الـسـلامُ عـلـيـكـم 🌻🌼
هشاشة قلب
الـبـارت_24_
عبرات_العباديه
alabadyia_09
أَنــا لا أشـرب السـجائـر . .
ولكــٰـني أُدخّـن أصـابـعَ المُـعجـبـات . . .
ثُـم أُطفـئ أَعقاب الأصـابـع فـي وجـنـاتـهـن لـتـصــيـر َ شـامـات .
~~~~~~~~~~~~~~~~~~~~~~~~~~~~~~
ماهر . . تفاجئت ويامن تسولف وهيَ وحدهه بالغرفه !! فتحت الباب وانصدمت بالمنظر !
ثُرىٰ . . سكت وعيونه شبطت وسعهن حيل وظل يرمش وعروگ رگبته تتشنج وترجع تنفتح. چان كاف ردان قميصه وإيده بارزه .. شعر إيده كله كزبر عبالك المشهد ينعاد گدامه.
اني سكتت خفت عليه وحتى ردته مايكمل مبين مايگدر صعبه عليه بنت خالته وخطيبته جانت هيج تسوي بيه وماتخليله مكانه وتخونه !
- ماهرر
رفع إيده يريدني اسكت .. أشر على شفته وهمس بهدوء
ماهر.. اششش
جلّه صوته ووگف فرك وجهه ورفع إيده يسلم عليه
ماهر.. رايح آني مع السلامه
باوعتله بنظرات خوف وقلق
- الله وياك.
كلش خفت عليه وشكله مايروح عن بالي .. گال مااگدر بس آني لحيت.
سولفت لمروه ونهى گالت مروه :-
- اكيد خاينته
- اي مادام انصدم
مروه.. عمت عينهه ولج هوَ المثل ماهر ينخان !؟
- لو شايفه وجهه شصار بيه من سولف
مروه.. مهما يكون صعبه ع الرجال يمر بهيج موقف هالشي يخلي يحس بنقص داخله ويظل يوهوس ليش خانتني وشناقصني وشقصرت
- اي هوَ هم دوم يگول هيچ شمقصر وياهه وهيج تسوي بيه
نهى.. يختي وحده ادبسزز انتِ شايفه لبسهه من تطلع عبالك كاعدين بأمريكا وكدام ماهر كله مستر وطويل بينما من يعوفهه لحظه كله شورتات وخلع
- الله لاينطيهه ضوجت گليبي
مروه... ااامممممم
.
بالليل الساعه بـ12 نايمه بسابع نومه واتصل موبايلي فتحت تك عين وشفته المتصل هوَ .. گلبي فزز گعدت على حيلي صار شگد انتظره يتصل .
تحمحمت ورديت :-
- الوو . .
إجاني صوته مبين بيه التعب ويحچي قريب للهمس .
- الووو هلو ثُرىٰ شلونج
- هلو حبيبي شلونك
سكت ! مرت ثواني ساكت باوعت بالموبايل عبالي الاتصال انقطع .. بس مامقطوع يسمعني وبعده الخط مفتوح
- الووو
- احمم احمم وياج
- چا ماتحجي
- مصدوم ههه
- هههههه الا تركز مو گوه حچيتهه من المستحه
- لا ذبيه المستحه ردديها وكرريها مثل البلسم تنزل على قلبي تريحني وتريح أعصابي وإذا تعيديها هسه تسوين فضل چبير
- حبيبي
- اوويييللي ناويه عليه اليوم
- ههههه
- صوتج ناعس جنتي نايمه؟
- اي ماعبالي تتصل عليه جان انتظرتك
- لا لا لتنتظرين إذا تنعسين
- ماكو فرق وهسه كعدت من نومي
- اوووو متعرفين تعبريها الا تقصفين ههه نعتذر يابه
- ههههه لا شعندي غيرك اني.. اگعد عسى ما بعز نومي
- فدوه رحتلج يروح ماهر .
سكتنا اثنينا .. رجع كال :-
- من طلعت شگال اسماعيل!
