ابي والغزلان

البارت التاسع والعشرون

ابي والغزلان
للكاتبة Reem
البارت التاسع والعشرون

تعبني الصبر ...
والحزن بيه جبال
وجبال الحزن بالروح منغرسه
طايح من أمس لليوم ...
وعيون الشماته بحالي متونسه
أوديلك جرح ...
ما نزف دم والله
ظل ينزف صبر حد ماكطع نفسه

سليل : هنا من كميت العياط والقهر والبجي فقدت اعصابي لأول مره وعطت على عمو وكتله انت مو بجيت من عافتك امك مو عيطت وكسرت الباب ليش تحاسبني وانت اجبن مني
محسيت غير يضربني راشدي فر وجهي
بذيج اللحظه يله انتبهت شحجيت عافني وطلع سحبتني عمه نهر هي وبيبي ودخلوني ليجوه كعدت بلكاع بس ابجي وعمه نهر تواسي بيه شتواسي واني روحي مذبوحه
حسيت بوسه تطبع على خدي من رشا والخد الثاني ريم باسني وخرن مني يخافن اخاف اعيط لو اسوي شى بس من باوعت عليهن شون يبجن وخايفت سحبتهن لحضني وابجي بحضنهم واسمع ريم تكول لتضوجين ثلل ترجع ماما راحت اجيبلنا العاب

سليل : ااااخ بيه صرخه تهز الدنيا هز
نهر : هاج بنتي اشربي ليروح گلبي يوكف من الشوطه
اخذت الكلاص وشربت جان بيبي تجيب مي ورد وتذبه بوجهي فزيت اباوع عليها تقرا ايات وتذبه عليه
ريم : بيبي مطيبه ريحته بجامتي راح تتوصخ
ام سندس : اسكتي يمه غير اختج شاطت لتروح تنجبس
سليل : باوعت عليهم كلهم خايفين علية والكل ينتظر كلمة مني كمت وعفتهم ودخلت للغرفه تمددت وغطيت راسي قابل وين اروح هذا مهربي قبل السطح جان مكاني وراحتي والبيت كله احترك هسه ماعندي غير اغطي راسي وابجي
بقيت اليوم كله بدون اكل وشرب حتى مطلعت وتحول اول يوم عيد اسود علينا خواتي ميعرفن شديصير عبالهم ماما كم يوم وترجع مهتمن وبدلت الهن عمه نهر كل وحده تنوره وبلوز مثل القاط جان شتا بارده وكلاو وجفوف ملابس العيد الي ماما قشمرتنا بيهم حتى نفرح بيهم وننساها زين اذا ريم ورشا نسو ومحسو اني شون انسى
خلص اول يوم وجر الثاني والثالث واني ساكته بس اكل كم لكمه وارجع للغرفه حتى غزل مهتميت بيها بيبي وعمه خطيه حارت بلبنات
ثالث يوم العيد العصر سمعت صوته جنت اكثر واحد شايله همه هو عمو سجاد شون اواجهه بعد الكلته طلعت بهدوء لكيته باب البيت واكف ويه عمه نهر مشتري غراض وانطاها الهم باوعت عليه وكتله بهدوء وخجل من الي سويته
شونك عمو
مجاوبني رجعت عدتها شونك عمو سجاد باوع بنظره يريد ياكلني خفت منه حيل وعرفت الي سويته شى كولش جبير اكثر من الي توقعته تجاهلني وبقى يسولف ويه عمه نهر ديروح وكتله
العفو عمو مو قصدي

نهر : شبيك سجاد مو كعد تحاجيك سليل
سجاد :مااريد اسمع صوتها وكوليلها خلي اطب مااريد اشوف وجهه لتخليني احلف يمين حتى جيه للهنا مااجي اني جاي علمود خواتها لتشوفني وجهه
سليل : تقربت منه وكتله بس عمو اسمعلي جان يقاطعني بعيطه خلتني اجفل وارجع ليوره من الخوف
طبي جوه داكولج من تتعلمين الاحترام بذاك الوكت احتمال اسمعلج اما هسه كلمة منج اطيح حظج
طبيت اركض واكيد بجيت يلام عمو من يسميني ام دميعه حيل انقهرت منه متوقعت هيج ضايج مني

نهر : ليش هيج سجاد تتعامل ويه سليل مرات احسك جاف حيل وياها وبنتره والله مرات اتخيلك من الاعصاب تريد تضربها
عكس خواتها رغم وكاحتهن تتعامل بلين وذاك اليوم الخفت منه صار وضربتها
ومعاتبتك
لان الوضع جان متأزم
سجاد : لازم اتعامل هيج وياها اريد اربيلها گلب
نهر : شنو يعني
سجاد : سليل صغيره بس حامله مسؤوليه ٣ بنات وهذا الشى اكو رياجيل ميكدرون يحملوه تعرفين شنو معنى بنيه عمرها ١٤ سنه مسؤوله عن بنات كارثه نهر تعرفين شنو معنى كارثه
نهر : احنا مو موجودين لو تعبت منهم احجي كول حقك اذا تعبت
سجاد : اكولج من احجي وياج فرزني الحجي زين مناقصني غباء اني كلت تعبت حجيت وبشنو اتعب قابل شايلهن على راسي وافتر بيهن بلشارع
نهر : هسه ليش تعيط شكد عصبي
سجاد : مو كلامج مستفز ركزي وياي من احجي
نهر : يله ركزت كمل

