قضية لم الشمل

النهاية

#الكاتبة_نهى_الحسون
#قضية_الشمل

نور
نظفت الغرفة وجهزت نفسي اليوم معزومة على الغدة
دك نقالي باوعت المتصل عناد

رديت عليه واني احط جنطتي على كتفي وبدربي باوعت لنفسي بالمرايا

.. الو هلا عناد
رديت عليه بالعجل
.. يالله طلعي انا بالباب انتظرج

.. اي هسة نازلة
طلعت وسديت باب الغرفة وبسرعة نزلت واني اعاين
منا ومنا منو موجود بالبيت بالحقيقة اني گلت لعناد
ياخذني من وكت

لان البنات البارحة اتصلوا علية وگالوا تعالي من وكت
حتى هم يالله نلحگ نكمل الترتيبات

لگيت خالة بالمطبخ سلمت عليها بالعجل
وهي ردت السلام بالگوة

گالت قبل لا اطلع .. اليوم حاولي ترجعين من وكت عندي حجي وياج
.. ان شاء الله خالة.

طلعت للباب لگيت عناد گاعد بالسيارة
ينتظر ويحجي بالنقال فتحت الباب مالت السيارة وصعدت
يمه.

باوع علية وهو يحجي بالنقال
وسوة فحص وجرد كامل لوجهي ولملابسي

سحب كلينكس من الباكيت الي گدامه وانطانياه
واشر بنظراته على شفايفي وعيوني

.. اووووف منك ترة محاطة ميك اب بس شوية كحلة على حمرة حتى فونديشن مخليت ترة حرام عليك
ترة ميصير هيج اروح ووجهي شاحب

ما رد علية بس اشرلي اصبر لان عند مكالمة مهمة
صرت انافخ بقلة صبر وهو حرك السيارة

دقايق انهى المكالمة وباوع علية وگال
.. شبي وجهج شاحب اشو شحلاتج جنج العافية اهم انا مقتنع
هو انتي المن تحطين مكياج علمودي لو علمود امة محمد يشوفونج

.. لا هذا ولا ذاك بس كل ما في الموضوع
من احط شوية مكياج بوجهي واباوع بالمرايا
احس بنفسيتي ترتاح ومعنوياتي شوية ترتفع

.. انا گايلج المكياج ولا المكياج تحطينه الي اهلاً وسهلا
بس مال تردين تحطينه بالطلعة للرايح والجاي ما ارضى

غنتبت وما رديت
عليه وطول الطريق يحاول يحجي وياي ماكو
ما رديت عليه

كلي .. كافي لاتزعلين خاف ابني يتأثر بيج ويطلع مثلج ابو طنكورة
گلبت عيوني وكلت .. مو على اساس ابوه مقصر

وصلت لبيت مهيمن ونزلت
وسديت الباب كال.. اليوم اجي عليج من وكت
.. ما اعرف احتمال ابات
.. ليش لا حتى ما اعزل البيت عليكم
.. عود كول هذا الحجي لأخوية مهيمن

دكيت الباب وطلعتلي حور. الوجه مكلوب
سلمت علية وكالت
.. همزين اجيتي بوكتج تعالي لحگي على زهرة تريد تعوف البيت وتطلع

دخلت جوة وسدت باب الشارع سمعت سيارة عناد اتحركت
وجان اشوف خالة زهرة كاعدة بالطارمة ولابسة عبايتها على راسها وتصيح والقنبلة ( TNT). بحضنها

اسمعها تكول .. انا بعد مالي كعدة بهذا البيت اريد مهيمن يجي ويلگالي حل

سلمت عليها وسألتها .. هَـا خالة خيرج شكو يا ستار على شنو تطلعين من البيت

.. ياخالة مالي كعدة بهذا البيت خلي البيت للخارمة رويمة
الفاهية
.. يااا ريم شسوت

اندك الباب وجان يدخل مهيمن وراه جلال
راجعين من الشغل هذا وكت جيتهم سلمت عليهم

شاف امه وكال .. هايمة خير شصاير
خالة زهرة كالت.. .. يا يمة مريتك ولتنا ولية الطاغين
بس انا بعد ما اسكتلها