- ماكال شي
- شكد فشله طلعت بدون مااسلم عليه
- لا عادي كتله إجاه إتصال وراح مالحگ يسلم عليك
- إعتذريلي منه كلش مستحي
- لا عادي
- احمم شلون صرت؟
- الحمد لله
- بعدك عصبي؟
- ثُررررىٰ رجااااءً
- لا لا بس جاي اسأل عن صحتك لااكثر
- زين اني ززززين
- تمام هاي هيه الحمد لله
- ثُرىٰ لتزعلين مني بس والله مداگدر احچي الشفته صعبه عليه ححيييل صعبه حطي نفسج بمكاني شتسوين؟
- هاا؟
- لو انتِ بمكاني شتسوين؟
- غير اعرف شنو الشفته حتى اتصرف
- اووف ثُررىٰ اوووف
همست
- اسم الله عليك من الأوووف
- محتاجج هسه يمي
- واني هياتني يمك
- لا مو بالموبايل اريد احس بدفو إيدج وانتِ تخليهه على متني .. احس بأنفاسج نتنفس نفس الهوى البغرفتنا .. ريحتج تترس الغرفه ولمسات إيديج تهدأني وتخلي الامواج مال الافكار الببالي بحالة سكوون دائم .. محتاجج من صدگ .
- نستعجل بالزواج واكمل يمك؟
- لا حيأثر عليج هالشي
- شلون؟
- يأثر اني دارس الوضع وشفته انتِ متعرفين مصلحتج اني ادرىٰ
- هاا بكيفك انتَ التشوفه صح سويه
- بس صبريني لما نتزوج لاتملين مني ثُرىٰ
- ماامل
- أحبج
رجع كررها
- أحبج وأحب خطواتج وأحب روحج كلشي بيج ينحب منين طلعتي وهزيتي الجبل
- هههه بس مو بگدي توقع حتى رزالتك جانت عندي عسل هههههه
- اووو اصلاً الرزايل كلهه حجه بس علمود احجي وياج وأقويج لااكثر .. اتندم بعد كل رزاله بس شسوي ردتج تتركين تصرفاتج الطفوليه بس مافاد تالي اني وگعت وانتِ بقيتي نفسيتج متغيرتي.
سكتت. استحي يربي شلون شأرد ؟
- وينج نمتي شنو.
- لا لا وياك
- نعستي ؟
- لا
- لا نعستي ههه دقيقه وتغفين ع الموبايل روحي نامي.
- ههههه
- تصبحين على خير يالخير كله
- وانتي بخير
ضحك بصوت عالي .
- هههههههههه لا مبين ممنعسه ابددد
- هههههه اسفه اسفه
- ههه كارثه روحي نامي يابه لابعد شويه اصير صديقتج
انحرجت حيل همست بصوت خافت.
- باي
- باي
سديته منه واني أشعر بالفشله .. ثاني يوم داومت ومااگدر اباوعله كلما اشوفه اشبع ضحك خرب حظي سويته انتي بلحظه .
مرت فتره خلصنه امتحانات نصف السنه بسلام واغلب الطلاب رسوب بمادته لان اسئلته كالعاده تكسر .. اليوم عدنه إمتحان الشهر الأول بعد نصف السنه والكل مخبوص واغلب الطلاب محضره روحهه للرسوب مأيسين يجيبون درجه .. بس اني مدري ليش متطمنه يلا غير صار خطيبي قابل يرسبني.
ولو ماهر مايتأمن ومايحب الواسطات اقره وشيصير خل يصير.
من رجعت خلصت اليوم كله قرايه حتى هوَ ماخابرني بيومهه .. رحت اني خابرته انطاني رفض .. شويه ودزلي رساله
- إقري تره الاسئله إينشتاين مايحلهه
- ييححح ليش هيج والله إحنه خطيه مانكسر خاطرك؟
- إقري يابه إقري لتشغلين بالج بيه الليله إستراحه
خوش طرده بنزاكه خل اكمل قرايه احسللي.. ظليت اقره بتركيز واني ادري بس اشوفه كلهن يتبخرن
دزيتله :-
- والله بس اشوفك المعلومات يتبخرن كما يتبخر الماء عند الغليان.
