسها لهالعار
و هي طكت و كامت تشيل باديها و تشمر و تتحسب عليه و تضرب بالكاع ، شافتني كاظبه الدرج و هي هجمت عليه مثل الوحش كضبتني من راسي و تضرب حيل هم التمو عليها ايريدون يفرغوها مني و هي مجلبه حيل و صراع يفاكك بيهم بقوه يريد بس يكضبها و الحجي واكف يصد عنو و ما يخلي يتقرب و يوخرها عني ..
اني اصرخ و هم و صراع و اخلاص و هوسه و كونه للظالين ، اخرها من فوك الحجي كضب راسها و جرها قوي من شعرها و هي سحبه و هي رجعه للكاع ركعها و يكولها :- بنت العار و تضربين حرمتي كبالي بنت *** ما تحترمين وجودي و تتعدين عليها اليوم اخلص عليج ..
صعد الدرج شبختين كلهم خافو من عصبيته ام سعد خلت عبايه على راس اخلاص و طلعت بيها ركض
نزل اسلاحو بايدو و الحجي يهدي بيه ، نائل ما جان موجود .. عافهم عاد صراع و صعد يرتاح بس هلكد غلط و فشر و خبص البيت
وكتها خفت اصعد و اخذ حصتي من عصبيتو ، و كدرت ابقى لان كل الحجي و الدعاوي عليه و اعتبرو المشكله بسببي ، فصعدت بغرفة حلا كعدت
من طلع ورا المغرب يلا رجعت الغرفتي .. بليل جا و ما يتحاجى و يطر بالملابس و يضرب اباب الكنتور بقوه من يريد يسدو ، بدل وكعد بالهول يأركل
للوحدة بالليل رحت يمو دا اشوفو ، عاقد الحواجب و ماد رجل على رجل للطبله و يدخن أركيله ، مطنكر فد مره حتى ما دحك بادرت و كتلو :- صراع ما راح تنام
:- كومي ولي من خلقتي
-اني شعليه كلكم محمليني الذنب بالمشكله
زكح :- دا اكولج كومي من خلقتي
بقيت ادحك بيه
صرخ بقوه :- ولج كومي
جفلت و كمت بسرعه للغرفه ، عاد عفتو و طفيت و نمت ، ساعه و جا هو فتح الفراش ضل يتگلب منا و منا بالفراش مزوهر و هو يفكر ، اخرها رفع راسي و مد ايدو تحتي و سحبني لحظنو ، تحاظنا و نمنا
بس ما هدأ ثاني يوم هم بقى مطنكر
الظهر اجت حلا خطار النا ، بطنها كبرانه عليها الشهر الخامس يمكن ، بالعافيه عليها هو الرزق حظوظ و البشر كلمن و حظو
اجت حلا و عساها لا اجت ، متحمله عليه كأني اني الطردت خالتها ، مدبله بس تسمع مني الكلمه تكب بوجهي و الحجيه تكولها :- كعدي ولج استري علينا ابوج كايمه اعصابو
اني اغلب و قتي معتزلتهم ما بيه اتصادم وياهم لاعبه نفسي منهم
للمغرب اجو عمومتهم ، حجو ويا الحجي بموضوع اخلاص كال الهم ابو حرب هسه معصب يهدئ و الله كريم ، بعدين حجو بسالفة سعد يريد يخطب مره
من جا صراع و فاتحو بموضوع سعد ما قبل ، يكول الهم :- هو ما فالح بعائلتو ويوميه جاي صراع انطيني و صراع شوفني و ديريد مره لخ ، ول هاذ ما يستحي مرتو ما صارلها كم شهر من ماتت و هو يتخطب
