ي بنات اسم البنت روعه مش سمارة الغلط من الكيبورد طلع الاسم ونا ماشفته ,,
رواية #جميلة_في_عالم_الذئاب للكاتبه هميلو
الحلقه /2
وصلنا لعند دفنو هيثم وكانت رقيه وبنتها في سيارة برا المقبرة ورقيه منهاااارة رسمي علي فقد زوجها وحبيبها ,, وروعه مش اقل منها حال كانت تبكي بعبرة لدرجة حست بقبلها بيوقف. 💔
وبعد دفنو هيثم وطلعو الرجاله كل حد في سيارته حسين ركب في سيارته وهو العيون حمر من البكا ومشا لحوش اللي فيه العيله والخيمة منصوبه والناس ملمومة وروعه وامها في حال مايعلم بيه الا ربي ,, وأول ماخشن الكل لاحظهن طول من الصبايا والعزايز ورقيه بحكم غريبه واول مرة تجيهم كانت مش عارفه شن ادير وكيف تتصرف لعند قربت منها وحده في نص عمرها واول ماقربتهن ,
.......: انتي مرت المرحوم هيثم ?
رقيه بدمووووع وعبره قالت : ا. ا. اا ايوا ,
وتحضنها الوليه حضن قوي وقعدت تبكي معاها ورقيه دموع ورعه ماسكه في بالطو امها وتبكي ولاحظت اعيال اكبر منها في العمر يشوفولها بصدمة وانبهار وهي دموع دموع ,
وبدن عيت حنه كل مرة اتجيها وحده وتضبيط وبكا وخششنها جوا وروعه مترسه في دبش امها البنت انفجعت حتي من الوضع 😒 خبر اتقول زعزاعه ركبت فيهن ,,
المهم بعد خشت رقيه لوحده من الديار وكل مرة اتجيها وحده تسلم وتعزي وهي حاضنه بنتها وتبكي وخلاص ,, والصبايا شي منعجب وشي منقهر ,, والوليه اللي جتها ونشدتها اول وحده هذي اخت هيثم اللي بعدها جا حسين ,, واسمها حليمة متجوزة وعندها ثلاث اولاد وبنت وهي الطيبه فيهن متجوزة من ولد عم بوها ,
المهم بعد ساعتين من التعب والبكا والتعزاي مر علي رقيه لاحظت وليتين مقمعزات في ركن الدار يشوفلها بتركيز ويوشوشن ورقيه التفتت علي بنتها اللي مقمعزة جنبها ومغمضة اعيونها البنت باااطله سفر وزنين وبكا فأكيد بترقد ,
سقمتها امها وخلتها ترقد اكويس وهي محتارة كيف بتتصرف عند ناس اول مرو اتجيهم.
واول ماشافت حليمة نادتها ,
رقيه : مأليش ي اختي.
حليمة جتها : نعم ي حنه ناديتيني ?
رقيه بخجل ورقه : ممكن في مكان انيم روأه فيه لانها تعبانه من السفر ,
حليمة شافت لروعه اللي وجعتها وقالت : من عيوني ,, انا قبل بنحط دبشكن في دار تحت لكن حسين اللي جابكن من المطار قالي نعطيكن الشقة اللي فوق ,, تعالي هيا ترتاحي انتي وبنيتك ومنها نفهمك علي كم حاجه هكذي ,
وفعلا صبت معاها رقيه وهي شايلة بنتها وطلعت للدروج وركبت ببنتها ومانحميلكن علي عيت حنه توشويش وتقريم في الوليه سبحان الله دوبها وصلت الوليه مازال مانفست 😒
ماعلينا ,, هذين مايتغيرن نمشو لرقيه اللي حليمة تعرفت عليها وعرفت اسمها واسم بنيتها وعرفتها علي روحها وبعد خشن للشقة عطتها مفتاح الشقة وقالت : ريتي ي حنه ,, حسين خوي , وخو هيثم الله يرحمه قالي نخليك هنا وصاكواتكن في الدار راه ,,, ارتاحي ودوشن وبكرة ان شاءالله لازم تبدي الرباط ,
رقيه بعدم فهم : رباط !? مش فاهم ,
حليمة : توا انتي مش مسلمة وتصلي زينا ?