مهيمن سأل حور وين ريم كالت
.. ريم جوة جاي تبجي
جلال .. هسة غير نفتهم شنو السالفة

مهيمن كال .. نور فوتي صحيلي ريم خلي افتهم الموضوع

تركت خالة كاعدة بالطارمة ويمها مهيمن وجلال
ودخلت للبيت لكيت ريم تبجي والعيون حمر

كلتلها .. ريم مهيمن اجة ويريدج بالطارمة

كامت من مكانها وهي تمسح بدموعها

كانت شايلة النقال بعلاكة نايلون
وجابته وياه للطارمة

مهيمن شافها وسألها .. شكو ريم شبيها امي زعلانة شنو صاير
ريم رفعت العلاكة كدامه بيها النقال وگالت
بصوت منعوص .. اني بعد ما اتحمل لهنا وحده
ذاك اليوم المكياج اتكسر وسكتت هم امك
اخذتني بالصياح وسكتت
بس مال اجي الگة النقال مشمور بالتواليت يسبح بالماي لا لهنا وكافي بعد ما اسكت

جلال سأل .. منو شمره
جاوبته ريم والدموع عشرة عشرة
.. بعد منو غيره القنبلة ابن اخوك تي ان تي

كلنا التفتنا على حسوني ابو لغود كان كاعد بحضن
خالة زهرة هو خدوده ورموشه معقوفات لازم الممية بيده ويرضع ولا جنه مسوي جريمة بگد راسه
والعركة والهوسة كله من وراه وهو ولا يمه الموضوع

جلال .. لا يالحمزة هذا المصلبخ بگد النتفة تطلع منه
هاي المصايب
خالة زهرة گالت وهي حاطه بحضنها مثل الدجاجة من تكرك
تحمي الكتاكيت نافشة ريشها بوجهم
.. يا خالة ظلم وداعتك يتبلون عليه هالمكرود
هو سودة علية بالگوة يمشي

حور جاوبتها .. اي من گد اللحم بالكوة يمشي
خالة زهرة گبت بوجهة .. تف .. تف عينج بحافرج خمسة وخميسة المايصلي عالنبي

مهيمن كللها .. يمة يعني معقولة هذا حنوش يهجم بيتي
يصير ارجع من الشغل والكة امي ومرتي متعاركات من وراه بالله كليلي شسويله

امه جاوبته.. خاب كول يالله هسة الي يسمع حجيك
ما يكول تحجي على طفل عمره سنة ونص
عبالك تحجي عن رجال جبير عليه العتب

ريم كالت .. خالة ترة ميصير هيج يعني الى متىً
تبقين هو يسوي المكسورة وانتي تكعدينه بحضنج
مثل الدخيل وتعلنين الحرب اني حتى عقاب
مثل الامهات من وراج ما اكدر اعاقبه

لا بقى عندي ميك ما كسره وسواه هريس وهاي من غير وجهه كله مشخبط
وهسة النقال.

كعدت ريم بالكاع تبجي مثل الطفلة
ام مهيمن كالت .. يروحله الف فدوة النقال
شني تردين تضربين الولد علمود الوانج ونقالج والله عمي
خوش والله اعوفلكم البيت ونطلع انا ووليدي ما نبقالكم بي
تدورون علينا ما تلكونا شني هي ولية مال غمان
ترة والله ذليتونا بس انتوا صرتوا علينا ام واب
تكعدون تمنون عليه ليش ولكم

حور .. اهوووو كلبتها زهرة روتانا سينما بعد شيخلصكم

ريم .. والله حرام عليها هي وحفيدها ضعت بينهم وضاع حقي وياهم

مهيمن كاللها .. انا اشتريلج نقال خلي يولي هذا انتي من قبل تردين تغيرينه

ريم بصوت متدلع .. اني ما مقهورة على النقال
اني ابجي عالصور الي بي

عندي كومة صور حافظتهم بي حتى هو الصلبوخ حمودي صوره من هو وصغير لحد اخر شي بعيد ميلاده
هواي صور كومة