بقو عمامه يحجون وياه بهالموضوع جاوبهم :- الله يوفقو شعدنا من باجر دنخطبلو بس هاي جدامكم احجيها انا مالي علاقه لا بي ولا بزواجو هو يتكفل كلشي
فتقرر انو الجمعه يرحون يخطبون لسعد ، و بدت تحظيراتنا للعرس ، شفت حلا كالتلو :- بابا اريد افلوس اطلع اشتري للخطبه
مد ايدو لمحفظتو و انطاها ٢٥ الف ، صفنت بوجهو :- بابا شتكفي اريد.اشتري ملابس
رجع انطاها ٥٠ الف و كال الها :- خبري رجلج و كليلو انا طالعه سوك لا تفرفرين شوارع بدون علمو
-لا بابا كلتلو حنطلع اني و خاله
-يا خالتج منهن ؟
-اخلاص
رجع طلع من محفظتو ٢٠٠ الف و كال الها :- و هاي وصليها الها مصرفها
حجاها و صعد ، صعدت وراه فات للغرفه كلتلو :- صراع انطيني فلوس اروح للسوك
فتح المحفظه و انطاني ٢٥ الف
- شنو هاي شتكفي
-شعندج شو الملابس ماليه الكنتور ما ملبوسه على شنو دا تشترين
- يم بنتك تنطي متحجي و لخلوص ادز كتت فلوس بس يمي اتحاسب
-ليليان احترمي نفسج لا قسما بالله اشوفج شيء ما يعجبج
شمرت الفلوس بالكاع و كتلو :- اخذها لفلوسها ما اريدها و لا تمن بيهن عليه
و هو كضبني من ايدي و لواها و صرخ بقوه :- اطرين الفلوس بوجهي **
-ما قصدي وخر بس ما اريد فلوس يلا
دفعني للسرير بقوه و هو يكول :-ويضربج وجع وبجزاة عملتج هاي يا ليليان ربع ما الج و حتى خطبه ما ترحين دشوف شلون أادبج
ما رديت عليه بس ضليت افرك بيدي اللي لواها و ابجي ، هو عافني و طلع ..
حيل ضجت منو و تضايقت شمعنى :- خلوص ينطيها مصرف و اني من طلبت ما قبل ..
گلبت وجهي عليه و ما قبلت احاجي ابد ، اجا بليل و اني نايمه يدور حق و حقوق ، طنكرت و ما اجيت وياه ابد ، انوبه عصب اكثر و يكولي :- صوجي انا الدللتج و طلعت عينج ، ولد *** كلها شايله وراكعه بيا من وراج و يصيحون جاهله لاحسه عكلو وانا كلشي ما محصل منج بس شلاع الگلب ، بس اكفيلي انا اعلمج
دار عني و نام بس اعصابو تغلي و اعصابي كذلك منو ، ثاني يوم سممني على كد ما عصبي و يزكح من يسخر و ما راضي ابد مدخل البيت انذار من ورا مزاجو
اجت هيام العصر تريد تروح للسوك فالحجيه دزت على صراع ينطيها مصرف ، عاد كالتلو هيام :- خل اخذ ليليان وياي
-لا عوفيها ما تروح العرس
-لا توكفها يخوي البنات كلهن راح يشترن و يلبسن هي هم تريد
-خليها يضربها وجع خلي تتعلم شلون تتادب
جاوبتها :- عليمن ام علي اني اصلا ما اريد اروح عاد عرس السلطان و دا احظرو
-الحجيه :- ولج انت ليش ما تعرفين تكضبين السانج يعوبه
-ما اريد يتمننون عليه تمنن و يم غيري لبيه شتريد و شتتمنى
صراع :- طايحة الحظ انا يا يوم قصرت وياج ، غيرج يتمنى العندج بس انتي مو وجه نعمه ، متعلمه ع الفگر