عود صايره فيزيائيه وكذا دزلي ضحكه طويله :-
- هههههههه عود صايره مدرسه .. اقري زين لاباجر تتبخرين كما يتبخر الماء
- هوَ جاي اقره امري لله
بعد مادز شي مايريد يشغلني عود مايدري اني كل موضوع اقراه لازم اتذكر بيا مكان شرحه واذا ماتذكرت امثله يلا اكدر احفظه .
ثاني يوم رحت للكليه والطلاب كلهه ملتمه عليه عبالهم عندي اسئله مايدرون بماهر يكتل روحه وماينطي سؤال.
ظليت اراجع وذني ملتمات عليه حتى الطلاب النوب يصيحون (ثُرىٰ فد سؤال !) ذوله صدگ تخبلو ماينلام ماهر من يگول مااريد احد أقاربي.
آخر شي اجاني طالب من ذوله المصكصكين وگف يمي ورافع الحاجب ويحجي من وره خشمه
- يختي تره سؤال مايكلفج شي
- شلقضيه والله ماعندي اصلاً حتى مانحچي بالدراسه
رفع حاجبه الولد ونظرات خبث بعيونه عزززا بس لا تفكيره راح .
سكتت عود ردت اكحلهه عميتهه . كال :-
- تره من تنطيني فد سؤال مراح يعرف
ضحكت مجامله بس اليشوفني يگول داگه وياه ميانه
- ههههه والله ماعندي شبيكم ماتصدگون
بهالأثناء القاعه كلهه وگفت ودخل ماهر .. عززاا خاف شافني ضحكت وي الولد ؟!
شافني لوو لا؟
واگف بباب القاعه وعاط بعلو صوته:-
- ششنننووو هاااي؟
يباوعلي مخنزر عرفته شافني من ضحكت .. جا حرام الضحك شنو.
ماهر.. شنوووو هاي الهووسسسه؟؟؟؟
الطلاب كلهه كامت تتراكض كل واحد لمكانه .. وزع الاسئله وظل يراقب ويمشي خطواته ترگع عود عصبي.
شگد ردته يجي يمي ع الأقل بس ينبهني لان كم سؤال طفيت بيهن..
الادهى من هذا اليوم نازل عليه وحي غشش القاعه كلهه أي واحد يصيحه يروحله وينبهه وحتى بيهم گاللهم طرف الاجابه عود اني هم ردته يعلمني رفعت إيدي وكتله :-
- إستاذ بس شويه من رخصتك
رفع حاجبه وقلّب عينه بهدوء ماعاجبه
- شنو ياسؤال تريدين ؟
دنگت ع الدفتر عبالك يشوفه بس ردته يجي
- بس هذا السؤال
- إي ياسؤؤؤال؟؟
باوعت بورقة الاسئله وباوعتله :-
- لا هاي هيه عرفته
زفر أنفاسه وتوتر كام يفتر يروح ويجي .. مر من يمي دنگ يريد يشوف ورقتي رأساً سديتهه ونمت عليهه نيوم وين چان من صارلي ساعه أصيح طاحت وذّره من لساني .
حظي هذا الطلاب تصيحه يروحلهم بس حظ ثُرىٰ هم يعرفه.
ظل واگف يمي وآني محنبه ع الدفتر حسيت ظله قريب مني .. إيده إنمدت ع الورقه يريد يشوف سحبتهه وغطيتهه .. همس :-
- وخري دشوفهه
رفعت راسي باوعتله وهزيت راسي بمعنى لا .. عض شفته يحذرني وخزرني .
- وينه السؤؤال ؟؟
- ماكو داعي عرفته
فاجئني ولزم ٱيدي سحبهه من فوك الدفتر إيدي رجفت وهوَ كال :-
- ثُررىٰ لتعاندين وينه
- مااريد
هد إيدي وهز راسه .
- تمام بكيفج
إستمريت احل ومن كملت كمت انطيه الورقه .. مديتهه إله .. اخذهه وطخ إصابعه بإصابعي .. شحنات سرت بجسمي كله.