جلال دنك عليه وشاله من حضن خالة زهرة وصار يعضعض بخدوده .. تعال ولك صلبوخ دمرت الشعب
شلون بيك دمك انهدر وين ناخذك كلها متحلفة بيك

ذاك اليوم وكعت الجاي على رجلي وحور مشكك التقارير مالت البحث وهسة خطية امك

شنو ولك ابن مهيمن دمرت الشعب بسوالفك العوجة
احلى شي بالموضوع حمودي يضحك وياه
ويدردم بكلام غير مفهوم

خالة زهرة كالت .. يالله هاك استلم هذا عمه
شيال همه اشو اول الهادين عليه

مهيمن اخذه منه وكال .. انطيني ابني وكفينا شرك
ترة انت ومرتك الي جايين ببيتنا ولازگين بينا
عود من يلفي لبيتكم ويخربه بذيج الساعة احجوا وطالبوا بحقكم من ابني

حور باوعت لريم وكالت تعالي حبيبتي ريومة گومي
لاتضوجين اني عندي الج هواي صور باللابتـُـــوب

تتذكرين من نزلتي الصور من نقالج على اللابتـُــوب مالتي
علمود تفرغين الذاكرة للصورة.

جاوبتها ريم بأمل .. اي عفية اتذكرت بس ما اتذكر نقلتهم كلهم لو نصهم
بالله شو راويني خلي اشوف شنو ناقلة من الصور

بعدين ورى ما خلصنا الغدى
كعدنا اني وريم وحور فتحت اللابتوب
وشغلته وكعدنا نگلب بالصور

واجة حمودي وكعد بحضني بكل صلافة يباوع ويانة
كنا نعاين عالصور كانت كلها ذكريات

ريم اشرت عالصورة وكالت هاي هنا اني ومهيمن بالعرس
تتذكرون بنات من شاف بدلة العرس مشخلعة كال

راح ابطل ماكو عرس گبل زفة
وخلة امه وخواله واني واحد يدعم بالثاني
حور ضحكت وكالت.. احلى شي من كام يصيح
.. ولج غضب هاي شنو لابسة

ريم برطمت شفايفها وكالت.. عابتله ما قبل يطلع بالزفة
الا واني مقبطة الفستان خرب ام الموديل

بس عليمن هذا الحجي اني ريم وداعتكم طلعت هاي السوالف كلها من عيونه خليته يكول التوبة بعد ما اعيدها

بس رحمي بحالي وتعالي يمي ترة تعبت من الشوف اريد اضوك

وصرنا نكلب بصور حمودي وهو صغير
ونور وعناد وصورهم
نور اشرت عالصورة وكالت.. هاي هنا جنت حامل
بحملي الاول الي اجهضته

ادعولي بنات كون هذا الحمل ربي يكتبه الي من نصيبي
.. امين يارب يثبته ويفرحكم بي انتي وعناد وعيالج

.. اي والله خصوصاً عيالي لان اكلوا گلبي
حور مستمرة تگلب بالصور وجان
حمودي يشوف صورة عرس جلال وحور
وصاح وهو يأشر على وجه جلال
.. چال
هذا المختصر لأسم جلال
حور .. عابتلك تعرف عمك ما تعرف عمتك
ابو المصالح

ريم ضحكت .. خطية ابني راح يصير عنده تضارب من وراح انتي وجلال
عمه وعمته اخوان ابوه متزوجين

حور ضحكت وكالت تتذكرون بنات شكل مهيمن من راد يكتب بطاقة العرس شلون داخ واحتار بإمره
شلون يكتب الكليشة مال بطاقة الدعوة

لا ومن يكول
.. كل امة محمد يعرسون لأخوهم ويفرحون بعرسه

الا انا من وصلني الدور وردت اعرس لأخوي
احس بروحي مسوي مكسورة ومستحي

خالة زهرة تكله .. يا يمة اسم الله عليك من المكسورة ليش تكول هيج

.. اي هسة كليلي شنو اكتب ببطاقة العرس
يتشرف حضرة السيد المحترم مهيمن بدعوتكم لحضور حفلة زفاف اخيه جلال على اخته حوارء