سجاد : الي قصدته سليل هسه ام الهن ومسؤوله عنهن اني او حتى انتي منعرف العمر شنو يجوز باجر نموت ومنصبح شون بوكتها منو الهن اريدها تصير قويه سباعيه اكثر واهم شى جريئه وتاخذ حقها من اكبر واحد
نهر : بس هي سباعيه مشفتها شون طبت ونقذت خواتها
سجاد : الي جايها اكثر من النار الي اكلت بيتهم من يوم مطبت بنص النار وطلعت خواتها رغم الي بعمرها من جويه شخاطه تنام فراش اله هي طبت بنص نار محد كدر يطب بيها وطلعت اخواتها من ذاك اليوم واني كلت هاي بطله وتحب خواتها لدرجه فدتهم بروحها بدون حتى متفكر بروحها لهذا اني اخاف عليها تدرين اكو نار اعظم من نار بيتهم جايها بلطريق
نهر : ياستار يانار
سجاد : نار الدنيا

نار اذا موكفت بوجهه راح تحترك هي وخواتها حالياً هي لا اب ولا ام وذني بنات لو ولد حتى لو يتربون بلشارع ويطلعون ساقطين يبقون ولد بس ذني بنات وحده منهن اذا سوت شى موزين انتهت سمعتهن كلهن وخاصه الي بلا ام وبلا اب ولا جبير فوك راسها تكدر كولشي تسوي وخواتها وكحات وجريئات اذا مو من هسه اتضبهن وتعلمهن الصح من الغلط راح يفلتن لهذا لازم اقسى عليها حتى تعرف تتصرف هي تبجي على كولشي اني ماانكر انقهر عليها وما الومها تبقى طفله مشافت شى من حياتها بس هذا حظها وقدرها ولازم تبقى قويه للاخير اني دااربي سليل على القوه وتحمل المسؤوليه وقصدت مو الطبخ والتنظيف وهاي السوالف قصدي تكون نبهه اكثر وسريعه الاستجابه بلتصرف من تصير مصيبه وتعرف شون تاخذ حقها متبقى بس تبجي ويضيع كلشي منها قسوتي ميفيده الها وحتى تكدر مستقبلاً تسيطر على خواتها لتنسين ذني جهال ويوميه مسويات مصيبه من يكبرن شيسون وماكو رداد الهن اذا امها عافتها رادت تهج بلشارع لو شغله ثانيه تخص خواتها شسوي تحرك روحها لازم متنهار على كلشي

نهر : والله صح كلامك بس مو بيدي گلبي ينمرد عليها من تبجي وانت جنت قاسي وياها
سجاد : هي تجاوزت ولازم تعرف غلطها وتبجي مني وتتعلم احسن ما تبجيها دنيتها وتخسرها نفسها وخواتها روحي عليها وطيبي خاطرها
نهر : ليش متدخل انت تحاجيها وتراضيها
سجاد : اكولها ثور تكولي حلبه ولج شون شون اراضيها واني هسه عايط بيها وكتلها مااريد اشوف وجهج حتى مره ثانيه تصير اركز وتعرف تتصرف نهر اذا ابقى دقيقه بعد انجلط من سوالفج خلي اروح اكمل كم شغله احسنلي

نهر : روح الله وياك انت بس تعيط اااخ منك شكد عصبي
سجاد : والله انتن النسوان تخلن اكبر واحد مخبل
نهر : بس صدك هي شنو قصدها جنت تبجي على امك مفهمت سليل شتقصد ومسألتها لان حابسه روحها بلغرفه
سجاد : مالج دخل واني الها اله اخليها توب تفقد اعصابها هيج
نهر : فدوه هله هله بيها هاي بت طه
سجاد : شبيج قابل ذابحها لتخافين اني اكثر واحد حريص عليها
نهر : والله اعرف يله عيني مااخرك الله وياك

سليل : دخلت عمه وكعدت بصفي باستني من راسي
كافي گلبي لتبجين والله عمو يحبج
سليل : بس زعلان مني
نهر : انتي هم تجاوزتي عليه صدك شنو قصدج جنت تبجي مدري شنو حتى مفهمت شحجيتلي بلحظتها
سليل : هااا سكتت خفت اكول لعمه نهر وتكوله ويطيح حظي بلزايد اصلاً اني هسه حايره شلون اصالحه
نهر : كومي بنتي مو العيد خلص وانتي مافتهمتي شى منه
سليل : الي مثلي ياعمه حتى فرحه العيد ممنوعه عليها الي مثلي بس هذا الي تحصله ومسحت عيني والدمع صار بيدي وكتلها هذا شفتي بس الدمع اما العيد اعوفه لأهله اني مو منهم