-الحمدلله ما عشت بفگر عند ابويه صدك ما جنا اغنياء بس ما خلانا بعازة احد و لا بعمري احتاجيت عدهم و ياريت لو ارجعلهم ولا عيشتكم الما تنطاق
حجيتها و بجيت و صعدت ، انوبه وصلت بيه يعيرني بفقر اهلي شويه و صعدت ورايا هيام تهدي بيا و تكلي كوني لبس اخذج للسوك وياي
-ما اريد اروح هيام عوفيني
-يولي من اعصابو ميعرف شيخرط عوفي و سدي اذنج عنو
-و اني عايفتو قابل شمسويتله ، خلي
-ديلا كومي حبيبه كال خل تنزل تروح وياج اوصلكم مستعجل ، ولج والله كلبو ما ينطي يزعلج بس بعد طناكرو و انت تعرفيها
كوه كوه جبرتني هيام و نزلنا يوصلنا للسوك ، بس عساني لا رحت ، ما جنت مخليه بس كريم اساس و حمره و كحل و هو ما انتبه لوجهي الا ما طلعنا و هو انجن
و نزل بالحجي : ساقطه و ما تستحين و لا عندج قطرة حيا مزوكه روحج و طالعه ادورين اليصجمج و انا هينا اشدلي كرون و انتظر مرتي كم رقم تحصل من السوك يرقموها
ويشيل بالكلنكس و يشمر و يصيح :- مسحي ما اريد ولا قطرة ** بوجهج
لما وصلنا للسوك روح روحي طالعه من صياحو نزلت و هو يصيح :- حجابج و عينج بالكاع و بلا تمضحك
و هو يحجي طبكت الباب حيل بعصبيه و كلت بنرفزه :- دنگلع
و مشيت للسوك حتى ما بقالي نفس اشتري ضليت الح على هيج خل نرجع و كافي حتى هي زهكت و كالت :- هو انا صوجي اجيت وياكم ارجع و باجر اجيب بناتي و اتسوكلهم
رجعنا للبيت صراع مموجود ، و المعزب مقرر يخلي الخطبه هينا ابيتو مو ابيت سعد ..
شكد ضجت و تضايقت ماكو سالفه ما خالها براسنه و هو متصدر كلشي عشتو عود كال انا ما اتحمل كلشي و هاي من هسه الخطبه و مصاريفها براسنا و تجي تكلو على فلوس يتمنن تمنن
لليل اني طالعه روحي و كاعده بالغرفه فات هو بلا سلام و لا كلام و العصبيه بوجهو واضحه ، بدل و جا يمي
استغربت عليه و هو فجأ يسحب اذني و يكولي :- منو الينكلع ليليان ؟ ..... يتبع
الحلقة ٩٢
تفاجئت و هو يسوي هيج يعني سمعني !
-شبيك اذني دوخر
ضربني راشدي :- احجي ولج تسدين الباب بقوه و انا احجي وياج و تكليلي انگلع ، اهلج مع الاسف شبعوج اكل بس ما شبعوج تربيه ، امج هم جانت تتجاوز على ابوج هيج ؟
يجر باذني و يصيح :- احجي والله لربيج و اعلمج الادب شلونه بنت **
راد يضرب خليت ايديه فوك راسي و كمبصت ، دفعني و ابتعد مني و كام يضرب بالغراض و يغلط و يصيح ما حجيت و لا رديت بحرف لحد ما هو تعب و ترك الغرفه و طلع، رجع ورا ساعه و حجه بصيغة امر :- تفرشين بالكاع يلا يمي ما اريد اشوف خلقتج ع السريع
نزلت بلا نقاش و فرشت و كعدت هو طفى و نام ..