بالله كليلي شلون راح تدبر والله اصير علج بحلك اهل السوگ والناس

هو انا بعدني ما مزوج اخوي
وهذا الخبل عناد كل شوية دازلي فديو لواحد يركص بعرس اخته يكلي شفته واتذكرتك

وانا جاوبته وكلتله اكل تبن لا احلف عليك ما تشوف اختي منا لبعد اسبوع

گلي لا والله هاي هي بطلت اتوبة
بس صدك مهيمن معقولة انت ما راح تفرح بعرس اخوك وتركص بي ترة هو اخوك

ولج حور هسه العرس فضت شايلين هم لاولادج شنو يصحون مهيمن
خالو لو عمو
حور جاوبت بثقة ومسيطرة يصحولة خمو

جنا مندمجات بالسوالف ونضحك
وجان اسمع مهيمن يحجي بالنقال بصوت عالي معصب
.. انت شكاعد تمسلت شنو وين جنتوا
نايمين حلمتوا وكعدتوا تفسرونه

طلع من يمنا وجلال راح وراه وكله .. كله احنا ما عدنا حجي وياك منا لحد ما يرجع ابو سيف من السفر يالله
نكعد وياك ونحجي.

مهيمن

كاعدين بالديوان يم خالي حسن هناك وخوالي
اليوم ابو سيف وصل للبصرة بخصوص موضوع
اخت ابوي الي نزل عليها الوحي وطلعتلنا بسالفة

ان البيت الجبير الي كان عايش بي ابوي الله يرحمه
وريم
تكول هذا البيت باسم ابوي والمفروض تتوزع الحصص
علية وعلى اخوي محمد ومؤيد

مو يتوزع على اولاد مؤيد
وتأكد كلامها وتكول
(وانا عندي الطابو مالت البيت لگيته وية اوراق القديمة لابوي المرحوم البيت بأسم ابوي)

وصادف من اتصلت علينا هي واولادها جان المحامي ابو سيف مسافر للخارج علمود العلاج
يوم ثاني من اتصالها دزتلنا محامي اجاني للسوگ وانطاني ورقة بيها بلاغ وصورة للطابوا

بساعتها اتصلنا على ابو سيف وكال كل شي لا تسوون انتظروني انا اجي واحجي وياها وافهمها مو مال نقال

نور
اليوم كلنا معزومين ببيت مهيمن عالغدا
اتجمعنا اني والبنات وبطني شكبرها
شكله راح يطلع خشن على ابوه

حور اليوم عرفت بروحها حامل
كانت مأجلة فكرة الحمل لان تدرس طب
هالسنة قررت هي وجلال يسون طفل

دخلت ريم للهول وهي تعيط على حمودي
ولازمته بيدها

.. لك اني شلون بيك كلي شسوي بيك هسة
حور اخذته منها وكالت.. ديري بالج ريم ترة
فرقة التدخل السريع ست زهرة موجودة بالمطبخ لا تگوم علينا

وتلبس عبايتها وتاخذ حمودي وتطلع زعلانة من البيت
مثل ذيج المرة
وخاف ذيج الزعلة لگيتوها كاعدة يم دكان
ابو سامي تشتري لاستاذ حمودي جبس

هالمرة تلگيها زعلانة هي حمودي بمدينة بصرة لاند
كاعدة بديلاب الهوى حاطة حمودي وتنوح
بعد تعرفين زهرة من تگلبها دراما

ريم ضحكت وكالت.. اي والله صدك تسويها امج
ما استبعدها

دخلت خالة زهرة
وكالت شنو وين صاروا الولد اشو اتغدوا وطلعوا بسرعة
ما افتهمنا منهم شي وبعد ما رجعوا لحد هسة
ونوب هذا مهيمن اتصل عليه ما يرد
علية

جاوبتها.. مهيمن طلع وية عناد وجلال راح وراهم

جنا نسولف وجان يندك الجرس وراحت حور فتحت الباب
وجان يدخل جلال ببدلته العكسرية
وكال وهو يهز بيده .. فوتوا .. فوتوا دخلوا
هييي .. هييي والله يالله صدگ ناس ما عندها شغل وعمل
غير بس الحشرية والفضول