رقيه : اكيد والهمدالله ,
حليمة بابتسامة : خلاص المرا المسلمة لما يموت زوجها لازم شرعا تمسك العده يعني اربع شهور وعشرة ايام لا تطلعي ولا تخشي مفيت للضرورة بس وتلبسي لبس معين وراسك مغطا ي حنه وبعد هالمده تفكي عادي ,
رقيه : اه اه انا مرة فهمت من شيخ جامع بروسيا درس عن الأده الشرعيه للارمله 😔
حليمة : ايوا عليك نور ,, هو كل القصة عشان لو حامل نعرفو وتقعدي رابط لعند تولدي هضا شرع مش لعب ايواه.
رقيه بابتسامة حزينة : ان شاءالله ,, ماشكر هليمة تغبتم معايا ,
حليمة : تلبك راجه ي خيه ,, صاح خوي هيثم مايجيناش من الظروف وربي يسامح من كات السبب بس في الاخير هو خونا ونحن خوته وربي يرحمه ويغفرله .جمايله مغرقه هله كلهم ونا اعتبريني خية لك راه ,
وبعد اطمنت حليمة عليهن ورقيه شافت لبنتها اللي راقده عالصالون بتعب نزلو دموعها بحزن علي زوجها ومشت لشناطيها وطلعت لبسه فستان طويل لونه رمادي ووشاح وخشت للتواليت تدوش وهي تبكي بعبرة وبعد كملت لبست وقربت من بنتها شالتها وحطتها في دار نوم وغطتها,
وطلعت قمعزت في الصاله تذكر في هيثم ودلاله وكلامه لها في اخر ايامه ,, وهي تدعي ربي يقويها علي بديره ,, او تنفذ اللي وصاها عليه هيثم ,
ومر اول يوم جاها غداها وعشاها فوق وبحكم عاد ارمله لا تطلع ولا تخش في النهار يبنها تنزل لكن رقيه قررت تقضي يومها بتلاوة القرآن زي مامتعوده ,, وبنتها معاها لا تحركت ولا نزلت للناس وعيت حنه نازلات فيها قرمة ريتن كيف كارسه لا تنزل ولا شي وخوذلكن من هالكلام 😒
ورقيه كل ليله ماترقد الا ودموعها مغرقات مخدتها وهالشي غصبن عنها ,
ومرو الايام ثقيييله وروعه بدت تمل من قعدة الشقة ياتتفرج من البلكوني او من الروشن او جنب امها ,, وفي يوم جت حليمة جايبه غدا لرقيه وبنتها ومعاها بنتها ,, واول ماخشت وسلمت ورقيه تشكر فيها ,,
روعه لاحظت بنت عمتها كانت من عمرها تقريبا بنوته ملامحها برونزيه واغيونها عسليه وشعرها عسلي وكانت تبتسم لروعه ,, فاطناتله جو بنقعد صاحبتك اللي نديرو فيه زمان نضحكو ونظرات اعيون , والبنيه اسمها حنان بنوته كويسه وهاديه وقعدت مع روعه وانسجمن لعب وضحك لدرجه بعد تنزل امها حليمة تقعد مع رقيه وروعه ,
المهم في يوم نزلت حنان ومعاها روعه يلعبن تحت ,, بحكم خفت الزحمة مفيت الاقربون ,, اللي بعد شافن روعه انعجبن بيها طول لفتهن جمالها الغربي ,
وروعه تلعب مع حنان في الحاجر كان كبير ومزروع نصه ازهار وورد , وهن يلعبن بالتراب وياشرينتي انديرو في حلويات 😁 قرب منهن مجموعة اولاد كانو في العشر سنوات و اكبر وكانو خمسه لبسهم متشرد شوي نظام متاعين المشاكل ومتختشين وحنان خافت منهم صبت نفضت ايديها ,وشافت لروعه اللي مقمعزه واتشوف للعيال عادي ,
حنان بخوف : روعه هيا نخشو ,
روعه : عليش ? خلينا نلعبو ,
حنان : بعدين نلعبو ,, هياا.