ما نمت للصبح افكر و الوم بنفسي شلون غلطت و تجاوزت عليه ، بس بسببه جزعت روحي من عصبيتو
الفجر صلى و رجع لفراشو .. تسحبت من فراشي و صعدت يمو ، حظنتو من ظهرو تعدل بسرعه و كال :- كومي مني
-ما عالقصد و الله
-دكلج كومي مني ليش تضطريني للحجايه المو زينه كفيت ايدي و خفت الله بيج فبتعدي و نزلي مني و تكفي شري
- اسفه و الله
-انزلي كلت
عفتو و نزلت بفراشي ابجي ، هو ما اهتم كمل نومو
ثاني يوم صادف قبل الخطبه بيوم التمت العالم ابيتنا و خاصه بنات ام سعد و جهالهن كلهم بخويطهم
ما كلش احتكيت لو اشتغلت ما الي خلكهم بس بنات ام سعد ما صرفلهن الوضع و امهن تسولفلهن حال اخلاص،
هلكد بسمرن و حجن و غلطن و دعن، وصراع ما يحجي ويايه احس روحي عتتطلع كد ما تضايقت
فقررت لا انزل و لا اشوف اي احد، صح هو بيتي، بس ما دام ام سعد و الكل مكابلني بيه ما اطيق اشوف احد فگلت خليني معتزله احسن
بس هذا الشيء ما صار، سرعان ما تغير عقلي و تفكيري لما سمعت اهل اخلاص اجو، طلعت من الغرفه سمعت صوت اخلاص جوا تسولف و تضحك ويا الناس ،انعصر گلبي وللحظه حسيت بغربه عجيبه وكأن ما الي مهرب من هذا العالم ، كل يوم ديمر اختنك اكثر و الأيام بدت تضيق الانفاس عليه احس حالتي مثل الواكف على حد سجين شما حاول يتساير ويا ألمو و يمشي، ينجرح و يوكع و ميعرف شلون يكمل.
نزلت جوا ع السريع اجت عيني على أخلاص، هي دحكت بيه و رفعتلي حاجب مثل اللي دتكولي : لا تفرحين اني رجعت
فات صراع من يمي شكد حاقده عليه بس لان زعلت صالحها ورجعها، منهظم ويايه الموقف فرجعت الغرفتي و قفلت الباب و كلعادة ما الي غير دموعي و اني اندب حظي و اتسأل: شوكت اخلص من هالعيشه ؟
راحو للخطبه و خلصو و اني مكاني متحركت، رجع فات هو بليل على نفس الطنكوره اني هم تمددت بالكاع انطيتو ظهري و نمت.
الصبح نزل اني واعيه، سمعت صوت جوا بس مو واضح عندي فتحت الباب و نزلت، سمعت اخلاص موكفتو بالمطبخ و تحجي و تتوسل بيه و تريد خاطىو و هو يحاجيها بنبره قويه وديضبط عليها
شافني هوا عافها وطلع للكراج و هي مرت من يمي و تدعي :- الله يحفظه اليه ولا يحرمني منه
حسيت بعد ما اتحمل اكثر، شنو السويته و هيج اتعامل ؟ بس لأن گلتلو انگلع، عجل هو رايح راد هيج منج و من عشيرتج و يسب بأهلي و هم ميتين ما لازم احجي و من تطلع مني الكلمه ما انحمل
في هذا المجتمع فقط لانكِ امرأه يجب ان تتحملي
فالرجل لا يعيبه الشيء و المرأه معابة بكل شيء
تجاهلا لاحكام و اوامر الدين ، فالمجتمع الشرقي يدعي الدين و لا دين له.
اكول ما اهتم و ما ادحك و يطبه طوب ، بس ما اكدر ما بيدي من اشوف اخلاص تهتم بيه و بتفاصيلو كلبي يصير مثل حبة الحنطة و هي تنطحن بالرحى
اصير اغلي و ما اعرف شنو اسوي
شفت صبتلو غدا و تحجي و تضحك وياه و امكيجه و لابسه كلابيه برتقالي و تتبختر گبالي، كمت اداري بدمعتي من هين لهين لحتى متوكع، هو حس و مشكلتو يحس بس اه يا قساوة گلبو من يعاند ييبس راسو ما يفك و يخليني بألف اه و ويل
عفتهم و صعدت متحملت ، و الاصعب هم ما اتحمل اصعد و اصبر النار تاكل بيه، لا بيه اكعد و اتجاهلو ولا بيا اكابلو و اتحمل غيري تعتني بتفاصيلو.