نهر : كافي ولج تكول عجوز وكاعده يمي كل عمرج ١٤ سنه وهذا تفكيرج
سليل : القهر الشفته يعادل ٧٠ سنه
نهر : كافي بداعة ابوج بداعة طه كافي والله گلبي ممرود وحايره شلون اساعدج
سليل : كولشي مااريد عمه بس لتعوفيني مثل ماما
نهر : من كل عقلج اعوفج لتخافين انتي بنتي ومااعوفج للموت
باستني وطلعت بيومها بقيت الليل كله افكر بعمو شلون اصالحه تعبت واخاف اني متعبانه حتى تكمل

فاتت اكثر من ١٠ ايام ومشفته لعمو وماما هم مبينت ورجعنا لدوامنا طبيعي حاولت ابين قويه كدام خواتي وحتى هنه مسألن عنها كل اعتقادهم ترجع وتجيب العاب حتى حسام ناقلته لغير مدرسه حياه الكل احسها طبيعيه اله اني بلنهار اركض مدرسه والبنات واساعد بيبي بس الليل اااااخ منه يهيج كولش مأذيني ابقى كاعده بلطرمه (الكراج ) واباوع للسما جان نهايه شباط وبارده كولش ومطر تنكط جنت مااحس بلبروده لان روحي محتركه
بعد هاي المده بيوم جمعه نايمين خطيه بيبي متكعدنا الجمعه تكول نامي اشبعي نوم لان اتعب طول الاسبوع سمعت صوتها مردت افتح عيوني بس اسمعها شون تبوس بغزل وريم ورشا لان اربعتنا نايمات بغرفه وحده كامن من النوم يعيطن مكيفات عبالهن رجعت جان اسمعها تكول كومي ماما سليل عبالج ماادري كاعده كعدت يم راسي باستني وحطت ايدها على راسي وخرت ايدها وغطيت راسي مااريد اشوفها مااريد
جان توخر الغطا وتكولي

سندس : الى متى تبقين هيج عنوديه جنج ابوج نفس الراس اليابس توقعت تشتاقيلي وتشمرين نفسج بحضني واني اكول هسه بنتي حبيبتي تستقبلني بلصلوات
سليل : متحملت كلامها كمت كعدت وكتلها بعياط اني مو كتلج اذا تزوجتي ماعندي ام روحي لبيتج ورجلج المن جايه امشي اطلعي بره
جان تكوم توكف
سندس : اسمعي لج لتشوفيني احجي وياج بلين وهدوء واكول خطيه وبتي ومقهوره بس اذا تجاوزتي بلقندره ادوسج باوعت عليها شون متغيره وميشه شعرها (صابغه شعرها) والكذله القاتله مالتها وتارسه روحها ذهب وتنوره كصيره نص الرگبه وقميص مشجر وحمره حمره حايره شمسويه بروحها
كتلها عفيه عوفيني بحالي اذا جايه على امج وبناتج هياتهم موجودين اما اني انسيني
سندس : بعدين احاسبج بعيني
عافتني وطلعت اسمع صوت البنات مكيفات بالالعاب والملابس الي جابتهم وحسام يحجيلهن على البيت الكاعد بيه شون حلو وجبير وبيه حديقه جبيره وعنده العاب هوايه خلاهن صافنات شنو الي ديصير عاطت بيه ماما وسكتته باوع عليه باسني ورجع يم ماما

طلعت من الغرفه وكعدت على صفحه واشوف غزل بحضنها وريم ورشا منا ومنا وحايره شجايبه اشكال العلاليك ملابس واكل وبيبي مثلي مگلوبه خلقتها ولا حجت وياها اخذت سجادتها وسبحتها وطبت من فرحه البنات بالالعاب والملابس حتى متريكو ساعه بلوحده الظهر
جابت اكل سفري وكعدو يتغدون سوه صاحتني حتى مجاوبتها وطبيت للغرفه وبيبي هم مأكلت ومن راحت كالت للبنات عندي شغل لازم اروح حتى من اجي اجيب بعد العاب وحلويات الكم ولان صغار وكل همهم اللعب والاكل صدكوها شفتها عافت فلوس على التلفزيون وراحت
تمنيت اكدر اشغل او عندي فلوس جان شمرتهن بوجهه واطردها تمنيت اكبر واشتغل وارجع كل فلس راح تصرفه علينا لو عدنا ولا اخليها تدفع فلس بس منين انجيب اذا حتى بيبي كوه تخبز وعمه نهر كوه مدبره العيشه وامرها بيد رجلها اما عمو سجاد خلف الله علية حامل همنا ويركض منا ومنا

شويه وانفتحت الباب وطبت بيبي بيدها صينيه بيها شوربه عدس بكاسه وبصفها خبز وكالت
ام سندس : تعالي يمه اكلي ويايه ولا تضوجين تروحلج فدوة سندس لدموعج
سليل : اخذت الصينيه وحطيتها بلكاع وبست ايدها تعالي اكلي ويايه بيبي
ام سندس : يله ناكل سوه تمنيت امي نفس حنيت امها جان صرت اسعد البنات والله راضيه بلقليل بس كون امي يمي وتحبني