وجان يدخلون مهيمن وعناد شكولهم مكلبه
والملابس مبهذلة مبين عليهم جانوا بعركة

جلال كمل كلامه
.. يعني خلصتوا كل شغلكم وصرتوا تفترون ورة المكرود طالب تدورون وراه يعني هسة احسنلكم
هالبهذلة بالمركز شوفوا الفضول وين وصلكم

مهيمن كله بغيض .. ياكل تبن حتى يعرف انا وراه مو عباله
الماي يمشي من جواي وياخذ راحته

خالة زهرة سألتهم بفضول .. شنو يمة شصاير بيكم كلولي
مهيمن جاوبها وهو يعدل بشعره
.. ما صاير شي سلامتج هيج شغلة بيني وبين الولد

گلبت عيونها وشكلها ما عجبها الحجي
بعدها لمعت عيونها وكالت .. خالة ريمة فدوة لطولج
سويلنا جاي خلي نشربلنا ستكانة جاي تعدل راسنا

اشوهي كالت ستكان الجاي وكلهم طفروا من مكانهم
ريم اخذت ابنها وشردت تصيح
.. يبوووو صار بيها ستكان جاي

مهيمن .. لا لا يمة دخيلج
اما جلال صاح .. انجوووو بأرواحكم ياقوم الچاي
السلاحٌ الفتاك

الحلو بالموضوع كلهم يعرفون بفلم الجاي
الا عناد المكرود بقى يباوع مصفصف كلشي ما مفتهم
لا والاقوى منها يكللها
.. اي والله خالة الف رحمة على والديج من صدك مال
هسة ستكان چاي يعدل الراس

خالة زهرة لمعت عيونها وكالت .. اي والله خالة بس انت تفتهم بيهم خليك يمي اجيب الجاي واجي

مهيمن باوع لجلال وكال .. خرب بالقسمة ونوب هذا السانه
فالت اول ما يشمروله گشر موز بسرعة يزلك

مهيمن

اليوم اتصلت على المحامي الي موكلته اسيا
وطلبت منه يحضر بالديوان حتى يصير الحجي كدام الكل

وصل ابو سيف والمحامي وصل وراه بشوية
وكعد يمنا وجلال موجود

خالي حسن كان عنده علم بالموضوع ويعرف بالسالفة

ورة ما ضيفنا ابو سيف بلش يسأل المحامي وبعدها طلع نفس الورقة وعرضها على ابو سيف

وابو سيف گله .. هذا الطابو قديم وتم تسقيطه بالمحكمة
واتحول العقار من ايام الحجي ابو مؤيد
بإسم مؤيد لان هذا البيت جان حصته من ورث ابوه

وهاك هذا الطابو واخذله صورة ودزه الهم خلي بتأكدون
من المحكمة ومن رقم الطابو

ويشوفون بأسم منو لاتكعد تدور سوالف تعبانة
المثلها المفروض تكعد تحمد الله وتشكره الف مرة

صدك ناس ما يملي عينهم بس التراب
يعني جايين بكل صلافة يطالبون اولاد مهيمن بحلال ابوهم
بالرغم مؤيد جان ما مقصر وياهم وخيره كله بحلكهم هي واولادها ياما دعم مشاريع اولادها وشركاتهم بالخارج

وخيرهم كله من لحم اكتاف ابوكم وهسة الي يقهر جاية تركض وراكم تطالبكم عالبيت الي باقي من حلال ابوكم
والله شي عجيب

جلال سأله.. يعني ابو سيف هسة همة مالهم حق يمنا وشغلتنا قانونية

.. اكيد شغلتكم قانونية وما لهم اي حق يمكم هم كلهم على بعضهم كانوا عايشين هي واولادها عالة على ابوك