طلعت من القاعه ضايجه منه وروحي طافره حچي الليل يمحيه النهار .
گعدت بالحديقه لوحدي والكآبه صعدت عندي .
اتصل موبايلي .. طلعته من الجنطه شفته هوَ المتصل.
مارديت . .
دگ مره ثانيه خليته لما يريد ينتهي الاتصال يله رديت ساكته
ماهر.. الووو ثُرىٰ وينجج دتسمعيني؟
- ها
- هااا !!! صار ساعه أتصل وتردين ها؟
- اي ها
يعني اليصيحون بإسمه شيگول؟
- وشبيج تحچين من وره خشمج
- ماحاچيه من وره خشمي
- ببااااعي لتعصبيني تره اني المفروض اعاقبج واگفه ويه الولد وتتمضحكين ماحسبتي حسابي
- إذا اضحك مو معناتهه عندي شي وياه
- ههههههههه لا والله هيَ هاي العايزه عندج شي وياه .
ردت احجي قاطعني
- سمعيييني ثُرىٰ أي طالبببب متحچين وياه انيي هنا محترگ حرگ وهيَ تريد حجه عليه
سكت شويه وأردف
- سمعتي شگلت أي طالب متحجين وياه لا زميل ولا شي فهمتينيييي؟
رديت بنتر :-
- اي
- هــه فوگاهه هيَ الزعلانه
- يلا باي عندي محاضره
- الله وياج
سديته منه روحي محترگه .. رجعت للبيت ومامقرره أصالحه بس يرزل بيه وماينتهي من عادته هاي.
سولفت للبنات نهى بقت عدنه من عهد الخطبه مال اسماعيل .. كالتلي :-
- إتصلي بيه وصالحيه لان هوَ من حقه يغار عليج
مروه.. لا لا لاتتصلين شنو ماليش تصالحيه انتِ مامسويه شي الولد حچه وياج وإبتسمتي مجامله ف لاتتصلين ولا شي فالح بس يرزل حضرته
- اي واني اشوف هيج مااتصل
مروه.. تره نهى جاي تنحاز لان يصير عمهه
نهى.. يااا عمي النوب
مروه.. اي غير عم وليد يصير عمج
ثُرىٰ.. يعني اني اصير عمتج ههههههاي
نهى.. اي عمه ههههه بس هاي العايزه اصيحلج عمه ههههه
إنتظرته يتصل شككدد بس ماإتصل !
سويت موبايلي صامت ونمت..
گعدت بـالـ4 للصلاه مال الصبح. بالعاده كلنه نصليهه بيتنه كله يصير عبالك نهار حتى امي هم تسوي ريوگ وتخلي الچاي بترمز حتى من نطلع للدوام مانتعب رواحنه .. ومرات لا تگعد تسوي ويانه .
بيه طبيعه إذا غسلت وجهي بعد ماانام يطير النعاس.
ظليت اتگلب لما مليت وسحبت موبايلي لگيته مكالمتين من عنده.
فز گلبي وظليت اتأملهن مكالمتين ! مكلف نفسه .
بعده الموبايل بإيدي واخذ بغيبته واتصل وهوَ بإيدي.
رديت رأساً إجه صوته
- الووو
- الوو
- شلونج
- الحمد لله
- گاعده شنو؟
- اي
- اگول بسرعه جاوبتي
- اي گعدنه للصلاه
- هاا .. اي ع الاقل گوليلي شلونك لو مااستاهلهه منج؟
- غير زعلانه
- ههه هوَ اصلاً منو الزعلان اني لو انتِ؟
- اني
- لا والله خاف متقبلين
- لا اقبل
- تره اني الزعلان وداحجي وياج بس انتِ حتى مكالماتي متجاوبين عليهه
- ماشفتهن جنت نايمه
- نايمه !! اني عيني مغمضت لأن محجيت وياج وانتِ ولا هامچ شي ونايمه !
- حچي الليل يمحيه النهار !