يوم بعد يوم واني حاسه الخنكه تسد نفسي شى ناقصني اعرف امي راحت وهذا الشى كافي يدمرني بس احس روحي تايهه مااحس بالامان ادور عليه وهو ماكو ومن اسأل البنات يكولن يجينا للمدرسه ويسأل الست علينا وفرحان لان اوائل
زين معقوله هيج كارهني وضايج مني
تمنيت يجي حتى بس احجي وياه وافهمه ماكو كطع وشهر ونص وهو ماكو كمت ادور عليه بعيون خواتي احس بألم قوي شون قهرته مني
بيوم اجت ريم تكمز واخذت كتاب العلوم من الغرفه وطلعت
سليل : وين رايحه
ريم : عمو سجاد بره والست رادت اعمال من عدنا ام العلوم وكال جيبيلي خلي اشوف الاعمال حتى يسويها اليه
سليل : يعني هو بره
ريم : اي بلباب
سليل : طلعت اركض اريد بس الزمه وصلت يمه مبتسمه وفرحانه لان شفته وكتله شونك عمو
سجاد : يله ريم ادخلي من اكمل الشغل اني اودي للمدرسه
سليل : بعدك زعلان مني
مجاوبني ومستمر يسولف ويه ريم دمعت عيني انتبهت ريم عليه جان تكوله
ريم : عمو ثلل راح تبجي
سجاد : وبجيتهم
عافني وراح شكد انقهرت ردت اركض للشارع وراه بس اعتذر منه حيل بيومها تندمت لان جرحته
ريم : شبيه عمو وياج
سليل : مابيه تعالي طبي
بقت متأذايه وابجي ولليل صخنت من القهره ولان يتجاهلني كولش اذاني من اتذكر شكله من يدير وجهه مني اموت قهر وحتى للمدرسه مداومت بقيت نايمه بفراشي وبيبي حارت بلبنات الصبح وغزل نايمه

اجت بيبي الصبح تقيس حرارتي بيدها اخاف بعدني مصخنه شافتني فاكه احسن
كالت رايحه تودي خبز للجيران
ساعه ١٠ اندكت الباب كمت على كيفي توقعت لو بيبي لو عمه لان البنات بلمدرسه
فتحته جان يصير بوجهي متوقعت اشوفه
رجفت واني بعدها يمكن الصخونه بيه
جان يكولي بنبره حاده
سجاد : ليش ممداومه
سليل : طبيت للهول وهو دخل ورايه وسد الباب ويحجي من وره خشمه
سجاد : هاااا هم كولي بطلت ومااداوم
سليل : منين عرفت ممداومه
سجاد : رحت لمدرسه ريم وديت الاعمال وسألتها وكالت مصخنه ومداومت
سليل : شفت عمو مصخنه مو مبطله
سجاد : وشون صرتي هسه
سليل : دنجت موزينه
سجاد : اوديج للطبيب
سليل : لا اريدك تسامحني يحجي وميباوع بوجهي ورث جكاره ودار وجهه واحسه نار مني
عمو عمو سجاد

سليل : تقربت منه ردت بس يباوع بوجهي ابد والجكاره بحلكة وصاير اعصاب اعرف غلطت بحقه بس والله مجنت واعيه عاقبني هوايه كولش اياام واسابيع وبعد مكعد اتحمل عقوبته وقسوته اقسى انواع العقاب هو التجاهل تقربت اكثر وهمست
عمو والله اعتذر دمعت عيني جان يندار عليه ويكولي بنبره غضب بس بصوت خافت احس مثل البركان كعد يثور شوي شوي وگلي

سجاد : حجيتلج الي متجرأت بيوم احجي ويه روحي وتوقعت سمعتي ونسيتي بس الغلط مني اني ما أمن بجنس حوا وكلت انتي طفله بعدج ممتعلمه شنو معنى الغدر بعدج نقيه مملوثتها الدنيا بس طلعت غلطان بأول موقف عيرتيني
سليل : نزلت دمعتي وبحركه لا اراديه من كثر ممقهوره اريد بس اراضي لزمت ايده بأثنين ايديه وكتله
توقعت تفهمني لان مريت مثلي جان يعت (يسحب) ايده مني بقوه وشمر الجكاره بلنفاضه اليمه وعاط
سجاد : لتعيدين الموضوع لو اله اكسر سنونج بحلكج يله تنسين وتسكتين
سليل : بس اسمعني عمو
سجاد : مااسمع وراد يطلع ركضت وكفت كباله صرت على الباب مااريده يروح بدون ميفهمني احجي واشهك

عمو والله مو قصدي اعيد الموضوع بس اني انكسرت والله انكسرت محد حاس بيه انحكم علية مااعيش طفوله مثل البنات وكلت ميخالف الصار صار وخسارتي جبيره خسرت بابا ارجع وكت ما الملم نفسي واحاول اتعلم تجيني ضربه ثانيه من امي وتعوفني وفوكاها تعوف ٣ بنات برگبتي شون تريدني ابقى طبيعيه
جان يرجع ليوره وكعد على الكرويته الخشب (القنفه) وسحبت الباكيت ورث جكاره ثانيه ودنج ايده على راسه بيها الجكاره وعيونه بلكاع ورجلي تتحرك من التوتر
تقربت اكثر منه وكعدت بلكاع گباله وكتله