والعيال لادو بيهن زي الدائره ويشوفو لروعه بتركيز ,
العيل الاول : انتي تحكي ليبي كيفنا ?
روعه : نحكي عادي ,
العيل الثاني : مش كنتي في بلاد اجنبيه المفروض تحكي انقليزي ,
روعه صبت ونفضت ايديها وكانت اقصر وحده فيهم وقالت : عادي نحكي عربي وروسي وحاليا نتعلم في انجليزي ,,
وقعدو العيال كل واحد يحكي حاجه الا طفل واحد كان يشوفلها بقوة وقارن حواجبه وقرب منها وقال بسهوكه : حاجة والله كبيره. انتي في الاخير مش ليبيه زينا امك اجنبيه ,
روعه : وشن فيها !? ماما روسيه مسلمة ,
والعيال شهقو بصدمة وكانهم مش متوقعين المسلمين يكونو اجانب ,
فراس دف روعه من كتفها نين طاحت وقال : بعد نحكي انا انتي تصكري فمك ,, ي بنت ماما ,هه 😏
روعه وقفت بقوة ودفاته زي مادفها لكن فراس ماطاحش وقالت : معش ادفني شن تحساب روحك انت ?
حنان للعيل : فراس خطاها مادارتلك شي ,
فراس لحنان : مادخكلش ,,
وشاف لروعه اللي ملامحها زي القطه البويه تبي تهجم عليه وتخبشه ,, وابتسم وقال : انتي بتسكني معانا يعني بتسمعي الكلام والا نشبع منك طرايح ي .. ي بنوووته ماما ,
وسيبوهن وهو يضحك هو والعيال اللي معاه ,
وروعه انقهرت من اسلوبه وحنان تهدي فيها ,
وعند رقيه تحكي اخت هيثم الصغيره ومعاها مرت خوها حسين وكانت رقيه لابسه حجاب كبير وجلباب واسع ووجها علي طبيعته ومع هضا جمالها ملفت للنظر وحسين اعيونه عليها وخلاص ورقيه اعيونها عالارض ,
حليمة : ريتي ي حنه خسين حاي بيفهمك علي كم حاجه هكي قال ضروري تعرفيها ,
رقيه بصوت هادي : ان شاء الله ,,
حسين باعجاب ماقدرش يخفيه : هي لولا عزانا واحد ,, والله غالب هضا حال الدنيا كلنا ماشيين في نفس الطريق ,
رقيه : اكيد لا ااتراض علي امر الله.
حسين : هيثم الله يرحمه قبل مايتوفا اتصل بيا وقالي ان عنده كذا موضوع بيتمه واولهن رزقه اللي في ليبيا.
رقيه : انا ااارف هو همالي كول شي ,
حسين : تمام ,, وبحكم ماعنداش ولد يورث وانتي وبنته بس فاكيد نحن خوته بنورثو معاه , كل شي بشرع ربي ,
وقعد حسين يحكيلها ان هيثم مقسم كل شي وهو حي ايام مرضه وحاط لكل حد من خوته قرعته وطبعا خلطي قرعة بنته وزوجته ,, لكن شاري شقة متوسطه الحجم يعني مش كبيره ومش صغيره في موقع سكني ممتاز ومأثثه وكاتبها باسم زوجته وبنته ,, ومبلغ مالي في حساب زوجته في ليبيا ومبلغ في حساب بنته عشان يضمن ماتتشرد بعد موته ,
المهم حسين يحكي وحليمة متاثره اما زوجة حسين عيونها بيزرقن في رقيه وراجلها اللي لاحظت نظراته فيها ,, وقعدت تحرررق , وحسدت رقيه علي شقتها والورث اللي حصلاته.