- شنو قصدج؟؟
- بالكليه ترزل بيه وتخوزر ومن تخابرني كلامك يختلف
- وليش بله كلامي يختلف؟؟ يعني مشفتج تضحكين وياه؟
- ضحكت مجامله لااكثر
- مااريد تضحكين ويه احد غيري اريد ضحكتج إلي وبس نظرات عيونج إلي لمساتج إلي كل شي بيج يخصني وحدي محد يشاركني بيه فهمتي
- اي فهمت
- صافي يااللبن؟
- اممم
- ههههه ثُرىٰ صصاااففيي؟؟؟
- اي صافي
- قاسيه شلون گلب
- ههههه لقبك هذا
- لقبي شنو؟
- ههههه لا لا ماكو شي
- اممم مطلعتلي ألقاب مو؟
- ياااء آني؟؟ فقيره اصلاً ولا مطلعتلك لقب بس هيج اكول قاسي لان ترزل بيه
- اممم أحاول اصدكچ
تصالحنه ومر كلشي بهدوء .
هاي الفتره كلهه نحضر لخطوبة إسماعيل وفرحانين .. أمي خلتنه نگلب البيت گلاب متت تعب بهالفتره.
اليوم الخطوبه واحنه مخبوصين نرتب ونحضر إشترريت فستان رصاصي من الصدر مثلث ومن ظهره هم مثلث .. وقصير للركبه .. سويت شعري كعكه وطلعت گذله وخليت مكياج يلوگ وي الفستان ولبست كعب اسود .
ماهر مايعوفني يوم اذا مايتصل بيه .. صورتله الفستان من شافه تخبل
ماهر.. ممنوع ممنوع ممنوع
- ييححح شبيه؟
- متشوفيه شلون فضيحه
- غير خطوبه وبين النسوان مااخلي احد يشوفني
- والتصوير؟
- محد تصور محلفيهن واني اراقب اذا وحده صورت
- لا ثُرررىٰ لاااا متلبسيه
- فددوه عليك الله لخاطري حباب
- چؤؤؤؤ
- ماهر فددوه والله گوه عجبني لان ذوقي صعب
- چؤؤؤ مينلبس يعني مينلبس
- وشلون هسه شألبس؟
- إلبسي أي شي.
متلبسين هذا اغااار
- ماعندي مال حفلات كلهن قديمات
- عادي إلبسي منهن
- وتقبل خطيبتك تطلع بلبس قديم
- اكيد لا مادام اني موجود ليش تلبس قديم
- جا خل ألبسه
- مااكو اني هسه اطلع اشتريلج
- لا عليمن غير اشتريت هذا
- لا متلبسيه هذا
- فدوه يعمري يگلبي
- امم هاي لان بيهه فستان اسمع كلمات حلوه
- لاا مو علمود الفستان انتَ صدگ عمري الإكتمل بيك وگلبي الي إسرته بحبك
- امم وبعد
- هاي هيه يعني مايكفيك عمري وگلبي
- تكفيني بعد روحي
همست :-
- ها ألبسه؟
- إلبسيه بس ماكو تصوير ومحد يشوفج غيري
- تشووفني؟ صددك وييين؟
- غير اجيكم ف اكيد اشوفج
- ايييي همزززين
- هههه يلا حبيبتي شغلتج باي
- باي
"وأشاح عني بِناظريَهِ مُعـاتباً لمّـا رأىٰ
حُسني بكل وقَـارُ..
و أتـاني مُسرعاً يقول تخمـري إنّي وربُ
العـالـمـيـن أغـارُ "
•••
سديته منه طايره فرح خلاني ألبسه وماكسر بخاطري.
صارت الخطوبه واجت السيارات التوصلنه لبيت العروس .. لبست عبايه وغشيت وجهي طلعت بس عيوني لان متمكيجه .
من طلعت شفت ماهر الهيبه والنزاكه فوول لابس القاط رصاصي عود منسق وياي وطاگ الربطه لون احمر يبووو يچتل .. شافني ضحك بوجهي وهز راسه برضا لان لابسه عبايه .. رحت بالسياره وي النسوان ماكدرت اصعد وياه لان اسماعيل واصدقائه وياه.