اني تعبانه عمو والله اني بعدني صغيره على كل هذا اني هم اريد اعيش مثل البنات تدري ذاك اليوم بنيه بلمدرسه تعاركت ويه وحده تدري بشنو تهددها تكولها اله اجيبلج امي اطيح حظج تعرف من اشوف الامهات شون يجن على بناتهن بلمدرسه ويتعاركن ويه المدرسات لو يسألن عن مستوى بناتهن شكد انقهر لان اني محد يجي يسأل عني تدري اجتماع الاباء والامهات اني غبت بيومها لان ماعندي اب وام والست رادت تعاقبني لحد متجرأت وكتلها ماعندي امي ميته تعرف شون طلعت من حلكي امي ميته واني اعرف امي عايشه وعايفتنا

سجاد : رفع راسه وباوع عليها وكال
ليش تحسسيني امج جانت احسن ام ومكابلتكم وكاعده وتخاف عليكم من الهوا شو هي والماكو سوه
سليل : بس موجوده بس من انام اعرف امي نايمه بلغرفه الثانيه يجوز ممهتمه بينا بس تبقى امي اكول بلكت من اكبر افهمها اكثر واصير صديقتها جنت متألمه واكول لان صغيره ما اعرف احجي وياها واخاف منها يجوز من اكبر اعرف اتصرف واخليها تقربتي منها كافي اكل يوميه من ايدها جنت راضيه بلقليل عمو المهم ما احس نفسي يتيمه الام كافي علية خسرت بابا ردت اعوضه بأمي حتى لو مقصره بحقنا لهذا من عافتنا تخبلت ردت بس واحد يحس بيه ياخذني بحضنه ويكول حاس بيج وصرت انت كدامي وتذكرت كلامك الي اصلاً منسيته بيوم وحسيت روحي انت ومن منعتني وحسيتك مثلهم محاس بيه انهاريت وفقدت وردت اذكرك تره انت هم مثلي بس من ضربتني راشدي وعيتني بس بنفس الوقت من حسيت على نفسي شفت خراب ودمار واول دمار حسيته هو كرهك اليه جان يرفع راسه وكال

سجاد : منو كال اني اكرهج
سليل : لا تكرهني وحاقد علية
سجاد : لتحجين بكيفج ولو كارهج مااجي هسه من بيج مصخنه
سليل : من تصرفاتك ويايه حتى متباوع بوجهي
سجاد : شتريدين هسه من الاخير
سليل : دنجت والغصه بلعومي وكتله سامحني وارجع مثل قبل ويايه والله مااعيدها اعتذر عمو
سجاد : تعلمي لتسوين شى غلط حتى لتعتذرين وتحطين نفسج بمواقف محلوه هاي من النقاط المهمه حطيها بعقلج
سليل : رفعت راسي واشهك
سجاد : وكافي بجي شكد تصرفين دموع لخاطر ربج واني جم مره كايلج لتبجين ام دميعه
سليل : ابتسم والدموع بعيني وكتله حتى هاي اشتاقيت الها
سجاد : شنو الي اشتاقيتي اله
سليل : ام دميعه رغم اضوج منها جان يتقرب مني حيل وهمس اليه بنبره رجوليه هادئه بحيث ويه كل كلمة تطلع احس انفاسه تلامس وجهي وكال
سجاد : راح انسى الصار بس بشرط
سليل : شنو
سجاد : صيري قويه وكافي على كل موقف تبجين واياج بيوم تكسرين كلامي امشي صّـْْ(☑)ـْْحّ حتى ماازعل منج وراج طريق طويل وخواتج محتاجاتجً اريد من ازور ابوج افتخر بيج كدامه مو ابقى صافن او اكذب عليه اريد يكول تستاهل سليل من دخلت السجن علمودها عفت رجال يعتمد عليه مو بنيه

سليل : صار عمو
سجاد : كومي سويلي جاي راسي راح يطك شكد تلغين وتعوين
سليل : ابتسمت طفرت وكفت واركض ورجعت ليمه هم ركض تذكرت ورجعت وكفت فوك راسه هو كاعد واني واكفه وكتله يعني مزعلان مني
سجاد : لا بس بعد لتعيديها
سليل : دنجت بسته من خده وركضت
بيومها جانت بوسه فرح بنيه مراهقه متألمه ومكسوره حست بشخص هو امانها وابوها وعمها لهذا بسته بعفويه وطفوله وركضت للمطبخ

بعدين كلت اخاف عيب بس هااا ليش عيب هو عمي جان سجاد الوحيد الي اسمح يلمسني او اني مااخاف من المسه اما الباقين اي رجال يفوت من يمي بلشارع اطفر بعيد عنه اخاف يطخني
جنت دوم اكول هو احسن من عمي علي الي حتى مكلف نفسه ولو مره يسأل بنات اخوه وين مهما كان نبقى بنات اخوه اكلنا شربنا شصار بحالنا ابد وكأنه ميتين
كملت الجاي وطلعت الاستكان بيدي شفته صافن ويحرك بلجكاره حرك باوع عليه وكال اروح اني
سليل : والجاي
سجاد : اشربي انتي تأخرت لازم اروح ديري بالج على نفسج واقري زين عندج امتحانات شهريه اريد شهاده تبيض الوجهه
سليل : صار عمو
سجاد : تعالي سدي الباب ورايه طلعت وراه وراح