حسين فهم رقيه ان هيثم بعث ملف لها لشخص في طرابلس عشان يحصللها عمل ,, وفعلا تم تعيينها في معهد لتعليم اللغه الانجليزيه ويستنو فيها تفك العدة عشان تبدا شغلها ,,
ورقيه بدن دموعها ينزلن علي زوجها اللي خايف عليهن ومأمن حياتهن حتى بعد موته ,
وحسين مد لوقيه ظرف فيه اوراق يخصن المرحوم زوجها من شهادة الوفاة وتصريح الدفن وغيره ,, واستلامته رقيه بخجل.
وبعد نزل حليمه طبطبت علي كتف رقيه وقالت : الله غالب ربي يصبرك علي فقده ,, ويقدرك علي ترباية بنتك ,
ونزلت اما زوجة حسين ةاسمها انتصار كانت تشوف لرقيه بغلللل ,, ونزلت بعد عطتها تفنيصة كان النظرات يقتلن راهي قتلتها ,,
المهم روايتي وزرقاتي راكن تنسني 😘 انحبكن نعموشاتي. Hamelo 💚
ومرو الايام علي رقيه محبوسه في الشقه فوق العيله ومعاها بنتها ويجنها الصبايا مرة مرات بالذات في العشيه يهدرزن عليها وروعه تلعب مع حنان بنت عمتها حليمة وانسجمن اخر اتسجام بالرغم من مضايقات فراس وصحابه ,
وفي مرة روعه خشت بتشرب مية لقت عزوز في المطبخ مقمعزة عالكرسي وشافت لروعه بغل ,
روعة خافت منها وقالت بصوتها الطفولي : معليش نبي كاس ميه نشرب ممكن ?
العزوز : هذي انتي ? وفي الشقة فوق مافيش اميه ?
روعه وخرت وقالت : لا في , اسفة عالازعاج.
وطلعت تجري للدروج ركبت لامها ,
طبعا العزوز هذي مرت بات هيثم ام حسين ولاقي العمام والعمات وكانت رااافضه ادير عزا هيثم عندها لكن حسين وخوته قنعهوها وحليمة , بالذات بعد علمو بحصتهم من رزق هيثم , فاظطرت اسكت قدام الناس , لكن قلبها مازال اسود ناحيته وكارهه زوجته وبنته , وهالعزوز اسمها نسيبه بضم النون 😁 ايييوا ,
وفي يوم روعه تلعب في الحاجر جتها حنان ,
حنان : روعه تمشي معايا ?
روعه : وين ?
حنان : للدكان نشرو ,
روعه : ماعنديش فلوس ,
حنان : انا معايا عطاني بوي هيا نمشو نشرو لوسي 😊
روعه : نمشي نستأذن من ماما قبل.
حنان : باه ,
وفعلا ركبت روعه لامها ةاستاذنتها ومعاها حنان ورقية تنشد وين الدكان وحنان قالتلها اخر الشارع قريب. وسمحتلهن رقيه وهي توصي فيهن ونزلن للشارع وكانن ماسكات في ايدين بعضهن ووصلن للدكان وشرن لوسي وحلوة غزل البنات وهن طالعات شافن فراس ومعاه مجموعة العيال اللي ديما معاه , ومشن عادي ولا كانه قدامهن وفراس عرضلهن وكان يضحك بخفه
حنان : فراس بعد عن طريقنا خلينا نمشو,
فراس : انتي تقدري تروحي لكن هذي لا ,
طبعا شير علي روعه ,
روعه باستغراب : لييش ?
فراس قرب منها وبضحكة ماكرة قال : لاني نبي منك شي ,
خلني نفهمكن فراس هضا شن قصته ,, طبعا يكون ولد عم روعه باته اسمه اسماعيل اصغر من هيثم بسنة بس وتجوز قبل هيثم طبعا الفترة اللي كان هيثم مازال ماارتبط برقيه ,, وفراس عمره 14 سنه يعني بينه وبين روعه ست سنوات ,
المهم روعه خافت منه وحاولت تمشي لكن فراس مسك يدها بقوة وحنان تعارك فيه.