نزلت ورا شويه محد بالهول رحت لغرفة الحجيه، دحگت صراع نايم، الحجيه بقت ادحك بوجهي من دخلت ، هزت راسها
-ها ليليان ؟
-ااا لا هيج ماكو شي
للعصر صراع طلع رجعت صاحتلي الحجيه و فتحت ويايه تحقيق و تسأل :- شصاير بينكم
فسولفتلها كل السالفه، اول شي كامت تلوم بيه و شلون تتجاوزين و عيب و ما يصير و بعدين كالتلي روحي اصعدي اسبحي و عدلي روحج و انا احجي وياه
حيل فرحت من كالتلي هيج و انو هي راح تحاول تخلي يلين مخو و ينهي الزعل، عدلت نفسي عل اخر حبايه و نزلت للمطبخ اسلي نفسي بالعشا و انتظرو.
لهناك فات هو من وراي راح للثلاجه يطلع ماي، اني كن طفل و ابوه زعلان و ادحك بوجهو و اتمنى الكلمه، عاد حجه و طلعت من السانو بس كلمة :- اگلاص من يمج
ما كن كال كلاص كن كال احبج .... غير هيج روحي فرفحت عليه رحت انطيتو كلاصه بسرعه ، شرب و عينو مثل الصكر ادحك بيا .. عاف البطل و طلع للهول كعد يم امو
محد جان كاعد بس الحجي و الحجيه و اخلاص فوك و ام سعد يم ابنها، فالحجيه فتحت الموضوع ويا صراع گبال الحجي
-يمه شبيك ويا مريتك
-ياهي منهن يمه ؟
-ليليان
-بيناتنا يمه انه وياها نتجازه سهمج العافيه
-يا عافيه ييمه و انت عايف البنيه تاكل بروحها عليك، كلمه و غلطت بيها ما كفرت يوليدي
زكح:- يمه سدي السالفه
- شوف يمه انه من رضيت تتزوج اخلاص حتى يصيرلك ضنى بس ما اقبل ييمه تظلم ليليان و اهي يتيمه و ما الها احد على كيفك وياها
صاح صراع بقوة :- ليليان
اجيتو من المطبخ اركض وكفت گدامو ، بعدني ما حاجيه و الحجي كال :- هي شمسويه ليليان
الحجيه :- بس كايلتلو انگلع هو ابنك ما ينحمل و يدوس بالمصارين
صراع:- ما الج علاقه يمه ادوس بمصرانها اذبحها اكتلها ما احد يدخل
حجاها وكام كضبني من حنجي وصرخ :- تتشكين مني يولي ، تريدين تنزلين هيبتي كبال اهلي و تكوليلهم تجاوزت عليه ولج والله اذبحج و اشمرج للجلاب ك****
دفعتو مني:- شبيك تخبلت دوخر مني
- ولج انا تكولين عني تخبلت بنت ***
-لا تسب اهلي افتهمت اهلي ما اسمحلك كافي ما اريد اتحمل بعد تعبت ما تريدني طلكني ارحمني لا عايفني اشوف حياتي من غيرك ولا راحمني ابيت شتريد مني.