بوكتها حسيت براحه عجيبه هم من گلبي وانزاح ورجعت اكمز مكيفه غزوله نايمه بعمق وبيبي طالعه تودي خبز للناس خطيه جم مره كتلها علميني اني اخبز متقبل تكول اخاف عليج
الله ينطيها العافيه شايله الحمل ويايه

رجعت اداوم بس براحه اكثر من اول ايام ماعندي صديقات ولا اختلط بأحد حتى بلفرصه مرات اطلع ومرات ابقى كاعده بمكاني اطلع لفتي اكل
بهاي الفتره شعري بفضل بيبي طول خطيه تحير شتجيب من العطار وتحطلي يوم زيت جوز الهند ويوم زيت الخروع ويوميه زيت شكل الي ريحته طيبه والي لا وتحط لحاجبي ورموشي وشعري وكالت بس يدفه الجو احطلج حنه عليه لان جان الجو بارد كالت موزين على راسج خطيه كل متروح للسوك اعتبر اليوم عندي صالون بيبي تستلمني وذني كاعدات داير مدايري يردن يحطن مثلي
رموشي بدت تطلع حاجبي بين خلال شهرين ورجع وحتى ثخين وشعري يطول بطئ بس احسن من الاول اما وجهي شبه بدا يطيب اماكن جداً بسيطه حمار بيها
اما غزوله بدت اماكن تروح منها بس اكثر منطقه متضرره الرقبه والرجل اليمنى جانو حيل متأذايين لدرجه التشوه جنت دوم اشده الها حتى لتخاف او لتوكع على الحرك اخر مره اخذها عمو للدكتور كال وضعها يطول يله يشفى ياخذله سنين واكو مناطق مراح تشفى يبقى الاثر بيها وهذا الشى سببلي احباط بس مابيدي شى اغيره غير اعتني بيها واحطها بعيوني

ماما صار شهر ماكو بس مره اجه واحد من طرفها حجه ويه بيبي وانطاها ظرف بيه فلوس وراح خوش والله كامت امنا تعوضنا عن وجودها بظروف مهتميت لان اني اصلاً قررت اعتبرها مموجوده بحياتي
رجعت من المدرسه قريب مااوصل الباب شفت عمه نهر كعد ادكه ركضت عليها وحضنتها
نهر : هلا بلحسن كله شونج ياروح عمتج
سليل : الْحٍمَدٍ للـّہ عمه تعالي خلي انطب
دخلت ولكيت بيبي تسوي زلاطه خطيه متشوف كوه بستها واخذتها من ايدها
عوفيها بيبي بس اغسل واجي اسوي
ام سندس : يايمه انتي تعبانه ومكسور ظهرج على خياتج
سليل : ميخالف بيبي رحت غسلت وبدلت لبست دشداشه وشلت شعري وكعدت بلكاع التخته موجوده وكعدت اثرم وعمه وبيبي يسولفون
وبالي يمهم رغم صوتهم ناصي بس كعد اسمعهم

ام سندس : شبيج يمه نهر وضعج معاجبني نهر : لا خاله مابيه شويه تعبانه
ام سندس : يمه بلكت حبله وين الله وابا الحسن وتحبلين
نهر : نفخت بقهر
ام سندس : ياااا شبيج سولفي انه حسبت امج
نهر : والله ياخاله اذا مااحجي گلبي راح يطك وتعرفين ماعندي احد اشكيله وصار شهر وعقلي راح يوكف من التفكير
ام سندس : اسم الله شجاج يمه عمتج المسودنه قهرتج
نهر : والله عمتي بعد اغرب من رجلي
تصوري اطب واطلع متسالني ابد ولا بالها يمي بلعكس تكولي سلميلي وبراحتج
ام سندس : ياااا چا فوكاها عمي انتن ماتنحزرن المره حجت تسودنتي ما حجت هم تسودنتي
نهر : لا ياخاله مو هذا قصدي بس اني اكثر وحده تعرف ام سامي وتعرف سوالفها وهدوئها هذا مخوفني والي خوفني اكثر تصرفات رجلي
سندس : شجاه هذا
نهر : گلي لزمت شغل خفاره بعماره بلكراده حراسات شركه هندسيه اني وصديقي يوم هو ويوم اني وهاي صار اكثر من شهر يوم يبات يمي ويوم بره سألته ليش بين يوم ويوم كال هيج شغلنا صدكته وجنت ماافكر بشى لحد ما كام من يرجع مو سامي الاولي خاله
ام سندس : المره اكثر وحده تحس بزلمتها
نهر : واني كعد احس سامي متغير ومو لهفته الاوليه راح يصيرلي ٩ سنوات متزوجته واعرفه من يتنفس مو عاد مااعرف متغير لو لا