خالي حسن جان لازم سبحة قصيرة بيده ويگلب بيها
باوع علينا انا وجلال

والله سالفتكم انت واخوانك وية عمتك
توگف العقل والله عجيب امر الدنيا

سألته .. ليش خالي تكول هيج وين العجيب بالموضوع
گال.. عاين علية يا بعد خالك واسمع مني ا
تعرف شنو العجيب بسالفتكم

.. شنو ؟؟
.. يعني من طلعتوا عالدنيا انت واخوانك
وابوكم رجال عنده خير من الله
بس رغم الخير الي عنده

ولا واحد بيكم عاش بخيره
كل واحد منكم شاف الضيم وانكسر ظهره من الصغر
لحدما كبرتوا وما شفتوا يوم راحة يحياتكم

والهضيمة من تشوف الغربة اولاد عمتك
عايشين بخير ابوكم. ومتنعمين بي

واليقهرك من اتمرض ابوكم اتذكر عنده اولاد
وكال المهم وعرف محد راح ينفعه بشدته
غير اولاده وراح يبقون يحافظون على اسمه موجود
بالدنيا

تعرف وين العجيب بالسالفة ان
سالفة قصتكم جنها مفصلة عالعراق تفصال

كل واحد بيكم بديرة محد يعرف عن الثاني
والتم شملكم بساعة الشدة من مات ابوكم

ومن انجمعتوا جان واحدكم يجر طول والثاني يجر بالعرض محد متفاهم وية الثاني
وهسة تالي من صفيتوا وصرتوا ايد وحدة
كدرتوا تحطون حد للغريب وتعيشون بتفاهم واحدكم للثاني صار سند

مثل العراق خيره لغيره
ومن يوگع بشدة ويحتاج احد يفزعله
يتذكر اولاده يجمعهم بس بالشدات وبساحة المعارك
يصيرون ايد وحدة ويبذلون الدم والنفس في سبيل اسمه
يبقى مرفوع عالي بينهم

جان خالي يحجي وانا

باوعت لجلال وجلال عاين علية
وبعيونا اتبادلنا نظرات الوفى النظرات ابلغ من الكلام

...................
النهاية مهداة للكاتبة المبدعة نهى الحسون

لقاء الاخوة كل الحكاية
كف بكف نبقى حتى النهاية

كدجلة والفرات بشط العرب
نفيض خيرا لكل من طلب

تعال اخي ننقي نوايانا
فأحضاننا تاقت للقيانا

تعال نرفع راية العراق
ترفرف عاليا بالافاق

حط ايدك بيدي كون ننهي القضية
ايران وداعش صارت عدنا شرعية

تعال نرجع هيبة العراق القبل جان
ان مال العدل بي تنعدل كفة الميزان

صبرك علينا ياوطنا كفكف دموعك
احنا اهل الغيرة جينا نشعل شموعك

اصبر صبر دجلة والفرات عالمحنة
فاضن بدمع القهر حتى يغسلن حزنا

ترانا لخيرك يابو الخير ابد ما ناسين
وشلون جنا جوة نخلك العالي متفيين

نكعد سوة اهل وصحبة يومية ملتمين
وبحضنك ياعراقنا الغالي متخاوين

مسلمين ومسيحيين
يزيديين ومندائيين

ناكل وياهم فرد ماعون
نروحلهم وعدنا يجون

يامن تصلي راكعا في بغداد
نادي مناديا حي على الجهاد

كنائسنا قد دقت نواقيسها
انصروا مريم كذلك عيسها

موعدنا بغداد في ساحة التحرير
بشراك يا عراقنا بالنصر الكبير

بقلم الشاعرة
هدى سعد

.................

الى هنا وتنتهي رحلتنا مع قصة قضية لم الشمل
راح اشتاق لجمعتنا سوية. من نتناقش
حول البارت ولمشاركتكم ابطال قصتي بلحظات احزانهم وافراحهم

شكراً لتعاونكم معي ولتفهمكم ودعمكم لي بكل مراحل القصة
فانتظروني ان شاء الله ارجع الكم بقصة جديدة
تجمع شملنا حولها من جديد

تمت كتابة القصة بقلم نهى الحسون  تحت اشراف الدكتورة هدى سعد

النهاية
شكراً لكم
اختكم نهى الحسون