احجي و هو ضربني راشدي و الحجي و الحجيه كاضبي و يدفعوني منه و نور و اخلاص طلعو و اني زدت بصوتي و صراخي :- ما اريدك ساعة الكشرة الشفتك بيها تعبت ، الله الفوك ينسب و ينغلط عليه و يغفر و انت دمرتني ما ترحمني تعبت منك ولك اعتقني عوفني
اني اصرخ و هو يسب و يغلط و لزمني من فوكاهم من شعري وكفخ على راسي و هم يجروني منه و يدافعولي اخرها صار الحجي بيني وبينا وخر عني و هو يسب و يغلط و دفعتني الحجيه للدرج و تكولي : صعدني يولي
اني ما بطلت صريخ بكل صوتي ما اعرف شحجي من حلات گلبي خلصتها بس صراخ و اتحسب عليهم لحد ما صعدت ، بس شصعدت نار كل البالي اكتل روحي و اخلص
جبت الطابوريه بهمه و فتح الملحق اللي مخلي بيه المسدس، فات هو عصبي ديصرخ بيه يكمل العركه، تفاجئ اني فاتحه خانتو و اطلع بسلاحو، جرني حيل و نزلني من الملحق بس السلاح جنت كاضبتو بأيدي ع السريع ابتعدت منو و اصرخ بيه
عيونو توسعت من الخوف و هو يكولي :- لا تتخبلين انطيني السلاح
-ما انطيك اموت و اخلصك مني ما اريد اعيش وياكم كافي تعبت
-اي ماشي بس انطيني السلاح ليليان
بعدت عنو و هو يتقرب و ماد ايدو:- مو لعبه هذا لا تلعبين بأعصابي ليليان انطيني
-وخر مني
دنكت اسحب اقسام بس المسدس جان صعب السحبه مالتو فصراع جان اسرع مني، بسرعه التف عليه و بلحظه خطفو من ايدي و زتو ع السرير و قيدني بثنين اديه كعدت بالكاع ارافس و أكلو :- اريد اموت ارحمني كافي اريد اموت
و هو ياخذ نفس و ما يحجي من الخوف كد ما اكل هوى من عملتي، حط راسو على راسي :- يمخبله اخذتي گلبي يولي راح نص حيلي
-وخر مني يلا وخر
-ششش كافي
بعدتو من عندي وكعدت ابجي هو تچّه ظهرو ع التخت يدحك بيه و ساكت
- اني مليت ما عاد اتحملك، كلما اكول تصير احسن تزيد.ما تنقص، ليمتى ابقى اتحملك تعبت منك
- انا جنت مقرر اليوم انهي الزعل بيناتنا و اراضيج بس انت اللي خربتي السالفه من حجيتي لأهلي، كم مره منبهج مشاكلنا ما تطلع تروحبن تكولين لأمي غلطت عليه و زعل ، هيج انت جاي تهيني جدام اهلي
-اني ما هنتك ولا حجيت لامك هي البقت تسأل شبيكم ، و بعدين عود ليش انت من تسبني و تسب اهلي ما لازم ازعل و من اغلط بكلمه وحدة تكلب الدنيا فوك راسي ، مليت من ظلمك تعبت تهين و تضرب و اني ولا شيء اسوه عندك
-بالقران غاليه بس ولج طلع ع الساني شعر وانا اكلج وكت عصبيتي اتجنبيني
-و هو منو اللي ما متجنبك انت اللي تكاون ذبان وجهك
-ليش تحسبين اغلاكي و تنسين اغلاطج عجل منو طر الفلوس بوجهي و ما قبل ياخذهم لو هاي نسيتيها ؟
-وعلى هاي گلبت الدنيا
-كافي يلا گومي غسلي
مكمت بقيت كاعده بمكاني ادردم و هو يسمع عاد هو مل كومني من مكاني و راح غسلي وجهي و دهلني للغرفه و كال :- انتظري هينا دقايق و راجعلج
اني رحت للفراش التفيت و صفنتي ويا روحي متعقده من الدنيا كلها، شويه و فات هو، كعد ع التخت تگدم باس راسي و بقى يعتذر مني و كال:- اكعدي شوفي شنو جبتلج
-ما اريد
كعدني غصب :- گلتلچ گومي بلا تفيك يلا
كعدت شفت كدامي بوكس هدايا، دحكت بيه مبتسم :-شنو هذا ؟
-افتحي حتى تعرفين شنو
فتحتو خيوط ملونه و زينه مديت طلعلي نساتل و كاكو و حلويات، بقيت امد و اطلع بالحلويات لحد ما طلعتلي علبه صغيره بيها محبس فضه بيه شذره خضره و اني جنت اتمنى اجيب منه لان اكره الذهب فبسرعه فرحت و نسيت الزعل.
يتبع
صوتوا للقصة شكد متكدرون
حتى تكون القصة الأولى على الواتباد
ادعمونا بتصويتكم
اختكم
#زينب_ماجد