ام سندس : اخافن من الشغل والتعب والسهر هذا گله يكسر الظهر بنيتي
نهر : صحيح هم گلت هيج بس
ام سندس : شنهي كملي
نهر : حتى ميتقرب علي مو لهفته خاله هذا رجلي وحب عمري حتى من يطخني افرزن مشتاق لو لا واذا اكله تعبانه ولا يمه گبل يخاف من الهوا عليه گلبي يلعب يخاله
ام سندس : يمه انه مااخربن بيتج بس سالفه رجلج مو خاليه
نهر : اااااه يانار گلبي الله يستر والي بالي صحيح يمكن اطك واموت
ام سندس : يااا دخيلك ياعلي شنهي يمه شجاج اذكري الله ولاتخلين
الوسواس ياكل راسج الزمي زلمتج واكعدي وياه وكليله وحده اثنين تلاثه وخلي يفتح گلبه الج واذبحيها على قبله وياه حتى لا تتوجعين بنيتي
نهر : هو هم هيج لان حيل تعبت ومااكدر ابقى بهذا الوضع

سليل : انقهرت على عمه حيل ليش عمو سامي هيج وياها هو هم تغير بعدني افكر ودااكوم اشيل التخته والزلاطه جان اطب رشا وريم وريم اتذب كل دمعه شكبرها من عيونها وتشهك والضفاير نازله والشريط مال شعرها منزوع حاطه على رگبتها ركضت عليها ولج شبيج ويه منو متعاركه
رشا .. ويه جنات وحسين
سليل : شنو ممصدكه ولج ليش
ريم : صدك ماما بعد متجي ومتحبنا
سليل : نزلت بمستواها منو كلج
ريم : جنات تكول امج عافت ابوج وراح اتجيب نونه من ذاك وتحبه اكثر مني
نهر : شو تعالي عمه اكعدي بحضني وامسحي دموعج
سليل : اباوع شون تبجي انمرد گلبي
نهر : ليش جنات كالت هيج انتم مو صديقات
ريم : اني بعد ما احبه حقيره تحب بيبي انعال
سليل : عطت بيها بزهكه اريدها تبطل تصيح هيج جان تكوم تعيط وتشهك وتحجي
ريم : اي بيبي نعال وما احبها والله يذبها بلنار وياكلها الشيطان ويزوعها لان طعمها مطيب
نهر : ابتسمت بداخلي على عصبيتها وبستها كافي حبيبتي شبيهه بيبي انعام شجابها بلنص

رشا .. مو بيبي كايله لجنات لتلعبين وياهن ريم تعديج وتصيرين مثلها مبكعه ومحد يحبج بعد وهم لان امهن عافتهم اذا لعبتي وياهن راح اعوفج وحدج وهاي اجت تكول لريم بعد مالعب وياج حتى بيبي لتعوفني مثل معافتج امج وتكافشن
سليل : وحسين شجابه بلنص
رشا .. حسين راد يفاككهن لان من الشعر صارت بس ريم متحملت وجرت حسين من شعره ونومته بلكاع ودك كتل وجلاليق هو وجنات سوتهم طماطه
سليل : حسين شعليه شبيجً تخبلتي شنو
هاي الوكاحه
ريم : ثلل يدفع بيه ميعوفني اضربها
سليل : ولج شون يعوفج
ريم : ثلل اني اعدي ليش محد يحبني والجهال كلها تنهزم مني ما اريد هاي النجوم اخذوها ما احبها اريد ارجع مثل قبل بلا نجوم وكلها تحبني مو يخافون مني
سليل : اخذتها من حضن عمه وامسح بدموعها كافي ياعمر ثلل لتبجين اني احبج انتي ونجومج
ريم : بس جنات والجهال ميحبوني
سليل : لا جنات تحبج وهسه تصالحج
ريم : زاعلتها ومااحبها وحتى سحليه مااحبه
سليل : والله هذا سحليه قصدي حسين ابتلى بلوه بيج وفوكاها واكعتله دك المكرود وهو ساكت
ريم : خلي يولي ابو صماخ
سليل : كافي كل شويه مطلعه لقب عليه تره ازعل منج حسوني حباب وجنات هم واثنينهم يحبوج شو تعالي اشيلج ولج ولا بيه حيل اشيلج ثكلانه تعالي اغسلج ومن تتغدين نروح نشتري من ابو الدكان
ريم : تشتريلي
سليل : شتريدين تدللين
ريم : اريد مصاص ام العلج وحب شمس قمر وموطا ابو البسي
سليل : ياهو هذا
رشا .. قصدها فريزو بلببسي
ريم : اي فيزو
سليل : فريزو شكد تبلعين احرف صار تدللين بس كافي بجي عيونج راحت جان تلزم عيونها بقوه وين راحت
سليل : هههههه ولج قصدي يتأذون خبله
ريم : يله نروح نشتري
سليل : وره الاكل هسه ماكو
رشا .. واني هم اريد
جان تكوم عمه تلبس عبايتها
سليل : وين عمه
نهر : شويه واجيكم
سليل : حسيته مفوره جانت صافنه علينه وفجأه كامت