وصلنه لبيت خالتي هم عدهم معازيم وفدك طالعه تجنن بدله ومكياج وتسريحه متغير شكلهه جذرياً .. اني نزعت الصايه ومحد صورت لان منبهين .
من دخل إسماعيل لبست العبايه كلمته ترددت ببالي محد يشوفج غيري أغارر .. وهاي محد شافني غيره حتى إخوي ماخليته يشوفني لان الفستان مفضوح.
خلصت الحفله ورجعنه .. عالم مابقت بس احنه حتى تعبانين مابينه حيل ننظف .. إجه إسماعيل كال ماهر يصحيج .
باوعت لروحي استحي اطلع بهذا الفستان رحت ركض أريد أبدل ولزمتني مروه.
مروه.. ولج مخبله من عقلج تحجين المن مبدله لصخام وجهج ؟؟ فوتي للولد اطلعي بسرعه لاتخبليينيي تريد تبدل النوب بس هاي العايزه تطلعله مثل اخوه
- استحي ولج
- اششش فوتي ولا كلمه
دفعتني ع الباب وراحت .. وكفت عدلت شعري واستقاميت بوگفتي وجليت صوتي.
دگيت الباب ودخلت ..
اول ماشافني ضحك ووگف .. باوعلي بلهفه وأشرلي أجي يمه .
گعدت يمه خجلانه وأجرجر بالفستان لان نظراته إخترقتني .. نظراته متمركزه بوسط جسمي والنوب الظهر طالع والمقدمه كله طالع .
ظليت أبلع ريك بصعوبه والنفس متسارع .. اباوعله عاض شفته وخاصم عينه .. كلساع يرفع عينه يباوع بعيني ويرجع يمتع نظره.
استحيت كلش وگفت .. وهوَ صاح بصوت طلع منه لاارادي :-
- ووويييين؟
عزززا انفضحنا صخام بويهي.
رديت بإرتباك :-
- اجيبلك ماي ماضيفوك
- مااريد مااريد تعالي گعدي
- هااا اي اجيت
رجعت گعدت يمه واني حاسني گلبي مايعبر هالمره بسلام.
ظل يباوع بلهفه .. مد إيده لزم إيدي بهددوء حطهه براحة إيده .. حاوط إيدي بإيديه الاثنين حسيت بدفو جسمه وحرارته من خلال لمساته .
عيونه ذبلت وتركزت على شفتي .. احس روحي عرگت وإيديه ترجف .
همس بذوبان :-
- اهدي
انفاسي تتسارع وعضلات صدري ترتفع وتنخفض
تقرب مني حيل .. أنفاسه أختلطت بأنفاسي ومرجي گصته على گصتي .. جسمي تشنج وكل خليه بيه تكهربت.
تقرب يريد يلتهم شفافي .. واندگ الباب .
اني طفرت وإبتعدت مخبوصه .. ضرب بقوه على فخده وعض شفته متحسف .
ظليت اهفي على وجهي وانخبصت خبص .. اهمس وي روحي شأسوي يربي
ضحك وحط إيده على ظهري سحبني لحضنه تجمدت وصرت مثل الصنم .. رفعت راسي عليه لگيته يباوعلي .. باوع بعيوني وهمس :-
- إهدي يابه إهدي اششش لتتحركين
سكتت وبس صوت أنفاسي مسموع. احس نار تطلع من وجهي .. گام فتح الباب واني وگفت .. طلعت نهى بالباب تريده علمود يوصل حسوني لاإبوه.
إلتفت عليه رفع إيده سلم وودعني .. راح ودخلت نهى ركض .
نهى.. شبيج ولج خدودج حمر والوجه أصفر والارتباك مبين .. احممممممم
- وخري عني وخرري خرب حظج
- خرب حظي؟؟ يعني خربت اللحظه مو؟
- اشش فضحتيني
- هاي هيه سكتنه سكتنه
ظلت تضحك وكلما تصير عيني بعينهه ترگعني بغمزه .
گعدت بالمطبخ وامي ونهى ومروه يسولفن اني أگشر بالبتيته وهنه كل وحده بإيدهه شغله .