حنان : سيبها ي فراس راهو نقول لعمي !!
فراس : تحكي حاجه نوريك ,, امشي روحي ساع تلحقك ,
وروعه خافت نادت لحنان : ماتمشيش وتخليني بروحي حنان ,
حنان : فرااااس خليها 😔
فراس بعياااط : صكري فمك وروووحي ,😡
حنان خافت وروحت تجري وروعه خااافت ,,
روعة مصبيه عالرصيف ووراها ساس وقدامها فراس والعيال معاه ويضحكو ويوشوشو لبعضهم وبدا فراس يقدم وروعه توخر وهو يقدم وهي توخر لعند انخبطت في الساس وقرب منها فراس وهمسلها : انتي كنتي عايشه برا يعني البوسه عاديه عندكم صاح ?
روعه بصدمة : شنووو ?
فراس بجراءة : نبي بوسه منك ,
روعه : انت واحد حقير ونا حنحكي لماما اللي قلته ,
فراس شدها من يدها نين قربت منه وبدن دموعها يجمعن في عيونها وقال: انتي بنت عمي ومن حقي ناخذ منك بوسه عادي , وقرب وجه بيبوسها وروعه بدون وعي تعفس علي رجله برجلها بقوة نين عيط وطلقها وقعدت تجري وهو حرش العيال اللي معاه يمسكوها وروعه تجري وهم وراها ودموعها مغطيات اعيونها وقليبها بيوقف من الخوف ,, واول ماوصلت للحوش قعدت اتعيط بقوة العيال خافو وردو وهي خشت داااهشه وواصله حدها لقت حنان تبكي عالدروج وروعه عزقتلها اللوسي والحلوة في كترها وقالتلها : ليش ماحكيتي لماما ?
حنان : خفت من فراس ,
روعه ركبت تجري للشقه وخبطت وفتحتلها امها وحضنت امها وهي تبكي وخاااايفه. وبعد ماهدتها امها حكت لامها باللي صار وامها خافت تصير مشكله وطمنت بنتها معش تطلع وتقعد جنبها ديما , وفعلا روعه معش طلعت ولا نزلت وكم مرة اتجيها حنان روعه رفضت تلعب تحت مع انها سامحتها وقعدن يلعبن في الشقه بس ,,
ومرت الايام والاسابيع والشهور وفكت رقيه عدتها ومشت كع حسين وحليمه ومرت حسين لشقتها اللي شاريها لها هيثم وكانت راااقيه وحلوة وطبعا بعد وصاهن حسين لو احتاجن شي يتصلن بيه ورقيه شكراته وروح خسين باخته وزوجته وهو عقله نشغول بارملة خوه وجمالها وشبابها الملفت للنظر ,,
ورقيه دوشت لبنتها ولبستها بيجاما النوم وطبعا كانت في غرفتين نوم بس رقيه قررت ترقد بنتها في حضنها ومعاها وفعلا بدت روعه ترقد مع امها وبعد فترة داومت رقيه في عنلها وسجلت روعه في مدرسه خاصه وكانت روعه ممتازة ومؤدبه رغم مضايقات بعض البنات او الاولاد وبالذات فراس لانهم في نفس المدرسه ,, ودايما كانت تتهرب منه ومن قربه لها , ومرت السنوات ووصلت روعه لثالثه اعدادي وكانت في نهاية السنة وترجى في النايجه وتستنى في امها قدام الندرسه , طبعا رقيه شرت سيارة وقعدت اسوق وتعتمد علي نفسها رغم المضايقات اللي تواجه فيهن بس كانت قويه في وجه المصاعب وكرست حياتها لبنتها وبس رغم الخطاب اللي يتقدمولها ,,
المهم قلنا روعه ترجا في امها قدام الندرسه مع حنان اللي كانت معاها في نفس المدرسه و ...
ان شاءالله بكرة نكملو ،،،
كاتبتكن #Hamelo ✒