نهر : طلعت اركض لبيت امي اريد بس اوصل دفعت الباب لان همه بيهم طبيعه ميسدوه لكيتها كاعده بلمطبخ ومرت علي وجنات وحسين كاعدين يردون يصبون غدا جان توكف من شافتني
يعني بس فهميني انتي شنو من ياطينه حتى الجهال مخلصو منج
انعام : انجبي ساقطه شجابج علينا امشي طلعي من بيتي
نهر : هسه اني ميته على بيتج
ولا اشتري فلس احمر لا هو ولا البي انتم كلكم متهموني يعني مكافي طيحتي حظ ابوهن وحركتي بيتهن وهجولتيهن جايه تزرعين الكراهيه بين الجهال بس اريد افهم عزرائيل وين عنج ياخذ روحج ويخلصنا
انعام : بت الگلب بت القندره هاي عليمن جان تكمش الماعون وتركعه بأتجاهي وخرت مصار بيه بقيت اعيط فقدت كتلها وروح ابويه وتراب جعفر الماندري بيه كاع اذا متبتي من بنات طه لا اشهرج شهيره بكل المنطقه لا عبالج ناسيه السويتي قبل
انعام : انتي بت ابوج وسويها اله اشكج نصين ولج اني انعام زلم مشوربه دستهم برجلي تجين انتي بزر بطني تهدديني
نهر : كمت الطم على خدي متكوليلي شتردين مكافي خافي الله وراج اخره جم واحد مات الج وما اتعضتي حتى الموت ماتخافين منه
نوريه مرت علي : شبيج نهر تخبلتي اكلتينا اكل شجاج غير نفهم شبيج
نهر : امي والله حرامات اكول امي تحجي بعقل الزعاطيط ابنج وبت جعفر وتخلوهم يأذون ريم بت طه
نوريه : قابل شكالت
نهر : تكولها لجنات بكعه وعوفيها ولتتقربين منها تنعدين
نوريه : حقها اني من الناس جم مره منعت حسين منها بس هو ميتوب والله عاشت ايدها لعمتي
نهر : اي عيني هو منو رجلج اكيد من عاش قوم صار اخيس منهم وانتي صرتي من نفس المله ولكم مايعدي والله مايعدي خافو الله البنيه مالها احد بس ابنج وبت جعفر اصدقاء راح ادمرون نفسيتها

انعام : امشي اطلعي بره لا انعل شيب الخلفج والخلف طه وبته لكم جنات حسين اذا وصلتم يم ريم اكطع اذاناتكم
نهر : اااااخ شكول وشحجي بس حسبي الله ونعم الوكيل بيكم ناس متخاف الله الكم يوم
طلعت وجان اسمع امي تكول

انتي لو بيج حظ مجان رجلج تزوج عليج حسيت تيزاب وذبته على لحمي بحيث اريد اتنفس ماكو
ابتسمت بخوف وكتلها هو هذا الكادره عليه
تذبين تهايم على رجلي
انعام : باع هاي ياتهايم علي شافه نازل من عماره مرتين ومن سأل كالوله عريس متزوج جديد وحتى انطوه اسمه كرت عينج اتزوج عليج الي كسرتي كلمتي ودستي سمعتنا علموده مو هذا نفسه الي انهزمتي بتوالي الليل وخليتي اخوج الارعن يزوجج اله يله ارتاحي كسر راسج ونزل مره عليج جان تغمني امداج هاي تاليها الي يبيع اهله

نهر : اريد افتح حلكي واجاوبها مااكدر رجعت كالت تره شقته مو بعيده انطيج عنوانها وروحي الها بلخير عليه بلكت يجيبله ولد وتضلين هاي ضلتج حتى تعرفين الي يعاند انعام شنو تاليته
طلعت بدون حتى مااندار حسيت الشارع يروح ويجي بيه اريد اخرب الصدمه فاقت حيلي كله امشي واتذكر ضحكاتنا شقانا حبنا دلعنا غزلنا هذا كله راح وهاي السنين الخلصتها بحضنه واتمناله الرضا وعايشه خدامه جوه رجله ورجل اهله مالهم قيمه

دخلت لبيت عيالي صعدت حتى بدون مااسلم
سليل : راحت عمتي وتأخرت وره ساعه اندكت الباب فتحتها واباوع بيدها بقجه مال ملابس وجهه كركم وشفتها بيضه وعيونها دم من البجي شبيج عمه ادخلي
نهر : صيحيلي بيبيتج
سليل : تعالي ياعمه
نهر : صيحيها سليل
سليل : ركضت عليها وطلعت بيبي تركض
ام سندس : ها يمه وين رحتي شبيج شنهي حالج
نهر : ماعندي احد اروحله تستقبليني بيتج

يتبع ....

مساء الـ🥀ـورد لأحلى المتابعين ان شاء الله البارت القادم يكون يوم الاحد بلغتكم سابقاً راح اوقف القصه يومين الجمعه والسبت احترام لاربعينه الامام الحسين عليه السلام لهذا نشرت يومياً بدون توقف طول الاسبوع بسبب هذه اليومين
تحياتي لًلًـّــ💎ــجٌٓمٍَُٓيِّعَْٓ