صافنه وسمعت أمي تكللهه بإيران .. إجت أبوذيه حافظتهه على بالي رأساً طفرت حچيت المقطعين الاخيرات منهه
- بيران .. أحلفك بالرضا المدفون .. بإيران
تحبني صدك لو تضحك عليه .
امي مباشرةً طفرت عليه وفتحت إيديهه إثنينهن
- يحبج يمه يحبجججج
اخواتي شبعن ضحك وأني وجهي صار احمر من الفشله ادري متوازيه لخاطر الله ومنا امي صايره تقصف بيه .
نهى لگتهه حجه بحجتين منا لاگفتني وجهي احمر ومنا الابوذيه كملت الحسبه .
غمزتلي وهمست
نهى.. بإيران
مروه.. ههههه هسه لو مطيتنه الابوذيه كلهه بيهه خير
نهى.. بله شنيه الابوذيه بشرفج اشعريلنه
أخذت دور الشاعر وظليت اشعرلهن . اني أحب الشعر من زمان ودوم أتخيل روحي شاعره واوگف ع المرايه افتح شعري وأظل أشعر وياخذني الواهس ..
- اريد احفر بوسط گلبي .. بيران
وعلى كل دموع العين .. بيران
أحلفك بالرضا المدفون .. بإيران
تحبني صدگ لو تضحك عليه
نهى.. ههههه عن استفاد ماهر مرتك شاعره طلعت
- هههه هسه عوفينه من الفشله بس شنو موضوع إيران؟
نهى.. نريد نشتري نيشانج من إيران ودافكر اگول لاامي حتى تحجي وياج وانتِ تزرگينه بصاروخ لماهر
- خاف مايرضه؟
نهى.. لا ليش يرضه بس احچي وياه انتِ
- انييي؟؟
نهى... جا جدي طبعاً انتِ
- ها اي احجي وياه اليوم
نهى.. خوش لان ليد گال نروح سفره هم نتونس وهم تتسوكين ويانه
- ماشي
بالليل من خابرني ظليت متردده خاف مايقبل ..
- هلو حبيبتي شلونج
- الحمد لله وانتَ
- زين .. اويلي ينهى بس كون ألزمهه اخخخ لج ضاربني الجفاف صار شكدد مالگت وقت تدك الباب غير بهالوقت خرب حظي خررب حظظي
- هههه اهدأ
- لج شأهدأ واني عايف جمال روما كله وجاي مگابل حايط الغرفه ويني وين الهددوء
- ههههه
سكتنه ولگيتهه فرصه احچي وياه .. بس ظليت محتاره شلون اگله خاف مايقبل ويعصب..
اخر شي تشجعت وگتله :
- ماهر .. البنات إقترحن عليه اشتري نيشاني من إيران لان بضاعتهم حلوه وأصليه شنو رأيك أروح؟
رأساً إنتفض
- شنو شنو شنووو؟؟؟
- اشتري نيشاني من إيران
- هههههه تتشاقين اكيد
- لا مااتشاقه
- ليش من أيران ؟ وشبيهه بغداد مثلاً
- مو نهى ووليد يريدون يروحون يتونسون وگالت ناخذج ويانه اشتري مناك
- تنسين هالموضوع وتشيليه من بالج نهااااائياااً
- بـس... (قاطعني)
- نهاااائياً ثُرررىٰ نهاااائياً
- ماهر ...
(قاطعني)
- ثُرىٰ اعرف ليش دتلحييين .. واعرف شلون إلتقيتي وياه .. الموجز كله عندي ف لتفكرين مجرد تفكير اخليج توصلين لاإيران
- شنو قصدك؟
- تعرفيه لقصدي شنو
- إذا قصدك أركان ف انتَ غلطان لان لو أريد وافقت عليه من البدايه و......
- لتذككرررين اسمه مقااابيلي
- لا اذكره انتَ جاي تشك بيه؟؟
- مداشك اني
- لا تشك
- لو أشك بيج جان صدگت كلام جنات بس گولي أغااااااررر
- تگدر توصلهه إليه بغير إسلوب وبغير صيغه بس واضحه نيتك شنو
- اني مو قصدي اشكك من ثقتي بيج
- تمام فهمت
- ثُررررىٰ شبيج لتزعلين
- لا ماازعل بس امي تصيحني ..
- تمام براحتج باي
سديته منه لسببين اولاً قهرني كلامه وثانياً مااريد اجادله وهوَ عصبي .. دوم امي تگللنه المره إذا راددت الرجال وهوَ عصبي تقل معزتهه ويظل الكلام بباله .
إتخذت وسيلة الصمت احسن شي بس هوَ يفيد وياه .عود من يهدأ احچي وياه .
ثاني يوم گالتلي نهى على الموضوع وسديته .
نهى.. اگلج اريد اروح للسوگ نشتري ملابس لحسوني تعالن وياي
مروه.. اني مااروح عندي تحاضير وإمتحانات وشايب راسي
نهى.. انتِ ثرااوي فدوه روحي وياي استحي اني
- اي عادي اروح ميخالف
نهى.. ايييي هاي الاخت مو بعض الناس .. تصير الساعه بالـ4 كون انتِ جاهزه حتى مانتأخر لان وليد يجي يوصلنه بسرعه ويرجع
- اي خوش
حضرت ملابسي مانتو جوه الركبه وبنطرون كابوي.. سويت قناع لوجهي وترتبت بحيث صارت الساعه 4 اني كملت.
نهى هم بدلت إلهه ولحسوني .. اجانه وليد وصعدنه .. اول ماصعدت وليد گصني گص ويخوزر بيه بالمرايه رافع حاجبه .
ياااا شبيه هذا ؟
آخر شي گال :-
وليد.. ثُرىٰ عمي يعرف بيج طالعه ويانه؟؟
من گاللي هيج عبالك ضربني راشدي صحاني على زماني .. ياصخام يالطام اني ماگايلتله واصلاً نسيت وراي زلمه يحاسبني ومدري يقبل مدري لا .
لا والادهىٰ من هذا كله گتله بإرتباك :-
- اي اي يدري
حچه بس عبالك مثل الينتر
- وعمي يعرف بلبسج هذا؟؟
باوعت على لبسي وباوعت لگدامي .. شبيه لبسي عريض اصلاً.
- وليد ليش تلح غير گتلك يعرف
وليد.. اگول مو استغربت لان عمي ماهر ابدد ميقبل مره تطلع للسوگ
نهى.. يااا وحد شنو؟
وليد.. اي هوَ طبعه هذا ميقبل
نهى.. ليش غير دوم نروح وويانه وموج من نفتر
وليد.. اي الفره غير هاي لان يونسكم مو تتسوگين وتاخذين وتنطين وي ابو المحل لا يتخبل.
همه يسولفون وآني وصل خيالي چنّ لازمني ولازمله صونده ويكتل بيه . عززا اني شلون ماگتله .. ولو غير بعده عصبي حتى بعدني ماهدأته
ظليت قلقانه وعيوني كلهه خوف.. نهى لاحظت عليه هالشي من نزلنه سألتني
نهى.. ماگايلتله مو؟
- اي صخام بوجهي
نهى.. إكليهه بخاشوگه
- كله من وراج تجيبين عرابيد وتذبين عليه مثل صگر إفيلح
نهى.. يا يا واني شدراني ماتگولين لماهر موديه عليج حظ مصخم
- لا والله فوگاهه هاي بدل ماتشكريني
نهى.. مدري شمسويتلي واشكرج تهي بهي.
وليد طول بالسياره يلا نزل عرفته دزله الخبر بصاروخ .
مشه الوقت وظلو نهى ووليد يشترون واني وياهم لازمه گلبي بإيدي.. ادري شنو موقعي من الاعراب مره ورجال جايين يشترون لاابنهم ملابس اني شكو..
المن اجيت ياربي المن.
بعدني اسولف بگلبي ودگ موبايلي .. رفعته اشوف الاسم وشفته ماهر .
يتبع..
عـبـرات الـعـبـادي🌻🌼
alabadyia_09
الي ماتگدر تعلق أثناء غياب النت .. تطفي الشبكه وتعلق ومن يجي النت يوصلن .